Ebʼ li kʼanjel re kabʼlak li natenqʼank re xpuktesinkil li chaabʼil esil

Choʼq re li Nekeʼjolomink re Xmolam li Jehobʼa aajel ru roksinkil li tenqʼ tumin re xkabʼlankil ebʼ li naʼajej li nokooxtenqʼa chi xkʼebʼal chi naweʼk li chaabʼil esil chirix li Xʼawabʼejilal li Yos. Joʼ eetalil, chiru li qakʼanjel saʼ li chihabʼ 2023, ebʼ li chʼuut li nekeʼril li kabʼlak ut xyiibʼankil saʼebʼ li xmolam rehebʼ laj testiiw re li Jehobʼa xeʼxsach numenaq 500 miyon chi dólara re xloqʼbʼal, xkabʼlankil ut xyiibʼankil ebʼ li Chʼutlebʼaal Kabʼl ut ebʼ li naʼajej re li nimla chʼutam saʼ chixjunil li Ruuchichʼochʼ. Ut moko kʼebʼil ta saʼ ajl chixjunil li nasachmank saʼ junjunq ebʼ li chʼuut re xchaabʼilobʼresinkil ebʼ li Chʼutlebʼaal Kabʼl.

Joʼkan ajwiʼ, li tenqʼ tumin naʼoksimank re xkabʼlankil ut xchʼolaninkil ebʼ li junjunq chi molam, li nekeʼkʼanjelak re xkʼubʼankil ut xbʼaanunkil li puktesink saʼ chixjunil li Ruuchichʼochʼ. Yaal naq xqakʼos bʼayaq li kʼanjel li nabʼaanumank saʼebʼ li junjunq chi molam re xxokbʼal li tumin choʼq re li kabʼlak, xyiibʼankil ebʼ li Chʼutlebʼaal Kabʼl ut ebʼ li naʼajej re li nimla chʼutam. Abʼan li xyaalal naq toj naʼajmank naabʼal li tumin re xyiibʼankil, xchaabʼilobʼresinkil ut xjalbʼal xnaʼaj ebʼ li molam. Kʼaʼut wank xwankil ebʼ li kʼanjel aʼin? Ut chanru natenqʼank li kʼanjel aʼin saʼ li puktesink, li nakolok yuʼam? Qilaq.

«Naqachaabʼilobʼresi aʼ yal chanru naʼajmank»

Naabʼal rehebʼ li molam xeʼkabʼlamank numenaq 30 malaj 40 chihabʼ. Laj Nicholas, li nakʼanjelak saʼ li chʼuut li naril li kabʼlak ut xyiibʼankil saʼ chixjunil li Ruuchichʼochʼ naxye: «Usta ebʼ li ochoch kabʼlanbʼilebʼ chiʼus, saʼ xnumikebʼ li chihabʼ nekeʼpoʼeʼk ut nekeʼxkʼam chaq li chʼaʼajkilal. Naq naqachaabʼilobʼresi aʼ yal chanru naʼajmank jun li ochoch, nakʼanjelak wiʼ chik chi chaabʼil».

Naʼajmank ajwiʼ xchaabʼilobʼresinkil ebʼ li naʼajej Betel joʼ naʼajmank saʼ li qamolam. Chalen naq xeʼkabʼlamank naabʼal rehebʼ li molam, qʼaxal xekʼiik ebʼ laj puktesinel. Saʼ xkʼabʼaʼ aʼin naʼajmank xkomon li teʼxyeechiʼi ribʼ chi tenqʼank re kʼanjelak aran. Aʼin naraj xyeebʼal naq ebʼ li molam aʼin moko nekeʼtzʼaqlok ta chik.

Joʼkan ajwiʼ, aajel ru naq yiibʼanbʼilaq chiʼus. Yook chaq chi nachʼok li rosoʼjik. Joʼkan naq saʼebʼ li kutan aʼin, yook chi numtaak ebʼ li nimla rahilal li naxkʼe saʼ xiwxiwal li qayuʼam (Lucas 21:11). Wi naq naqachaabʼilobʼresi junaq li molam, naqoksi li akʼ naʼlebʼ re kabʼlak, qʼaxal chaabʼil t-elq. Ut moko kaʼaj tawiʼ aʼan. Naq nakʼulmank junaq li rahilal, ebʼ li naʼajej aʼin naru t-oksimanq re xbʼeresinkil li kʼanjel re tenqʼank ut xkʼubʼankil li puktesink saʼ li teep aʼan.

«Li Jehobʼa kirosobʼtesi li xqakʼub chaq»

Saʼ li qakʼanjel re li chihabʼ 2023, li Nekeʼjolomink re xMolam li Jehobʼa kixkʼulubʼa ebʼ li kʼanjel re kabʼlak saʼ 43 chi molam, kachʼin chik ma yijach xkʼihalil li molam li wank saʼ chixjunil li Ruuchichʼochʼ! Qilaq wiibʼ rehebʼ li eetalil li naxkʼutbʼesi li xnimal ru xwankil li kʼanjel li yook chi bʼaanumank.

