Qoqsihaq jw.org saʼ li puktesink: «Chatwanq choʼq ramiiw li Jehobʼa»
Saʼ jw.org bʼarwiʼ naxye «Jalan jalanq li tasal hu» taataw ebʼ li bʼideo choʼq rehebʼ li kokʼal li naxkʼabʼaʼi «Chatwanq choʼq ramiiw li Jehobʼa». (Ut saʼ kaxlan aatin taataw ebʼ li bʼideo, ebʼ li bʼich ut ebʼ li chʼinaʼusil kʼanjel.) Ma ak xqoksi ebʼ li bʼideo aʼin saʼ li puktesink? Wi junaq rehebʼ li qatzolom wank xkokʼal, us raj naq tqakʼut chiru ebʼ li bʼideo. Maare rikʼin xbʼaanunkil aʼin, t-alaaq saʼ xchʼool xsikʼbʼal jalan chik li naʼlebʼ saʼ li qanaʼaj saʼ Internet.
Naq jun laj puktesinel winq kixkʼe li hu Resil li Xʼawabʼejilal li Yos ajl 38 re jun li ixq li wank xkokʼal, li ixq aʼin saʼ junpaat kiʼok rilbʼal saʼ li hu. Ebʼ li kokʼal keʼraj ajwiʼ xnawbʼal kʼaru naxye li hu. Tojaʼ naq li hermaan kixchʼolobʼ chiruhebʼ li kokʼal chirix kʼaru yook chi aatinak ut kixkʼut chiruhebʼ li qanaʼaj saʼ Internet li wank toj saʼ raqik li hu. Naq li hermaan kiril naq li ixq kiwulak chiru li yook xchʼolobʼankil, kiroksi li xselular re xkʼutbʼal chiruhebʼ jun rehebʼ li bʼideo chirix laj Caleb.
Jun li hermaan ixq kiʼaatinak chirix li jw.org re jun rehebʼ li rech aj kʼanjel ixq li wank xkokʼal. Kixchʼolobʼ chiru naq saʼ li qanaʼaj saʼ Internet tixtaw ebʼ li naʼlebʼ chirix li junkabʼal. Li qanaʼchin kiʼok rilbʼal li qanaʼaj saʼ Internet rochbʼen li xkokʼal. Ut kixseeraqʼi re li hermaan naq ebʼ li kokʼal keʼwulak chiru li bʼich «Predica la palabra», ut keʼok chi bʼichank saʼ rochoch. Li bʼich aʼin wank saʼ kaxlan aatin ut natawmank bʼarwiʼ naxye «Chatwanq choʼq ramiiw li Jehobʼa».
Peʼyaal naq jwal us xnawbʼal kʼaru yook chi kʼemank saʼ jw.org ut xkubʼsinkil wiibʼ oxibʼ rehebʼ li bʼideo, bʼich malaj kʼanjel? Wi joʼkan tqabʼaanu, tooruuq roksinkil li naʼlebʼ aʼin saʼ li puktesink ut chi joʼkan yooqo chi kʼanjelak choʼq xmoos li Qaawaʼ (Hech. 20:19).