LEVI

1 Yehowa bingaka Moize mpi tubilaka yandi na tenta ya lukutakanu+ nde: 2 “Tubila bantu ya Izraele* mpi songa bo nde, ‘Kana muntu mosi na kati na beno ke zola kupesa Yehowa dikabu ya me katuka na bambisi ya bwala, beno fwete pesa dikabu ya me katuka na bangombe to na mameme.+

3 “‘Kana dikabu na yandi kele dikabu ya kuyoka ya me katuka na bangombe, yandi fwete pesa mbisi ya bakala ya kukonda kifu.+ Yandi fwete pesa yo na luzolo na yandi mosi+ na ntwala ya Yehowa na munoko ya tenta ya lukutakanu. 4 Yandi fwete tula diboko na yandi na ntu ya dikabu ya kuyoka, mpi yo ta ndimama sambu na yandi sambu na kufika masumu na yandi.

5 “‘Ebuna bo fwete fwa mwana-ngombe ya bakala na ntwala ya Yehowa, mpi bana ya Aroni, banganga-nzambi,+ ta pesa menga mpi ta mwanga menga na bandambu yonso ya mesa-kimenga,+ yina kele na munoko ya tenta ya lukutakanu. 6 Bo fwete katula mpusu ya dikabu ya kuyoka mpi kuzenga yo bitini-bitini.+ 7 Bana ya Aroni, banganga-nzambi, fwete tula tiya na mesa-kimenga+ mpi kuyidika bankuni na tiya. 8 Bana ya Aroni, banganga-nzambi, ta yidika bitini ya dikabu+ yina ti ntu mpi mafuta* na zulu ya bankuni yina kele na tiya na zulu ya mesa-kimenga. 9 Bo ta yobisa misopo na yo ti makulu na yo na masa, ebuna nganga-nzambi ta yoka bima yina yonso na zulu ya mesa-kimenga sambu yo basisa midinga bonso dikabu ya kuyoka, dikabu yina bo me yoka na tiya, dikabu ya nsudi ya kitoko* sambu na Yehowa.+

10 “‘Kana dikabu na yandi sambu na dikabu ya kuyoka me katuka na mameme,+ na bana-mameme ya babakala to na bankombo, yandi fwete pesa mbisi ya bakala ya kukonda kifu.+ 11 Bo fwete fwa yo na ndambu ya nordi ya mesa-kimenga na ntwala ya Yehowa, mpi bana ya Aroni, banganga-nzambi, ta mwanga menga na yo na bandambu yonso ya mesa-kimenga.+ 12 Yandi ta zenga yo bitini-bitini, ti ntu na yo mpi mafuta na yo,* ebuna nganga-nzambi ta yidika yo na zulu ya bankuni yina kele na tiya na zulu ya mesa-kimenga. 13 Yandi ta yobisa misopo ti makulu na yo na masa, ebuna nganga-nzambi ta pesa yo yonso mpi ta yoka yo na zulu ya mesa-kimenga sambu yo basisa midinga. Yo kele dikabu ya kuyoka, dikabu yina bo me yoka na tiya, dikabu ya nsudi ya kitoko* sambu na Yehowa.

14 “‘Kansi, kana yandi ke pesa Yehowa bandeke bonso dikabu ya kuyoka, yandi ta pesa dikabu na yandi ya me katuka na mayembe to na bana-bapizio.+ 15 Nganga-nzambi ta pesa yo na mesa-kimenga, yandi ta buka nkingu na yo mpi ta yoka yo na zulu ya mesa-kimenga sambu yo basisa midinga, kansi yandi fwete bika nde menga na yo kutiamuka na lweka ya mesa-kimenga. 16 Yandi fwete katula dikundu na yo ti mansala na yo mpi kulosa yo pene-pene ya mesa-kimenga, na esti, na kisika ya bo ke losaka putulu ya tiya.*+ 17 Yandi ta pasula yo na mapapu na yo kukonda kuzenga yo na bitini zole. Na nima, nganga-nzambi ta yoka yo na zulu ya mesa-kimenga sambu yo basisa midinga na zulu ya bankuni yina kele na tiya. Yo kele dikabu ya kuyoka, dikabu yina bo me yoka na tiya, dikabu ya nsudi ya kitoko* sambu na Yehowa.

2 “‘Kansi kana muntu* ke pesa Yehowa dikabu ya mbuma,+ dikabu na yandi fwete vanda fufu ya kitoko, mpi yandi fwete losila yo mafuta mpi kutula ndumbu ya mpembe na zulu na yo.+ 2 Na nima yandi ta nata yo na bana ya Aroni, banganga-nzambi, ebuna nganga-nzambi ta baka ndambu ya fufu ya kitoko na diboko mpi mafuta ti ndumbu na yo yonso ya mpembe, mpi yandi ta yoka yo na zulu ya mesa-kimenga sambu yo basisa midinga bonso dikabu ya kifwani,*+ bonso dikabu yina bo me yoka na tiya, dikabu ya nsudi ya kitoko* sambu na Yehowa. 3 Bima yonso yina ta bikala na dikabu ya mbuma ta vanda ya Aroni ti bana na yandi,+ bonso kima ya kuluta santu+ ya me katuka na makabu ya Yehowa yina bo me yoka na tiya.

4 “‘Kana nge ke pesa dikabu ya mbuma yina bo me yoka na fulu, yo fwete vanda fufu ya kitoko, mampa ya kukonda levire ya bo me sala bonso lupetu, mpi yina bo me vukisa ti mafuta to bagaleti ya kukonda levire ya bo me pakula mafuta.+

5 “‘Kana dikabu na nge kele dikabu ya mbuma ya bo me yoka na kikalungu,+ yo fwete vanda fufu ya kitoko, ya kukonda levire mpi ya bo me vukisa ti mafuta. 6 Bo fwete zenga yo bitini-bitini, mpi nge fwete losila yo mafuta.+ Yo kele dikabu ya mbuma.

7 “‘Kana dikabu na nge kele dikabu ya mbuma ya bo me kalanga na panu, yo fwete salama na fufu ya kitoko ti mafuta. 8 Nge fwete natila Yehowa dikabu ya mbuma yina salamaka na bima yai, mpi bo fwete pesa yo na nganga-nzambi, yina ta nata yo pene-pene ya mesa-kimenga. 9 Mpi nganga-nzambi ta katula ndambu ya dikabu ya mbuma bonso dikabu ya kifwani*+ mpi ta yoka yo na zulu ya mesa-kimenga sambu yo basisa midinga, bonso dikabu yina bo me yoka na tiya, dikabu ya nsudi ya kitoko* sambu na Yehowa.+ 10 Yina ta bikala na dikabu ya mbuma ta vanda ya Aroni ti bana na yandi, bonso kima ya kuluta santu ya makabu ya Yehowa yina bo me yoka na tiya.+

11 “‘Ata dikabu mosi ve ya mbuma yina beno ke pesa Yehowa fwete vanda ti levire,+ sambu beno fwete sala ve nde pate ya ngani to bwiki kubasisa midinga bonso dikabu ya kuyoka na tiya yina beno ke pesa na Yehowa.

12 “‘Beno lenda pesa yo na Yehowa bonso dikabu ya bambuma ya ntete,+ kansi beno fwete nata yo ve na mesa-kimenga bonso kima ya nsudi ya kitoko.*

13 “‘Konso dikabu ya mbuma ya nge ke pesa, nge fwete tula yo mungwa; mpi nge fwete bika ve nde mungwa ya kuwakana ya Nzambi na nge kukonda na dikabu na nge ya mbuma. Nge ta pesa mungwa+ kumosi ti makabu na nge yonso.

14 “‘Kana nge ke pesa Yehowa dikabu ya mbuma ya bambuma ya ntete ya kuyela, nge fwete pesa mbuma ya mpa* ya kuyoka na tiya, mbuma ya mpa ya bo me tuta, bonso dikabu ya mbuma ya bambuma na nge ya ntete ya kuyela.+ 15 Nge fwete tula mafuta na zulu na yo mpi kutula ndumbu ya mpembe na zulu na yo. Yo kele dikabu ya mbuma. 16 Nganga-nzambi ta yoka sambu yo basisa midinga bonso dikabu ya kifwani,*+ disongidila, ndambu ya bambuma ya bo me tuta mpi mafuta, kumosi ti ndumbu na yo yonso ya mpembe, bonso dikabu yina bo me yoka na tiya sambu na Yehowa.

3 “‘Kana dikabu na yandi kele kimenga ya kinduku,*+ mpi kana dikabu ya yandi ke pesa me katuka na bangombe, yo vanda ya bakala to ya nkento, yandi fwete pesa mbisi ya kukonda kifu na ntwala ya Yehowa. 2 Yandi fwete tula diboko na yandi na zulu ya ntu ya dikabu na yandi, mpi bo fwete fwa yo na munoko ya tenta ya lukutakanu; mpi bana ya Aroni, banganga-nzambi, ta mwanga menga na bandambu yonso ya mesa-kimenga. 3 Yandi ta pesa ndambu ya kimenga ya kinduku bonso dikabu yina bo me yoka na tiya sambu na Yehowa:+ mafuta+ yina ke fikaka misopo, mafuta yonso yina kele na nziunga ya misopo, 4 mpi bapiku zole ti mafuta ya kele na zulu na yo yina kele pene-pene ya musuni ya mukongo. Yandi ta katula mpi mafuta ya dizafu* kumosi ti bapiku.+ 5 Bana ya Aroni ta yoka yo na zulu ya mesa-kimenga sambu yo basisa midinga na zulu ya dikabu ya kuyoka yina bo me tula na zulu ya bankuni ya kele na tiya;+ yo kele dikabu yina bo me yoka na tiya, dikabu ya nsudi ya kitoko* sambu na Yehowa.+

6 “‘Kana dikabu na yandi me katuka na mameme sambu na kimenga ya kinduku ya kupesa na Yehowa, yandi ta pesa mbisi ya bakala to ya nkento ya kukonda kifu.+ 7 Kana yandi ke pesa mwana-dimeme ya bakala bonso dikabu na yandi, yandi ta pesa yo na ntwala ya Yehowa. 8 Yandi ta tula diboko na yandi na zulu ya ntu ya dikabu na yandi, mpi bo ta fwa yo na ntwala ya tenta ya lukutakanu. Bana ya Aroni ta mwanga menga na yo na bandambu yonso ya mesa-kimenga. 9 Yandi ta pesa mafuta ya kimenga ya kinduku bonso dikabu yina bo me yoka na tiya sambu na Yehowa.+ Yandi ta katula mukila ya mvimba ya mafuta yina kele pene-pene ya mukongo, mafuta yina ke fikaka misopo, mafuta yonso yina kele na nziunga ya misopo, 10 mpi bapiku zole ti mafuta ya kele na zulu na yo, yina kele pene-pene ya musuni ya mukongo. Yandi ta katula mpi mafuta ya dizafu* kumosi ti bapiku.+ 11 Nganga-nzambi ta yoka yo na zulu ya mesa-kimenga sambu yo basisa midinga bonso madia,* dikabu yina bo me yoka na tiya sambu na Yehowa.+

12 “‘Kana dikabu na yandi kele nkombo, yandi ta pesa yo na ntwala ya Yehowa. 13 Yandi ta tula diboko na yandi na zulu ya ntu na yo, mpi bo ta fwa yo na ntwala ya tenta ya lukutakanu, mpi bana ya Aroni fwete mwanga menga na yo na bandambu yonso ya mesa-kimenga. 14 Ndambu yina yandi ta pesa bonso dikabu na yandi yina bo me yoka na tiya sambu na Yehowa kele mafuta yina ke fikaka misopo, mafuta yonso yina kele na nziunga ya misopo,+ 15 mpi bapiku zole ti mafuta ya kele na zulu na yo, yina kele pene-pene ya musuni ya mukongo. Yandi ta katula mpi mafuta ya dizafu* kumosi ti bapiku. 16 Nganga-nzambi ta yoka yo na zulu ya mesa-kimenga sambu yo basisa midinga bonso madia,* dikabu yina bo me yoka na tiya sambu yo pesa nsudi ya kitoko.* Mafuta yina yonso kele ya Yehowa.+

17 “‘Yo kele nsiku ya mvula na mvula sambu na bandonga na beno ya bantu, na bisika na beno yonso ya kuzinga: Beno fwete dia ve ata fioti mafuta to menga.’”+

4 Yehowa tubilaka diaka Moize nde: 2 “Songa bantu ya Izraele nde, ‘Kana muntu* mosi kusala disumu kukonda kukana+ sambu yandi me sala diambu mosi na kati ya mambu yina Yehowa tubaka nde yo fwete salama ve:

3 “‘Kana nganga-nzambi+ yina bo me tulaka mafuta kusala disumu+ mpi kunatila bantu makambu, yandi fwete pesa Yehowa mwana-ngombe ya bakala ya kukonda kifu bonso dikabu sambu na disumu sambu na disumu yina yandi salaka.+ 4 Yandi ta nata ngombe yina ya bakala na munoko ya tenta ya lukutakanu+ na ntwala ya Yehowa mpi ta tula diboko na yandi na zulu ya ntu ya ngombe yina, mpi yandi ta fwa ngombe yina na ntwala ya Yehowa.+ 5 Ebuna nganga-nzambi+ yina bo me tulaka mafuta ta baka ndambu ya menga ya ngombe yina ya bakala mpi ta nata yo na tenta ya lukutakanu; 6 mpi nganga-nzambi ta kotisa musapi na yandi na menga+ yina mpi ta mwanga ndambu ya menga yina mbala nsambwadi+ na ntwala ya Yehowa na ntwala ya rido ya kisika ya santu. 7 Nganga-nzambi ta tula mpi ndambu ya menga yina na zulu ya bibongo ya mesa-kimenga ya ndumbu ya nsudi ya kitoko,+ yina kele na ntwala ya Yehowa na tenta ya lukutakanu; mpi menga yonso ya ngombe ya bakala yina me bikala, yandi ta losa yo na nsi ya mesa-kimenga ya dikabu ya kuyoka,+ yina kele na munoko ya tenta ya lukutakanu.

8 “‘Ebuna yandi ta katula mafuta yonso ya ngombe yina ya dikabu sambu na disumu, kumosi ti mafuta yina ke fikaka misopo ti mafuta yina kele na nziunga ya misopo, 9 mpi bapiku zole ti mafuta ya kele na zulu na yo, yina kele pene-pene ya musuni ya mukongo. Mpi yandi ta katula mafuta ya dizafu* kumosi ti bapiku.+ 10 Yo ta vanda kiteso mosi ti yina bo katulaka na ngombe ya bakala ya kimenga ya kinduku.+ Ebuna nganga-nzambi ta yoka yo na zulu ya mesa-kimenga ya dikabu ya kuyoka sambu yo basisa midinga.

11 “‘Kansi mpusu ya ngombe yina ya bakala mpi nsuni na yo kumosi ti ntu na yo, makulu na yo, misopo na yo, mpi tufi+ na yo⁠— 12 bima yonso ya ngombe ya bakala yina me bikala—yandi ta lomba nde bo nata yo na bandilu ya camp na kisika ya bunkete, kisika yina bo ke losaka putulu ya tiya,* mpi yandi ta yoka yo na zulu ya bankuni tii yo zika.+ Bo fwete yoka yo kisika yina bo ke losaka putulu ya tiya tii yo zika.

13 “‘Ebuna kana kimvuka ya mvimba ya bantu ya Izraele me sala mbi mpi me sala disumu kukonda kukana,+ kansi dibundu zabaka ve nde bo salaka diambu yina Yehowa songaka bo na kusala ve,+ 14 ebuna disumu yina me zabana, dibundu fwete pesa mwana-ngombe ya bakala sambu na dikabu sambu na disumu mpi kunata yo na ntwala ya tenta ya lukutakanu. 15 Bankuluntu ya bantu ya Izraele ta tula maboko na bo na zulu ya ntu ya ngombe yina ya bakala na ntwala ya Yehowa, mpi bo ta fwa ngombe yina na ntwala ya Yehowa.

16 “‘Ebuna nganga-nzambi yina bo me tulaka mafuta ta nata ndambu ya menga ya ngombe yina ya bakala na tenta ya lukutakanu. 17 Nganga-nzambi fwete kotisa musapi na yandi na menga mpi kumwanga ndambu na yo mbala nsambwadi na ntwala ya Yehowa na ntwala ya rido.+ 18 Na nima yandi ta tula ndambu ya menga yina na zulu ya bibongo ya mesa-kimenga+ yina kele na ntwala ya Yehowa, yina kele na tenta ya lukutakanu; mpi yandi ta losa menga yonso yina me bikala na nsi ya mesa-kimenga ya dikabu ya kuyoka, yina kele na munoko ya tenta ya lukutakanu.+ 19 Yandi ta katula mafuta na yo yonso mpi ta yoka yo na zulu ya mesa-kimenga sambu yo basisa midinga.+ 20 Yandi fwete sala na ngombe yina ya bakala kaka mutindu yandi salaka na ngombe yina ya nkaka ya dikabu sambu na disumu. Yai mutindu yandi ta sala yo, mpi nganga-nzambi ta fika masumu na bo,+ mpi bo ta lolula bo. 21 Yandi ta lomba nde bo nata ngombe yina ya bakala na bandilu ya camp mpi yandi ta yoka yo tii yo zika, kaka mutindu yandi yokaka ngombe ya ntete.+ Yo kele dikabu sambu na disumu sambu na dibundu.+

22 “‘Kana mfumu+ mosi kusala disumu kukonda kukana sambu yandi me sala diambu mosi na kati ya mambu yonso yina Yehowa Nzambi na yandi tubaka nde yo fwete salama ve, ebuna yandi sala mbi, 23 to kana yandi me zaba disumu mosi yina yandi salaka na mutindu yandi fwaka nsiku, yandi fwete nata mwana-nkombo ya bakala ya kukonda kifu bonso dikabu na yandi. 24 Yandi ta tula diboko na yandi na zulu ya ntu ya mwana-nkombo yina mpi ta fwa yo na kisika yina bo ke fwaka dikabu ya kuyoka na ntwala ya Yehowa.+ Yo kele dikabu sambu na disumu. 25 Nganga-nzambi fwete baka ndambu ya menga ya dikabu sambu na disumu na musapi na yandi mpi kutula yo na zulu ya bibongo+ ya mesa-kimenga ya dikabu ya kuyoka, mpi yandi ta losa menga na yo yina me bikala na nsi ya mesa-kimenga ya dikabu ya kuyoka.+ 26 Yandi ta yoka mafuta na yo yonso na zulu ya mesa-kimenga sambu yo basisa midinga bonso mafuta ya kimenga ya kinduku;+ mpi nganga-nzambi ta fika masumu na yandi, ebuna bo ta lolula yandi.

