KUBASIKA

1 Yai kele bazina ya bana ya Izraele yina kotaka na Ezipte ti Yakobi, konso muntu yina kwisaka ti bantu ya nzo na yandi:+ 2 Rubeni, Simeoni, Levi, mpi Yuda;+ 3 Isakare, Zebuloni, mpi Benyamini; 4 Dani mpi Naftali; Gadi mpi Asere.+ 5 Bantu* yonso yina Yakobi butaka* vandaka bantu* 70, kansi Yozefi vandaka tuka ntama na Ezipte.+ 6 Nsuka-nsuka Yozefi fwaka;+ bampangi na yandi yonso ti ndonga yina yonso ya bantu mpi fwaka. 7 Bantu ya Izraele* butaka mingi mpi yantikaka kukuma mingi kibeni, mpi bo landaka kukuma mingi mpi ngolo mingi na kiteso ya kuyituka, na mpila nde bo fulukaka na insi yina.+

8 Na nima, ntotila mosi ya mpa kumaka kuyala Ezipte; yandi zabaka ve Yozefi. 9 Ebuna yandi tubilaka bantu na yandi nde: “Bantu ya Izraele kele mingi kibeni mpi ngolo mingi kuluta beto.+ 10 Bika beto sadila bo mambu na mayele. Kana ve, bo ta kuma kaka mingi, ebuna kana bitumba kubasika, bo ta vukana ti bambeni na beto ebuna bo ta nwanisa beto mpi bo ta tina insi.”

11 Yo yina bo tudilaka bo bamfumu yina vandaka kupesa bo bisalu ya ngolo* sambu na kuniokula bo na kisalu ya mpasi,+ ebuna bo tungaka bambanza ya kubumbila bima sambu na Farao, disongidila, Pitomi ti Ramsesi.+ 12 Kansi ata bo vandaka kuniokula bo, bo vandaka kukuma kaka mingi mpi vandaka kaka kupanzana na mpila nde bantu ya Ezipte waka boma ya ngolo sambu na bantu ya Izraele.+ 13 Yo yina, bantu ya Ezipte sadisaka bantu ya Izraele kisalu ya kimpika ya ngolo.+ 14 Bo kumisaka luzingu na bo ndudi na kisalu ya mpasi, ntangu bo vandaka kulamba poto-poto ya ntoto ya tuma ti kusala babriki, mpi bisalu ya kimpika ya mitindu yonso na bilanga. Ya kieleka, bo sadisaka bo bisalu ya ngolo na mutindu ya nku na kimpika+ ya mitindu yonso.

15 Na nima, ntotila ya Ezipte tubilaka bankento ya Baebreo yina vandaka kubutisa, bazina na bo Shifra ti Pua, 16 mpi yandi songaka bo nde: “Ntangu beno ke butisa+ bankento ya Baebreo mpi beno mona bo na zulu ya kazune ya kubutila, beno fwete fwa mwana yina kana yandi kele mwana ya bakala; kansi kana yandi kele mwana ya nkento, yandi fwete zinga.” 17 Kansi, bankento yina vandaka kubutisa waka Nzambi ya kieleka boma, mpi bo salaka ve mambu yina ntotila ya Ezipte songaka bo. Kansi, bo vandaka kubikisa bana ya babakala na luzingu.+ 18 Na nima, ntotila ya Ezipte bingaka bankento yina vandaka kubutisa mpi tubilaka bo nde: “Sambu na nki beno me bikisa bana ya babakala na luzingu?” 19 Bankento yina vandaka kubutisa tubilaka Farao nde: “Bankento ya Baebreo kele ve bonso bankento ya Ezipte. Bo kele ngolo mpi bo ke butaka dezia na ntwala nde nkento yina ke butisaka kukota kisika bo kele.”

20 Yo yina Nzambi sadilaka bankento yina vandaka kubutisa mambu ya mbote, ebuna bantu landaka kukuma mingi mpi ngolo mingi kibeni. 21 Mpi sambu bankento yina vandaka kubutisa waka Nzambi ya kieleka boma, yandi pesaka bo mabuta na nima. 22 Nsuka-nsuka, Farao songaka bantu na yandi yonso nde: “Beno fwete losa na Nzadi ya Nile konso mwana-bakala ya Baebreo yina me katuka kubutuka, kansi beno fwete bikisa konso mwana ya nkento na luzingu.”+

2 Na ntangu yina, bakala mosi ya nzo ya Levi kwelaka mwana-nkento mosi ya Levi.+ 2 Nkento yina bakaka divumu mpi butaka mwana-bakala. Ntangu nkento yina monaka nde mwana yina vandaka kitoko mingi, yandi bumbaka yandi bangonda tatu.+ 3 Ntangu yandi monaka diaka ve mpila ya kubumba yandi,+ yandi bakaka kitunga* mosi ya papirusi, pakulaka yo gudro ti bidi, tulaka mwana na kati na yo, mpi tululaka yo na kati ya balukengi na lweka ya Nzadi ya Nile. 4 Kansi mpangi na yandi ya nkento+ telamaka mwa-ntama sambu na kutala mambu yina zolaka kukumina yandi.

5 Ntangu mwana ya Farao kulumukaka na Nile sambu na kuyobila, bansadi na yandi ya bankento vandaka kutambula na lweka ya Nile. Yandi monaka kitunga na kati-kati ya balukengi. Na mbala mosi, yandi tindaka mpika na yandi ya nkento na kubaka yo.+ 6 Ntangu yandi kangulaka yo, yandi monaka mwana yina, mpi mwana yango ya bakala vandaka kudila. Yandi wilaka yandi mawa, kansi yandi tubaka nde: “Mwana yai kele mwana ya Baebreo.” 7 Ebuna mpangi-nkento ya mwana yina tubilaka mwana ya Farao nde: “Keti nge ke zola nde mono kwenda kubinga ndesi mosi ya nkento na kati ya Baebreo sambu na kunwisila nge mwana yai?” 8 Mwana ya Farao tubilaka yandi nde: “Kwenda!” Na mbala mosi leke yina ya nkento kwendaka mpi bingaka mama ya mwana yina.+ 9 Ebuna mwana-nkento ya Farao tubilaka yandi nde: “Nata mwana yai mpi nwisila mono yandi, ebuna mono ta futa nge.” Yo yina nkento yina bakaka mwana mpi nwisaka yandi. 10 Ntangu mwana yelaka, yandi nataka yandi na mwana ya Farao, ebuna mwana yina kumaka mwana na yandi.+ Yandi pesaka yandi zina Moize* mpi tubaka nde: “Yo kele sambu mono basisaka yandi na masa.”+

11 Na bilumbu yina, ntangu Moize kumaka mbuta,* yandi basikaka mpi kwendaka na bampangi na yandi sambu na kutala bizitu yina bo vandaka kunata,+ ebuna yandi monaka muntu mosi ya Ezipte ke bula mpangi na yandi Mu-Ebreo. 12 Yandi talaka ndambu na ndambu, ebuna sambu yandi monaka ata muntu mosi ve, yandi fwaka muntu yina ya Ezipte mpi bumbaka yandi na zelo.+

13 Kansi yandi basikaka na kilumbu yina landaka, mpi Baebreo zole vandaka kunwana. Ebuna yandi tubilaka muntu yina vandaka na kifu nde: “Sambu na nki nge ke bula mpangi na nge?”+ 14 Yandi tubaka nde: “Nani me tula nge mfumu mpi zuzi na beto? Keti nge ke kana kufwa mono mutindu nge fwaka muntu ya Ezipte?”+ Ebuna Moize waka boma mpi tubaka nde: “Ya kieleka diambu yina me zabana!”

15 Na nima Farao waka diambu yina, mpi yandi sosaka kufwa Moize; kansi Moize tinaka Farao mpi kwendaka kuzinga na insi ya Madiani,+ mpi yandi vandaka pene-pene ya dibulu mosi ya masa. 16 Nganga-nzambi ya Madiani+ vandaka ti bana-bankento nsambwadi, ebuna bo kwisaka sambu na kubaka masa mpi kufulusa yo na bisika yina bambisi vandaka kunwa masa sambu bitwisi ya tata na bo kunwa. 17 Kansi mutindu vandaka kikalulu ya bangungudi, bo kwisaka mpi kulaka bana-bankento yina. Yo yina Moize telamaka mpi sadisaka* bankento yina ebuna yandi pesaka bitwisi na bo masa. 18 Ntangu bo vutukaka na tata na bo Rewele,*+ yandi tubaka nde: “Inki mutindu beno me vutuka nswalu bubu yai?” 19 Bo vutulaka nde: “Muntu mosi ya Ezipte+ me gulusa beto na maboko ya bangungudi, nkutu yandi me bakila beto masa mpi me pesa bitwisi masa.” 20 Yandi tubilaka bana na yandi ya bankento nde: “Kansi yandi kele na wapi? Sambu na nki beno me bikisa muntu yina? Beno binga yandi, sambu yandi dia ti beto.” 21 Na nima, Moize ndimaka na kuzinga ti bakala yina, ebuna bakala yina pesaka Sipora+ mwana na yandi ya nkento na Moize sambu yandi kuma nkento na yandi. 22 Na nima Sipora butaka mwana-bakala mpi Moize pesaka yandi zina Gershomi,*+ sambu yandi tubaka nde: “Mono me kuma munzenza na insi mosi ya nzenza.”+

23 Ntangu mingi* na nima, ntotila ya Ezipte fwaka,+ kansi bantu ya Izraele landaka kudila sambu na kimpika mpi kudila-dila, ebuna kudila na bo sambu na kulomba lusadisu sambu na kimpika landaka kutombuka na Nzambi ya kieleka.+ 24 Nsuka-nsuka, Nzambi waka kudila na bo,+ mpi Nzambi yibukaka kuwakana yina yandi salaka ti Abrahami, Izaki, mpi Yakobi.+ 25 Ebuna Nzambi talaka bantu ya Izraele; mpi Nzambi tudilaka bo dikebi.

3 Moize kumaka ngungudi ya bitwisi ya bokilo na yandi Yetro,+ nganga-nzambi ya Madiani. Ntangu yandi vandaka kunata bitwisi na ndambu ya westi ya ntoto-makanga, nsuka-nsuka yandi kumaka na ngumba ya Nzambi ya kieleka, na Orebi.+ 2 Ebuna wanzio ya Yehowa monanaka na yandi na ludimi ya tiya na kati-kati ya mwa-nti ya bansende.+ Ntangu yandi landaka kutala, yandi monaka nde mwa-nti yina ya bansende ke pela tiya, kansi yo ke zika ve. 3 Yo yina Moize tubaka nde: “Mono ta pusana sambu na kutala diambu yai ya kuyituka sambu na kumona sambu na nki mwa-nti yai ya bansende ke zika ve.” 4 Ntangu Yehowa monaka nde yandi pusanaka sambu na kutala, Nzambi bingaka yandi katuka na mwa-nti yina ya bansende mpi tubaka nde: “Moize! Moize!” ebuna yandi tubaka nde: “Mono yandi yai.” 5 Yandi tubaka nde: “Kupusana diaka ve. Katula basandale na nge, sambu kisika yina nge me telama kele ntoto ya santu.”

6 Yandi tubaka diaka nde: “Mono kele Nzambi ya tata na nge, Nzambi ya Abrahami,+ Nzambi ya Izaki,+ mpi Nzambi ya Yakobi.”+ Ebuna Moize bumbaka luse na yandi, sambu yandi waka boma na kutala Nzambi ya kieleka. 7 Yehowa tubaka diaka nde: “Mono me mona kibeni mpasi ya bantu na mono yina kele na Ezipte, mpi mono me wa kudila na bo sambu bamfumu ya kisalu ke pusa bo na kisalu na kingolo-ngolo; mono me zaba mbote bampasi+ yina bo ke mona. 8 Mono ta kulumuka sambu na kugulusa bo na maboko ya bantu ya Ezipte+ mpi kubasisa bo na insi yina sambu na kunata bo na insi mosi ya mbote mpi ya nene, insi yina miliki* ti bwiki kele mingi,+ teritware ya bantu ya Kanana, ya bantu ya Heti, ya bantu ya Amore, ya bantu ya Perizi, ya bantu ya Hivi, mpi ya bantu ya Yebusi.+ 9 Tala! Mono me wa bidilu ya bantu ya Izraele, mono me mona mpi mutindu bantu ya Ezipte ke niokula+ bo na nku yonso. 10 Ntangu yai kwisa, mono ta tinda nge na Farao mpi nge ta basisa bantu na mono bantu ya Izraele na Ezipte.”+

11 Kansi, Moize tubaka na Nzambi ya kieleka nde: “Mono kele nani sambu mono kwenda na Farao mpi kubasisa bantu ya Izraele na Ezipte?” 12 Ebuna yandi tubaka nde: “Mono ta vanda ti nge,+ mpi yai kele kidimbu yina ta songa nge nde mono muntu me tinda nge: Ntangu nge ta basisa bantu na Ezipte, beno ta sadila* Nzambi ya kieleka na ngumba yai.”+

13 Kansi Moize tubaka na Nzambi ya kieleka nde: “Yindula nde mono kwenda na bantu ya Izraele mpi mono tubila bo nde, ‘Nzambi ya ba-nkaka na beno me tinda mono na beno,’ ebuna bo yula mono nde, ‘Zina na yandi nani?’+ Inki mono fwete tubila bo?” 14 Yo yina Nzambi tubilaka Moize nde: “Mono Ta Kuma Yina Mono Ke Sola* Kukuma.”*+ Mpi yandi yikaka nde: “Nge fwete tubila bantu ya Izraele nde, ‘Mono Ta Kuma me tinda mono na beno.’”+ 15 Ebuna Nzambi tubilaka diaka Moize nde:

“Nge fwete tubila bantu ya Izraele nde, ‘Yehowa Nzambi ya ba-nkaka na beno, Nzambi ya Abrahami,+ Nzambi ya Izaki,+ mpi Nzambi ya Yakobi,+ me tinda mono na beno.’ Yai kele zina na mono kimakulu,+ mpi bandonga ya bantu yonso yina ta kwisa ta yibukaka mono mutindu yina. 16 Ntangu yai kwenda mpi vukisa bankuluntu ya Izraele mpi tubila bo nde, ‘Yehowa Nzambi ya ba-nkaka na beno me monana na mono, Nzambi ya Abrahami, ya Izaki, mpi ya Yakobi, mpi yandi me tuba nde: “Mono me tudila beno+ kibeni dikebi mpi mono me mona mambu yina bo ke sala beno na Ezipte. 17 Yo yina mono ke tuba nde, mono ta katula beno na bampasi+ yina beno ke mona na maboko ya bantu ya Ezipte sambu na kunata beno na insi ya bantu ya Kanana, ya bantu ya Heti, ya bantu ya Amore,+ ya bantu ya Perizi, ya bantu ya Hivi, mpi ya bantu ya Yebusi,+ na insi yina miliki* ti bwiki kele mingi.”’+

18 “Bo ta wa kibeni ndinga na nge,+ mpi nge ta kwenda, nge ti bankuluntu ya Izraele, na ntotila ya Ezipte, mpi beno fwete tubila yandi nde: ‘Yehowa Nzambi ya Baebreo+ me solula ti beto. Pardo, pesa beto nzila ya kusala nzietelo ya bilumbu tatu na ntoto-makanga sambu beto pesa bimenga na Yehowa Nzambi na beto.’+ 19 Kansi mono me zaba mbote nde ntotila ya Ezipte ta pesa beno ve nswa ya kukwenda kana diboko mosi ya ngolo kupusa yandi ve.+ 20 Yo yina yo ta lomba nde mono tandula diboko na mono sambu na kupesa Ezipte ndola na nzila ya bisalu na mono yonso ya kuyituka yina mono ta sala na kati na yo, mpi na nima yandi ta bikisa beno,+ beno kwenda. 21 Ebuna mono ta sala nde bantu ya Ezipte kundima bantu yai, mpi ntangu beno ta kwenda, beno ta kwenda ve ata fioti maboko-mpamba.+ 22 Konso nkento fwete lomba muntu yina ke zingaka pene-pene na yandi mpi nkento yina ke zingaka na nzo na yandi bima ya arza, ya wolo, mpi bilele, ebuna beno ta lwatisa yo bana na beno ya babakala mpi bana na beno ya bankento; mpi beno ta botula bantu ya Ezipte bima.”+

4 Ata mpidina, Moize vutulaka nde: “Kansi yindula nde bo kwikila mono ve mpi bo wa ve ndinga na mono,+ sambu bo ta tuba nde, ‘Yehowa monanaka ve na nge.’” 2 Ebuna Yehowa tubilaka yandi nde: “Inki kele na diboko na nge?” Yandi vutulaka nde: “Nti.” 3 Yandi tubaka nde: “Losa yo na ntoto.” Yandi losaka yo na ntoto, ebuna yo kumaka nioka;+ mpi Moize tinaka yo. 4 Ebuna Yehowa tubilaka Moize nde: “Tandula diboko na nge mpi simba yo na mukila.” Yandi tandulaka diboko mpi simbaka yo, ebuna yo kumaka nti na diboko na yandi. 5 Ebuna Nzambi tubaka nde: “Yo kele sambu bo ndima nde Yehowa Nzambi ya ba-nkaka na bo, Nzambi ya Abrahami, Nzambi ya Izaki, mpi Nzambi ya Yakobi,+ me monana na nge.”+

6 Yehowa tubilaka yandi diaka nde: “Pardo, kotisa diboko na nge na lele na nge.” Yandi kotisaka diboko na yandi na lele na yandi. Ntangu yandi basisaka yo, maladi ya lepre simbaka yandi na diboko mpi yo kumaka mpembe bonso mvula ya mpembe!*+ 7 Ebuna yandi tubaka nde: “Vutula diboko na nge na lele na nge.” Yandi vutulaka diboko na yandi na lele na yandi. Ntangu yandi basisaka yo na lele, yo vutukaka bonso nsuni na yandi ya nkaka! 8 Yandi tubaka nde: “Kana bo kwikila nge ve to bo tula ve dikebi na kidimbu ya ntete, bo ta tula kibeni dikebi na kidimbu+ ya zole. 9 Kansi, ata kana bo ndima ve bidimbu yai zole mpi bo buya kuwa ndinga na nge, nge ta baka ndambu ya masa na Nzadi ya Nile mpi ta tiamuna yo na ntoto ya kuyuma, ebuna masa yina nge ta baka na Nile ta kuma menga na ntoto ya kuyuma.”+

10 Ebuna Moize tubaka na Yehowa nde: “Lolula mono, Yehowa, kansi mono kele ve mutubi ya mbote, yo vanda na bilumbu me luta to yantika nge ke tuba na nsadi na nge, sambu mono ke tubaka mbote ve* mpi ludimi+ na mono kele kilo.” 11 Yehowa tubilaka yandi nde: “Nani salaka munoko sambu na muntu, to nani ke kumisaka bo bababa, bifwa-makutu, bantu ya ke monaka mbote, to bifwa-meso? Keti yo kele ve mono Yehowa? 12 Ntangu yai, kwenda mpi mono ta vanda ti nge ntangu nge ta tuba* mpi mono ta longa nge mambu yina nge fwete tuba.”+ 13 Kansi yandi tubaka nde: “Lolula mono, Yehowa, pardo, tinda konso muntu yina nge ke zola kutinda.” 14 Ebuna Yehowa wilaka Moize makasi ya ngolo mpi tubaka nde: “Ebuna mpangi na nge Aroni+ Mulevi? Mono me zaba nde yandi lenda tuba mbote kibeni. Yandi kele ntangu yai na nzila, yandi ke kwisa awa sambu na kukutana ti nge. Ntangu yandi ta mona nge, ntima na yandi ta wa kiese.+ 15 Yo yina, nge fwete tubila yandi mpi kutula bangogo na munoko na yandi,+ ebuna mono ta vanda ti nge mpi ti yandi na ntangu nge ta tuba,+ mpi mono ta longa beno mambu ya beno ta sala. 16 Yandi ta tuba na bantu na kisika na nge, mpi yandi ta vanda kinati-ndinga na nge, ebuna nge ta vanda bonso Nzambi na ntwala na yandi.*+ 17 Nge ta baka nti yai na diboko na nge mpi ta sala bidimbu ti yo.”+

18 Yo yina Moize vutukaka na bokilo na yandi+ Yetro mpi tubilaka yandi nde: “Pardo, mono ke zola kukwenda mpi kuvutuka na bampangi na mono yina kele na Ezipte sambu na kutala kana bo kele kaka na luzingu.” Yetro tubilaka Moize nde: “Kwenda na ngemba.” 19 Na nima, Yehowa tubilaka Moize na Madiani nde: “Kwenda, vutuka na Ezipte, sambu bantu yonso yina vandaka kusosa kufwa nge* me fwa.”+

20 Ebuna Moize bakaka nkento na yandi ti bana na yandi zole ya babakala, matisaka bo na zulu ya mpunda, mpi yandi yantikaka kuvutuka na insi ya Ezipte. Diaka, Moize bakaka nti ya Nzambi ya kieleka na diboko na yandi. 21 Ebuna Yehowa tubilaka Moize nde: “Ntangu nge ta vutuka na Ezipte, sala ngolo na kusala na ntwala ya Farao bimangu yonso yina mono me pesa nge ngolo ya kusala.+ Kansi mono ta bika nde ntima na yandi kukuma ngolo,+ mpi yandi ta bika ve nde bantu kukwenda.+ 22 Nge fwete tubila Farao nde, ‘Yehowa me tuba nde: “Izraele kele mwana na mono ya bakala, mwana na mono ya ntete.+ 23 Mono ke tubila nge nde, Bika mwana na mono ya bakala yandi kwenda kusadila mono. Kansi kana nge buya nde yandi kwenda, mono ta fwa mwana na nge ya bakala, mwana na nge ya ntete.”’”+

24 Ntangu yandi vandaka na nzila na kisika ya kulala, Yehowa+ kutanaka ti yandi mpi vandaka kusosa kufwa+ yandi. 25 Nsuka-nsuka Sipora+ bakaka ditadi ya sileksi* mpi yotisaka mwana na yandi mpi salaka nde mpusu ya kibakala ya mwana na yandi kusimba makulu na yandi mpi yandi tubaka nde: “Yo kele sambu nge kele bakala na mono ya menga.”* 26 Yo yina Yandi bikaka yandi, yandi kwenda. Na ntangu yina Sipora tubaka nde, “bakala ya menga,” sambu na luyotisu.

27 Na nima Yehowa tubilaka Aroni nde: “Kwenda na ntoto-makanga sambu na kukutana ti Moize.”+ Yo yina yandi kwendaka mpi kutanaka ti yandi na ngumba ya Nzambi ya kieleka+ mpi pesaka yandi mbote ti beze. 28 Ebuna Moize songaka Aroni mambu yonso yina Yehowa muntu yina tindaka yandi+ tubaka, mpi bidimbu yonso yina Yandi songaka yandi na kusala.+ 29 Na nima, Moize ti Aroni kwendaka mpi vukisaka bankuluntu yonso ya bantu ya Izraele.+ 30 Aroni songaka bo mambu yonso yina Yehowa tubilaka Moize, mpi yandi salaka bidimbu+ na meso ya bantu. 31 Ebuna bantu kwikilaka.+ Ntangu bo waka nde Yehowa tudilaka bantu ya Izraele+ dikebi mpi nde yandi monaka mpasi+ na bo, bo fukamaka mpi bwaka luse na ntoto.

5 Na nima, Moize ti Aroni kotaka mpi tubilaka Farao nde: “Yehowa Nzambi ya Izraele me tuba nde, ‘Bika bantu na mono bo kwenda sambu bo sadila mono nkinsi na ntoto-makanga.’” 2 Kansi Farao tubaka nde: “Yehowa+ kele nani, sambu mono lemfuka na ndinga na yandi mpi kubika Izraele na kukwenda?+ Mono me zaba ve Yehowa ata fioti, mpi nkutu mono ta bika ve Izraele na kukwenda.”+ 3 Kansi, bo tubaka nde: “Nzambi ya Baebreo me solula ti beto. Pardo, beto ke zola kusala nzietelo ya bilumbu tatu na ntoto-makanga mpi kupesa bimenga na Yehowa Nzambi na beto;+ kana ve yandi ta pesa beto maladi to ta fwa beto na mbele ya bitumba.” 4 Ntotila ya Ezipte vutudilaka bo nde: “Moize mpi Aroni, sambu na nki beno ke katula bantu na kisalu na bo? Beno vutuka na kisalu na beno ya ngolo!”*+ 5 Farao tubaka diaka nde: “Beno tala mutindu bantu ya insi me kuma mingi kibeni, ebuna beno ke zola nde bo yambula kisalu na bo ya ngolo.”

6 Kaka na kilumbu yina, Farao songaka bamfumu ya kisalu mpi bakapita na bo nde: 7 “Beno fwete pesa diaka ve bantu matiti sambu na kubula babriki.+ Beno bika bo mosi bo kwenda kusosa matiti. 8 Kansi beno fwete lomba bo kaka ntalu ya babriki kiteso mosi ti yina bo vandaka kubula ntete. Beno fiotuna yo ve sambu na bo, sambu bo kele bamolo.* Yo yina bo ke dila nde, ‘Beto ke zola kukwenda, beto ke zola kupesa bimenga na Nzambi na beto!’ 9 Beno sadisa bo kisalu ngolo kuluta mpi beno landa kupesa bo kisalu mingi mpidina bo ta tula ve dikebi na mambu ya luvunu.”

10 Ebuna bamfumu ya kisalu+ mpi bakapita na bo basikaka mpi tubilaka bantu nde: “Yai mambu Farao me tuba, ‘Mono ta pesa beno diaka ve matiti. 11 Beno kwenda kubaka matiti ya kuyuma beno mosi konso kisika yina beno lenda mona yo, kansi bo ta fiotuna ve kisalu na beno ata fioti.’” 12 Yo yina bantu panzanaka na insi ya mvimba ya Ezipte sambu na kulokuta nianga na kisika ya matiti ya kuyuma. 13 Ebuna bamfumu ya kisalu vandaka kutubila bo mbala na mbala nde: “Beno yonso fwete manisa kisalu na beno konso kilumbu, kaka bonso ntangu bo vandaka kupesa beno matiti ya kuyuma.” 14 Diaka bo bulaka+ bakapita ya bantu ya Izraele, yina bamfumu ya kisalu ya Farao tulaka na zulu na bo. Bo yulaka bo nde: “Sambu na nki beno me lungisa ve ntalu ya babriki yina beno ke bulaka ntete? Yo salamaka mazono mpi bubu.”

15 Yo yina, bakapita ya bantu ya Izraele kotaka mpi bokutilaka Farao nde: “Sambu na nki nge ke sadila bansadi na nge mambu mutindu yai? 16 Bo ke pesa ve bansadi na nge matiti, kansi bo ke tubila beto nde, ‘Beno bula babriki!’ Bo ke bula bansadi na nge, kansi bantu na nge mosi bantu kele na foti.” 17 Kansi yandi tubaka nde: “Beno kele bamolo,* beno kele bamolo!*+ Yo yina beno ke tuba nde: ‘Beto ke zola kukwenda, beto ke zola kupesa bimenga na Yehowa.’+ 18 Ntangu yai, beno kwenda, beno vutuka na kisalu! Bo ta pesa beno ve matiti, kansi beno fwete bula kaka ntalu ya babriki yina beno ke bulaka.”

19 Ebuna bakapita ya bantu ya Izraele monaka nde bo vandaka na mpasi mingi sambu na nsiku yai: “Beno fwete fiotuna ve ata fioti ntalu ya babriki ya beno fwete bula konso kilumbu.” 20 Na nima bo kutanaka ti Moize mpi Aroni, yina telamaka pana sambu na kukutana ti bo ntangu bo vandaka kukatuka na Farao. 21 Na mbala mosi, bo tubilaka bo nde: “Bika nde Yehowa kutala beno mpi kupesa beno ndola, sambu beno me sala nde Farao ti bansadi na yandi kumenga beto,* mpi beno me tula mbele ya bitumba na maboko na bo sambu bo fwa beto.”+ 22 Ebuna Moize balukaka na Yehowa mpi tubaka nde: “Yehowa, sambu na nki nge me monisa bantu yai mpasi? Sambu na nki nge me tinda mono? 23 Katuka ntangu mono kotaka na ntwala ya Farao sambu na kutuba na zina na nge,+ yandi me sadila bantu yai+ mambu ya mbi kuluta, mpi ya kieleka nge me gulusa ve bantu na nge.”+

6 Ebuna Yehowa tubilaka Moize nde: “Ntangu yai nge ta mona mambu yina mono ta sala Farao.+ Diboko mosi ya ngolo ta pusa yandi na kubika bo, bo kwenda, mpi diboko mosi ya ngolo ta pusa yandi na kukula bo na insi na yandi.”+

2 Ebuna Nzambi tubilaka Moize nde: “Mono kele Yehowa. 3 Mono vandaka kumonana na Abrahami, na Izaki, mpi na Yakobi bonso Nzambi Nkwa-Ngolo Yonso,+ kansi na yina me tala zina na mono Yehowa+ mono zabisaka bo yo ve.+ 4 Mono salaka mpi kuwakana na mono ti bo sambu na kupesa bo insi ya Kanana, insi yina bo zingaka bonso banzenza.+ 5 Ntangu yai, mono me wa kudila ya bantu ya Izraele, yina bantu ya Ezipte me kumisa bampika, mpi mono me yibuka kuwakana na mono.+

6 “Yo yina, tubila bantu ya Izraele nde: ‘Mono kele Yehowa, mpi mono ta katula beno na bizitu ya bantu ya Ezipte mpi ta basisa beno mpi ta gulusa beno na kimpika na bo,+ mpi mono ta gulusa beno ti diboko ya ngolo* mpi ti balusambisu ya nene.+ 7 Ebuna mono ta baka beno bonso bantu na mono, mpi mono ta vanda Nzambi na beno,+ beno ta zaba kibeni nde mono kele Yehowa Nzambi na beno yina ke katula beno na bizitu ya Ezipte. 8 Mono ta nata beno na insi yina mono zengaka kieleka ti ndefi* na kupesa na Abrahami, na Izaki, mpi na Yakobi; mpi mono ta pesa beno yo sambu yo vanda ya beno.+ Mono kele Yehowa.’”+

9 Na nima, Moize pesaka bantu ya Izraele nsangu yai, kansi bo wilaka ve Moize sambu bo lembaka nitu mpi sambu kimpika vandaka ngolo.+

10 Ebuna Yehowa tubilaka Moize nde: 11 “Kota mpi songa Farao, ntotila ya Ezipte, nde yandi fwete bika bantu ya Izraele bo basika na insi na yandi.” 12 Kansi Moize vutudilaka Yehowa nde: “Bantu ya Izraele me wila mono ve;+ ebuna nki mutindu Farao ta wila mono, sambu mono ke tubaka mbote ve?”*+ 13 Kansi Yehowa songaka diaka Moize ti Aroni bantuma yina bo ta pesa bantu ya Izraele mpi Farao, ntotila ya Ezipte, sambu na kubasisa bantu ya Izraele na insi ya Ezipte.

14 Bamfumu ya nzo ya batata na bo bo yai: Bana-babakala ya Rubeni, mwana ya ntete+ ya Izraele, vandaka Anoki, Palu, Esroni, mpi Karmi.+ Yai kele mabuta ya Rubeni.

15 Bana-babakala ya Simeoni vandaka Yemuele, Yamini, Ohadi, Yakini, Sohare, mpi Shaule, mwana ya nkento mosi ya Kanana.+ Yai kele mabuta ya Simeoni.

16 Bazina ya bana-babakala ya Levi,+ na kulandaka ndonga ya mabuta na bo, yo yai: Gershoni, Kohati, mpi Merari.+ Levi zingaka bamvula 137.

17 Bana-babakala ya Gershoni vandaka Libni mpi Shimei, na kulandaka mabuta na bo.+

18 Bana-babakala ya Kohati vandaka Amrami, Yisare, Ebroni, mpi Uziele.+ Kohati zingaka bamvula 133.

19 Bana-babakala ya Merari vandaka Mali mpi Mushi.

Yai mabuta ya Balevi, na kulandaka ndonga ya mabuta na bo.+

20 Ebuna Amrami kwelaka Yokebedi, mpangi-nkento ya tata na yandi.+ Yokebedi butilaka yandi Aroni mpi Moize.+ Amrami zingaka bamvula 137.

