Kʼaʼut maaʼani naru xkʼambʼal chaq li tuqtuukilal? | Kʼaru naxye li Santil Hu?

Ebʼ li nekeʼjolomink re li ruuchichʼochʼ ut ebʼ li xninqal ru molam li nekeʼkʼanjelak chirix li tuqtuukilal inkʼaʼ nekeʼruuk xkʼambʼal chaq li tuqtuukilal. Chalen li xkabʼ nimla yalok u rajlal naʼabʼimank resil ebʼ li nimla pleet. 2.000 miyon chi poyanam wankebʼ saʼ li naʼaj bʼarwi wank ebʼ li yalok u, aʼin naraj xyeebʼal li xka jachal li kristiʼaan li wankebʼ saʼ ruuchichʼochʼ.

Kʼaʼut ebʼ li poyanam inkʼaʼ nekeʼruuk xkʼambʼal chaq li tuqtuukilal? Kʼaru naxye li Santil Hu?

Wank oxibʼ xyaalal kʼaʼut ebʼ li poyanam inkʼaʼ nekeʼruuk xkʼambʼal chaq li tuqtuukilal

1. 1. Li Santil Hu naxye naq sa’eb’ li qakutan «ebʼ li qas qiitzʼin kaʼajwiʼ aʼanebʼ teʼxra rib; teʼxrahi ru li tumin, teʼxye li inkʼaʼ us, teʼxnima ribʼ, […] teʼxtzʼeqtaana li ras riitzʼin, [...] inkʼaʼ chik teʼxkʼe ribʼ saʼ aatin, [...] inkʼaʼ chik teʼxkuy ribʼ, chanchanaqebʼ li xul li qʼaxal josqʼebʼ, [...] kawaqebʼ xjolom, qʼaxal qʼetqʼetaqebʼ». Li yibʼ aj naʼlebʼ aʼin naxbʼaanu naq moko nekeʼxkʼe ta xchʼool chi xsikʼbʼal li tuqtuukilal (2 Timoteo 3:2-4).

2. 2. Ebʼ li poyanam, aʼ yaal chi chʼuut malaj saʼ jun junqal inkʼaʼ nekeʼruuk xtuqubʼankil ru ebʼ li chʼaʼajkilal wi li Jehobʼa laj Yobʼtesinel inkʼaʼ natenqʼank rehebʼ.a Li Santil Hu naxkʼut «naq li winq moko a’an ta yaal re sa’ xb’een li xyu’am, chi moko sa’ ruq’ wank li xb’eenik» (Jeremías 10:23, Li Santil Hu, Sociedad Bíblica de Guatemala, SBG).

3. 3. Li naʼawabʼejink re li ruuchichʼochʼ wank xwankil ut maaʼus xnaʼlebʼ ut «yook xbʼalaqʼinkil chixjunil li ruuchichʼochʼ». Aʼan laj Tza, li nayeemank re ajwiʼ Maaʼus. Naq li ruuchichʼochʼ toj wanq «rub’el xwankil li maa’us», junelik wanq ebʼ li xninqal ru pleet ut ebʼ li yalok u (Apocalipsis 12:9; 1 Juan 5:19).

Ani tkʼamoq chaq re li tuqtuukilal?

Li Santil Hu naxchʼolobʼ naq kaʼajwiʼ li Yos tkʼamoq chaq re li tuqtuukilal ut maawaʼ ebʼ li poyanam.

• «Laa’in wank sa’ inch’ool k’aru tinb’aanu cho’q eere: twaj texwanq sa’ tuqtuukilal ut ink’a’ sa’ rahilal, re naq toxeetaw xsahil eech’ool chi junelik. Laa’in, li Qaawa’, ninyehok re a’in» (Jeremías 29:11, SBG ).

Chanru tixbʼaanu li Yos li naxyeechiʼi? Li Santil Hu naxye: «Li Yos li nakʼehok tuqtuukilal chi seebʼ tixpitzʼ laj Tza» (Romanos 16:20). Li Yos troksi jun li awabʼejilal li wank saʼ choxa re xkʼambʼal chaq li tuqtuukilal saʼ Ruuchichʼochʼ. Li Santil Hu naxye naq aʼan «Li Xnimajwal Awabʼejilal li Yos», ut li Awabʼej aʼan li Jesukriist (Lucas 4:43). Naq li Jesús t-awabʼejinq saʼ Ruuchichʼochʼ, ebʼ li poyanam teʼxtzol wank saʼ tuqtuukilal (Isaías 9:6, 7).

• Wi taawaj xsikʼbʼal xkomon li naʼleb chaawil li tzolom: «Kʼaru truuq xbʼaanunkil li Xnimajwal Awabʼejilal li Yos?».