Chattenqʼanq re naq wanq li junajil saʼ li chʼuut

Naq wanko rochbʼenebʼ li qechpaabʼanel naqekʼa qibʼ joʼ li awabʼej David naq kixye: «Kʼehomaq reetal: kʼajoʼ xloqʼal, makachʼin xchʼinaʼusal naq wankebʼ laj paabʼanel saʼ junajil!» (Salmo 133:1). Moko yal ta chi joʼkan nachalk li junajil tento naq chiqajunilo tqayal qaqʼe chi xtawbʼal aʼin.

1. Kʼaru li naʼlebʼ naʼilmank saʼ xyanq li xtenamit li Jehobʼa?

Wi tatxik saʼ jalan chik li tenamit maare inkʼaʼ taataw ru li aatinobʼaal abʼan sa taawekʼa aawibʼ. Kʼaʼut? Xbʼaan naq maakʼaʼ naxye bʼar wanqat ebʼ laj Testiiw moko jalan ta li hu nekeʼxtzol. Ut naqayal qaqʼe chi xraabʼal qibʼ chiqibʼil qibʼ. Maakʼaʼ naxye bʼar wanko chiqajunilo naru naqayaabʼa li «xkʼabʼaʼ li Qaawaʼ» ut naqaloqʼoni ru chi junaj ru qachʼool (Sofonías 3:9).

2. Kʼaru taabʼaanu re naq junelik wanq li junajil saʼ li chʼuut?

«Cherahaq eeribʼ chi saqaq ru leechʼool» (1 Pedro 1:22). Chanru taayuʼami li naʼlebʼ aʼin? Maakʼe aachʼool chirix li xpaltilebʼ, kʼe bʼan aachʼool chirix li xchaabʼil bʼaanuhomebʼ. Moko kaʼaj tawiʼ twochbʼenihebʼ li nekeʼnaʼlebʼak joʼ laaʼat, yal bʼan aaqʼe chi xnawbʼal ru junaq li jalan xtenamit malaj xwanjik. Michʼ saʼ laachʼool li xikʼ ilok (yaabʼasi 1 Pedro 2:17).a

3. Kʼaru taabʼaanu naq wanq aachʼaʼajkilal rikʼin junaq laawech aj paabʼanel?

Yaal naq wanko saʼ junajil abʼan xbʼaan naq laaʼo aj maak naqatochʼ qachʼool chiqibʼil qibʼ. Joʼkan naq li Santil Hu naxye: «Meekanabʼ [...] xkuybʼal eemaak chi anchal eechʼool chiribʼil eeribʼ [...]. Joʼ naq li Jehobʼa kixkuy eemaak chi anchal xchʼool, joʼkan ajwiʼ bʼaanuhomaq laaʼex» (yaabʼasi Colosenses 3:13, TNM). Junelik naqatochʼ xchʼool li Jehobʼa abʼan aʼan naxkuy li qamaak. Joʼkan naq naroybʼeni naq tqakuyebʼ xmaak li qech aj paabʼanel. Wi xaakʼe reetal naq xaatochʼ xchʼool laawech aj paabʼanel, sikʼ chanru xtuqubʼankil ru li chʼaʼajkilal (yaabʼasi Mateo 5:23, 24).b

QASIKʼAQ XCHAMAL LI NAʼLEBʼ

4. Qʼax ru li xikʼ ilok

Naqaj xraabʼal chixjunilebʼ li qahermaan. Abʼan maare nachʼaʼajkoʼk chiqu xkʼulubʼankilebʼ li jalanebʼ chiqu, kʼaru tawiʼ ttenqʼanq qe? Cheeyaabʼasi Hechos 10:34, 35 ut chexʼaatinaq chirix ebʼ li patzʼom aʼin:

• Li Jehobʼa naxkʼulebʼ chixjunil li kristiʼaan re naq teʼwanq choʼq xTestiiw maakʼaʼ naxye kʼaru xtenamitebʼ. Naq nakaawabʼi aʼin, chanru taawilebʼ li jalanebʼ chaawu?

• Kʼaru li xikʼ ilok wank saʼ laateep? Kʼaʼut naq inkʼaʼ taayuʼami aʼan laaʼat?

Cheeyaabʼasi 2 Corintios 6:11-13 ut chexʼaatinaq chirix li patzʼom aʼin:

• Kʼaru tatruuq xbʼaanunkil re naq qʼaxal taarahebʼ laawech aj paabʼanel?