21 Bana-babakala ya Yisare vandaka Kora,+ Nefegi, mpi Zikri.

22 Bana-babakala ya Uziele vandaka Mishaele, Elisafani,+ mpi Sitri.

23 Ebuna Aroni kwelaka Elisheba, mwana ya Aminadabi, mpangi ya Nashoni.+ Elisheba butilaka yandi Nadabi, Abihu, Eleazare, mpi Itamare.+

24 Bana-babakala ya Kora vandaka Asire, Elkana, mpi Abiasafi.+ Yai mabuta ya bantu ya Kora.+

25 Eleazare,+ mwana ya Aroni, kwelaka mwana-nkento mosi na kati ya bana-bankento ya Putiele. Nkento yina butilaka yandi Fineasi.+

Yai kele bamfumu ya batata ya Balevi, na kulandaka mabuta na bo.+

26 Yai kele Aroni ti Moize yina Yehowa tubaka na bo nde: “Beno basisa bantu ya Izraele na insi ya Ezipte, bimvuka na bimvuka.”*+ 27 Bo bantu tubilaka Farao, ntotila ya Ezipte, na kubasisa bantu ya Izraele na Ezipte. Yo vandaka Moize mpi Aroni+ yai.

28 Na kilumbu yina, ntangu Yehowa tubilaka Moize na insi ya Ezipte, 29 Yehowa songaka Moize nde: “Mono kele Yehowa. Tubila Farao, ntotila ya Ezipte, mambu yonso yina mono ke tubila nge.” 30 Ebuna Moize tubaka na ntwala ya Yehowa nde: “Mono ke tubaka mbote ve,* ebuna nki mutindu Farao ta wila mono?”+

7 Ebuna Yehowa tubilaka Moize nde: “Tala, mono me tula nge bonso Nzambi* sambu na Farao, mpi Aroni mpangi na nge ta kuma mbikudi na nge.+ 2 Nge fwete vutukila mambu yonso yina mono ta songa nge, mpi Aroni mpangi na nge ta tubila Farao, ebuna yandi ta bika bantu ya Izraele bo basika na insi na yandi. 3 Kansi mono, mono ta bika nde ntima ya Farao kukuma ngolo,+ mpi mono ta kumisa bidimbu na mono mpi bimangu na mono mingi na insi ya Ezipte.+ 4 Kansi Farao ta wila beno ve, ebuna mono ta tula diboko na mono na Ezipte mpi ta basisa bimvuka na mono mingi ya bantu,* bantu na mono, bantu ya Izraele, na insi ya Ezipte na nzila ya balusambisu ya nene.+ 5 Ebuna bantu ya Ezipte ta zaba kibeni nde mono kele Yehowa+ ntangu mono ta tandula diboko na mono sambu na kupesa Ezipte ndola mpi ta basisa bantu ya Izraele na kati na bo.” 6 Moize ti Aroni salaka mambu yina Yehowa songaka bo; bo salaka kaka mutindu yina. 7 Moize vandaka ti bamvula 80 mpi Aroni vandaka ti bamvula 83 ntangu bo tubaka na Farao.+

8 Yehowa tubilaka Moize ti Aroni nde: 9 “Kana Farao kutubila beno nde, ‘Beno sala kimangu,’ songa Aroni nde, ‘Baka nti na nge mpi losa yo na ntwala ya Farao.’ Yo ta kuma nioka ya nene.”+ 10 Yo yina Moize ti Aroni kotaka kisika ya Farao mpi salaka kaka mutindu Yehowa songaka yandi. Aroni losaka nti na yandi na ntwala ya Farao ti ya bansadi na yandi, ebuna yo kumaka nioka ya nene. 11 Kansi, Farao bingaka bantu ya mayele ti banganga-nkisi, ebuna banganga-nkisi ya Ezipte+ yina vandaka kusadila mazi salaka mpi mutindu mosi ti mazi na bo.*+ 12 Konso muntu losaka nti na yandi, mpi banti yina kumaka banioka ya nene; kansi nti ya Aroni minaka banti na bo. 13 Ata mpidina, ntima ya Farao kumaka ngolo,+ mpi yandi wilaka bo ve, kaka mutindu Yehowa tubaka.

14 Ebuna Yehowa tubilaka Moize nde: “Ntima ya Farao kele ngolo.+ Yandi me buya kubika bantu bo kwenda. 15 Kwenda na Farao na suka. Tala! Yandi ke kwenda na masa! Nge fwete telama na lweka ya Nzadi ya Nile sambu na kukutana ti yandi; nata nti yina kitukaka nioka.+ 16 Nge fwete tubila yandi nde, ‘Yehowa Nzambi ya Baebreo me tinda mono na nge,+ mpi yandi ke tuba nde: “Bika bantu na mono bo kwenda sambu bo sadila mono na ntoto-makanga,” kansi nge me lemfuka ve tii ntangu yai. 17 Yehowa me tuba nde: “Na diambu yai nge ta zaba nde mono kele Yehowa.+ Mono ke bula nti yina kele na diboko na mono na masa yina kele na Nzadi ya Nile, mpi yo ta kuma menga. 18 Ebuna bambisi yina kele na Nile ta fwa, Nile ta basisa nsudi ya mbi, mpi bantu ya Ezipte ta mona ve mpila ya kunwa masa ya Nile.”’”

19 Na nima, Yehowa tubilaka Moize nde: “Tuba na Aroni nde, ‘Baka nti na nge mpi tandula diboko na nge na zulu ya bamasa ya Ezipte,+ na zulu ya banzadi na yo, na zulu ya tu-bamasa na yo,* na zulu ya biziba na yo,+ mpi na zulu ya bima na yo ya bo ke bumbilaka masa, sambu yo kuma menga.’ Menga ta vanda na insi ya mvimba ya Ezipte, ata na kati ya mabungu ya mabaya mpi ya matadi.” 20 Na mbala mosi Moize ti Aroni salaka kaka mutindu Yehowa songaka bo. Yandi nangulaka nti mpi bulaka masa yina vandaka na Nzadi ya Nile na meso ya Farao ti ya bansadi na yandi, ebuna masa yonso yina vandaka na nzadi kumaka menga.+ 21 Ebuna bambisi yina vandaka na nzadi fwaka,+ nzadi yantikaka kubasisa nsudi ya mbi, bantu ya Ezipte kukaka ve kunwa masa ya Nile,+ mpi menga vandaka na insi ya mvimba ya Ezipte.

22 Kansi, banganga-nkisi ya Ezipte yina ke sadilaka mazi salaka mutindu mosi ti mazi na bo,+ mpidina ntima ya Farao landaka kukuma ngolo, mpi yandi wilaka bo ve, kaka mutindu Yehowa tubaka.+ 23 Ebuna Farao vutukaka na nzo na yandi, yandi tulaka mpi ve diambu yai na ntima. 24 Yo yina bantu yonso ya Ezipte vandaka kutimuna mabulu na nziunga ya Nile sambu na kusosa masa ya kunwa, sambu bo lendaka ve kunwa masa ya Nile. 25 Bilumbu nsambwadi ya mvimba lutaka tuka Yehowa bulaka Nile.

8 Ebuna Yehowa tubilaka Moize nde: “Kota na kisika ya Farao mpi tubila yandi nde, ‘Yehowa me tuba nde: “Bika bantu na mono bo kwenda sambu bo sadila mono.+ 2 Kana nge ke buya kaka kubika bo sambu bo kwenda, mono ta pesa insi na nge ya mvimba ndola ya makototo.+ 3 Nzadi ya Nile ta fuluka ti makototo, ebuna yo ta tombuka mpi ta kota na nzo na nge, na suku na nge, na zulu ya mbeto na nge, na banzo ya bansadi na nge mpi na bantu na nge, na kati ya bafulu na nge, mpi na kati ya bima*+ na nge ya kubudila pate. 4 Makototo ta kotila nge, bantu na nge, mpi bansadi na nge yonso.”’”

5 Na nima, Yehowa tubilaka Moize nde: “Tubila Aroni nde, ‘Tandula diboko na nge ti nti na nge na zulu ya banzadi, ya tu-bamasa ya Nile, mpi ya biziba, mpi sala na mpila nde makototo kutombuka na insi ya Ezipte.’” 6 Ebuna Aroni tandulaka diboko na yandi na zulu ya bamasa ya Ezipte, mpi makototo yantikaka kutombuka mpi kufika insi ya Ezipte. 7 Kansi, banganga-nkisi ya ke sadilaka mazi salaka mpi mutindu mosi na nzila ya mazi na bo, bo salaka mpi nde makototo kutombuka na insi ya Ezipte.+ 8 Na nima, Farao bingaka Moize ti Aroni mpi tubaka nde: “Beno bondila Yehowa sambu yandi katula makototo na ntwala na mono mpi ya bantu na mono,+ sambu mono ke zola kubika bantu bo kwenda sambu bo pesa kimenga na Yehowa.” 9 Ebuna Moize tubilaka Farao nde: “Nge lenda songa mono ntangu yina mono fwete bondila sambu makototo kukatuka na ntwala na nge, ya bansadi na nge, ya bantu na nge, mpi ya banzo na nge. Yo ta bikala kaka na Nzadi ya Nile.” 10 Ebuna yandi tubaka nde: “Mbasi.” Yo yina Moize tubaka nde: “Yo ta salama kaka mutindu nge me tuba sambu nge zaba nde muntu ya nkaka kele ve yina kele bonso Yehowa Nzambi na beto.+ 11 Makototo ta bikisa nge, banzo na nge, bansadi na nge, mpi bantu na nge. Yo ta bikala kaka na Nile.”+

12 Yo yina Moize ti Aroni katukaka na ntwala ya Farao mpi basikaka, ebuna Moize bondilaka Yehowa sambu na makototo yina Yandi natilaka Farao.+ 13 Ebuna Yehowa salaka mutindu Moize lombaka, mpi makototo yantikaka kufwa na banzo, na bibansala, mpi na bilanga. 14 Bo vandaka kuvukisa yo na bita yina bo lendaka ve kutanga, ebuna insi yantikaka kubasisa nsudi ya mbi. 15 Ntangu Farao monaka nde mpasi me lembama, yandi kumisaka ntima+ na yandi ngolo mpi yandi buyaka kuwila bo, kaka mutindu Yehowa tubaka.

16 Ebuna Yehowa tubilaka Moize nde: “Tubila Aroni nde, ‘Tandula nti na nge mpi bula mfututu ya ntoto, mpi yo fwete kuma bambembele na insi ya mvimba ya Ezipte.’” 17 Bo salaka mutindu yina. Aroni tandulaka diboko na yandi ti nti na yandi mpi bulaka mfututu ya ntoto, ebuna bambembele kwisaka na zulu ya bantu ti bambisi. Mfututu yonso ya ntoto kumaka bambembele na insi ya mvimba ya Ezipte.+ 18 Banganga-nkisi ya ke sadilaka mazi mekaka kusala mutindu mosi mpi kubasisa bambembele na nzila ya mazi na bo,+ kansi bo kukaka ve. Ebuna bambembele kwisaka na zulu ya bantu ti bambisi. 19 Yo yina banganga-nkisi ya ke sadilaka mazi tubilaka Farao nde: “Yo kele musapi ya Nzambi!”+ Kansi ntima ya Farao landaka kukuma ngolo, mpi yandi wilaka bo ve, kaka mutindu Yehowa tubaka.

20 Ebuna Yehowa tubilaka Moize nde: “Telama na suka-suka kibeni mpi kwenda na ntwala ya Farao. Tala! Yandi ke kwisa na masa! Nge fwete tubila yandi nde, ‘Yehowa me tuba nde: “Bika bantu na mono bo kwenda sambu bo sadila mono. 21 Kansi kana nge bika ve bantu na mono bo kwenda, mono ta tindila nge, bansadi na nge, mpi bantu na nge, biningi-ningi,* mpi yo ta kota na kati ya banzo na nge; ebuna banzo ya Ezipte ta fuluka ti biningi-ningi, nkutu yo ta fika kitini ya ntoto yina bo* kele. 22 Na kilumbu yina, mono ta tula insi ya Goshene na kingenga kisika bantu na mono ke zingaka. Ata kiningi-ningi mosi ve ta vanda kuna,+ mpi sambu na yo nge ta zaba nde mono Yehowa, mono kele awa na insi yai.+ 23 Ebuna mono ta sala luswaswanu na kati ya bantu na mono mpi bantu na nge. Mbasi, kidimbu yai ta salama.”’”

24 Yehowa salaka mutindu yina mpi biningi-ningi mingi yantikaka kukota na nzo ya Farao, na banzo ya bansadi na yandi, mpi na insi ya mvimba ya Ezipte.+ Biningi-ningi+ yina bebisaka insi. 25 Nsuka-nsuka, Farao bingaka Moize ti Aroni mpi tubaka nde: “Beno kwenda, beno pesa kimenga na Nzambi na beno na insi yai.” 26 Kansi Moize tubaka nde: “Yo kele mbote ve na kusala mutindu yina, sambu bima yina beto ta pesa kimenga na Yehowa Nzambi na beto ta vanda bima ya nzanzi na meso ya bantu ya Ezipte.+ Kana beto pesa kimenga yina kele kima ya nzanzi na meso ya bantu ya Ezipte, keti bo ta losila beto ve matadi? 27 Beto ta sala nzietelo ya bilumbu tatu na ntoto-makanga, mpi kuna beto ta pesa kimenga na Yehowa Nzambi na beto, kaka mutindu yandi tubilaka beto.”+

28 Ntangu yai Farao tubaka nde: “Mono ta bika beno beno kwenda sambu na kupesa kimenga na Yehowa Nzambi na beno na ntoto-makanga. Kansi, beno fwete kwenda ntama ve. Beno bondila sambu na mono.”+ 29 Ebuna Moize tubaka nde: “Ntangu yai mono ke katuka na ntwala na nge, ebuna mono ta bondila Yehowa, mpi mbasi biningi-ningi ta bikisa Farao, bansadi na yandi, mpi bantu na yandi. Kansi Farao fwete yambula kusakana* ti beto na mutindu yandi ke buya kubika bantu bo kwenda sambu na kupesa kimenga na Yehowa.”+ 30 Ebuna Moize katukaka na ntwala ya Farao, basikaka, mpi bondilaka Yehowa.+ 31 Yo yina Yehowa salaka mutindu Moize tubaka, mpi biningi-ningi bikisaka Farao, bansadi na yandi, mpi bantu na yandi. Ata mosi ve bikalaka. 32 Kansi, Farao kumisaka diaka ntima na yandi ngolo mpi yandi bikaka ve bantu bo kwenda.

9 Yo yina Yehowa tubilaka Moize nde: “Kota kisika ya Farao mpi tubila yandi nde, ‘Yehowa Nzambi ya Baebreo me tuba nde: “Bika bantu na mono bo kwenda sambu bo sadila mono.+ 2 Kansi kana nge buya kubika bo mpi nge landa kukanga bo, 3 diboko ya Yehowa+ ta kwisa kufwa bitwisi na nge yina kele na nseke. Mpasi ya lufwa+ ta bwila bampunda ya bitumba, bampunda ya fioti, bashamo, bangombe, mpi mameme. 4 Yehowa ta sala kibeni luswaswanu na kati ya bitwisi ya Izraele ti bitwisi ya Ezipte, mpi ata kitwisi mosi ve ya bantu ya Izraele ta fwa.”’”+ 5 Diaka, Yehowa tulaka ntangu mosi, mpi tubaka nde: “Mbasi Yehowa ta sala diambu yina na insi yai.”

6 Yehowa salaka diambu yina kaka na kilumbu yina landaka, ebuna bitwisi ya mitindu yonso ya Ezipte yantikaka kufwa,+ kansi ata kitwisi mosi ve ya Izraele fwaka. 7 Ntangu Farao yulaka, tala! ata kitwisi mosi ve ya Izraele fwaka. Ata mpidina, ntima ya Farao landaka kukuma ngolo, mpi yandi bikaka ve bantu bo kwenda.+

8 Na nima, Yehowa tubilaka Moize ti Aroni nde: “Beno fulusa maboko na beno ti putulu ya tiya ya fulu, ebuna Moize fwete losa yo na zulu na ntwala ya Farao. 9 Yo ta kuma mfututu na insi ya mvimba ya Ezipte, mpi yo ta kuma bivimbu ya kupola na nitu ya bantu mpi ya bambisi yina kele na insi ya Ezipte ya mvimba.”

10 Ebuna bo bakaka putulu ya tiya ya fulu mpi bo telamaka na ntwala ya Farao, ebuna Moize losaka yo na zulu mpi yo kumaka bivimbu ya kupola yina vandaka kubasika na nitu ya bantu mpi ya bambisi. 11 Banganga-nkisi ya ke sadilaka mazi kukaka ve kutelama na ntwala ya Moize sambu na bivimbu yina, sambu yo basikaka banganga-nkisi ya ke sadilaka mazi mpi bantu yonso ya Ezipte.+ 12 Kansi Yehowa bikaka nde ntima ya Farao kukuma ngolo, mpi yandi wilaka bo ve, kaka mutindu Yehowa songaka Moize.+

13 Ebuna Yehowa tubilaka Moize nde: “Telama na suka-suka kibeni mpi kwenda na ntwala ya Farao, mpi tubila yandi nde, ‘Yehowa Nzambi ya Baebreo me tuba nde: “Bika bantu na mono bo kwenda sambu bo sadila mono. 14 Sambu ntangu yai mono ke tinda bampasi na mono yonso sambu na kubula ntima na nge, bansadi na nge, mpi bantu na nge, sambu nge zaba nde ata muntu mosi ve kele bonso mono na ntoto ya mvimba.+ 15 Kana ve ntangu yai mono zolaka kutandula diboko na mono sambu na kupesa nge ti bantu na nge mpasi ya lufwa, mpi mono zolaka kukatula* nge na ntoto. 16 Kansi mono me bika nge na luzingu sambu na kikuma yai: sambu na kusonga nge ngolo na mono mpi sambu bo zabisa zina na mono na ntoto ya mvimba.+ 17 Keti nge ke landa kaka kusadila bantu na mono mambu ti lulendo mpi nge ke buya kubika bo bo kwenda? 18 Tala! Mbasi na ntangu yai, mono ta nokisa mvula ya ngolo ya matadi, yina me nokaka ntete ve na Ezipte tuka kilumbu bo salaka yo tii bubu yai. 19 Yo yina, tinda ndinga sambu bo katula bitwisi na nge yonso mpi bima na nge yonso yina kele na nseke mpi bo tula yo na kisika ya lutaninu. Konso muntu mpi konso mbisi yina ta bikala na nseke mpi yina bo ta nata ve na nzo ta fwa ntangu mvula ya matadi ta nokila bo.”’”

20 Konso muntu na kati ya bansadi ya Farao yina waka ndinga ya Yehowa boma nataka nswalu bansadi na yandi ti bitwisi na yandi na banzo, 21 kansi konso muntu yina tulaka ve na ntima mambu yina Yehowa tubaka bikisaka bansadi na yandi ti bitwisi na yandi na nseke.

22 Ebuna Yehowa tubilaka Moize nde: “Tandula diboko na nge na zulu, sambu mvula ya matadi kunoka na insi ya mvimba ya Ezipte+ mpi kunokila bantu, bambisi, ti matiti yonso ya bilanga na insi ya Ezipte.”+ 23 Moize tandulaka nti na yandi na zulu, ebuna Yehowa tindaka makelele ya nzasi ti mvula ya matadi, mpi tiya* bwaka na ntoto, mpi Yehowa landaka kunokisa mvula ya matadi na insi ya Ezipte. 24 Mvula ya matadi nokaka mpi tiya vandaka kubasika na kati ya mvula ya matadi. Yo vandaka ngolo kibeni; diambu ya mutindu yina me salamaka ntete ve na insi yina tuka Ezipte me kumaka dikanda.+ 25 Mvula ya matadi fwaka bima yonso yina vandaka na nseke na insi ya mvimba ya Ezipte, yantika na muntu tii na mbisi, mpi yo fwaka matiti yonso mpi zenga-zengaka banti yonso ya nseke.+ 26 Kaka na insi ya Goshene mpamba, kisika bantu ya Izraele vandaka, mvula ya matadi nokaka ve.+

27 Yo yina, Farao tindaka bantu bo binga Moize ti Aroni, mpi yandi tubilaka bo nde: “Mbala yai mono me sumuka. Yehowa kele muntu ya lunungu, mpi mono ti bantu na mono beto me sala mbi. 28 Beno bondila Yehowa sambu makelele ya nzasi ya Nzambi mpi mvula ya matadi kumana. Ebuna mono ta bika beno na luzolo yonso beno kwenda, mpi mono ta kanga beno diaka ve nzila.” 29 Ebuna Moize tubilaka yandi nde: “Ntangu mono ta basika na mbanza mono ta tombula maboko na mono na zulu na ntwala ya Yehowa. Makelele ya nzasi ta mana mpi mvula ya matadi ta noka diaka ve, mpidina nge ta zaba nde ntoto kele ya Yehowa.+ 30 Kansi mono me zaba nde ata na ntangu yina, nge ti bansadi na nge beno ta wa ve Yehowa Nzambi boma.”

31 Ebuna, nti ya lino ti ya orze fwaka, sambu nti ya orze vandaka kubasisa ba-ntu mpi nti ya lino vandaka ti bintuntu. 32 Kansi ble* fwaka ve, sambu yo vandaka bambuma yina bo vandaka kukatula na nima.* 33 Ebuna Moize katukaka na ntwala ya Farao, basikaka na nganda ya mbanza, mpi tombulaka maboko na yandi na ntwala ya Yehowa, ebuna makelele ya nzasi ti mvula ya matadi manaka, mpi mvula yambulaka kunoka na ntoto.+ 34 Ntangu Farao monaka nde mvula, mvula ya matadi, mpi makelele ya nzasi me mana, yandi sumukaka diaka mpi kumisaka ntima na yandi ngolo,+ yandi ti bansadi na yandi. 35 Ntima ya Farao landaka kukuma ngolo, mpi yandi bikaka ve bantu ya Izraele bo kwenda, kaka mutindu Yehowa tubaka na nzila ya Moize.+

10 Ebuna Yehowa tubilaka Moize nde: “Kota kisika ya Farao, sambu mono me bika nde ntima na yandi mpi bantima ya bansadi na yandi kukuma ngolo,+ na mpila nde mono sala bidimbu na mono yai na meso na yandi,+ 2 mpi sambu nge zabisa bana na nge ti bantekolo na nge mutindu mono me sadila Ezipte mambu na nku kibeni mpi bidimbu yina mono me sala na kati na bo;+ ebuna beno ta zaba kibeni nde mono kele Yehowa.”

3 Yo yina Moize ti Aroni kotaka kisika ya Farao mpi tubilaka yandi nde: “Yehowa Nzambi ya Baebreo me tuba nde, ‘Tii nki ntangu nge ta buya kulemfukila mono?+ Bika bantu na mono bo kwenda sambu bo sadila mono. 4 Sambu kana nge ke buya kaka kubika bantu na mono bo kwenda, mbasi mono ke tinda bampasu na kati ya bandilu na nge. 5 Yo ta fika ntoto, mpi mpila ya kumona ntoto ta vanda ve. Yo ta dia bima yina mvula ya matadi bebisaka ve mpi yina bikalaka sambu na beno, mpi yo ta dia banti na beno yonso yina ke yela na mfinda.+ 6 Yo ta fuluka na banzo na nge, na banzo ya bansadi na nge yonso, mpi na banzo ya Ezipte yonso na kiteso yina batata na nge ti ba-nkaka na nge me monaka ntete ve yantika ntangu yina bo me vandaka na insi yai tii bubu yai.’”+ Ebuna yandi balukaka, katukaka na ntwala ya Farao mpi basikaka.

7 Ebuna, bansadi ya Farao tubilaka yandi nde: “Tii nki ntangu muntu yai ta landa kuvanda kigonsa* sambu na beto? Bika bantu yai bo kwenda sambu bo sadila Yehowa Nzambi na bo. Keti nge ke bakisa kaka ve nde Ezipte me beba?” 8 Yo yina bo vutulaka diaka Moize ti Aroni na Farao, mpi yandi tubilaka bo nde: “Beno kwenda, beno sadila Yehowa Nzambi na beno. Kansi banani kibeni ta kwenda?” 9 Ebuna Moize tubaka nde: “Beto ta kwenda ti baleke na beto, bambuta na beto, bana na beto ya babakala, bana na beto ya bankento, mameme na beto, mpi bangombe na beto,+ sambu beto ta sala nkinsi sambu na Yehowa.”+ 10 Yandi tubilaka bo nde: “Kana mono bika beno kibeni ti bana na beno beno kwenda, tuba nde Yehowa kele kibeni ti beno!+ Yo kele pwelele nde beno ke kana kusala diambu mosi ya mbi. 11 Ikele ve! Babakala na beno mpamba bantu lenda kwenda kusadila Yehowa, sambu yo yina diambu ya beno lombaka.” Ebuna bo kulaka bo na ntwala ya Farao.

12 Ebuna Yehowa tubilaka Moize nde: “Tandula diboko na nge na zulu, na insi ya Ezipte, sambu bampasu kukwisa, yo tombuka na insi ya Ezipte mpi yo dia matiti yonso ya insi, bima yonso yina mvula ya matadi bikisaka.” 13 Na mbala mosi Moize tandulaka nti na yandi na insi ya Ezipte, ebuna Yehowa salaka nde mupepe mosi ya esti kubula na insi kilumbu yina ya mvimba ti mpimpa ya mvimba. Ntongo tanaka, mpi mupepe ya esti kwisaka kunata bampasu. 14 Ebuna bampasu tombukaka na insi ya mvimba ya Ezipte mpi kotaka na teritware ya mvimba ya Ezipte.+ Yo vandaka mingi kibeni;+ bampasu mingi kibeni na mutindu yina me monanaka ntete ve, yo ta monana mpi diaka ve mingi mutindu yina. 15 Yo fikaka insi ya mvimba, mpi yo kumisaka insi ndombe; yo diaka matiti yonso ya insi mpi bambuma yonso ya banti yina mvula ya matadi bikisaka; ata dititi mosi ve ya mubisu bikalaka na banti to na matiti ya bilanga na insi ya mvimba ya Ezipte.

16 Ebuna Farao bingaka nswalu Moize ti Aroni mpi tubaka nde: “Mono me sala disumu na ntwala ya Yehowa Nzambi na beno mpi na ntwala na beno. 17 Ntangu yai, pardo, lolula disumu na mono kaka mbala yai, mpi beno bondila Yehowa Nzambi na beno sambu yandi katula mono na mpasi yai ya lufwa.” 18 Yo yina yandi* katukaka na ntwala ya Farao, basikaka, mpi bondilaka Yehowa.+ 19 Ebuna Yehowa salaka nde mupepe kusoba, mpi yo kumaka mupepe ya ngolo kibeni ya westi, ebuna yo nataka bampasu mpi kwendaka kulosa yo na Nzadi-Mungwa ya Mbwaki. Ata mpasu mosi ve bikalaka na teritware yonso ya Ezipte. 20 Kansi, Yehowa pesaka nzila nde ntima ya Farao kukuma ngolo,+ mpi yandi bikaka ve bantu ya Izraele bo kwenda.

21 Ebuna Yehowa tubilaka Moize nde: “Tandula diboko na nge na zulu, sambu mpimpa kubwa na insi ya Ezipte, mpimpa mosi ya ngolo kibeni.” 22 Na mbala mosi, Moize tandulaka diboko na yandi na zulu, ebuna mpimpa ya ngolo bwaka na insi ya mvimba ya Ezipte bilumbu tatu.+ 23 Bo vandaka kumonana ve bo na bo, mpi bilumbu tatu ata muntu mosi ve na kati na bo katukaka kisika yina yandi vandaka; kansi bantu yonso ya Izraele vandaka ti nsemo na bisika yina bo vandaka kuzinga.+ 24 Ebuna, Farao bingaka Moize mpi tubaka nde: “Beno kwenda, beno sadila Yehowa.+ Kaka mameme ti bangombe na beno ta bikala. Ata bana na beno lenda kwenda ti beno.” 25 Kansi Moize tubaka nde: “Nge mosi mpi muntu ta pesa beto* bimenga ti makabu ya kuyoka, ebuna beto ta pesa yo na Yehowa Nzambi na beto.+ 26 Beto ta kwenda mpi ti bitwisi na beto. Ata mbisi* mosi ve ta bikala, sambu beto ta sadila bambisi ya nkaka sambu na kusambila Yehowa Nzambi na beto, mpi beto me zaba ve nki mbisi beto ta pesa sambu na kusambila Yehowa tii ntangu beto ta kuma kuna.” 27 Kansi Yehowa pesaka nzila nde ntima ya Farao kukuma ngolo, mpi yandi ndimaka ve na kubika bo bo kwenda.+ 28 Farao tubilaka yandi nde: “Katuka na ntwala na mono! Kumeka diaka ve na kusosa kumona luse na mono, sambu kilumbu nge ta mona luse na mono nge ta fwa.” 29 Ebuna Moize tubaka nde: “Kaka mutindu nge me tuba, mono ta meka diaka ve kusosa kumona luse na nge.”

11 Ebuna Yehowa tubilaka Moize nde: “Mono ke natila Farao mpi Ezipte mpasi ya nkaka. Na nima yandi ta bika beno beno katuka awa.+ Ntangu yandi ta bika beno beno kwenda, yandi ta kula beno kibeni na kukatuka na kisika yai.+ 2 Ntangu yai, songa bantu nde babakala ti bankento yonso fwete lomba bima ya arza mpi ya wolo na bantu yina ke zingaka pene-pene na bo.”+ 3 Ebuna Yehowa salaka nde bantu ya Ezipte kundima bantu ya Izraele. Diaka, Moize yandi mosi kumaka muntu mosi ya bo vandaka kupesa luzitu mingi na insi ya Ezipte na kati ya bansadi ya Farao mpi na kati ya bantu.

4 Ebuna Moize tubaka nde: “Yehowa me tuba nde, ‘Pene-pene ya midi ya mpimpa mono ta luta na kati ya Ezipte,+ 5 mpi konso mwana ya ntete na insi ya Ezipte ta fwa,+ yantika na mwana ya ntete ya Farao yina me vanda na kiti na yandi ya kimfumu tii na mwana ya ntete ya mpika ya nkento yina ke sala na kima ya kunikila bambuma na maboko; mpi konso mwana ya ntete ya bitwisi.+ 6 Bidilu ya ngolo kibeni ta vanda na insi ya mvimba ya Ezipte, bidilu yina me salamaka ntete ve mpi yo ta salama diaka ve.+ 7 Kansi ata mbwa mosi ve ta nganina* bantu ya Izraele, yo vanda bantu to bitwisi na bo, sambu beno zaba nde Yehowa lenda sala luswaswanu na kati ya bantu ya Ezipte mpi bantu ya Izraele.’+ 8 Bansadi na nge yonso ta kwisa kukulumuka kisika mono kele, bo ta fukimina mono mpi ta tuba nde, ‘Kwenda, nge ti bantu yonso yina ke landa nge.’+ Na nima mono ta basika.” Ebuna yandi katukaka na ntwala ya Farao mpi basikaka na makasi yonso.