27 “‘Kana konso muntu* yina na kati ya bantu ya insi kusala disumu kukonda kukana mpi kusala mbi sambu yandi me sala diambu mosi na kati ya mambu yina Yehowa tubaka nde yo fwete salama ve,+ 28 to kana yandi me zaba disumu mosi yina yandi salaka, yandi fwete nata mwana-nkombo ya nkento ya kukonda kifu bonso dikabu na yandi sambu na disumu yina yandi salaka. 29 Yandi ta tula diboko na yandi na zulu ya ntu ya dikabu sambu na disumu mpi yandi ta fwa dikabu sambu na disumu na kisika yina bo ke fwaka dikabu ya kuyoka.+ 30 Nganga-nzambi ta baka ndambu ya menga na yo na musapi na yandi mpi ta tula yo na zulu ya bibongo ya mesa-kimenga ya dikabu ya kuyoka, mpi yandi ta losa menga na yo yonso yina me bikala na nsi ya mesa-kimenga.+ 31 Yandi ta katula mafuta+ na yo yonso, kaka mutindu yandi katulaka mafuta ya kimenga ya kinduku,+ ebuna nganga-nzambi ta yoka yo na zulu ya mesa-kimenga sambu yo basisa midinga bonso kima ya nsudi ya kitoko* sambu na Yehowa; mpi nganga-nzambi ta fika masumu na yandi, ebuna bo ta lolula yandi.

32 “‘Kansi kana yandi pesa mwana-dimeme bonso dikabu sambu na disumu, yandi fwete nata mwana-dimeme ya nkento ya kukonda kifu. 33 Yandi ta tula diboko na yandi na zulu ya ntu ya dikabu sambu na disumu mpi ta fwa yo bonso dikabu sambu na disumu na kisika yina bo ke fwaka+ dikabu ya kuyoka. 34 Nganga-nzambi ta baka ndambu ya menga ya dikabu sambu na disumu na musapi na yandi mpi ta tula yo na zulu ya bibongo ya mesa-kimenga ya dikabu ya kuyoka,+ mpi yandi ta losa menga na yo yonso yina me bikala na nsi ya mesa-kimenga. 35 Yandi ta katula mafuta na yo yonso mutindu yandi katulaka mafuta ya mwana-dimeme ya bakala ya kimenga ya kinduku, mpi nganga-nzambi ta yoka yo na zulu ya mesa-kimenga sambu yo basisa midinga na zulu ya makabu ya Yehowa ya bo me yoka na tiya;+ mpi nganga-nzambi ta fika masumu na yandi yina yandi salaka, ebuna bo ta lolula yandi.+

5 “‘Kana muntu* mosi me sala disumu, sambu yandi me wa bo ke binga na ndinga ya ngolo na meso ya bantu yonso na kukwisa kuta kimbangi*+ mpi yandi kele mbangi ya diambu yina to yandi me mona yo to me zaba yo, kansi yandi me zabisa yo ve, yandi ta vutula munoko sambu na kifu na yandi.

2 “‘To kana muntu* mosi me simba kima ya mvindu, yo vanda mvumbi ya mbisi ya mfinda ya mvindu, mvumbi ya mbisi ya bwala ya mvindu, to mvumbi ya kigangwa ya mvindu ya ke tambulaka na kimvuka+ na ntoto, yandi kele mvindu mpi yandi me sala mbi ata yandi me zaba yo ve. 3 To kana muntu me simba mvindu+ ya muntu mosi kukonda kuzaba—konso kima ya mvindu yina lenda kumisa yandi mvindu⁠—mpi na nima yandi me zaba yo, yandi me sala mbi.

4 “‘To kana muntu* mosi me dia ndefi kukonda kuyindula sambu na kusala diambu mosi—yo vanda sambu na kusala diambu ya mbote to sambu na kusala diambu ya mbi, ata yo kele konso kima yina—mpi yandi zabaka yo ve, kansi na nima yandi me bakisa nde yandi diaka ndefi kukonda kuyindula, yandi me sala mbi.*+

5 “‘Kana yandi me sala mbi na yina me tala diambu mosi na kati ya mambu yai, yandi fwete funguna+ nki mutindu yandi salaka disumu. 6 Yandi ta natila mpi Yehowa dikabu na yandi sambu na makambu sambu na disumu yina yandi salaka,+ disongidila, mbisi ya nkento ya me katuka na mameme to bankombo, dimeme ya nkento to mwana-nkombo ya nkento, sambu na dikabu sambu na disumu. Ebuna nganga-nzambi ta fika masumu na yandi.

7 “‘Kansi, kana yandi lenda pesa ve dimeme, yandi fwete natila Yehowa mayembe zole to bana-bapizio+ zole bonso dikabu na yandi sambu na makambu sambu na disumu, mosi sambu na dikabu sambu na disumu mpi ya nkaka sambu na dikabu ya kuyoka.+ 8 Yandi fwete nata yo na nganga-nzambi, mpi nganga-nzambi ta pesa ntete mosi sambu na dikabu sambu na disumu mpi ta zenga yo ntu, na nkingu na yo, kukonda kuzenga yo ya mvimba. 9 Yandi ta mwanga ndambu ya menga ya dikabu sambu na disumu na lweka ya mesa-kimenga, kansi menga yina me bikala yandi ta losa yo na nsi ya mesa-kimenga.+ Yo kele dikabu sambu na disumu. 10 Yandi fwete pesa yina ya nkaka bonso dikabu ya kuyoka na kutadila mutindu bo ke salaka mbala na mbala;+ mpi nganga-nzambi ta fika disumu yina yandi salaka, ebuna bo ta lolula yandi.+

11 “‘Ntangu yai, kana yandi lenda pesa ve mayembe zole to bana-bapizio zole, yandi fwete nata bonso dikabu na yandi sambu na disumu na yandi ndambu mosi na kati ya bandambu kumi ya efa*+ ya fufu sambu na dikabu sambu na disumu. Yandi fwete yika ve mafuta na kati na yo to kutula ndumbu ya mpembe na zulu na yo, sambu yo kele dikabu sambu na disumu. 12 Yandi ta nata yo na nganga-nzambi, ebuna nganga-nzambi ta baka ndambu ya fufu yina na diboko bonso dikabu ya kifwani* mpi ta yoka yo na zulu ya mesa-kimenga sambu yo basisa midinga na zulu ya makabu ya Yehowa yina bo me yoka na tiya. Yo kele dikabu sambu na disumu. 13 Nganga-nzambi ta fika disumu yina yandi salaka, konso disumu na kati ya masumu yai, ebuna bo ta lolula yandi.+ Yina ta bikala ta kuma ya nganga-nzambi,+ kaka bonso dikabu ya mbuma.’”+

14 Yehowa landaka kutubila Moize nde: 15 “Kana muntu* mosi me sala mambu kukonda kwikama sambu yandi me sala disumu kukonda kukana na bima ya santu ya Yehowa,+ yandi fwete natila Yehowa dimeme ya bakala ya kukonda kifu ya me katuka na kimvuka ya mameme bonso dikabu sambu na makambu;+ bo me tulaka ntalu na yo na shekele* ya arza na kutadila shekele ya kisika ya santu.*+ 16 Yandi ta futa sambu na disumu yina yandi sadilaka kisika ya santu; yandi ta yika mpi ndambu mosi na kati ya bandambu tanu ya ntalu na yo.+ Yandi ta pesa yo na nganga-nzambi, ebuna nganga-nzambi lenda fika+ masumu na yandi ti dimeme ya bakala ya dikabu sambu na makambu, ebuna bo ta lolula yandi.+

17 “Kana muntu* mosi me sala disumu mpi me sala diambu mosi na kati ya mambu yina Yehowa tubaka nde yo fwete salama ve, ata yandi me zaba yo ve, yandi me sala kaka mbi mpi yandi ta vutula munoko sambu na kifu na yandi.+ 18 Yandi fwete nata na nganga-nzambi dimeme ya bakala ya kukonda kifu ya me katuka na kimvuka ya mameme na kutadila ntalu yina bo me zengaka, sambu na dikabu sambu na makambu.+ Ebuna nganga-nzambi ta fika masumu sambu na yandi sambu na kifu ya kukonda kukana yina yandi salaka kukonda kuzaba, ebuna bo ta lolula yandi. 19 Yo kele dikabu sambu na makambu. Yandi me sala kibeni mbi sambu yandi me sala disumu na ntwala ya Yehowa.”

6 Yehowa tubilaka diaka Moize nde: 2 “Kana muntu* mosi me sala disumu mpi me sala mambu kukonda kwikama na ntwala ya Yehowa+ mpi me kusa nkweno na yandi na yina me tala kima mosi ya bo pesaka yandi,+ to kima mosi ya bo bumbisaka na yandi, to yandi me yiba, to me kusa nkweno na yandi, 3 to yandi me mona kima mosi yina vilaka mpi yandi me kusa sambu na yo, mpi kana yandi me dia ndefi ya luvunu sambu na konso disumu ya mutindu yai yina yandi lenda sala,+ yandi fwete sala mambu yai: 4 Kana yandi me sala disumu mpi me sala mbi, yandi fwete vutula kima yina yandi yibaka, kima yina yandi botulaka, kima yina yandi bakaka na luvunu, kima yina bo pesaka yandi, to kima yina vilaka yina yandi monaka, 5 to konso kima yina yandi zengaka kieleka ya luvunu sambu na yo, mpi yandi fwete futa yo yonso,+ mpi yandi ta yika ndambu mosi na kati ya bandambu tanu ya ntalu na yo. Yandi ta pesa yo na munkwa na yo na kilumbu yina bo ta monisa nde yandi me nata makambu. 6 Mpi yandi ta nata na nganga-nzambi dikabu na yandi sambu na makambu na Yehowa dimeme ya bakala ya kukonda kifu ya me katuka na kimvuka ya mameme na kutadila ntalu yina bo me zengaka, sambu na dikabu sambu na makambu.+ 7 Nganga-nzambi ta fika masumu na yandi na ntwala ya Yehowa, mpi bo ta lolula yandi sambu na konso kima yina yandi salaka mpi yina natilaka yandi makambu.”+

8 Yehowa landaka kutubila Moize nde: 9 “Songa Aroni ti bana na yandi nde, ‘Yai nsiku ya dikabu ya kuyoka:+ Dikabu ya kuyoka ta bikala na kisika tiya ke pelaka na zulu ya mesa-kimenga mpimpa ya mvimba tii na suka, mpi tiya ta landa kupela na zulu ya mesa-kimenga. 10 Nganga-nzambi ta lwata lele na yandi ya kisalu ya lino,+ mpi yandi ta lwata bakupe*+ ya lino. Ebuna yandi ta katula putulu ya tiya*+ ya dikabu ya kuyoka yina tiya yokaka na zulu ya mesa-kimenga mpi yandi ta tula yo na lweka ya mesa-kimenga. 11 Na nima, yandi ta katula bilele+ na yandi mpi ta lwata bilele ya nkaka, ebuna yandi ta nata putulu yina ya tiya na kisika ya bunkete na nganda ya camp.+ 12 Tiya ta landa kupela na zulu ya mesa-kimenga. Yo fwete fwa ve. Nganga-nzambi fwete yoka bankuni+ na zulu na yo konso suka, kuyidika dikabu ya kuyoka na zulu na yo, mpi yandi ta yoka mafuta ya bimenga ya kinduku na zulu na yo sambu yo basisa midinga.+ 13 Tiya fwete landa kupela ntangu yonso na zulu ya mesa-kimenga. Yo fwete fwa ve.

14 “‘Yai nsiku ya dikabu ya mbuma:+ Beno bana ya Aroni, beno fwete pesa yo na ntwala ya Yehowa na ntwala ya mesa-kimenga. 15 Muntu mosi na kati na bo ta baka ndambu ya fufu ya dikabu ya mbuma na diboko mpi ndambu ya mafuta na yo mpi ndumbu yonso ya mpembe yina kele na zulu ya dikabu ya mbuma, mpi yandi ta yoka yo na zulu ya mesa-kimenga sambu yo basisa midinga bonso kima ya nsudi ya kitoko* sambu na dikabu ya kifwani* sambu na Yehowa.+ 16 Aroni mpi bana na yandi ta dia bitini na yo yina ta bikala.+ Bo ta dia yo bonso mampa ya kukonda levire na kisika mosi ya santu. Bo ta dia yo na kibansala ya tenta ya lukutakanu.+ 17 Bo fwete yoka yo ve ti konso kima yina kele ti levire.+ Mono me pesa yo sambu yo vanda dikabu na bo na makabu na mono yina bo me yoka na tiya.+ Yo kele kima ya kuluta santu,+ bonso dikabu sambu na disumu mpi bonso dikabu sambu na makambu. 18 Konso bakala na kati ya bana ya Aroni ta dia yo.+ Yo kele dikabu na bo ya kimakulu na bandonga na beno yonso ya bantu ya me katuka na makabu ya Yehowa yina bo me yoka na tiya.+ Konso kima yina ta simba yo* ta kuma santu.’”

19 Yehowa tubilaka diaka Moize nde: 20 “Yai dikabu yina Aroni mpi bana na yandi ta pesa Yehowa na kilumbu yina bo ta tula yandi mafuta:+ ndambu mosi na kati ya bandambu kumi ya efa*+ ya fufu ya kitoko bonso dikabu ya mbuma+ ya bo fwete pesa mbala na mbala, kati-kati na yo na suka mpi kati-kati na yo na nkokila. 21 Bo ta sala yo ti mafuta na kikalungu.+ Nge ta nata yo ya kuvukisa mbote ti mafuta mpi nge ta pesa yo bitini-bitini bonso kima ya bo me yoka ya dikabu ya mbuma, bonso kima ya nsudi ya kitoko* sambu na Yehowa. 22 Nganga-nzambi ya bo me tulaka mafuta yina ta yinga yandi na kati ya bana na yandi+ muntu ta sala yo. Yo kele nsiku ya mvula na mvula: Bonso dikabu ya mvimba, yandi ta yoka yo sambu yo basisa midinga sambu na Yehowa. 23 Konso dikabu ya mbuma ya nganga-nzambi fwete vanda dikabu ya mvimba. Bo fwete dia yo ve.”

24 Yehowa tubilaka diaka Moize nde: 25 “Songa Aroni mpi bana na yandi nde, ‘Yai nsiku ya dikabu sambu na disumu:+ Na kisika yina bo ke fwaka+ dikabu ya kuyoka, beno ta fwa mpi dikabu sambu na disumu na ntwala ya Yehowa. Yo kele kima ya kuluta santu. 26 Nganga-nzambi yina ke pesa yo sambu na disumu ta dia yo.+ Yandi ta dia yo na kisika mosi ya santu, na kibansala ya tenta ya lukutakanu.+

27 “‘Konso kima yina ta simba nsuni na yo ta kuma ya santu, mpi ntangu muntu mosi ta mwanga ndambu ya menga na yo na lele na yandi, nge fwete yobisa kima yina yandi mwangaka menga na kisika mosi ya santu. 28 Bo fwete pasula nzungu ya ntoto yina bo lambilaka yo. Kansi kana bo lambaka yo na nzungu ya kwivre, bo fwete nika yo mpi kuyobisa yo ti masa.

29 “‘Konso bakala na kati ya banganga-nzambi ta dia yo.+ Yo kele kima ya kuluta santu.+ 30 Kansi, bo fwete dia ve ata dikabu mosi sambu na disumu kana bo me nata ndambu ya menga na yo na tenta ya lukutakanu sambu na kufika masumu na kisika ya santu.+ Bo fwete yoka yo na tiya tii yo zika.

7 “‘Yai nsiku ya dikabu sambu na makambu:+ Yo kele kima ya kuluta santu. 2 Bo ta fwa dikabu sambu na makambu na kisika yina bo ke fwaka makabu ya kuyoka, mpi bo fwete mwanga menga+ na yo na bandambu yonso ya mesa-kimenga.+ 3 Yandi ta pesa mafuta+ na yo yonso, ti mukila ya mafuta, mafuta yina ke fikaka misopo, 4 mpi bapiku zole ti mafuta na yo yina kele pene-pene ya musuni ya mukongo. Yandi ta katula mpi mafuta ya dizafu* kumosi ti bapiku.+ 5 Nganga-nzambi ta yoka yo na zulu ya mesa-kimenga sambu yo basisa midinga bonso dikabu yina bo me yoka na tiya sambu na Yehowa.+ Yo kele dikabu sambu na makambu. 6 Konso bakala na kati ya banganga-nzambi ta dia yo,+ mpi bo fwete dia yo na kisika mosi ya santu. Yo kele kima ya kuluta santu.+ 7 Nsiku ya me tala dikabu sambu na disumu ke tadila mpi dikabu sambu na makambu; yo kele ya nganga-nzambi yina ke sadila yo+ sambu na kufika masumu.

8 “‘Ntangu nganga-nzambi ke pesa dikabu ya kuyoka sambu na muntu, mpusu+ ya dikabu ya kuyoka yina bo pesaka nganga-nzambi ta kuma ya yandi.

