Li kabʼlak li xchoymank naq maajiʼ natiklaak li nimla yajel

Rajlal chihabʼ chi mil ebʼ li kristiʼaan nekeʼsubʼeʼk saʼ haʼ. Joʼkan naq aajel ru xkomon ebʼ li Chʼutlebʼaal Kabʼl re xloqʼoninkil li Jehobʼa. Joʼkan naq ebʼ li chʼuut li nekeʼril li kabʼlak ut li xyiibʼankil keʼxkʼubʼ xkabʼlankil malaj xyiibʼankil numenaq 2,700 ebʼ li naʼajej saʼ li chihabʼ 2020.a

Ra xyeebʼal, li COVID-19 xram li qakʼanjel. Re xkolbʼalebʼ li hermaan ut xpaabʼankil li xchaqʼrabʼ li awabʼej, li chʼuut li naril ebʼ li hu re li Nekeʼjolomink re Xmolam li Jehobʼa kixxaqabʼ li kabʼlak. Saʼ li chihabʼ 2020 naq toj maajiʼ natiklaak li nimla yajel kikabʼlamank ut kiyiibʼamank numenaq 1,700 li naʼajej re loqʼonink. Ut numenaq 100 ebʼ li kʼanjel re kabʼlak kibʼaanumank saʼ jalan jalanq li qamolam. Qilaq wiibʼ rehebʼ li kʼanjel aʼin ut chanru xtenqʼahebʼ li hermaan.

Li qamolam re Camerún. Li qamolam li wank saʼ li tenamit Duala, jwal kachʼin ut aajel ru xyiibʼankil. Li chʼuut li naril ebʼ li hu kixkʼoxla xjalbʼal li ak xpoʼeʼk, abʼan terto t-elq. Keʼxkʼoxla ajwiʼ xkabʼlankil li qamolam saʼ jalan chik naʼajej malaj xloqʼbʼal ut xchaabʼilobʼresinkil jun nimla ochoch. Abʼan maajun rehebʼ aʼin keʼruuk xbʼaanunkil.

Saʼ xqʼehil aʼan, ebʼ li hermaan xeʼrabʼi resil naq ebʼ li nekeʼjolomink re li tenamit Duala yookebʼ xkʼoxlankil xyiibʼankil jun nimla bʼe chixkʼatq li naʼaj re li nimla chʼutam. Aʼin ttenqʼanq re naq moko chʼaʼaj ta chik wulak saʼ li qamolam ut xtawbʼal chixjunil li nakʼanjelak. Joʼkan naq li Nekeʼjolomink re Xmolam li Jehobʼa keʼxkʼulubʼa naq teʼxkabʼla li qamolam nachʼ bʼar wank li naʼaj re li nimla chʼutam.

Re xbʼaanunkil junqaq rehebʼ li kʼanjel aʼin, ebʼ li hermaan keʼxsikʼ jun li molam li nakabʼlak ut aʼin kixkol hoonal ut tumin. Chi joʼkan moko kisachmank ta li kikʼoxlamank chaq: kikolmank rix 2 miyon chi dólar. Li junkabʼal Betel kiruuk chi qʼaxonk saʼ li akʼ molam naq toj maajiʼ natiklaak li COVID-19.

Anaqwan li wankebʼ Betel aran Camerún, nekeʼkʼanjelak ut wankebʼ saʼ jun chaabʼil naʼajej, nekeʼril li akʼ naʼajej aʼin joʼ jun maatan li nachalk rikʼin li Jehobʼa. Jun li sumal naxye: «Naqaj xkʼebʼal xtzʼaqobʼ li qakʼanjel re xkʼutbʼesinkil naq oxloqʼ chiqu li maatan aʼin».

Li ochoch re jalok aatin saʼ li aatinobʼaal tojolabal (México). Chiru naabʼal chihabʼ, li chʼuut li najalok aatin saʼ li aatinobʼaal tojolabal nakʼanjelak saʼ li qamolam re Centroamérica, li wank sa’ li tenamit México. Abʼanan, li xkʼihalil li nekeʼaatinak saʼ tojolabal wankebʼ saʼ li teep Altamirano ut Las Margaritas, kachʼin chik ma 1,000 kilómetros (620 millas) rikʼin li qamolam. Saʼ xkʼabʼaʼ aʼin, nachʼaʼajkoʼk chiruhebʼ laj jalol aatin xnawbʼal chanru yookebʼ chi aatinak li kristiʼaan saʼebʼ li teep aʼin. Ut chʼaʼaj ajwiʼ chiru li qamolam xtawbʼalebʼ li hermaan li teʼruuq chi tenqʼank saʼ li jalok aatin ut xxokbʼal li xyaabʼ kuxej.

