Naq nachalk junaq rahilal

Usta taakʼe aaqʼe chi wank saʼ sahilal saʼ laasumlajik ut saʼ laajunkabʼal, abʼan maare maakʼaʼ saʼ laachʼool naq tchalq junaq li rahilal saʼ eebʼeen, ut aʼan trahobʼtesinq re laachʼool (Eclesiastes 9:12). Li Yos junelik nokooxtenqʼa naq wanko saʼ rahilal. Wi nekeeyuʼami ebʼ li raqal li Santil Hu li ok qe chi rilbʼal, laajunkabʼal ut laaʼat texruuq xkuybʼal yalaq kʼaru chi chʼaʼajkilal.

1. KʼOJOBʼ AACHʼOOL RIKʼIN LI JEHOBʼA

LI NAXYE LI SANTIL HU: «Qʼaxtesihomaq saʼ ruqʼ li Yos chixjunil li kʼaʼuxl wiʼ eechʼool, xbʼaan naq Aʼan naʼilok eere» (1 Pedro 5:7). Jultikoʼq aawe naq moko li Yos ta nakʼamok chaq re li chʼaʼajkilal (Santiago 1:13). Wi nakatjilok chixkʼatq, tatxtenqʼa (Isaias 41:10). «Tehomaq leechʼool chiru.» (Salmo 62:9 [62:8, Wy].)

Wi nakaawil ut nakaatzol wulaj wulaj li Santil Hu, tixkʼojobʼ ajwiʼ laachʼool. Ut wi nakaabʼaanu, taakʼe reetal naq li Jehobʼa «nakʼojobʼank qachʼool saʼ chixjunil li qarahilal» (2 Corintios 1:3, 4; Romanos 15:4). Joʼkan naq naxye: «Li tuqtuukil usilal li nachalk rikʼin li Yos [...] naxqʼax ru chixjunil li naʼlebʼ» (Filipenses 4:6, 7, 13).

NARU NAKAABʼAANU AʼIN:

• Tzʼaama re li Jehobʼa naq tatxtenqʼa chi xtuqubʼankil aachʼool ut chi kʼoxlak chiʼus

• Kʼoxla li junjunq chi naʼlebʼ re rilbʼal bʼar wank tkʼanjelaq chaawu

2. CHAAWIL AAWIBʼ LAAʼAT UT LAAJUNKABʼAL

LI NAXYE LI SANTIL HU: «Ebʼ li wankebʼ xnaʼlebʼ ut seebʼ xkʼaʼuxebʼ nekeʼxsikʼ xtzʼaqobʼ li xnaʼlebʼ, ut nekeʼxtaw» (Proverbios 18:15). Tzʼil rix chiʼus kʼaru nekeʼraj chixjunqalebʼ saʼ laajunkabʼal. Aatinan rikʼinebʼ ut kʼe aachʼool chi rabʼinkilebʼ (Proverbios 20:5).

Ut wi nakamk junaq rehebʼ laajunkabʼal? Matxutaanak chi yaabʼak. Jultikoʼq aawe naq li Jesus kiyaabʼak ajwiʼ (Juan 11:35; Eclesiastes 3:4). Ut aajel ajwiʼ ru naq tathilanq ut tatwarq chiʼus (Eclesiastes 4:6). Ut aʼin ttenqʼanq aawe chi xkuybʼal li rahilal.

NARU NAKAABʼAANU AʼIN:

• Kʼaytesi aawibʼ chi aatinak rikʼin laajunkabʼal naq toj maajiʼ nachalk junaq li rahilal. Ut chi joʼkan, moko teʼkʼoxlaq ta chi aatinak aawikʼin

• Seeraqʼink rikʼin junaq li qas qiitzʼin li ak xkʼul ajwiʼ li rahilal aʼin

3. SIKʼ AATENQʼANKIL

LI NAXYE LI SANTIL HU: «Li tzʼaqal amiiw junelik narahok; saʼ xqʼehil junaq rahilal tatxtenqʼa joʼ junaq tzʼaqal asbʼej» (Proverbios 17:17). Maare ebʼ laawamiiw teʼraj aatenqʼankil, abʼan inkʼaʼ nekeʼxnaw chanru teʼxbʼaanu. Taaye rehebʼ kʼaru teʼruuq xbʼaanunkil (Proverbios 12:25). Taasikʼ ajwiʼ aatenqʼankil chirix li Yos rikʼinebʼ li nekeʼxtaw ru chiʼus li Santil Hu. Rikʼin li naʼlebʼ li teʼxkʼe aawe, tat-elq chi ubʼej (Santiago 5:14).

Wi kʼaynaqat chi wank rikʼinebʼ li kawebʼ xpaabʼal ut li nekeʼxkʼojobʼ xchʼool chirix li xyeechiʼom li Yos, taataw aatenqʼankil rikʼinebʼ. Ut taataw ajwiʼ xkʼojobʼankil aachʼool wi nakaatenqʼa li rahebʼ saʼ xchʼool. Aatinan rikʼinebʼ chirix laapaabʼal ut chirix li xyeechiʼom li Jehobʼa. Maakanabʼ xtenqʼankilebʼ li qas qiitzʼin ut wank chixkʼatq li nekeʼrahok aawe ut li nakateʼxkʼoxla (Proverbios 18:1; 1 Corintios 15:58).

NARU NAKAABʼAANU AʼIN:

• Aatinan rikʼin junaq laawamiiw ut kanabʼ naq tatxtenqʼa

• Taaye kʼaru tzʼaqal nakaawaj