9 “‘Konso dikabu ya mbuma yina bo me yoka na fulu to yina bo me yidika na panu to na kikalungu+ kele ya nganga-nzambi yina ke pesa yo. Yo ta kuma ya yandi.+ 10 Kansi, konso dikabu ya mbuma yina bo me vukisa ti mafuta+ to yina kele ya kuyuma,+ ta vanda ya bana yonso ya Aroni; konso muntu ta baka dikabu ya kiteso mosi.

11 “‘Kansi, yai nsiku ya kimenga ya kinduku+ yina muntu lenda pesa Yehowa: 12 Kana yandi ke pesa yo sambu na kupesa matondo,+ yandi ta pesa kumosi ti kimenga ya kupesa matondo, mampa ya kukonda levire yina bo me sala bonso lupetu mpi yina bo me vukisa ti mafuta, bagaleti ya kukonda levire ya bo me pakula mafuta, mpi mampa ya bo me sala bonso lupetu na fufu ya kitoko ya bo me vukisa mbote kibeni ti mafuta. 13 Yandi ta pesa dikabu na yandi kumosi ti mampa ya kukonda levire ya bo me sala bonso lupetu mpi kimenga sambu na kupesa matondo ya bimenga na yandi ya kinduku. 14 Na dikabu yina, yandi ta pesa ndambu mosi ya konso dikabu bonso kitini ya santu sambu na Yehowa; yo ta vanda ya nganga-nzambi yina ke mwanga menga ya bimenga ya kinduku.+ 15 Bo fwete dia musuni ya kimenga sambu na kupesa matondo ya bimenga na yandi ya kinduku kilumbu yina yandi ke pesa yo. Yandi fwete bumba ve ata ndambu na yo mosi tii na suka.+

16 “‘Kana kimenga ya dikabu na yandi kele lusilu+ to dikabu ya luzolo ya mbote,+ bo fwete dia yo kilumbu yina yandi ke pesa kimenga na yandi, mpi na kilumbu yina ke landa bo lenda dia mpi kitini yina me bikala. 17 Kansi konso kitini ya nsuni ya kimenga yina me bikala tii na kilumbu ya tatu, bo fwete yoka yo na tiya.+ 18 Kansi, kana bo dia konso kitini ya musuni ya kimenga na yandi ya kinduku na kilumbu ya tatu, muntu yina ke pesa yo ta ndimama ve. Bo ta tangila yandi yo ve; yo kele kima ya mbi, mpi muntu* yina ke dia ndambu na yo ta vutula munoko sambu na kifu na yandi.+ 19 Bo fwete dia ve musuni yina me simba konso kima ya mvindu. Bo fwete yoka yo na tiya tii yo zika. Konso muntu yina kele bunkete lenda dia musuni ya bunkete.

20 “‘Kansi konso muntu* yina kele mvindu mpi ke dia nsuni ya kimenga ya kinduku, yina kele sambu na Yehowa, bo fwete katula* muntu* yina na kati ya bantu na yandi.+ 21 Kana muntu kusimba konso kima ya mvindu, yo vanda mvindu ya muntu,+ to mbisi ya mvindu,+ to konso kima ya mvindu yina kele nzanzi,+ mpi yandi dia ndambu ya musuni ya kimenga ya kinduku, yina kele sambu na Yehowa, bo fwete katula* muntu* yina na kati ya bantu na yandi.’”

22 Yehowa landaka kutubila Moize nde: 23 “Songa bantu ya Izraele nde, ‘Beno fwete dia ve konso mafuta+ ya ngombe ya bakala to ya mwana-dimeme ya bakala to ya nkombo. 24 Mafuta ya mbisi yina bo me mona ya kufwa mpi mafuta ya mbisi yina mbisi ya nkaka me fwa, beno lenda sadila yo sambu na lukanu ya nkaka, kansi beno fwete dia yo ve ata fioti.+ 25 Sambu konso muntu yina ke dia mafuta ya mbisi yina yandi ke pesa bonso dikabu yina bo me yoka na tiya sambu na Yehowa, bo fwete katula* yandi na kati ya bantu na yandi.

26 “‘Beno fwete dia ve konso menga+ na bisika na beno yonso ya kuzinga, yo vanda ya bandeke to ya bambisi. 27 Konso muntu* yina ke dia konso menga yina, bo fwete katula*+ yandi na kati ya bantu na yandi.’”

28 Yehowa tubilaka diaka Moize nde: 29 “Songa bantu ya Izraele nde, ‘Konso muntu yina ke pesa kimenga na yandi ya kinduku na Yehowa ta natila Yehowa ndambu ya dikabu ya me katuka na kimenga na yandi ya kinduku.+ 30 Yandi ta nata na maboko na yandi mosi mafuta+ kumosi ti ntulu bonso dikabu yina bo me yoka na tiya sambu na Yehowa, mpi yandi ta nikisa yo na ntwala mpi na nima bonso dikabu ya kunikisa+ na ntwala ya Yehowa. 31 Nganga-nzambi ta yoka mafuta na zulu ya mesa-kimenga sambu yo basisa midinga,+ kansi ntulu ta vanda ya Aroni ti bana na yandi.+

32 “‘Na bimenga na beno ya kinduku,+ beno ta pesa nganga-nzambi dikulu ya kitata bonso kitini ya santu. 33 Mwana ya Aroni yina ke pesa menga ya bimenga ya kinduku mpi mafuta ta baka dikulu ya kitata bonso dikabu na yandi.+ 34 Sambu mono ke baka ntulu ya dikabu ya kunikisa mpi dikulu ya kitini ya santu ya bimenga ya kinduku ya bantu ya Izraele, mpi mono ke pesa yo na nganga-nzambi Aroni mpi na bana na yandi bonso nsiku ya mvula na mvula sambu na bantu ya Izraele.+

35 “‘Yai vandaka kitini ya me katuka na makabu ya Yehowa yina bo me yoka na tiya, ya bo fwete tula na lweka sambu na banganga-nzambi, sambu na Aroni mpi bana na yandi, na kilumbu yina yandi monisaka bo sambu bo sadila Yehowa bonso banganga-nzambi.+ 36 Yehowa tubaka nde bo pesa bo kitini yai ya me katuka na bantu ya Izraele kilumbu yina yandi tulaka bo mafuta.+ Yo kele nsiku ya ntangu yonso sambu na bandonga na bo ya bantu.’”

37 Yai nsiku ya ke tadila dikabu ya kuyoka,+ dikabu ya mbuma,+ dikabu sambu na disumu,+ dikabu sambu na makambu,+ kimenga sambu na kutula na kisalu ya kinganga-nzambi,+ mpi kimenga ya kinduku,+ 38 kaka mutindu Yehowa songaka Moize na Ngumba ya Sinai+ kilumbu yina yandi songaka bantu ya Izraele na kupesa Yehowa makabu na ntoto-makanga ya Sinai.+

8 Yehowa landaka kutubila Moize nde: 2 “Baka Aroni ti bana na yandi,+ bilele,+ mafuta ya santu,+ ngombe ya bakala ya dikabu sambu na disumu, mameme zole ya babakala, mpi kitunga ya mampa ya kukonda levire,+ 3 mpi songa kimvuka ya mvimba ya bantu bo vukana na munoko ya tenta ya lukutakanu.”

4 Ebuna Moize salaka kaka mutindu Yehowa songaka yandi, mpi kimvuka ya bantu vukanaka na munoko ya tenta ya lukutakanu. 5 Ntangu yai Moize tubilaka kimvuka yina ya bantu nde: “Yai mambu yina Yehowa me songa beto na kusala.” 6 Ebuna Moize nataka Aroni ti bana na yandi pene-pene mpi yobisaka bo masa.+ 7 Na nima, yandi lwatisaka yandi mvwela,+ lele ya kukanga na luketo,+ kazaka ya kukonda maboko;+ yandi lwatisaka yandi efodi+ mpi kangisaka yandi yo ti mukaba*+ ya efodi, mpi yandi kangisaka yandi yo ngolo. 8 Na nima, yandi tulaka yandi lele ya ntulu+ mpi tulaka Urimi mpi Tumimi+ na kati ya lele yina ya ntulu. 9 Ebuna yandi tulaka tirbani+ na ntu na yandi, mpi yandi tulaka kinzanza ya wolo ya ke sema na ntwala ya tirbani yina, kidimbu ya santu ya kudipesa,*+ kaka mutindu Yehowa songaka Moize.

10 Ebuna Moize bakaka mafuta ya santu mpi yandi tulaka mafuta na nzo-tenta mpi na bima yonso yina vandaka na kati na yo+ mpi santisaka yo. 11 Na nima, yandi mwangaka ndambu ya mafuta yina mbala nsambwadi na mesa-kimenga mpi tulaka mafuta na mesa-kimenga, na bisadilu na yo yonso, na dilonga, mpi na kima ya kutula yo, sambu na kusantisa bima yina. 12 Nsuka-nsuka, yandi tiamunaka ndambu ya mafuta ya santu na ntu ya Aroni mpi tulaka yandi mafuta sambu na kusantisa yandi.+

13 Ebuna Moize nataka bana ya Aroni pene-pene mpi lwatisaka bo bamvwela ti mikaba mpi tulaka* lele ya kukanga na ntu na zulu ya ba-ntu na bo,+ kaka mutindu Yehowa songaka Moize.

14 Na nima, yandi nataka ngombe ya bakala ya dikabu sambu na disumu, ebuna Aroni ti bana na yandi tulaka maboko na bo na zulu ya ntu ya ngombe yina ya dikabu sambu na disumu.+ 15 Moize fwaka yo mpi bakaka menga+ na musapi na yandi mpi tulaka yo na zulu ya bibongo ya mesa-kimenga na bandambu yonso, ebuna yandi kumisaka mesa-kimenga bunkete,* kansi menga yina bikalaka yandi tiamunaka yo na nsi ya mesa-kimenga sambu na kusantisa yo sambu na kufika masumu na zulu na yo. 16 Na nima, yandi bakaka mafuta yonso yina vandaka na misopo, mafuta ya dizafu,* bapiku yonso zole ti mafuta na yo, mpi Moize salaka nde yo basisa midinga na mesa-kimenga.+ 17 Ebuna, bo yokaka na tiya ndambu ya ngombe ya bakala yina bikalaka, mpusu na yo, nsuni na yo, mpi tufi na yo na nganda ya camp,+ kaka mutindu Yehowa songaka Moize.

18 Ntangu yai, yandi nataka dimeme ya bakala ya dikabu ya kuyoka pene-pene, ebuna Aroni ti bana na yandi tulaka maboko na bo na zulu ya ntu ya dimeme yina ya bakala.+ 19 Na nima, Moize fwaka yo mpi mwangaka menga na bandambu yonso ya mesa-kimenga. 20 Yandi zengaka dimeme yina ya bakala bitini-bitini, mpi Moize salaka nde ntu, bitini yina mpi mafuta* kubasisa midinga. 21 Yandi yobisaka misopo mpi makulu na masa, Moize salaka nde dimeme yina ya mvimba kubasisa midinga na mesa-kimenga. Yo vandaka dikabu ya kuyoka bonso kima ya nsudi ya kitoko.* Yo vandaka dikabu yina bo me yoka na tiya sambu na Yehowa, kaka mutindu Yehowa songaka Moize.

22 Ebuna yandi nataka dimeme ya bakala ya zole, dimeme ya bakala sambu na kutula na kisalu ya kinganga-nzambi,+ mpi Aroni ti bana na yandi tulaka maboko na bo na zulu ya ntu ya dimeme yina.+ 23 Moize fwaka yo mpi bakaka ndambu ya menga na yo mpi yandi tulaka yo na nsongi ya dikutu ya kitata ya Aroni mpi na musapi ya nene ya diboko na yandi ya kitata mpi na musapi ya nene ya dikulu na yandi ya kitata. 24 Na nima, Moize basisaka bana ya Aroni na ntwala mpi yandi tulaka ndambu ya menga na nsongi ya makutu na bo ya kitata, na musapi ya nene ya maboko na bo ya kitata, mpi na musapi ya nene ya makulu na bo ya kitata; kansi Moize mwangaka menga yina bikalaka na bandambu yonso ya mesa-kimenga.+

25 Ebuna yandi bakaka mafuta, mukila ya mafuta, mafuta yonso yina vandaka na misopo, mafuta ya dizafu,* bapiku yonso zole ti mafuta na yo, mpi dikulu ya kitata.+ 26 Na kitunga ya mampa ya kukonda levire yina vandaka na ntwala ya Yehowa, yandi bakaka dimpa mosi ya kukonda levire ya bo me sala bonso lupetu,+ dimpa mosi ya bo me sala bonso lupetu mpi ya bo me pakula mafuta,+ mpi galeti mosi. Na nima yandi tulaka yo na bitini ya mafuta mpi ya dikulu ya kitata. 27 Ebuna yandi tulaka yo yonso na bipala-pala ya maboko ya Aroni mpi na bipala-pala ya maboko ya bana na yandi, mpi yandi yantikaka kunikisa yo na ntwala mpi na nima bonso dikabu ya kunikisa na ntwala ya Yehowa. 28 Na nima Moize bakaka yo na maboko na bo mpi yokaka yo na zulu ya mesa-kimenga na zulu ya dikabu ya kuyoka sambu yo basisa midinga. Yo vandaka kimenga sambu na kutula na kisalu ya kinganga-nzambi bonso kima ya nsudi ya kitoko.* Yo vandaka dikabu yina bo me yoka na tiya sambu na Yehowa.

29 Na nima Moize bakaka ntulu mpi nikisaka yo na ntwala mpi na nima bonso dikabu ya kunikisa na ntwala ya Yehowa.+ Na dimeme ya bakala yina bo pesaka sambu na kutula na kisalu ya kinganga-nzambi, ntulu yina kumaka dikabu ya Moize, kaka mutindu Yehowa songaka Moize.+

30 Ebuna Moize bakaka ndambu ya mafuta ya santu+ mpi ndambu ya menga yina vandaka na mesa-kimenga mpi yandi mwangilaka yo Aroni ti bilele na yandi, mpi bana na yandi ti bilele ya bana na yandi yina vandaka ti yandi. Na mutindu yina, yandi santisaka Aroni ti bilele na yandi+ mpi bana na yandi ti bilele+ na bo.

31 Ebuna Moize tubilaka Aroni mpi bana na yandi nde: “Beno tokisa+ musuni na munoko ya tenta ya lukutakanu, mpi beno ta dia yo kuna ti mampa yina kele na kitunga yina bo ke sadilaka sambu na kutula banganga-nzambi na kisalu, mutindu bo songaka mono, ‘Aroni ti bana na yandi ta dia yo.’+ 32 Ndambu ya musuni mpi ya dimpa yina ta bikala, beno ta yoka yo na tiya tii yo zika.+ 33 Beno fwete basika ve na nganda ya munoko ya tenta ya lukutakanu na nsungi ya bilumbu nsambwadi, tii kuna bilumbu ya kutula beno na kisalu ya kinganga-nzambi ta mana, sambu yo ta baka bilumbu nsambwadi sambu na kutula beno na kisalu ya kinganga-nzambi.*+ 34 Yehowa songaka beto na kusala mambu yina beto me sala bubu yai sambu na kufika masumu na beno.+ 35 Beno ta bikala na munoko ya tenta ya lukutakanu mwini ti mpimpa na nsungi ya bilumbu nsambwadi+ mpi beno ta lungisa mambu yina Yehowa ke lomba beno na kusala,+ sambu beno fwa ve; sambu bo me songa mono mutindu yina.”

36 Aroni ti bana na yandi salaka mambu yonso yina Yehowa tubaka na nzila ya Moize.

9 Na kilumbu ya nana,+ Moize bingaka Aroni ti bana na yandi mpi bankuluntu ya Izraele. 2 Yandi tubilaka Aroni nde: “Baka mwana-ngombe mosi sambu na dikabu sambu na disumu+ mpi dimeme ya bakala mosi sambu na dikabu ya kuyoka, bambisi ya kukonda kifu, mpi pesa yo na ntwala ya Yehowa. 3 Kansi nge ta tubila bantu ya Izraele nde, ‘Beno baka nkombo mosi ya bakala sambu na dikabu sambu na disumu mpi mwana-ngombe mosi ti mwana-dimeme mosi ya bakala, konso mbisi fwete vanda ti mvula mosi mpi kukonda kifu, sambu na dikabu ya kuyoka, 4 mpi ngombe mosi ya bakala ti dimeme mosi ya bakala sambu na bimenga ya kinduku,+ sambu na kutambika yo na ntwala ya Yehowa, mpi dikabu ya mbuma+ ya kuvukisa ti mafuta, sambu bubu yai Yehowa ta monana na beno.’”+

5 Yo yina, bo nataka na ntwala ya tenta ya lukutakanu bima yina Moize songaka bo. Na nima, kimvuka ya mvimba ya bantu kwisaka na ntwala mpi telamaka na ntwala ya Yehowa. 6 Ebuna Moize tubaka nde: “Yai mambu yina Yehowa songaka beno na kusala, sambu nkembo ya Yehowa kumonana na beno.”+ 7 Na nima, Moize tubilaka Aroni nde: “Pusana pene-pene ya mesa-kimenga mpi pesa dikabu na nge sambu na disumu+ mpi dikabu na nge ya kuyoka, mpi fika masumu na nge mosi+ mpi ya nzo na nge; na nima pesa dikabu ya bantu,+ mpi fika masumu na bo,+ kaka mutindu Yehowa tubaka.”

