Qakʼehaq qachʼool chi kʼoxlak joʼ li Jehobʼa ut li Jesús

1, 2. a) Kʼaru naraj xyeebʼal xraabʼal li Jehobʼa? b) Chanru kixkʼutbʼesi li Jesús naq naxra li Yos chi anchal xkʼaʼuxl?

LI JESÚS xkanabʼ chi chʼolchʼo ru bʼar wank li xnimal ru chaqʼrabʼ re li Xchaqʼrabʼ laj Moisés naq kixye: «Taara li Jehobʼa Laayos chi anchal laachʼool, chi anchal laayuʼam, chi anchal laakʼaʼuxl ut chi anchal laametzʼew» (Mar. 12:30). Joʼkan naq tento tqara li Jehobʼa chi anchal qachʼool, rikʼin chixjunil li wank qe. Saʼ xyanq aʼin wank li naqarahi, li naqekʼa ut li qametzʼew. Ut naʼokenk ajwiʼ li qakʼaʼuxl, naraj xyeebʼal chanru nokookʼoxlak. Saʼ xkʼabʼaʼ naq naqara li Jehobʼa, naqayal qaqʼe chi xkʼambʼal qe rikʼin li xkʼaʼuxl. Yaal naq maajunwa tooruuq xtawbʼal chi tzʼaqal re ru chanru nakʼoxlak li Jehobʼa. Abʼan naru tqakʼam qe rikʼin «li xkʼaʼuxl li Kriist» xbʼaan naq aʼan chi tzʼaqal re ru kixkʼam re rikʼin li xnaʼlebʼ li Xyuwaʼ (1 Cor. 2:16).

² Li Jesús naxra li Jehobʼa chi anchal li xkʼaʼuxl. Naxnaw kʼaru naraj li Yos naq tixbʼaanu ut naraj xbʼaanunkil usta aʼin tixkʼam chaq rahilal saʼ xbʼeen. Saʼ xkʼabʼaʼ naq kiraj xsahobʼresinkil xchʼool li Xyuwaʼ inkʼaʼ kixkanabʼ naq junaq li naʼlebʼ tixram chiru xbʼaanunkil li rajom li Yos.

3. Kʼaru kixtzol li apóstol Pedro rikʼin li Jesús ut kʼaru kixye rehebʼ laj paabʼanel naq teʼxbʼaanu? (1 Pedro 4:1).

³ Laj Pedro ut ebʼ li junchʼol chik chi apóstol xeʼwank xhoonal re xtzolbʼal chanru nanaʼlebʼak li Jesús. Saʼ li xbʼeen hu li kixtzʼiibʼa laj Pedro kixye naq tento tqakʼam qe rikʼin li xnaʼlebʼ li Kriist (yaabʼasi 1 Pedro 4:1). Naq laj Pedro kixye «Kawresimaq eeribʼ», yook chi aatinak chirix chanru ebʼ laj puubʼ nekeʼxkawresi ribʼ choʼq re li yalok. Chi joʼkan kixkʼutbʼesi naq tento tookʼoxlaq joʼ li Jesús re naq kawresinbʼilaqo re xqʼaxbʼal yalaq kʼaru li naʼlebʼ li moko us ta (2 Cor. 10:​3-5; Efes. 6:12).

4. Kʼaru tqatzʼil rix saʼ li tzolom aʼin?

⁴ Saʼ li tzolom aʼin tqatzʼil rix chanru nakʼoxlak li Jesús ut chanru tqakʼam qe rikʼin. Tqil ajwiʼ kʼaru tooruuq xbʼaanunkil 1) re xtzolbʼal kʼoxlak joʼ li Jehobʼa, 2) re xkubʼsinkil qibʼ ut 3) re kʼoxlak chiʼus.

CHOOKʼOXLAQ JOʼ LI JEHOBʼA

5. Joqʼe kixkʼutbʼesi laj Pedro naq moko nakʼoxlak ta joʼ li Jehobʼa?

⁵ Saʼ jun kutan li Jesús kixye rehebʼ li xtzolom naq tento taaxik Jerusalén, bʼarwiʼ ebʼ li nekeʼkʼamok bʼe saʼ li bʼalaqʼil paabʼal teʼxchap, teʼxrahobʼtesi ut teʼxkamsi (Mat. 16:21). Chʼolchʼo chiru laj Pedro naq li Jesús aʼan li Mesiiy li tixkol li xtenamit li Yos, joʼkan naq maare kichʼaʼajkoʼk chiru xkʼulubʼankil naq li Jehobʼa tixkanabʼ naq teʼxrahobʼtesi li Jesús (Mat. 16:16). Joʼkan naq laj Pedro kixkʼam li Jesús ut kixye re: «Maaye aʼan Qaawaʼ! Maajoqʼe taakʼul aʼin» (Mat. 16:22). Rikʼin aʼin laj Pedro kixkʼutbʼesi naq moko yook ta chi kʼoxlak joʼ li Jehobʼa ut li Jesús.

