Chanru taakʼaytesi aawibʼ saʼ junaq li akʼ chʼuut

Jalan bʼayaq li xeʼxkʼul laj Nicolas ut li xCéline xbʼaan naq li qamolam re Francia kixpatzʼ rehebʼ naq teʼqʼaxonq saʼ jalan chik li chʼuut. Li sumal aʼin naxye li xeʼxkʼul: «Saʼ xtiklajik jwal sa qachʼool abʼan moqon kichʼaʼajkoʼk chiqu xbʼaan naq inkʼaʼ naqilebʼ li qamiiw. Ut moko wanko ta saʼ tzʼaqal amiiwil rikʼinebʼ li hermaan re li chʼuut bʼarwiʼ xooqʼaxonk». Joʼkan naq, kʼaru truuq aatenqʼankil re xqʼaxbʼal ru ebʼ li chʼaʼajkilal ut xkʼaytesinkil aawibʼ saʼ li akʼ chʼuut? Kʼaru teʼruuq xbʼaanunkil ebʼ li hermaan? Ut kʼaru rusilal tatruuq xtawbʼal ut xkʼebʼal re li akʼ chʼuut?

KAAHIBʼ LI NAʼLEBʼ LI TATXTENQʼA

1. Kʼojobʼ aachʼool rikʼin li Jehobʼa (Sal. 37:5). Li xKazumi jun li hermaan re Japón kiwank chiru junmay chihabʼ saʼ jun ajwiʼ li chʼuut abʼan moqon xeʼxtaqla li xbʼeelom chi kʼanjelak saʼ jalan chik li teep. Kʼaru kixbʼaanu re xkʼebʼal li xyuʼam «rubʼel roq rubʼel ruqʼ li Qaawaʼ»? Li xKazumi naxye: «Xinte linchʼool chiru li Jehobʼa ut xinye re naq nawekʼa wibʼ injunes ut naq yook inxiw. Li Jehobʼa junelik kixkʼe li metzʼew li xʼajmank chiwu».

Kʼaru ttenqʼanq aawe re xkʼojobʼankil aachʼool rikʼin li Jehobʼa? Li qapaabʼal chanchan jun li uutzʼuʼuj li tento tqakʼe xhaʼul ut xbʼanol re naq tkʼiiq ut tkawuuq. Laj Nicolas, li xooʼaatinak wiʼ rubʼelaj kixnaʼlebʼa rix li xʼeetalil laj Abrahán, li Jesús ut laj Pablo, li naabʼal xeʼxbʼaanu re xbʼaanunkil li rajom li Jehobʼa. Ut aʼin kitenqʼank re laj Nicolas re rilbʼal naq li Jehobʼa junelik ttenqʼanq re. Xtzolbʼal li Santil Hu tatxtenqʼa naq tjalaaq laawanjik, taatzol ajwiʼ naabʼal li naʼlebʼ li taawoksi re xwaklesinkilebʼ xchʼool li hermaan re li akʼ chʼuut.

2. Maajuntaqʼeeta ebʼ li chʼuut (Ecl. 7:10). Laj Jules li nachalk Benín ut kiqʼaxonk Estados Unidos kixkʼe reetal naq jalan xwanjikebʼ li kristiʼaan. Aʼan naxye: «Nawekʼa naq tento tinseeraqʼi re yalaq ani li xinkʼul chaq saʼ linyuʼam». Saʼ xkʼabʼaʼ naq laj Jules moko kʼaynaq ta chi xbʼaanunkil, inkʼaʼ sa narekʼa ribʼ. Joʼkan naq inkʼaʼ chik naxjunaji ribʼ rikʼinebʼ li hermaan, aʼan naxye naq chixjunil kijalaak naq kiʼok xnawbʼal ru ebʼ li hermaan: «Xinkʼe reetal naq juntaqʼeeto, kaʼajwiʼ jalan wiʼ nokooʼaatinak. Tento tqakʼulubʼa ebʼ li junchʼol ut inkʼaʼ tqajal chanruhebʼ». Joʼkan naq maajuntaqʼeeta li akʼ chʼuut rikʼin li chʼuut bʼarwiʼ xatwank. Li xʼAnne-Lise jun li hermaan li nakʼamok bʼe saʼ li puktesink naxye: «Moko xinqʼaxonk ta saʼ jalan chik li naʼajej re naq juntaqʼeetaq linwanjik, xinqʼaxonk bʼan re xtzolbʼal jalan chik ebʼ li naʼlebʼ».

Ebʼ li cheekel winq ajwiʼ inkʼaʼ teʼxjuntaqʼeeta ebʼ li chʼuut. Maare jalan chanru nekeʼxbʼaanu wiibʼ oxibʼ li naʼlebʼ abʼan moko naraj ta xyeebʼal naq moko us ta nekeʼxbʼaanu. Us naq teenaw chiʼus kʼaʼut nabʼaanumank wiibʼ oxibʼ li naʼlebʼ naq toj maajiʼ teeye li nekeekʼoxla (Ecl. 3:​1, 7b). Jwal chaabʼil xkʼebʼal rehebʼ li junchʼol jun chaabʼil eetalil chiru xyeebʼal rehebʼ chanru teʼnaʼlebʼaq (2 Cor. 1:24).

