Chanru tqanaw anihebʼ li tzʼaqal aj paabʼanel?

Naabʼalebʼ li kristiʼaan nekeʼxye naq aʼanebʼ aj paabʼanel abʼan moko juntaqʼeet ta li nekeʼxpaabʼ chi moko li xnaʼlebʼebʼ. Joʼkan naq, chanru tooruuq xnawbʼal anihebʼ li tzʼaqal aj paabʼanel?

1. Anihebʼ li tzʼaqal aj paabʼanel?

Aʼanebʼ li xtzolom li Jesukriist (yaabʼasi Hechos 11:26). Chanru nekeʼxkʼut naq nekeʼabʼink chiru? Li Jesús kixye: «Wi laaʼex teebʼaanu li kʼaru ninye eere, laaʼexaq tzʼaqal intzolom» (Juan 8:31, Wy). Aʼin naraj xyeebʼal naq ebʼ laj paabʼanel tento teʼxyuʼami li naxye li Jesús. Ebʼ li tzʼaqal aj paabʼanel nekeʼxkʼut li naxye li Santil Hu joʼ kixbʼaanu chaq li Jesús (yaabʼasi Lucas 24:27).

2. Chanru nekeʼxkʼutbʼesi li rahok ebʼ li tzʼaqal aj paabʼanel?

Li Jesús kixye rehebʼ li xtzolom: «Chera eeribʼ cheribʼil eeribʼ joʼ naq xexinra laaʼin» (Juan 15:12). Chanru kixkʼutbʼesi li Jesús naq naxrahebʼ li xtzolom? Kirochbʼenihebʼ, kixwaklesihebʼ xchʼool, kixtenqʼahebʼ ut kixqʼaxtesi ajwiʼ li xyuʼam saʼ xkʼabʼaʼebʼ (1 Juan 3:16). Ebʼ li tzʼaqal aj paabʼanel moko kaʼaj tawiʼ nekeʼxye naq nekeʼrahok, nekeʼxkʼutbʼesi bʼan rikʼinebʼ li raatin ut ebʼ li xbʼaanuhom joʼ kixbʼaanu li Jesús.

3. Kʼaru xnimal ru kʼanjel nekeʼxbʼaanu ebʼ li tzʼaqal aj paabʼanel?

Li Jesús kixkʼe jun li kʼanjel rehebʼ li xtzolom. «Kixtaqlahebʼ chi xpuktesinkil resil li xnimajwal awabʼejihom li Yos» (Lucas 9:2). Ebʼ li xbʼeen aj paabʼanel moko kaʼaj tawiʼ nekeʼpuktesink saʼebʼ li chʼutlebʼaal kabʼl, nekeʼpuktesink chirekabʼlal ut yalaq bʼar (yaabʼasi Hechos 5:42; 17:17). Saʼebʼ li qakutan ebʼ li tzʼaqal aj paabʼanel yalaq bʼar nekeʼxkʼut li yaal chirix li Santil Hu. Xbʼaan naq nekeʼrahok nekeʼroksi li xhoonal ut li xmetzʼew re xkʼebʼal chi naweʼk li xyeechiʼom li Yos ut xwaklesinkilebʼ xchʼool ebʼ li qas qiitzʼin rikʼin li Santil Hu (Marcos 12:31).

QASIKʼAQ XCHAMAL LI NAʼLEBʼ

4. Nekeʼxsikʼ li yaal li wank saʼ li Santil Hu

Moko chixjunilebʼ ta li nekeʼxye naq ebʼ aj paabʼanel nekeʼxkʼe xwankil li wank saʼ li Santil Hu. Cheerilaq li BʼIDEO ut chexʼaatinaq chirix li patzʼom aʼin:

BʼIDEO: Chanru keʼxtzʼajni li tzʼaqal paabʼal? (5:11)

• Kʼaru keʼxbʼaanu wiibʼ oxibʼ li iklees re naq ebʼ li kristiʼaan inkʼaʼ teʼxnaw li kixye li Jesús?

Li Jesús kixkʼut li yaal li wank saʼ li Santil Hu. Cheeyaabʼasi Juan 18:37 ut chexʼaatinaq chirix li patzʼom aʼin:

• Joʼ kixye li Jesús, chanru tqanaw anihebʼ li kristiʼaan li nekeʼokenk «chirix li yaal»?

