Ebʼ li Awabʼej li Chaabʼilebʼ ut li Maaʼusebʼ Xnaʼlebʼ

NAQ kijachmank li tenamit Israel moko ak naabʼal chihabʼ ta xnumik naq laj Salomon kixtzʼeqtaana li Jehobʼa. Kikʼulmank chi tzʼaqal joʼ kixye chaq li Jehobʼa. Laj Rehoboam, li ralal laj Salomon, kiʼok choʼq ruuchil ut kixjolomi li tenamit Israel. Xbʼaan naq kaw kiʼok chi taqlank, lajeebʼ rehebʼ li teep keʼelk rubʼel li xʼawabʼejilal. Li wiibʼ chi teep li inkʼaʼ keʼxqʼet ribʼ chiru li xʼawabʼejilal laj David li wank Jerusalen, keʼkanaak rubʼel xʼawabʼejilal li tenamit Juda.

Saʼ xkʼabʼaʼ naq ebʼ li awabʼej aʼin inkʼaʼ keʼabʼink chi moko kawebʼ ta li xpaabʼal, moko najt ta chik keʼwank saʼ tuqtuukilal chi moko us ta chik keʼelk saʼebʼ li xʼawabʼejilal. Li 10 chi teep re Israel qʼaxal yiibʼru kixbʼaanu xbʼaan naq chalen saʼ xtiklajik ebʼ li awabʼej keʼxchʼik li bʼalaqʼil paabʼal saʼ li tenamit. Li Yos kixtaqlahebʼ li xpropeet joʼ laj Elias ut laj Eliseo re naq teʼxjal xnaʼlebʼ, usta keʼwaklesink kamenaq moko keʼabʼink ta. Joʼkan naq, li Yos kixkanabʼ naq ebʼ laj Asiria teʼreechani li tenamit Israel.

Ak xnumeʼk jun siʼeent chihabʼ xbʼaanunkil aʼin naq li Yos kiraqok aatin saʼ xbʼeenebʼ laj Juda. Ebʼ li xpropeet li Yos keʼxqʼus ebʼ li awabʼej abʼan wiibʼ oxibʼ ajwiʼ keʼabʼink ut keʼok xkʼeebʼal xnaʼlebʼ li tenamit. Ut jun rehebʼ aʼan li awabʼej Josias. Li awabʼej aʼin kixkʼe xchʼool chi xsachbʼal xnaʼajebʼ li pechʼbʼil yos ut kixyiibʼ wiʼ chik li Rochoch li Jehobʼa. Naq yookebʼ xyiibʼankil li ochoch aʼin, keʼxtaw li chaqʼrabʼ li kikʼeheʼk chaq re laj Moises. Joʼkan naq, chi sa saʼ xchʼool laj Josias kiʼok chi kʼanjelak chi kaw re xmesbʼal li naʼaj.

Abʼanan, li keʼkanaak chi awabʼejink saʼ xnaʼaj laj Josias moko keʼxkʼam ta re rikʼin. Joʼkan naq, li Jehobʼa kixkanabʼ naq ebʼ laj Babilonia teʼreechani li tenamit Juda ut teʼxjukʼ li tenamit Jerusalen ut li Rochoch li Yos. Ut li keʼkoleʼk, keʼkʼameʼk Babilonia choʼq moos, ut li Yos ak kixye chaq naq tnumeʼq 70 chihabʼ re naq teʼsutqʼiiq saʼ xtenamitebʼ. Ut chiruhebʼ li chihabʼ aʼin, maaʼani chik kinaʼajink saʼ li tenamit Juda.

Li Yos kixye naq maaʼani rehebʼ li ralal xkʼajol laj David tnaʼajinq saʼ li xkʼojaribʼaal, kaʼajwiʼ li Sikʼbʼil Ru. Rikʼinebʼ li xnaʼlebʼ li ralal xkʼajol laj David keʼxkʼutbʼesi naq li winq moko yoobʼtesinbʼil ta re awabʼejink. Kaʼajwiʼ li Sikʼbʼil Ru truuq xbʼaanunkil aʼin. Joʼkan naq li Jehobʼa kixye re li xraqijebʼ li awabʼej aʼin: «Taaʼawabʼejinq saʼ xbʼeen li rochoch laj Jakob chi junelik, ut li xnimal awabʼejihom inkʼaʼ taalajq taaʼosoʼq» (Lucas 1:33).

(Isinbʼil chaq saʼ 1 Reyes, 2 Reyes, saʼ 2 Cronicas tasal 10-36 ut saʼ Jeremias 25:8-11.)