Li Jw.org Nakʼanjelak re Xtzolbʼalebʼ li Kokʼal
1. Kʼaru aj e naq kikʼuubʼamank li jw.org bʼarwiʼ naxye: «Niños»?
1 Li jw.org kʼuubʼanbʼil re naq yalaq ani t-oksinq re ut moko toj sikʼbʼil ta ru li xchihabʼ junaq li poyanam. Jun li eetalil chirix aʼin, li naʼlebʼ li naxye: «Niños», (sikʼ Enseñanzas bíblicas > Niños). Li naʼlebʼ aʼin nakʼanjelak re naq ebʼ li yuwaʼbʼej ut ebʼ li xkokʼal teʼxtzol wank saʼ junajil ut teʼwanq chixkʼatq li Jehobʼa (Deut. 6:6, 7). Ut laaʼat, chanru tatruuq roksinkil li jw.org re xtzolbʼalebʼ laakokʼal?
2. Chanru xnawbʼal kʼaru li naʼlebʼ aajel ru choʼq re li junjunq chi kokʼal?
2 Chaanaw Taqlank: Moko juntaqʼeetebʼ ta chixjunilebʼ li kokʼal (1 Cor. 13:11). Joʼkan bʼiʼ, chanru xnawbʼal kʼaru li naʼlebʼ aajel ru choʼq re li junjunq. Joʼkan naq us xkʼeebʼal reetal kʼaru xchihabʼ li junjunq ut kʼaru nawulak chiru. Ut us ajwiʼ xkʼoxlankil, joʼnimal tixtaw ru ut ma inkʼaʼ ttitzʼq saʼ junpaat chi tzolok? Saʼ li jw.org bʼarwiʼ naxye: «Mis primeras lecciones de la Biblia» nakʼanjelak choʼq aj oxibʼ chihabʼ malaj li toj maajiʼ nekeʼxbʼaanu oxibʼ. Ut li naʼlebʼ: «De padres a hijos», jwal chʼinaʼus roksinkil ut ebʼ li kokʼal inkʼaʼ nekeʼtitzʼk. Abʼan qilaq kʼaru chik li naʼlebʼ tatruuq roksinkil.
3. Chanru teʼruuq li naʼbʼej yuwaʼbʼej xtawbʼal rusilal ebʼ li naʼlebʼ ut ebʼ li kʼanjel li wank saʼ «Ideas para la adoración en familia»?
3 Ebʼ li Naʼlebʼ re Xloqʼoninkil li Yos saʼ Junajil joʼ Junkabʼal: Arin wank naabʼal li naʼlebʼ choʼq rehebʼ li nekeʼjolomink re li junkabʼal. Ut re xtawbʼal rusilal ebʼ li naʼlebʼ ut xbʼaanunkil ebʼ li kʼanjel li wank aran, taapitzʼ «Descargar», ut taawil bʼarwiʼ naxye «Guía para los padres». Ut choʼq rehebʼ li toj kachʼinebʼ us roksinkil ebʼ li kʼanjel bʼarwiʼ wank ebʼ li eetalil ut ebʼ li eetalil li naraj bʼoneʼk. Ut li ak yuʼyuukebʼ naru xtenqʼankilebʼ re naq teʼxtzʼil rix junaq li kʼanjel. Chixjunil li kʼanjel li wank saʼ «Guía para los padres» naʼaatinak ajwiʼ chirix li naʼlebʼ li ak yook chi tzolmank. Ut chi joʼkan chixjunilebʼ li wankebʼ saʼ li junkabʼal teʼruuq chi tzʼaqonq.
4. Kʼaru wank saʼ li naʼlebʼ «Hazte amigo de Jehová»?
4 Chatwanq choqʼ Ramiiw li Jehobʼa: Chixjunil ebʼ li video, ebʼ li bʼich ut ebʼ li kʼanjel li wank saʼ jw.org naxtenqʼahebʼ li yuwaʼbʼej chi xkʼutbʼal li Santil Hu chiruhebʼ li xkokʼal (Deut. 31:12). Ebʼ li video bʼarwiʼ nekeʼeekʼank ebʼ li jalam u naxkanabʼ naabʼal li naʼlebʼ rehebʼ li kokʼal, ut ebʼ li kʼanjel li wank ajwiʼ aran naxchʼolobʼ wiʼ chik ebʼ li naʼlebʼ aʼin chiruhebʼ. Saʼ xkʼabʼaʼ naq naabʼalebʼ li kokʼal nekeʼwulak chiru bʼichank, ebʼ li bʼich nakʼanjelak chiruhebʼ re naq teʼxjultika li ak xeʼxtzol. Ut saʼ li naʼaj aʼin nakʼeemank ajwiʼ li bʼich re xloqʼoninkil li Jehobʼa ut xbʼichebʼ li kokʼal.
5. Kʼaʼut ebʼ li naʼbʼej yuwaʼbʼej inkʼaʼ teʼkʼoxlaq xtzʼaamankil re li Jehobʼa xnaʼlebʼebʼ?
5 Ex naʼbʼej yuwaʼbʼej, li Jehobʼa naraj naq teenaw ut texruuq xkʼutbʼal li yaal chiruhebʼ leekokʼal. Joʼkan naq, mexkʼoxlak chi xtzʼaamankil re li Jehobʼa eenaʼlebʼ ut eetenqʼankil (Juec. 13:8). Ut chi joʼkan texruuq xtenqʼankilebʼ chi xtawbʼal xnaʼlebʼebʼ chirix «li kolbʼa ibʼ saʼ xkʼabʼaʼ xpaabʼankil li Kristo Jesus» (2 Tim. 3:15; Prov. 4:1-4).