9 Na nima Yehowa tubilaka Moize nde: “Farao ta wila beno ve,+ sambu bimangu na mono kukuma mingi na insi ya Ezipte.”+ 10 Moize ti Aroni salaka bimangu yai yonso na ntwala ya Farao,+ kansi Yehowa pesaka nzila nde ntima ya Farao kukuma ngolo, na mpila nde yandi bikaka ve bantu ya Izraele bo katuka na insi na yandi.+

12 Ntangu yai, Yehowa tubilaka Moize ti Aroni na insi ya Ezipte nde: 2 “Ngonda yai ta vanda luyantiku ya bangonda sambu na beno. Yo ta vanda ngonda ya ntete na bangonda ya mvula sambu na beno.+ 3 Beno tubila kimvuka ya mvimba ya bantu ya Izraele nde: ‘Na kilumbu ya kumi ya ngonda yai, konso muntu na kati na bo fwete baka dimeme+ mosi sambu na nzo ya tata na yandi, konso nzo dimeme mosi. 4 Kansi kana bantu ya nzo yina kele fioti kibeni sambu na dimeme yina, bo ti dibuta yina kele pene-pene ti bo* fwete kabula yo na nzo na bo na kiteso ya ntalu ya bantu.* Na ntangu beno ke tanga ntalu ya bantu, beno fwete zaba kiteso ya dimeme yina konso muntu ta dia. 5 Dimeme na beno fwete vanda ya kukonda kifu,+ ya bakala, mpi yina me lungisa mvula mosi. Beno lenda pona yo na kati ya bana-mameme ya babakala to na kati ya bankombo. 6 Beno fwete keba yo tii na kilumbu ya 14 ya ngonda yai,+ ebuna dibundu ya mvimba ya bantu ya Izraele fwete fwa yo na nkokila.*+ 7 Bo fwete baka ndambu ya menga mpi kumwanga yo na makunzi yonso zole ya kielo mpi na dibaya ya zulu ya kielo ya banzo yina bo ta dia yo.+

8 “‘Bo fwete dia musuni na yo na mpimpa yina.+ Bo fwete yoka yo na tiya mpi kudia yo ti mampa ya kukonda levire+ mpi matiti ya ndudi.+ 9 Beno dia ve ata ndambu na yo ya mubisu to ya kutokisa, to ya kulamba na masa, kansi beno yoka yo na tiya, ntu kumosi ti makulu mpi ti bima ya kati. 10 Beno fwete bumba ve ata kitini na yo tii na suka, kansi konso kitini yina ta bikala tii na suka beno fwete yoka yo na tiya tii yo zika.+ 11 Ebuna beno fwete dia yo mutindu yai, ti mikaba na beno ya kukanga,* basandale na makulu na beno, mpi ti banti na beno na maboko; mpi beno fwete dia yo ntinu-ntinu. Yo kele Paki ya Yehowa. 12 Mono ta luta na insi ya Ezipte na mpimpa yai mpi ta fwa konso mwana ya ntete na insi ya Ezipte, yantika na muntu tii na mbisi;+ mpi mono ta sambisa banzambi yonso ya Ezipte mpi ta pesa bo ndola.+ Mono kele Yehowa. 13 Menga ta vanda kidimbu na beno na zulu ya banzo yina beno kele; mono ta mona menga yina mpi ta luta na zulu na beno, ebuna mpasi ta bwila beno ve sambu na kufwa beno ntangu mono ta bula insi ya Ezipte.+

14 “‘Beno fwete yibuka kilumbu yai, mpi beno fwete sala nkinsi kilumbu yina sambu na Yehowa na bandonga na beno yonso ya bantu. Beno fwete sala yo bonso nsiku ya mvula na mvula. 15 Beno fwete dia mampa ya kukonda levire+ bilumbu nsambwadi. Ya kieleka, na kilumbu ya ntete beno fwete katula pate ya ngani na banzo na beno, sambu konso muntu yina ta dia kima ya bo me tula levire, yantika kilumbu ya ntete tii na kilumbu ya nsambwadi, bo fwete katula* muntu* yina na Izraele. 16 Na kilumbu ya ntete, beno ta sala lukutakanu mosi ya santu, mpi na kilumbu ya nsambwadi lukutakanu ya nkaka ya santu. Beno fwete sala ve ata kisalu mosi na bilumbu yai.+ Kaka kima yina konso muntu* kele ti mfunu ya kudia, yo yina mpamba bo lenda lambila beno.

17 “‘Beno fwete landa kusala Nkinsi ya Mampa ya Kukonda Levire,+ sambu na kilumbu yina kibeni, mono ta katula bimvuka na beno mingi ya bantu* na insi ya Ezipte. Mpi beno fwete yibuka kilumbu yai na bandonga na beno yonso ya bantu bonso nsiku ya mvula na mvula. 18 Na ngonda ya ntete, na kilumbu ya 14 ya ngonda, na nkokila, beno fwete dia mampa ya kukonda levire tii na kilumbu ya 21 ya ngonda, na nkokila.+ 19 Bilumbu nsambwadi bo fwete mona ve pate ya ngani na banzo na beno, sambu kana muntu kudia kima yina bo me tula levire, yo vanda yandi kele munzenza to munkwa-nsi,+ bo fwete katula* muntu* yina na kati ya kimvuka ya bantu ya Izraele.+ 20 Beno fwete dia ve ata kima mosi yina bo me tula levire. Na banzo na beno yonso beno fwete dia mampa ya kukonda levire.’”

21 Moize bingaka bankuluntu yonso ya Izraele+ kukonda kusukinina mpi tubilaka bo nde: “Beno kwenda mpi beno pona bana-bambisi* sambu na mabuta na beno yonso, mpi beno fwa bambisi ya kimenga ya Paki. 22 Ebuna beno fwete dindisa dibuki ya matiti ya izope na menga yina kele na dilonga mpi kubula menga yina na kitini ya zulu ya kielo mpi na makunzi zole ya kielo; ata muntu mosi ve na kati na beno fwete basika na munoko ya nzo na yandi tii na suka. 23 Ebuna ntangu Yehowa ta luta sambu na kupesa mpasi na bantu ya Ezipte mpi ta mona menga na kitini ya zulu ya kielo mpi na zulu ya makunzi yonso zole ya kielo, Yehowa ta luta kibeni na zulu ya munoko ya nzo, mpi yandi ta pesa ve nzila nde mpasi ya lufwa kukota na banzo na beno.+

24 “Beno fwete zitisa diambu yai bonso nsiku ya mvula na mvula sambu na beno mpi bana na beno.+ 25 Ntangu beno ta kota na insi yina Yehowa ta pesa beno kaka mutindu yandi tubaka, beno fwete landa kusala diambu yai.+ 26 Ebuna ntangu bana na beno ta yula beno nde, ‘Diambu yai ke tendula nki sambu na beno?’+ 27 beno fwete tuba nde, ‘Yo kele kimenga ya Paki sambu na Yehowa, yina lutaka na zulu ya banzo ya bantu ya Izraele na Ezipte ntangu yandi pesaka mpasi na bantu ya Ezipte, kansi yandi gulusaka banzo na beto.’”

Ebuna bantu bwaka na ntoto mpi fukamaka. 28 Yo yina bantu ya Izraele kwendaka mpi bo salaka kaka mutindu Yehowa songaka Moize ti Aroni.+ Bo salaka kaka mutindu yina.

29 Ebuna na midi ya mpimpa, Yehowa fwaka konso mwana ya ntete na insi ya Ezipte,+ yantika na mwana ya ntete ya Farao yina vandaka na kiti na yandi ya kimfumu tii na mwana ya ntete ya mpika yina vandaka na boloko,* mpi konso mwana ya ntete ya bambisi.+ 30 Farao telamaka na mpimpa yina ti bansadi na yandi yonso mpi bantu yonso ya nkaka ya Ezipte, ebuna bidilu vandaka ya ngolo na kati ya bantu ya Ezipte, sambu na konso nzo yo vandaka ti muntu yina fwaka.+ 31 Na mbala mosi yandi bingaka Moize ti Aroni+ na mpimpa mpi tubaka nde: “Beno telama, beno basika na kati ya bantu na mono, beno ti bantu ya nkaka ya Izraele. Beno kwenda mpi beno sadila Yehowa, kaka mutindu beno tubaka.+ 32 Beno baka mpi mameme na beno ti bangombe na beno mpi beno kwenda, kaka mutindu beno tubaka.+ Kansi beno fwete sakumuna mono mpi.”

33 Ebuna bantu ya Ezipte yantikaka kupusa bantu ya Izraele na kubasika nswalu+ na insi yina, “sambu,” mutindu bo vandaka kutuba, “beto yonso kele bonso bamvumbi!”+ 34 Yo yina bantu nataka pate na bo ya fufu yina bo vandaka me tula ntete ve levire, bima* na bo ya kubudila pate vandaka ya kukanga na bilele mpi bo tulaka yo na mapeka. 35 Bantu ya Izraele salaka mambu yina Moize songaka bo mpi bo lombaka bantu ya Ezipte bima ya arza, ya wolo, mpi bilele.+ 36 Yehowa salaka nde bantu ya Ezipte kundima bantu ya Izraele, yo yina bantu ya Ezipte pesaka bo bima yina bo lombaka; mpi bo botulaka bima ya bantu ya Ezipte.+

37 Ebuna bantu ya Izraele katukaka na Ramesesi+ mpi kwendaka na Sukoti,+ babakala kiteso ya 600 000 yina vandaka kutambula na makulu, kukonda kutanga bana.+ 38 Kimvuka mosi ya nene ya bantu ya mutindu na mutindu*+ mpi tombukaka ti bo, mpi mameme ti bangombe, bitwisi mingi kibeni. 39 Bo yantikaka kuyoka poto-poto yina bo katukaka na yo na Ezipte mpi kusala mampa ya kukonda levire yina vandaka bonso dimbuma. Yo vandaka ya kukonda levire sambu bo kulaka bo na kintulumukina kibeni na Ezipte yo yina bo yidikaka ve ata kima mosi ya kudia.+

40 Ntangu yina bantu ya Izraele zingaka, bayina zingaka na Ezipte,+ vandaka bamvula 430.+ 41 Na nsuka ya bamvula 430, na kilumbu yina kibeni, bimvuka mingi ya bantu* yonso ya Yehowa basikaka na insi ya Ezipte. 42 Yo kele mpimpa yina bo ta taka nkinsi ya ke monisa mutindu Yehowa basisaka bo na insi ya Ezipte. Bantu yonso ya Izraele fwete zitisa mpimpa yai sambu na Yehowa na bandonga na bo yonso ya bantu.+

43 Ebuna Yehowa tubilaka Moize ti Aroni nde, “Yai kele nsiku sambu na Paki: Munzenza mosi ve lenda dia yo.+ 44 Kansi kana muntu kele ti mpika ya bakala yina yandi sumbaka na mbongo, nge fwete yotisa yandi.+ Ebuna yandi lenda dia yo. 45 Muntu yina me kwisaka kuzinga na kati na beno mpi muntu ya kisalu yina ke bakaka lufutu lenda dia yo ve. 46 Beno fwete dia yo na kati ya nzo mosi. Beno fwete nata ve ata kitini ya musuni na nganda ya nzo, mpi beno fwete buka ve ata mukwa+ na yo mosi. 47 Kimvuka yonso ya bantu ya Izraele fwete sala nkinsi yina. 48 Kana munzenza mosi ke zinga ti nge mpi yandi ke zola kusala nkinsi ya Paki sambu na Yehowa, bo fwete yotisa babakala yonso ya nzo na yandi. Na nima yandi lenda pusana sambu na kusala nkinsi yina, mpi yandi ta kuma bonso munkwa-nsi. Kansi ata bakala mosi ve ya kukonda kuyotisa lenda dia yo.+ 49 Beno fwete sadila kaka nsiku mosi sambu na munkwa-nsi mpi sambu na munzenza yina ke zinga na kati na beno.”+

50 Ebuna bantu yonso ya Izraele salaka kaka mutindu Yehowa songaka Moize ti Aroni. Bo salaka kaka mutindu yina. 51 Na kilumbu yina kibeni, Yehowa basisaka bantu ya Izraele ti bimvuka na bo mingi ya bantu* na insi ya Ezipte.

13 Yehowa tubilaka diaka Moize nde: 2 “Santisa* sambu na mono konso mwana ya ntete ya bakala* na kati ya bantu ya Izraele. Mwana ya ntete ya bakala yina ta butuka, yo vanda ya muntu to ya mbisi, kele ya mono.”+

3 Ebuna Moize tubilaka bantu nde: “Beno yibuka kilumbu yai ya beno me basika na Ezipte,+ na nzo ya kimpika, sambu Yehowa me basisa beno awa+ ti diboko ya ngolo. Yo yina beno lenda dia ve ata kima mosi ya bo me tula levire. 4 Beno ke basika na kilumbu yai, na ngonda ya Abibi.*+ 5 Ntangu Yehowa ta nata nge na insi ya bantu ya Kanana, ya bantu ya Heti, ya bantu ya Amore, ya bantu ya Hivi, mpi ya bantu ya Yebusi,+ yina yandi zengaka kieleka na ntwala ya ba-nkaka na nge na kupesa nge,+ insi yina miliki* ti bwiki+ kele mingi, nge fwete salaka diambu yai na ngonda yai. 6 Nge fwete dia mampa ya kukonda levire+ bilumbu nsambwadi, mpi na kilumbu ya nsambwadi nge ta sala nkinsi sambu na Yehowa. 7 Nge fwete dia mampa ya kukonda levire bilumbu yina nsambwadi;+ mpi bo fwete mona nge ve ata ti kima mosi ya bo me tula levire+ mpi bo fwete mona nge ve ti pate ya ngani na teritware* na nge yonso. 8 Ebuna nge fwete songa mwana na nge na kilumbu yina nde, ‘Yo kele sambu na mambu yina Yehowa sadilaka mono ntangu mono basikaka na Ezipte.’+ 9 Yai ta vanda kidimbu na diboko na nge mpi ngibusa na mbunzu na nge,*+ na mpila nde nsiku ya Yehowa kuvanda na munoko na nge, sambu Yehowa basisaka nge na Ezipte ti diboko ya ngolo. 10 Nge fwete landa kuzitisa nsiku yai na ntangu na yo mvula na mvula.+

11 “Ntangu Yehowa ta nata nge na insi ya bantu ya Kanana, yina yandi zengaka kieleka na ntwala na nge mpi ya ba-nkaka na nge na kupesa nge,+ 12 nge fwete pesa Yehowa konso mwana ya ntete ya bakala,* mpi konso mwana-bakala ya ntete ya bitwisi yina nge ta baka. Bana ya babakala kele ya Yehowa.+ 13 Nge fwete futa dimeme sambu na kusumba diaka konso mwana ya ntete ya mpunda, mpi kana nge sumba yo diaka ve, nge fwete buka yo nkingu. Nge fwete sumba diaka+ konso mwana na nge ya ntete ya bakala.

14 “Kana mwana na nge ya bakala kuyula nge na nima nde, ‘Diambu yai ke tendula inki?’ nge fwete tubila yandi nde, ‘Yehowa basisaka beto na Ezipte, na nzo ya kimpika, ti diboko ya ngolo.+ 15 Ntangu Farao buyaka na ntu-ngolo yonso na kubika beto beto kwenda,+ Yehowa fwaka konso mwana ya ntete na insi ya Ezipte, yantika na mwana ya ntete ya muntu tii na mwana ya ntete ya mbisi.+ Yo yina mono ke pesa Yehowa kimenga ya bana yonso ya ntete ya babakala,* mpi mono ke sumba diaka konso mwana na mono ya ntete ya bakala.’ 16 Diambu yai fwete vanda bonso kidimbu na diboko na nge mpi bonso lele ya bo ke kangisaka na ntu na mbunzu na nge,*+ sambu Yehowa basisaka beto na Ezipte ti diboko ya ngolo.”

17 Ebuna ntangu Farao bikaka bantu bo kwenda, Nzambi twadisaka bo ve na nzila ya insi ya bantu ya Filistia, ata yo vandaka pene-pene. Sambu Nzambi tubaka nde: “Bantu lenda soba mabanza na bo ntangu bo ta kutana ti bitumba mpi ta vutuka na Ezipte.” 18 Yo yina Nzambi salaka nde bantu kwenda kuyungana na nzila ya ntoto-makanga ya Nzadi-Mungwa ya Mbwaki.+ Kansi bantu ya Izraele basikaka na insi ya Ezipte na ndonga, bonso bimvuka ya basoda. 19 Moize nataka mpi mikwa ya Yozefi, sambu Yozefi songaka bana ya Izraele na kuzenga kieleka nde: “Nzambi ta konda ve na kutudila beno dikebi, ebuna beno fwete katula mikwa na mono awa mpi kunata yo.”+ 20 Bo katukaka na Sukoti mpi salaka camp na Etame, pene-pene ya ntoto-makanga.

21 Ebuna na mwini Yehowa vandaka kukwenda na ntwala na bo na dikunzi ya dituti sambu na kutwadisa bo na nzila,+ mpi na mpimpa na dikunzi ya tiya sambu na kupesa bo nsemo, mpidina bo lendaka kusala nzietelo na mwini mpi na mpimpa.+ 22 Na mwini dikunzi ya dituti vandaka kukatuka ve na ntwala ya bantu, na mpimpa+ dikunzi ya tiya vandaka kukatuka mpi ve.

14 Ebuna Yehowa tubilaka Moize nde: 2 “Songa bantu ya Izraele nde bo fwete vutuka mpi kutula camp na ntwala ya Pihahiroti, na kati-kati ya Migdole mpi ya nzadi-mungwa, yo talana ti Baale-sefoni.+ Beno fwete sala camp ya ke talana ti yo pene-pene ya nzadi-mungwa. 3 Ebuna Farao ta tuba sambu na bantu ya Izraele nde, ‘Bo ke yungana-yungana na insi yai, bo me kuma kisaka-saka. Bo me kangama na ntoto-makanga.’ 4 Mono ta bika nde ntima ya Farao kukuma ngolo,+ mpi yandi ta landa bo, ebuna mono ta kudipesa nkembo na nzila ya Farao mpi ya basoda na yandi yonso;+ mpi bantu ya Ezipte ta zaba kibeni nde mono kele Yehowa.”+ Yo yina mambu ya bo salaka.

5 Na nima bo pesaka ntotila ya Ezipte nsangu nde bantu ya Izraele me tina. Na mbala mosi, Farao ti bansadi na yandi sobaka mabanza na bo sambu na bantu yina,+ mpi bo tubaka nde: “Sambu na nki beto me sala diambu yai mpi me yambula Izraele sambu na kuvanda diaka ve bampika na beto?” 6 Ebuna yandi yidikaka bapusu-pusu na yandi ya bitumba, mpi yandi kwendaka ti bantu na yandi.+ 7 Yandi bakaka bapusu-pusu 600 ya mbote kibeni mpi bapusu-pusu yonso ya nkaka ya Ezipte, konso pusu-pusu vandaka ti basoda na zulu na yo. 8 Ebuna Yehowa bikaka nde ntima ya Farao, ntotila ya Ezipte, kukuma ngolo, mpi yandi landaka bantu ya Izraele ntangu bo vandaka kubasika ti kivuvu yonso.*+ 9 Bantu ya Ezipte landaka bo,+ mpi bapusu-pusu yonso ya Farao yina bampunda vandaka kunata, basoda na yandi yina ke tambusaka bampunda, mpi basoda na yandi vandaka kufinama ti bo na ntangu bo vandaka na camp yina bo salaka pene-pene ya nzadi-mungwa, pene-pene ya Pihahiroti, na ntwala ya Baale-sefoni.

10 Ntangu Farao kumaka pene-pene, bantu ya Izraele talaka mpi monaka bantu ya Ezipte ke landa bo. Bantu ya Izraele waka boma ya ngolo mpi bo yantikaka kudidila Yehowa.+ 11 Bo tubilaka Moize nde: “Keti yo kele sambu maziamu kele ve na Ezipte yo yina nge me nata beto awa sambu beto fwa na ntoto-makanga?+ Sambu na nki nge me sala beto diambu ya mutindu yai? Sambu na nki nge basisaka beto na Ezipte? 12 Keti yo kele ve kibeni diambu ya beto songaka nge na Ezipte ntangu beto tubaka nde, ‘Bika beto, na mpila nde beto sadila bantu ya Ezipte’? Sambu yo me luta mbote nde beto sadila bantu ya Ezipte na kisika ya kufwa na ntoto-makanga.”+ 13 Ebuna Moize tubilaka bantu nde: “Beno wa boma ve.+ Beno telama ngolo mpi beno tala mutindu Yehowa ta gulusa beno bubu yai.+ Sambu bantu ya Ezipte yina beno ke mona bubu yai, beno ta monaka bo diaka ve.+ 14 Yehowa yandi mosi ta nwanina beno,+ mpi beno ta vanda pima.”

15 Ebuna Yehowa tubilaka Moize nde: “Sambu na nki nge ke landa kudidila mono? Songa bantu ya Izraele bo katula camp. 16 Kansi nge, nangula nti na nge mpi tandula diboko na nge na zulu ya nzadi-mungwa mpi kabula yo, sambu bantu ya Izraele kuluta na kati-kati ya nzadi-mungwa na ntoto ya kuyuma. 17 Kansi mono, mono ke bika nde bantima ya bantu ya Ezipte kukuma ngolo, na mpila nde bo ta landa bo; mpidina mono ta kudipesa nkembo na nzila ya Farao, ya basoda na yandi yonso, ya bapusu-pusu na yandi ya bitumba, mpi ya basoda na yandi yina ke tambusaka bampunda.+ 18 Ebuna bantu ya Ezipte ta zaba kibeni nde mono kele Yehowa ntangu mono ta kudipesa nkembo na nzila ya Farao, ya bapusu-pusu na yandi ya bitumba, mpi ya basoda na yandi yina ke tambusaka bampunda.”+

19 Ebuna wanzio ya Nzambi ya kieleka+ yina vandaka kukwenda na ntwala ya camp ya Izraele katukaka na ntwala mpi vutukaka na nima na bo, mpi dikunzi ya dituti yina vandaka na ntwala na bo katukaka na ntwala mpi kwendaka na nima mpi telamaka na nima na bo.+ 20 Ebuna yo kwisaka na kati-kati ya camp ya bantu ya Ezipte mpi camp ya Izraele.+ Na ndambu mosi, yo vandaka dituti ya ndombe. Na ndambu ya nkaka yo vandaka kupesa nsemo na mpimpa.+ Yo yina camp mosi pusanaka ve pene-pene na camp ya nkaka mpimpa ya mvimba.

21 Ntangu yai Moize tandulaka diboko na yandi na zulu ya nzadi-mungwa;+ ebuna Yehowa sadilaka mupepe mosi ya ngolo ya esti yina bulaka mpimpa ya mvimba mpi vutulaka nzadi-mungwa na nima, mpidina nsi ya nzadi-mungwa kumaka ntoto ya kuyuma+ mpi masa kabwanaka na bandambu zole.+ 22 Bantu ya Izraele lutaka na kati-kati ya nzadi-mungwa na ntoto ya kuyuma,+ masa salaka kibaka na diboko na bo ya kitata mpi na diboko na bo ya kimama.+ 23 Bantu ya Ezipte landaka bo, mpi bampunda yonso ya Farao, bapusu-pusu na yandi ya bitumba, mpi basoda na yandi yina ke tambusaka bampunda, yantikaka kukota na kati-kati ya nzadi-mungwa+ sambu na kulanda bo. 24 Na nsungi ya kukengila ya suka-suka,* Yehowa talaka camp ya bantu ya Ezipte tuka dikunzi ya tiya mpi ya dituti,+ ebuna yandi kumisaka camp ya bantu ya Ezipte kisaka-saka. 25 Yandi vandaka kukatula makulu ya bapusu-pusu na bo yo yina bo vandaka kutambusa yo na mpasi, ebuna bantu ya Ezipte vandaka kutuba nde: “Beto tina mpi beto pusana ve pene-pene na Izraele, sambu Yehowa ke nwanisa bantu ya Ezipte+ sambu na kunwanina bo.”

26 Ebuna Yehowa tubilaka Moize nde: “Tandula diboko na nge na zulu ya nzadi-mungwa sambu masa kuvutukila bantu ya Ezipte, bapusu-pusu na bo ya bitumba, mpi basoda na bo yina ke tambusaka bampunda.” 27 Na mbala mosi Moize tandulaka diboko na yandi na zulu ya nzadi-mungwa, mpi ntangu ntongo vandaka kutana, nzadi-mungwa vutukaka mutindu yo ke vandaka. Ntangu bantu ya Ezipte vandaka kutina yo, Yehowa losaka bo na kati-kati ya nzadi-mungwa.+ 28 Masa yina vutukaka fikaka bapusu-pusu ya bitumba, basoda yina ke tambusaka bampunda, mpi basoda yonso ya Farao yina kotaka na nzadi-mungwa sambu na kulanda bantu ya Izraele.+ Bo bikaka ve nde ata muntu mosi na kati na bo kuguluka.+

29 Kansi bantu ya Izraele tambulaka na ntoto ya kuyuma na kati-kati ya nsi ya nzadi-mungwa,+ mpi masa salaka kibaka na diboko na bo ya kitata mpi na diboko na bo ya kimama.+ 30 Mpidina na kilumbu yina Yehowa gulusaka Izraele na maboko ya bantu ya Ezipte,+ mpi Izraele monaka bantu ya Ezipte me fwa-fwa na lweka ya nzadi-mungwa. 31 Izraele monaka mpi ngolo* ya nene yina Yehowa sadilaka sambu na kunwanisa bantu ya Ezipte, ebuna bantu yantikaka kuwa Yehowa boma mpi kukwikila na Yehowa mpi na Moize+ nsadi na yandi.

15 Na ntangu yina, Moize mpi bantu ya Izraele yimbilaka Yehowa nkunga yai:+

“Bika mono yimbila Yehowa, sambu nkembo na yandi me kuma mingi.+

Yandi me losa mpunda ti muntu yina ke tambusa yo na nzadi-mungwa.+

 2 Kikesa na mono mpi ngolo na mono kele Yah,* sambu yandi me kuma luguluku na mono.+

Yai Nzambi na mono, mpi mono ta kumisa yandi;+ Nzambi ya tata na mono,+ mpi mono ta nangula yandi.+

 3 Yehowa kele soda ya ngolo.+ Zina na yandi Yehowa.+

 5 Masa ya me dasuka fikaka bo; bo dindaka bonso ditadi na bisika ya mudindu.+

 9 Mbeni tubaka nde: ‘Mono ta landa! Mono ta kanga!

Mono ta kabula bima ya mono ta botula tii kuna mono* ta sepela!

Mono ta basisa mbele na mono ya bitumba! Diboko na mono ta bedisa bo!’+

11 Nani na kati ya banzambi kele bonso nge, O Yehowa?+

Nani kele bonso nge, nge muntu yina kele santu na kiteso ya kuluta?+

Muntu yina bo fwete wa boma mpi kuyimbila bankunga ya lukumu, Muntu yina ke salaka mambu ya kuyituka.+

12 Nge tandulaka diboko na nge ya kitata, mpi ntoto minaka bo.+

Bantu yonso ya Kanana ta lemba nitu.+

16 Boma mpi matekita ta simba bo.+

18 Yehowa ta yala bonso ntotila mvula na mvula.+

20 Ebuna Miriami mbikudi ya nkento, mpangi ya Aroni, bakaka ngoma ya fioti na diboko na yandi, ebuna bankento yonso landaka yandi bo ke bula bangoma ya fioti mpi ke kina. 21 Miriami pesaka babakala mvutu na nkunga nde:

“Beno yimbila Yehowa, sambu nkembo na yandi me kuma mingi.+

Yandi me losa mpunda ti muntu yina ke tambusa yo na nzadi-mungwa.”+

22 Na nima Moize katulaka Izraele na Nzadi-Mungwa ya Mbwaki, ebuna bo kwendaka na ntoto-makanga ya Shure mpi bo tambulaka bilumbu tatu na ntoto-makanga, kansi bo monaka ve masa. 23 Bo kumaka na Mara,*+ kansi bo monaka ve mpila ya kunwa masa ya Mara sambu yo vandaka ndudi. Yo yina yandi pesaka yo zina Mara. 24 Ebuna bantu yantikaka kubokutila Moize+ nde: “Inki beto ta nwa?” 25 Yandi didilaka Yehowa,+ ebuna Yehowa songaka yandi nti mosi. Ntangu yandi losaka yo na masa, masa kumaka mbote.

Kuna Nzambi tudilaka bo nsiku mpi mbandu yina ta sadisaka bo na kusambisa, mpi kuna yandi mekaka+ bo. 26 Yandi tubaka nde: “Kana nge wa kibeni ndinga ya Yehowa Nzambi na nge mpi nge sala mambu yina kele ya mbote na meso na yandi mpi nge tula dikebi na bantuma na yandi mpi nge landa bansiku na yandi yonso,+ mono ta natila nge ve ata maladi mosi yina mono natilaka bantu ya Ezipte,+ sambu mono, Yehowa, mono ke belula nge.”+

27 Na nima, bo kumaka na Elimi, kisika vandaka banto ya masa 12 mpi maba 70. Ebuna bo salaka camp pana pene-pene ya masa.

16 Na nima ya kukatuka na Elimi, kimvuka ya mvimba ya bantu ya Izraele kumaka nsuka-nsuka na ntoto-makanga ya Sini,+ yina kele na kati-kati ya Elimi mpi Sinai, na kilumbu ya 15 ya ngonda ya zole na nima ya kubasika na bo na insi ya Ezipte.

2 Ebuna kimvuka ya mvimba ya bantu ya Izraele yantikaka kubokutila Moize ti Aroni na ntoto-makanga.+ 3 Bantu ya Izraele vandaka kutubila bo nde: “A kana beto fwaka na diboko ya Yehowa na insi ya Ezipte ntangu beto vandaka kuvanda pene-pene ya banzungu ya misuni,+ ntangu beto vandaka kudia mampa tii kuna beto fuluka. Ntangu yai, beno me nata beto na ntoto-makanga yai sambu na kufwa dibundu yai ya mvimba na nzala.”+

4 Ebuna Yehowa tubilaka Moize nde: “Ntangu yai mono ke nokisila beno mampa na zulu,+ mpi konso muntu fwete basika sambu na kulokuta kiteso yina me fwana sambu na yandi konso kilumbu,+ sambu mono meka bo mpi kumona kana bo ta zitisa nsiku na mono to ve.+ 5 Kansi na kilumbu ya sambanu+ ntangu bo ta lamba yina bo me lokuta, yo fwete vanda mbala zole kuluta kiteso yina bo ke lokutaka bilumbu ya nkaka.”+

6 Ebuna Moize ti Aroni tubilaka bantu yonso ya Izraele nde: “Na nkokila beno ta zaba kibeni nde Yehowa muntu basisaka beno na insi ya Ezipte.+ 7 Na suka beno ta mona nkembo ya Yehowa, sambu yandi me wa mabokuta na beno yina beno ke bokutila Yehowa. Beto, beto kele banani sambu beno bokutila beto?” 8 Moize tubaka diaka nde: “Ntangu Yehowa ta pesa beno misuni ya kudia na nkokila mpi mampa na suka tii kuna beno ta fuluka, beno ta mona nde Yehowa me wa mabokuta na beno yina beno ke bokutila yandi. Kansi beto, beto kele banani? Beno ke bokutila beto ve, kansi Yehowa.”+

9 Ebuna Moize tubilaka Aroni nde: “Songa kimvuka ya mvimba ya bantu ya Izraele nde, ‘Beno kwisa na ntwala ya Yehowa, sambu yandi me wa mabokuta na beno.’”+ 10 Kaka na ntangu Aroni tubilaka kimvuka ya mvimba ya bantu ya Izraele, bo balukaka mpi talaka na ndambu ya ntoto-makanga, ebuna tala! nkembo ya Yehowa monikaka na dituti.+

11 Yehowa tubilaka diaka Moize nde: 12 “Mono me wa mabokuta ya bantu ya Izraele.+ Songa bo nde, ‘Na nkokila* beno ta dia misuni, mpi na suka beno ta dia mampa tii kuna beno ta fuluka,+ ebuna beno ta zaba kibeni nde mono kele Yehowa Nzambi na beno.’”+

13 Yo yina na nkokila yina bandeke yina vandaka bonso bangwadi kwisaka mpi fulukaka na camp,+ ebuna na suka malulu vandaka na nziunga ya camp. 14 Ntangu malulu walukaka, kuvandaka ti bima ya fioti-fioti, ya ke bukana mpamba-mpamba na zulu ya ntoto-makanga,+ yo vandaka fioti-fioti kibeni bonso masa ya matadi na ntoto. 15 Ntangu bantu ya Izraele monaka yo, bo yantikaka kutuba bo na bo nde: “Yai nki?” sambu bo zabaka ve kana yo vandaka nki. Moize tubilaka bo nde: “Yo kele mampa yina Yehowa me pesa beno sambu na kudia.+ 16 Yehowa me tuba nde, ‘Konso muntu fwete lokuta kiteso yina yandi lenda dia. Beno fwete baka omere mosi*+ sambu na konso muntu na kutadila ntalu ya bantu* yina konso muntu na kati na beno kele na bo na tenta na yandi.’” 17 Bantu ya Izraele yantikaka kusala mutindu yina; bo lokutaka yo, bantu ya nkaka lokutaka mingi mpi bankaka lokutaka fioti. 18 Ntangu bo vandaka kutesa yo na omere, na muntu yina lokutaka mingi yo lutanaka ve, mpi na muntu yina lokutaka fioti yo kondaka ve.+ Konso muntu vandaka kulokuta yo na kutadila kiteso yina yandi lendaka kudia.

19 Ebuna Moize tubilaka bo nde: “Ata muntu mosi ve fwete bika ata ndambu na yo tii na suka.”+ 20 Kansi bo wilaka Moize ve. Ntangu bantu ya nkaka bikaka ndambu na yo tii na suka, yo butaka misopi mpi basisaka nsudi, ebuna Moize wilaka bo makasi. 21 Bo vandaka kulokuta yo konso suka, konso muntu na kutadila kiteso yina yandi lendaka kudia. Ntangu mwini vandaka kukuma ngolo, yo vandaka kukuma masa-masa.

