TZOLOM 05
Saʼ li Santil Hu natawmank li naxye qe li Yos
Li Jehobʼa kixkʼe qe jun li loqʼlaj maatan, aʼ li Santil Hu. Chisaʼ natawmank 66 chi hu. Maare nakaakʼoxla: «Bʼar chalenaq li Santil Hu? Ani aj kʼaʼuxl wank chisaʼ?». Re xsumenkil ebʼ li patzʼom aʼin qatzʼilaq rix kʼaru kibʼaanumank re naq toj wanq saʼebʼ li qakutan.
1. Wi ebʼ li winq keʼtzʼiibʼank re, kʼaʼut nayeemank naq Raatin li Yos?
Li Santil Hu kitzʼiibʼaak tana xbʼaan 40 chi winq li jalan jalanq xwanjikebʼ ut xkʼanjelebʼ. Keʼxtikibʼ xtzʼiibʼankil saʼ li chihabʼ 1513 naq toj maajiʼ nachalk li Jesús saʼ Ruuchichʼochʼ ut kiraqmank saʼ li chihabʼ 98. Kitzʼiibʼaak tana chiru 1600 chihabʼ, usta joʼkan moko jalpaq ta li naʼlebʼ li wank chisaʼ. Chanru keʼruuk xbʼaanunkil? Xbʼaan naq li xkʼaʼuxl li Yos wank chisaʼ (yaabʼasi 1 Tesalonicenses 2:13). Ebʼ li winq aʼin moko keʼxtzʼiibʼa ta li xkʼaʼuxebʼ. «Keʼaatinak joʼ kiyeheʼk chaq rehebʼ xbʼaan li Yos» (2 Pedro 1:21).a Li Yos kiroksi li xsantil musiqʼej re naq ebʼ li winq li keʼtzʼiibʼank re teʼxtzʼiibʼa li xkʼaʼuxl (2 Timoteo 3:16).
2. Ani truuq xtawbʼal rusilal li Santil Hu?
«Chixjunil li amaq ut tenamit yalaq chanru nekeʼilok ut nekeʼaatinak» naru nekeʼxtaw rusilal li chaabʼil esil li wank saʼ li Santil Hu (yaabʼasi Apocalipsis 14:6). Li Yos kixbʼaanu naq li Santil Hu tjalmanq ru saʼ jalan jalanq chi aatinobʼaal, ut maakʼaʼ chik junaq hu li najalmank ru joʼ li Santil Hu. Kachʼin chik ma chixjunilebʼ li kristiʼaan naru nekeʼxnaw li naxye li Santil Hu maakʼaʼ naxye kʼaru li raatinobʼaalebʼ malaj bʼar wankebʼ.
3. Kʼaru kixbʼaanu li Jehobʼa re xkolbʼal li Santil Hu?
Li Santil Hu kitzʼiibʼaak chiruhebʼ li kʼaʼaq re ru li saʼ junpaat naqʼaak malaj napejeʼk. Wiibʼ oxibʼ li winq li nekeʼroxloqʼi chaq li Santil Hu keʼxtzʼiibʼa wiʼ chik chi chʼolchʼo ru li naxye. Wiibʼ oxibʼ li kristiʼaan li wankebʼ xwankil keʼxyal xsachbʼal li Santil Hu. Abʼan li nekeʼroxloqʼi chaq, keʼxkʼe xyuʼam saʼ xiwxiwal re xkolbʼal rix li Santil Hu. Maaʼani naramok chiru li Jehobʼa xyeebʼal qe li naraj. Li Santil Hu naxye: «Li raatin li qaYos wank chi junelik» (Isaías 40:8).
QASIKʼAQ XCHAMAL LI NAʼLEBʼ
Qatzʼilaq rix chanru li Yos kiroksi li xsantil musiqʼej re naq wiibʼ oxibʼ li winq teʼxtzʼiibʼa li Santil Hu. Ut li kixbʼaanu re xkolbʼal chaq ut re naq ebʼ li kristiʼaan teʼruuq rilbʼal xsaʼ.
4. Li Santil Hu naxye ani aj kʼaʼuxl wank chisaʼ
Cheerilaq li BʼIDEO. Moqon chik cheeyaabʼasi 2 Timoteo 3:16 ut chexʼaatinaq chirix ebʼ li patzʼom aʼin:
Wi ebʼ li winq keʼtzʼiibʼank re li Santil Hu, kʼaʼut nayeemank naq Raatin li Yos?
Ma nakaapaabʼ naq li Yos kixye rehebʼ li winq aʼin li naxkʼoxla?
Li moos natzʼiibʼank re li esilhu, abʼan moko re ta. Joʼkan ajwiʼ kikʼulmank rikʼin li Santil Hu, winq keʼtzʼiibʼank re, abʼan xkʼaʼuxl li Yos wank chisaʼ.
