Ebʼ li kʼanjelobʼaal bʼarwiʼ natusmank ebʼ li qahu «naxchʼolobʼ li yaal chiruhebʼ chixjunil li tenamit»

Ebʼ li kokʼ kʼanjelobʼaal aʼin 10 chihabʼ qokik chi roksinkil. Ut saʼ chixjunil li Ruuchichʼochʼ naʼilmank. Naq naqakʼe saʼ jun li naʼaj, ebʼ li poyanam nekeʼril ut ak nekeʼxnaw aniho. Moko chʼaʼaj ta roksinkil ut jwal chʼinaʼusebʼ. Joʼ kixye li xʼAsenata, jun li hermaan re Polonia: «Ebʼ li kokʼ kʼanjelobʼaal aʼin jwal chʼinaʼusebʼ ut sa roksinkilebʼ. Ut moko chʼaʼaj ta xyiibʼankil ut xkʼambʼal yalaq bʼar!».

Ma xaakʼoxla junsutaq chanru kiyiibʼaak chaq?

Chanru kiyiibʼaak chaq?

Saʼ li chihabʼ 2001, li Nekeʼjolomink re xmolam li Jehobʼa keʼxkʼulubʼa naq ebʼ li hermaan re Francia teʼxyal puktesink rikʼin jalan chik li akʼ kʼanjelobʼaal. Keʼxyal rikʼin xkʼebʼal xkokʼ yantil li maleet malaj ebʼ li kokʼ kaar bʼarwiʼ nakʼemank li loqʼom re xkʼulankil ut xkʼebʼal resil ebʼ li qatasal hu. Saʼ xraqik, li molam kixkʼulubʼa jun li kʼanjelobʼaal ut ebʼ li hermaan xeʼroksi chiru naabʼal chihabʼ.

Us kiʼelk xyalbʼal roksinkil li kʼanjelobʼaal aʼin saʼ Francia. Joʼkan naq saʼ li chihabʼ 2011 li Nekeʼjolomink re xmolam li Jehobʼa kixkʼulubʼa xyalbʼal naq t-oksimanq ebʼ li kokʼ kʼanjelobʼaal ut ebʼ li meex saʼ li puktesink bʼarwiʼ nekeʼnumeʼk naabʼal li kristiʼaan saʼ li tenamit Nueva York (Estados Unidos). Ebʼ laj kʼamolbʼe li xeʼtzʼaqonk saʼ li kʼanjel aʼin xeʼxkʼe reetal naq naabʼal li rusilal wank roksinkil ebʼ kʼanjelobʼaal aʼin. Joʼ eetalil, naru xkʼambʼalebʼ yalaq bʼar. Abʼan, keʼxkʼe ajwiʼ reetal naq wank junjunq li kʼaʼaq re ru li teʼruuq raj xchaabʼilobʼresinkil. Joʼkan naq xeʼxkʼe junjunq ebʼ li naʼlebʼ. Saʼ xtiklajik ebʼ li kʼanjelobʼaal keʼxyiibʼ rikʼin cheʼ ut jwal chʼaʼaj raj xtaqsinkil ut xkubʼsinkil bʼarwiʼ wank ebʼ li grada. Joʼkan naq keʼxbʼaanu naq inkʼaʼ raj jwal aalaq, abʼan, teʼxkuy li iqʼ ut inkʼaʼ ttʼaneʼq. Joʼkan ajwiʼ, keʼxkʼe ninqi yaant re naq teʼruuq xkʼambʼal saʼebʼ li bʼe li jwal chʼaʼajkaʼq xnumsinkil. Ut keʼxkʼe jun li kaax re xkʼambʼal ebʼ li tasal hu.

Qʼaxal chaabʼil kiʼelk roksinkil ebʼ li kʼanjelobʼaal aʼin. Joʼkan naq saʼ li chihabʼ 2012, li Nekeʼjolomink re xmolam li Jehobʼa kixkʼulubʼa roksinkil ebʼ li kʼanjelobʼaal aʼin saʼ chixjunil li Ruuchichʼochʼ. Keʼxkʼe ribʼ saʼ aatin rikʼin jun laj yiibʼanel re naq tixbʼaanu naabʼal li kʼanjelobʼaal aʼin, li inkʼaʼ aalaq xkʼambʼal abʼan kawaq ribʼ.

Saʼ xnumikebʼ li chihabʼ, yookebʼ xchaabʼilobʼresinkil ebʼ li kʼanjelobʼaal aʼin. Joʼ eetalil, chalen saʼ li chihabʼ 2015 xeʼxkʼe jun li xnaylil re naq inkʼaʼ ttʼaqaaq. Li xDina, jun li hermaan li wank Georgia, jwal kiwulak chiru. Aʼan naxye: «Ebʼ li qatasal hu junelik kolbʼil xbʼaan naq li qakʼanjelobʼaal wank li xnaylon» Saʼ li chihabʼ 2017, saʼ wiibʼ oxibʼ li aatinobʼaal keʼxtikibʼ roksinkil ebʼ li eetalil li naxchap ribʼ xjunes rikʼin jun li imán. Laj Tomasz, jun li hermaan re Polonia, naxye: «Junxil qʼaxal chʼaʼaj choʼq qe xletzbʼal li eetalil malaj li calcomanía. Abʼan, anaqwan li eetalil li naxchap ribʼ xjunes jwal chaabʼilebʼ!». Saʼ li chihabʼ 2019, keʼjalmank bʼayaq chanru yiibʼanbʼilebʼ re naq inkʼaʼ teʼpoʼeʼq saʼ junpaat.