8 Na mbala mosi Aroni pusanaka pene-pene ya mesa-kimenga mpi fwaka ngombe ya bakala ya dikabu sambu na disumu, yina vandaka sambu na yandi.+ 9 Na nima, bana ya Aroni pesaka yandi menga,+ mpi yandi kotisaka musapi na yandi na menga mpi tulaka yo na zulu ya bibongo ya mesa-kimenga, mpi yandi tiamunaka menga yina bikalaka na nsi ya mesa-kimenga.+ 10 Yandi salaka nde mafuta, bapiku, mpi mafuta ya dizafu* ya dikabu sambu na disumu kubasisa midinga na mesa-kimenga, kaka mutindu Yehowa songaka Moize.+ 11 Yandi yokaka musuni ti mpusu na tiya na nganda ya camp tii yo zika.+

12 Na nima yandi fwaka dikabu ya kuyoka, ebuna bana ya Aroni pesaka yandi menga, mpi yandi mwangaka yo na bandambu yonso ya mesa-kimenga.+ 13 Bo pesaka yandi bitini ya dikabu ya kuyoka kumosi ti ntu, mpi yandi yokaka yo na zulu ya mesa-kimenga sambu yo basisa midinga. 14 Diaka, yandi yobisaka misopo ti makulu mpi yokaka yo na zulu ya dikabu ya kuyoka na zulu ya mesa-kimenga sambu yo basisa midinga.

15 Na nima, yandi pesaka dikabu ya bantu mpi bakaka nkombo ya dikabu sambu na disumu yina vandaka sambu na bantu, yandi fwaka yo mpi pesaka yo dikabu sambu na disumu mutindu yandi salaka yina ya ntete. 16 Yandi pesaka dikabu ya kuyoka mpi yandi salaka yo kaka mutindu bo ke salaka mbala na mbala.+

17 Na nima, yandi pesaka dikabu ya mbuma,+ yandi bakaka ndambu na yo mpi fulusaka diboko na yandi mpi yokaka yo na zulu ya mesa-kimenga sambu yo basisa midinga, katula dikabu ya kuyoka ya suka.+

18 Ebuna yandi fwaka ngombe ya bakala mpi dimeme ya bakala ya kimenga ya kinduku yina vandaka sambu na bantu. Na nima, bana ya Aroni pesaka yandi menga, mpi yandi mwangaka yo na nziunga ya mesa-kimenga na bandambu na yo yonso.+ 19 Sambu na bitini ya mafuta ya ngombe ya bakala,+ mukila ya mafuta ya dimeme ya bakala, mafuta yina ke fikaka bima ya kati, bapiku, mpi mafuta ya dizafu,*+ 20 bo tulaka bitini yina yonso ya mafuta na bantulu ya bambisi, na nima yandi yokaka bitini yina ya mafuta na zulu ya mesa-kimenga sambu yo basisa midinga.+ 21 Kansi bantulu yina mpi dikulu yina ya kitata, Aroni nikisaka yo na ntwala mpi na nima bonso dikabu ya kunikisa na ntwala ya Yehowa, kaka mutindu Moize tubaka.+

22 Ebuna Aroni nangulaka maboko na yandi na ndambu ya bantu mpi sakumunaka bo+ mpi kulumukaka na nima ya kupesa dikabu sambu na disumu, dikabu ya kuyoka, mpi bimenga ya kinduku. 23 Nsuka-nsuka, Moize ti Aroni kotaka na tenta ya lukutakanu, basikaka, mpi sakumunaka bantu.+

Ebuna nkembo ya Yehowa monanaka na bantu yonso,+ 24 na nima tiya katukaka na Yehowa+ mpi yantikaka kuyoka dikabu ya kuyoka ti bitini ya mafuta na zulu ya mesa-kimenga. Ntangu bantu yonso monaka yo, bo yantikaka kuboka mpi bo bwaka baluse na ntoto.+

10 Na nima, Nadabi ti Abihu,+ bana ya Aroni, bakaka konso muntu kima na yandi ya kutudila tiya, bo tulaka tiya na kati na yo mpi tulaka ndumbu+ na zulu na yo. Ebuna bo yantikaka kupesa na ntwala ya Yehowa tiya yina nsiku pesaka ve nswa,+ yina yandi songaka bo ve na kusala. 2 Ebuna tiya basikaka na ntwala ya Yehowa mpi yokaka bo,+ yo yina bo fwaka na ntwala ya Yehowa.+ 3 Ebuna Moize tubilaka Aroni nde: “Yehowa me tuba nde, ‘Mono ta vanda muntu ya santu na kati ya bantu yina kele pene-pene na mono,+ mpi mono ta baka lukumu na ntwala ya bantu yonso.’” Aroni vandaka kaka pima.

4 Yo yina Moize bingaka Mishaele mpi Elisafani, bana ya Uziele,+ ngwasi ya Aroni, mpi tubilaka bo nde: “Beno kwisa, beno katula bampangi na beno na ntwala ya kisika ya santu mpi beno nata bo na kisika mosi na nganda ya camp.” 5 Bo kwisaka mpi nataka bo na kati ya bamvwela na bo na kisika mosi na nganda ya camp, kaka mutindu Moize songaka bo.

6 Ebuna Moize tubilaka Aroni mpi bana na yandi ya nkaka, Eleazare ti Itamare, nde: “Beno bika ve nde nsuki na beno kukuma nda mpi kisaka-saka, beno pasula mpi ve bilele na beno,+ sambu beno fwa ve mpi sambu Nzambi kuwila ve kimvuka ya mvimba ya bantu makasi. Bampangi na beno ya nzo ya mvimba ya Izraele bantu ta dila bantu yina Yehowa me fwa na tiya. 7 Beno fwete basika ve na munoko ya tenta ya lukutakanu kana ve beno ta fwa, sambu mafuta ya santu ya Yehowa kele na zulu na beno.”+ Yo yina bo salaka mutindu Moize tubaka.

8 Na nima, Yehowa tubilaka Aroni nde: 9 “Nge ti bana na nge, beno nwa ve vinu to malafu ya nkaka ya ke lawusaka ntangu beno ke kota na tenta ya lukutakanu,+ sambu beno fwa ve. Yo kele nsiku ya ntangu yonso sambu na bandonga na beno ya bantu. 10 Yo kele sambu na kusala luswaswanu na kati ya kima ya santu mpi kima ya santu ve, na kati ya kima ya mvindu mpi kima ya bunkete,+ 11 mpi sambu na kulonga bantu ya Izraele bansiku yonso yina Yehowa tubilaka bo na nzila ya Moize.”+

12 Ebuna Moize tubilaka Aroni mpi Eleazare ti Itamare, bana na yandi yina bikalaka, nde: “Beno baka dikabu ya mbuma yina bikalaka na makabu ya Yehowa yina bo me yoka na tiya mpi beno dia yo bonso dimpa ya kukonda levire pene-pene ya mesa-kimenga,+ sambu yo kele kima ya kuluta santu.+ 13 Beno fwete dia yo na kisika mosi ya santu,+ sambu yo kele dikabu na nge mpi dikabu ya bana na nge na makabu ya Yehowa yina bo me yoka na tiya, sambu yai mambu yina bo songaka mono. 14 Beno ta dia mpi ntulu ya dikabu ya kunikisa mpi dikulu ya kitini ya santu+ na kisika mosi ya bunkete, nge ti bana na nge ya babakala, mpi bana na nge ya bankento,+ sambu bo me pesa nge bima yai bonso dikabu na nge mpi dikabu ya bana na nge ya babakala na bimenga ya kinduku ya bantu ya Izraele. 15 Bo ta nata dikulu ya kitini ya santu mpi ntulu ya dikabu ya kunikisa kumosi ti makabu ya mafuta yina bo me yoka na tiya, sambu na kunikisa na ntwala ya Yehowa dikabu ya kunikisa na ntwala mpi na nima; mpi yo ta vanda dikabu ya ntangu yonso sambu na nge mpi sambu na bana na nge ya babakala,+ kaka mutindu Yehowa me tuba.”

16 Moize sosaka na dikebi yonso nkombo ya dikabu sambu na disumu,+ mpi yandi zabaka nde bo yokaka yo na tiya. Ebuna yandi wilaka Eleazare ti Itamare, bana ya Aroni yina bikalaka, makasi, mpi tubaka nde: 17 “Sambu na nki beno diaka ve dikabu sambu na disumu na kisika ya santu,+ sambu yo kele kima ya kuluta santu mpi bo me pesaka beno yo sambu beno vutula munoko sambu na kifu ya kimvuka ya bantu mpi beno fika masumu na bo na ntwala ya Yehowa? 18 Tala! Bo me nata ve menga na yo na kisika ya santu.+ Yo lombaka kibeni nde beno dia yo na kisika ya santu, kaka mutindu bo songaka mono.” 19 Aroni vutudilaka Moize nde: “Tala! Bubu yai bo pesaka dikabu na bo sambu na disumu mpi dikabu na bo ya kuyoka na ntwala ya Yehowa,+ kansi mambu yina kuminaka mono. Kana mono diaka dikabu sambu na disumu bubu yai, keti yo zolaka kupesa Yehowa kiese?” 20 Ntangu Moize waka mambu yina, yandi waka kiese.

11 Na nima Yehowa tubilaka Moize ti Aroni nde: 2 “Beno songa bantu ya Izraele nde, ‘Yai bigangwa ya ke zingaka yina kele na ntoto,* ya beno lenda dia:+ 3 Konso mbisi yina kele ti diboto ya kukabwana mpi nzila na maboto na yo mpi yina ke basisaka madia sambu na kutafuna yo diaka, beno lenda dia yo.

4 “‘Kansi beno fwete dia ve bambisi yai ya ke basisaka madia sambu na kutafuna yo diaka to yina diboto na yo kele ya kukabwana: shamo, sambu yo ke basisaka madia sambu na kutafuna yo diaka, kansi diboto na yo kele ve ya kukabwana. Yo kele mvindu sambu na beno.+ 5 Mpi simbidiki ya matadi,+ sambu yo ke basisaka madia sambu na kutafuna yo diaka kansi diboto na yo kele ve ya kukabwana. Yo kele mvindu sambu na beno. 6 Mpi lape ya mfinda, sambu yo ke basisaka madia sambu na kutafuna yo diaka kansi diboto na yo kele ve ya kukabwana. Yo kele mvindu sambu na beno. 7 Mpi ngulu,+ sambu diboto na yo kele ya kukabwana mpi yo kele ti nzila na diboto na yo kansi yo ke basisaka ve madia sambu na kutafuna yo diaka. Yo kele mvindu sambu na beno. 8 Beno fwete dia ve ata fioti musuni na yo to kusimba mvumbi na yo. Yo kele mvindu sambu na beno.+

9 “‘Yai bima yina beno lenda dia na bima yonso yina kele na masa: Konso kima ya kele na masa yina kele ti bipe mpi bibala, yo vanda na banzadi-mungwa to na banzadi, beno lenda dia+ yo. 10 Konso kima ya kele na banzadi-mungwa mpi na banzadi, yina kele ve ti bipe mpi bibala, na kati ya bigangwa yonso ya ke tambulaka na kimvuka mpi ya konso kigangwa* ya ke zingaka yina kele na masa, yo kele kima ya nzanzi sambu na beno. 11 Ee, yo fwete vanda kima ya nzanzi sambu na beno, beno fwete dia ve musuni na yo+ ata fioti mpi beno fwete mona bamvumbi na yo nzanzi. 12 Konso kima ya kele na masa yina kele ve ti bipe mpi bibala kele kima ya nzanzi sambu na beno.

13 “‘Yai bigangwa ya ke pumbukaka yina beno fwete mona nzanzi; beno fwete dia yo ve, sambu yo kele bima ya nzanzi: ngo-zulu,+ balbuzare, mbemba+ ya ndombe, 14 kumbi-kumbi ya mbwaki mpi bakumbi-kumbi yonso ya ndombe, 15 bakwanga-kwanga yonso, 16 otrishi, kikungulu, dibata ya nzadi-mungwa, bakumbi-kumbi yonso ya matono-matono, 17 kikungulu ya fioti, kormoran, kikungulu ya makutu-nda, 18 dibata ya masa, pelikane, mbemba, 19 mubila, ba-eron yonso, hupe, mpi kapakala-ngonzu. 20 Konso kigangwa ya ke tambulaka na kimvuka yina kele ti mansala* mpi yina ke tambulaka na makulu iya, kele kima ya nzanzi sambu na beno.

21 “‘Na bigangwa ya ke tambulaka na kimvuka yina kele ti mansala mpi yina ke tambulaka na makulu iya, beno lenda dia kaka bigangwa yina kele ti makulu ya nda sambu na kupumbuka. 22 Na kati na yo, beno lenda dia: mitindu ya kuswaswana ya bampasu yina ke salaka nzietelo, bampasu+ ya nkaka ya bo ke diaka, makelele, mpi bampasu ya nkaka. 23 Bigangwa yonso ya nkaka ya ke tambulaka na kimvuka yina kele ti mansala mpi yina kele ti makulu iya kele bima ya nzanzi sambu na beno. 24 Beno ta kudikumisa mvindu na nzila na yo. Konso muntu yina ke simba bamvumbi na yo ta vanda mvindu tii na nkokila.+ 25 Konso muntu yina ke nata bamvumbi na yo fwete yobisa bilele na yandi;+ yandi ta vanda mvindu tii na nkokila.

26 “‘Konso mbisi yina kele ti diboto ya kukabwana kansi yina kele ve ti nzila mpi yina ke basisaka ve madia sambu na kutafuna yo diaka kele mvindu sambu na beno. Konso muntu yina ke simba yo ta vanda mvindu.+ 27 Konso kigangwa ya ke zingaka yina ke tambula na makulu na kati ya bigangwa yina ke tambulaka na makulu iya kele mvindu sambu na beno. Konso muntu yina ke simba bamvumbi na yo ta vanda mvindu tii na nkokila. 28 Muntu yina ke nata bamvumbi na yo fwete yobisa bilele na yandi,+ mpi yandi ta vanda mvindu tii na nkokila.+ Yo kele mvindu sambu na beno.

29 “‘Yai bigangwa ya ke tambulaka na kimvuka na ntoto, yina kele mvindu sambu na beno: kulu, kakala,+ mitindu yonso ya mbala-mbongo, 30 mbala-mbongo ya bo ke bingaka geko, mbambi-ngundu, kala-kala, mbala-mbongo ya zelo, mpi lungwenia. 31 Bigangwa yai ya ke tambulaka na kimvuka kele mvindu+ sambu na beno. Konso muntu yina ke simba bamvumbi na yo ta vanda mvindu tii na nkokila.+

32 “‘Ebuna konso kima yina yo ke bwila ntangu yo ke fwa ta vanda mvindu, yo vanda kisadilu ya dibaya, lele, mpusu, to lele ya bo me sala na saki. Konso kisadilu yina bo ke sadilaka, bo fwete dindisa yo na masa, mpi yo ta vanda mvindu tii na nkokila; na nima yo ta kuma bunkete. 33 Kana yo bwa na dibungu, beno fwete pasula yo, mpi konso kima yina vandaka na kati na yo ta vanda mvindu.+ 34 Konso madia yina ke simba masa ya kele na dibungu ya mutindu yina ta vanda mvindu, mpi konso kima ya kunwa yina kele na dibungu ya mutindu yina ta vanda mvindu. 35 Konso kima yina bamvumbi na yo ke bwila ta vanda mvindu. Yo vanda fulu to dituka, beno fwete buka yo. Yo kele mvindu, mpi yo ta bikala mvindu sambu na beno. 36 Kaka nto ya masa mpi dibulu ya masa ta landa kuvanda bunkete, kansi konso muntu yina ke simba bamvumbi na yo ta vanda mvindu. 37 Kana bamvumbi na yo kubwa na zulu ya nkeni ya kamwa-nti yina bo fwete kuna, yo kele bunkete. 38 Kansi kana bo tula masa na nkeni mosi ebuna kitini ya bamvumbi na yo kubwa na zulu na yo, nkeni yina kele mvindu sambu na beno.

39 “‘Kansi kana mbisi mosi ya beno kele ti nswa ya kudia me fwa, muntu yina ke simba mvumbi na yo ta vanda mvindu tii na nkokila.+ 40 Konso muntu yina ke dia mvumbi na yo fwete yobisa bilele na yandi, mpi yandi ta vanda mvindu tii na nkokila.+ Konso muntu yina ke nata mvumbi na yo fwete yobisa bilele na yandi, mpi yandi ta vanda mvindu tii na nkokila. 41 Konso kigangwa ya ke tambulaka na kimvuka na ntoto kele kima ya nzanzi.+ Beno fwete dia yo ve. 42 Beno fwete dia ve konso kigangwa yina ke tambulaka na divumu na yo, konso kigangwa yina ke tambulaka na makulu iya, to bigangwa yonso ya ke tambulaka na kimvuka na ntoto yina kele ti makulu mingi, sambu yo kele bima ya nzanzi.+ 43 Beno* kudikumisa ve nzanzi na nzila ya konso kigangwa ya ke tambulaka na kimvuka, beno kudibebisa ve mpi beno kuma ve mvindu na nzila na yo.+ 44 Sambu mono kele Yehowa Nzambi na beno,+ mpi beno fwete kudisantisa mpi kukuma santu,+ sambu mono kele santu.+ Yo yina, beno* fwete kudikumisa ve mvindu na nzila ya konso kigangwa ya ke tambulaka na kimvuka yina ke tambulaka na ntoto. 45 Sambu mono kele Yehowa, yina ke basisa beno na insi ya Ezipte sambu na kudimonisa Nzambi na beno,+ mpi beno fwete vanda santu,+ sambu mono kele santu.+

46 “‘Yai nsiku ya me tala bambisi, bigangwa ya ke pumbukaka, konso kigangwa* ya ke zingaka yina ke tambulaka na masa, mpi ya me tala konso kigangwa* yina ke tambulaka na kimvuka na ntoto, 47 sambu na kusala luswaswanu na kati ya kima ya mvindu mpi kima ya bunkete, na kati ya bigangwa ya ke zingaka yina bo lenda dia mpi bigangwa yina bo lenda dia ve.’”+

12 Yehowa tubilaka diaka Moize nde: 2 “Songa bantu ya Izraele nde, ‘Kana nkento me baka divumu mpi me buta mwana-bakala, yandi ta vanda mvindu bilumbu nsambwadi, mutindu yandi ke vandaka na bilumbu ya kukonda bunkete ntangu yandi ke monaka menga.+ 3 Na kilumbu ya nana, bo ta yotisa+ mpusu ya kibakala ya mwana yina. 4 Nkento yina ta landa kudikumisa bunkete sambu na menga yina na bilumbu 33 yina ke landa. Yandi fwete simba ve ata kima mosi ya santu, mpi yandi fwete kota ve na kisika ya santu tii kuna yandi ta lungisa bilumbu na yandi ya kudikumisa bunkete.