22 Na kilumbu ya sambanu, bo lokutaka mampa mbala zole kuluta,+ ba omere zole sambu na konso muntu. Ebuna bamfumu yonso ya bantu ya Izraele kwisaka kuzabisa Moize mambu yina. 23 Ebuna yandi tubilaka bo nde: “Yai mambu Yehowa me tuba. Mbasi ta vanda kilumbu ya kupema kibeni,* kisabatu ya santu sambu na Yehowa.+ Beno yoka yina beno fwete yoka, mpi beno tokisa yina beno fwete tokisa;+ ebuna beno bumba yina yonso ta bikala tii na suka.” 24 Yo yina bo bumbaka yo tii na suka, kaka mutindu Moize tubaka, yo basisaka ve nsudi ya mbi mpi mikuni vandaka ve na kati na yo. 25 Ebuna Moize tubaka nde: “Beno dia yo bubu yai, sambu bubu yai kele kisabatu sambu na Yehowa. Bubu yai beno ta mona yo ve na ntoto. 26 Beno ta lokutaka yo bilumbu sambanu, kansi na kilumbu ya nsambwadi, na Kisabatu,+ yo ta vandaka ve.” 27 Ata mpidina, bantu ya nkaka basikaka sambu na kulokuta yo na kilumbu ya nsambwadi, kansi bo monaka kima ve.

28 Yo yina Yehowa tubilaka Moize nde: “Tii nki ntangu beno ta buya kuzitisa bantuma na mono mpi bansiku na mono?+ 29 Beno zaba nde Yehowa me pesa beno Kisabatu.+ Yo yina yandi ke pesa beno mampa ya bilumbu zole na kilumbu ya sambanu. Konso muntu fwete bikala kisika yandi kele; ata muntu mosi ve fwete bikisa kisika na yandi na kilumbu ya nsambwadi.” 30 Yo yina bantu vandaka kuzitisa Kisabatu* na kilumbu ya nsambwadi.+

31 Nzo ya Izraele pesaka mampa yina zina “mana.”* Yo vandaka mpembe bonso nkeni ya koriandre, mpi ntomo na yo vandaka bonso ya bagato ya papala ya bo me sala ti bwiki.+ 32 Ebuna Moize tubaka nde: “Yehowa me tuba nde, ‘Beno fulusa yo na omere mosi bonso kima ya kubumba sambu na bandonga na beno yonso ya bantu,+ sambu bo mona mampa yina mono pesaka beno na kudia na ntoto-makanga ntangu mono vandaka kubasisa beno na insi ya Ezipte.’” 33 Yo yina Moize tubilaka Aroni nde: “Baka dibungu mosi, tula omere mosi ya mana na kati na yo, mpi tula yo na ntwala ya Yehowa bonso kima ya kubumba sambu na bandonga na beno yonso ya bantu.”+ 34 Kaka mutindu Yehowa songaka Moize, Aroni tulaka yo na ntwala ya Kimbangi+ sambu bo tanina yo. 35 Bantu ya Izraele diaka mana bamvula 40,+ tii kuna bo kwisaka kukuma na insi yina bantu vandaka kuzinga ve.+ Bo diaka mana tii kuna bo kwisaka kukuma na ndilu ya insi ya Kanana.+ 36 Omere kele ndambu mosi na kati ya bandambu kumi ya efa.*

17 Kimvuka ya mvimba ya bantu ya Izraele katukaka na ntoto-makanga ya Sini,+ bo salaka nzietelo yina bitini-bitini, mutindu Yehowa songaka bo,+ mpi bo salaka camp na Refidimi.+ Kansi masa vandaka ve sambu bantu kunwa.

2 Ebuna bantu yantikaka kuswanisa Moize+ mpi kutuba nde: “Pesa beto masa ya kunwa.” Kansi Moize tubilaka bo nde: “Sambu na nki beno ke swanisa mono? Sambu na nki beno ke landa kumeka+ Yehowa?” 3 Kansi bantu vandaka na nzala ya ngolo ya masa kuna, mpi bo landaka kubokutila Moize+ mpi kutuba nde: “Sambu na nki nge basisaka beto na Ezipte sambu na kufwa beto, bana na beto mpi bitwisi na beto na nzala ya masa?” 4 Nsuka-nsuka Moize didilaka Yehowa nde: “Nki mono fwete sala sambu na bantu yai? Kubika fioti bo ta losila mono matadi!”

5 Ebuna Yehowa tubilaka Moize nde: “Kwenda na ntwala ya bantu, mpi nata bankuluntu ya nkaka ya Izraele mpi nti na nge yina nge bulaka na Nzadi ya Nile.+ Baka yo na diboko mpi tambula. 6 Tala! Mono ta telama na ntwala na nge pana na zulu ya ditadi na Orebi. Nge fwete bula ditadi, mpi masa ta basika na kati na yo, mpi bantu ta nwa yo.”+ Moize salaka mutindu yina na meso ya bankuluntu ya Izraele. 7 Yo yina yandi pesaka kisika yina zina Massa*+ mpi Meriba*+ sambu bantu ya Izraele swanisaka Moize mpi sambu bo mekaka+ Yehowa na ntangu bo tubaka nde: “Keti Yehowa kele na kati na beto to ve?”

8 Ebuna bantu ya Amaleki+ kwisaka mpi nwanisaka Izraele na Refidimi.+ 9 Na nima Moize tubilaka Yozue+ nde: “Sola bantu sambu na beto mpi basika sambu na kunwana ti bantu ya Amaleki. Mbasi mono ta telama na nsongi ya ngumba, ti nti ya Nzambi ya kieleka na diboko na mono.” 10 Ebuna Yozue salaka kaka mutindu Moize songaka yandi,+ mpi yandi nwanaka ti bantu ya Amaleki. Moize, Aroni, mpi Hure+ tombukaka na nsongi ya ngumba.

11 Ntangu Moize vandaka kubika maboko na yandi ya kunangula, bantu ya Izraele vandaka kununga, kansi ntangu yandi vandaka kukulumusa maboko na yandi, bantu ya Amaleki vandaka kununga. 12 Ntangu maboko ya Moize kumaka kilo, bo bakaka ditadi, bo tulaka yo na nsi na yandi, mpi yandi vandilaka yo. Ebuna Aroni ti Hure simbaka maboko na yandi, mosi na lweka mosi mpi ya nkaka na lweka ya nkaka, yo yina maboko na yandi nikanaka ve tii kuna ntangu dindaka. 13 Na mutindu yina, Yozue bedisaka Amaleki ti bantu na yandi na mbele ya bitumba.+

14 Ntangu yai Yehowa tubilaka Moize nde: “Sonika mambu yai na mukanda sambu na kuyibukaka yo mpi tubila yo Yozue, ‘Mono ta katula kimakulu bantu ya Amaleki na zulu ya ntoto mpi bo ta yibuka bo diaka ve ata fioti.’”+ 15 Ebuna Moize tungaka mesa-kimenga mpi pesaka yo zina Yehowa-nisi,* 16 mpi tubaka nde: “Sambu diboko na yandi ke nwanisa kiti ya kimfumu ya Yah,+ Yehowa ta nwanaka bitumba ti Amaleki tii na bandonga ya bantu na yandi yonso yina ta kwisa.”+

18 Ntangu yai Yetro, nganga-nzambi ya Madiani, bokilo ya Moize,+ waka mambu yonso yina Nzambi salaka sambu na Moize mpi sambu na bantu na yandi Izraele, mutindu Yehowa basisaka Izraele na Ezipte.+ 2 Yetro, bokilo ya Moize, bakaka Sipora, nkento ya Moize, ntangu Moize vutulaka yandi, 3 kumosi ti bana na yandi zole ya babakala.+ Zina ya mwana mosi vandaka Gershomi,*+ sambu Moize tubaka nde, “Mono me kuma munzenza na insi ya nzenza,” 4 mpi zina ya mwana ya nkaka vandaka Eliezere,* sambu yandi tubaka nde, “Nzambi ya tata na mono kele nsadisi na mono, yina gulusaka mono na mbele ya bitumba ya Farao.”+

5 Yo yina Yetro, bokilo ya Moize, ti bana ya Moize mpi nkento na yandi, kwisaka na Moize na ntoto-makanga kisika yandi salaka camp na ngumba ya Nzambi ya kieleka.+ 6 Ebuna yandi tindilaka Moize ndinga nde: “Mono Yetro bokilo na nge,+ mono ke kwisa kuna na nge ti nkento na nge mpi bana na yandi zole.” 7 Na mbala mosi Moize basikaka sambu na kukutana ti bokilo na yandi, yandi fukamaka mpi pesaka yandi beze. Bo pesanaka mbote, mpi na nima bo kotaka na tenta.

8 Moize telaka bokilo na yandi mambu yonso yina Yehowa salaka Farao mpi Ezipte sambu na mambote ya Izraele,+ bampasi yonso yina bwilaka bo na nzila,+ mpi mutindu Yehowa gulusaka bo. 9 Yetro waka kiese sambu na mambu yonso ya mbote yina Yehowa salaka sambu na Izraele mutindu yandi gulusaka bo na Ezipte.* 10 Ebuna Yetro tubaka nde: “Yehowa kubaka lukumu, yandi muntu yina gulusaka beno na Ezipte mpi na maboko ya Farao, mpi yina gulusaka bantu na nsi ya kiyeka ya Ezipte. 11 Ntangu yai mono me zaba nde Yehowa kele nene kuluta banzambi yonso ya nkaka,+ sambu na mambu yina yandi salaka na bantu yina sadilaka bantu na yandi mambu na lulendo yonso.” 12 Na nima Yetro, bokilo ya Moize, nataka dikabu ya kuyoka mpi bimenga sambu na Nzambi, ebuna Aroni ti bankuluntu yonso ya Izraele kwisaka kudia ti bokilo ya Moize na ntwala ya Nzambi ya kieleka.

13 Kilumbu yina landaka, Moize vandaka sambu na kusambisa bantu mutindu vandaka kikalulu na yandi, ebuna bantu vandaka kaka kukwisa na ntwala ya Moize yantika na suka tii na nkokila. 14 Ntangu bokilo ya Moize monaka mambu yonso yina yandi vandaka kusala sambu na bantu, yandi tubaka nde: “Inki diambu yai nge ke sala sambu na bantu? Sambu na nki nge me vanda awa nge mosi mpi bantu yonso me telama na ntwala na nge yantika na suka tii na nkokila?” 15 Moize tubilaka bokilo na yandi nde: “Sambu bantu ke landaka kukwisa na mono sambu na kuyula mambu na Nzambi. 16 Kana diambu mosi kubasika, yo ke kwisaka na mono mpi mono fwete zenga diambu yina na kati ya muntu mosi ti muntu ya nkaka, ebuna mono ke zabisaka balukanu ya Nzambi ya kieleka mpi bansiku na yandi.”+

17 Bokilo ya Moize tubilaka yandi nde: “Mambu ya nge ke sala kele mbote ve. 18 Nge ta lemba kibeni, nge ti bantu yai ya kele ti nge, sambu yo kele kizitu mingi kibeni sambu na nge mpi nge lenda nata yo ve nge mosi. 19 Ntangu yai, wa mono. Mono ke pesa nge ndongisila, mpi Nzambi ta vanda ti nge.+ Nge, vanda mumonisi ya bantu na ntwala ya Nzambi ya kieleka,+ mpi nge fwete nata mambu na Nzambi ya kieleka.+ 20 Nge fwete longa bo bantuma ti bansiku+ mpi kuzabisa bo mutindu bo fwete tambula mpi kisalu yina bo fwete sala. 21 Kansi nge fwete sola na kati ya bantu babakala yina me fwana,+ yina ke waka Nzambi boma, babakala yina me fwana na kutudila ntima mpi yina ke mengaka kubaka luta na banzila ya luvunu,+ mpi tula bantu yai na zulu na bo sambu bo vanda bamfumu ya mafunda, bamfumu ya bankama, bamfumu ya makumi tanu, mpi bamfumu ya makumi.+ 22 Bo fwete sambisa bantu kana mambu kubasika,* ebuna bo ta kwisa kunatila nge konso diambu ya mpasi,+ kansi bo ta zenga konso diambu ya fioti. Bika nde bo kabula kilo ti nge sambu mambu kukuma pete sambu na nge.+ 23 Kana nge sala mutindu yai, mpi yo kele na kuwakana ti nsiku ya Nzambi, nge ta vanda kaka ngolo mpi konso muntu ta kwenda na nzo na yandi na kiese.”

24 Na mbala mosi Moize wilaka bokilo na yandi mpi salaka mambu yonso yina yandi tubaka. 25 Moize solaka babakala yina me fwana na kati ya Izraele ya mvimba mpi yandi tulaka bo bamfumu na zulu ya bantu, sambu bo vanda bamfumu ya mafunda, bamfumu ya bankama, bamfumu ya makumi tanu, mpi bamfumu ya makumi. 26 Ebuna bo vandaka kusambisa bantu ntangu mambu vandaka kubasika. Bo vandaka kunata diambu ya mpasi na Moize,+ kansi bo vandaka kusambisa konso diambu ya fioti. 27 Na nima, Moize kwendaka kufidisa bokilo na yandi,+ ebuna yandi kwendaka na insi na yandi.

19 Na ngonda ya tatu na nima ya ntangu yina bantu ya Izraele basikaka na insi ya Ezipte, na kilumbu yina kibeni, bo kwisaka kukuma na ntoto-makanga ya Sinai. 2 Bo katukaka na Refidimi,+ kumaka na ntoto-makanga ya Sinai, mpi bo salaka camp na ntoto-makanga. Izraele salaka camp pana na ntwala ya ngumba.+

3 Ebuna Moize tombukaka na Nzambi ya kieleka, mpi Yehowa bingaka yandi tuka na ngumba,+ mpi tubaka nde: “Nge ta tubila nzo ya Yakobi mpi ta songa bantu ya Izraele nde, 4 ‘Beno me mona beno mosi mambu yina mono salaka bantu ya Ezipte,+ sambu na kubaka beno na mapapu ya bango-zulu mpi kunata beno tii na mono.+ 5 Ebuna kana beno lemfukila kibeni ndinga na mono mpi beno zitisa kuwakana na mono, beno ta kuma kibeni kima na mono ya mfunu mingi* na kati ya bantu yonso,+ sambu ntoto ya mvimba kele ya mono.+ 6 Beno ta kuma sambu na mono kimfumu ya banganga-nzambi mpi dikanda ya santu.’+ Yai mambu yina nge ta tubila bantu ya Izraele.”

7 Yo yina Moize kwendaka mpi bingaka bankuluntu ya bantu mpi zabisaka bo mambu yai yonso yina Yehowa songaka yandi.+ 8 Na nima, bantu yonso vutulaka na ndinga mosi nde: “Beto me ndima kusala mambu yonso yina Yehowa me tuba.”+ Na mbala mosi Moize nataka mvutu ya bantu na Yehowa. 9 Mpi Yehowa tubilaka Moize nde: “Tala! Mono ke kwisa na nge na dituti ya ndombe, sambu bantu kuwa ntangu mono ta solula ti nge, sambu bo kwikila mpi na nge ntangu yonso.” Na nima Moize zabisaka Yehowa mambu yina bantu tubaka.

10 Ebuna Yehowa tubilaka Moize nde: “Kwenda na bantu, santisa bo bubu yai ti mbasi, mpi bo fwete yobisa bilele na bo. 11 Bo fwete vanda ya kuyilama sambu na kilumbu ya tatu, sambu na kilumbu ya tatu Yehowa ta kwisa kukulumuka na Ngumba ya Sinai na meso ya bantu yonso. 12 Nge fwete tudila bantu bandilu na nziunga na yo mpi kusonga bo nde, ‘Beno keba, beno tombuka ve na ngumba mpi beno simba ve ndilu na yo. Konso muntu yina ta simba ngumba bo ta fwa yandi kibeni. 13 Ata diboko mosi ve ta simba yandi, kansi bo ta losila yandi matadi to ta tobula yandi.* Yo vanda mbisi to muntu, yandi ta zinga ve.’+ Kansi kana bo wa makelele ya kibongo ya dimeme ya bakala,+ bo lenda tombuka na ngumba.”

14 Ebuna Moize katukaka na ngumba mpi kulumukaka kisika bantu vandaka, mpi yandi yantikaka kusantisa bantu, mpi bo yobisaka bilele na bo.+ 15 Yandi tubilaka bantu nde: “Beno vanda ya kuyilama sambu na kilumbu ya tatu. Beno vukisa ve nitu ti bankento.”*

16 Na suka ya kilumbu ya tatu, makelele ya mvula mpi nsemo ya nzasi vandaka, mpi dituti mosi ya nene+ vandaka na zulu ya ngumba ti makelele ya ngolo kibeni ya kibongo, ebuna bantu yonso na camp yantikaka kutekita.+ 17 Ebuna Moize basisaka bantu na nganda ya camp sambu na kukutana ti Nzambi ya kieleka, mpi bo kwendaka kutelama na nsi ya ngumba. 18 Ngumba ya Sinai fulukaka na midinga, sambu Yehowa kulumukaka na zulu na yo na kati ya tiya;+ mpi midinga na yo vandaka kutombuka bonso midinga ya fulu, mpi ngumba ya mvimba vandaka kunikana ngolo.+ 19 Ntangu makelele ya kibongo vandaka kukuma kaka ngolo, Moize tubaka, ebuna ndinga ya Nzambi ya kieleka pesaka yandi mvutu.

20 Yehowa kwisaka kukulumuka na Ngumba ya Sinai, na nsongi ya ngumba. Ebuna Yehowa bingaka Moize na nsongi ya ngumba, mpi Moize tombukaka.+ 21 Ebuna Yehowa tubilaka Moize nde: “Kulumuka mpi kebisa bantu sambu bo meka ve kusabuka bandilu sambu na kukwisa kutala Yehowa, kana ve bantu mingi na kati na bo ta fwa. 22 Bika nde banganga-nzambi yina ke pusanaka mbala na mbala pene-pene ya Yehowa kudisantisa, sambu Yehowa kufwa bo ve.”+ 23 Ebuna Moize tubaka na Yehowa nde: “Bantu lenda tombuka ve na Ngumba ya Sinai sambu nge kebisaka beto tuka ntama nde, ‘Tula bandilu na nziunga ya ngumba mpi santisa yo.’”+ 24 Kansi, Yehowa tubilaka yandi nde: “Kwenda, kulumuka, mpi kwisa kutombuka diaka, nge ti Aroni, kansi kubika ve nde banganga-nzambi mpi bantu kusabuka bandilu sambu na kutombuka na Yehowa, na mpila nde yandi fwa bo ve.”+ 25 Yo yina, Moize kulumukaka kisika bantu vandaka mpi songaka bo mambu yina.

20 Ebuna Nzambi tubaka mambu yai yonso:+

2 “Mono kele Yehowa Nzambi na nge, yina basisaka nge na insi ya Ezipte, na nzo ya kimpika.+ 3 Nge fwete vanda ve ti banzambi ya nkaka katula mono.*+

4 “Nge fwete kudisadila ve kiteki to kima mosi* ya me fwanana ti konso kima yina kele na zulu to na ntoto to na masa yina kele na nsi ya ntoto.+ 5 Nge fwete fukimina yo ve to kubika nde bo pukumuna nge na kusadila yo,+ sambu mono Yehowa Nzambi na nge, mono kele Nzambi yina ke lombaka nde bo kangama kaka na yandi,+ yina sambu na kifu ya batata ke pesaka ndola na bana, na ndonga ya tatu ya bantu, mpi na ndonga ya iya ya bantu yina ke mengaka mono, 6 kansi yina ke monisaka zola ya kwikama na mafunda ya bandonga ya bantu yina ke zolaka mono mpi ke zitisaka bansiku+ na mono.

7 “Nge fwete sadila ve zina ya Yehowa Nzambi na nge na mutindu ya mbi,+ sambu Yehowa ta pesa ndola na muntu yina ke sadila zina na Yandi na mutindu ya mbi.+

8 “Yibuka kilumbu ya Kisabatu sambu yo landa kuvanda ya santu.+ 9 Nge ta sala kisalu ya ngolo mpi kisalu na nge yonso bilumbu sambanu,+ 10 kansi kilumbu ya nsambwadi kele kisabatu sambu na Yehowa Nzambi na nge. Nge fwete sala ve ata kisalu mosi, yo vanda nge, mwana na nge ya bakala, mwana na nge ya nkento, mpika na nge ya bakala, mpika na nge ya nkento, mbisi na nge ya bwala to munzenza yina kele na babwala* na nge.+ 11 Sambu Yehowa salaka zulu ti ntoto, nzadi-mungwa mpi bima yonso yina kele na kati na yo na bilumbu sambanu, mpi yandi yantikaka kupema na kilumbu ya nsambwadi.+ Yo yina Yehowa sakumunaka kilumbu ya Kisabatu mpi santisaka yo.

12 “Kumisa tata na nge ti mama na nge,+ sambu nge zinga mingi na insi yina Yehowa Nzambi na nge ke pesa nge.+

13 “Nge fwete fwa ve muntu.+

14 “Nge fwete sala ve bizumba.+

15 “Nge fwete yiba ve.+

16 “Nge fwete tuba ve mambu ya luvunu ntangu nge ke ta kimbangi sambu na nkweno na nge.+

17 “Nge fwete yuma ve ntima sambu na nzo ya nkweno na nge. Nge fwete yuma ve ntima sambu na nkento ya nkweno na nge,+ mpika na yandi ya bakala, mpika na yandi ya nkento, ngombe na yandi, mpunda na yandi, to sambu na konso kima ya nkweno na nge.”+

18 Bantu yonso vandaka kuwa makelele ya nzasi mpi makelele ya kibongo, mpi vandaka kumona nsemo ya nzasi mpi ngumba yina vandaka kubasisa midinga; ebuna mutindu bo monaka mpi waka mambu yai, yo salaka nde bo tekita mpi bo telama ntama.+ 19 Yo yina bo tubilaka Moize nde: “Nge, tubila beto, ebuna beto ta wa, kansi kubika ve nde Nzambi kutubila beto, kana ve beto ta fwa.”+ 20 Ebuna Moize tubilaka bantu nde: “Beno wa boma ve, sambu Nzambi ya kieleka me kwisa kumeka+ beno, na mpila nde beno landa kuwa yandi boma sambu beno sala ve disumu.”+ 21 Yo yina bantu telamaka kaka ntama, kansi Moize kwendaka pene-pene ya dituti ya ndombe kisika Nzambi ya kieleka vandaka.+

22 Ebuna Yehowa tubilaka Moize nde: “Nge ta tubila bantu ya Izraele nde, ‘Beno me mona beno mosi nde mono tubilaka beno tuka na zulu.+ 23 Beno fwete sala ve banzambi ya arza na lweka na mono, mpi beno fwete sala ve banzambi ya wolo sambu na beno mosi.+ 24 Nge ta sadila mono mesa-kimenga ya ntoto, mpi nge ta tambika na zulu na yo makabu na nge ya kuyoka, bimenga na nge ya kinduku,* mameme na nge, mpi bangombe na nge. Na konso kisika yina mono ta sala nde bantu kuyibuka zina na mono,+ mono ta kwisa na nge mpi mono ta sakumuna nge. 25 Kana nge sadila mono mesa-kimenga ya matadi, nge fwete tunga yo ve ti matadi ya bo me zenga.*+ Sambu kana nge sadila kibende na nge ya kupasudila matadi na zulu na yo, nge ta vweza yo. 26 Mpi nge fwete mata ve na mesa-kimenga na mono na bimatilu, sambu kinkonga na nge* kumonana ve na zulu na yo.’

21 “Yai kele bankanu yina nge ta songa bo:+

2 “Kana nge sumba mpika+ mosi ya Mu-Ebreo, yandi ta vanda mpika bamvula sambanu, kansi na mvula ya nsambwadi, yandi ta katuka na kimpika kukonda kufuta ata kima.+ 3 Kana yandi kwisaka yandi mosi, yandi ta basika mpi yandi mosi. Kana yandi kele ti nkento, nkento na yandi fwete basika ti yandi. 4 Kana mfumu na yandi me pesa yandi nkento ebuna nkento yina me butila yandi bana ya babakala to ya bankento, nkento ti bana na yandi ta kuma ya mfumu na yandi, ebuna yandi ta basika yandi mosi.+ 5 Kansi kana mpika yina kudindamana mpi kutuba nde, ‘Mono ke zolaka mfumu na mono, nkento na mono, mpi bana na mono; mono ke zola ve kukatuka na kimpika,’+ 6 mfumu na yandi fwete nata yandi na ntwala ya Nzambi ya kieleka. Ebuna yandi ta nata yandi na kielo to na dikunzi ya kielo, mpi mfumu na yandi ta tobula yandi dikutu ti muntunga, ebuna yandi ta vanda mpika na yandi sambu na luzingu ya mvimba.

7 “Kana muntu kuteka mwana na yandi ya nkento na kimpika, mwana yina ta katuka ve na kimpika mutindu mpika ya bakala ke katukaka. 8 Kana mfumu na yandi me sepela ve ti yandi mpi me pona yandi ve na kuvanda makangu na yandi, kansi yandi me sala nde muntu ya nkaka kusumba* yandi, mfumu yina ta vanda ve na nswa ya kuteka yandi na banzenza, sambu yandi me kusa yandi. 9 Kana yandi me pona yandi sambu na mwana na yandi ya bakala, yandi fwete pesa yandi banswa ya mwana-nkento. 10 Kana yandi baka nkento ya nkaka sambu na yandi mosi, yandi fwete fiotuna ve madia ya nkento ya ntete, bilele na yandi, mpi banzala*+ na yandi na makwela. 11 Kana bakala yina kupesa yandi ve bima yai tatu, yandi ta kwenda ya ofele, kukonda kufuta mbongo.

12 “Konso muntu yina ke bula muntu ya nkaka ebuna muntu yina kufwa, bo fwete fwa+ yandi. 13 Kansi kana yandi salaka yo kukonda kukana ebuna Nzambi ya kieleka kubika nde yo salama, mono ta songa nge kisika yina yandi lenda tina.+ 14 Kana muntu mosi kuwila nkweno na yandi makasi ya ngolo ebuna yandi fwa yandi na luzolo,+ muntu yina fwete fwa ata yo ke lomba nde nge baka yandi na mesa-kimenga na mono.+ 15 Muntu yina ke bula tata na yandi to mama na yandi, bo fwete fwa+ yandi.

16 “Kana muntu mosi kukanga muntu ya nkaka na ngolo+ mpi kuteka yandi to bo kanga yandi ti muntu yina na maboko na yandi,+ bo fwete fwa+ yandi.

17 “Konso muntu yina ke singa* tata na yandi to mama na yandi, bo fwete fwa+ yandi.

18 “Yai mambu yina ta salama kana babakala ke swana ebuna bakala mosi kubula nkweno na yandi ditadi to dikofi* ebuna yandi fwa ve, kansi yandi bikala na mbeto na yandi: 19 Kana yandi lenda telama mpi kutambula na nganda na nsadisa ya nti na yandi, muntu yina bulaka yandi fwete baka ve ndola. Yandi ta futa kaka sambu na ntangu yina muntu yina ya kele ti mpasi me vidisa na kisalu na yandi tii kuna yandi ta beluka kibeni.

20 “Kana muntu mosi kubula mpika na yandi ya bakala to mpika na yandi ya nkento ti nti ebuna mpika yina kufwa na maboko na yandi, bo fwete vutula mbi+ sambu na yandi. 21 Kansi, kana yandi zinga kilumbu mosi to bilumbu zole, bo ta vutula ve mbi sambu na yandi, sambu yandi kele muntu yina bo sumbaka na mbongo ya mfumu na yandi.

22 “Kana babakala ke nwana ebuna bo tutana ti nkento ya kele ti divumu mpi yandi buta matsiombe,*+ kansi kisumbula ya ke nata lufwa* kusalama ve, muntu yina me sala mbi fwete futa kibawu yina bakala ya nkento yina ta lomba; mpi yandi fwete futa yo na nzila ya bazuzi.+ 23 Kansi kana kisumbula ya ke nata lufwa kusalama, nge fwete pesa luzingu sambu na luzingu,*+ 24 disu sambu na disu, dinu sambu na dinu, diboko sambu na diboko, dikulu sambu na dikulu,+ 25 kuyoka tiya sambu na kuyoka tiya, mputa sambu na mputa, dikofi sambu na dikofi.

26 “Kana muntu mosi kubula mpika na yandi ya bakala to ya nkento na disu ebuna yandi tobula yo, yandi fwete katula mpika yina na kimpika sambu na kufuta disu na yandi.+ 27 Mpi kana yandi katula mpika na yandi ya bakala to ya nkento dinu, yandi fwete katula mpika yina na kimpika sambu na kufuta dinu na yandi.

28 “Kana ngombe kulwadisa bakala mosi to nkento mosi ti bibongo na yo ebuna muntu yina kufwa, bo fwete fwa+ ngombe yina na matadi mpi bo fwete dia ve misuni na yo; kansi bo ta pesa ve munkwa-ngombe yina ndola. 29 Kansi kana ngombe vandaka ti kikalulu ya kulwadisa bantu ti bibongo na yo mpi bo kebisaka munkwa na yo, kansi yandi vandaka kukanga yo ve, ebuna yo fwa bakala mosi to nkento mosi, bo ta fwa ngombe yina na matadi ebuna bo fwete fwa mpi munkwa na yo. 30 Kana bo lomba yandi nkudulu,* yandi fwete futa yonso yina bo ta lomba yandi sambu na kusumba diaka luzingu* na yandi. 31 Yo vanda ngombe yina lwadisaka mwana ya bakala to mwana ya nkento ti bibongo na yo, bo fwete sala munkwa-ngombe mambu na kuwakana ti nkanu yai. 32 Kana ngombe yina lwadisaka mpika ya bakala to mpika ya nkento ti bibongo na yo, munkwa-ngombe ta pesa bashekele* 30 na mfumu ya mpika yina, mpi bo ta fwa ngombe yina na matadi.

33 “Kana muntu kukangula to kutimuna dibulu mosi kansi yandi fika yo ve, ebuna ngombe to mpunda kubwa na kati na yo, 34 munkwa-dibulu yina fwete futa.+ Yandi fwete futa mbongo na munkwa-mbisi yina, ebuna mbisi yina ya kufwa ta kuma ya yandi. 35 Kana ngombe ya muntu mosi kubula ngombe ya muntu ya nkaka ebuna yo fwa, bo fwete teka ngombe yina ya moyo mpi kukabula mbongo yina bo me futa sambu na yo; bo fwete kabula mpi mbisi yina ya kufwa. 36 To kana yo zabanaka nde ngombe yina vandaka ti kikalulu ya kulwadisa bantu ti bibongo na yo kansi munkwa na yo vandaka kukanga yo ve, yandi fwete futa ngombe sambu na ngombe, mpi ngombe ya kufwa ta kuma ya yandi.

22 “Kana muntu mosi me yiba ngombe to dimeme ebuna yandi me fwa yo to me teka yo, yandi fwete futa bangombe tanu sambu na ngombe yina mpi mameme iya sambu na dimeme yina.+

2 (“Kana bo kanga muyibi+ ke buka nzo sambu na kuyiba ebuna bo bula yandi mpi yandi fwa, muntu yina me fwa yandi kele ve na mfuka ya menga. 3 Kansi kana yo salama na nima ya kubasika ya ntangu, muntu yina me fwa yandi kele na mfuka ya menga.)

“Yandi fwete futa. Kana yandi kele na kima ve, bo fwete teka yandi sambu na bima yina yandi yibaka. 4 Kana bo kuta bima yina yandi yibaka ya moyo na maboko na yandi, yo vanda ngombe, mpunda, to dimeme, yandi fwete futa yo mbala zole.

5 “Kana muntu kubasisa bambisi na yandi sambu yo dia matiti na kilanga to na kilanga ya vinu, ebuna yandi bikisa yo yo dia na kilanga ya muntu ya nkaka, yandi fwete futa yo ti bambuma ya kuluta mbote ya bilanga na yandi to ti bambuma ya kuluta mbote ya kilanga na yandi ya vinu.

6 “Kana tiya kupela ebuna yo panzana na tu-banti ya bansende mpi yo yoka bita ya matiti, bambuma yina bo me katula ntete ve, to kilanga, muntu yina tulaka tiya yina fwete futa bima yina me pia tiya.

