Li Naʼajmank Xnawbʼal

◼ Wi junaq laj puktesinel ixq naxkʼe chaq xtzolbʼal junaq li poyanam chirix li Santil Hu chire li rokebʼaal ut narochbʼeeni ribʼ rikʼin junaq rech aj puktesinel winq, ma tento naq tixlan xjolom?

Wi junaq laj puktesinel ixq naxkʼe chaq xtzolbʼal junaq li poyanam ut narochbʼeeni ribʼ rikʼin junaq rech aj puktesinel winq, tento naq tixlan xjolom (1 Cor. 11:3-10). La Atalaya 15 re Julio 2002 naxchʼolobʼ saʼ li perel 27: «Naq junaq laj puktesinel ak yook xchʼolobʼankil chi tustu ebʼ li naʼlebʼ li wank saʼ li Santil Hu ak yook xjolominkil jun li tzolom. Saʼ xkʼabʼaʼ naq li kʼanjel aʼin tenebʼanbʼil saʼ xbʼeenebʼ li winq saʼ li chʼuut, laj puktesinel ixq aʼin wi naʼochbʼeeniik xbʼaan jun aj puktesinel winq re xtzolbʼal chaq junaq li poyanam chirix li Santil Hu tento naq tixlan xjolom». Ut maakʼaʼ naxye naq li poyanam aʼin tooxkʼul chisaʼ malaj chire li rochoch malaj saʼ junaq chik li naʼaj, tento naq laj puktesinel ixq li t-ochbʼeeniiq xbʼaan jun laj puktesinel winq, tixlan xjolom.

Ut laj puktesinel ixq inkʼaʼ tixlan xjolom naq t-ochbʼeeniiq xbʼaan junaq laj puktesinel winq, wi li poyanam li yooqebʼ rulaʼaninkil maajiʼ naʼok chi tzolok chirix li Santil Hu ut wi yal yookebʼ xkʼutbʼal chiru chanru natzolmank li Santil Hu rikʼin junaq rehebʼ li tasal hu. Naq naʼok chi tzolok junaq li poyanam chirix li Santil Hu, moko naxtikibʼ ta saʼ junpaat, maare toj naʼulaʼaak naabʼal sut. Joʼkan naq us naq tkʼeemanq reetal ma ak xwulak xqʼehil naq laj puktesinel ixq tixlan xjolom naq yooq chi ochbʼeeniik xbʼaan junaq laj puktesinel winq.