5 “‘Kana yandi buta mwana-nkento, yandi ta vanda mvindu bilumbu 14, kaka mutindu yandi ke vandaka mvindu ntangu yandi ke monaka menga. Yandi ta landa kudikumisa bunkete sambu na menga yina na bilumbu 66 yina ke landa. 6 Ntangu bilumbu na yandi ya kudikumisa bunkete sambu na mwana-bakala to mwana-nkento ta mana, yandi ta nata mwana-dimeme ya bakala yina kele na mvula na yo ya ntete sambu na dikabu ya kuyoka+ mpi mwana-pizio mosi to diyembe mosi sambu na dikabu sambu na disumu na munoko ya tenta ya lukutakanu, na nganga-nzambi. 7 Yandi ta pesa yo na ntwala ya Yehowa mpi ta fika masumu ya nkento yina, ebuna yandi ta vanda bunkete na menga na yandi yina basikaka. Yai nsiku ya me tala nkento yina ke buta mwana-bakala to mwana-nkento. 8 Kansi, kana yandi lenda pesa ve dimeme, yandi fwete baka mayembe zole to bana-bapizio+ zole, mosi sambu na dikabu ya kuyoka mpi ya nkaka sambu na dikabu sambu na disumu, ebuna nganga-nzambi ta fika masumu na yandi, mpi yandi ta kuma bunkete.’”

13 Yehowa landaka kutubila Moize ti Aroni nde: 2 “Kana kivimbu, kibala, to ditono kubasika na mpusu ya muntu mosi,* mpi yo lenda kuma maladi ya lepre*+ na mpusu na yandi, bo fwete nata yandi na nganga-nzambi Aroni to na mosi na kati ya bana na yandi, banganga-nzambi.+ 3 Nganga-nzambi ta tala maladi yina kele na mpusu na yandi. Kana mika yina kele na kisika ya maladi kukuma mpembe mpi yo ke monana nde maladi yina me kota ngolo na nsi ya mpusu, yo kele maladi ya lepre. Nganga-nzambi ta tala yo mpi ta tuba nde yandi kele mvindu. 4 Kansi, kana ditono ya kele na mpusu na yandi kele mpembe mpi yo ke monana nde yo me kota ve ngolo na nsi ya mpusu mpi mika me kuma ve mpembe, nganga-nzambi ta tula muntu yina ke bela na kingenga bilumbu nsambwadi.+ 5 Nganga-nzambi ta tala yandi na kilumbu ya nsambwadi, mpi kana yo monana nde maladi yina me mana mpi yo me yalumuka ve na mpusu, nganga-nzambi ta tula yandi na kingenga bilumbu nsambwadi ya nkaka.

6 “Nganga-nzambi fwete tala yandi diaka na kilumbu ya nsambwadi, mpi kana maladi yina me yuma mpi me yalumuka ve na mpusu, nganga-nzambi ta tuba nde yandi kele bunkete;+ yo vandaka kaka kibala. Ebuna muntu yina ta yobisa bilele na yandi mpi ta kuma bunkete. 7 Kansi, kana kibala* me yalumuka kibeni na mpusu na nima ya ntangu yina yandi monanaka na ntwala ya nganga-nzambi sambu na kundima nde yandi me kuma bunkete, yandi ta monana diaka* na ntwala ya nganga-nzambi. 8 Nganga-nzambi ta tala yo, mpi kana kibala yina me yalumuka na mpusu, nganga-nzambi ta tuba nde yandi kele mvindu. Yo kele lepre.+

9 “Kana muntu me bela maladi ya lepre, bo fwete nata yandi na nganga-nzambi, 10 ebuna nganga-nzambi ta tala yandi.+ Kana kele ti kivimbu ya mpembe na mpusu mpi yo me kumisa mika mpembe mpi kana kele ti mputa+ na zulu ya kivimbu, 11 yo kele lepre yina ke belukaka ve na mpusu na yandi, mpi nganga-nzambi ta tuba nde yandi kele mvindu. Yandi fwete tula ve muntu yina na kingenga,+ sambu yandi kele mvindu. 12 Kansi, kana lepre me basika na mpusu ya mvimba mpi yo me fuluka na nitu ya muntu katuka na ntu tii na makulu, na kiteso yina nganga-nzambi lenda mona, 13 mpi nganga-nzambi me tala yandi mpi me mona nde lepre me fuluka na mpusu na yandi ya mvimba, yandi ta tuba nde muntu ya ke bela maladi yina kele bunkete.* Yonso me kuma mpembe, mpi yandi kele bunkete. 14 Kansi, konso ntangu yina mputa ke monana na zulu na yo, yandi ta vanda mvindu. 15 Ntangu nganga-nzambi ta mona mputa, yandi ta tuba nde muntu yina kele mvindu.+ Mputa yina kele mvindu. Yo kele lepre.+ 16 Kansi kana mputa yina kukuma diaka mpembe, yandi ta kwisa na nganga-nzambi. 17 Nganga-nzambi ta tala yandi,+ mpi kana mputa yina me kuma mpembe, nganga-nzambi ta tuba nde muntu ya ke bela maladi yina kele bunkete. Yandi kele bunkete.

18 “Kana kivimbu me basika na mpusu ya nitu ya muntu mpi yo me beluka, 19 kansi mbuma mosi ya mpembe to ditono mosi ya mukubu ya mbwaki-mpembe kubasika na kisika ya kivimbu yina, yandi fwete kudimonisa na nganga-nzambi. 20 Nganga-nzambi ta tala yo,+ mpi kana yo monana nde yo me kota ngolo na nsi ya mpusu mpi mika na yo me kuma mpembe, nganga-nzambi ta tuba nde yandi kele mvindu. Yo kele maladi ya lepre yina me basika na kivimbu. 21 Kansi, kana nganga-nzambi kutala yo mpi kumona nde kele ve ti mika ya mpembe na kati na yo mpi yo me kota ve ngolo na nsi ya mpusu mpi yo ke monana ya kuyuma, nganga-nzambi ta tula yandi na kingenga bilumbu nsambwadi.+ 22 Kana yo me yalumuka kibeni na mpusu, nganga-nzambi ta tuba nde yandi kele mvindu. Yo kele maladi. 23 Kansi kana ditono me bikala na kisika mosi mpi yo me yalumuka ve, yo kele kaka kuvimba ya kivimbu, mpi nganga-nzambi ta tuba nde yandi kele bunkete.+

24 “To kana muntu kele ti kidimbu ya kupia tiya mpi nsuni ya mubisu ya kidimbu yina me kuma ditono ya mbwaki-mpembe to ya mpembe, 25 nganga-nzambi ta tala yo. Kana mika ya kele na ditono yina me kuma mpembe mpi yo ke monana nde yo me kota ngolo na nsi ya mpusu, yo kele lepre yina me basika na kidimbu ya kupia tiya, mpi nganga-nzambi ta tuba nde yandi kele mvindu. Yo kele maladi ya lepre. 26 Kansi kana nganga-nzambi kutala yo mpi kumona nde mika ya mpembe kele ve na kati ya ditono yina mpi yo me kota ve ngolo na nsi ya mpusu mpi yo kele ya kuyuma, nganga-nzambi ta tula yandi na kingenga bilumbu nsambwadi.+ 27 Nganga-nzambi ta tala yandi na kilumbu ya nsambwadi, mpi kana yo me yalumuka kibeni na mpusu, nganga-nzambi ta tuba nde yandi kele mvindu. Yo kele maladi ya lepre. 28 Kansi kana ditono yina me bikala na kisika mosi mpi me yalumuka ve na mpusu mpi yo kele ya kuyuma, yo kele kaka mbuma ya kidimbu ya kupia tiya, mpi nganga-nzambi ta tuba nde yandi kele bunkete, sambu yo kele kuvimba ya kidimbu ya kupia tiya.

29 “Kana maladi me basika na ntu to na kibeku ya bakala to ya nkento mosi, 30 nganga-nzambi ta tala maladi yina.+ Kana yo ke monana nde yo me kota ngolo na nsi ya mpusu mpi mika kele ya mukubu ya mwamba ya ngasi mpi fioti, nganga-nzambi ta tuba nde muntu yina kele mvindu; yo kele maladi ya mpusu ya ntu to ya mandefo. Yo kele lepre ya ntu to ya kibeku. 31 Kansi kana nganga-nzambi kumona nde maladi yina me kota ve ngolo na nsi ya mpusu mpi mika ya ndombe kele ve na kati na yo, nganga-nzambi fwete tula muntu yina kele ti maladi na kingenga bilumbu nsambwadi.+ 32 Nganga-nzambi ta tala maladi yina na kilumbu ya nsambwadi, mpi kana kisika yina maladi vandaka me yalumuka ve mpi mika ya mukubu ya mwamba ya ngasi me basika ve na kati na yo, mpi yo ke monana nde kisika yina maladi kele me kota ve ngolo na nsi ya mpusu, 33 muntu yina fwete kudizenga nsuki, kansi yandi fwete zenga ve nsuki ya kisika yina maladi kele. Na nima, nganga-nzambi ta tula muntu yina kele ti maladi na kingenga bilumbu nsambwadi.

34 “Na kilumbu ya nsambwadi, nganga-nzambi ta tala diaka kisika yina maladi kele, mpi kana maladi ya mpusu ya ntu mpi ya mandefo me yalumuka ve na mpusu mpi yo ke monana nde yo me kota ve ngolo na nsi ya mpusu, nganga-nzambi fwete tuba nde muntu yina kele bunkete, mpi yandi fwete yobisa bilele na yandi mpi kuvanda bunkete. 35 Kansi, kana maladi me yalumuka kibeni na mpusu na nima ya kukuma bunkete, 36 nganga-nzambi ta tala yandi, mpi kana maladi me yalumuka na mpusu, nganga-nzambi kele ve na mfunu ya kusosa mika ya mukubu ya mwamba ya ngasi; muntu yina kele mvindu. 37 Kansi, kana na nima ya kutala yandi, yo monana nde maladi yina me yalumuka ve mpi mika ya ndombe me basika na kati na yo, maladi yina me mana. Muntu yina kele bunkete, mpi nganga-nzambi ta tuba nde yandi kele bunkete.+

38 “Kana matono me basika na mpusu* ya bakala to ya nkento mosi, mpi matono yina kele mpembe, 39 nganga-nzambi ta tala yo.+ Kana matono ya kele na mpusu me yuma mpi me kuma mpembe, yo kele kivimbu ya mpamba yina me basika na mpusu. Muntu yina kele bunkete.

40 “Kana nsuki me mana bakala mosi na ntu ebuna yandi me kuma ti dibandi, yandi kele bunkete. 41 Kana nsuki me mana yandi na mbunzu mpi yandi me kuma ti dibandi kisika yina, yandi kele bunkete. 42 Kansi, kana kivimbu mosi ya mukubu ya mbwaki-mpembe kubasika na kitini ya mpusu ya ntu na yandi yina kele ti dibandi to na mbunzu na yandi, yo kele lepre yina ke basika na mpusu ya ntu na yandi to na mbunzu na yandi. 43 Nganga-nzambi ta tala yandi, mpi kana kivimbu ya me katuka na maladi yina kele mbwaki-mpembe na kisampala na zulu ya ntu na yandi to na mbunzu na yandi mpi yo ke monana bonso lepre na mpusu na yandi, 44 yandi kele muntu ya lepre. Yandi kele mvindu, mpi nganga-nzambi fwete tuba nde yandi kele mvindu sambu na maladi yina kele na ntu na yandi. 45 Sambu na muntu ya lepre yina kele ti maladi yina, bo fwete pasula bilele na yandi, mpi yandi fwete bika nde nsuki ya ntu na yandi kukuma nda mpi kisaka-saka, mpi yandi fwete fika munoko* na yandi mpi kutuba na ndinga ya ngolo nde, ‘Mvindu, mvindu!’ 46 Yandi ta vanda mvindu ntangu yonso yina yandi kele ti maladi yina. Sambu yandi kele mvindu, yandi fwete zinga na kingenga. Kisika na yandi ya kuzinga ta vanda na nganda ya camp.+

47 “Kana maladi ya lepre me sambukila lele mosi, yo vanda lele ya lene to ya lino, 48 yo vanda na nsinga ya lele yina bo me tunga to na nsinga ya lino to ya lene, to na mpusu to na konso kima yina bo me sala na mpusu, 49 mpi tashe ya mukubu ya masa ya saka-saka ti ya mwamba ya ngasi to ya mbwaki ya me katuka na maladi yina me sambukila lele, mpusu, nsinga ya lele yina bo me tunga, nsinga, to konso kima ya bo me sala na mpusu, lepre me sambukila yo, mpi bo fwete songa yo na nganga-nzambi. 50 Nganga-nzambi ta tala maladi yina, mpi yandi fwete tula kima yina kele ti lepre na kingenga bilumbu nsambwadi.+ 51 Kana yandi tala maladi yina na kilumbu ya nsambwadi mpi kumona nde yo me yalumuka na lele, na nsinga ya lele yina bo me tunga, na nsinga, to na mpusu (ata bo ke sadilaka mpusu yina sambu na konso kikuma yina), maladi yina kele lepre yina ke sambukilaka, mpi yo kele mvindu.+ 52 Yandi fwete yoka lele to nsinga to lele yina bo me tunga na nsinga ya lene to ya lino to konso kima ya bo me sala na mpusu yina maladi me basika na yo, sambu yo kele lepre yina ke sambukilaka. Bo fwete yoka yo na tiya.

53 “Kansi, kana nganga-nzambi kutala yo mpi maladi yina me yalumuka ve na lele to na nsinga ya lele yina bo me tunga to na nsinga to na konso kima yina bo me sala na mpusu, 54 nganga-nzambi ta pesa ntuma nde bo yobisa kima yina maladi me simba, mpi yandi ta tula yo na kingenga bilumbu nsambwadi ya nkaka. 55 Nganga-nzambi ta tala kima yina maladi me simba na nima ya kuyobisa yo mbote-mbote. Kana maladi yina me soba ve, ata kana maladi yina me yalumuka ve, yo kele mvindu. Nge fwete yoka yo na tiya, sambu maladi me dia kima yina, yo vanda na nsi to na zulu.

56 “Kansi kana nganga-nzambi me tala yo mpi kisika yina maladi simbaka yo me yuma na nima ya kuyobisa yo mbote-mbote, yandi ta katula yo na lele to na mpusu to na bansinga ya lele yina bo me tunga. 57 Kansi kana yo ke landa kumonana na kitini ya nkaka ya lele to na nsinga ya lele yina bo me tunga to na nsinga to na konso kima yina bo me sala na mpusu, yo ke yalumuka, mpi nge fwete yoka na tiya+ konso kima yina maladi yina me simba. 58 Kansi kana maladi yina me waluka na lele to na nsinga ya lele yina bo me tunga to na nsinga to na konso kima yina bo me sala na mpusu yina nge yobisaka, bo fwete yobisa yo mbala ya zole, ebuna yo ta kuma bunkete.

59 “Yai nsiku ya maladi ya lepre na lele ya lene to ya lino, to na nsinga ya lele yina bo me tunga to na nsinga, to na konso kima yina bo me sala na mpusu, sambu na kutuba nde yo kele bunkete to mvindu.”

14 Yehowa landaka kutubila Moize nde: 2 “Yai fwete vanda nsiku ya muntu ya lepre na kilumbu yina bo ke ndima nde yandi me kuma bunkete, ntangu bo fwete nata yandi na nganga-nzambi.+ 3 Nganga-nzambi ta kwenda na nganda ya camp mpi ta tala yandi. Kana muntu ya lepre me beluka na lepre na yandi, 4 nganga-nzambi ta songa yandi na kunata bandeke zole ya bunkete mpi ya moyo, kitini ya nti ya sedre, lele ya mbwaki mingi, mpi izope sambu na kukumisa yandi bunkete.+ 5 Nganga-nzambi ta lomba nde bo fwa ndeke mosi na kati ya dibungu, na zulu ya masa yina ke kulumuka. 6 Kansi yandi fwete baka ndeke ya moyo kumosi ti kitini ya nti ya sedre, lele ya mbwaki mingi, mpi izope, mpi kudindisa yo kumosi na menga ya ndeke yina bo fwaka na zulu ya masa yina ke kulumuka. 7 Ebuna yandi ta mwangila yo muntu yina ke kudikumisa bunkete na lepre mbala nsambwadi mpi ta tuba nde yandi kele bunkete, ebuna yandi ta yambula ndeke yina ya moyo na nseke.+

8 “Muntu yina ke kudikumisa bunkete fwete yobisa bilele na yandi, kuzenga mika na yandi yonso, kuyobila na masa, ebuna yandi ta vanda bunkete. Na nima, yandi lenda kota na camp, kansi yandi ta zinga na nganda ya tenta na yandi bilumbu nsambwadi. 9 Na kilumbu ya nsambwadi, yandi fwete zenga nsuki yonso ya ntu na yandi, mandefo na yandi, mpi mansala ya meso na yandi. Na nima ya kuzenga nsuki na yandi yonso, yandi ta yobisa bilele na yandi, kuyobila masa, ebuna yandi ta kuma bunkete.