6. Chanru kixkʼutbʼesi li Jesús naq nakʼoxlak joʼ li Jehobʼa?

⁶ Li Jesús nakʼoxlak joʼ li Xyuwaʼ, joʼkan naq kixye re laj Pedro: «Elen chinkʼatq at aj Tza! Yookat xrambʼal chiwu xbʼaanunkil li rajom li Yos xbʼaan naq moko yookat ta chi kʼoxlak joʼ nakʼoxlak li Yos, yookat bʼan chi kʼoxlak joʼ nakʼoxlak li winq» (Mat. 16:23). Li Jesús naxnaw naq re xbʼaanunkil li rajom li Yos tento trahobʼtesiiq ut tkamsiiq. Joʼkan naq moko kixkʼulubʼa ta li naʼlebʼ li kixkʼe laj Pedro, usta kixbʼaanu re xtenqʼankil. Laj Pedro kixtzol naq tento ajwiʼ tkʼoxlaq joʼ li Jehobʼa. Aʼin jun chaabʼil naʼlebʼ choʼq qe!

7. Chanru kixkʼutbʼesi laj Pedro naq yook xkʼebʼal xchʼool re kʼoxlak joʼ li Jehobʼa? (Chaawil li jalam u).

⁷ Wiibʼ oxibʼ chihabʼ moqon, li Jehobʼa kixye naq xwulak li hoonal bʼarwiʼ ebʼ li kristiʼaan li moko aj judiiy ta naru teʼoq saʼ xyanq li xtenamit. Joʼkan naq kixye re laj Pedro naq tixwotz li chaabʼil esil rikʼin laj Cornelio, li moqon twanq joʼ jun rehebʼ li xbʼeen aj paabʼanel li moko aj judiiy ta. Ebʼ laj judiiy moko nekeʼxjunaji ta ribʼ rikʼinebʼ li kristiʼaan li jalan xtenamitebʼ, joʼkan naq maare kichʼaʼajkok chiru laj Pedro xkʼulubʼankil kʼaʼut li Jehobʼa yook xpatzʼbʼal re aʼin. Abʼan naq laj Pedro kixtaw ru kʼaru li rajom li Jehobʼa, kixjal chanru nakʼoxlak. Naq laj Cornelio kixpatzʼ re laj Pedro naq twulaq saʼ rochoch, laj Pedro saʼ junpaat kixkʼulubʼa li xbʼoqbʼal (Hech. 10:​28, 29). Kixkʼe chi naweʼk li yaal re laj Cornelio ut rehebʼ li xjunkabʼal ut chixjunilebʼ xeʼkubʼeek xhaʼ (Hech. 10:​21-23, 34, 35, 44-48). Laj Pedro kixkʼutbʼesi naq ak nakʼoxlak chik joʼ li Jehobʼa.

8. Chanru tqakʼutbʼesi naq nokookʼoxlak joʼ li Jehobʼa? (1 Pedro 3:8).

⁸ Wiibʼ oxibʼ chihabʼ chirix aʼin, laj Pedro kixye rehebʼ laj paabʼanel: «Cheejunilex junajaq ru li leekʼaʼuxl» (yaabʼasi 1 Pedro 3:8). Joʼ aj Testiiw, re naq junajaq ru li qakʼaʼuxl tento tqatzol chanru nakʼoxlak li Jehobʼa ut aʼin tqataw saʼ li Santil Hu. Qakʼoxlaq rix aʼin: li Jesús kixwaklesihebʼ xchʼool li xtzolom re naq teʼxkʼe chiʼubʼej li Xʼawabʼejilal li Yos (Mat. 6:33). Wi jun laj paabʼanel naxye qe naq naraj xkʼebʼal chixjunil li xhoonal saʼ xkʼanjel li Yos, tooruuq xtenqʼankil ut xkʼebʼal xsahil xchʼool ut miqaye li kixye laj Pedro re li Jesús.

QAKUBʼSIHAQ QIBʼ

9, 10. Kʼaru xkʼut chiqu li Jesús chirix li kubʼsink ibʼ?

⁹ Naq jun qʼoqyink chik ma nakamk, li Jesús kixkʼut chiru laj Pedro ut ebʼ li junchʼol chik chi apóstol jun chaabʼil eetalil chirix li kubʼsink ibʼ. Li Jesús kixye re laj Juan ut laj Pedro naq teʼxkʼubʼ chixjunil choʼq re jun li waʼak. Maare xeʼxkawresi chixjunil re naq aran twanq jun li palangaan ut ebʼ li tʼikr re naq tchʼajmanq li roqebʼ. Abʼan, ani tixbʼaanu li kʼanjel aʼin?

