Tatruuq chi tenqʼank re naq sahaq xchʼool laajunkabʼal

Li Jehobʼa naraj naq sahaqebʼ saʼ xchʼool ebʼ li junkabʼal (Sl 127:3-5; Ec 9:9; 11:9). Abʼan, maare wank sut, wank naabʼal saʼ qakʼaʼuxl malaj nokoopaltoʼk ut aʼin tixchʼaʼajki li sahil chʼoolejil saʼ li qajunkabʼal. Kʼaru teʼruuq xbʼaanunkil li junjunq saʼ li junkabʼal re naq teʼxtaw li sahil chʼoolejil?

Jun chaabʼil bʼeelomej naroxloqʼi li rixaqil (1Pe 3:7). Naxnumsi li hoonal rikʼin, inkʼaʼ naxpatzʼ re li inkʼaʼ truuq xbʼaanunkil ut naxbʼanyoxi chixjunil li naxbʼaanu saʼ li ochoch (Col 3:15). Junelik naxkʼutbʼesi naq naxra ut naxkʼe xloqʼal (Pr 31:28, 31).

Jun chaabʼil ixaqilbʼej junelik naxtenqʼa li xbʼeelom (Pr 31:12). Naxbʼaanu li nayeeheʼk re ut nakʼanjelak rochbʼeen (Col 3:18). Naraatina saʼ qʼunil ut chaabʼil naʼaatinak chirix rikʼinebʼ li junchʼol (Pr 31:26).

Ebʼ li naʼbʼej yuwaʼbʼej nekeʼxnumsi li hoonal rikʼinebʼ li ralal (Dt 6:6, 7). Junelik nekeʼxye naq nekeʼxrahebʼ (Mt 3:17). Nekeʼxnaw joqʼe ut chanru xqʼusbʼalebʼ, ut junelik nekeʼxbʼaanu rikʼin rahok (Ef 6:4).

Ebʼ li alal kʼajolbʼej nekeʼxpaabʼ ut nekeʼxkʼe xloqʼal li xnaʼ ut xyuwaʼ (Pr 23:22). Nekeʼxye rehebʼ li xnaʼ xyuwaʼ chanru nekeʼrekʼa ut li nekeʼxkʼoxla. Nekeʼxkʼulubʼa li qʼuseʼk ut nekeʼxkʼutbʼesi naq nekeʼroxloqʼihebʼ (Pr 19:20).

NAQ AK XAAWIL LI BʼIDEO CHANRU TIXTAW LI SAHIL CHʼOOLEJIL LI JUNKABʼAL?, TAASUME LI PATZʼOM AʼIN:

Kʼaru xbʼaanu li junjunq saʼ li junkabʼal re naq sahaqebʼ saʼ xchʼool?