10 “Na kilumbu ya nana, yandi ta baka bana-mameme zole ya babakala ya kukonda kifu, mwana-dimeme mosi ya nkento+ ya kukonda kifu yina kele na mvula na yo ya ntete, bandambu tatu na kati ya bandambu kumi ya efa* ya fufu ya kitoko ya bo me vukisa ti mafuta bonso dikabu ya mbuma,+ mpi logi* mosi ya mafuta;+ 11 ebuna nganga-nzambi yina ke tuba nde yandi me kuma bunkete ta monisa muntu yina ke kudikumisa bunkete, kumosi ti makabu yina, na ntwala ya Yehowa na munoko ya tenta ya lukutakanu. 12 Nganga-nzambi ta baka mwana-dimeme mosi mpi ta pesa yo bonso dikabu sambu na makambu+ kumosi ti logi yina ya mafuta, mpi yandi ta nikisa yo na nima mpi na ntwala bonso dikabu ya kunikisa na ntwala ya Yehowa.+ 13 Na nima, yandi ta fwa mwana-dimeme yina na kisika yina bo ke fwaka+ mbala na mbala dikabu sambu na disumu mpi dikabu ya kuyoka, na kisika mosi ya santu, sambu dikabu sambu na makambu kele ya nganga-nzambi,+ bonso dikabu sambu na disumu. Yo kele kima ya kuluta santu.+

14 “Ebuna nganga-nzambi ta baka ndambu ya menga ya dikabu sambu na makambu, mpi yandi ta tula yo na nsongi ya dikutu ya kitata ya muntu yina ke kudikumisa bunkete mpi na musapi ya nene ya diboko na yandi ya kitata mpi na musapi ya nene ya dikulu na yandi ya kitata. 15 Mpi nganga-nzambi ta baka ndambu ya logi ya mafuta+ mpi ta tiamuna yo na kipala-pala ya diboko na yandi ya kimama. 16 Na nima, nganga-nzambi ta dindisa musapi ya diboko na yandi ya kitata na mafuta yina kele na kipala-pala ya diboko na yandi ya kimama mpi ta mwanga ndambu ya mafuta ti musapi na yandi mbala nsambwadi na ntwala ya Yehowa. 17 Ebuna nganga-nzambi ta tula ndambu ya mafuta yina me bikala na kipala-pala ya diboko na yandi na nsongi ya dikutu ya kitata ya muntu yina ke kudikumisa bunkete mpi na musapi ya nene ya diboko na yandi ya kitata mpi na musapi ya nene ya dikulu na yandi ya kitata, na zulu ya menga ya dikabu sambu na makambu. 18 Mafuta yina me bikala na mafuta yina kele na kipala-pala ya diboko na yandi, nganga-nzambi ta tula yo na ntu ya muntu yina ke kudikumisa bunkete, mpi nganga-nzambi ta fika masumu na yandi na ntwala ya Yehowa.+

19 “Nganga-nzambi ta tambika dikabu sambu na disumu+ mpi ta fika masumu ya muntu yina ke kudikumisa bunkete na mvindu na yandi, na nima yandi ta fwa dikabu ya kuyoka. 20 Nganga-nzambi ta pesa dikabu ya kuyoka ti dikabu ya mbuma+ na mesa-kimenga, mpi nganga-nzambi ta fika masumu na yandi,+ ebuna yandi ta kuma bunkete.+

21 “Kansi, kana yandi kele nsukami mpi yandi kele ve ti bima mingi, yandi ta baka mwana-dimeme mosi ya bakala bonso dikabu sambu na makambu sambu na dikabu ya kunikisa, sambu na kufika masumu na yandi, kumosi ti ndambu mosi na kati ya bandambu kumi ya efa* ya fufu ya kitoko ya bo me vukisa ti mafuta bonso dikabu ya mbuma, logi mosi ya mafuta, 22 mpi mayembe zole to bana-bapizio zole na kutadila makuki na yandi. Bo ta sadila mosi bonso dikabu sambu na disumu, mpi ya nkaka bonso dikabu ya kuyoka.+ 23 Na kilumbu ya nana,+ yandi ta nata yo na nganga-nzambi na munoko ya tenta ya lukutakanu na ntwala ya Yehowa+ sambu bo ndima nde yandi me kuma bunkete.

24 “Nganga-nzambi ta baka mwana-dimeme ya bakala ya dikabu sambu na makambu+ mpi logi ya mafuta, mpi nganga-nzambi ta nikisa yo na nima mpi na ntwala bonso dikabu ya kunikisa na ntwala ya Yehowa.+ 25 Na nima, yandi ta fwa mwana-dimeme ya bakala ya dikabu sambu na makambu, mpi nganga-nzambi ta baka ndambu ya menga ya dikabu sambu na makambu mpi ta tula yo na nsongi ya dikutu ya kitata ya muntu yina ke kudikumisa bunkete mpi na musapi ya nene ya diboko na yandi ya kitata mpi na musapi ya nene ya dikulu na yandi ya kitata.+ 26 Nganga-nzambi ta tiamuna ndambu ya mafuta na kipala-pala ya diboko na yandi ya kimama,+ 27 mpi yandi ta mwanga ti musapi ya diboko na yandi ya kitata ndambu ya mafuta yina kele na kipala-pala ya diboko na yandi ya kimama mbala nsambwadi na ntwala ya Yehowa. 28 Mpi nganga-nzambi ta tula ndambu ya mafuta yina kele na kipala-pala ya diboko na yandi na nsongi ya dikutu ya kitata ya muntu yina ke kudikumisa bunkete mpi na musapi ya nene ya diboko na yandi ya kitata mpi na musapi ya nene ya dikulu na yandi ya kitata na bisika yina yandi tulaka menga ya dikabu sambu na makambu. 29 Na nima, mafuta yina me bikala na mafuta yina kele na kipala-pala ya diboko na yandi, nganga-nzambi ta tula yo na ntu ya muntu yina ke kudikumisa bunkete, sambu na kufika masumu na yandi na ntwala ya Yehowa.

30 “Yandi ta pesa diyembe mosi na kati ya mayembe to mwana-pizio mosi na kati ya bana-bapizio, na kutadila bima yina yandi kele na yo,+ 31 yandi lenda pesa mosi yina yandi lenda zwa, bonso dikabu sambu na disumu mpi ya nkaka bonso dikabu ya kuyoka+ kumosi ti dikabu ya mbuma; mpi nganga-nzambi ta fika masumu ya muntu yina ke kudikumisa bunkete na ntwala ya Yehowa.+

32 “Yai nsiku sambu na muntu yina ke bela maladi ya lepre, kansi yina kele ve ti bima mingi ntangu bo ke ndima nde yandi me kuma bunkete.”

33 Ebuna Yehowa tubilaka Moize mpi Aroni nde: 34 “Ntangu beno ta kota na insi ya Kanana,+ yina mono ke pesa beno sambu yo vanda ya beno,+ mpi mono tula maladi ya lepre+ na nzo mosi na insi na beno, 35 munkwa-nzo yina fwete kwisa kusonga nganga-nzambi nde, ‘Maladi mosi buna ya nsambukila me monana na nzo na mono.’ 36 Nganga-nzambi ta songa bo na kubasisa bima na nzo yina na ntwala nde yandi kwisa kutala maladi yina, sambu yandi tuba ve nde bima yonso yina kele na nzo yina kele mvindu; mpi na nima nganga-nzambi ta kota sambu na kutala nzo yina. 37 Yandi ta tala kisika yina maladi kele, mpi kana bibaka ya nzo yina me kuma ti matono ya mukubu ya masa ya saka-saka ti ya mwamba ya ngasi to ya mbwaki mingi mpi yo ke monana nde yo me kota mingi na kibaka, 38 nganga-nzambi ta basika na nzo tii na munoko na yo mpi yandi ta tula yo na kingenga bilumbu nsambwadi.+

39 “Ebuna nganga-nzambi ta vutuka na kilumbu ya nsambwadi mpi ta tala yo. Kana maladi me yalumuka na bibaka ya nzo yina, 40 nganga-nzambi ta pesa bantuma, mpi bo fwete katula matadi yina kele ti maladi mpi kulosa yo na nganda ya mbanza na kisika mosi ya mvindu. 41 Ebuna yandi fwete lomba nde bo kulula nzo yina mbote-mbote na kati, mpi bo fwete losa mpemba mpi poto-poto yina bo ta katula na nganda ya mbanza na kisika mosi ya mvindu. 42 Na nima, bo ta tula matadi ya nkaka na kisika ya matadi yina bo katulaka, mpi yandi fwete sadila poto-poto ya nkaka mpi kulomba nde bo pakula nzo yina mpemba.

43 “Kansi, kana maladi me vutuka mpi me kota na nzo yina na nima ya kukatula matadi mpi ya kukulula nzo mpi ya kupakula yo diaka mpemba, 44 nganga-nzambi ta kota mpi ta tala yo. Kana maladi me yalumuka na nzo, yo kele lepre ya ke sambukilaka+ na kati ya nzo yina. Nzo yina kele mvindu. 45 Yandi ta lomba nde bo bwisa nzo yina—matadi na yo, mabaya na yo, mpi mpemba yonso ti poto-poto ya nzo yina—mpi kunata yo na nganda ya mbanza na kisika mosi ya mvindu.+ 46 Kansi, konso muntu yina ke kota na nzo yina na bilumbu yina bo me tula yo na kingenga,+ yandi ta vanda mvindu tii na nkokila;+ 47 mpi konso muntu yina ke lala na nzo yina fwete yobisa bilele na yandi, mpi konso muntu yina ke dia na nzo yina fwete yobisa bilele na yandi.

48 “Kansi, kana nganga-nzambi me kwisa mpi me mona nde maladi yina me yalumuka ve na nzo na nima ya kupakula yo diaka mpemba, nganga-nzambi ta tuba nde nzo yina kele bunkete, sambu maladi me mana. 49 Sambu na kukumisa nzo yina bunkete na mvindu* na yo, yandi ta baka bandeke zole, kitini ya nti ya sedre, lele ya mbwaki mingi, mpi izope.+ 50 Yandi fwete fwa ndeke mosi na dibungu, na masa yina ke kulumuka. 51 Na nima, yandi ta baka kitini ya nti ya sedre, izope, lele ya mbwaki mingi, mpi ndeke ya moyo, mpi ta dindisa yo na menga ya ndeke yina bo fwaka mpi na masa yina ke kulumuka, mpi yandi fwete mwanga yo na ndambu ya nzo yina mbala nsambwadi.+ 52 Mpi yandi ta kumisa nzo yina bunkete na mvindu* na yo ti menga ya ndeke yina, masa yina ke kulumuka, ndeke ya moyo, kitini ya nti ya sedre, izope, mpi lele ya mbwaki mingi. 53 Yandi ta yambula ndeke yina ya moyo na nganda ya mbanza na nseke mpi ta fika masumu ya nzo yina, mpi yo ta kuma bunkete.

54 “Yai nsiku ya me tala mitindu yonso ya maladi ya lepre, maladi ya mpusu ya ntu to ya mandefo,+ 55 maladi ya lepre+ ya lele to ya nzo,+ 56 mpi ya me tala bivimbu, bibala ya mputa, mpi matono,+ 57 sambu na kuzaba ntangu kima mosi kele mvindu mpi ntangu kima mosi kele bunkete.+ Yai nsiku ya me tala maladi ya lepre.”+

15 Yehowa landaka kutubila Moize ti Aroni nde: 2 “Beno tubila bantu ya Izraele mpi beno songa bo nde, ‘Kana masa ke basika bakala mosi na kibakala* na yandi, masa yina ya ke basika ke kumisa yandi mvindu.+ 3 Yandi kele mvindu sambu na masa yina ke basika yandi, yo vanda masa yina ke landa kubasika na kibakala na yandi to yo me kangama, yandi kele kaka mvindu.

4 “Konso mbeto yina muntu yina ke basika masa ke lala ta vanda mvindu, mpi konso kima yina yandi ke vandila ta vanda mvindu. 5 Muntu yina ke simba mbeto na yandi fwete yobisa bilele na yandi, mpi yandi fwete yobila masa mpi kuvanda mvindu tii na nkokila.+ 6 Konso muntu yina ke vandila kima yina muntu yina ke basika masa vandilaka fwete yobisa bilele na yandi, kuyobila masa, mpi kuvanda mvindu tii na nkokila. 7 Konso muntu yina ke simba nsuni ya muntu yina ke basika masa fwete yobisa bilele na yandi, kuyobila masa, mpi kuvanda mvindu tii na nkokila. 8 Kana muntu yina ke basika masa kulosila muntu mosi ya kele bunkete mate, muntu yina fwete yobisa bilele na yandi, kuyobila masa, mpi kuvanda mvindu tii na nkokila. 9 Konso kima ya kuvandila na mukongo ya mbisi yina muntu yina ke basika masa me vandila ta vanda mvindu. 10 Konso muntu yina ke simba konso kima yina vandaka na nsi na yandi ta vanda mvindu tii na nkokila, mpi konso muntu yina ta nata bima yina ta yobisa bilele na yandi, ta yobila masa, mpi ta vanda mvindu tii na nkokila. 11 Kana muntu yina ke basika masa+ me yobisa ve maboko na yandi na masa ebuna yandi simba muntu ya nkaka, muntu yina fwete yobisa bilele na yandi, kuyobila masa, mpi kuvanda mvindu tii na nkokila. 12 Dibungu yina muntu yina ke basika masa ke simba, bo fwete pasula yo, mpi konso dilonga ya bo me sala na nti, bo fwete yobisa yo ti masa.+

13 “‘Kana masa yina ke basika me kangama ebuna muntu yina me kuma bunkete, yandi ta tanga bilumbu nsambwadi sambu na kudikumisa bunkete, mpi yandi fwete yobisa bilele na yandi, kuyobila na masa yina ke kulumuka, ebuna yandi ta kuma bunkete.+ 14 Na kilumbu ya nana, yandi fwete baka mayembe zole to bana-bapizio+ zole mpi kukwisa na ntwala ya Yehowa na munoko ya tenta ya lukutakanu mpi kupesa yo na nganga-nzambi. 15 Nganga-nzambi ta pesa yo, mosi sambu na dikabu sambu na disumu mpi ya nkaka bonso dikabu ya kuyoka, mpi nganga-nzambi ta fika masumu na yandi na ntwala ya Yehowa sambu na masa yina ke basika yandi.

16 “‘Kansi, kana masa ya babakala ke basika bakala mosi, yandi fwete yobila masa nitu ya mvimba ebuna kuvanda mvindu tii na nkokila.+ 17 Yandi fwete yobisa na masa konso lele mpi konso mpusu yina kele ti masa yina ya babakala, mpi yo ta vanda mvindu tii na nkokila.

18 “‘Kana bakala mosi me lala ti nkento mpi me losa masa ya babakala, bo fwete yobila masa mpi kuvanda mvindu tii na nkokila.+

19 “‘Kana menga ke basika nkento mosi, yandi ta landa kuvanda na mvindu na yandi ya kumona menga bilumbu nsambwadi.+ Konso muntu yina ke simba yandi ta vanda mvindu tii na nkokila.+ 20 Konso kima yina yandi ke ladila na nsungi ya mvindu na yandi ya kumona menga ta vanda mvindu, mpi konso kima yina yandi ke vandila ta vanda mvindu.+ 21 Konso muntu yina ke simba mbeto na yandi fwete yobisa bilele na yandi, kuyobila masa, mpi kuvanda mvindu tii na nkokila. 22 Konso muntu yina ke simba kima yina yandi vandilaka fwete yobisa bilele na yandi, kuyobila masa, mpi kuvanda mvindu tii na nkokila. 23 Kana yandi vandaka na mbeto to na kima ya nkaka, muntu yina ta simba yo, yo ta kumisa yandi mvindu tii na nkokila.+ 24 Mpi kana bakala mosi kulala ti yandi mpi mvindu+ na yandi ya kumona menga kusimba bakala yina, bakala yina ta vanda mvindu bilumbu nsambwadi, mpi konso mbeto yina bakala yina ke lala ta vanda mvindu.

25 “‘Kana menga ya ke basika nkento mosi ke landa kubasika bilumbu mingi,+ kansi yo kele ve nsungi ya yandi ke monaka menga+ mbala na mbala, to kana menga kubasika yandi bilumbu mingi kuluta nsungi na yandi ya kumona menga, yandi ta vanda mvindu bilumbu yonso yina menga ke basika yandi, mutindu yandi ke vandaka mvindu na bilumbu ya mvindu na yandi ya kumona menga. 26 Konso mbeto yina yandi ke lala na bilumbu yina menga ke basika yandi ta kuma mvindu bonso mbeto yina yandi ke ladilaka na ntangu na yandi ya kumona menga,+ mpi konso kima yina yandi ke vandila ta kuma mvindu bonso mvindu ya me katuka na mvindu na yandi ya kumona menga. 27 Konso muntu yina ke simba yo ta vanda mvindu, mpi yandi fwete yobisa bilele na yandi, kuyobila masa, mpi kuvanda mvindu tii na nkokila.+

28 “‘Kansi, kana yandi me kuma bunkete sambu na menga yina vandaka kubasika yandi, yandi ta tanga bilumbu nsambwadi, na nima yandi ta kuma bunkete.+ 29 Na kilumbu ya nana, yandi fwete baka mayembe zole to bana-bapizio+ zole, mpi yandi ta nata yo na nganga-nzambi na munoko ya tenta ya lukutakanu.+ 30 Nganga-nzambi ta pesa mosi bonso dikabu sambu na disumu mpi ya nkaka bonso dikabu ya kuyoka, mpi nganga-nzambi ta fika masumu na yandi na ntwala ya Yehowa sambu na kima ya mvindu+ yina ke basika yandi.

31 “‘Beno fwete sadisa bantu ya Izraele na kuvanda ya kukabwana ti mvindu na bo, sambu bo fwa ve na mvindu na bo na ntangu bo me kumisa nzo-tenta na mono yina kele na kati-kati na bo mvindu.+

32 “‘Yai nsiku ya me tala bakala yina masa ke basika yandi, bakala yina kele mvindu sambu na masa ya babakala+ yina ke basika yandi, 33 nkento na nsungi ya mvindu na yandi ya kumona menga,+ konso bakala to nkento yina kele ti kima ya ke basika na yandi,+ mpi bakala yina ke lala ti nkento yina kele mvindu.’”