7 “Kana muntu me pesa nkweno na yandi mbongo to bima sambu yandi bumbila yandi ebuna bo yiba bima yina na nzo ya nkweno na yandi, kana bo me kanga muyibi yina, yandi fwete futa yo mbala zole.+ 8 Kana bo me kanga muyibi yina ve, bo fwete nata munkwa-nzo na ntwala ya Nzambi ya kieleka+ sambu na kuzaba kana yandi tulaka diboko na yandi na bima ya nkweno na yandi to ve. 9 Kana bantu zole ke swana sambu na ngombe, mpunda, dimeme, lele, to konso kima yina vilaka, sambu muntu mosi na kati na bo ke tuba nde, ‘Yo kele ya mono!’ bo ta nata mambu na bo na ntwala ya Nzambi ya kieleka.+ Muntu yina Nzambi ta tuba nde yandi me sala mbi fwete futa muntu yina ya nkaka mbala zole.+

10 “Kana muntu kupesa nkweno na yandi mpunda, ngombe, dimeme, to konso mbisi ya bwala sambu na kubumba, ebuna yo fwa, yo lwala, to bo nata yo ntama kansi ata muntu mosi ve ke mona, 11 muntu yina fwete dia ndefi na ntwala ya Yehowa nde yandi tulaka ve diboko na bima ya nkweno na yandi; mpi munkwa-bima fwete ndima yo. Muntu yina ya nkaka ta futa+ ve. 12 Kansi kana bo yibaka mbisi yina na maboko na yandi, yandi fwete futa yo na munkwa na yo. 13 Kana mbisi ya mfinda pasulaka yo, yandi fwete nata yo bonso nzikisa. Yandi fwete futa ve sambu na kima yina mbisi ya mfinda me pasula.

14 “Kansi kana muntu mosi kudefa mbisi ya nkweno na yandi, ebuna yo lwala to yo fwa ntangu munkwa na yo kele ve pana ti yo, muntu yina defaka yo fwete futa. 15 Kana munkwa na yo kele pana ti yo, yandi fwete futa ve. Kana bo futaka sambu na yo, mbongo yina bo futaka sambu na kubaka yo, me lunga.

16 “Ntangu yai, kana bakala mosi kupukumuna mwense yina bo me sila ve na makwela ebuna yandi lala ti yandi, yandi fwete futa mbongo ya makwela sambu yandi kuma nkento na yandi.+ 17 Kana tata ya mwense yina kubuya kibeni na kupesa yandi na bakala yina, bakala yina fwete futa mbongo na ntalu ya mbongo ya makwela.

18 “Nge fwete bika ve+ ndoki ya nkento na luzingu.

19 “Konso muntu yina ke vukisa nitu ti mbisi bo fwete fwa+ yandi kibeni.

20 “Konso muntu yina ke pesa bimenga na banzambi ya nkaka, na kisika ya kupesa yo kaka na Yehowa, bo fwete fwa+ yandi.

21 “Nge fwete monisa ve munzenza mpasi to kuniokula yandi,+ sambu beno vandaka banzenza na insi ya Ezipte.+

22 “Beno fwete monisa ve nkento yina kele mufwidi to mwana ya me konda tata mpasi.*+ 23 Kana nge monisa yandi mpasi ata ya fioti, ebuna yandi didila mono, mono ta wa kibeni bidilu na yandi;+ 24 mono ta wa makasi, mpi mono ta fwa beno na mbele ya bitumba, ebuna bankento na beno ta kuma mifwidi, mpi bana na beno ta konda batata.

25 “Kana nge defisa mbongo na muntu ya kele nsukami* na kati ya bantu na mono, muntu yina ke zinga ti nge, nge fwete kuma ve na meso na yandi bonso muntu yina ke defisaka mbongo.* Beno fwete lomba yandi luta ve.+

26 “Kana nge kanga lele ya nkweno na nge bonso kidimbu sambu na mfuka,*+ nge fwete vutudila yandi yo na kudinda ya ntangu. 27 Sambu yo kele kima na yandi mosi kaka ya kudifika, lele na yandi sambu na kufika nitu* na yandi; yandi ta lala na zulu ya inki?+ Ntangu yandi ta didila mono, mono ta wa kibeni, sambu mono ke fwilaka bantu nkenda.*+

28 “Nge fwete singa* ve Nzambi,+ nge fwete singa mpi ve mfumu* na kati ya bantu na nge.+

29 “Nge fwete vanda ve ti keti-keti na kupesa makabu ya me katuka na bima na nge ya mingi ya bilanga mpi na bima ya me lutana na bikamuninu*+ na nge. Nge fwete pesa mono+ mwana na nge ya ntete ya bakala na kati ya bana na nge ya babakala. 30 Yai kele mambu ya nge fwete sala sambu na ngombe na nge mpi dimeme na nge:+ Yo ta vanda bilumbu nsambwadi ti mama na yo. Na kilumbu ya nana nge ta pesa mono+ yo.

31 “Beno fwete kudimonisa bantu ya santu na ntwala na mono,+ mpi beno fwete dia ve musuni ya konso kima yina mbisi ya mfinda+ me pasula na nseke. Beno fwete losila yo bambwa.

23 “Nge fwete panza* ve nsangu yina kele ve ya kieleka.+ Kukuma ve mbangi ya luvunu kaka sambu na kusadisa muntu ya mbi.+ 2 Nge fwete landa ve kimvuka ya bantu sambu na kusala mbi, nge fwete sambisa ve mambu na mutindu ya mbi mpi nge fwete ta ve kimbangi sambu yo wakana ti kimvuka ya bantu.* 3 Nge fwete monisa kikalulu ya kukonda kupona-pona na diambu ya nsukami.+

4 “Kana nge kutana ti ngombe ya mbeni na nge to mpunda na yandi yina me vila, nge fwete vutudila yandi yo.+ 5 Kana nge mona nde mpunda ya muntu yina ke mengaka nge me bwa na nsi ya kizitu na yo, nge fwete sala ve bonso nde nge me mona yo ve mpi kuluta. Nge fwete sadisa yandi na kukatula mbisi yina.+

6 “Nge fwete sambisa ve diambu ya nsukami yina kele na kati na beno na mutindu ya mbi.+

7 “Kudikotisa ve na diambu* ya luvunu ya bo me fundila muntu, mpi kufwa ve muntu yina me sala ve mbi mpi muntu ya lunungu, sambu mono ta tuba ve nde muntu ya mbi kele muntu ya lunungu.*+

8 “Nge fwete ndima ve avoka, sambu kundima avoka ke fwaka meso ya bantu yina ke monaka mbote mpi yo lenda bebisa bangogo ya bantu ya lunungu.+

9 “Nge fwete niokula ve munzenza. Beno me zaba mutindu munzenza ke kudiwaka,* sambu beno vandaka banzenza na insi ya Ezipte.+

10 “Nge fwete kuna nkeni na kilanga na nge mpi kukatula bima na yo yina yo ke basisa bamvula sambanu.+ 11 Kansi na mvula ya nsambwadi, nge fwete kuna kima ve mpi kupemisa yo, ebuna bansukami yina kele na kati ya bantu na nge ta dia bima na yo, mpi bima yina bo ta bikisa, bambisi ya mfinda ta dia yo. Yai kele mambu ya nge fwete sala sambu na kilanga na nge ya vinu mpi kilanga na nge ya ba olive.

12 “Nge fwete sala kisalu na nge bilumbu sambanu; kansi na kilumbu ya nsambwadi, nge fwete yambula kisalu na nge ya ngolo, sambu ngombe ti mpunda na nge kupema mpi mwana-bakala ya mpika na nge ya nkento mpi munzenza kubaka diaka ngolo.+

13 “Beno fwete sala ngolo na kusala mambu yonso yina mono me tubila beno,+ mpi beno fwete tanga ve bazina ya banzambi ya nkaka; bo fwete wa yo ve na munoko*+ na nge.

14 “Nge fwete sala nkinsi sambu na mono mbala tatu na mvula.+ 15 Nge ta sala Nkinsi ya Mampa ya Kukonda Levire.+ Nge ta dia mampa ya kukonda levire bilumbu nsambwadi, kaka mutindu mono songaka nge, na ntangu na yo na ngonda ya Abibi,*+ sambu nge basikaka na Ezipte na ntangu yina. Ata muntu mosi ve fwete kwisa na ntwala na mono maboko-mpamba.+ 16 Diaka, nge fwete sala Nkinsi ya Nsungi ya Kukatula Bima na Bilanga* ya bambuma ya ntete ya kuyela ya bisalu na nge ya ngolo, ya bima yina nge kunaka na bilanga.+ Nge fwete sala mpi Nkinsi ya Kuvukisa Bambuma* na nsuka ya mvula, ntangu nge ke katula bambuma ya bisalu na nge ya ngolo+ na bilanga mpi ke vukisa yo. 17 Bantu* na nge yonso fwete kwisa na ntwala ya Mfumu ya kieleka, Yehowa,+ mbala tatu na mvula.

18 “Nge fwete pesa ve menga ya kimenga na mono ti konso kima yina bo me tula levire. Bimenga ya mafuta yina bo ke pesa na bankinsi na mono fwete lala ve mpimpa ya mvimba tii na suka.

19 “Nge fwete nata bambuma ya ntete ya kuyela ya kuluta kitoko ya ntoto na nge na nzo ya Yehowa Nzambi na nge.+

“Nge fwete tokisa ve mwana-nkombo na mabele ya mama na yo.+

20 “Mono ke tinda wanzio mosi na ntwala na nge+ sambu na kutanina nge na nzila mpi kunata nge na kisika yina mono me yidika.+ 21 Keba na yandi, mpi lemfuka na ndinga na yandi. Kukolama ve na yandi, sambu yandi ta lolula ve mambi na beno,+ sambu yandi ke nata zina na mono. 22 Kansi, kana nge lemfuka kibeni na ndinga na yandi mpi nge sala mambu yonso yina mono ke tuba, mono ta menga bambeni na nge mpi ta nwanisa bantu yina ke nwanisa nge. 23 Sambu wanzio na mono ta kwenda na ntwala na nge mpi ta nata nge na bantu ya Amore, na bantu ya Heti, na bantu ya Perizi, na bantu ya Kanana, na bantu ya Hivi, mpi na bantu ya Yebusi, ebuna mono ta manisa bo.+ 24 Nge fwete fukimina ve banzambi na bo to kubika nde bo pusa nge na kusadila yo, mpi nge fwete sala ve bisalu na bo.+ Kansi, nge fwete fwa yo mpi kupanza-panza makunzi na bo ya santu.+ 25 Beno fwete sadila Yehowa Nzambi na beno,+ ebuna yandi ta sakumuna dimpa na nge mpi masa na nge.+ Mono ta katula maladi na kati na beno.+ 26 Bankento yina kele na insi na nge, mavumu na bo ta basika ve mpi bo ta vanda ve mikobo,+ mpi mono ta kumisa luzingu na nge nda.*

27 “Na ntwala nde nge kuma, bo ta wa nsangu na mono mpi ta wa boma,+ mpi mono ta kumisa bantu yonso yina nge ta kutana ti bo kisaka-saka, ebuna mono ta sala nde bambeni na nge yonso kutina na ntwala na nge sambu nge ta bedisa bo.*+ 28 Mono ta tinda mawi ya ke lembisa nitu na ntwala nde nge kuma,+ ebuna yo ta kula bantu ya Hivi, bantu ya Kanana, mpi bantu ya Heti na ntwala na nge.+ 29 Mono ta kula bo ve na ntwala na nge na mvula mosi, sambu insi kubikala ve ya mpamba mpi bambisi ya mfinda kukuma ve mingi mpi kusala nge mbi.+ 30 Mono ta kula bo na ntwala na nge malembe-malembe, tii kuna nge ta buta mingi mpi ta baka insi yina.+

31 “Mono ta tula ndilu ya insi na nge katuka na Nzadi-Mungwa ya Mbwaki tii na nzadi-mungwa ya bantu ya Filistia mpi katuka na ntoto-makanga tii na Nzadi;*+ sambu mono ta pesa bantu ya insi yina na maboko na beno, ebuna nge ta kula bo na ntwala na nge.+ 32 Nge fwete sala ve kuwakana ti bo to ti banzambi na bo.+ 33 Bo fwete zinga ve na insi na nge, sambu bo pusa nge ve na kusala disumu na ntwala na mono. Kana nge sadila banzambi na bo, yo ta kuma kibeni mutambu sambu na nge.”+

24 Ebuna yandi tubilaka Moize nde: “Tombuka na Yehowa, nge ti Aroni, Nadabi ti Abihu,+ mpi bankuluntu 70 na kati ya bankuluntu ya Izraele, mpi beno fukama mwa ntama. 2 Moize fwete pusana pene-pene ya Yehowa yandi mosi; kansi bantu yina ya nkaka fwete pusana ve pene-pene, mpi bantu fwete tombuka ve ti yandi.”+

3 Ebuna Moize kwisaka mpi songaka bantu mambu yonso yina Yehowa tubaka mpi bankanu yonso,+ ebuna bantu yonso vutulaka na ndinga mosi nde: “Mambu yonso yina Yehowa me tuba, beto me ndima na kusala yo.”+ 4 Yo yina Moize sonikaka mambu yonso yina Yehowa tubaka.+ Ebuna yandi telamaka na suka-suka mpi yandi tungaka mesa-kimenga na nsi ya ngumba mpi makunzi 12 na ntalu ya makanda 12 ya Izraele. 5 Na nima yandi tindaka baleke ya babakala ya Izraele ebuna bo pesaka makabu ya kuyoka mpi tambikaka bangombe ya babakala bonso bimenga+ ya kinduku na Yehowa. 6 Ebuna Moize bakaka ndambu ya menga mpi tulaka yo na babolo, mpi yandi mwangaka ndambu ya nkaka ya menga na zulu ya mesa-kimenga. 7 Ebuna yandi bakaka mukanda ya kuwakana mpi tangilaka yo bantu na ndinga ya ngolo.+ Mpi bo tubaka nde: “Mambu yonso yina Yehowa me tuba, beto me ndima na kusala yo mpi beto ta lemfukila yo.”+ 8 Ebuna Moize bakaka menga mpi mwangilaka yo bantu+ mpi tubaka nde: “Yai menga ya kuwakana yina Yehowa me sala ti beno na kuwakana ti mambu yai yonso.”+

9 Moize ti Aroni, Nadabi ti Abihu, mpi bankuluntu 70 na kati ya bankuluntu ya Izraele tombukaka, 10 mpi bo monaka Nzambi ya Izraele.+ Na nsi ya makulu na yandi vandaka ti kima mosi yina vandaka kumonika bonso pavema yina bo me sala ti matadi ya safire mpi yo vandaka bunkete bonso zulu yo mosi.+ 11 Yandi salaka ve mbi na babakala ya lukumu ya Izraele,+ mpi bo monaka mbona-meso ya Nzambi ya kieleka ebuna bo diaka mpi nwaka.

12 Ntangu yai Yehowa tubilaka Moize nde: “Kwisa kutombuka na mono na ngumba mpi bikala pana. Mono ta pesa nge matadi yina kele ti bansiku mpi bantuma yina mono ta sonika sambu na kulonga bo.”+ 13 Ebuna Moize ti nsadi na yandi Yozue+ telamaka, mpi Moize tombukaka na ngumba ya Nzambi ya kieleka.+ 14 Kansi yandi tubilaka bankuluntu nde: “Beno vingila beto awa tii kuna beto ta kwisa kuvutuka.+ Aroni ti Hure+ kele ti beno. Konso muntu yina kele ti diambu lenda kwenda na bo.”+ 15 Ebuna Moize tombukaka na ngumba ntangu dituti vandaka kufika yo.+

16 Nkembo ya Yehowa+ landaka kuvanda na zulu ya Ngumba ya Sinai,+ mpi dituti fikaka yo bilumbu sambanu. Na kilumbu ya nsambwadi yandi bingaka Moize tuka na kati-kati ya dituti. 17 Sambu na bantu ya Izraele yina vandaka kutala, nkembo ya Yehowa vandaka kumonana na nsongi ya ngumba bonso tiya ya ke yokaka. 18 Ebuna Moize kotaka na kati ya dituti mpi tombukaka na ngumba.+ Mpi Moize bikalaka na ngumba bilumbu 40 mpi bampimpa 40.+

25 Ebuna Yehowa tubilaka Moize nde: 2 “Songa bantu ya Izraele na kubaka makabu sambu na mono; beno ta baka makabu na mono+ na konso muntu yina ntima na yandi ke pusa yandi. 3 Yai kele makabu yina beno fwete baka na bo: wolo,+ arza,+ kwivre,+ 4 nsinga ya ble, lene ya mbwaki-ble,* lele ya mbwaki mingi,* lino ya kitoko, mika ya nkombo, 5 bampusu ya mameme ya babakala ya bo me pakula mukubu ya mbwaki, bampusu ya mbisi ya bo ke bingaka foke, mabaya ya akasia,+ 6 mafuta sambu na minda,+ balsami sambu na mafuta ya bo ke tulaka muntu+ mpi sambu na ndumbu ya nsudi ya kitoko,+ 7 mpi matadi ya oniksi ti matadi ya nkaka ya kutula na efodi+ mpi na lele ya ntulu.+ 8 Bo fwete sadila mono kisika ya santu, mpi mono ta zinga na kati na bo.+ 9 Beno fwete sala yo, disongidila nzo-tenta ti bima na yo yonso, na kulandaka mbote-mbote mbandu* yina mono ke songa nge.+

10 “Bo ta sala sanduku* na mabaya ya akasia, nda na yo maboko* zole na ndambu, nene na yo diboko mosi na ndambu, nda na yo katuka na ntoto tii na zulu diboko mosi na ndambu.+ 11 Ebuna nge ta pakula yo wolo ya kukonda kuvukisa ti kima ya nkaka.+ Nge fwete pakula yo na kati mpi na nganda, mpi nge ta sala ndilu mosi ya wolo* na nziunga na yo.+ 12 Nge ta sala mitaku iya ya wolo sambu na yo mpi nge ta kangisa yo na zulu ya makulu na yo iya, mitaku zole na ndambu mosi mpi mitaku zole na ndambu ya nkaka. 13 Nge ta sala banti na mabaya ya akasia mpi ta pakula yo wolo.+ 14 Nge ta lutisa banti yina na kati ya mitaku yina kele na balweka ya Sanduku sambu na kunata Sanduku. 15 Banti yina ta bikala na mitaku ya Sanduku; bo fwete katula yo ve.+ 16 Nge ta tula na kati ya Sanduku Kimbangi yina mono ta pesa nge.+

17 “Nge ta sala mufiniku na wolo ya kukonda kuvukisa ti kima ya nkaka, nda na yo maboko zole na ndambu mpi nene na yo diboko mosi na ndambu.+ 18 Nge ta sala basherube zole na wolo; nge ta sadila marto sambu na kusala yo na bansongi yonso zole ya mufiniku.+ 19 Sala basherube na bansongi yonso zole, sherube mosi na konso nsongi ya mufiniku. 20 Basherube ta tandula mapapu na yo zole na zulu, mpidina yo ta fika mufiniku ti mapapu na yo,+ mpi yo ta talana. Baluse ya basherube ta tala mufiniku. 21 Nge ta tula mufiniku+ na zulu ya Sanduku, mpi na kati ya Sanduku nge ta tula Kimbangi yina mono ta pesa nge. 22 Mono ta kudimonisaka na nge kuna mpi mono ta tubilaka nge tuka na zulu ya mufiniku.+ Tuka na kati-kati ya basherube zole yina kele na zulu ya sanduku ya Kimbangi, mono ta zabisa nge bantuma yonso yina mono ta pesa nge sambu na bantu ya Izraele.

23 “Nge ta sala mpi mesa+ na mabaya ya akasia, nda na yo maboko zole, nene na yo diboko mosi, mpi nda na yo katuka na ntoto tii na zulu diboko mosi na ndambu.+ 24 Nge ta pakula yo wolo ya kukonda kuvukisa ti kima ya nkaka mpi nge ta sala ndilu mosi ya wolo* na nziunga na yo. 25 Nge ta sala dibaya mosi na nziunga na yo, yo ta vanda nene ya kipala-pala ya diboko* mpi nge ta sala ndilu mosi ya wolo* sambu yo ziunga dibaya yina. 26 Nge ta sala mitaku iya ya wolo sambu na yo mpi nge ta tula mitaku yina na binkonko iya bisika bo ta kangisa makulu yina iya. 27 Mitaku yina ta vanda pene-pene ya dibaya bonso bima ya ta simba banti yina sambu na kunata mesa. 28 Nge ta sala banti na mabaya ya akasia mpi ta pakula yo wolo mpi ta sadila yo sambu na kunata mesa.

29 “Nge ta sala mpi malonga na yo, makopa na yo, mpi mabungu ti babolo na yo yina bo ta sadila sambu na kutiamuna makabu ya malafu. Nge fwete sala yo na wolo ya kukonda kuvukisa ti kima ya nkaka.+ 30 Mpi nge ta tula mampa ya kumonisa na zulu ya mesa na ntwala na mono konso ntangu.+

31 “Nge ta sala kima ya kutudila minda+ na wolo ya kukonda kuvukisa ti kima ya nkaka. Nge fwete sadila marto sambu na kusala kima yina ya kutudila minda. Nsi na yo, nti na yo, balutangu na yo, makopa na yo, bambuma na yo, mpi bintuntu na yo ta vanda kaka kima mosi.+ 32 Balutangu sambanu ta katuka na balweka ya kima ya kutudila minda, balutangu tatu na lweka mosi mpi balutangu tatu na lweka ya nkaka. 33 Makopa tatu ya bo ta sala bonso bintuntu ya nti ya amande ta vanda na kimvuka mosi ya balutangu yina kele na lweka mosi, ti bambuma mpi bintuntu yina ta landana, mpi nge ta sala mutindu mosi na kimvuka ya balutangu yina kele na lweka ya nkaka. Balutangu sambanu yina ke katuka na nti ya kima ya kutudila minda ta vanda mutindu yina. 34 Nti ya kima ya kutudila minda ta vanda ti makopa iya ya bo me sala bonso bintuntu ya nti ya amande, ti bambuma mpi bintuntu na yo yina ta landana. 35 Dimbuma mosi ta vanda na nsi ya balutangu zole ya ntete yina me katuka na nti yina, dimbuma mosi na nsi ya balutangu zole ya me landa, mpi dimbuma mosi na nsi ya balutangu zole ya nkaka ya me landa, sambu na balutangu sambanu ya ke katuka na nti yina. 36 Bambuma, balutangu mpi kima ya mvimba ya kutudila minda fwete vanda kaka kima mosi ya bo me sala na wolo ya kukonda kuvukisa ti kima ya nkaka, ya bo me bula marto.+ 37 Nge ta sadila yo minda nsambwadi, ebuna ntangu bo ta pedisa minda, yo ta pesa nsemo na kisika yina kele na ntwala na yo.+ 38 Basizo* na yo mpi bima na yo ya kunatila tiya fwete vanda ya wolo ya kukonda kuvukisa ti kima ya nkaka.+ 39 Bo fwete sala yo ti bisadilu yai na talanta* mosi ya wolo ya kukonda kuvukisa ti kima ya nkaka. 40 Ntangu nge ke sala yo, sala yonso na kulanda mbandu* na yo yina bo songaka nge na ngumba.+

26 “Nge ta sala nzo-tenta+ ti bilele kumi ya tenta na lino ya kitoko ya kudimba-dimba, na nsinga ya ble, na lene ya mbwaki-ble, mpi na lele ya mbwaki mingi. Nge ta sala bifwanisu+ ya basherube+ na zulu na yo. 2 Nda ya konso lele ya tenta ta vanda maboko* 28 mpi nene na yo maboko 4. Bilele yonso ya tenta fwete vanda nene mpi nda kiteso mosi.+ 3 Bo ta kangisa bilele tanu ya tenta, lele mosi ti lele ya nkaka, sambu yo kuma ndonga mosi, mpi bo ta kangisa bilele tanu ya nkaka ya tenta na ndonga ya nkaka. 4 Nge ta sala minoko na nsinga ya ble na nsongi ya lele mosi ya tenta yina kele na nsongi ya ndonga mosi, mpi nge ta sala mutindu mosi na nsongi kibeni ya ndonga ya nkaka kisika bo ta kangisa yo. 5 Nge ta sala minoko 50 na lele mosi ya tenta mpi minoko 50 na nsongi ya lele ya nkaka ya tenta sambu yo talana na kisika bo ta kangisa yo. 6 Nge ta sala bikangilu 50 ya wolo mpi ta kangisa bilele ya tenta ti bikangilu yina, ebuna nzo-tenta ta kuma kima mosi.+

7 “Nge ta sala mpi bilele na mika ya nkombo+ sambu na kufika nzo-tenta. Nge ta sala bilele ya tenta 11.+ 8 Nda ya konso lele ya tenta ta vanda maboko 30 mpi nene na yo maboko 4. Bilele yonso 11 ya tenta fwete vanda nene mpi nda kiteso mosi. 9 Nge fwete kangisa bilele tanu ya tenta kumosi mpi kukangisa bilele ya nkaka sambanu ya tenta kumosi, mpi nge fwete konika lele ya sambanu ya tenta na ntwala ya tenta. 10 Nge ta sala minoko 50 na nsongi ya lele mosi ya tenta, lele yina kele na nsongi kibeni ya ndonga, mpi minoko 50 na nsongi ya lele ya tenta na kisika ya nkaka yina bo ta kangisa yo. 11 Nge ta sala bikangilu 50 ya kwivre mpi ta tula bikangilu yina na minoko yina mpi ta kangisa bilele ya tenta kumosi, ebuna yo ta kuma kima mosi. 12 Kitini ya bilele ya tenta yina me bikala ta lela. Kati-kati ya lele ya tenta yina me bikala ta lela na nima ya nzo-tenta. 13 Nda ya bilele ya tenta yina me bikala ta lela na nzo-tenta diboko mosi na konso lweka, sambu na kufika yo.

14 “Nge ta sala mpi lele mosi na mpusu ya dimeme ya bakala ya bo me pakula mukubu ya mbwaki sambu na kufika tenta mpi na zulu na yo lele ya nkaka na mpusu ya mbisi ya bo ke bingaka foke sambu na kufika tenta.+

15 “Nge ta sala makunzi+ sambu na nzo-tenta na mabaya ya akasia yina ta vanda ya kusungama.+ 16 Nda ya konso dikunzi katuka na ntoto tii na zulu fwete vanda maboko kumi mpi nene na yo diboko mosi na ndambu. 17 Konso dikunzi kele ti makulu* zole, dikulu mosi pene-pene ti ya nkaka. Nge fwete sala makunzi yonso ya nzo-tenta mutindu yina. 18 Nge fwete sala makunzi 20 sambu na ndambu ya sudi ya nzo-tenta, ya ke tala na sudi.

19 “Nge ta sala mabulu+ 40 ya arza na nsi ya makunzi 20: mabulu zole na nsi ya dikunzi mosi sambu na makulu na yo zole mpi mabulu zole na nsi ya konso dikunzi yina ke landa sambu na makulu+ na yo zole. 20 Sambu na ndambu ya nkaka ya nzo-tenta, ndambu ya nordi, sala makunzi 20, 21 ti mabulu na yo 40 ya arza, mabulu zole na nsi ya dikunzi mosi mpi mabulu zole na nsi ya konso dikunzi yina ke landa. 22 Sambu na kitini ya nima ya nzo-tenta na ndambu ya westi, nge ta sala makunzi+ sambanu. 23 Nge ta sala makunzi zole sambu yo vanda makunzi zole ya binkonko ya nima ya nzo-tenta. 24 Yo fwete vanda zole katuka na nsi tii na zulu, tii na mutaku ya ntete. Yo fwete salama mutindu yina sambu na yonso zole, mpi yo ta kuma makunzi zole ya binkonko. 25 Makunzi ta vanda nana ti mabulu na yo 16 ya arza, mabulu zole na nsi ya dikunzi mosi mpi mabulu zole na nsi ya konso dikunzi yina ke landa.

26 “Nge ta sala banti na mabaya ya akasia, banti tanu sambu na makunzi ya lweka mosi ya nzo-tenta,+ 27 mpi banti tanu sambu na makunzi ya lweka ya nkaka ya nzo-tenta, mpi banti tanu sambu na makunzi ya lweka ya nzo-tenta na westi, sambu na kitini ya nima. 28 Nti ya kati-kati yina ke luta na kati-kati ya makunzi fwete katuka na nsongi mosi tii na nsongi ya nkaka.

29 “Nge ta pakula makunzi yina wolo,+ mpi nge ta sala mitaku na yo na wolo sambu yo simba banti yina, mpi nge ta pakula banti yina wolo. 30 Nge fwete tedimisa nzo-tenta na kulanda pula na yo yina bo songaka nge na ngumba.+

31 “Nge fwete sala rido+ na nsinga ya ble, na lene ya mbwaki-ble, na lele ya mbwaki mingi, mpi na lino ya kitoko ya kudimba-dimba. Bo ta sala yo ti bifwanisu ya basherube na zulu na yo. 32 Nge ta kanga yo na zulu ya makunzi iya ya nti ya akasia yina bo me pakula wolo. Bapense na yo fwete vanda ya wolo. Bo ta tedimisa makunzi na zulu ya mabulu iya ya arza. 33 Nge ta kanga rido na nsi ya bikangilu mpi nge ta nata sanduku ya Kimbangi+ kuna na kati ya rido. Rido ta kabula Kisika ya Santu+ mpi Kisika ya Kuluta Santu+ sambu na beno. 34 Nge fwete tula mufiniku na zulu ya sanduku ya Kimbangi na Kisika ya Kuluta Santu.

35 “Nge ta tula mesa na nganda ya rido, ti kima ya kutudila minda+ ya ke talana ti mesa na ndambu ya sudi ya nzo-tenta; mpi nge ta tula mesa na ndambu ya nordi. 36 Nge ta sala rido sambu na munoko ya tenta na nsinga ya ble, na lene ya mbwaki-ble, na lele ya mbwaki mingi, mpi na lino ya kitoko ya kudimba-dimba ya bo me tunga kumosi.+ 37 Nge ta sala makunzi tanu ti nti ya akasia sambu na rido mpi ta pakula yo wolo. Bapense na yo ta vanda ya wolo, mpi nge ta sadila yo mabulu tanu ya kwivre.

27 “Nge ta sala mesa-kimenga na mabaya ya akasia;+ nda na yo ta vanda maboko* tanu mpi nene na yo maboko tanu. Bandambu yonso ya mesa-kimenga fwete vanda kiteso mosi, mpi nda na yo katuka na ntoto tii na zulu fwete vanda maboko tatu.+ 2 Nge ta sala bibongo+ na zulu ya binkonko na yo iya; bibongo yina ta vanda kitini ya mesa-kimenga, mpi nge ta pakula mesa-kimenga kwivre.+ 3 Nge ta sala bakantini ya kukatudila putulu* na yo ya tiya, kumosi ti bapawu, babolo, bansomo, mpi bima ya kunatila tiya, mpi nge ta sala bisadilu na yo yonso na kwivre.+ 4 Nge ta sala wayi sambu na mesa-kimenga, muyungulu mosi ya kwivre, mpi nge ta sala na zulu ya muyungulu yina mitaku iya ya kwivre na binkonko na yo iya. 5 Nge ta tula yo na nsi ya dibaya ya mesa-kimenga, mpi muyungulu yina ta basika mwa fioti na kati-kati ya mesa-kimenga. 6 Nge ta sala banti sambu na mesa-kimenga na mabaya ya akasia mpi nge ta pakula yo kwivre. 7 Bo ta kotisa banti yina na kati ya mitaku na mpila nde banti yina kuvanda na balweka yonso zole ya mesa-kimenga ntangu bo ke nata yo.+ 8 Nge ta sala mesa-kimenga bonso sanduku mosi ya mabaya yina kele pululu. Yo fwete salama kaka mutindu Yandi songaka nge na ngumba.+

9 “Nge ta sala kibansala+ ya nzo-tenta. Sambu na ndambu ya sudi, yina ke tala na sudi, kibansala ta vanda ti barido ya ke lela ya bo me sala na lino ya kitoko ya kudimba-dimba, nda na yo na ndambu mosi ta vanda maboko 100.+ 10 Yo ta vanda ti makunzi 20 mpi mabulu 20 ya kwivre. Bapense ya makunzi ti bikangilu* na yo ta vanda ya arza. 11 Nda ya barido yina ke lela sambu na ndambu ya nordi ta vanda mpi maboko 100, kumosi ti makunzi na yo 20 mpi mabulu na yo 20 ya kwivre, ti bapense ya arza mpi bikangilu sambu na makunzi. 12 Yo ta vanda ti barido ya ke lela na ndambu ya westi sambu na maboko 50 yina ta sabuka nene ya kibansala, ti makunzi kumi mpi mabulu kumi. 13 Nene ya kibansala na ndambu ya esti, na ndambu yina ntangu ke basikaka, kele maboko 50. 14 Barido ya ke lela ta vanda maboko 15 na lweka mosi, ti makunzi tatu mpi mabulu tatu.+ 15 Sambu na lweka yina ya nkaka barido ya ke lela ta vanda maboko 15, ti makunzi tatu mpi mabulu tatu.

