Xpatzʼom ebʼ laj ilol hu

Naq laj David kixye naq tixloqʼoni li xkʼabʼaʼ li Yos chi «junelik» li natawmank saʼ Salmo 61:9, ma kiraj xyeebʼal naq maajunwa tkamq?

Inkʼaʼ. Moko aʼan ta kiraj xyeebʼal.

Kʼoxla li kixtzʼiibʼa saʼ li raqal aʼin ut saʼ jalan chik li chanchan ajwiʼ aʼin. Kixye: «Tinbʼichanq junelik saʼ laakʼabʼaʼ ut rajlal kutan tinbʼaanu li xinyeechiʼi aawe», «At Qaawaʼ, at inYos, ninyoxink chawu chi anchal linchʼool ut junelik tinkʼe xloqʼal laakʼabʼaʼ» ut «Tinloqʼoni laakʼabʼaʼ chi junelik» (Sal. 61:9; 86:12; 145:1, 2).

Moko kixkʼe ta xbʼeen li kixye laj David. Naxnaw naq saʼ jun kutan tkamq xbʼaan naq li maak naxkʼam chaq li kamk. Ut laj David naxnaw naq aʼan aj maak (Gén. 3:3, 17-19; Sal. 51:6, 7). Chʼolchʼo chiru naq ebʼ laj kʼanjel chiru li Yos joʼ laj Abrahán, laj Isaac ut laj Jacob xeʼkamk. Joʼkan ajwiʼ, naxkʼe reetal naq li xyuʼam yook chi lajk chi osoʼk (Sal. 37:25; 39:5). Abʼanan li kixye saʼ Salmo 61:9 naxkʼutbʼesi naq naraj xloqʼoninkil ru li Yos chi junelik, malaj, naq toj yoʼyooq (2 Sam. 7:12).

Laj David kixtzʼiibʼa ajwiʼ chirix li kixkʼul, joʼ naʼilmank saʼebʼ li xjolomil li Salmo 18, 51 ut 52. Saʼ li Salmo 23, naxchʼolobʼ naq li Jehobʼa naxbʼeresi, naxkolebʼ ut naxtenqʼahebʼ laj kʼanjel chiru. Joʼkan ajwiʼ naxbʼaanu laj David rikʼinebʼ li xkarneer ut naraj kʼanjelak chiru li Jehobʼa saʼ chixjunil li xyuʼam (Sal. 23:6).

Qajultikaq ajwiʼ naq li kixtzʼiibʼa laj David musiqʼanbʼil xbʼaan li Yos. Wiibʼ oxibʼ li naʼlebʼ li kixtzʼiibʼa naʼaatinak chirixebʼ li propesiiy li ttzʼaqloq ru moqon. Jun eetalil, saʼ li Salmo 110, laj David kixye naq saʼ jun kutan li Qaawaʼ tchunlaaq chixkʼatq li Yos ut tixkʼul naabʼal li wankilal. Ut rikʼin li wankilal aʼin tixqʼaxebʼ ru li xikʼ nekeʼilok re li Yos ut «taaraqoq aatin saʼ xbʼeenebʼ li tenamit». Laj David aʼan li xxeʼtoonil li Mesiiy, li t-awabʼejinq saʼ choxa ut twanq joʼ xyuwaʼil «aj tij chi junelik» (Sal. 110:1-6). Li Jesús kixye naq li propesiiy li natawmank saʼ Salmo 110 naʼaatinak chirix aʼan ut ttzʼaqloq ru saʼ li kutan chalk re (Mat. 22:41-45).

Joʼ ak xqil, li Jehobʼa kixtenqʼa laj David re naq tixtzʼiibʼa li tkʼulmanq saʼebʼ li xkutan, joʼ ajwiʼ chirix li tkʼulmanq saʼ li kutan chalk re, naq twakliiq chi yoʼyo ut tixloqʼoni ru li Jehobʼa chi junelik. Joʼ li Salmo 37:10, 11, 29 kitzʼaqlok ru naq kixtzʼiibʼa chaq, joʼkan ajwiʼ ttzʼaqloq ru saʼ li kutan chalkebʼ re. Ebʼ li raqal aʼin naxye chanru li xwanjikebʼ chaq laj Israel ut joʼkan ajwiʼ nokooxtenqʼa chi rilbʼal chankaq ru ebʼ li kutan chalk re naq li Jehobʼa tixbʼaanu li rajom saʼ chixjunil li ruuchichʼochʼ (chaawil saʼ li hu aʼin li raqal 8 saʼ li tzolom «Wanqat wikʼin saʼ li paraíso»).

Joʼkan bʼiʼ, Salmo 61:9 ut jalan chik ebʼ li raqal li naxchap ribʼ rikʼin aʼin nokooxtenqʼa chi rilbʼal naq laj David naraj chaq xloqʼoninkil ru li Jehobʼa saʼ li najteril Israel naq toj yoʼyo chaq. Ut aʼin naxkʼut chiqu li tixbʼaanu saʼ li kutan chalk re, naq li Jehobʼa tixwaklesi chi yoʼyo.