16 Yehowa tubilaka Moize na nima ya lufwa ya bana zole ya Aroni yina fwaka sambu bo pusanaka pene-pene ya Yehowa.+ 2 Yehowa tubilaka Moize nde: “Songa mpangi na nge Aroni nde yandi lenda kota ve konso ntangu yina na kisika ya santu,+ na nima ya rido,+ na ntwala ya mufiniku yina kele na zulu ya Sanduku, sambu yandi fwa ve,+ sambu mono ta monana na dituti+ na zulu ya mufiniku.+

3 “Yai bima yina Aroni fwete nata ntangu yandi ke kota na kisika ya santu: mwana-ngombe mosi ya bakala sambu na dikabu sambu na disumu+ mpi dimeme mosi ya bakala sambu na dikabu ya kuyoka.+ 4 Yandi fwete lwata mvwela ya lino ya santu,+ mpi bakupe*+ ya lino fwete fika nitu na yandi,* mpi yandi fwete kudikangisa lele ya lino yina bo ke kangaka na luketo+ mpi kukanga tirbani+ ya lino na ntu na yandi. Yo kele bilele ya santu.+ Yandi ta yobila masa+ mpi ta lwata bilele yina.

5 “Yandi fwete baka na kimvuka ya bantu ya Izraele+ bana-bankombo zole ya babakala sambu na dikabu sambu na disumu mpi dimeme mosi ya bakala sambu na dikabu ya kuyoka.

6 “Ebuna Aroni fwete pesa ngombe yina ya bakala ya dikabu sambu na disumu, yina kele sambu na yandi mosi, mpi yandi ta fika masumu na yandi mosi+ ti ya nzo na yandi.

7 “Na nima, yandi ta baka bankombo zole mpi ta tula yo na ntwala ya Yehowa na munoko ya tenta ya lukutakanu. 8 Aroni ta bula zeke sambu na bankombo zole yina, mosi sambu na Yehowa mpi ya nkaka sambu na Azazele.* 9 Aroni ta pesa nkombo yina bo solaka sambu na Yehowa na nima ya kubula zeke,+ mpi ta pesa yo bonso dikabu sambu na disumu. 10 Kansi, nkombo yina bo solaka sambu na Azazele na nima ya kubula zeke, bo fwete nata yo ya moyo sambu bo tula yo na ntwala ya Yehowa sambu na kufika masumu na zulu na yo, sambu bo tinda yo sambu na Azazele na ntoto-makanga.+

11 “Aroni ta pesa ngombe ya bakala ya dikabu sambu na disumu, yina kele sambu na yandi mosi, mpi yandi ta fika masumu na yandi mosi ti ya nzo na yandi; na nima yandi ta fwa ngombe yina ya bakala ya dikabu sambu na disumu, yina kele sambu na yandi mosi.+

12 “Ebuna yandi ta baka kima ya kutudila tiya+ ya kufuluka ti makala ya tiya ya me katuka na mesa-kimenga+ yina kele na ntwala ya Yehowa mpi maboko zole ya kufuluka ti ndumbu ya nsudi ya kitoko,+ mpi yandi ta nata yo na nima ya rido.+ 13 Yandi ta tula mpi ndumbu na tiya na ntwala ya Yehowa,+ mpi dituti ya ndumbu ta fika mufiniku+ ya Sanduku, yina kele na zulu ya Kimbangi,+ sambu yandi fwa ve.

14 “Yandi ta baka ndambu ya menga+ ya ngombe yina ya bakala mpi ta mwanga yo na musapi na yandi na ntwala ya mufiniku na ndambu ya esti, mpi yandi ta mwanga ndambu ya menga ti musapi na yandi mbala nsambwadi na ntwala ya mufiniku.+

15 “Na nima, yandi ta fwa nkombo ya dikabu sambu na disumu, yina kele sambu na bantu,+ mpi yandi ta nata menga na yo na nima ya rido,+ mpi ta sala ti menga+ na yo mutindu yandi salaka na menga ya ngombe ya bakala; yandi fwete mwanga yo na ndambu ya mufiniku mpi na ntwala ya mufiniku.

16 “Yandi fwete fika masumu ya kisika ya santu sambu na mambu ya mvindu ya bantu ya Izraele, sambu na mambu na bo ya mbi, mpi masumu+ na bo, mpi yai mambu yina yandi fwete sala sambu na tenta ya lukutakanu, yina kele na kati na bo na kati-kati ya mambu na bo ya mvindu.

17 “Muntu ya nkaka fwete vanda ve na tenta ya lukutakanu ntangu yandi ke kota sambu na kufika masumu na kisika ya santu tii kuna yandi ta basika. Yandi ta fika masumu na yandi mosi, ya nzo na yandi,+ mpi ya dibundu ya mvimba ya Izraele.+

18 “Na nima, yandi ta basika sambu na kukwenda na mesa-kimenga,+ yina kele na ntwala ya Yehowa, mpi kufika masumu na yo, mpi yandi ta baka ndambu ya menga ya ngombe ya bakala mpi ndambu ya menga ya nkombo mpi kutula yo na zulu ya bibongo ya mesa-kimenga na bandambu yonso. 19 Yandi ta mwanga mpi ndambu ya menga na zulu na yo ti musapi na yandi mbala nsambwadi mpi kukumisa yo bunkete mpi kusantisa yo na mambu ya mvindu ya bantu ya Izraele.

20 “Ntangu yandi ta manisa kufika masumu+ sambu na kisika ya santu, tenta ya lukutakanu, mpi mesa-kimenga,+ yandi ta pesa mpi nkombo+ ya moyo. 21 Aroni ta tula maboko na yandi zole na ntu ya nkombo ya moyo mpi ta funguna na zulu na yo bifu yonso ya bantu ya Izraele, mambu na bo yonso ya mbi, mpi masumu na bo yonso, ebuna yandi ta tula yo na ntu ya nkombo+ yina mpi ta tinda yo na ntoto-makanga na maboko ya muntu mosi yina bo solaka sambu na kusala yo.* 22 Nkombo yina ta nata na zulu na yo bifu+ na bo yonso na ntoto ya zelo na zelo,+ mpi yandi ta tinda nkombo yina na ntoto-makanga.+

23 “Na nima, Aroni ta kota na tenta ya lukutakanu mpi ta katula bilele ya lino yina yandi lwataka ntangu yandi kotaka na kisika ya santu, mpi yandi ta tulula yo kuna. 24 Yandi fwete yobila* masa+ na kisika mosi ya santu mpi kulwata bilele na yandi;+ na nima yandi ta basika, ta pesa dikabu na yandi ya kuyoka+ ti dikabu ya kuyoka+ ya bantu mpi yandi ta fika masumu na yandi mosi ti ya bantu.+ 25 Yandi ta yoka mafuta ya dikabu sambu na disumu na zulu ya mesa-kimenga sambu yo basisa midinga.

26 “Muntu yina tindaka nkombo sambu na Azazele+ fwete yobisa bilele na yandi mpi kuyobila masa, mpi na nima yandi lenda kwisa kukota na camp.

27 “Ngombe ya bakala ya dikabu sambu na disumu mpi nkombo ya dikabu sambu na disumu, yina bo nataka menga na yo na kisika ya santu sambu na kufika masumu, bo ta nata yo na nganda ya camp, mpi bo ta yoka bampusu na yo, nsuni na yo, mpi tufi na yo na tiya.+ 28 Muntu yina ke yoka yo fwete yobisa bilele na yandi mpi kuyobila masa, mpi na nima yandi lenda kota na camp.

29 “Yo ta vanda nsiku ya mvula na mvula sambu na beno: Na ngonda ya nsambwadi, na kilumbu ya kumi ya ngonda, beno fwete kudimonisa* mpasi, mpi beno fwete sala ve ata kisalu mosi,+ yo vanda munkwa-nsi to munzenza yina ke zinga na kati na beno. 30 Na kilumbu yina, bo ta fika masumu+ na beno, sambu na kutuba nde beno kele bunkete. Beno ta kuma bunkete na masumu na beno yonso na ntwala ya Yehowa.+ 31 Yo kele kisabatu ya kupema kibeni sambu na beno, mpi beno fwete kudimonisa* mpasi.+ Yo kele nsiku ya mvula na mvula.

32 “Nganga-nzambi yina bo me tula mafuta+ mpi yina bo me tula* sambu yandi vanda nganga-nzambi+ na kisika ya tata+ na yandi ta fika masumu mpi ta lwata bilele ya lino,+ bilele ya santu.+ 33 Yandi ta fika masumu ya kisika ya santu,+ ya tenta ya lukutakanu,+ mpi ya mesa-kimenga;+ mpi yandi ta fika masumu ya banganga-nzambi mpi ya bantu yonso ya dibundu.+ 34 Yai ta vanda nsiku ya mvula na mvula sambu na beno,+ sambu na kufika masumu sambu na bantu ya Izraele sambu na masumu na bo yonso mbala mosi konso mvula.”+

Yo yina, yandi salaka kaka mutindu Yehowa songaka Moize.

17 Yehowa tubilaka diaka Moize nde: 2 “Tubila Aroni ti bana na yandi mpi bantu yonso ya Izraele nde, ‘Yai nsiku yina Yehowa me pesa:

3 “‘“Kana muntu mosi ya nzo ya Izraele me fwa ngombe ya bakala to mwana-dimeme ya bakala to nkombo na kati ya camp to kana yandi me fwa yo na nganda ya camp, 4 na kisika ya kunata yo na munoko ya tenta ya lukutakanu sambu na kupesa yo bonso dikabu na Yehowa na ntwala ya nzo-tenta ya Yehowa, muntu yina ta vanda ti mfuka ya menga. Yandi me tiamuna menga, mpi bo fwete katula* muntu yina na kati ya bantu na yandi. 5 Mpidina bantu ya Izraele ta nata bimenga, yina bo ke tambika ntangu yai na nseke, na Yehowa, na munoko ya tenta ya lukutakanu, na nganga-nzambi. Bo ta tambika yo bonso bimenga ya kinduku na Yehowa.+ 6 Nganga-nzambi ta mwanga menga na mesa-kimenga ya Yehowa na munoko ya tenta ya lukutakanu mpi ta yoka mafuta sambu yo basisa midinga bonso nsudi ya kitoko* sambu na Yehowa.+ 7 Yo yina, bo fwete pesa diaka ve bimenga na bademo yina kele bonso bankombo,*+ yina bo ke sala kindumba ti bo.+ Yai ta vanda nsiku ya mvula na mvula sambu na beno na bandonga na beno yonso ya bantu.”’

8 “Nge fwete tubila bo nde, ‘Konso muntu ya nzo ya Izraele to konso munzenza yina ke zinga na kati na beno, yina ke pesa dikabu ya kuyoka to kimenga 9 mpi yina ke nata yo ve na munoko ya tenta ya lukutakanu sambu na kupesa yo na Yehowa, bo fwete katula* yandi na kati ya bantu na yandi.+

10 “‘Kana muntu mosi ya nzo ya Izraele to munzenza mosi yina ke zinga na kati na beno kudia menga+ ya konso mutindu yina, mono ta buya muntu* yina ke dia menga mpi mono ta katula* yandi na kati ya bantu na yandi. 11 Sambu luzingu* ya kigangwa yina ke zingaka kele na menga,+ mpi mono mosi me pesa yo na mesa-kimenga+ sambu na beno sambu na kufika masumu na beno,* sambu menga kele kima yina ke fikaka masumu+ na nsadisa ya luzingu* yina kele na kati na yo. 12 Yo yina mono tubilaka bantu ya Izraele nde: “Muntu mosi ve* na kati na beno fwete dia menga, mpi munzenza mosi ve yina ke zinga na kati na beno+ fwete dia menga.”+

13 “‘Kana muntu mosi na kati ya bantu ya Izraele to munzenza mosi yina ke zinga na kati na beno ke zomba mpi me kanga mbisi ya mfinda to ndeke yina bo lenda dia, yandi fwete tiamuna+ menga na yo mpi kufika yo mfututu. 14 Sambu luzingu* ya konso kigangwa yina ke zingaka kele menga na yo, sambu luzingu* kele na kati na yo. Yo yina, mono tubilaka bantu ya Izraele nde: “Beno fwete dia ve menga ya konso kigangwa yina ke zingaka sambu luzingu* ya konso kigangwa yina ke zingaka kele menga na yo. Konso muntu yina ke dia yo, bo fwete fwa*+ yandi.” 15 Kana konso muntu yina,* yo vanda munkwa-nsi to munzenza, kudia mbisi yina yandi kutaka ya kufwa to yina mbisi mosi ya mfinda pasulaka,+ yandi fwete yobisa bilele na yandi, kuyobila masa, mpi kuvanda mvindu tii na nkokila;+ ebuna yandi ta kuma bunkete. 16 Kansi, kana yandi yobisa yo ve mpi kuyobila* ve, yandi ta vutula munoko sambu na kifu na yandi.’”+

18 Yehowa landaka kutubila Moize nde: 2 “Tubila bantu ya Izraele nde, ‘Mono kele Yehowa Nzambi na beno.+ 3 Beno fwete sala ve mambu mutindu bo ke salaka na insi ya Ezipte, kisika beno vandaka kuzinga, mpi beno fwete sala ve mambu yina bo ke sala na insi ya Kanana, kisika mono ke nata beno.+ Beno fwete zitisa ve bansiku na bo. 4 Beno fwete lemfukila bankanu na mono, mpi beno fwete zitisa bansiku na mono mpi kulanda yo.+ Mono kele Yehowa Nzambi na beno. 5 Beno fwete zitisa bansiku na mono mpi bankanu na mono; muntu yina ke salaka mutindu yina ta zinga na nzila na yo.+ Mono kele Yehowa.

6 “‘Muntu mosi ve na kati na beno fwete pusana pene-pene ya bampangi na yandi ya dibuta mosi sambu na kuvukisa nitu ti bo.*+ Mono kele Yehowa. 7 Nge fwete vukisa ve nitu ti tata na nge, mpi nge fwete vukisa ve nitu ti mama na nge. Yandi kele mama na nge, mpi nge fwete vukisa ve nitu ti yandi.

8 “‘Nge fwete vukisa ve nitu ti nkento ya tata na nge.+ Yo kele kupesa tata na nge nsoni.*

9 “‘Nge fwete vukisa ve nitu ti mpangi na nge ya nkento, yo vanda mwana ya tata na nge to mwana ya mama na nge, ata yandi butukaka nzo mosi ti nge to ve.+

10 “‘Nge fwete vukisa ve nitu ti mwana ya mwana na nge ya bakala to ti mwana ya mwana na nge ya nkento, sambu bo kele kinkonga na nge mosi.

11 “‘Nge fwete vukisa ve nitu ti mwana ya nkento ya tata na nge, mwana ya tata na nge, sambu yandi kele mpangi na nge ya nkento.

12 “‘Nge fwete vukisa ve nitu ti mpangi-nkento ya tata na nge. Yandi kele mpangi ya menga+ ya tata na nge.

13 “‘Nge fwete vukisa ve nitu ti mpangi-nkento ya mama na nge, sambu yandi kele mpangi ya menga ya mama na nge.

14 “‘Nge fwete monisa ve mpangi-bakala ya tata na nge nsoni* na kuvukisaka nitu ti nkento na yandi. Yandi kele tata-nkento+ na nge.

15 “‘Nge fwete vukisa ve nitu ti bokilo na nge ya nkento.+ Yandi kele nkento ya mwana na nge ya bakala, mpi nge fwete vukisa ve nitu ti yandi.

16 “‘Nge fwete vukisa ve nitu ti nkento ya mpangi na nge ya bakala,+ sambu yo kele kupesa mpangi na nge ya bakala nsoni.*

17 “‘Nge fwete vukisa ve nitu ti nkento mosi mpi mwana na yandi ya nkento.+ Nge fwete baka ve mwana ya mwana na yandi ya bakala mpi mwana ya mwana na yandi ya nkento sambu na kuvukisa nitu ti bo. Bo kele bampangi na yandi ya dibuta mosi; yo kele diambu ya nsoni.*

18 “‘Nge fwete baka ve nkento mosi ti mpangi na yandi ya nkento sambu yandi vanda mbanda+ na yandi mpi kuvukisa nitu ti yandi ntangu mpangi na yandi ya nkento kele na luzingu.

19 “‘Nge fwete pusana ve pene-pene ya nkento na nsungi ya mvindu na yandi ya kumona menga sambu na kuvukisa nitu ti yandi.+

20 “‘Nge fwete vukisa ve nitu ti nkento ya nkweno na nge,* na mutindu yina nge ta kudikumisa mvindu.+

21 “‘Nge fwete bika ve nde bo pesa* mwana na nge ata mosi na Moleki.+ Nge fwete vweza ve zina ya Nzambi na nge na mutindu yina.+ Mono kele Yehowa.

22 “‘Nge fwete lala ve ti bakala mutindu nge ke lalaka ti nkento.+ Yo kele diambu ya nzanzi.

23 “‘Bakala fwete vukisa ve nitu ti mbisi mpi kukuma mvindu na nzila na yo; mpi nkento fwete kudipesa ve na mbisi sambu na kuvukisa nitu ti yo.+ Yo kele kukonda kuzitisa mutindu bo me yidikaka mambu.

24 “‘Beno kudikumisa ve mvindu na diambu mosi na kati ya mambu yai, sambu makanda yina mono ke kula na ntwala na beno me kudikumisaka mvindu+ na nzila ya mambu yai yonso. 25 Yo yina, insi yina kele mvindu, mpi mono ta pesa yo ndola sambu na kifu na yo, mpi insi yina ta luka bantu na yo.+ 26 Kansi beno, beno fwete zitisa bansiku na mono ti bankanu na mono,+ mpi beno fwete sala ve diambu mosi na kati ya mambu yai ya nzanzi, yo vanda munkwa-nsi to munzenza yina ke zinga na kati na beno.+ 27 Sambu bantu yina zingaka na insi yina na ntwala na beno+ salaka mambu yai yonso ya nzanzi, yo yina insi yina kele mvindu. 28 Ebuna insi yina ta luka beno ve sambu beno me kumisa yo mvindu, mutindu yo ta luka makanda yina vandaka na ntwala na beno. 29 Kana muntu kusala diambu mosi na kati ya mambu yai ya nzanzi, bantu* yonso yina ke salaka yo, bo fwete katula* bo na kati ya bantu na bo. 30 Beno fwete lungisa mambu yina mono ke lomba beno: Beno landa ve ata kinkulu mosi ya nzanzi yina bantu vandaka kusala na ntwala na beno,+ sambu beno kudikumisa ve mvindu na nzila na yo. Mono kele Yehowa Nzambi na beno.’”