Angola. Laj Matt, jun rehebʼ li nakʼanjelak saʼ li chʼuut li naril li molam saʼ li tenamit aʼin, naxye: «Qʼaxal nasach qachʼool rilbʼal chanru yook chi tzʼaqlok li propesiiy li wank saʼ Ageo 2:7. Yal chiru 10 chihabʼ ebʼ laj puktesinel xeʼkʼiik jun 60%! Xʼajmank naq li junkabʼal Betel tkʼiiq rox sut li xkʼihalil re xchʼolaninkilebʼ. Abʼan moko nim ta li naʼaj re naq teʼchalq jalanebʼ chik chi tenqʼank. Joʼkan naq xnumtaak xkʼanjelebʼ li wankebʼ aran Betel».

Xbʼaan aʼin, xpatzʼmank re wiibʼ oxibʼ ebʼ li hermaan naq teʼxtzʼil rix kʼaru truuq tbʼaanumanq re xnimtresinkil li molam. Saʼ xtiklajik, xkʼoxlamank naq xchaabʼilobʼresinkil ebʼ li naʼaj li ak yook chi oksimank us t-elq ut saʼ junpaat. Abʼan, moqon xeʼxkʼe reetal naq wi nekexbʼaanu aʼan moko t-oksimanq ta chiʼus li tenqʼ tumin. Xeʼxkʼoxla naq us raj xloqʼbʼal ut xchʼaabʼilobʼresinkil jun li naʼajej li nachʼ wank. Laj Matt naxye: «Naq ebʼ li hermaan xeʼxye re li chʼuut li naril li molam chirix xloqbʼal ut xchʼaabʼilobʼresinkil jun li ochoch li nachʼ wank chaq, xʼok qakʼaʼuxl xkʼoxlankil ma tkʼanjelaq chiqu joʼ naq laaʼo raj xqakabʼla chaq. Abʼan anaqwan naqakʼe reetal naq li Jehobʼa kirosobʼtesi li xqakʼubʼ chaq xbʼaanunkil xbʼaan naq li ochoch aʼan nakʼanjelak tzʼaqal joʼ naʼajmank chiqu».

Naqakʼoxla naq maare chi seebʼ t-ajmanq wiʼ chik xnimtresinkil li molam re Angola. Abʼan rikʼin li naʼaj li tojeʼ xkabʼlamank, ebʼ li ochoch li xkʼubʼamank aran Betel ut ebʼ li xtoʼnimank, ttzʼaqloq re xbʼaanunkil li naʼajmank saʼ li tenamit aʼin, bʼarwiʼ li qakʼanjel yook chi kʼiik saʼ junpaat.

Japón. Ebʼ li xbʼeen nimla ochoch re li molam xkabʼlamank kachʼin chik ma 40 chihabʼ anaqwan ut maajunwa xeʼchʼaabʼilobʼresimank chiʼus. Xbʼaanumank chixjunil li wank saʼ quqʼ re naq chaabʼilaq ebʼ li naʼajej aʼin. Usta joʼkan, ak xeʼoksimank chiru naabʼal chihabʼ. Joʼkan naq, ak xtiklaak jun li nimla kʼanjel re xchaabʼilobʼresinkilebʼ.

Li wanjik saʼebʼ li molam kijalaak saʼ xnumikebʼ li chihabʼ. Rubʼelaj li chihabʼ 2015, aran Betel oxibʼ sut saʼ li kutan nakʼubʼamank li tzekemq. Joʼkan naq saʼ naabʼal ebʼ li waribʼaal aran Betel xkʼemank li «kokʼ naʼajej re kʼubʼank». Abʼan anaqwan, ebʼ li wankebʼ aran tento naq teʼkʼubʼanq. Joʼkan naq, re naq inkʼaʼ chʼaʼajkaq chiruhebʼ, xchaabʼilobʼresimank ebʼ li naʼaj re kʼubʼank. Li xKumiko jun li hermaan li wank saʼ li molam aran Japón naxye: «Kubʼank saʼ li naʼaj aʼin nikinxtenqʼa chi xkʼaytesinkil wibʼ saʼ linkʼanjel arin Betel. Li xyaalal naq, nawekʼa naq wankin saʼ wochoch!

