Chootzʼaqonq chirix li Xʼawabʼejilal li Yos!

Joʼ kixye li Jesús, yook chaq chi nachʼok jun li nimla rahilal li chanchan jun li «kaqsut-iqʼ» (Mateo 24:21). Usta inkʼaʼ tooruuq chi elelik chiru, abʼan naru tqasikʼ bʼar tqakol qibʼ. Kʼaru tento tqabʼaanu?

Naq li Jesukriist kixkʼe li seeraqʼ saʼ li tzuul, kixye: «Sikʼomaq xbʼenwa li xnimajwal awabʼejihom li Yos ut li tiikilal li nachalk rikʼin» (Mateo 6:33). Kʼaru naraj xyeebʼal aʼin?

«Sikʼomaq xbʼenwa li xnimajwal awabʼejihom li Yos». Aʼin naraj xyeebʼal naq aʼan wanq xwankil chiru chixjunil (Mateo 6:25, 32, 33). Xbʼaan naq laaʼo inkʼaʼ nokooruuk xtuqubʼankil ru li chʼaʼajkilal. Kaʼajwiʼ li Xʼawabʼejilal li Yos truuq xbʼaanunkil.

Sikʼomaq «li tiikilal li nachalk rikʼin» li Yos. Aʼin naraj xyeebʼal naq tqakʼe qachʼool chi xpaabʼankil li xchaqʼrabʼ ut li xnaʼlebʼ li Yos. Xbʼaan naq wi laaʼo tqaye kʼaru li us ut li inkʼaʼ us, tqachʼik qibʼ saʼ chʼaʼajkilal (Proverbios 16:25). Abʼan, wi tqapaabʼ li xchaqʼrabʼ li Yos, tqasahobʼresi xchʼool ut us tooʼelq (Isaías 48:17, 18).

Kʼaʼut kixye li Jesús: «Sikʼomaq xbʼenwa li xnimajwal awabʼejihom li Yos ut li tiikilal li nachalk rikʼin»? Xbʼaan naq maare wank ani tixkʼoxla naq us wanq wi tixsikʼ li bʼihomal. Junaq chik maare txik xchʼool chi xsikʼbʼal li naʼajmank chiru ut maakʼaʼaq chik xhoonal re xsikʼbʼal xbʼeenwa li Xʼawabʼejilal li Yos (Mateo 6:19-21, 25-32).

Li Jesús kixye naq maakʼaʼ tpaltoʼq qe ut tqakʼul naabʼal li osobʼtesihom wi naqasikʼ xbʼeenwa li Xʼawabʼejilal li Yos (Mateo 6:33).

Ebʼ li xtzolom li Jesús moko keʼril ta li xraqik li rahilal usta keʼxsikʼ li Xʼawabʼejilal li Yos ut li xtiikilal. Abʼan keʼxtaw bʼar tzʼaqal teʼxkol ribʼ. Chanru keʼxbʼaanu?

Xpaabʼankil li xchaqʼrabʼ li Jehobʼa kitenqʼank rehebʼ li xtzolom li Jesús chiru li chʼaʼajkilal li nekeʼxkʼul li inkʼaʼ nekeʼxpaabʼ li Yos. Keʼruuk xqʼaxbʼal ru li xninqal ru chʼaʼajkilal xbʼaan naq keʼxkʼojobʼ xchʼool chirix li Xʼawabʼejilal li Yos. Li Yos kixkʼe rehebʼ li «xnimal ru wankilal» re naq teʼruuq xkuybʼal (2 Corintios 4:7-9).

MA TAASIKʼ XBʼEENWA LI XʼAWABʼEJILAL LI YOS?

Ebʼ li xbʼeen aj paabʼanel keʼxsikʼ xbʼeenwa li Xʼawabʼejilal li Yos joʼ kixye li Jesús rehebʼ. Keʼxpuktesi li chaabʼil esilal saʼ xteepebʼ (Colosenses 1:23). Ma wank ani nabʼaanunk re aʼin saʼebʼ li qakutan?

Ebʼ laj testiiw re li Jehobʼa nekeʼxnaw naq chi seebʼ li Xʼawabʼejilal li Yos trisi chixjunil li xmaaʼusilal li ruuchichʼochʼ. Joʼkan naq nekeʼxkʼe xchʼool chi xpaabʼankil li kixye li Jesús: «Taapuktesimanq li chaabʼil esilal aʼin chirix li xnimajwal wankilal li choxa saʼ chixjunil li ruuchichʼochʼ re xchʼolobʼankil li yaal chiruhebʼ chixjunil li tenamit: tojaʼ naq taachalq li rosoʼjik» (Mateo 24:14).

Kʼaru taabʼaanu naq taawabʼi li chaabʼil esil aʼin? Us raj naq taakʼam aawe rikʼinebʼ li keʼwank chaq saʼ li tenamit Berea, saʼ Macedonia. Naq keʼrabʼi li chaabʼil esil li kixpuktesi li apóstol Pablo, keʼxkʼulubʼa «chi anchalebʼ xchʼool», keʼxtzʼil rix chiʼus «li Santil Hu» re xnawbʼal ma yaal li keʼrabʼi ut keʼxyuʼami (Hechos 17:11, 12).

Laaʼat naru ajwiʼ taabʼaanu aʼin. Wi taasikʼ xbʼeenwa li Xʼawabʼejilal li Yos ut li xtiikilal, taataw aakolbʼal anaqwan ut saʼebʼ li kutan chalk re tatwanq saʼ tuqtuukilal ut saʼ sahilal chi junelik.