16 “Munoko ya kibansala fwete vanda ti rido yina nda na yo ta vanda maboko 20 mpi ya bo me sala ti nsinga ya ble, lene ya mbwaki-ble, lele ya mbwaki mingi, mpi lino ya kitoko ya kudimba-dimba ya bo me tunga kumosi,+ ti makunzi iya mpi mabulu na yo iya.+ 17 Makunzi yonso yina ta ziunga kibansala ta vanda ti bikangilu ya arza mpi bapense ya arza, kansi mabulu na yo ta vanda ya kwivre.+ 18 Nda ya kibansala fwete vanda maboko 100,+ nene na yo maboko 50, mpi nda na yo katuka na ntoto tii na zulu maboko 5, ya bo me sala na lino ya kitoko ya kudimba-dimba, mpi yo fwete vanda ti mabulu ya kwivre. 19 Bisadilu yonso ti bima yonso ya bo ta sadila na kisalu ya nzo-tenta, mpi bapike na yo ya tenta ti bapike yonso ya kibansala, fwete vanda ya kwivre.+

20 “Nge fwete songa bantu ya Izraele sambu bo natila nge mafuta ya olive ya bunkete mpi yina bo me tuta, sambu na nsemo, na mpila nde minda kulanda kupela ntangu yonso.+ 21 Na tenta ya lukutakanu, na nganda ya rido yina kele pene-pene ya Kimbangi,+ Aroni ti bana na yandi ya babakala ta baka bangidika sambu minda kulanda kupela katuka na nkokila tii na suka na ntwala ya Yehowa.+ Yo kele nsiku ya mvula na mvula sambu na bandonga na bo yonso ya bantu, yina bantu ya Izraele fwete zitisa.+

28 “Nge ta binga mpangi na nge Aroni, ti bana na yandi ya babakala, na kati ya bantu ya Izraele, sambu yandi vanda nganga-nzambi na mono+—Aroni,+ kumosi ti Nadabi mpi Abihu,+ Eleazare mpi Itamare,+ bana ya Aroni.+ 2 Nge ta sala bilele ya santu sambu na Aroni mpangi na nge, sambu na nkembo mpi kitoko.+ 3 Nge ta tubila bantu yonso yina me zaba kisalu mbote,* bayina mono me pesa mayele,+ ebuna bo ta sala bilele ya Aroni sambu na kusantisama na yandi na mpila nde yandi vanda nganga-nzambi na mono.

4 “Yai bilele ya bo ta sala: lele ya ntulu,+ efodi,+ kazaka ya kukonda maboko,+ mvwela ya kare-kare, tirbani,+ mpi mukaba;+ bo ta sala bilele yai ya santu sambu na mpangi na nge Aroni mpi bana na yandi, sambu yandi vanda nganga-nzambi na mono. 5 Bantu yina me zaba kisalu mbote ta sadila wolo, nsinga ya ble, lene ya mbwaki-ble, lele ya mbwaki mingi, mpi lino ya kitoko.

6 “Bo ta sala efodi na wolo, na nsinga ya ble, na lene ya mbwaki-ble, na lele ya mbwaki mingi, mpi na lino ya kitoko ya kudimba-dimba, mpi bo fwete tula yo bifwanisu.+ 7 Yo fwete vanda ti bitini ya lele zole na mapeka yina bo me kutanisa bansongi ya balweka na yo zole. 8 Mukaba*+ yina bo ta kangisa na efodi sambu na kukanga yo ngolo, bo fwete sala yo ti bima ya kiteso mosi: wolo, nsinga ya ble, lene ya mbwaki-ble, lele ya mbwaki mingi, mpi lino ya kitoko ya kudimba-dimba.

9 “Nge ta baka matadi zole ya oniksi+ mpi ta sonika bazina ya bana ya Izraele+ na zulu na yo, 10 bazina sambanu na zulu ya ditadi mosi mpi bazina sambanu yina me bikala na zulu ya ditadi ya nkaka, na ndonga ya kubutuka na bo. 11 Muntu yina ke sonikaka na zulu ya matadi ta sonika bazina ya bana ya Izraele na zulu ya matadi yina zole mutindu yandi ke sonikaka na kashe.+ Ebuna nge ta tula yo na zulu ya bima ya wolo. 12 Nge ta tula matadi yonso zole na zulu ya bitini ya lele ya efodi na mapeka sambu yo vanda matadi yina bana ya Izraele ta yibukaka,+ mpi Aroni fwete nata bazina na bo na ntwala ya Yehowa na zulu ya bitini ya lele yina zole ya mapeka na yandi sambu na kuyibukaka yo. 13 Nge ta sala bima ya wolo 14 mpi bashene zole ya wolo ya kukonda kuvukisa ti kima ya nkaka mpi ya kudimba-dimba bonso nsinga,+ mpi nge fwete kangisa bashene ya bo me kanga bonso nsinga na bima yina ya wolo.+

15 “Nge ta lomba muntu yina ke tulaka bifwanisu na bilele na kusala lele ya ntulu sambu na kusambisa.+ Bo fwete sala yo bonso efodi, na wolo, na nsinga ya ble, na lene ya mbwaki-ble, na lele ya mbwaki mingi, mpi na lino ya kitoko ya kudimba-dimba.+ 16 Bandambu na yo yonso fwete vanda kiteso mosi kana bo konika yo na ndambu zole, nda na yo fwete vanda kitamina ya misapi* mpi nene na yo kitamina ya misapi. 17 Nge fwete tula na zulu na yo matadi ya bo me kangisa ngolo, bandonga iya ya matadi. Na ndonga ya ntete: rubi, topaze, mpi emerode. 18 Na ndonga ya zole: tirkwazi, safire, mpi yaspe. 19 Na ndonga ya tatu: ditadi ya lesheme,* agate, mpi ametiste. 20 Na ndonga ya iya: krisolite, oniksi, mpi yade. Bo fwete tula yo na kati ya bima ya wolo. 21 Matadi yina ta fwanana ti bazina ya bana 12 ya Izraele. Bo fwete sonika zina na konso ditadi bonso na kashe, konso zina ta monisa dikanda mosi na kati ya makanda 12.

22 “Nge ta sala bashene ya kutunga na zulu ya lele ya ntulu, bonso bansinga ya wolo ya kukonda kuvukisa ti kima ya nkaka.+ 23 Nge ta sala mitaku zole ya wolo sambu na lele ya ntulu mpi ta kangisa mitaku yina zole na bansongi yina zole ya lele ya ntulu. 24 Nge ta kotisa bansinga yina zole ya wolo na mitaku yina zole ya kele na bansongi ya lele ya ntulu. 25 Nge ta kotisa bansongi yonso zole ya bansinga yina zole na bima yina zole, mpi nge fwete kangisa yo na bitini ya lele ya efodi na mapeka, na ntwala. 26 Nge ta sala mitaku zole ya wolo mpi ta tula yo na bansongi yina zole na ndilu ya kati ya lele ya ntulu, yina ke talana ti efodi.+ 27 Nge fwete sala mitaku zole ya nkaka ya wolo na ntwala ya efodi, na nsi ya bitini zole ya lele ya mapeka, pene-pene ti kisika yina yo ke kutana, na zulu ya mukaba* ya efodi.+ 28 Nsinga ya ble fwete sala nde lele ya ntulu kubikala na kisika na yo, mpi yo kangisa mitaku na yo ti mitaku ya efodi. Yo ta sala nde lele ya ntulu kubikala kaka na kisika na yo na zulu ya efodi, na zulu ya mukaba.*

29 “Aroni fwete nataka bazina ya bana ya Izraele na zulu ya lele ya ntulu sambu na kusambisa. Yandi ta nata yo na zulu ya ntima na yandi ntangu yandi ta kotaka na Kisika ya Santu sambu na kuyibukaka ntangu yonso na ntwala ya Yehowa. 30 Nge ta tula Urimi mpi Tumimi*+ na kati ya lele ya ntulu sambu na kusambisa, mpi yo fwete vanda na zulu ya ntima ya Aroni ntangu yandi ke kota na ntwala ya Yehowa, mpi Aroni fwete vanda kaka ti bima yai na zulu ya ntima na yandi na ntwala ya Yehowa ntangu yonso sambu na kusambisa bana ya Izraele.

31 “Nge ta sala kazaka ya kukonda maboko ya kulwata na nsi ya efodi, yonso ti nsinga ya ble.+ 32 Yo ta vanda ti dibulu na zulu* na kati-kati na yo. Dibulu na yo ta vanda ti ndilu yina muntu ya ke tungaka bilele ta tunga na nziunga na yo. Yo fwete vanda bonso dibulu ya kinkutu ya kibende, mpidina yo ta pasuka ve. 33 Nge fwete sala bagrenade na nsinga ya ble, na lene ya mbwaki-ble, mpi na lele ya mbwaki mingi na nziunga ya ndilu na yo, kumosi ti tu-bangunga ya wolo na kati-kati na yo. 34 Nge fwete landisa ka-ngunga mosi ya wolo ti grenade mosi, ka-ngunga mosi ya wolo ti grenade mosi, na nziunga ya ndilu ya nsi ya kazaka ya kukonda maboko. 35 Aroni fwete lwata yo sambu yandi sala kisalu, mpi makelele na yo fwete wakana ntangu yandi ke kota na kisika ya santu na ntwala ya Yehowa mpi ntangu yandi ke basika, mpidina yandi ta fwa ve.+

36 “Nge fwete sala kinzanza mosi ya ke sema na wolo ya kukonda kuvukisa ti kima ya nkaka mpi kusonika na zulu na yo mutindu bo ke sonikaka na kashe: ‘Busantu kele ya Yehowa.’+ 37 Nge fwete kangisa yo na tirbani+ ti nsinga ya ble; yo fwete vanda ntangu yonso na ntwala ya tirbani. 38 Yo ta vanda na mbunzu ya Aroni, mpi Aroni ta nata makambu kana muntu mosi me sala kifu na yina me tala bima ya santu,+ yina bantu ya Izraele ke santisa ntangu bo ke pesa yo bonso makabu ya santu. Yo fwete vanda ntangu yonso na mbunzu na yandi sambu Yehowa kundima bo.

39 “Nge ta tunga mvwela mosi ya kare-kare na lino ya kitoko, ta sala tirbani na lino ya kitoko, mpi ta sala mukaba.+

40 “Nge ta sala mpi bamvwela, mikaba, mpi lele ya kulwata na ntu sambu na bana ya Aroni,+ sambu na nkembo mpi kitoko.+ 41 Nge ta lwatisa mpangi na nge Aroni ti bana na yandi ya babakala bilele, mpi nge ta tula bo mafuta,+ nge ta tula bo na kisalu*+ mpi ta santisa bo, ebuna bo ta vanda banganga-nzambi na mono. 42 Diaka, sadila bo bakupe* ya lino sambu na kufika kinkonga na bo.+ Yo ta katuka na luketo tii na bambendi. 43 Aroni ti bana na yandi ya babakala fwete lwata yo ntangu bo ke kota na tenta ya lukutakanu to ntangu bo ke pusana na mesa-kimenga sambu na kusala na kisika ya santu, sambu bo nata ve makambu mpi bo fwa. Yo kele nsiku ya ntangu yonso sambu na yandi mpi bana* na yandi.

29 “Yai kele mambu ya nge fwete sala sambu na kusantisa bo sambu bo vanda banganga-nzambi na mono: Baka mwana-ngombe ya bakala, mameme zole ya babakala ya kukonda kifu,+ 2 mampa ya kukonda levire, mampa ya kukonda levire yina bo me sala bonso lupetu mpi ya bo me vukisa ti mafuta, mpi bagaleti ya kukonda levire ya bo me pakula mafuta.+ Nge ta sala yo ti fufu ya kitoko ya ble 3 mpi nge ta tula yo na kitunga mpi ta pesa yo na kitunga,+ kumosi ti ngombe yina ya bakala mpi mameme yina zole ya babakala.

4 “Nge ta nata Aroni ti bana na yandi ya babakala na munoko ya tenta ya lukutakanu+ mpi ta yobisa bo masa.+ 5 Na nima, nge ta baka bilele+ mpi ta lwatisa Aroni mvwela, kazaka ya kukonda maboko ya kulwata na nsi ya efodi, efodi, mpi lele ya ntulu, ebuna nge ta kanga ngolo mukaba* ya efodi na luketo na yandi.+ 6 Nge ta tula tirbani na ntu na yandi mpi ta tula kidimbu ya santu ya kudipesa* na zulu ya tirbani;+ 7 ebuna nge ta baka mafuta ya bo ke tulaka muntu+ mpi ta tiamuna yo na zulu ya ntu na yandi mpi ta tula yandi mafuta.+

8 “Na nima nata bana na yandi, lwatisa bo bamvwela,+ 9 mpi lwatisa bo mikaba, Aroni ti bana na yandi, mpi tula lele ya kukanga na ntu na zulu ya ntu na bo; ebuna kinganga-nzambi ta kuma ya bo bonso nsiku ya ntangu yonso.+ Yai kele mutindu nge fwete tula Aroni ti bana na yandi na kisalu sambu bo vanda banganga-nzambi.*+

10 “Na nima, nge ta nata ngombe ya bakala na ntwala ya tenta ya lukutakanu, mpi Aroni ti bana na yandi ta tula maboko na bo na zulu ya ntu ya ngombe yina ya bakala.+ 11 Fwa ngombe yina na ntwala ya Yehowa, na munoko ya tenta ya lukutakanu.+ 12 Baka ndambu ya menga ya ngombe yina na musapi na nge mpi tula yo na zulu ya bibongo ya mesa-kimenga,+ mpi tiamuna na nsi ya mesa-kimenga+ menga yonso yina ta bikala. 13 Na nima baka mafuta+ yonso yina ke fikaka misopo, mafuta yina kele na zulu ya dizafu,* mpi bapiku yonso zole ti mafuta yina kele na zulu na yo, ebuna yoka yo na zulu ya mesa-kimenga sambu yo basisa midinga.+ 14 Kansi musuni ya ngombe yina, mpusu na yo, mpi tufi na yo, nge ta yoka yo na tiya tii yo zika, na nganda ya camp. Yo kele dikabu sambu na disumu.

15 “Na nima baka dimeme mosi ya bakala, mpi Aroni ti bana na yandi ta tula maboko na bo na zulu ya ntu ya dimeme yina.+ 16 Fwa dimeme yina, baka menga na yo, mpi mwanga yo na zulu ya mesa-kimenga, na bandambu yonso.+ 17 Zenga dimeme yina bitini-bitini, yobisa misopo+ na yo ti makulu na yo mpi yidika bitini yina kumosi ti ntu na yo. 18 Nge fwete yoka dimeme yina ya mvimba, mpi kusala nde yo basisa midinga na zulu ya mesa-kimenga. Yo kele dikabu ya kuyoka sambu na Yehowa, kima ya nsudi ya kitoko.*+ Yo kele dikabu yina bo me yoka na tiya sambu na Yehowa.

19 “Na nima, nge ta baka dimeme yina ya nkaka, mpi Aroni ti bana na yandi ya babakala fwete tula maboko na bo na zulu ya ntu ya dimeme yina.+ 20 Fwa dimeme yina mpi baka ndambu ya menga na yo, tula yo na nsongi ya dikutu ya kitata ya Aroni mpi na nsongi ya makutu ya kitata ya bana na yandi mpi na musapi ya nene ya maboko na bo ya kitata mpi na musapi ya nene ya makulu na bo ya kitata, mpi mwanga menga na bandambu yonso ya mesa-kimenga. 21 Na nima baka ndambu ya menga yina kele na zulu ya mesa-kimenga ti ndambu ya mafuta ya bo ke tulaka muntu+ mpi mwanga yo na zulu ya Aroni ti ya bilele na yandi, mpi na zulu ya bana na yandi ti ya bilele ya bana na yandi, sambu yandi ti bilele na yandi mpi bana na yandi ti bilele na bo, kuvanda santu.+

22 “Na nima baka mafuta ya dimeme yina ya bakala, mukila ya mafuta-mafuta, mafuta yina ke fikaka misopo, mafuta yina kele na zulu ya dizafu,* bapiku yonso zole ti mafuta yina kele na zulu na yo,+ mpi dikulu ya kitata, sambu yo kele dimeme ya bakala ya bo me pesa sambu na kutula bo na kisalu ya kinganga-nzambi.+ 23 Na kitunga ya mampa ya kukonda levire yina kele na ntwala ya Yehowa, baka mpi dimpa mosi ya kele bonso dimbuma mpi dimpa ya bo me sala bonso lupetu mpi ya bo me pakula mafuta mpi galeti mosi. 24 Nge fwete tula yo yonso na maboko ya Aroni mpi na maboko ya bana na yandi, mpi nge fwete nikisa yo na ntwala mpi na nima bonso dikabu ya kunikisa na ntwala ya Yehowa. 25 Ebuna nge ta baka yo na maboko na bo mpi ta yoka yo na zulu ya mesa-kimenga, na zulu ya dikabu ya kuyoka, bonso kima ya nsudi ya kitoko* na ntwala ya Yehowa. Yo kele dikabu yina bo me yoka na tiya sambu na Yehowa.

26 “Na nima baka ntulu ya dimeme yina ya bakala ya bo pesaka sambu na kutula Aroni na kisalu ya kinganga-nzambi,+ mpi nikisa yo na ntwala ti na nima bonso dikabu ya kunikisa na ntwala ya Yehowa, mpi yo ta kuma dikabu na nge. 27 Nge ta santisa ntulu ya dikabu ya kunikisa mpi dikulu ya dikabu ya santu yina bo nikisaka mpi yina bo bakaka na dimeme ya bakala yina bo pesaka sambu na kutula Aroni ti bana na yandi na kisalu ya kinganga-nzambi.+ 28 Yo fwete kuma ya Aroni mpi ya bana na yandi na kulanda nsiku ya ntangu yonso yina bantu ya Izraele ta zitisaka, sambu yo kele dikabu ya santu, mpi yo ta kuma dikabu ya santu yina bantu ya Izraele+ ta pesaka. Yo kele dikabu na bo ya santu sambu na Yehowa, dikabu ya me katuka na bimenga+ na bo ya kinduku.

29 “Na nima ya lufwa ya Aroni, bana+ na yandi ta sadila bilele yina ya santu+ ya Aroni, ntangu bo ta tula bo mafuta mpi ta tula bo banganga-nzambi. 30 Nganga-nzambi yina ta yinga yandi na kati ya bana na yandi mpi yina ta kota na tenta ya lukutakanu sambu na kusala na kisika ya santu ta lwata yo bilumbu nsambwadi.+

31 “Nge ta baka dimeme ya bakala yina bo pesaka sambu na kutula bo na kisalu ya kinganga-nzambi mpi nge ta tokisa musuni na yo na kisika mosi ya santu.+ 32 Aroni ti bana na yandi ta dia+ musuni ya dimeme yina ya bakala mpi dimpa yina kele na kitunga, na munoko ya tenta ya lukutakanu. 33 Bo ta dia bima yina bo pesaka sambu na kufika masumu sambu na kutula bo banganga-nzambi* mpi kusantisa bo. Kansi muntu yina kele ve ti nswa* lenda dia yo ve, sambu yo kele bima ya santu.+ 34 Kana ndambu ya musuni ya kimenga yina bo pesaka sambu na kutula na kisalu ya kinganga-nzambi mpi ya dimpa kubikala tii na suka, nge fwete yoka yo na tiya.+ Bo fwete dia yo ve, sambu yo kele kima mosi ya santu.

35 “Nge fwete sala mutindu yai na Aroni ti na bana na yandi, na kulanda mambu yonso yina mono songaka nge. Nge ta baka bilumbu nsambwadi sambu na kutula bo banganga-nzambi.*+ 36 Konso kilumbu nge ta pesa ngombe ya bakala ya dikabu sambu na disumu sambu na kufika masumu, mpi nge ta pesa kimenga ya ke fika masumu sambu na kukumisa mesa-kimenga bunkete, mpi nge fwete tula yo mafuta sambu na kusantisa yo.+ 37 Nge ta baka bilumbu nsambwadi sambu na kupesa kimenga ya ke fika masumu sambu na mesa-kimenga, mpi nge fwete santisa yo sambu yo kuma mesa-kimenga ya kuluta santu.+ Konso muntu yina ke simba mesa-kimenga fwete vanda santu.

38 “Yai kele bima ya nge ta pesa na zulu ya mesa-kimenga: bana-mameme zole ya babakala ya me lungisa mvula mosi, konso kilumbu mpi mbala na mbala.+ 39 Pesa mwana-dimeme mosi ya bakala na suka mpi mwana-dimeme yina ya nkaka na nkokila.*+ 40 Ndambu mosi na kati ya bandambu kumi ya kitesilu mosi ya efa* ya fufu ya kitoko ya bo me vukisa ti ndambu mosi na kati ya bandambu iya ya hini* ya mafuta ya olive yina bo me tuta, mpi dikabu ya malafu ya ndambu mosi na kati ya bandambu iya ya hini ya vinu, ta vanda sambu na mwana-dimeme ya ntete ya bakala. 41 Nge ta pesa mwana-dimeme yina ya zole na nkokila* kumosi ti makabu ya bambuma mpi ya malafu bonso na suka. Nge ta pesa yo bonso kima ya nsudi ya kitoko,* dikabu yina bo me yoka na tiya sambu na Yehowa. 42 Yo fwete vanda dikabu ya kuyoka ya mbala na mbala na bandonga na beno yonso ya bantu na munoko ya tenta ya lukutakanu na ntwala ya Yehowa, kisika mono ta kudimonisaka na beno sambu na kutubila nge kuna.+

43 “Mono ta kudimonisaka kuna na bantu ya Izraele, mpi nkembo+ na mono ta santisa yo. 44 Mono ta santisa tenta ya lukutakanu mpi mesa-kimenga, mpi mono ta santisa Aroni ti bana na yandi+ sambu bo vanda banganga-nzambi na mono. 45 Mono ta zinga na kati ya bantu ya Izraele, mpi mono ta vanda Nzambi+ na bo. 46 Ebuna bo ta zaba kibeni nde mono kele Yehowa Nzambi na bo, yina basisaka bo na insi ya Ezipte sambu mono zinga na kati na bo.+ Mono kele Yehowa Nzambi na bo.

30 “Nge ta sala mesa-kimenga bonso kisika ya kuyokila ndumbu;+ nge ta sala yo na mabaya ya akasia.+ 2 Bandambu na yo yonso fwete vanda kiteso mosi, nda na yo diboko* mosi, nene na yo diboko mosi mpi nda na yo katuka na ntoto tii na zulu maboko zole. Bibongo na yo ta vanda kaka kima mosi ti yo.+ 3 Nge ta pakula yo wolo ya kukonda kuvukisa ti kima ya nkaka: zulu na yo, balweka na yo yonso, ti bibongo na yo; mpi nge fwete sala ndilu mosi ya wolo* na nziunga sambu na yo. 4 Nge ta sadila yo mpi mitaku zole ya wolo na nsi ya ndilu na yo* na balweka zole ya ke talana, mpi yo ta simba banti yina bo ta sadila sambu na kunata yo. 5 Sala banti na mabaya ya akasia mpi pakula yo wolo. 6 Nge fwete tula yo na ntwala ya rido yina kele pene-pene ya sanduku ya Kimbangi,+ na ntwala ya mufiniku yina kele na zulu ya Kimbangi, kisika mono ta kudimonisaka na nge.+

7 “Aroni+ ta yoka ndumbu+ ya nsudi ya kitoko na zulu na yo+ mpi kusala nde yo basisa midinga na zulu ya mesa-kimenga ntangu yandi ta yidikaka minda+ konso suka. 8 Diaka, ntangu Aroni ta pedisa minda na nkokila,* yandi ta yoka ndumbu. Yo kele dikabu ya ndumbu ya mbala na mbala na ntwala ya Yehowa na bandonga na beno yonso ya bantu. 9 Beno fwete pesa ve ndumbu+ yina nsiku ke pesa ve nswa to dikabu ya kuyoka to dikabu ya mbuma na zulu na yo, mpi beno fwete tiamuna ve dikabu ya malafu na zulu na yo. 10 Aroni fwete pesa dikabu ya ke fika masumu na zulu ya bibongo na yo mbala mosi na mvula.+ Kumosi ti ndambu ya menga ya dikabu sambu na disumu,+ yandi ta pesa dikabu ya ke fika masumu sambu na yo mbala mosi na mvula na bandonga na beno yonso ya bantu. Yo kele kima ya kuluta santu sambu na Yehowa.”

11 Ebuna Yehowa tubilaka Moize nde: 12 “Konso ntangu ya nge ke sonikisa bazina mpi ke tanga ntalu ya bana ya Izraele,+ konso muntu fwete pesa nkudulu na Yehowa sambu na luzingu* na yandi na ntangu ya kutanga ntalu na bo. Yo kele sambu mpasi kubwila bo ve ntangu bo ke sonikisa bazina. 13 Bantu yonso yina me sonikisa bazina ta pesa bima yai: kati-kati ya shekele* na kutadila shekele ya kisika ya santu.*+ Ba gera* makumi zole kele shekele mosi. Kati-kati ya shekele kele makabu sambu na Yehowa.+ 14 Konso muntu yina me sonikisa zina mpi kele ti bamvula 20 mata ta pesa makabu+ ya Yehowa. 15 Mvwama fwete pesa ve mingi mpi nsukami fwete pesa ve na nsi ya kati-kati ya shekele* bonso makabu na Yehowa sambu na kufika masumu sambu na luzingu* na beno. 16 Nge ta baka mbongo ya kibende* ya kufika masumu na maboko ya bantu ya Izraele mpi ta pesa yo sambu na kisalu ya tenta ya lukutakanu, mpidina bantu ya Izraele ta yibukaka yo na ntwala ya Yehowa, sambu na kufika masumu sambu na luzingu* na beno.”

17 Yehowa tubilaka diaka Moize nde: 18 “Sala dilonga mosi ya nene ya kwivre sambu na kuyobidila+ mpi kima ya kutula yo; na nima tula yo na kati-kati ya tenta ya lukutakanu ti mesa-kimenga, mpi tula masa na kati na yo.+ 19 Aroni ti bana na yandi ta yobisa maboko na bo ti makulu na bo pana.+ 20 Ntangu bo ta kota na tenta ya lukutakanu to ntangu bo ta pusana pene-pene ya mesa-kimenga sambu na kusala kisalu mpi kupesa makabu ya kuyoka na tiya mpi kusala nde yo basisa midinga sambu na Yehowa, bo ta yobila masa sambu bo fwa ve. 21 Bo fwete yobisa maboko na bo ti makulu na bo sambu bo fwa ve, mpi yo fwete vanda nsiku ya ntangu yonso sambu na bo, sambu na yandi ti bana na yandi, na bimvuka na bo yonso ya bantu.”+

22 Yehowa landaka kutubila Moize nde: 23 “Na nima, baka mananasi ya kuluta kitoko: bashekele 500 ya mire ya ngolo, mpi kati-kati ya ntalu yina, bashekele 250, ya sinamome ya nsudi ya kitoko, bashekele 250 ya kanele, 24 mpi bashekele 500 ya kase, ya bo me tesa na kutadila shekele ya kisika ya santu,*+ kumosi ti hini* mosi ya mafuta ya olive. 25 Ebuna sala ti yo mafuta ya santu ya bo ke tulaka muntu; bo fwete vukisa yo mbote-mbote.*+ Yo fwete vanda mafuta ya santu ya bo ke tulaka muntu.

26 “Nge ta tula tenta ya lukutakanu+ mpi sanduku ya Kimbangi mafuta yina, 27 mpi mesa ti bisadilu na yo yonso, kima ya kutudila minda ti bisadilu na yo, mesa-kimenga ya ndumbu, 28 mesa-kimenga ya dikabu ya kuyoka ti bisadilu na yo yonso, mpi dilonga ya nene ti kima ya kutula yo. 29 Nge fwete santisa yo sambu yo kuma bima ya kuluta santu.+ Konso muntu yina ke simba yo fwete vanda santu.+ 30 Ebuna nge ta tula Aroni+ ti bana na yandi+ mafuta mpi ta santisa bo sambu bo vanda banganga-nzambi na mono.+

31 “Nge ta tubila bantu ya Izraele nde, ‘Yo fwete landa kuvanda sambu na mono mafuta ya santu ya bo ke tulaka muntu na bandonga na beno ya bantu.+ 32 Bo fwete sadila yo ve na nitu ya bantu, mpi beno fwete sala ve ata kima mosi ya kele ti bima na kati bonso yo. Yo kele kima mosi ya santu. Yo fwete landa kuvanda kima ya santu sambu na beno. 33 Konso muntu yina ke sala mafuta ya kele bonso yo mpi ke tula ndambu na yo na zulu ya muntu yina kele ve ti nswa,* bo fwete katula* yandi na kati ya bantu na yandi.’”+

34 Na nima Yehowa tubilaka Moize nde: “Baka bandambu ya kiteso mosi ya bamananasi+ yai: matonsi ya stakite, onika, galbanumi ya nsudi ya kitoko, mpi ndumbu ya mpembe ya bo me vukisa ve ti kima ya nkaka. 35 Sala ndumbu+ ti yo; mpi bima ya nsudi ya kitoko yina bo me vukisa, bo fwete vukisa yo mbote-mbote,* bo fwete tula yo mungwa,+ yo fwete vanda bunkete, mpi santu. 36 Nge ta tuta ndambu na yo sambu yo kuma mfututu mpi ta tula ndambu na yo na ntwala ya Kimbangi na tenta ya lukutakanu, kisika mono ta kudimonisaka na nge. Yo fwete vanda ya kuluta santu sambu na beno. 37 Ndumbu yina nge me sala ti bima yai, nge fwete sala yo ve sambu na kusadila yo nge mosi.+ Nge fwete tadila yo bonso kima mosi ya santu sambu na Yehowa. 38 Konso muntu yina ke sala kima yina kele bonso yo sambu na kusepela na nsudi na yo, bo fwete katula* yandi na kati ya bantu na yandi.”

31 Yehowa landaka kutubila Moize nde: 2 “Tala, mono me pona* Besalele+ mwana ya Uri mwana ya Hure ya dikanda ya Yuda.+ 3 Mono ta fulusa yandi ti mpeve ya Nzambi, ta pesa yandi mayele, mayele ya kubakisa mambu, mpi nzayilu ya bisalu ya maboko ya mutindu na mutindu, 4 sambu na kusala bapula, sambu na kusala bima ti wolo, ti arza, mpi ti kwivre, 5 sambu na kuzenga mpi kuyidika matadi,+ mpi sambu na kusala bima ya mabaya ya mutindu na mutindu.+ 6 Diaka, mono me tula Oholiabi+ mwana ya Ahisamaki ya dikanda ya Dani sambu na kusadisa yandi, mpi mono ke tula mayele na ntima ya bantu yonso yina me zaba kisalu mbote,* sambu bo sala bima yonso yina mono me songa nge:+ 7 tenta ya lukutakanu,+ sanduku ya Kimbangi+ mpi mufiniku+ yina kele na zulu na yo, bima yonso ya tenta, 8 mesa+ ti bisadilu na yo, kima ya kutudila minda ya bo me sala na wolo ya kukonda kuvukisa ti kima ya nkaka mpi bisadilu na yo yonso,+ mesa-kimenga ya ndumbu,+ 9 mesa-kimenga ya dikabu ya kuyoka+ ti bisadilu na yo yonso, dilonga ya nene ti kima ya kutula yo,+ 10 bilele ya kutunga mbote, bilele ya santu sambu na nganga-nzambi Aroni, bilele ya bana na yandi sambu bo vanda banganga-nzambi,+ 11 mafuta ya bo ke tulaka muntu, mpi ndumbu ya nsudi ya kitoko sambu na kisika ya santu.+ Bo ta sala bima yonso yina mono me songa nge.”

12 Yehowa tubilaka diaka Moize nde: 13 “Tubila bantu ya Izraele mpi songa bo nde, ‘Beno fwete zitisa kibeni bisabatu+ na mono, sambu yo kele kidimbu na kati na mono ti beno na bandonga na beno yonso ya bantu sambu beno zaba nde mono, Yehowa, mono ke santisa beno. 14 Beno fwete zitisa Kisabatu, sambu yo kele kima mosi ya santu sambu na beno.+ Konso muntu yina ke vweza yo bo fwete fwa yandi. Kana muntu kusala konso kisalu na kilumbu yina, bo fwete katula* muntu* yina na kati ya bantu na yandi.+ 15 Beno lenda sala kisalu bilumbu sambanu, kansi kilumbu ya nsambwadi kele kisabatu ya kupema kibeni.+ Yo kele kima mosi ya santu sambu na Yehowa. Konso muntu yina ke sala kisalu na kilumbu ya Kisabatu, bo fwete fwa yandi. 16 Bantu ya Izraele fwete zitisa Kisabatu; bo fwete zitisa Kisabatu na bandonga na bo yonso ya bantu. Yo kele kuwakana ya mvula na mvula. 17 Yo kele kidimbu ya ntangu yonso na kati na mono ti bantu ya Izraele,+ sambu Yehowa salaka zulu ti ntoto na bilumbu sambanu mpi na kilumbu ya nsambwadi yandi yambulaka kusala mpi pemaka.’”+

18 Ebuna, ntangu yandi manisaka kutuba ti yandi na Ngumba ya Sinai, yandi pesaka Moize matadi zole ya Kimbangi,+ matadi yina Nzambi sonikaka na musapi+ na yandi.

