Tzolom 4

Ani laj Tza?

Bʼar kichalk chaq laj Tza? (1,2)

Chanru nabʼalaqʼik laj Tza? (3-7)

Kʼaʼut inkʼaʼ taabʼaanu li naraj laj Tza? (7)

1. Laj Tza jwal xikʼ naril li Yos ut aj yoobʼanel tikʼtiʼ. Naq kitikla chaq xyuʼam li aanjel aʼin, chaabʼil ut tzʼaqal re ru xyuʼam ut kiwank saʼ choxa rikʼin li Yos. Abʼan kixjal xkʼaʼuxl xbʼaan naq kiraj naq tloqʼoniiq ru. Kaʼajwiʼ li Yos wank xkʼulubʼ re naq tqaloqʼoni ru (Mateo 4:8-10).

2. Laj Tza kiroksi jun li kʼantiʼ re xbʼalaqʼinkil xEva ut chi joʼkan li ixq kixqʼet xchaqʼrabʼ li Yos. Laj Tza kixye naq li Yos inkʼaʼ truuq xjolominkil chiʼus li xtenamit ut chi joʼkan kixmaajewa li xʼAwabʼejilal li Jehobʼa. Kixye ajwiʼ naq maajun rehebʼ li qas qiitzʼin tiikaq xchʼool chiru li Yos. Naq kixbʼaanu ut kixye aʼin kisutqʼi choʼq aj Tza (Génesis 3:1-5; Job 1:8-11; Apocalipsis 12:9).

3. Laj Tza naxyal xbʼalaqʼinkilebʼ li poyanam re naq tloqʼoniiq ru (2 Corintios 11:3, 14). Li bʼalaqʼil paabʼal aʼan jun rehebʼ li naʼlebʼ li naroksi laj Tza. Wi junaq li paabʼal naxkʼut li tikʼtiʼ chirix li Yos, yook chi xbʼaanunkil li naraj laj Tza (Juan 8:44). Li wankebʼ saʼ li bʼalaqʼil paabʼal nekeʼxkʼoxla naq yookebʼ chi xloqʼoninkil ru li Yos, abʼan yookebʼ chi xloqʼoninkil laj Tza, li ‹xyosil li ruuchichʼochʼ› (2 Corintios 4:4).

4. Laj Tza naroksi ajwiʼ chixjunil li xkʼanjel aj qʼe malaj ebʼ aj tuul re naq ebʼ li poyanam wanqebʼ rubʼel xwankil. Joʼkan naq wankebʼ nekeʼxpatzʼ xtenqʼankil rehebʼ li musiqʼej re xbʼaanunkil li maaʼusilal, re xqʼehinkil ru li kutan chaalel malaj re xbʼaanunkil li sachbʼachʼoolej. Chixjunil aʼin wank rubʼel xwankil laj Tza. Wi naqaj xsahobʼresinkil xchʼool li Yos, maajunwa tqabʼaanu ebʼ li yiibʼ ru aj naʼlebʼ aʼin (Deuteronomio 18:10-12; Hechos 19:18, 19).

5. Wankebʼ nekeʼxnimobʼresi ribʼebʼ xbʼaan naq nekeʼxkʼoxla naq li xtenamitebʼ jwal chaabʼil chiruhebʼ jalan chik tenamit. Abʼan aʼin moko yaal ta (Hechos 10:34, 35). Wankebʼ ajwiʼ nekeʼxloqʼoni ebʼ li molam li nekeʼbʼeeresink re xnaʼlebʼ li awabʼej. Naabʼalebʼ nekeʼxkʼoxla naq ebʼ li molam aʼin teʼxtuqubʼ ru li xchʼaʼajkilal li ruuchichʼochʼ. Chi joʼkan nekeʼxtzʼeqtaana li xNimajwal Awabʼejilal li Yos. Abʼan kaʼajwiʼ li xʼAwabʼejilal li Yos ttuqubʼanq re chixjunil li qachʼaʼajkilal (Daniel 2:44).

6. Laj Tza naxbʼaanu ajwiʼ naq ebʼ li poyanam teʼxra ru li maakobʼk. Li Jehobʼa naxye qe naq inkʼaʼ toomaakobʼq xbʼaan naq naxnaw naq ebʼ li yiibʼ ru aj naʼlebʼ aʼin tooxkʼe saʼ rahilal (Gálatas 6:7, 8). Mare wankebʼ teʼraj naq taabʼaanu li inkʼaʼ us. Abʼan chaajultika naq laj Tza naraj naq taabʼaanu aʼin (1 Corintios 6:9, 10; 15:33).

7. Laj Tza naru naxbʼaanu naq xikʼ taateʼril malaj taateʼrahobʼtesi re naq taatzʼeqtaana li Jehobʼa. Wi yookat xtzolbʼal li naxkʼut li Santil Hu, mare taateʼxseʼe malaj teʼpoʼq aawikʼin ebʼ laakomon malaj ebʼ laawamiiw. Abʼan kʼoxla aʼin, ani xkʼehok chaq re laayuʼam? Chaakʼe reetal naq laj Tza naraj aasebʼesinkil re naq inkʼaʼ chik tattzoloq chirix li Jehobʼa. Abʼan, mat-abʼink chiru (Mateo 10:34-39; 1 Pedro 5:8, 9). Wi inkʼaʼ nakaabʼaanu li naraj laj Tza, taasahobʼresi xchʼool li Jehobʼa, ut taakʼutbʼesi naq taawaj naq li Yos t-awabʼejinq (Proverbios 27:11).

[Ebʼ li jalam u re li perel 9]

Laj Tza naroksi li bʼalaqʼil paabʼal, li xkʼanjel aj qʼe ut li xloqʼoninkil ru li tenamit re xbʼalaqʼinkilebʼ li poyanam

[Li jalam u re li perel 9]

Wi inkʼaʼ taakanabʼ tzolok chirix li Jehobʼa, inkʼaʼ ajwiʼ taabʼaanu li naraj laj Tza