Chanru natawmank?

Jun ajwiʼ aj yiibʼanel naxbʼaanu ebʼ li kʼanjelobʼaal aʼin, ut moqon najekʼimank saʼ chixjunil li Ruuchichʼochʼ. Anaqwan li xtzʼaq li junjunq chi kʼanjelobʼaal aʼin, aʼan 43 dólares, ut jalan wiʼ xtojbʼal li xtaqlankil. Chalen xtiklaak li kʼanjel aʼin, ak xeʼxtaqla 420.000 ebʼ li kʼanjelobʼaal li moko chʼaʼaj ta xkʼambʼal saʼebʼ li junjunq chi chʼuut li wankebʼ saʼ chixjunil li Ruuchichʼochʼ, numenaq 16 miyon chi dólar ak xsachmank saʼebʼ li kʼanjelobʼaal aʼin.

Re roksinkil chiʼus li tenqʼ tumin, ebʼ li kʼanjelobʼaal aʼin nekeʼloqʼmank chi naabʼal. Joʼkan ajwiʼ, ebʼ li chʼuut anaqwan naru chik nekeʼxloqʼ li naʼajmank re xyiibʼankil li napoʼeʼk, ut moko aajel ta ru xloqʼbʼal junaq chik akʼ kʼanjelobʼaal.

Naqachʼolobʼ li yaal rikʼinebʼ li kʼanjelobʼaal bʼarwiʼ natusmank ebʼ li qahu

Kʼajoʼ nekeʼwulak chiruhebʼ li hermaan puktesink rikʼin ebʼ li kʼanjelobʼaal aʼin. Li xMartina, re Ghana naxye: «Naabʼal sut saʼ li puktesink laaʼo nokoonachʼok rikʼinebʼ li poyanam. Abʼan li nawulak chiwu naq ninpuktesink rikʼin li kʼanjelobʼaal aʼin, aʼan naq ebʼ li poyanam nekeʼnachʼok chaq qikʼin. Chixjunilebʼ li nekeʼnumeʼk ut nekeʼril li kʼanjelobʼaal aʼin, nekeʼxnaw chirix li yaal».

Saʼ jalan chik naʼajej re África, jun li winq kinachʼok chixkʼatq li kʼanjelobʼaal ut kixkʼam ebʼ li tasal hu saʼebʼ li raatinobʼaal. Jun xamaan chik chirix, kisutqʼiik wiʼ chik ut kixye rehebʼ li hermaan: «Ak xintzol chixjunil ebʼ li tasal hu. Jwal wank xwankil li naxye, joʼkan naq tinxik saʼ lintenamit re naq linjunkabʼal teʼruuq ajwiʼ xtzolbʼal li naxye». Li xjunkabʼal li winq aʼin nakanaak 500 kilómetros chixkʼatq li tenamit. Wiibʼ po chik chirix, li winq kisutqʼiik wiʼ chik ut kixye: «Saʼ lintenamit ak xeʼril chik chixjunilebʼ li tasal hu, ut kʼajoʼ naq xeʼwulak chiru li naxye. Teʼraj wank joʼ aj testiiw re li Jehobʼa. Abʼan wankebʼ junjunq li xpatzʼom. Joʼ eetalil, nekeʼxnaw naq re teʼsubʼeʼq saʼ haʼ tento naq teʼsubʼeʼq chixjunil li xjunxaqalil saʼ haʼ. Abʼanan, saʼ li naʼajej wankebʼ wiʼ maakʼaʼ junaq li nimaʼ. Ma tento teʼchalq toj arin re naq teʼsubʼeʼq saʼ haʼ?» Ebʼ li hermaan keʼxsikʼ jun laj kʼamolbʼe saʼ li puktesink re naq truuq aatinak rikʼin li winq saʼ li raatinobʼaal. Chalen aʼan, rajlal chik nekeʼaatinak.

Kʼajoʼ xchaabʼilal rilbʼal naq ebʼ li kʼanjelobʼaal aʼin yookebʼ chi oksimank re «xchʼolobʼankil li yaal chiruhebʼ chixjunil li tenamit» (Mateo 24:14, Li Santil Hu, Sociedad Bíblica de Guatemala). Saʼ xkʼabʼaʼ li tenqʼ tumin li nakʼemank saʼ chixjunil li Ruuchichʼochʼ, yookebʼ chi oksimank ebʼ li kʼanjelobʼaal aʼin, naabʼal rehebʼ li tenqʼ tumin nakʼemank saʼ donate.jw.org. Kʼajoʼ naqabʼanyoxi leetenqʼ li nekeebʼaanu chi anchal leechʼool!