Saʼ xkʼabʼaʼ aʼin, li chʼuut li naril li naxkawresi li qapaabʼal re li Nekeʼjolomink re Xmolam li Jehobʼa, kixye naq li chʼuut li najalok aatin tqʼaxonq bʼarwiʼ nekeʼaatinak saʼ tojolabal. Re xbʼaanunkil aʼin, li qamolam kixloqʼ ut kixchabʼilobʼresi jun li nimla ochoch. Aʼin jwal kubʼenaq xtzʼaq chiru xkabʼlankil malaj xtoʼoninkil ebʼ li ofisiin.

Jun laj jalol aatin naxye chanru narekʼa ribʼ: «Chiru li 10 chihabʼ li xinkʼanjelak joʼ aj jalol aatin saʼ li qamolam, moko xintaw ta junaq li junkabʼal li naʼaatinak saʼ li waatinobʼaal. Anaqwan ebʼ li ofisiin wank tzʼaqal bʼarwiʼ xkʼihalil nekeʼaatinak saʼ tojolabal. Rajlal kutan ninʼaatinak rikʼin anihaq saʼ li waatinobʼaal. Aʼin xinxtenqʼa chi xtawbʼal ru chiʼus li waatinobʼaal ut xchaabʼilobʼresinkil linkʼanjel».

Ebʼ li kʼanjel li tbʼaanumanq saʼ li chihabʼ 2021

Maare saʼ li chihabʼ 2021 tooruuq xchaabʼilobʼresinkil 75 li ofisiin re jalok aatin ut ebʼ li naʼaj re li Tzolok chirix li Yos. Joʼkan ajwiʼ t-uxmanq kʼanjelak saʼ 8 li qamolam, jun rehebʼ li wank Rámapo (Nueva York) ut xjalbʼal xnaʼaj li qamolam re Argentina ut Italia. Naʼajmank 1,000 ebʼ li akʼ Chʼutlebʼaal Kabʼl. Joʼkan ajwiʼ wank numenaq 6,000 li naʼaj re loqʼonink li inkʼaʼ nokooruuk roksinkil xbʼaan naq moko usebʼ ta ut aajel ru xjalbʼal ut 4,000 chik ebʼ li Chʼutlebʼaal Kabʼl li naʼajmank xchaabʼilobʼresinkil.

Chanru natojmank chixjunil li kʼanjel aʼin? Li hermaan Lázaro González, li naʼokenk saʼ li chʼuut li naril li qakʼanjel saʼ Centroamérica, naxsume li patzʼom aʼin. Chirix li kʼanjel saʼ li ochoch re jalok aatin saʼ li aatinobʼaal tojolabal, naxye: «Ebʼ li hermaan li wankebʼ saʼ xteep li qamolam nebʼaʼebʼ. Inkʼaʼ raj xooruuk xkabʼlankil ebʼ li ochoch re jalok aatin re jalan jalanq li aatinobʼaal, wi ebʼ li hermaan saʼ chixjunil li ruuchichʼochʼ inkʼaʼ raj xooʼeʼxtenqʼa. Saʼ xkʼabʼaʼ li tenqʼ tumin nokooruuk xtaqlankilebʼ laj jalol aatin saʼ li naʼaj bʼarwiʼ nekeʼaatinak saʼebʼ li raatinobʼaal. Naqabʼanyoxi li xtenqʼ ebʼ li hermaan». Joʼ xeekʼe reetal li kʼanjel aʼin nabʼaanumank saʼ xkʼabʼaʼ li tenqʼ tumin li nakʼemank saʼ li kʼanjel saʼ chixjunil li ruuchichʼochʼ. Li tenqʼ nakʼemank ajwiʼ saʼ donate.jw.org.