Xjalmank saʼ jalan jalanq aatinobʼaal li nimla chʼutam 2020 «Sahaq laachʼool!»

Aʼin li xbʼeen sut naq ebʼ laj testiiw re li Jehobʼa saʼ chixjunil li ruuchichʼochʼ teʼril li nimla chʼutam 2020 saʼ bʼideo: chiru li po julio ut agosto. Joʼkan naq, aajel ru naq txokmanq saʼ 500 chi aatinobʼaal. Re xbʼaanunkil junaq li kʼanjel joʼ aʼin, naʼajmank jun chihabʼ malaj bʼayaq chik. Abʼan saʼ xkʼabʼaʼ li nimla yajel coronavirus, ebʼ laj jalol aatin re li nimla chʼutam 2020 «Sahaq laachʼool!» keʼxbʼaanu chiru kachʼin chik ma kaahibʼ po.

Li xaqabʼanbʼilebʼ chi loqʼok saʼ chixjunil li ruuchichʼochʼ ut li nekeʼxkʼanjela li jalok aatin saʼ li qamolam keʼtenqʼank saʼ li nimla kʼanjel aʼin. Li chʼuut li naril li nekeʼxkʼanjela li jalok aatin kixkʼe reetal naq aajel ru li kʼanjelobʼaal li naʼoksimank re xokok xyaabʼ kuxej choʼq rehebʼ li kokʼ chʼuut li nekeʼjalok aatin. Li xaqabʼanbʼilebʼ chi loqʼok saʼ chixjunil li ruuchichʼochʼ kixloqʼ 1,000 li kʼanjelobʼaal re xokok xyaabʼ kuxej ut kixtaqla saʼ kachʼin chik ma 200 li naʼajej.

Re naq inkʼaʼ tsachmanq naabʼal li tumin kiloqʼmank li kʼanjelobʼaal chi naabʼal, keʼxtaqla saʼ jun ajwiʼ li naʼajej ut aran keʼxtaqla rehebʼ laj jalol aatin. Saʼ xkʼabʼaʼ naq naabʼal kiloqʼmank, kitojmank 170 dólar li junjunq, saʼ xyanq aʼin kiʼokenk li xtzʼaq re xtaqlankil. Rikʼin aʼin kikolmank rix numenaq 20% li tumin.

Li xaqabʼanbʼilebʼ chi loqʼok saʼ chixjunil li ruuchichʼochʼ kixbʼaanu chixjunil aʼin chiru li po abril ut mayo re li chihabʼ 2020, saʼ li qʼehil aʼin chʼaʼaj li loqʼok xbʼaan li nimla yajel. Abʼanan, saʼ xraqik li po mayo li xkʼihalil ebʼ li ochoch re jalok aatin, ebʼ li molam ut jalan chik li naʼajej re jalok aatin, ak wank chik rikʼinebʼ li kʼanjelobʼaal.

Laj Jay Swinney, li najolomink re li xaqabʼanbʼilebʼ chi loqʼok saʼ chixjunil li ruuchichʼochʼ, naxye: «Saʼ li kʼanjel aʼin, chaabʼil yookebʼ chi elk li wankebʼ Betel rikʼinebʼ laj kʼay. Kaʼajwiʼ li xmusiqʼ li Jehobʼa naru xbʼaanunkil naq tkʼemanq saʼ junpaat ut chi kubʼenaq xtzʼaq ebʼ li kʼanjelobʼaal li naʼajmank choʼq rehebʼ li qahermaan».

Laj Nicholas Ahladis, li nakʼanjelak rikʼinebʼ li nekeʼxkʼanjela li jalok aatin, naxye: «Ebʼ laj jalol aatin li tzʼaptzʼokebʼ saʼ li rochoch kʼajoʼ keʼsahoʼk xchʼool naq keʼxkʼul li akʼ kʼanjelobʼaal. Usta najt wankebʼ xeʼtzʼaqonk chi jalok aatin ut xxokbʼal li xyaabʼ kuxej re li seeraqʼ ut ebʼ li bʼideo ut bʼich saʼ numenaq 500 chi aatinobʼaal».

Li nimla kʼanjel aʼin, yal jun rehebʼ li kibʼaanumank re xyiibʼankil li nimla chʼutam 2020 «Sahaq laachʼool!» choʼq re chixjunilebʼ li hermaan. Chixjunil ebʼ li kʼanjelobʼaal aʼin kiloqʼmank saʼ xkʼabʼaʼ li tenqʼ tumin li xeekʼe laaʼex saʼ donate.jw.org ut jalan chik.