5. Naabʼal sut kikoleʼk li Santil Hu naq keʼraj xsachbʼal
Wi li Santil Hu aʼan Raatin li Yos chʼolchʼo naq tixkol rix. Saʼ xnumikebʼ li chihabʼ naabʼal ebʼ li awabʼej keʼraj xsachbʼal li Santil Hu. Joʼkan ajwiʼ naabʼalebʼ laj kʼamolbʼe saʼebʼ li paabʼal inkʼaʼ keʼraj naq ebʼ li kristiʼaan teʼril xsaʼ li Santil Hu. Abʼan wankebʼ keʼxkol rix li Santil Hu usta xikʼ keʼileʼk ut keʼxkʼe saʼ xiwxiwal li xyuʼam. Re xnawbʼal ru jun rehebʼ li winq aʼin cheerilaq li BʼIDEO ut chexʼaatinaq chirix li patzʼom aʼin:
Naq xaawabʼi kʼaru keʼxbʼaanu li kristiʼaan re xkolbʼal li Santil Hu, ma naʼalaak saʼ laachʼool rilbʼal xsaʼ? Kʼaʼut?
Cheeyaabʼasi Salmo 119:97 ut chexʼaatinaq chirix li patzʼom aʼin:
Kʼaʼut naq naabʼal li kristiʼaan keʼxkʼe saʼ xiwxiwal li xyuʼam re xjalbʼal saʼ jalan chik chi aatinobʼaal li Santil Hu ut re xjekʼinkil?
6. Jun li tasal hu choʼq re chixjunilebʼ li kristiʼaan
Maajun chik li hu najalmank saʼ jalan chik chi aatinobʼaal ut najekʼimank joʼ li Santil Hu. Cheeyaabʼasi Hechos 10:34, 35 ut chexʼaatinaq chirix ebʼ li patzʼom aʼin:
Kʼaʼut naraj li Jehobʼa naq tjalmanq li Santil Hu saʼ jalan jalanq chi aatinobʼaal ut yalaq bʼar tjekʼimanq?
Kʼaru nawulak chaawu chirix li Santil Hu?
Kachʼin chik ma
chixjunilebʼ
li kristiʼaan saʼ li Ruuchichʼochʼ
naru nekeʼril xsaʼ li Santil Hu saʼ li raatinobʼaalebʼ
Natawmank saʼ numenaq
3,000
chi aatinobʼaal,
chi tasal malaj chixjunil
5,000 miyon
li ak xʼelk chi huhil.
Maakʼaʼ chik junaq li hu li tixtaw li ajl aʼin
WIIBʼ OXIBʼ NEKEʼXYE: «Li Santil Hu yal jun najteril hu tzʼiibʼanbʼil xbʼaanebʼ li winq».
Kʼaru nakaakʼoxla laaʼat?
Kʼaru naxkʼutbʼesi naq li Santil Hu Raatin li Yos?
LI AK XQATZOL
Li Santil Hu Raatin li Yos ut kixbʼaanu naq chixjunilebʼ li kristiʼaan teʼruuq rilbʼal xsaʼ.
Qajultikaq
Kʼaru naraj xyeebʼal naq li Yos kixmusiqʼa ebʼ li winq re naq teʼxtzʼiibʼa li Santil Hu?
Kʼaru xwulak chaawu naq xaawabʼi naq xkoleʼk li Santil Hu? ut naq najalmank saʼ jalan jalanq chi aatinobʼaal ut najekʼimank?
Kʼaru nakaawekʼa naq nakaanaw chixjunil li kixbʼaanu li Yos re naq taanaw li naxye aawe saʼ li Santil Hu?
SIKʼ XKOMON LI NAʼLEBʼ
Tzol li kikʼulmank chaq rikʼin li Santil Hu chalen saʼ xtiklajik toj saʼ li qakutan.
«Chanru xwulak li Santil Hu saʼebʼ li qakutan» (Ajsi aawu!, noviembre 2007)
Tzol chanru kikoleʼk li Santil Hu chiru oxibʼ li naʼlebʼ.
«Chanru kikoleʼk li Santil Hu?» (Laj Kʼaakʼalehom, ajl 4 2016)
Kʼe reetal chanru wiibʼ oxibʼ li kristiʼaan keʼxkʼe saʼ xiwxiwal li xyuʼam re xjalbʼal saʼ jalan chik chi aatinobʼaal li Santil Hu.
Saʼ xkʼabʼaʼ naq li Santil Hu isinbʼil saʼ jalan jalanq chi aatinobʼaal, chanru taanaw naq moko xjalmank ta li naxye?
«Ma xjalmank malaj xjalpaqimank li Santil Hu?» (Li naʼlebʼ re jw.org)
a Saʼ li tzolom 07 tqil naq li xsantil musiqʼej li Yos aʼan li xmetzʼew li naroksi re xbʼaanunkil li naraj.