Chanru tqataw li tuqtuukilal usta wank li pleetik?
Laj Gary, li kiwank choʼq soldaad, naxye: «Naq toj maajiʼ ninʼok xtzolbʼal li Santil Hu inkʼaʼ nintaw ru kʼaʼut wank li chʼaʼajkilal ut li xikʼ ilok saʼ ruuchichʼochʼ. Abʼan anaqwan tuqtu chik ru inchʼool. Ninnaw naq li Jehobʼa tixbʼaanu naq maakʼaʼ chik tqaxiwa ru saʼ ruuchichʼochʼ».
Moko kaʼaj tawiʼ laj Gary narekʼa ribʼ chi joʼkan. Qilaq chanru li Santil Hu kixtenqʼahebʼ jalanebʼ chik li kristiʼaan.
LI NAXYE LI SANTIL HU: «Qʼaxal chaabʼilat, at Qaawaʼ, ut aj kuyulat maak» (Salmo 86:5).
CHANRU NOKOOXTENQʼA: «Ebʼ li aatin aʼin naxkʼojobʼ inchʼool xbʼaan naq naxkʼut chiwu naq li Jehobʼa aʼan aj uxtaan. Ut rikʼin chixjunil li xinbʼaanu chaq saʼ li pleetik ninnaw naq tixkuy inmaak» (Wilmar, Colombia).
LI NAXYE LI SANTIL HU: «Tinyoobʼtesi jun akʼ choxa ut jun akʼ ruuchichʼochʼ. Maajoqʼe chik taajultikamanq li kʼaru xkʼulmank ut inkʼaʼ chik tinkʼe saʼ inchʼool» (Isaías 65:17).
CHANRU NOKOOXTENQʼA: «Li xwil chaq saʼ li pleetik toj naxchʼaʼajki linkʼaʼuxl ut li nawekʼa. Li raqal aʼin naxjultika chiwu naq li Jehobʼa trisi chixjunil li naxrahobʼtesi linchʼool ut linkʼaʼuxl. Ut aʼin inkʼaʼ chik tinjultika. Aʼin jun maatan choʼq we» (Zafirah, Estados Unidos).
LI NAXYE LI SANTIL HU: «Chiʼatzʼumaq li tiikil chʼoolej naq wanq chi awabʼejil; kʼajoʼaq li tuqtuukilal joʼ najtil twanq li po saʼ xbʼeen li ruuchichʼochʼ» (Salmo 72:7).
CHANRU NOKOOXTENQʼA: «Rajlal ninkʼoxla rix li raqal aʼin. Chi seebʼ maakʼaʼaq chik li rahilal li naxkʼam chaq li pleetik ut inkʼaʼ chik tqakʼoxla naq wankebʼ saʼ xiwxiwal li qakomon» (Olexandra, Ucrania).
LI NAXYE LI SANTIL HU: «Ebʼ laakamenaq teʼwanq xyuʼam […]; teʼajq ruhebʼ ut teʼbʼichanq xbʼaan xsahil xchʼoolebʼ joʼkʼihalebʼ li wankebʼ saʼ pojtzʼ» (Isaías 26:19).
CHANRU NOKOOXTENQʼA: «Naq jun chʼuut li kristiʼaan xeʼraj xkamsinkil ebʼ laj tutsis, kachʼin chik ma xeʼxkamsi chixjunil linjunkabʼal. Ebʼ li aatin aʼin naxjultika chiwu naq chi seebʼ teʼwil wiʼ chik ru chixjunilebʼ linkomon li ak xeʼkamk. Ut chi anchal inchʼool nawaj rabʼinkilebʼ xyaabʼ xkux» (Marie, Ruanda).
LI NAXYE LI SANTIL HU: «Saʼ jun chʼina kʼamok maakʼaʼaqebʼ chik li inkʼaʼ usebʼ xnaʼlebʼ […]. Aʼut ebʼ li nebʼaʼ teʼreechani li chaabʼil naʼajej [“li Ruuchichʼochʼ”, TNM]. Kʼajoʼ xnimal li tuqtuukil usilal teʼxyal chi junelik!» (Salmo 37:10, 11).
CHANRU NOKOOXTENQʼA: «Usta ak xraqeʼk li pleetik abʼan toj wank li xikʼ ilok ut toj wankebʼ li kristiʼaan li nekeʼxbʼaanu li maaʼusilal. Li raqal aʼin kʼajoʼ nikinxtenqʼa. Li Jehobʼa naril chixjunil ut naxtaw ru li ninkʼul. Aʼan naxye naq chi seebʼ trisi chixjunil li rahilal ut inkʼaʼ chik tqajultika» (Daler, Tayikistán).
Ebʼ li kristiʼaan li naxye li hu aʼin wankebʼ saʼ xyanq li miyon chi aj testiiw re li Jehobʼa li xeʼxtaw li tuqtuukilal saʼ xkʼabʼaʼ li xeʼxtzol saʼ li Santil Hu. Junxil wank chaq li xikʼ ilok saʼ xchʼoolebʼ xbʼaan li xtenamitebʼ, li xbʼonol li xtibʼelebʼ ut li xwanjikebʼ abʼan xeʼxtzol xtzʼeqtaanankil chixjunil aʼin (Efesios 4:31, 32). Joʼ aj testiiw re li Jehobʼa inkʼaʼ nokootzʼaqonk chirixebʼ li awabʼej chi moko saʼ li mululij ibʼ (Juan 18:36).
Joʼ aj Testiiw re li Jehobʼa naqatenqʼa qibʼ chiqibʼil qibʼ joʼ junkabʼal (Juan 13:35). Li xʼOlexandra, li xooʼaatinak wiʼ, xkoho saʼ jalan chik tenamit rochbʼeen li riitzʼin xbʼaan li pleetik. Naxye: «Naq xoowulak saʼ li tenamit aʼan, ebʼ li hermaan xooʼeʼxkʼul chi sahebʼ saʼ xchʼool ut saʼ xkʼabʼaʼ naq xooʼeʼxtenqʼa inkʼaʼ xchʼaʼajkoʼk chiqu kʼayk saʼ li tenamit aʼan».
Nakatqabʼoq saʼ li qachʼutam bʼarwiʼ taatzol chirix li tuqtuukilal li naxye li Santil Hu ut chanru taayuʼami. Chaawil jw.org ut sikʼ jun li naʼaj nachʼ chakʼatq bʼarwiʼ tatwulaq saʼ li chʼutam ut patzʼ aatzolbʼal ut jun aj testiiw re li Jehobʼa tatxtzol rikʼin li hu Sahaq laachʼool!, chi sibʼil.