5. Chatkuyuq maak chi anchal aachʼool ut chaasikʼ li tuqtuukilal

Usta laaʼo maajunwa tqakuy xmaak li Jehobʼa, aʼan naxkuy qamaak chi anchal xchʼool. Cheeyaabʼasi Salmo 86:5 ut chexʼaatinaq chirix ebʼ li patzʼom aʼin:

• Kʼaru naxkʼut chiqu li raqal aʼin chirix chanru nakuyuk maak li Jehobʼa?

• Ma nakaabʼanyoxi naq li Jehobʼa naxkuy aamaak? Kʼaʼut?

• Joqʼe naru nachʼaʼajkoʼk chiqu xkʼambʼal qibʼ saʼ usilal rikʼinebʼ li junchʼol?

Wi naqaj naq junelik toowanq saʼ junajil rikʼinebʼ li qech aj paabʼanel, kʼaʼut tento tqakʼam qe rikʼin li Jehobʼa? Cheeyaabʼasi Proverbios 19:11 ut chexʼaatinaq chirix li patzʼom aʼin:

• Wi junaq li kristiʼaan naxbʼaanu junaq li naʼlebʼ li naxbʼor aawix, kʼaru taabʼaanu re wanq saʼ tuqtuukilal?

Wank sut laaʼo naqatochʼ xchʼoolebʼ li qahermaan, wi joʼkan raj tqakʼul, kʼaru raj tqabʼaanu? Cheerilaq BʼIDEO ut chexʼaatinaq chirix li patzʼom aʼin:

BʼIDEO: Li rusilal li naxkʼam chaq xsikʼbʼal li tuqtuukilal (6:01)

• Kʼaru kixbʼaanu li hermaan re wank saʼ tuqtuukilal?

6. Kʼe reetal li xchaabʼil bʼaanuhom laawech aj paabʼanel

Naq naqanawebʼ ru chiʼus li qahermaan moko kaʼaj tawiʼ naqil li xchaabʼilal, naqil ajwiʼ li xpaltil. Kʼaru tqabʼaanu re xkʼebʼal qachʼool chirix li xchaabʼil bʼaanuhom? Cheerilaq li BʼIDEO ut chexʼaatinaq chirix li patzʼom aʼin:

BʼIDEO: Jwal chʼinaʼusaq wiʼ chik laanaʼlebʼ! (5:10)

• Kʼaru ttenqʼanq aawe re naq taawil li xchaabʼil naʼlebʼ ebʼ laawech aj paabʼanel?

Li Jehobʼa naxkʼe xchʼool chirix li xchaabʼilal li qanaʼlebʼ. Cheeyaabʼasi 2 Crónicas 16:9a ut chexʼaatinaq chirix li patzʼom aʼin:

• Kʼaru nakaawekʼa naq nakaanaw naq li Jehobʼa naxkʼe xchʼool chirix li xchaabʼilal laanaʼlebʼ?

LI AK XQATZOL

Wi nakaakuyebʼ xmaak ebʼ li hermaan ut nakaakʼutbʼesi naq nakaarahebʼ, tat-okenq re naq wanq li tuqtuukilal saʼ li chʼuut.

Qajultikaq

• Kʼaru tatruuq xbʼaanunkil re xqʼaxbʼal ru li xikʼ ilok?

• Kʼaru taabʼaanu naq wanq aachʼaʼajkilal rikʼin junaq laawech aj paabʼanel?

• Kʼaʼut naq taawaj xkuybʼal xmaak ebʼ li junchʼol joʼ naxbʼaanu li Jehobʼa?

SIKʼ XKOMON LI NAʼLEBʼ

Kʼe reetal kʼaru eetalil kiroksi li Jesús re naq inkʼaʼ tooraqoq aatin saʼ xbʼeenebʼ li junchʼol.

Isi li tzʼambʼa saʼ laawu! (6:56)

Ma tento tqapatzʼ xkuybʼal qamaak wi moko laaʼo ta xoopaltoʼk?

«Xpatzʼbʼal xkuybʼal aamaak naxkʼam chaq li tuqtuukilal» (Laj Kʼaakʼalehom, 1 re noviembre 2002)

Kʼe reetal kʼaru xeʼxbʼaanu wiibʼ oxibʼ li qas qiitzʼin re naq inkʼa teʼsikʼoq u.

Mooraqok aatin aʼ yaal chanru naqilebʼ (5:06)

Tzol chanru tatruuq xtuqubʼankil ru ebʼ li chʼaʼajkilal re naq wanq li tuqtuukilal saʼ li chʼuut.

«Qatuqubʼaq ru ebʼ li chʼaʼajkilal rikʼin rahok» (Laj Kʼaakʼalehom, mayo 2016)