¹⁰ Li kʼanjel aʼin naxbʼaanu jun li moos, abʼan saʼ li hoonal aʼan li Jesús kixchʼaj roqebʼ li xtzolom. Sachsokebʼ tana xchʼool xeʼkanaak naq xeʼril li Jesús risinkil li xtʼikr li lanlo wiʼ ut xchapbʼal jun li tʼikr ut jun li palangaan re xchʼajbʼal li roqebʼ (Juan 13:​4, 5). Kibʼayk tana li Jesús chi xbʼaanunkil aʼin xbʼaan naq kixchʼaj roqebʼ chixjunilebʼ li xtzolom ut saʼ xyanqebʼ wank laj Judas, li moqon tkʼayinq re. Rikʼin aʼin li Jesús kixkʼutbʼesi li kubʼsink ibʼ. Moqon chik kixye rehebʼ li xtzolom: «Ma nekeetaw ru li xinbʼaanu eere? Laaʼex nekeeye we Kʼutunel ut Qaawaʼ, ut yaal nekeeye xbʼaan naq laaʼin. Joʼkan naq, wi laaʼin xinchʼaj leeroq usta laaʼin li Qaawaʼ ut aj Kʼutunel, laaʼex ajwiʼ tento teechʼaj leeroq cheeribʼil eeribʼ» (Juan 13:​12-14).

11. Chanru kixkʼutbʼesi laj Pedro naq naxkubʼsi ribʼ? (1 Pedro 5:5; chaawil li jalam u).

¹¹ Laj Pedro kixtzol xkubʼsinkil ribʼ rikʼin li Jesús. Naq li Jesús kisutqʼiik saʼ choxa, laj Pedro kixkʼirtasi jun li winq li yeq roq (Hech. 1:​8, 9; 3:​2, 6-8). Ebʼ li kristiʼaan keʼsach xchʼool xbʼaan aʼin (Hech. 3:11). Qajultikaq naq saʼ li kutan aʼan ebʼ li kristiʼaan nekeʼwulak chiru xnimobʼresinkil ribʼ. Kʼaru tixbʼaanu laj Pedro? Ma tixnimobʼresi ribʼ xbʼaan li kixbʼaanu? Inkʼaʼ, kixkubʼsi bʼan ribʼ ut kixkʼe xloqʼal li Jehobʼa ut li Jesús ut kixye: «Saʼ xkʼabʼaʼ li Jesús ut xbʼaan naq naqapaabʼ li xkʼabʼaʼ, xkawuuk li winq aʼin li yookex rilbʼal anaqwan» (Hech. 3:​12-16). Moqon, laj Pedro kixtzʼiibʼa rehebʼ laj paabʼanel naq aajel ru naq teʼxkubʼsi ribʼ. Li aatin li kiroksi naxjultika chiqu li hoonal bʼarwiʼ li Jesús kixchap jun li tʼikr ut kixchʼaj roqebʼ li xtzolom (yaabʼasi 1 Pedro 5:5).

12. Chanru tooruuq xkubʼsinkil qibʼ joʼ kixbʼaanu laj Pedro?

¹² Joʼ laj Pedro naru tqakubʼsi qibʼ. Li tooxtenqʼa aʼan xjultikankil naq li kubʼsink ibʼ moko nakʼutbʼesimank ta kaʼajwiʼ rikʼin li naqaye, rikʼin bʼan li naʼelk saʼ xchamal li qachʼool. Aʼin tzʼaqal xyaalal li naʼlebʼ li najalmank ru joʼ «kubʼsink ibʼ» saʼ 1 Pedro 5:5. Naq nokootenqʼank naqabʼaanu xbʼaan naq naqara li Jehobʼa ut ebʼ li poyanam ut inkʼaʼ re naq teʼxkʼe qaloqʼal. Naq nokookʼanjelak chiru li Jehobʼa chi sa qachʼool ut naq nokootenqʼank naqakʼutbʼesi li kubʼsink ibʼ ut moko yal naqaj ta naq tooʼeʼril (Mat. 6:​1-4).

CHOOKʼOXLAQ «CHIʼUS»

13. Kʼaru naraj xyeebʼal kʼoxlak chiʼus?

¹³ Kʼaru naraj xyeebʼal kʼoxlak chiʼus? (1 Ped. 4:7). Naraj xyeebʼal naq li naqasikʼ xbʼaanunkil saʼ li qayuʼam naxkʼutbʼesi naq nokookʼoxlak joʼ naxbʼaanu li Jehobʼa ut naq li qʼaxal wank xwankil saʼ li qayuʼam aʼan li qamiiwil rikʼin. Wi nokookʼoxlak chiʼus maajunwa tqanimobʼresi qibʼ ut inkʼaʼ tqakʼoxla naq ak naqanaw chixjunil. Joʼkan ajwiʼ junelik tqatzʼaama chiru li Yos naq tooxbʼeresi.