Li nabʼaanumank saʼ li molam re Japón naʼokenq saʼ li kʼanjel re puktesink saʼ chixjunil li Ruuchichʼochʼ (Mateo 28:19, 20). Saʼ wiibʼ ajwiʼ ebʼ li molam li wank saʼ chixjunil li Ruuchichʼochʼ naʼisimank chi huhil li Santil Hu, ut jun rehebʼ aʼan li wank Japón. Saʼ xkʼabʼaʼ aʼin, saʼ li kʼanjel re xchʼaabʼilobʼresinkil xkʼemank jun li kʼanjelobʼaal li naxxok li poqs ut li relaʼ ebʼ li hu. Kachʼin chik ma jun miyon chi dólar xsachmank re xloqʼbʼal ut re naq t-oq chi kʼanjelak li chʼiichʼ aʼin, abʼan natenqʼank re naq us wanqebʼ li nekeʼkʼanjelak re risinkil chi huhil ebʼ li tasal hu ut xtaqlankil rehebʼ li hermaan.

Li wank tzʼaqal xwankil saʼ li hoonal aʼan naq inkʼaʼ txaqliiq li kʼanjel re risinkil chi huhil li Santil Hu. Laj Trey, jun rehebʼ li wank saʼ li chʼuut li naril li molam re Japón naxye: «Tzʼaqal saʼ xqʼehil naq yooko chi kʼanjelak, qʼaxal naabʼal chik li Santil Hu xeʼxpatzʼ, xbʼaan naq li qamolam yook chaq chi risinkil saʼ naabʼal chik chi aatinobʼaal». Naabʼalebʼ xeʼokenk re naq junelik yook chi elk chi huhil ebʼ li tasal hu. Usta xchʼaʼajkoʼk bʼayaq, chiru li po marzo toj agosto 2023 kiʼisimank chi huhil kachʼin chik ma 220,000 li Santil Hu rajlal po. Usta chiruhebʼ li po aʼan xxaqabʼamank ajwiʼ saʼ xnaʼaj li akʼ kʼanjelobʼaal chʼiichʼ. Xbʼaanumank chixjunil li kʼubʼanbʼil chi inkʼaʼ xnumtaak xkʼihalil li sachomq.

Saʼ li kʼanjel aʼin re xchaabʼilobʼresinkil li molam wank xwankil naq inkʼaʼ tsachmanq naabʼal li kaxlan xaml. T-oksimanq ebʼ li panel solar, aʼin ttenqʼanq chi xkʼuulankil 120,000 chi dólar chiru jun chihabʼ. Tkʼemanq ajwiʼ lem pim ru chiruhebʼ li bʼentaan; chi joʼkan inkʼaʼ t-oksimanq naabʼal li kaxlan xaml, aʼin tooxtenqʼa chi xxokbʼal 10,000 chi dólar chiru jun chihabʼ. Yaal naq xbʼaanunkil aʼin tixterqʼusi xtzʼaq li kʼanjel, abʼan aʼin tooxtenqʼa chi xxokbʼal naabʼal li tumin, maare junaq oxibʼ miyon chi dólar, joʼ najtil t-oksimanq, joʼ ajwiʼ xkolbʼal li sutam.

«Toj wank naabʼal li kʼanjel»

Li kʼanjel li yook chi bʼaanumank aran Angola ut Japón yal wiibʼ ajwiʼ li eetalil li naxkʼutbʼesi li naʼajmanq re naq ebʼ li molam teʼruuq xchʼolaninkilebʼ li xpaabʼal ebʼ li hermaan saʼ li teep. Abʼan toj wank naabʼal li kʼanjel li uxk naraj! Laj Aaron, li nakʼanjelak saʼ li chʼuut li nekeʼril li kabʼlak ut xyiibʼankil saʼ chixjunil li Ruuchichʼochʼ, naxye: «Naabʼal li ak xbʼaanumank chaq, abʼan toj wank naabʼal li kʼanjel…» Naxye li naʼajmank re xraqbʼal chixjunil li kʼanjel: «Saʼ xkʼabʼaʼ li tenqʼ tumin li nekeʼxkʼe ebʼ li qahermaan, nokooruuk xbʼaanunkil li kʼanjel aʼin li qʼaxal wank xwankil. Tento xbʼanyoxinkil rehebʼ li ak xeʼxyechiʼi ribʼ chi tenqʼank joʼ ajwiʼ li yookebʼ xkʼoxlankil xbʼaanunkil. Li xyaalal naq li tenqʼ tumin ut li xmetzʼewebʼ li nekeʼxkʼe ebʼ li qahermaan naxkʼutbʼesi naq li Jehobʼa yook chi qosobʼtesinkil» (Salmo 110:3).

Chixjunil li qakʼanjel re kabʼlak ut chaabʼilobʼresink naabʼaanumank saʼ xkʼabʼaʼ li tenqʼ tumin li naqakʼul, naabʼal rehebʼ nabʼaanumank saʼ donate.jw.org. Bʼanyox eere xbʼaan naq yookex chi kʼehok!