NASA Photo
JUNELIK AJʼAJAQ QU!
Ma wank junaq awabʼejilal li truuq xʼawabʼejinkil li ruuchichʼochʼ ut maajunwa tsachmanq? | Kʼaru naxye li Santil Hu?
Ebʼ li nekeʼawabʼejink re li ruuchichʼochʼ yookebʼ xnumsinkil naabʼal li chʼaʼajkilal. Saʼebʼ li tenamit bʼarwiʼ chanchan tawiʼ naq maakʼaʼ tsachmanq rehebʼ li awabʼej, nekeʼxnumsi ajwiʼ li chʼaʼajkilal, joʼ li jachok ibʼ saʼ xyanqebʼ li nekeʼawabʼejink, li mululij ibʼ ut nekeʼxwechʼi ribʼ xbʼaan naq moko chʼolchʼo ta ani naʼelk chiʼubʼej naq nekeʼxxaqabʼ jun li awabʼej.
Li Santil Hu naxchʼolobʼ naq wank jun li Awabʼejilal li maajunwa tsachmanq. Maare ak aawabʼihom chirix. Aʼin li awabʼejilal li kiʼaatinak wiʼ li Jesukriist naq kitijok chiru li Xyuwaʼ.
«Laaʼex tento textijoq chi joʼkaʼin: “At Qayuwaʼ li wankat saʼ choxa, santobʼresinbʼil taxaq laakʼabʼaʼ. Chichalq ta Laaʼawabʼejilal. Chiʼuxq ta laawajom, joʼ saʼ choxa joʼ ajwiʼ saʼ ruuchichʼochʼ”» (Mateo 6:9, 10).
Kʼaru naxye li Santil Hu chirix li Awabʼejilal aʼin?
Li Awabʼejilal, jun li Awabʼejihom li maajunwa tsachmanq
Li Awabʼejilal naʼawabʼejink saʼ choxa.
Li Jesús kixkʼabʼaʼi «li Xʼawabʼejilal li choxa» (Mateo 4:17; 5:3, 10, 19, 20). Joʼkan naq kixye: «Linʼawabʼejilal moko re ta arin» (Juan 18:36).
Li Awabʼejilal tkanaaq choʼq reqaj li xʼawabʼejilal li winq.
Li Santil Hu naxye: «Tixjukʼi ut tixputzʼihebʼ li awabʼejihom junchʼol (malaj li xʼawabʼejilal li winq), ut aʼan wanq xwankil chi junelik» (Daniel 2:44, Li Santil Hu, Sociedad Bíblica de Guatemala, SBG).
Li Jesukriist aʼan li Awabʼej, ut li Awabʼejilal maajunwa tsachmanq.
Li Santil Hu naxye: «Li xwankilal wanq chi junelik ut inkʼaʼ taaʼosoʼq; ut li xʼawabʼejihom maajoqʼe taasachmanq» (Daniel 7:13, 14, SBG).
Li Awabʼejilal tixkʼam chaq li tuqtuukilal ut li sahilal saʼ ruuchichʼochʼ.
Li Santil Hu naxye: «Ut li junjunq taahilanq saʼ xmu li rochoch saʼ tuqtuukilal, chi maakʼaʼaq xxiw» (Miqueas 4:4, SBG).
Tzol xkomon aanaʼlebʼ chirix li Awabʼejilal
Naq li Jesús kiwank saʼ Ruuchichʼochʼ, yook chaq «xyeebʼal resil li chaabʼil esil chirix li Xʼawabʼejilal li Yos» (Mateo 9:35). Kixye ajwiʼ li aatin aʼin:
«Tyeemanq resil li chaabʼil esil chirix li Xʼawabʼejilal li Yos saʼ chixjunil li ruuchichʼochʼ re naq chi joʼkan ebʼ li qas qiitzʼin teʼruuq rabʼinkil, tojaʼ naq tchalq li xraqik» (Mateo 24:14).
Saʼebʼ li qakutan, yook chi kʼemank chi naweʼk li chaabʼil esil chirix li Awabʼejilal saʼ numenaq 240 chi tenamit ut naʼajej. Kʼaru li osobʼtesihom tixkʼam chaq li Awabʼejilal? Chanru taataw rusilal li osobʼtesihom aʼin? Naqaj naq taatzol xkomon aanaʼlebʼ chirix li Awabʼejilal aʼin.
Chaawil li bʼideo Kʼaru li Xʼawabʼejilal li Yos?