Chanru nokooxkol li xkamik li Jesús?
Li naxsume li Santil Hu
Li xkamik li Jesús aʼan li kiroksi li Yos re qakolbʼal chiru li maak ut li kamk. Li Santil Hu naxye naq li xkikʼel li Jesús kiʼoksimank re xtojbʼal rix li qakolbʼal (Efesios 1:7; 1 Pedro 1:18, 19). Li Jesús kixye naq kikʼulunk «re xkʼeebʼal li xyuʼam re xkolbʼalebʼ rix chixjunilebʼ» (Mateo 20:28, Li Santil Hu, Sociedad Bíblica de Guatemala, SBG).
Kʼaʼut kiʼajmank «xkolbʼalebʼ rix chixjunilebʼ»?
Laj Adán, li xbʼeen winq li kixyobʼtesi li Yos tzʼaqal re ru xyuʼam ut maakʼaʼ xmaak. Kiyeemank ajwiʼ re naq truuq wanq xyuʼam chi junelik abʼan kixtzʼeq aʼin naq kixqʼet ribʼ chiru li Yos (Génesis 3:17-19). Ebʼ li ralal xkʼajol laj Adán keʼrechani li maak (Romanos 5:12). Joʼkan naq, li Santil Hu naxye naq laj Adán kixkʼayi ribʼ ut kixkʼayi ebʼ li ralal xkʼajol chiru li maak ut li kamk (Romanos 7:14). Maaʼani truuq xtawbʼal wiʼ chik li kixtzʼeq laj Adán xbʼaan naq chiqajunilo aj maak (Salmo 49:8, 9).
Li Yos kiruxtaana ruhebʼ li ralal xkʼajol laj Adán xbʼaan naq maakʼaʼ chik roybʼenihomebʼ (Juan 3:16). Saʼ xkʼabʼaʼ li xtiikilal xchʼool li Yos moko kiruuk ta xkuybʼal ut xsachbʼalebʼ li xmaak yal chi maakʼaʼ xyaalal (Salmo 89:15; Romanos 3:23-26). Xbʼaan naq naxra ebʼ li qas qiitzʼin, li Yos kixxaqabʼ jun li naʼlebʼ moko kaʼaj tawiʼ re xsachbʼal ut xkuybʼalebʼ xmaak, re risinkil bʼan chi junajwa (Romanos 5:6-8). Li naʼlebʼ li kixxaqabʼ aʼan li xkamik li Jesús re qakolbʼal.
Kʼaru naʼokenk saʼ li qakolbʼal?
Naq li Santil Hu naʼaatinak chirix li aatin kolok naʼokenk li oxibʼ chi naʼlebʼ aʼin:
Li xtzʼaq li natojmank (Números 3:46, 47).
Chi joʼkan nakoleʼk junaq malaj natawmank wiʼ chik li xsachmank (Éxodo 21:30).
Juntaqʼeet li xtzʼaq rikʼin li natojeʼk.a
Qakʼehaq reetal chanru naxchap ribʼ ebʼ li naʼlebʼ aʼin rikʼin li xkamik li Jesús.
Li xtzʼaq li natojmank. Li Santil Hu naxye chirixebʼ laj paabʼanel: «Loqʼbʼilex chi terto eetzʼaq» (1 Corintios 6:20, SBG; 7:23). Li xtzʼaq aʼan li xkikʼel li Jesús, rikʼin aʼin kixloqʼebʼ «choʼq re li Yos saʼ xyanq chixjunilebʼ li xteepal ut xtenamit li ruuchichʼochʼ, yalaq chanru nekeʼilok ut nekeʼaatinak» (Apocalipsis 5:8, 9, SBG).
Li qakolbʼal. Li xkamik li Jesús nokooxkol chiru li maak (1 Corintios 1:30; Colosenses 1:14; Hebreos 9:15).
Juntaqʼeet xtzʼaq. Li yuʼam li kixqʼaxtesi li Jesús juntaqʼeet xtzʼaq rikʼin li yuʼam li tzʼaqal re ru li kixtzʼeq laj Adán (1 Corintios 15:21, 22, 45, 46). Li Santil Hu naxye: «Xbʼaan li xqʼetbʼa aatin jun chi winq [laj Adán] keʼkanaak choʼq aj maak chixjunilebʼ; joʼkan ajwiʼ, rikʼin naq kipaabʼank li jun chi winq [li Jesukriist], naabʼalebʼ teʼkanaaq choʼq tiikebʼ xchʼool» (Romanos 5:19, SBG). Aʼin naxchʼolobʼ chi tzʼaqal re ru kʼaʼut li xkamik jun li winq nakʼanjelak re xkolbʼal naabʼalebʼ li qas qiitzʼin li wankebʼ xmaak. Li Jesús «kixqʼaxtesi ribʼ re qakolbʼal chiqajunilo» wi naqabʼaanu chixjunil li naʼajmank re xtawbʼal li rusilal (1 Timoteo 2:5, 6, SBG).
a Saʼ li aatinobʼaal li kitzʼiibʼamank wiʼ chaq li Santil Hu saʼ xtiklajik, li aatin «kolok» naraj xyeebʼal li xtzʼaq li natojmank re xloqʼbʼal junaq li kʼaʼaq re ru. Jun eetalil, saʼ hebreo li aatin kafár naraj xyeebʼal «tzʼapok» (Génesis 6:14). Rajlal naʼoksimank aʼin naq naʼuxmank aatinak chirix xtzʼapbʼal jun li maak (Salmo 65:4). Li aatin kófer naʼaatinak chirix xtojbʼal junaq li kʼaʼaq re ru re xtawbʼal wiʼ chik (Éxodo 21:30). Joʼkan ajwiʼ li aatin saʼ griego lýtron li najalmank ru joʼ «kolok» naʼaatinak chirix «xtojbʼal rix li xmaakebʼ chixjunilebʼ» (Mateo 20:28, Li Santil Hu, Wycliffe Bible Translators. Akʼ tzʼiibʼ). Ebʼ li keʼtzʼiibʼank chaq saʼ griego keʼroksi li aatin aʼin naq keʼaatinak chirix xkolbʼal jun li soldaad li kichapeʼk chaq saʼ li yalok u malaj re naq t-achʼabʼaaq jun li loqʼbʼil moos.