32 Na ntangu yina, bantu monaka nde Moize ke sukinina na kukulumuka na ngumba.+ Ebuna bantu kwisaka kuziunga Aroni mpi tubilaka yandi nde: “Telama, sadila beto nzambi yina ta kwendaka na ntwala na beto,+ sambu beto ke zaba ve nki me kumina Moize yai, muntu yina basisaka beto na insi ya Ezipte.” 2 Ebuna Aroni tubilaka bo nde: “Beno katula bima-makutu+ ya wolo na makutu ya bankento na beno, ya bana na beno ya babakala ti ya bana na beno ya bankento, mpi beno natila mono yo.” 3 Yo yina bantu yonso yantikaka kukatula bima-makutu ya wolo yina vandaka na makutu na bo mpi kunatila yo Aroni. 4 Ebuna yandi bakaka wolo na maboko na bo, yandi yidikaka yo ti kisadilu mosi mpi salaka yo kiteki* ya mwana-ngombe ya bakala.+ Bo yantikaka kutuba nde: “O Izraele, yai kele Nzambi na nge yina basisaka nge na insi ya Ezipte.”+

5 Ntangu Aroni monaka diambu yai, yandi tungaka mesa-kimenga na ntwala na yo. Ebuna Aroni bokaka nde: “Nkinsi ta vanda mbasi sambu na Yehowa.” 6 Yo yina na kilumbu yina landaka bo telamaka na suka-suka mpi yantikaka kupesa makabu ya kuyoka mpi bimenga ya kinduku. Na nima bantu vandaka sambu na kudia mpi kunwa. Ebuna bo telamaka sambu na kuyangalala.+

7 Ntangu yai Yehowa tubilaka Moize nde: “Kwenda, kulumuka, sambu bantu na nge yina nge basisaka na insi ya Ezipte me kudibebisa.+ 8 Bo me bikisa nswalu nzila yina mono songaka bo na kulanda.+ Bo me kudisadila kiteki* ya mwana-ngombe, mpi bo ke landa kufukimina yo mpi kupesa yo bimenga mpi kutuba nde, ‘O Izraele, yai kele Nzambi na nge yina basisaka nge na insi ya Ezipte.’” 9 Yehowa tubilaka diaka Moize nde: “Mono me mona nde bo kele bantu ya ntu-ngolo.*+ 10 Ntangu yai bika mono, ebuna mono ta manisa bo na makasi na mono ya ngolo, mpi bika nde mono kumisa nge dikanda mosi ya nene na kisika na bo.”+

11 Ebuna Moize bondilaka* Yehowa Nzambi na yandi+ mpi tubaka nde: “O Yehowa, sambu na nki nge fwete wila bantu na nge makasi ya ngolo na nima ya kubasisa bo na insi ya Ezipte ti ngolo ya nene mpi diboko+ ya ngolo? 12 Sambu na nki bantu ya Ezipte fwete tuba nde, ‘Yandi vandaka ti bangindu ya mbi ntangu yandi basisaka bo. Yandi kanaka kufwa bo na bangumba mpi kumanisa bo na ntoto’?+ Yambula makasi na nge ya ngolo mpi tadila diaka* lukanu na nge ya kunata mpasi yai na zulu ya bantu na nge. 13 Yibuka bansadi na nge Abrahami, Izaki, mpi Izraele, bayina nge zengaka kieleka na zina na nge mosi mpi tubaka nde: ‘Mono ta kumisa bana* na beno mingi bonso bambwetete ya zulu,+ mpi mono ta pesa insi yai yonso ya mono me sola na bana* na beno sambu bo baka yo bonso dikabu+ na bo ya ntangu yonso.’”

14 Ebuna Yehowa yantikaka kutadila diaka* mpasi yina yandi tubaka na kunata na zulu ya bantu na yandi.+

15 Na nima, Moize balukaka mpi kulumukaka na ngumba ti matadi zole ya Kimbangi+ na diboko+ na yandi. Matadi yina vandaka ya kusonika na bandambu yonso zole; yo vandaka ya kusonika na ntwala mpi na nima. 16 Matadi yina vandaka kisalu ya Nzambi, mpi bisono yina vandaka bisono ya Nzambi yina yandi sonikaka na matadi yina.+ 17 Ntangu Yozue yantikaka kuwa makelele ya bantu sambu na milolo yina bo vandaka kutula, yandi tubilaka Moize nde: “Makelele ya bitumba kele na camp.” 18 Kansi Moize tubaka nde:

19 Ntangu Moize kumaka pene-pene ya camp mpi monaka mwana-ngombe+ mpi makinu, yandi waka makasi mingi, mpi yandi losaka matadi yina vandaka na maboko na yandi mpi panzaka yo na nsi ya ngumba.+ 20 Yandi bakaka mwana-ngombe yina bo salaka, yandi yokaka yo na tiya, mpi tutaka yo tii kuna yo kumaka putulu;+ na nima yandi panzaka yo na masa mpi salaka nde bantu ya Izraele kunwa yo.+ 21 Ebuna Moize tubilaka Aroni nde: “Bantu yai me sala nge nki yo yina nge me natila bo disumu ya nene?” 22 Aroni vutulaka nde: “Kuwa ve makasi ya ngolo, mfumu na mono. Nge me zaba mbote nde bantu yai ke vandaka kaka ti bangindu ya kusala mambu ya mbi.+ 23 Bo tubilaka mono nde, ‘Sadila beto nzambi yina ta kwendaka na ntwala na beto, sambu beto ke zaba ve nki me kumina Moize yai, muntu yina basisaka beto na insi ya Ezipte.’+ 24 Yo yina mono tubilaka bo nde, ‘Konso muntu yina kele ti wolo fwete katula yo mpi kupesa mono yo.’ Na nima, mono losaka yo na tiya mpi mwana-ngombe yai basikaka.”

25 Moize monaka nde bantu vandaka kudiyala ve, sambu Aroni bikaka nde bo kuma bantu ya kukonda kudiyala yo yina bo vandaka kima ya nsoni na ntwala ya bambeni na bo. 26 Ebuna Moize telamaka na kielo ya camp mpi tubaka nde: “Nani kele na lweka ya Yehowa? Yandi kwisa na mono!”+ Ebuna Balevi yonso vukanaka na nziunga na yandi. 27 Ntangu yai yandi tubilaka bo nde: “Yehowa Nzambi ya Izraele me tuba nde, ‘Konso muntu na kati na beno fwete baka mbele na yandi ya bitumba mpi kuluta kielo na kielo na camp ya mvimba sambu na kufwa mpangi na yandi ya bakala, muntu yina ke zingaka pene-pene na yandi, mpi nduku na yandi ya ngolo.’”+ 28 Balevi salaka mambu yina Moize tubaka. Yo yina na kilumbu yina, babakala kiteso ya 3 000 fwaka. 29 Ebuna Moize tubaka nde: “Bubu yai, beno kuditula na kingenga* sambu na Yehowa, sambu konso muntu na kati na beno me fwa mwana na yandi ya bakala mpi mpangi na yandi ya bakala;+ bubu yai yandi ta pesa beno lusakumunu.”+

30 Kaka na kilumbu yina landaka, Moize tubilaka bantu nde: “Beno me sala disumu mosi ya nene kibeni, mpi ntangu yai mono ta tombuka na Yehowa sambu na kutala kana mono lenda lomba ndolula sambu na disumu+ na beno.” 31 Ebuna Moize vutukaka na Yehowa mpi tubaka nde: “Bantu yai me sala disumu ya nene kibeni! Bo me kudisadila nzambi ya wolo!+ 32 Kansi ntangu yai kana nge me zola, lolula disumu+ na bo; kana ve, pardo, vwansa zina na mono na mukanda na nge yina nge me sonikaka.”+ 33 Kansi, Yehowa tubilaka Moize nde: “Konso muntu yina me sala disumu na ntwala na mono, yandi muntu yina mono ta vwansa zina na yandi na mukanda na mono. 34 Ntangu yai, kwenda, nata bantu na kisika yina mono tubilaka nge. Tala! Wanzio na mono ta vanda na ntwala na nge,+ mpi kilumbu yina mono ta kwisa kutala, mono ta pesa bo ndola sambu na disumu na bo.” 35 Ebuna Yehowa yantikaka kunatila bantu mpasi sambu bo salaka mwana-ngombe, yina ya Aroni salaka.

33 Yehowa tubilaka diaka Moize nde: “Katuka awa mpi kwenda ti bantu yina nge basisaka na insi ya Ezipte. Kwenda na insi yina mono zengaka kieleka na Abrahami, na Izaki, mpi na Yakobi nde, ‘Mono ta pesa yo+ na bana* na nge.’ 2 Mono ta tinda wanzio na mono na ntwala na nge+ mpi ta kula bantu ya Kanana, bantu ya Amore, bantu ya Heti, bantu ya Perizi, bantu ya Hivi, mpi bantu ya Yebusi.+ 3 Tombuka na insi yina miliki* ti bwiki+ kele mingi. Kansi mono ta kwenda ve na kati na beno, sambu beno kele bantu ya ntu-ngolo,*+ kana ve mono lenda manisa beno na nzila.”+

4 Ntangu bantu waka bangogo yai ya mbi, bo yantikaka kuwa mawa, mpi ata muntu mosi ve na kati na bo lwataka bima na yandi ya kukumisa nitu kitoko. 5 Yehowa tubilaka Moize nde: “Tubila bantu ya Izraele nde, ‘Beno kele bantu ya ntu-ngolo.*+ Na ntangu fioti mono lenda luta na kati na beno mpi kumanisa beno.+ Yo yina beno katula bima na beno ya kukumisa nitu kitoko na ntangu mono ke tadila nki mono ta sala beno.’” 6 Yo yina katuka na Ngumba ya Orebi tii kuna, bantu ya Izraele buyaka kulwata* bima na bo ya kukumisa nitu kitoko.

7 Ntangu yai Moize bakaka tenta na yandi mpi tedimisaka yo na nganda ya camp, mwa-ntama ti camp, mpi yandi bingaka yo tenta ya lukutakanu. Konso muntu yina vandaka na diambu ya kuyula Yehowa+ vandaka kubasika sambu na kukwenda na tenta ya lukutakanu, yina vandaka na nganda ya camp. 8 Na ntangu Moize vandaka kubasika sambu na kukwenda na tenta, bantu yonso vandaka kutelama mpi kubikala ya kutelama na munoko ya batenta na bo, mpi bo vandaka kutala Moize tii kuna yandi vandaka kukota na tenta. 9 Na ntangu Moize vandaka kukota na tenta, dikunzi ya dituti+ vandaka kukwisa kukulumuka mpi kutelama na munoko ya tenta na ntangu Nzambi vandaka kusolula ti Moize.+ 10 Ntangu bantu yonso vandaka kumona dikunzi ya dituti me telama na munoko ya tenta, konso muntu na kati na bo vandaka kutelama mpi kufukama na munoko ya tenta na yandi mosi. 11 Yehowa vandaka kutubila Moize meso na meso,+ kaka mutindu muntu ke tubaka ti muntu ya nkaka. Ntangu yandi vandaka kuvutuka na camp, Yozue+ mwana ya Nuni, nsadi mpi nsadisi+ na yandi, vandaka kukatuka ve na tenta.

12 Ntangu yai Moize tubilaka Yehowa nde: “Tala, nge ke tubila mono nde, ‘Nata bantu yai,’ kansi nge me zabisa mono ve ti nani nge ta tinda mono. Diaka, nge me tuba nde, ‘Mono me zaba nge mbote,* mono me ndima nge mpi.’ 13 Pardo, kana nge me ndima mono, songa mono banzila+ na nge, sambu mono zaba nge mpi nge landa na kundima mono. Yibuka mpi nde dikanda yai kele bantu na nge.”+ 14 Yo yina yandi tubaka nde: “Mono mosi* ta kwenda ti nge,+ mpi mono ta pesa nge ngemba.”+ 15 Ebuna Moize tubilaka yandi nde: “Kana nge mosi ke* kwenda ve, kukatula beto ve na kisika yai. 16 Inki mutindu bantu ta zaba nde nge me ndima mono, mono ti bantu na nge? Keti yo kele ve kana nge kwenda ti beto, mpidina mono ti bantu na nge beto ta swaswana ti bantu yonso ya nkaka yina kele na ntoto+ ya mvimba?”+

17 Yehowa tubilaka diaka Moize nde: “Mono ta sala mpi diambu yai ya nge me lomba, sambu mono me ndima nge mpi mono me zaba nge mbote.”* 18 Ebuna yandi tubaka nde: “Pardo, songa mono nkembo na nge.” 19 Kansi yandi tubaka nde: “Mono ta sala nde nge mona bumbote na mono yonso, mpi mono ta zabisa zina ya Yehowa+ na ntwala na nge; mono ta ndima muntu yina mono ta ndima, mpi mono ta wila mawa muntu yina mono ta wila mawa.”+ 20 Kansi yandi yikaka nde: “Nge lenda mona ve luse na mono, sambu ata muntu mosi ve lenda mona mono mpi kubikala na luzingu.”

21 Yehowa tubaka diaka nde: “Tala kisika yai pene-pene na mono. Telama na zulu ya ditadi. 22 Ntangu nkembo na mono ta luta, mono ta tula nge na dibulu yina kele na ditadi, mpi mono ta fika nge diboko na mono tii kuna mona ta luta. 23 Na nima mono ta katula diboko na mono, mpi nge ta mona mukongo na mono. Kansi nge lenda mona ve luse na mono.”+

34 Ebuna Yehowa tubilaka Moize nde: “Sala matadi zole bonso yina ya ntete,+ ebuna mono ta sonika na zulu ya matadi yina mambu yina vandaka na matadi ya ntete,+ yina nge panzaka.+ 2 Vanda ya kuyilama na suka sambu nge ta tombuka na Ngumba ya Sinai mpi ta telama na ntwala na mono kuna na nsongi ya ngumba.+ 3 Kansi muntu mosi ve lenda tombuka ti nge, mpi bo fwete mona ve muntu ya nkaka na konso kisika yina na ngumba. Ata mameme to bangombe fwete dia ve matiti na ntwala ya ngumba yina.”+

4 Yo yina Moize zengaka matadi zole bonso yina ya ntete, telamaka na suka-suka, mpi tombukaka na Ngumba ya Sinai, kaka mutindu Yehowa songaka yandi, mpi yandi bakaka matadi yina zole na maboko na yandi. 5 Ebuna Yehowa kulumukaka+ na kati ya dituti, telamaka pene-pene na yandi, mpi zabisaka zina ya Yehowa.+ 6 Yehowa vandaka kuluta na ntwala na yandi mpi kutuba nde: “Yehowa, Yehowa, Nzambi yina ke wilaka bantu mawa+ mpi ke fwilaka bo nkenda,*+ yandi ke waka makasi+ nswalu ve mpi kele ya kufuluka na zola ya kwikama*+ mpi kieleka,*+ 7 yandi ke monisilaka mafunda ya bantu zola ya kwikama,+ yandi ke lolulaka kifu, mambu ya mbi, mpi disumu,+ kansi yandi ta pesa kibeni ndola+ na muntu yina me sala mbi, mpi sambu na kifu ya batata yandi ke pesaka ndola na bana, na bantekolo, na ndonga ya tatu ya bantu, mpi na ndonga ya iya ya bantu.”+

8 Moize fukamaka nswalu mpi bwaka luse na ntoto. 9 Ebuna yandi tubaka nde: “O Yehowa, kana ntangu yai nge me ndima mono, pardo Yehowa, kwenda ti beto mpi vanda na kati na beto,+ ata beto kele bantu ya ntu-ngolo,*+ mpi lolula kifu na beto ti disumu na beto,+ mpi baka beto bonso kima na nge mosi.” 10 Yandi vutulaka nde: “Tala, mono ke sala kuwakana: Na meso ya bantu na nge yonso, mono ta sala mambu ya kuyituka yina me salamaka* ntete ve na ntoto ya mvimba to na kati ya makanda yonso,+ mpi bantu yonso yina nge ke zinga na kati na bo ta mona kisalu ya Yehowa, sambu kima ya mono ke sala ti nge kele kima ya ke pesa boma.+

11 “Tula dikebi na mambu yina mono ke songa nge bubu yai.+ Tala, mono ke kula bantu ya Amore, bantu ya Kanana, bantu ya Heti, bantu ya Perizi, bantu ya Hivi, mpi bantu ya Yebusi+ na ntwala na nge. 12 Keba, kusala ve kuwakana ti bantu ya insi yina nge ke kwenda,+ kana ve yo ta vanda mutambu na kati na beno.+ 13 Kansi beno fwete bwisa bamesa-kimenga na bo, beno fwete buka makunzi na bo ya santu, mpi beno fwete zenga+ banti na bo ya santu.* 14 Nge fwete fukimina ve nzambi ya nkaka,+ sambu Yehowa me zabanaka nde yandi ke* lombaka nde bo kangama kaka na yandi.* Ya kieleka, yandi kele Nzambi yina ke lombaka nde bo kangama kaka na yandi.+ 15 Keba, kusala ve kuwakana ti bantu ya insi yina, sambu ntangu bo ta sala kindumba ti banzambi na bo mpi ta pesa bimenga na banzambi na bo,+ muntu mosi ta binga nge mpi nge ta dia kimenga+ na yandi. 16 Ebuna nge ta baka kibeni bana na bo ya nkaka ya bankento sambu na bana na nge ya babakala,+ ebuna bana na bo ya bankento ta sala kindumba ti banzambi na bo mpi ta nata bana na nge ya babakala na kusala kindumba ti banzambi na bo.+

17 “Nge fwete sala ve banzambi ya bibende ya bo me lamba na tiya.+

18 “Nge fwete sala Nkinsi ya Mampa ya Kukonda Levire. Nge ta dia mampa ya kukonda levire,+ kaka mutindu mono songaka nge; sala yo bilumbu nsambwadi na ntangu na yo na ngonda ya Abibi,*+ sambu nge basikaka na Ezipte na ngonda ya Abibi.

19 “Konso mwana ya ntete ya bakala* kele ya mono,+ bitwisi na nge yonso mpi, yo vanda mwana-bakala ya ntete ya ngombe to ya dimeme.+ 20 Nge fwete futa dimeme sambu na kusumba diaka mwana ya ntete ya mpunda. Kansi kana nge sumba yo diaka ve, nge fwete buka yo nkingu. Nge fwete sumba diaka konso mwana na nge ya ntete ya bakala.+ Ata muntu mosi ve lenda kwisa na ntwala na mono maboko-mpamba.

21 “Nge ta sala kisalu bilumbu sambanu, kansi na kilumbu ya nsambwadi nge ta pema.*+ Ata na ntangu ya kubundula mpi na nsungi ya kukatula bima na bilanga, nge ta pema.

22 “Nge ta sala Nkinsi na nge ya Bamposo ti bambuma ya ntete ya kuyela ya nsungi ya kukatula ble na bilanga, mpi Nkinsi ya Kuvukisa Bambuma* na luyantiku ya mvula.+

23 “Bantu* na nge yonso fwete kwisa na ntwala ya Mfumu ya kieleka, Yehowa, Nzambi ya Izraele,+ mbala tatu na mvula. 24 Sambu mono ta kula makanda na ntwala na nge,+ mpi mono ta kumisa teritware na nge nene, mpi ata muntu mosi ve ta yuma ntima sambu na insi na nge na ntangu nge ta tombuka sambu na kumona luse ya Yehowa Nzambi na nge mbala tatu na mvula.

25 “Nge fwete pesa ve menga ya kimenga na mono kumosi ti konso kima ya bo me tula levire.+ Kimenga ya nkinsi ya Paki fwete lala ve mpimpa ya mvimba tii na suka.+

26 “Nge fwete nata bambuma ya ntete ya kuyela ya kuluta kitoko ya ntoto na nge na nzo ya Yehowa Nzambi na nge.+

“Nge fwete tokisa ve mwana-nkombo na mabele ya mama na yo.”+

27 Yehowa tubilaka diaka Moize nde: “Nge fwete sonika bangogo yai,+ sambu mono ke sala kuwakana ti nge mpi ti Izraele+ na kuwakana ti bangogo yai.” 28 Moize bikalaka kuna ti Yehowa bilumbu 40 mpi bampimpa 40. Yandi diaka ve dimpa mpi nwaka ve masa.+ Yandi* sonikaka bangogo ya kuwakana, Bansiku Kumi,*+ na zulu ya matadi yina.

29 Ebuna Moize kulumukaka na Ngumba ya Sinai, mpi matadi zole ya Kimbangi vandaka na diboko+ na yandi. Ntangu yandi kulumukaka na ngumba, Moize zabaka ve nde mpusu ya luse na yandi vandaka kusema sambu yandi solulaka ti Nzambi. 30 Ntangu Aroni mpi bantu yonso ya Izraele monaka Moize, bo monaka nde mpusu ya luse na yandi vandaka kusema ebuna bo waka boma na kukwenda pene-pene na yandi.+

31 Kansi Moize bingaka bo, ebuna Aroni mpi bamfumu yonso ya bantu ya Izraele kwisaka na yandi mpi Moize solulaka ti bo. 32 Na nima, bantu yonso ya Izraele kwisaka pene-pene na yandi, mpi yandi pesaka bo bantuma yonso yina Yehowa pesaka yandi na Ngumba ya Sinai.+ 33 Ntangu Moize vandaka kumanisa kusolula ti bo, yandi vandaka kutula lele na luse na yandi.+ 34 Kansi ntangu Moize vandaka kukota na ntwala ya Yehowa sambu na kusolula ti yandi, yandi vandaka kukatula lele yina kaka kana yandi me basika.+ Na nima, yandi vandaka kubasika mpi kusonga bantu ya Izraele bantuma yina yandi bakaka.+ 35 Ebuna bantu ya Izraele monaka nde mpusu ya luse ya Moize vandaka kusema; na nima, Moize tulaka diaka lele na luse na yandi tii kuna yandi kotaka sambu na kusolula ti Nzambi.*+

35 Na nima Moize vukisaka kimvuka ya mvimba ya bantu ya Izraele mpi tubilaka bo nde: “Yehowa me pesa ntuma na kusala mambu yai:+ 2 Beno lenda sala kisalu bilumbu sambanu, kansi kilumbu ya nsambwadi ta kuma kima mosi ya santu sambu na beno, kisabatu ya kupema kibeni sambu na Yehowa.+ Konso muntu yina ta sala kisalu na kilumbu yina, bo ta fwa yandi.+ 3 Na kilumbu ya Kisabatu, beno fwete pedisa ve tiya na bisika yonso yina beno ke zingaka.”

4 Ebuna Moize tubilaka kimvuka ya mvimba ya bantu ya Izraele nde: “Yehowa me tuba nde, 5 ‘Beno baka makabu sambu na Yehowa na kati na beno.+ Bika nde konso muntu yina ntima na yandi me zola+ kunata dikabu sambu na Yehowa: wolo, arza, kwivre, 6 nsinga ya ble, lene ya mbwaki-ble, lele ya mbwaki mingi, lino ya kitoko, mika ya nkombo,+ 7 bampusu ya mameme ya babakala ya bo me pakula mukubu ya mbwaki, bampusu ya mbisi ya bo ke bingaka foke, mabaya ya akasia, 8 mafuta sambu na minda, balsami sambu na mafuta ya bo ke tulaka muntu mpi sambu na ndumbu ya nsudi ya kitoko,+ 9 matadi ya oniksi, mpi matadi ya nkaka ya kutula na efodi+ mpi na lele ya ntulu.+

10 “‘Bika nde bantu yonso yina me zaba kisalu mbote*+ na kati na beno kukwisa mpi kusala bima yonso yina Yehowa me tuba, 11 disongidila, nzo-tenta ti tenta na yo mpi lele sambu na kufika yo, bikangilu na yo mpi makunzi na yo, banti na yo, makunzi na yo ya nene mpi mabulu na yo; 12 Sanduku+ ti banti+ na yo, mufiniku+ mpi rido+ ya ke kabulaka; 13 mesa+ mpi banti na yo mpi bisadilu na yo yonso mpi mampa ya kumonisa;+ 14 kima ya kutudila minda+ sambu na nsemo mpi bisadilu na yo mpi minda na yo mpi mafuta sambu na nsemo;+ 15 mesa-kimenga ya ndumbu+ mpi banti na yo; mafuta ya bo ke tulaka muntu mpi ndumbu ya nsudi ya kitoko;+ rido sambu na munoko ya nzo-tenta; 16 mesa-kimenga ya dikabu ya kuyoka+ mpi wayi na yo ya kwivre, banti na yo mpi bisadilu na yo yonso; dilonga ya nene mpi kima ya kutula yo;+ 17 barido ya ke lela ya kibansala,+ makunzi na yo mpi mabulu na yo; rido ya munoko ya kibansala; 18 bapike ya tenta ya nzo-tenta mpi bapike ya tenta ya kibansala mpi bansinga na yo;+ 19 bilele+ ya kutunga mbote sambu na kusala na kisika ya santu, bilele ya santu sambu na nganga-nzambi Aroni,+ mpi bilele ya bana na yandi sambu bo vanda banganga-nzambi.’”

20 Yo yina kimvuka ya mvimba ya bantu ya Izraele katukaka na ntwala ya Moize mpi basikaka. 21 Ebuna konso muntu yina ntima na yandi vandaka kupusa yandi+ mpi konso muntu yina mpeve na yandi vandaka kupusa yandi, kwisaka mpi nataka makabu na yandi sambu na Yehowa sambu bo sadila yo sambu na tenta ya lukutakanu, sambu na bisalu na yo yonso, mpi sambu na bilele ya santu. 22 Bo landaka kukwisa, babakala ti bankento, konso muntu yina ntima na yandi zolaka, mpi bo vandaka kunata bilunga ya bo ke lwataka na bilele, bima-makutu, mitaku, mpi babiju ya nkaka, mpi bima ya wolo ya mitindu yonso. Bo yonso pesaka makabu na bo* ya wolo na Yehowa.+ 23 Bantu yonso yina vandaka ti nsinga ya ble, lene ya mbwaki-ble, lele ya mbwaki mingi, lino ya kitoko, mika ya nkombo, bampusu ya dimeme ya bakala ya bo me pakula mukubu ya mbwaki, mpi bampusu ya mbisi ya bo ke bingaka foke, nataka yo. 24 Bantu yonso yina pesaka arza mpi kwivre nataka makabu ya Yehowa, mpi bantu yonso yina vandaka ti mabaya ya akasia sambu na konso kisalu ya nzo-tenta nataka yo.

25 Bankento yonso yina zabaka kisalu mbote+ tungaka na maboko na bo, mpi bo nataka bima yina bo tungaka: nsinga ya ble, lene ya mbwaki-ble, lele ya mbwaki mingi, mpi lino ya kitoko. 26 Bankento yonso yina zabaka kisalu mbote yina ntima na bo vandaka kupusa bo tungaka mika ya nkombo.

27 Ebuna bamfumu nataka matadi ya oniksi ti matadi ya nkaka ya kutula na efodi mpi na lele ya ntulu,+ 28 balsami mpi mafuta sambu na nsemo, sambu na mafuta ya bo ke tulaka muntu+ mpi sambu na ndumbu ya nsudi ya kitoko.+ 29 Babakala ti bankento yonso yina bantima na bo pusaka bo nataka mwa kima sambu na kisalu yina Yehowa tubaka na nzila ya Moize nde beto fwete sala; bantu ya Izraele nataka yo bonso dikabu ya luzolo ya mbote na Yehowa.+

30 Ebuna Moize tubilaka bantu ya Izraele nde: “Tala, Yehowa me pona Besalele mwana ya Uri mwana ya Hure ya dikanda ya Yuda.+ 31 Yandi me fulusa yandi ti mpeve ya Nzambi, me pesa yandi mayele, mayele ya kubakisa mambu, mpi nzayilu ya bisalu ya maboko ya mutindu na mutindu 32 sambu na kusala bapula, sambu na kusala bima ti wolo, ti arza, mpi ti kwivre, 33 sambu na kuzenga mpi kuyidika matadi, mpi sambu na kusala bima ya kitoko ya mabaya ya mutindu na mutindu. 34 Yandi me tula na ntima na yandi mpi ya Oholiabi+ mwana ya Ahisamaki ya dikanda ya Dani mayele ya kulonga bantu ya nkaka. 35 Yandi me pesa bo mayele mingi ya kusala kisalu mbote*+ sambu na kusala kisalu yonso ya muntu ya ke salaka kisalu ya maboko, ya muntu ya ke tulaka bifwanisu na bilele, mpi ya muntu ya ke sadilaka nsinga ya ble, lene ya mbwaki-ble, lele ya mbwaki mingi, mpi lino ya kitoko sambu na kutunga bilele, mpi ya muntu ya ke tungaka bilele. Babakala yai ta sala bisalu ya mitindu yonso mpi ta yidika bapula ya mitindu yonso.

36 “Besalele ta sala kumosi ti Oholiabi mpi konso muntu yina me zaba kisalu mbote* yina Yehowa me pesa mayele ti mayele ya kubakisa mambu sambu na kuzaba mutindu ya kusala kisalu yonso ya kisika ya santu kaka mutindu Yehowa tubaka.”+

2 Ebuna Moize bingaka Besalele, Oholiabi, mpi konso muntu yina me zaba kisalu mbote yina Yehowa tulaka mayele na ntima na yandi,+ konso muntu yina ntima na yandi pusaka yandi na kudipesa na luzolo yonso sambu na kusala kisalu.+ 3 Bo bakaka makabu yonso+ yina vandaka na Moize, yina bantu ya Izraele nataka sambu na kisalu ya kisika ya santu. Kansi, konso suka bo landaka kunatila yandi makabu ya luzolo ya mbote.

4 Na nima ntangu bo yantikaka kisalu ya santu, bantu yonso yina me zaba kisalu mbote vandaka kukwisa, mosi-mosi, 5 mpi bo vandaka kusonga Moize nde: “Bantu ke nata bima mingi kuluta yina bo me lomba sambu na kisalu yina Yehowa me tuba nde beto sala.” 6 Yo yina Moize tubaka nde bo pesa luzayisu yai na camp ya mvimba: “Babakala ti bankento, beno nata diaka ve bima sambu na makabu ya santu.” Ebuna bo buyisaka bantu na kunata bima ya nkaka. 7 Bima vandaka ya kufwana sambu na kisalu yonso yina yo lombaka nde bo sala, mpi yo vandaka mingi kuluta.

8 Ebuna bantu yonso yina me zaba kisalu mbote+ salaka nzo-tenta+ yina vandaka ti bilele kumi ya tenta na lino ya kitoko ya kudimba-dimba, na nsinga ya ble, na lene ya mbwaki-ble, mpi na lele ya mbwaki mingi; yandi* salaka yo ti bifwanisu ya basherube na zulu na yo.+ 9 Nda ya konso lele ya tenta vandaka maboko* 28 mpi nene na yo maboko 4. Bilele yonso ya tenta vandaka nene mpi nda kiteso mosi. 10 Ebuna yandi kangisaka bilele tanu ya tenta kumosi, mpi yandi kangisaka bilele ya nkaka tanu ya tenta kumosi. 11 Na nima yandi salaka minoko na nsinga ya ble na nsongi ya lele mosi ya tenta na kisika bo ta kangisa yo. Yandi salaka mutindu mosi na nsongi ya lele ya nsuka ya tenta na kisika yina bo zolaka kukangisa yo. 12 Yandi salaka minoko 50 na lele mosi ya tenta mpi minoko 50 na nsongi ya nkaka ya lele ya tenta na kisika bo ta kangisa yo sambu minoko yina kutalana. 13 Nsuka-nsuka, yandi salaka bikangilu 50 ya wolo mpi kangisaka bilele ya tenta ti bikangilu yina, mpidina nzo-tenta kumaka kima mosi.

