Kʼulubʼa li tenqʼ li naxkʼe li Jehobʼa naq nakattijok

Li Jehobʼa nabʼaanunk re, naq li riyajil li yaal txeʼinq ut tkʼiiq saʼ xchʼool junaq li kristiʼaan (1Co 3:6-9). Joʼkan naq, wi naqaj naq us tooʼelq saʼ li xkʼanjel li Yos, tento naq chʼolchʼooq chiqu naq li Jehobʼa tooxtenqʼa joʼ ajwiʼ ebʼ li qatzolom.

Chʼolchʼooq ru li taatzʼaama. Ye re li Jehobʼa naq chixtenqʼaq ebʼ laatzolom chi xkuybʼal ut chi xqʼaxbʼal ru ebʼ li chʼaʼajkilal (Flp 1:9, 10). Ye re, naq li xsantil musiqʼej tatxtenqʼa saʼ chixjunil li nakaakʼoxla ut li nakaabʼaanu (Lu 11:13). Kʼut chiruhebʼ laatzolom chanru teʼtijoq ut waklesihebʼ xchʼool re naq teʼxbʼaanu. Tijon rikʼinebʼ ut ye li xkʼabʼaʼebʼ naq tattijoq chirixebʼ.

NAQ AK XAAWIL LI BʼIDEO LI SAHIL CHʼOOLEJIL RE XTZOLBʼALEBʼ LI POYANAM. QAKʼULUBʼAQ LI XTENQʼ LI JEHOBʼA: LI TIJOK, TAASUME EBʼ LI PATZʼOM AʼIN:

• Kʼaru li chʼaʼajkilal kixkʼul li xRita naq yook chaq xtzolbʼal li xCoral?

• Chanru kikʼanjelak 1 Corintios 3:6 chiru li xRita?

• Chanru kituqubʼaak ru li chʼaʼajkilal?