Tzol chiʼus li puktesink: Oksi li naʼlebʼ li tkʼanjelaq chiruhebʼ

KʼAʼUT US XBʼAANUNKIL. Li yulbʼilebʼ ru ut li jun chʼuut chik chi karneer nekeʼxbʼoq chixjunilebʼ re naq teʼxkʼul «chi maatan li haʼ nakʼehok yuʼam» (Ap 22:17, SBG). Li haʼ aʼin reetalil chixjunil li kixbʼaanu li Jehobʼa chirixebʼ li nekeʼabʼink chiru re xkolbʼalebʼ chiru li maak ut li kamk. Re xtenqʼankilebʼ li poyanam li jalan jalanq xbʼaanuhomebʼ ut xpaabʼalebʼ, tento tqakʼut «li chaabʼil esilal li maakʼaʼ rosoʼjik» joʼ chanru twulaq chiru li junjunq (Ap 14:6, SBG).

CHANRU XBʼAANUNKIL

• Sikʼ junaq li naʼlebʼ ut junaq xraqal li Santil Hu li twulaq saʼ xchʼoolebʼ li qas qiitzʼin saʼ laateep. Naru nakaasikʼ jun rehebʼ li eetalil re aatinak malaj taakʼoxla junaq li naʼlebʼ li us kiʼelk chaawu. Kʼaru li naʼlebʼ malaj li raqal nakʼanjelak chiʼus? Chirix kʼaru li esil yookebʼ chi aatinak li poyanam anaqwan? Kʼaru li naʼlebʼ nekeʼwulak chiru li winq ut li ixq?

• Naq tat-aatinaq, wanq saʼ aachʼool li xbʼaanuhomebʼ ut chanru nekeʼxkʼe xsahilebʼ xchʼool saʼ li naʼaj bʼarwiʼ wankat (2Co 6:3, 4).

• Naw chiʼus kʼaru li tasal hu ut li bʼideo wank saʼ li kʼanjelobʼaal re kʼutuk, chi joʼkan tatruuq roksinkil rikʼinebʼ li nekeʼraj rabʼinkil li naxye li Santil Hu.

• Kubʼsi li hu ut li bʼideo saʼ li raatinobʼaal li wankebʼ saʼ laateep.

• Oksi li naʼlebʼ li tkʼanjelaq chiru li poyanam joʼ chanru naʼajmank (1Co 9:19-23). Jun eetalil, kʼaru raj taaye wi li poyanam naxye naq tojaʼ xkamk jun li xkomon?

NAQ AK XAAWIL LI BʼIDEO, TAASUME EBʼ LI PATZʼOM AʼIN:

• Chirix kʼaru li naʼlebʼ kixtikibʼ aatinak laj puktesinel?

• Kʼaru yook chaq xkʼulbʼal li poyanam?

• Kʼaru li raqal li jwal kikʼanjelak raj saʼ li hoonal aʼin, ut kʼaʼut?

• Chanru nakaajal ru li naʼlebʼ re naq teʼraj rabʼinkil li esil saʼ laateep?