14 Ebuna yandi salaka bilele ya tenta na mika ya nkombo sambu na kufika nzo-tenta. Yandi salaka bilele ya tenta 11.+ 15 Nda ya konso lele ya tenta vandaka maboko 30 mpi nene na yo maboko 4. Bilele 11 ya tenta vandaka nene mpi nda kiteso mosi. 16 Ebuna yandi kangisaka bilele tanu ya tenta kumosi, mpi yandi kangisaka bilele ya nkaka sambanu ya tenta kumosi. 17 Na nima yandi salaka minoko 50 na nsongi ya lele ya nsuka ya tenta kisika yo vandaka kukangama, mpi yandi salaka minoko 50 na nsongi ya lele ya nkaka ya tenta yina kangamaka ti yo. 18 Na nima yandi salaka bikangilu 50 ya kwivre sambu na kukangisa tenta sambu yo kuma kima mosi.

19 Ebuna yandi salaka lele mosi na mpusu ya dimeme ya bakala ya bo me pakula mukubu ya mbwaki sambu na kufika tenta mpi na zulu na yo lele ya nkaka na mpusu ya mbisi ya bo ke bingaka foke sambu na kufika tenta.+

20 Ebuna yandi salaka makunzi ya nzo-tenta na mabaya ya akasia+ yina vandaka ya kusungama.+ 21 Nda ya konso dikunzi katuka na ntoto tii na zulu vandaka maboko kumi mpi nene na yo diboko mosi na ndambu. 22 Konso dikunzi vandaka ti makulu* zole, dikulu mosi pene-pene ti ya nkaka. Yandi salaka makunzi yonso ya nzo-tenta mutindu yina. 23 Na mutindu yina, yandi salaka makunzi sambu na ndambu ya sudi ya nzo-tenta, makunzi 20, ya ke tala na sudi. 24 Ebuna yandi salaka mabulu 40 ya arza sambu na kutula yo na nsi ya makunzi 20, mabulu zole na nsi ya dikunzi mosi sambu na makulu na yo zole mpi mabulu zole na nsi ya konso dikunzi yina ke landa sambu na makulu na yo zole.+ 25 Sambu na ndambu ya nkaka ya nzo-tenta, ndambu ya nordi, yandi salaka makunzi 20, 26 ti mabulu na yo 40 ya arza, mabulu zole na nsi ya dikunzi mosi mpi mabulu zole na nsi ya konso dikunzi na kati ya makunzi yina ya nkaka.

27 Sambu na kitini ya nima ya nzo-tenta na ndambu ya westi, yandi salaka makunzi sambanu.+ 28 Yandi salaka makunzi zole sambu yo vanda makunzi ya binkonko ya nzo-tenta na binkonko zole ya nima. 29 Makunzi vandaka zole katuka na nsi tii na zulu, tii na mutaku ya ntete. Yandi salaka mutindu yina sambu na makunzi zole ya binkonko. 30 Yo yina makunzi kumaka nana ti mabulu na yo 16 ya arza, mabulu zole na nsi ya konso dikunzi.

31 Ebuna yandi salaka banti na mabaya ya akasia, banti tanu sambu na makunzi ya lweka mosi ya nzo-tenta,+ 32 mpi banti tanu sambu na makunzi ya lweka ya nkaka ya nzo-tenta mpi banti tanu sambu na makunzi ya nzo-tenta sambu na kitini ya nima na westi. 33 Yandi salaka nti ya kati-kati sambu yo luta na kati-kati ya makunzi katuka na nsongi mosi tii na nsongi ya nkaka. 34 Yandi pakulaka makunzi yina wolo, mpi yandi salaka mitaku na yo na wolo sambu yo simba banti yina, mpi yandi pakulaka banti yina wolo.+

35 Ebuna yandi salaka rido+ na nsinga ya ble, na lene ya mbwaki-ble, na lele ya mbwaki mingi, mpi na lino ya kitoko ya kudimba-dimba. Yandi salaka yo ti bifwanisu ya basherube+ na zulu na yo.+ 36 Ebuna yandi sadilaka yo makunzi iya ya nti ya akasia mpi pakulaka yo wolo, kumosi ti bapense ya wolo, mpi sadilaka yo mabulu iya ya arza. 37 Na nima, yandi salaka rido sambu na munoko ya tenta na nsinga ya ble, na lene ya mbwaki-ble, na lele ya mbwaki mingi, mpi na lino ya kitoko ya kudimba-dimba ya bo me tunga kumosi,+ 38 mpi makunzi na yo tanu ti bapense na yo. Yandi pakulaka bansongi na yo mpi bikangilu* na yo wolo, kansi mabulu na yo tanu vandaka ya kwivre.

37 Ebuna Besalele+ salaka Sanduku+ na mabaya ya akasia. Nda na yo vandaka maboko* zole na ndambu, nene na yo diboko mosi na ndambu, mpi nda na yo katuka na ntoto tii na zulu diboko mosi na ndambu.+ 2 Yandi pakulaka yo wolo ya kukonda kuvukisa ti kima ya nkaka, na kati ti na nganda, mpi yandi salaka ndilu mosi ya wolo* na nziunga na yo.+ 3 Na nima, yandi salaka mitaku iya ya wolo sambu na yo, sambu na kutula yo na zulu ya makulu na yo iya, mitaku zole na ndambu na yo mosi mpi mitaku zole na ndambu na yo ya nkaka. 4 Na nima, yandi salaka banti na mabaya ya akasia mpi pakulaka yo wolo.+ 5 Ebuna, yandi lutisaka banti yina na kati ya mitaku yina kele na balweka ya Sanduku sambu na kunata Sanduku.+

6 Yandi salaka mufiniku na wolo ya kukonda kuvukisa ti kima ya nkaka.+ Nda na yo vandaka maboko zole na ndambu mpi nene na yo diboko mosi na ndambu.+ 7 Ebuna yandi salaka basherube+ zole na bansongi yonso zole ya mufiniku+ na wolo ya bo me bula marto. 8 Sherube mosi vandaka na nsongi mosi, mpi sherube ya nkaka vandaka na nsongi ya nkaka. Yandi salaka basherube yina na bansongi yonso zole ya mufiniku. 9 Basherube yina zole tandulaka mapapu na yo na zulu, mpidina yo fikaka mufiniku ti mapapu na yo.+ Yo vandaka kutalana mpi baluse na yo vandaka kutala mufiniku.+

10 Ebuna yandi salaka mesa na mabaya ya akasia.+ Nda na yo vandaka maboko zole, nene na yo diboko mosi, mpi nda na yo katuka na ntoto tii na zulu diboko mosi na ndambu.+ 11 Yandi pakulaka yo wolo ya kukonda kuvukisa ti kima ya nkaka mpi salaka ndilu mosi ya wolo* na nziunga na yo. 12 Na nima, yandi salaka dibaya mosi na nene ya kipala-pala ya diboko* sambu yo ziunga yo mpi yandi salaka ndilu mosi ya wolo* sambu yo ziunga dibaya yina. 13 Diaka, yandi salaka mitaku iya ya wolo sambu na yo mpi tulaka mitaku yina na binkonko iya bisika bo kangisaka makulu yina iya. 14 Mitaku yina vandaka pene-pene ya dibaya, bonso bima ya ke simba banti yina bo ta sadila sambu na kunata mesa. 15 Ebuna yandi salaka banti na mabaya ya akasia mpi pakulaka yo wolo, sambu na kunata mesa. 16 Na nima, yandi salaka bisadilu ya mesa na wolo ya kukonda kuvukisa ti kima ya nkaka, disongidila malonga na yo, makopa na yo, mpi babolo ti mabungu na yo yina bo ta sadila sambu na kutiamuna+ makabu ya malafu.

17 Ebuna yandi salaka kima ya kutudila minda+ na wolo ya kukonda kuvukisa ti kima ya nkaka. Yandi sadilaka marto sambu na kusala kima yina ya kutudila minda. Nsi na yo, nti na yo, makopa na yo, bambuma na yo, mpi bintuntu na yo vandaka kaka kima mosi.+ 18 Balutangu sambanu vandaka kukatuka na nti na yo, balutangu tatu ya kima ya kutudila minda na lweka na yo mosi mpi balutangu tatu na lweka na yo ya nkaka. 19 Makopa tatu ya bo salaka bonso bintuntu ya nti ya amande vandaka na kimvuka mosi ya balutangu yina kele na lweka mosi, ti bambuma mpi bintuntu yina ke landana, mpi bo salaka mutindu mosi na kimvuka ya balutangu yina kele na lweka ya nkaka. Bo salaka mutindu yina sambu na balutangu sambanu yina vandaka kukatuka na nti ya kima ya kutudila minda. 20 Nti ya kima ya kutudila minda vandaka ti makopa iya ya bo salaka bonso bintuntu ya nti ya amande, ti bambuma mpi bintuntu yina ke landana. 21 Dimbuma mosi vandaka na nsi ya balutangu zole ya ntete yina me katuka na nti yina, dimbuma mosi na nsi ya balutangu zole ya me landa, mpi dimbuma mosi na nsi ya balutangu zole ya nkaka ya me landa, sambu na balutangu sambanu ya ke katuka na nti ya kima ya kutudila minda. 22 Bambuma, balutangu mpi kima ya mvimba ya kutudila minda vandaka kaka kima mosi ya bo me sala na wolo ya kukonda kuvukisa ti kima ya nkaka, ya bo me bula marto. 23 Na nima yandi salaka minda+ na yo nsambwadi, basizo* na yo mpi bima na yo ya kunatila tiya na wolo ya kukonda kuvukisa ti kima ya nkaka. 24 Yandi salaka yo ti bisadilu na yo yonso na talanta* mosi ya wolo ya kukonda kuvukisa ti kima ya nkaka.

25 Na nima, yandi salaka mesa-kimenga ya ndumbu+ na mabaya ya akasia. Bandambu na yo yonso vandaka kiteso mosi, nda na yo diboko mosi, nene na yo diboko mosi mpi nda na yo katuka na ntoto tii na zulu maboko zole. Bibongo na yo vandaka ya kukangama ti yo.+ 26 Ebuna, yandi pakulaka yo wolo ya kukonda kuvukisa ti kima ya nkaka, zulu na yo, balweka na yo yonso, ti bibongo na yo, mpi yandi salaka ndilu mosi ya wolo* na nziunga na yo. 27 Yandi sadilaka yo mitaku zole ya wolo na nsi ya ndilu na yo* na balweka zole ya ke talana sambu na kusimba banti yina bo ta sadila sambu na kunata yo. 28 Na nima, yandi salaka banti na mabaya ya akasia mpi pakulaka yo wolo. 29 Yandi salaka mpi mafuta ya santu ya bo ke tulaka muntu+ ti ndumbu ya kukonda kuvukisa ti kima ya nkaka, ya nsudi ya kitoko,+ ya bo me vukisa mbote-mbote.*

38 Yandi salaka mesa-kimenga ya dikabu ya kuyoka na mabaya ya akasia. Bandambu na yo yonso vandaka kiteso mosi, nda na yo maboko* tanu, nene na yo maboko tanu, mpi nda na yo katuka na ntoto tii na zulu maboko tatu.+ 2 Ebuna yandi salaka bibongo na yo na zulu ya binkonko na yo iya. Bibongo na yo vandaka ya kukangama ti yo. Na nima, yandi pakulaka yo kwivre.+ 3 Ebuna, yandi salaka bisadilu yonso ya mesa-kimenga, bakantini ya kutudila putulu ya tiya, bapawu, babolo, bansomo, mpi bima ya kunatila tiya. Yandi salaka bisadilu na yo yonso na kwivre. 4 Yandi salaka mpi wayi sambu na mesa-kimenga, muyungulu mosi ya kwivre, na nsi ya dibaya na yo, pene-pene ya kati-kati na yo. 5 Yandi salaka mitaku iya na binkonko iya pene-pene ya wayi ya kwivre, sambu yo simba banti. 6 Na nima yandi salaka banti na mabaya ya akasia mpi pakulaka yo kwivre. 7 Yandi kotisaka banti na kati ya mitaku yina vandaka na balweka ya mesa-kimenga sambu na kunata yo. Yandi salaka mesa-kimenga bonso sanduku ya mabaya yina vandaka pululu.

8 Ebuna yandi salaka dilonga ya nene ya kwivre+ mpi kima ya kwivre ya kutula yo; yandi sadilaka batala-tala* ya bankento yina bo yidikaka sambu na kusala na munoko ya tenta ya lukutakanu.

9 Na nima yandi salaka kibansala.+ Sambu na ndambu ya sudi ya kibansala, yina ke tala na sudi, yandi salaka barido ya ke lela ya bo me sala na lino ya kitoko ya kudimba-dimba, nda na yo vandaka maboko 100.+ 10 Kuvandaka ti makunzi 20 mpi mabulu 20 ya kwivre, mpi bapense ya makunzi ti bikangilu* na yo vandaka ya arza. 11 Diaka, sambu na ndambu ya nordi, nda ya barido ya ke lela vandaka maboko 100. Makunzi na yo 20 mpi mabulu na yo 20 vandaka ya kwivre. Bapense ya makunzi mpi bikangilu* na yo vandaka ya arza. 12 Kansi sambu na ndambu ya westi, nene ya barido ya ke lela vandaka maboko 50. Kuvandaka ti makunzi kumi mpi mabulu kumi, mpi bapense ya makunzi ti bikangilu* na yo vandaka ya arza. 13 Nene na ndambu ya esti, na ndambu yina ntangu ke basikaka, vandaka maboko 50. 14 Barido ya ke lela vandaka maboko 15 na lweka mosi, ti makunzi tatu mpi mabulu tatu. 15 Sambu na lweka yina ya nkaka, na ndambu ya nkaka ya munoko ya kibansala, barido ya ke lela vandaka maboko 15, ti makunzi tatu mpi mabulu tatu. 16 Barido yonso ya ke lela yina vandaka kuziunga kibansala vandaka ya lino ya kitoko ya kudimba-dimba. 17 Mabulu sambu na makunzi vandaka ya kwivre, bapense ya makunzi mpi bikangilu na yo vandaka ya arza, bo pakulaka bansongi na yo arza, mpi kuvandaka ti bikangilu* ya arza sambu na makunzi yonso ya kibansala.+

18 Bo tungaka rido ya munoko ya kibansala ti nsinga ya ble, lene ya mbwaki-ble, lele ya mbwaki mingi, mpi lino ya kitoko ya kudimba-dimba. Nda na yo vandaka maboko 20 mpi nda na yo katuka na ntoto tii na zulu maboko 5, kiteso mosi ti nda ya barido ya ke lela ya kibansala+ katuka na ntoto tii na zulu. 19 Bo salaka makunzi na yo iya mpi mabulu na yo na kwivre. Bapense mpi bikangilu* na yo vandaka ya arza, mpi bo pakulaka bansongi na yo arza. 20 Bapike yonso ya nzo-tenta mpi ya nziunga ya kibansala vandaka ya kwivre.+

21 Yai lisiti ya bima ya nzo-tenta, nzo-tenta ya Kimbangi,+ yina bo tangaka na kulanda ntuma ya Moize, bonso kisalu ya Balevi+ na nsi ya lutwadisu ya Itamare,+ mwana ya nganga-nzambi Aroni. 22 Besalele+ mwana ya Uri mwana ya Hure ya dikanda ya Yuda salaka mambu yonso yina Yehowa songaka Moize. 23 Oholiabi+ mwana ya Ahisamaki ya dikanda ya Dani, muntu yina ke salaka bisalu ya maboko mpi muntu ya ke tulaka bifwanisu na bilele mpi ya ke tungaka ti nsinga ya ble, lene ya mbwaki-ble, lele ya mbwaki mingi, mpi lino ya kitoko vandaka ti yandi.

24 Wolo yonso yina bo sadilaka kisalu yonso ya kisika ya santu vandaka ntalu ya wolo ya dikabu ya kunikisa,+ batalanta* 29 mpi bashekele* 730 na kutadila shekele ya kisika ya santu.* 25 Mpi arza ya bantu ya Izraele yina bo sonikisaka bazina vandaka batalanta 100 mpi bashekele 1 775 na kutadila shekele ya kisika ya santu.* 26 Kati-kati ya shekele sambu na konso muntu vandaka kati-kati ya shekele na kutadila shekele ya kisika ya santu* sambu na konso muntu yina vandaka na kati ya bantu yina bo sonikisaka bazina yantika na bamvula 20 mata,+ bo vandaka 603 550.+

27 Kisalu ya kutula mabulu ya kisika ya santu mpi mabulu ya rido vandaka batalanta 100; mabulu 100 vandaka batalanta 100, talanta mosi sambu na konso dibulu.+ 28 Ti bashekele 1 775, yandi salaka bapense sambu na makunzi mpi pakulaka bansongi na yo mpi kangisaka yo kumosi.

29 Kwivre sambu na dikabu* vandaka batalanta 70 mpi bashekele 2 400. 30 Ti yo, yandi salaka mabulu sambu na munoko ya tenta ya lukutakanu, mesa-kimenga ya kwivre mpi wayi na yo ya kwivre, bisadilu yonso ya mesa-kimenga, 31 mabulu na nziunga ya kibansala, mabulu sambu na munoko ya kibansala, bapike yonso ya tenta ya nzo-tenta mpi bapike yonso+ ya tenta na nziunga ya kibansala.

39 Na nsadisa ya nsinga ya ble, ya lene ya mbwaki-ble, mpi ya lele ya mbwaki mingi,+ bo salaka bilele ya kutunga mbote sambu na kusala na kisika ya santu. Bo salaka bilele ya santu sambu na Aroni,+ kaka mutindu Yehowa songaka Moize.

2 Yandi salaka efodi+ na wolo, na nsinga ya ble, na lene ya mbwaki-ble, na lele ya mbwaki mingi, mpi na lino ya kitoko ya kudimba-dimba. 3 Bo bulaka manzanza ya wolo marto sambu yo kuma pete-pete, mpi yandi zengaka yo sambu yo kuma bansinga na mpila nde yandi vukisa yo ti nsinga ya ble, ti lene ya mbwaki-ble, ti lele ya mbwaki mingi, mpi ti lino ya kitoko, ebuna bo tulaka yo bifwanisu. 4 Bo sadilaka yo bitini ya lele ya mapeka yina bo kutanisaka bansongi ya balweka na yo zole. 5 Ebuna mukaba* yina bo kangisaka na efodi sambu na kukanga yo ngolo,+ bo salaka yo ti bima ya kiteso mosi, na wolo, na nsinga ya ble, na lene ya mbwaki-ble, na lele ya mbwaki mingi, mpi na lino ya kitoko ya kudimba-dimba, kaka mutindu Yehowa songaka Moize.

6 Ebuna bo tulaka matadi ya oniksi na bima ya wolo, mpi bo sonikaka bazina ya bana ya Izraele na zulu na yo, mutindu bo ke sonikaka na kashe.+ 7 Yandi tulaka yo na zulu ya bitini ya lele ya efodi na mapeka sambu yo vanda matadi yina bana ya Izraele ta yibukaka,+ kaka mutindu Yehowa songaka Moize. 8 Ebuna yandi salaka lele ya ntulu,+ kisalu ya muntu ya ke tulaka bifwanisu na bilele, mutindu bo salaka efodi, na wolo, na nsinga ya ble, na lene ya mbwaki-ble, na lele ya mbwaki mingi, mpi na lino ya kitoko ya kudimba-dimba.+ 9 Bandambu na yo yonso vandaka kiteso mosi kana bo konika yo na ndambu zole. Bo salaka lele ya ntulu, yina kana bo konika yo na ndambu zole, nda ti nene na yo vandaka kiteso mosi ti kitamina ya misapi ya diboko.* 10 Bo tulaka bandonga iya ya matadi na zulu na yo. Na ndonga ya ntete: rubi, topaze, mpi emerode. 11 Na ndonga ya zole: tirkwazi, safire, mpi yaspe. 12 Na ndonga ya tatu: ditadi ya lesheme,* agate, mpi ametiste. 13 Na ndonga ya iya: krisolite, oniksi, mpi yade. Bo tulaka yo na kati ya bima ya wolo. 14 Matadi yina fwananaka ti bazina ya bana 12 ya Izraele, mpi bo sonikaka bazina yina bonso na kashe, konso zina vandaka kumonisa dikanda mosi na kati ya makanda 12.

15 Ebuna bo salaka bashene ya kutunga na zulu ya lele ya ntulu, bonso bansinga ya wolo ya kukonda kuvukisa ti kima ya nkaka.+ 16 Bo salaka bima zole ya wolo mpi mitaku zole ya wolo mpi bo kangisaka mitaku yina zole na bansongi yina zole ya lele ya ntulu. 17 Na nima, bo kotisaka bansinga yina zole ya wolo na mitaku zole yina kele na bansongi ya lele ya ntulu. 18 Ebuna bo kotisaka bansongi yonso zole ya bansinga yina zole na bima yina zole mpi bo kangisaka yo na bitini ya lele ya mapeka na ntwala ya efodi. 19 Na nima bo salaka mitaku zole ya wolo mpi tulaka yo na bansongi yina zole na ndilu ya kati ya lele ya ntulu, yina ke talana ti efodi.+ 20 Ebuna bo salaka mitaku zole ya nkaka ya wolo mpi tulaka yo na ntwala ya efodi, na nsi ya bitini zole ya lele ya mapeka pene-pene ya kisika yina bo ke vukisaka yo, na zulu ya mukaba* ya efodi. 21 Nsuka-nsuka, bo kangisaka lele ya ntulu ti nsinga ya ble katuka na mitaku na yo tii na mitaku ya efodi, sambu lele ya ntulu kubikala kaka na kisika na yo na zulu ya efodi, na zulu ya mukaba,* kaka mutindu Yehowa songaka Moize.

22 Ebuna yandi salaka kazaka ya kukonda maboko ya kulwata na nsi ya efodi, yina muntu ya ke tungaka bilele tungaka, yonso ti nsinga ya ble.+ 23 Dibulu ya kazaka ya kukonda maboko vandaka na kati-kati na yo, bonso dibulu ya kinkutu ya kibende. Dibulu na yo vandaka ti ndilu na nziunga na yo sambu yo pasuka ve. 24 Na nima, na ndilu ya nsi ya kazaka ya kukonda maboko, bo salaka bagrenade na nsinga ya ble, na lene ya mbwaki-ble, mpi na lele ya mbwaki mingi, ya bo me dimba-dimba kumosi. 25 Bo salaka tu-bangunga ya wolo ya kukonda kuvukisa ti kima ya nkaka mpi bo tulaka yo na kati-kati ya bagrenade na nziunga ya ndilu ya nsi ya kazaka ya kukonda maboko, na kati-kati ya bagrenade; 26 bo landisaka ka-ngunga mosi ti grenade mosi, ka-ngunga mosi ti grenade mosi, na nziunga ya ndilu ya nsi ya kazaka ya kukonda maboko, yina bo vandaka kusadila sambu na kusala kisalu, kaka mutindu Yehowa songaka Moize.

27 Bo salaka bamvwela na lino ya kitoko, yina muntu ya ke tungaka bilele tungaka, sambu na Aroni ti bana na yandi ya babakala,+ 28 tirbani+ na lino ya kitoko, lele ya kulwata na ntu+ sambu na kukumisa nitu kitoko na lino ya kitoko, bakupe*+ ya lino na lino ya kitoko ya kudimba-dimba, 29 mpi lele ya kukanga na luketo na lino ya kitoko ya kudimba-dimba, na nsinga ya ble, na lene ya mbwaki-ble, mpi na lele ya mbwaki mingi ya bo me tunga kumosi, kaka mutindu Yehowa songaka Moize.

30 Nsuka-nsuka, bo salaka kinzanza ya ke sema, kidimbu ya santu ya kudipesa,* na wolo ya kukonda kuvukisa ti kima ya nkaka mpi bo sonikaka bisono yai na zulu na yo mutindu bo ke sonikaka na kashe: “Busantu kele ya Yehowa.”+ 31 Bo kangisaka yo nsinga mosi ya bo salaka na nsinga ya ble sambu na kutula yo na zulu ya tirbani, kaka mutindu Yehowa songaka Moize.

32 Ebuna kisalu yonso manaka sambu na nzo-tenta, tenta ya lukutakanu, mpi bantu ya Izraele salaka mambu yonso yina Yehowa songaka Moize.+ Bo salaka kaka mutindu yina.

33 Na nima bo nataka nzo-tenta+ na Moize, tenta+ ti bima na yo yonso: bikangilu+ na yo, makunzi+ na yo, banti+ na yo ti makunzi na yo ya nene mpi mabulu+ na yo; 34 lele ya kufika yo ya bo me sala na mpusu ya dimeme ya bakala ya bo me pakula mukubu ya mbwaki,+ lele ya kufika yo ya bo me sala na mpusu ya mbisi ya bo ke bingaka foke, rido+ ya ke kabulaka; 35 sanduku ya Kimbangi ti banti+ na yo mpi mufiniku;+ 36 mesa, bisadilu+ na yo yonso mpi mampa ya kumonisa; 37 kima ya kutudila minda+ ya wolo ya kukonda kuvukisa ti kima ya nkaka, minda na yo, ndonga ya minda, mpi bisadilu+ na yo yonso mpi mafuta sambu na nsemo;+ 38 mesa-kimenga+ ya wolo, mafuta ya bo ke tulaka muntu,+ ndumbu+ ya nsudi ya kitoko, rido+ sambu na munoko ya tenta; 39 mesa-kimenga ya kwivre+ mpi wayi na yo ya kwivre, banti+ na yo, bisadilu+ na yo yonso, dilonga ya nene mpi kima ya kutula yo;+ 40 barido ya ke lela ya kibansala, makunzi na yo mpi mabulu+ na yo, rido+ sambu na munoko ya kibansala, bansinga ya tenta ti bapike+ ya tenta mpi bisadilu yonso sambu na kisalu ya nzo-tenta, sambu na tenta ya lukutakanu; 41 bilele ya kutunga mbote sambu na kusala na kisika ya santu, bilele ya santu sambu na nganga-nzambi+ Aroni, mpi bilele ya bana na yandi ya babakala sambu bo vanda banganga-nzambi.

42 Bantu ya Izraele salaka kisalu yonso na kuwakana ti mambu yonso+ yina Yehowa songaka Moize. 43 Ntangu Moize talaka kisalu na bo yonso, yandi monaka nde bo salaka yo kaka mutindu Yehowa tubaka; ebuna Moize sakumunaka bo.

40 Ebuna Yehowa tubilaka Moize nde: 2 “Na kilumbu ya ntete ya ngonda ya ntete, nge ta tedimisa nzo-tenta, tenta ya lukutakanu.+ 3 Tula sanduku ya Kimbangi na kati na yo,+ mpi tula rido+ sambu na kubumba Sanduku. 4 Nge fwete kotisa mesa+ mpi kuyidika bima na yo, mpi kukotisa kima ya kutudila minda+ mpi kupedisa minda+ na yo. 5 Na nima, tula mesa-kimenga ya wolo sambu na ndumbu+ na ntwala ya sanduku ya Kimbangi mpi tula rido sambu na munoko ya nzo-tenta na kisika na yo.+

6 “Nge ta tula mesa-kimenga ya dikabu ya kuyoka+ na ntwala ya munoko ya nzo-tenta, tenta ya lukutakanu, 7 mpi nge ta tula dilonga ya nene na kati-kati ya tenta ya lukutakanu ti mesa-kimenga, mpi nge ta tula masa na kati na yo.+ 8 Ebuna sala kibansala+ na nziunga na yo mpi tula rido+ sambu na munoko ya kibansala. 9 Na nima nge ta baka mafuta ya bo ke tulaka muntu+ mpi kutula nzo-tenta ti bima yonso yina kele na kati+ na yo mafuta, mpi nge ta santisa yo ti bisadilu na yo yonso, mpidina yo ta kuma kima ya santu. 10 Nge ta tula mesa-kimenga ya dikabu ya kuyoka mpi bisadilu na yo yonso mafuta mpi ta santisa mesa-kimenga, mpidina yo ta kuma mesa-kimenga+ ya kuluta santu. 11 Tula dilonga ya nene mafuta mpi kima ya kutula yo, mpi santisa yo.

12 “Ebuna nata Aroni ti bana na yandi ya babakala pene-pene ya munoko ya tenta ya lukutakanu, mpi yobisa bo masa.+ 13 Nge ta lwatisa Aroni bilele+ ya santu, ta tula yandi mafuta,+ mpi ta santisa yandi, ebuna yandi ta vanda nganga-nzambi na mono. 14 Na nima, nata bana na yandi ya babakala pene-pene, mpi lwatisa bo bamvwela.+ 15 Nge ta tula bo mafuta, kaka mutindu nge tulaka tata+ na bo mafuta, mpidina bo ta vanda banganga-nzambi na mono, mpi kutulama mafuta na bo ta vanda ntangu yonso sambu na bo bonso kinganga-nzambi ya mvula na mvula na bandonga na bo ya bantu.”+

16 Moize salaka mambu yonso kaka mutindu Yehowa songaka yandi.+ Yandi salaka kaka mutindu yina.

17 Na ngonda ya ntete, na mvula ya zole, na kilumbu ya ntete ya ngonda, bo tedimisaka+ nzo-tenta. 18 Ntangu Moize tedimisaka nzo-tenta, yandi tululaka mabulu+ na yo, yandi tedimisaka makunzi,+ kotisaka banti+ na yo, mpi tedimisaka makunzi na yo ya nene. 19 Yandi tandaka bilele ya tenta+ na zulu ya nzo-tenta mpi tulaka lele ya kufika+ tenta na zulu na yo, kaka mutindu Yehowa songaka Moize.

20 Na nima, yandi bakaka Kimbangi,+ tulaka yo na kati ya Sanduku,+ kotisaka banti+ na mitaku ya Sanduku, mpi tulaka mufiniku+ na zulu ya Sanduku.+ 21 Yandi kotisaka Sanduku na kati ya nzo-tenta mpi tulaka rido+ na kisika na yo mpi bumbaka sanduku ya Kimbangi,+ kaka mutindu Yehowa songaka Moize.

22 Na nima, yandi tulaka mesa+ na kati ya tenta ya lukutakanu na ndambu ya nordi ya nzo-tenta na nganda ya rido, 23 mpi yandi yidikaka ndonga ya mampa+ na zulu na yo na ntwala ya Yehowa, kaka mutindu Yehowa songaka Moize.

24 Ebuna yandi tulaka kima ya kutudila minda+ na kati ya tenta ya lukutakanu na ntwala ya mesa, na ndambu ya sudi ya nzo-tenta. 25 Yandi pedisaka minda+ na ntwala ya Yehowa, kaka mutindu Yehowa songaka Moize.

26 Na nima, yandi tulaka mesa-kimenga+ ya wolo na kati ya tenta ya lukutakanu na ntwala ya rido, 27 sambu na kuyoka ndumbu+ ya nsudi ya kitoko na zulu na yo sambu yo basisa midinga,+ kaka mutindu Yehowa songaka Moize.

28 Ebuna yandi tulaka rido+ sambu na munoko ya nzo-tenta na kisika na yo.

29 Yandi tulaka mesa-kimenga ya dikabu ya kuyoka+ na munoko ya nzo-tenta, tenta ya lukutakanu, sambu yandi pesa dikabu ya kuyoka+ mpi dikabu ya mbuma na zulu na yo, kaka mutindu Yehowa songaka Moize.

30 Ebuna, yandi tulaka dilonga ya nene na kati-kati ya tenta ya lukutakanu ti mesa-kimenga, mpi yandi tulaka masa ya kuyobila+ na kati na yo. 31 Moize, mpi Aroni ti bana na yandi yobisaka maboko na bo ti makulu na bo na dilonga yina. 32 Konso ntangu ya bo vandaka kukota na tenta ya lukutakanu to kupusana pene-pene ya mesa-kimenga, bo vandaka kuyobila,+ kaka mutindu Yehowa songaka Moize.

33 Nsuka-nsuka, yandi salaka kibansala+ na nziunga ya nzo-tenta ti ya mesa-kimenga, mpi tulaka rido sambu na munoko ya kibansala.+

Na mutindu yina Moize manisaka kisalu. 34 Ebuna dituti yantikaka kufika tenta ya lukutakanu, mpi nkembo ya Yehowa fulukaka na nzo-tenta.+ 35 Moize vandaka ve na mpila ya kukota na tenta ya lukutakanu sambu dituti bikalaka na zulu na yo, mpi nkembo ya Yehowa fulukaka na nzo-tenta.+

36 Kana dituti kukatuka na zulu ya nzo-tenta mpi kutombuka, bantu ya Izraele vandaka kukatula camp na bitini yonso ya nzietelo na bo.+ 37 Kansi, kana dituti kutombuka ve, bo vandaka kukatula ve camp tii na kilumbu yina yo ta tombuka.+ 38 Dituti ya Yehowa vandaka na zulu ya nzo-tenta na mwini, mpi tiya vandaka kubikala na zulu na yo na mpimpa na meso ya nzo ya Izraele ya mvimba na bitini yonso ya nzietelo na bo.+