5. Nekeʼxkʼe chi naweʼk li yaal li wank saʼ li Santil Hu

Naq ok re chi xikʼ saʼ choxa li Jesús kixkʼe rehebʼ li xtzolom jun li kʼanjel li toj nabʼaanumank anaqwan. Cheeyaabʼasi Mateo 28:19, 20 ut Hechos 1:8 ut chexʼaatinaq chirix li patzʼom aʼin:

• Toj bʼar nekeʼwulak chi xkʼebʼal resil li yaal ut toj joqʼe teʼxbʼaanu?

6. Nekeʼxyuʼami li naʼlebʼ li nekeʼxkʼut

Kʼaʼut chʼolchʼo chiru laj Tom naq kixtaw li tzʼaqal paabʼal? Cheerilaq li BʼIDEO ut chexʼaatinaq chirix ebʼ li patzʼom aʼin:

BʼIDEO: Xchʼina linchʼool xbʼaanebʼ li paabʼal (5:20)

• Kʼaʼut kichʼinaak xchʼool laj Tom?

• Chanru kixnaw laj Tom naq kixtaw li tzʼaqal paabʼal?

Bʼaanu li nakaaye. Cheeyaabʼasi Mateo 7:21 ut chexʼaatinaq chirix li patzʼom aʼin:

• Kʼaru naxkʼe reetal li Jesús, ma li naqaye malaj li naqabʼaanu?

7. Nekeʼxra ribʼ chiribʼilebʼ ribʼ

Ma relik chi yaal nekeʼxkʼe saʼ xiwxiwal li xyuʼam re xkolbʼalebʼ li rechpaabʼanel? Cheerilaq li BʼIDEO ut chexʼaatinaq chirix ebʼ li patzʼom aʼin:

BʼIDEO: Xinkʼe saʼ xiwxiwal linyuʼam (2:55)

• Kʼaʼut naq li hermaan Lloyd inkʼaʼ kixkʼoxla wiibʼ sut xkolbʼal li xyuʼam li hermaan Johansson?

• Ma nakaakʼoxla naq kinaʼlebʼak joʼ jun tzʼaqal aj paabʼanel?

• Chan raj ru teʼril ebʼ li tzʼaqal aj paabʼanel ebʼ li junchʼol chi kristiʼaan?

• Chan raj ru teʼxbʼaanu aʼin naq yook li yalok u?

LI AK XQATZOL

Ebʼ li tzʼaqal aj paabʼanel nekeʼxyuʼami li naxye li Santil Hu, saʼ xkʼabʼaʼ naq nekeʼxra ribʼebʼ nekeʼxbʼaanu chixjunil li nekeʼruuk re xtenqʼankilebʼ li junchʼol ut nekeʼxkʼe chi naweʼk li yaal li wank saʼ li Santil Hu.

Qajultikaq

• Bʼar chalenaq li nekeʼxpaabʼ li tzʼaqal aj paabʼanel?

• Kʼaru nakʼutbʼesink re anihebʼ li tzʼaqal aj paabʼanel?

• Kʼaru li kʼanjel nekeʼxbʼaanu?

SIKʼ XKOMON LI NAʼLEBʼ

Kʼe reetal chanru jun li chʼuut nekeʼxyal xqʼe chi xkʼambʼal rehebʼ rikʼin li Jesús.

Aniho laj Testiiw re li Jehobʼa? (1:13)

Tzol chanru jun li moonj kixtaw li xtenamit li Jehobʼa.

«Xeʼxsume chixjunil linpatzʼom rikʼin li Santil Hu» (Laj Kʼaakʼalehom, 1 re abril 2014)

Kʼe reetal chanru ebʼ li tzʼaqal aj paabʼanel nekeʼxtenqʼa ebʼ li rechpaabʼanel naq wank li rahilal.

Naqatenqʼahebʼ li qechpaabʼanel naq wank li rahilal (moko chixjunil ta) (3:57)

Li Jesús kixye chanru teʼnaʼlebʼaq ebʼ li xtzolom. Kʼe reetal chanru juntaqʼeetebʼ laj paabʼanel anaqwan rikʼinebʼ li xbʼeen aj paabʼanel.

«Kʼaru nakʼutbʼesink re anihebʼ li tzʼaqal aj paabʼanel?» (Laj Kʼaakʼalehom, 1 re marzo 2012)