14. Joqʼe laj Pedro inkʼaʼ kixkʼojobʼ xchʼool rikʼin li Jehobʼa?

¹⁴ Jun qʼoqyink chik ma nakamk li Jesús, kixye rehebʼ li xtzolom: «Saʼ xkʼabʼaʼ li tinkʼul cheejunilex tineekanabʼ saʼ li qʼoqyink aʼin». Chi chʼolchʼo ru laj Pedro kixye re: «Saʼ xkʼabʼaʼ li taakʼul, chixjunilebʼ tateʼxkanabʼ abʼan laaʼin maajunwa tatinkanabʼ!». Saʼ li qʼoqyink aʼan, li Jesús kixkʼe ajwiʼ li naʼlebʼ aʼin rehebʼ li xtzolom: «Meekanabʼ yoʼlek ut meekanabʼ tijok» (Mat. 26:​31, 33, 41). Wi laj Pedro kixyuʼami raj li naʼlebʼ aʼin, kiruuk raj xyeebʼal naq aʼan jun rehebʼ li xtzolom. Abʼan laj Pedro kixye naq inkʼaʼ naxnaw ru li Jesús ut moqon chik kirahoʼk xchʼool! (Mat. 26:​69-75).

15. Kʼaru kitenqʼank re li Jesús re kʼoxlak chiʼus naq jun qʼoqyink chik ma nakamk?

¹⁵ Li Jesús junelik kixkʼojobʼ xchʼool rikʼin li Jehobʼa. Usta tzʼaqal re ru li xyuʼam, naq jun qʼoqyink chik ma nakamk naabʼal sut kitijok. Aʼin kixkʼe xmetzʼew re xbʼaanunkil li rajom li Jehobʼa (Mat. 26:​39, 42, 44; Juan 18:​4, 5). Chʼolchʼo naq laj Pedro maajunwa xsach saʼ xchʼool rilbʼal naq li Jesús naabʼal sut kitijok naq jun qʼoqyink chik ma nakamk.

16. Chanru kixkʼutbʼesi laj Pedro naq kixtzol kʼoxlak chiʼus? (1 Pedro 4:7).

¹⁶ Saʼ xnumikebʼ li chihabʼ, laj Pedro kixtzol naq aajel ru naq ttijoq re naq tixkʼojobʼ xchʼool rikʼin li Jehobʼa. Naq li Jesús kiwakliik chi yoʼyo kixye re laj Pedro ut ebʼ li junchʼol chik chi apóstol naq teʼxkʼul li santil musiqʼej re naq teʼruuq xpuktesinkil li chaabʼil esil (Luc. 24:49; Hech. 1:​4, 5). Kixye ajwiʼ rehebʼ naq teʼoybʼeninq Jerusalén, saʼ li qʼehil aʼan laj Pedro ut ebʼ li junchʼol chik aj paabʼanel «yookebʼ chaq chi tijok» (Hech. 1:​13, 14). Saʼ li xbʼeen esilhu kixwaklesi xchʼool ebʼ laj paabʼanel re naq teʼkʼoxlaq chiʼus ut naq teʼxkʼojobʼ xchʼool rikʼin li Jehobʼa (yaabʼasi 1 Pedro 4:7). Laj Pedro kixtzol xkʼojobʼankil xchʼool rikʼin li Jehobʼa ut aʼin kʼajoʼ kixtenqʼa li chʼuut (Gál. 2:9).

17. Usta wank kʼaru inkʼaʼ tchʼaʼajkoʼq chiqu, kʼaru tento tqabʼaanu? (Chaawil li jalam u).

¹⁷ Re naq us tookʼoxlaq tento tootijoq chiru li Jehobʼa, naʼajmank naq tqapatzʼ li xtenqʼ usta moko chʼaʼaj ta li tqabʼaanu. Qʼaxal wiʼ chik wi naqasikʼ xbʼaanunkil junaq li naʼlebʼ li qʼaxal wank xwankil saʼ li qayuʼam, xbʼaan naq chʼolchʼo chiqu naq aʼan naxnaw li kʼaru us choʼq qe.

18. Joʼ laj Pedro, kʼaru tento tqabʼaanu?

¹⁸ Jwal oxloqʼ chiqu naq li Jehobʼa xooxyobʼtesi re xkʼambʼal qe rikʼin (Gén. 1:26; Is. 55:9). Abʼan joʼ laj Pedro naru tookʼoxlaq joʼ li Jehobʼa, xyuʼaminkil li kubʼsink ibʼ ut kʼoxlak chiʼus.