3. Junaji aawibʼ rikʼinebʼ li junchʼol (Filip. 1:27). Yaal naq naʼajmank hoonal ut metzʼew re qʼaxonk saʼ jalan chik li teep abʼan aajel ru naq chalen saʼ xtiklajik tatwulaq saʼ li chʼutam re li akʼ chʼuut ut jwal us naq tatwulaq saʼ li Chʼutlebʼaal Kabʼl. Xbʼaan naq ebʼ li hermaan inkʼaʼ naru tateʼxtenqʼa wi maajunwa tateʼril. Li xLucinda naxye li kixbʼaanu aʼan ut ebʼ li xkoʼ naq xeʼqʼaxonk saʼ jalan chik li tenamit aran Sudáfrica, aʼan naxye: «Xqakʼe qachʼool re tzʼaqonk saʼ li kʼanjel re li chʼuut, elk chi puktesink rikʼin jalan jalanq li hermaan ut tzʼaqonk saʼebʼ li chʼutam. Joʼkan ajwiʼ xqayeechiʼi li qochoch re naq aran teʼxchʼutubʼ ribʼ ebʼ li hermaan naq teʼxik chi puktesink».

Wi nakaakʼe aachʼool re wank rikʼinebʼ li hermaan saʼ li kʼanjel re li chʼuut «inkʼaʼ teekanabʼ xpaabʼankil li chaabʼil esil». Ebʼ li cheekel winq xeʼxye re li xʼAnne-Lise, li xooʼaatinak wiʼ rubʼelaj, naq tixkʼe xchʼool chi puktesink rikʼin chixjunilebʼ. Aʼan naxye: «Xinkʼe reetal naq tento tinbʼaanu aʼin re naq tinjunaji wibʼ rikʼinebʼ li junchʼol». Wi laaʼat nakaayeechiʼi aawibʼ re tenqʼank saʼ li saabʼesink re li Chʼutlebʼaal Kabʼl, ebʼ li junchʼol teʼxkʼe reetal naq sa nakaawekʼa aawibʼ saʼ li chʼuut. Wi saʼ junpaat nakaajunaji aawibʼ rikʼinebʼ li hermaan, ebʼ aʼan sa teʼrekʼa ribʼ aawikʼin ut laaʼat taawilebʼ joʼ laajunkabʼal.

4. Sikʼebʼ aawamiiw (2 Cor. 6:​11-13). Li tatruuq xbʼaanunkil re naq teʼwanq aawamiiw, aʼan xkʼebʼal aachʼool chirixebʼ li junchʼol. Joʼkan naq, kʼe aahoonal re aatinak rikʼinebʼ li hermaan naq toj maajiʼ natiklaak li chʼutam ut naq ak xraqeʼk chik. Kʼe aachʼool re xjultikankil li xkʼabʼaʼebʼ. Wi sa nakat-aatinak rikʼinebʼ ut nakaakʼe aachʼool chirixebʼ, aʼanebʼ sa teʼrekʼa ribʼ aawikʼin ut teʼraj wank choʼq aawamiiw.

Maajal aanaʼlebʼ yal re naq ebʼ li junchʼol teʼraj wank aawikʼin. Kʼutbʼesi bʼan chanru tzʼaqal aanaʼlebʼ. Naru taabʼaanu joʼ li xLucinda, aʼan naxye: «Xqakʼe qachʼool re xbʼoqbʼalebʼ li hermaan saʼ qochoch ut xbʼaan aʼin anaqwan wankebʼ qamiiw».

«CHEEKʼULAQ EERIBʼ CHEERIBʼIL EERIBʼ CHI ANCHAL EECHʼOOL»

Choʼq re wiibʼ oxibʼ li hermaan chʼaʼaj xik saʼ junaq li chʼutam bʼarwiʼ inkʼaʼ nekeʼxnaw ru anihaq. Joʼkan naq, chanru tatruuq xtenqʼankil junaq li xqʼaxonk saʼ laachʼuut? Laj Pablo kixye: «Cheekʼulaq eeribʼ cheeribʼil eeribʼ chi anchal eechʼool joʼ naq li Kriist xexkʼul ajwiʼ chi anchal xchʼool» (Rom. 15:7). Ebʼ li cheekel winq naru teʼxkʼam rehebʼ rikʼin li Jesús ut teʼruuq xtenqʼankilebʼ li hermaan li tojeʼ xeʼqʼaxonk saʼ li chʼuut (chaawil li kaaxukuut «Kʼaru taabʼaanu re naq us tat-elq naq taajal aachʼuut»). Joʼkan ajwiʼ, chiqajunilo tooruuq xtenqʼankilebʼ li hermaan li tojeʼ xeʼqʼaxonk saʼ li chʼuut re naq sa teʼrekʼa ribʼebʼ.

