Chanru tqoksi ebʼ li tratado re xtikibʼankil aatinak?

Chalen chaq li po Enero 2018, saʼ li xbʼeen perel re li Xhuhil li qachʼutam kiʼok chi elk junjunq li eetalil chirix chanru tqatikibʼ seeraqʼik. Nayeemank qe naq moko kaʼaj tawiʼ tqayeechiʼi ebʼ li hu, tento bʼan tooʼaatinaq rikʼinebʼ li poyanam. Re naq tooruuq xbʼaanunkil, ebʼ li bʼideo re li tasal «Ebʼ li eetalil re aatinak» nekeʼxkʼut chiqu chanru tqatikibʼ aatinak kaʼajwiʼ rikʼin roksinkil li Santil Hu. Abʼanan, ma naraj xyeebʼal aʼin naq inkʼaʼ naru tqoksi ebʼ li tasal hu naq toopuktesinq chirekabʼlal? Moko joʼkan ta. Jun li eetalil, ebʼ li tratado naru nokooxtenqʼa re naq tqatikibʼ aatinak. Naq tqoksi, naru tqabʼaanu aʼin:

1. Tqabʼaanu li patzʼom li wank chiru li tratado ut tqakanabʼ naq tixsikʼ li xsumenkil.

2. Tqakʼut chiru li xraqal li Santil Hu li wank saʼ xtiklajik li xkabʼ perel. Wi li poyanam wank xhoonal, tqayaabʼasi ut tqatzʼil rix li esil li wank chisaʼ.

3. Tqakʼe li tratado re li poyanam ut tqaye re, naq tixchoy rilbʼal xsaʼ naq wanq xhoonal.

4. Naq ak xik qe, tqakʼut chiru li wank rubʼel li aatin «Kʼoxla li patzʼom aʼin» ut tqaye re joqʼe toosutqʼiiq chi xsumenkil rikʼin li Santil Hu.

Naq toosutqʼiiq, tqatzʼil rix li xsumenkil ut tqakanabʼ jun chik li patzʼom re xsumenkil saʼ junaq chik kutan. Naru tqasikʼ junaq li patzʼom li wank saʼ li qanaʼaj saʼ Internet malaj saʼ li hu li wank chirix li tratado. Naq tixkʼe ribʼ chiqu, tqayeechiʼi li folleto Li chaabʼil esil li nachalk rikʼin li Yos malaj junaq chik li wank saʼ li kʼanjelobʼaal re kʼutuk li naqoksi re xtzolbʼalebʼ li poyanam.