Tzolom 9

Anihebʼ li ramiiw li Yos?

Li Jesukriist ralal li Jehobʼa ut tzʼaqal ramiiw. Naq toj majiʼ nayoʼla li Jesus saʼ Ruuchichʼochʼ, ak yoʼyo chaq saʼ choxa joʼ musiqʼej ut nim xwankil (Juan 17:5). Naq kichalk saʼ Ruuchichʼochʼ kixkʼut li yaal chirix li Yos (Juan 18:37). Kixkʼe xchʼochʼil yuʼam saʼ xkʼabʼaʼebʼ li nekeʼpaabʼank, re xkolbʼalebʼ chiru li maak ut li kamk (Romanos 6:23). Anaqwan li Jesus Awabʼej saʼ li xNimajwal Awabʼejilal li Yos. Li choxahil awabʼejilal aʼin tixyiibʼ li Ruuchichʼochʼ choʼq Sahilal Naʼajej (Apocalipsis 19:16).

Ebʼ li anjel ramiiwebʼ li Yos ajwiʼ. Ebʼ li anjel moko keʼyoobʼtesiik ta joʼ winq saʼ li Ruuchichʼochʼ. Keʼyoobʼtesiik saʼ choxa naq toj majiʼ naxyiibʼ li Yos li Ruuchichʼochʼ (Job 38:4-7). Kʼajoʼ xkʼihal ebʼ li anjel (Daniel 7:10). Ebʼ li choxahil ramiiw li Yos aʼin, nekeʼraj naq tqatzol li yaal chirix li Jehobʼa (Apocalipsis 14:6, 7).

Saʼ li Ruuchichʼochʼ wank ajwiʼ ramiiw li Yos ut naxkʼabʼaʼiʼebʼ xtestiiw. Naq wank jun li testiiw chiru li raqlebʼaal aatin naxye li naxnaw chirix anihaq malaj kʼaruhaq. Ebʼ laj testiiw re li Jehobʼa nekeʼaatinak ajwiʼ chirix li Jehobʼa ut chirix li Rajom (Isaías 43:10). Joʼebʼ li anjel, ebʼ laj Testiiw nekeʼraj ajwiʼ aatenqʼankil re naq taatzol li yaal chirix li Jehobʼa ut re naq tatwanq choʼq ramiiw li Yos.