Re naq sahaq qachʼool chi xkʼulbʼal li tojeʼ xeʼqʼaxonk saʼ li chʼuut naru tqabʼoqebʼ saʼ qochoch ut xtenqʼankilebʼ rikʼin li naʼajmank chiruhebʼ. Jun eetalil, jun li hermaan kixkʼe xhoonal re xkʼutbʼal re jun chik li hermaan li tojeʼ kiqʼaxonk chanru li tenamit ut kixye re chanru troksi li bus. Li hermaan li tojeʼ kiqʼaxonk kixye naq sa kirekʼa ribʼ ut naq kʼajoʼ kitenqʼaak xbʼaan li hermaan.

NARU TATKʼIIQ SAʼ LAAPAABʼAL

Maare yook aakʼaʼuxl malaj aaxiw wi yookat xkʼoxlankil qʼaxonk saʼ jun li akʼ chʼuut. Abʼan kʼoxla rix li eetalil aʼin: jun li chʼina tzʼik maare naxuwak chi rupupik abʼan naq inkʼaʼ chik yook xxiw, najt narupupik. Joʼkan ajwiʼ junaq li naqʼaxonk saʼ jun li akʼ chʼuut, maare yook xxiw abʼan naq inkʼaʼ chik yook xxiw nakʼiik saʼ li xpaabʼal ut saʼ li xkʼanjel chiru li Jehobʼa. Laj Nicolas ut li xCéline nekeʼxye: «Naabʼal nakaatzol naq nakatqʼaxonk saʼ junaq li akʼ chʼuut. Laaʼo xooruuk xkʼaytesinkil qibʼ rikʼinebʼ li junchʼol ut xbʼaan aʼin xqatzol naabʼal li chaabʼil naʼlebʼ li inkʼaʼ naqayuʼami chaq junxil». Laj Jean-Charles naxye li rusilal li kixtaw li xjunkabʼal: «Xjalbʼal li qachʼuut kixkawresi li xpaabʼal ebʼ li qakokʼal. Saʼ wiibʼ oxibʼ po linrabʼin kiʼok chi tzʼaqonk saʼ li kʼanjel li nabʼaanumank saʼ xyanq xamaan ut li walal kixaqʼabʼaak joʼ aj puktesinel li maajiʼ nakubʼeek xhaʼ».

Maare xbʼaan laawanjik inkʼaʼ nakatruuk qʼaxonk bʼarwiʼ naʼajmank li tenqʼ. Usta joʼkan yal aaqʼe re xbʼaanunkil wiibʼ oxibʼ li naʼlebʼ li natawmank saʼ li tzolom aʼin, chi joʼkan taawekʼa naq yookat xtikibʼankil wiʼ chik saʼ laachʼuut. Kʼojobʼ aachʼool rikʼin li Jehobʼa, maakanabʼ kʼanjelak rikʼinebʼ li hermaan re laachʼuut saʼ li puktesink ut kawresi laaʼamiiwil rikʼinebʼ li hermaan. Ma wank kʼaru tatruuq xbʼaanunkil re xtenqʼankilebʼ li hermaan li tojeʼ xeʼqʼaxonk saʼ laachʼuut? Xbʼaanunkil aʼin tatxtenqʼa re xkawresinkil laapaabʼal xbʼaan naq li rahok aʼan li naxkʼutbʼesi anihebʼ li tzʼaqal aj paabʼanel (Juan 13:35). Chʼolchʼooq chaawu naq «ebʼ li mayej aʼin qʼaxal nawulak chiru li Yos» (Heb. 13:16).

Naabʼalebʼ li hermaan xeʼkʼayk saʼ jalan chik li chʼuut ut sahebʼ saʼ xchʼool usta wank kʼaru nachʼaʼajkoʼk chiruhebʼ. Laaʼat ajwiʼ tatruuq xbʼaanunkil! Li xʼAnne-Lise naxye: «Qʼaxonk saʼ jalan chik li chʼuut kitenqʼank we re naq tinkʼojobʼ inchʼool rikʼinebʼ li hermaan». Li xKazumi naxye naq «qʼaxonk saʼ jalan chik li chʼuut naxbʼaanu naq taakʼe reetal chanru li Jehobʼa nakatxtenqʼa joʼ maajunwa xaakʼoxla». Ut laj Jules naxye: «Xintaw naabʼalebʼ li wamiiw ut inkʼaʼ chik nawekʼa naq wankin injunes. Jwal sa nawekʼa wibʼ saʼ linchʼuut ut chʼolchʼo naq tchʼaʼajkoʼq chiwu xkanabʼankil».