19 Yehowa tubilaka diaka Moize nde: 2 “Tubila kimvuka ya mvimba ya bantu ya Izraele nde, ‘Beno fwete vanda santu, sambu mono, Yehowa Nzambi na beno, mono kele santu.+

3 “‘Konso muntu na kati na beno fwete zitisa* mama na yandi mpi tata na yandi,+ mpi beno fwete zitisa bisabatu+ na mono. Mono kele Yehowa Nzambi na beno. 4 Beno baluka ve sambu na kukwenda na banzambi ya kukonda mfunu+ mpi beno kudisadila ve banzambi ya bibende ya bo me lamba na tiya.+ Mono kele Yehowa Nzambi na beno.

5 “‘Kana beno ke pesa Yehowa kimenga ya kinduku,+ beno fwete tambika yo na mutindu yina ta sala nde yandi ndima beno.+ 6 Beno fwete dia yo na kilumbu ya kimenga na beno mpi na kilumbu yina ke landa, kansi yina ke bikala tii na kilumbu ya tatu, beno fwete yoka yo na tiya.+ 7 Kana beno dia ndambu na yo na kilumbu ya tatu, yo kele kima ya mbi yina ta ndimama ve. 8 Muntu yina ke dia yo ta vutula munoko sambu na kifu na yandi sambu yandi me vweza kima ya santu ya Yehowa, mpi bo fwete katula* muntu* yina na kati ya bantu na yandi.

9 “‘Ntangu beno ke katula bima na bilanga ya insi na beno, nge fwete katula ve bima yonso yina kele na ndilu ya kilanga na nge mpi nge fwete lokuta ve bima yina ke bikala ntangu nge ke katula bima na bilanga.+ 10 Diaka, nge fwete katula ve bambuma yina me bikala na kilanga na nge ya vinu to kulokuta bambuma ya vinu yina me bwa na ntoto na kilanga na nge ya vinu. Nge fwete bikisa yo sambu na nsukami*+ mpi munzenza. Mono kele Yehowa Nzambi na beno.

11 “‘Beno fwete yiba ve,+ beno fwete kusa ve,+ mpi beno fwete sadilana ve mambu ti luvunu. 12 Beno fwete zenga ve kieleka na zina na mono+ sambu na diambu ya luvunu mpi na mutindu yina kuvweza zina ya Nzambi na nge. Mono kele Yehowa. 13 Nge fwete kusa ve nkweno na nge,+ mpi nge fwete yiba ve.+ Nge fwete kanga ve mpimpa ya mvimba tii na suka lufutu ya muntu ya kisalu yina ke bakaka lufutu.+

14 “‘Nge fwete singa ve* kifwa-makutu mpi nge fwete tula ve sakuba na ntwala ya kifwa-meso,+ mpi nge fwete wa Nzambi na nge boma.+ Mono kele Yehowa.

15 “‘Beno fwete sala ve mambu kukonda lunungu ntangu beno ke sambisa. Nge fwete monisa ve kupona-pona sambu na nsukami to zola ya mingi sambu na mvwama.+ Nge fwete sambisa nkweno na nge ti lunungu.

16 “‘Nge fwete tambula-tambula ve na kati ya bantu na nge+ sambu na kukusila bantu makambu. Nge fwete sosa ve kukatula luzingu* ya nkweno na nge.*+ Mono kele Yehowa.

17 “‘Nge fwete menga ve mpangi na nge na ntima+ na nge. Nge fwete nganina kibeni nkweno na nge,+ mpidina nge ta kudikotisa ve na disumu na yandi.

18 “‘Nge fwete vutula ve mbi+ to kubumbila bana ya bantu na nge kimbeni na ntima, mpi nge fwete zola nkweno na nge bonso nge mosi.+ Mono kele Yehowa.

19 “‘Beno fwete zitisa bansiku na mono: Nge fwete sala ve nde bambisi na nge ya bwala ya mitindu zole kuvukisa nitu. Nge fwete kuna ve nkeni+ ya mitindu zole na kilanga na nge, mpi nge fwete lwata ve lele yina bo me tunga ti bansinga ya mitindu zole yina bo me vukisa.+

20 “‘Ntangu yai, kana bakala mosi kulala ti nkento mosi mpi kuvukisa nitu ti yandi, kansi nkento yina kele nsadi ya bo me solaka sambu na bakala ya nkaka, mpi bo me sumbaka yandi diaka ve to me pesaka yandi ve kimpwanza, bo fwete pesa bo ndola. Kansi, bo fwete fwa bo ve, sambu bo me pesa ntete ve nkento yina kimpwanza. 21 Bakala yina fwete nata dikabu na yandi sambu na makambu na Yehowa na munoko ya tenta ya lukutakanu, dimeme ya bakala ya dikabu sambu na makambu.+ 22 Nganga-nzambi ta fika masumu na yandi ti dimeme ya bakala ya dikabu sambu na makambu na ntwala ya Yehowa sambu na disumu yina yandi salaka, ebuna bo ta lolula yandi sambu na disumu yina yandi salaka.

23 “‘Ntangu beno ke kota na insi yina mpi beno kuna konso nti yina sambu na madia, beno fwete mona mbuma na yo bonso kima ya mvindu mpi ya bo me buyisa.* Na nsungi ya bamvula tatu yo ta vanda kima ya bo me buyisa beno.* Beno fwete dia yo ve. 24 Kansi na mvula ya iya, mbuma na yo yonso ta vanda santu sambu na kuwa kiese na ntwala ya Yehowa.+ 25 Ebuna na mvula ya tanu, beno lenda dia mbuma na yo sambu na kuyika mbuma na yo na bima yina beno ke katula. Mono kele Yehowa Nzambi na beno.

26 “‘Beno fwete dia ve ata kima mosi ya kele ti menga.+

“‘Beno fwete sosa ve bidimbu ya mambu yina ke kwisa to kusala mazi.+

27 “‘Beno fwete zenga ve nsuki yina kele na lweka ya ntu na beno to kubebisa bansongi ya mandefo+ na beno.

28 “‘Beno fwete zenga-zenga ve nsuni na beno sambu na muntu yina me fwa,*+ mpi beno fwete tula ve banzoloko na nitu na beno. Mono kele Yehowa.

29 “‘Kuvweza ve mwana na nge ya nkento na kukumisaka yandi ndumba,+ sambu insi kusala ve kindumba mpi kufulaka ti mambu ya nsoni.+

30 “‘Beno fwete zitisa bisabatu+ na mono, mpi beno fwete monisa luzitu sambu na* kisika na mono ya santu. Mono kele Yehowa.

31 “‘Kukwenda ve na bantu yina ke solulaka ti bampeve ya bafwa,+ mpi kuyula ve bantu yina ke zabisaka bantu mambu yina ta kumina bo,+ kana ve nge ta kuma mvindu na nzila na bo. Mono kele Yehowa Nzambi na beno.

32 “‘Nge fwete telama+ na ntwala ya nsuki ya mpembe, nge fwete pesa mununu+ lukumu, mpi nge fwete wa Nzambi na nge boma.+ Mono kele Yehowa.

33 “‘Kana munzenza ke zinga ti beno na insi na beno, beno fwete niokula yandi ve.+ 34 Munzenza yina ke zinga ti beno fwete kuma sambu na beno bonso munkwa-nsi na kati na beno;+ mpi nge fwete zola yandi bonso nge mosi, sambu beno vandaka banzenza na insi ya Ezipte.+ Mono kele Yehowa Nzambi na beno.

35 “‘Beno fwete sadila ve bitesilu ya luvunu ntangu beno ke tesa nda, kizitu, to bima ya masa.+ 36 Beno fwete sadila kilo ya sikisiki, bitesilu ya kizitu ya sikisiki, kitesilu ya sikisiki ya bima ya kuyuma,* mpi kitesilu ya sikisiki ya bima ya masa.*+ Mono kele Yehowa Nzambi na beno, yina basisaka beno na insi ya Ezipte. 37 Yo yina, beno fwete zitisa bansiku na mono yonso mpi bankanu na mono yonso, mpi beno fwete landa yo.+ Mono kele Yehowa.’”

20 Yehowa tubilaka diaka Moize nde: 2 “Nge fwete tubila bantu ya Izraele nde, ‘Konso muntu ya Izraele mpi konso munzenza yina ke zinga na Izraele yina ke pesa mwana na yandi mosi na Moleki, bo fwete fwa yandi kibeni.+ Bantu ya insi yina fwete fwa yandi na matadi. 3 Mono ta buya muntu yina, mpi mono ta katula* yandi na kati ya bantu na yandi, sambu yandi me pesa mwana na yandi mosi na Moleki, yandi me kumisa kisika na mono ya santu+ mvindu, mpi me vweza zina na mono ya santu. 4 Kana bantu ya insi yina kukanga meso na luzolo yonso na mambu yina yandi ke sala ntangu yandi ke pesa mwana na yandi na Moleki mpi bo fwa yandi ve,+ 5 mono ta buya kibeni muntu yina mpi dibuta+ na yandi. Mono ta katula* muntu yina na kati ya bantu na yandi kumosi ti bantu yonso yina ke vukana ti yandi na kusala kindumba ti Moleki.

6 “‘Sambu na muntu* yina ke kwenda na bantu yina ke solulaka ti bampeve ya bafwa+ mpi na bantu yina ke zabisaka bantu mambu yina ta kumina bo+ sambu na kusala kindumba ya kimpeve ti bo, mono ta balukila kibeni muntu yina mpi ta fwa* yandi na kati ya bantu na yandi.+

7 “‘Beno fwete kudisantisa mpi kukuma santu,+ sambu mono kele Yehowa Nzambi na beno. 8 Beno fwete zitisa bansiku na mono mpi kusadila yo.+ Mono kele Yehowa, muntu yina ke santisa beno.+

9 “‘Kana muntu mosi kusinga* tata na yandi to mama na yandi, bo fwete fwa yandi kibeni.+ Sambu yandi me singa tata na yandi to mama na yandi, menga na yandi kele na ntu na yandi mosi.

10 “‘Ntangu yai, sambu na bakala yina ke sala bizumba ti nkento ya bakala ya nkaka: Muntu yina ke sala bizumba ti nkento ya nkweno na yandi, bo fwete fwa yandi kibeni, bakala yina me sala bizumba mpi nkento yina me sala bizumba.+ 11 Bakala yina ke vukisa nitu ti nkento ya tata na yandi me pesa tata na yandi* nsoni.+ Bo fwete fwa bo zole kibeni. Menga na bo kele na ntu na bo mosi. 12 Kana bakala mosi kulala ti bokilo na yandi ya nkento, bo fwete fwa bo zole kibeni. Bo me zitisa ve mutindu bo me yidikaka mambu. Menga na bo kele na ntu na bo mosi.+

13 “‘Kana bakala mosi kulala ti bakala ya nkaka mutindu bo ke lalaka ti nkento, bo zole me sala diambu ya nzanzi.+ Bo fwete fwa bo kibeni. Menga na bo kele na ntu na bo mosi.

14 “‘Kana bakala mosi kubaka nkento mosi ti mama ya nkento yina, yo kele diambu ya nsoni.*+ Bo fwete yoka bakala yina mpi bankento yina na tiya,+ sambu mambu ya nsoni kulanda ve kusalama na kati na beno.

15 “‘Kana bakala mosi kuvukisa nitu ti mbisi, bo fwete fwa yandi kibeni, mpi beno fwete fwa mbisi yina.+ 16 Kana nkento mosi kupusana pene-pene ya konso mbisi yina sambu na kuvukisa nitu ti yo,+ beno fwete fwa nkento yina mpi mbisi yina. Bo fwete fwa bo kibeni. Menga na bo kele na ntu na bo mosi.

17 “‘Kana bakala mosi kuvukisa nitu ti mpangi na yandi ya nkento, mwana ya tata na yandi to mwana ya mama na yandi, mpi yandi me mona kinkonga na yandi mpi mwana yina ya nkento me mona kinkonga ya bakala yina, yo kele diambu ya nsoni.+ Beno fwete fwa* bo na meso ya bana ya bantu na bo. Yandi me pesa mpangi na yandi ya nkento* nsoni. Yandi fwete vutula munoko sambu na kifu na yandi.

18 “‘Kana bakala mosi me lala ti nkento yina ke mona menga mpi me vukisa nitu ti yandi, bakala yina ti nkento yina bo me monisa kisina ya menga ya nkento yina.+ Beno fwete katula* bo zole na kati ya bantu na bo.

19 “‘Nge fwete vukisa ve nitu ti mpangi-nkento ya mama na nge to mpangi-nkento ya tata na nge, sambu yo ta vanda kumonisa mpangi mosi ya menga nsoni.+ Bo fwete vutula munoko sambu na kifu na bo. 20 Bakala yina ke vukisa nitu ti nkento ya mpangi ya tata na yandi me pesa mpangi ya tata na yandi* nsoni.+ Bo fwete vutula munoko sambu na disumu na bo. Bo fwete fwa kukonda bana. 21 Kana bakala mosi kubaka nkento ya mpangi na yandi ya bakala, yo kele diambu ya mbi kibeni.+ Yandi me pesa mpangi na yandi ya bakala* nsoni. Bo fwete konda bana.

22 “‘Beno fwete zitisa bansiku na mono yonso ti bankanu na mono+ yonso mpi kusadila yo,+ sambu insi yina mono ke nata beno na kuzinga kuluka+ beno ve. 23 Beno fwete zitisa ve bansiku ya makanda yina mono ke kula na ntwala na beno;+ sambu bo me sala mambu yai yonso mpi mono ke menga bo.+ 24 Yo yina mono tubilaka beno nde: “Beno ta baka insi na bo, mpi mono ta pesa beno yo bonso dikabu na beno, insi yina miliki* ti bwiki kele mingi.+ Mono kele Yehowa Nzambi na beno, yina me katulaka beno na kati ya bantu yonso ya nkaka mpi me tulaka beno na kingenga.”+ 25 Beno fwete sala luswaswanu na kati ya mbisi ya bunkete ti ya mvindu mpi na kati ya ndeke ya mvindu ti ya bunkete;+ beno fwete kudikumisa ve* nzanzi na nzila ya mbisi to ya ndeke to ya konso kima yina ke tambulaka divumu na ntoto, yina mono me tula na kingenga sambu beno mona yo bonso kima ya mvindu.+ 26 Beno fwete vanda santu sambu na mono, sambu mono Yehowa, mono kele santu,+ mpi mono ke katula beno na kati ya bantu yonso ya nkaka mpi ke tula beno na kingenga sambu beno kuma bantu na mono.+

27 “‘Konso bakala to nkento yina ke solulaka ti bampeve ya bafwa to ke zabisaka bantu mambu yina ta kumina bo,* bo fwete fwa yandi kibeni.+ Bantu fwete fwa bo na matadi. Menga na bo kele na ntu na bo.’”

21 Yehowa tubilaka diaka Moize nde: “Tubila banganga-nzambi, bana ya Aroni nde, ‘Muntu mosi ve fwete kudikumisa mvindu sambu na muntu* yina me fwa na kati ya bantu na yandi.+ 2 Kansi, yandi lenda sala mutindu yina sambu na mpangi mosi ya menga, sambu na mama na yandi, tata na yandi, mwana na yandi ya bakala, mwana na yandi ya nkento, mpangi na yandi ya bakala, 3 mpi yandi lenda kudikumisa mvindu sambu na mpangi na yandi ya nkento kana yandi kele mwense yina kele pene-pene na yandi mpi yandi me kwelaka ntete ve. 4 Yandi lenda kudikumisa ve mvindu mpi kudikatula ve lukumu sambu na nkento yina kele nkento ya bakala mosi na kati ya bantu na yandi. 5 Bo fwete kumisa ve ba-ntu na bo mabandi+ to kuzenga nsongi ya mandefo na bo to kuzenga-zenga nitu na bo.+ 6 Bo fwete vanda santu sambu na Nzambi na bo,+ mpi bo fwete vweza ve zina ya Nzambi na bo,+ sambu bo ke pesaka makabu ya Yehowa yina bo me yoka na tiya, dimpa* ya Nzambi na bo, mpi bo fwete vanda santu.+ 7 Bo fwete kwela ve nkento ya ndumba,+ nkento yina bo me bebisaka, to nkento yina makwela me fwaka ti bakala na yandi,+ sambu nganga-nzambi kele santu sambu na Nzambi na yandi. 8 Nge fwete santisa yandi,+ sambu yandi kele muntu yina ke pesaka dimpa ya Nzambi na nge. Yandi fwete vanda santu sambu na nge, sambu mono, Yehowa, muntu yina ke santisa beno, mono kele santu.+

9 “‘Kana mwana ya nganga-nzambi me kudikatula lukumu na kusalaka kindumba, yandi me katula lukumu ya tata na yandi. Bo fwete yoka yandi na tiya.+

10 “‘Nganga-nzambi ya nene ya bampangi na yandi, yina bo me tulaka mafuta ya santu na ntu+ mpi yina bo me tulaka na kisalu* sambu yandi lwata bilele ya kinganga-nzambi,+ fwete bika ve nde nsuki na yandi kukuma nda mpi kisaka-saka to kupasula bilele na yandi.+ 11 Yandi fwete pusana ve pene-pene ya konso muntu ya kufwa;*+ yandi lenda kudikumisa ve mvindu ata sambu na tata na yandi to mama na yandi. 12 Yandi fwete basika ve na kisika ya santu mpi yandi fwete vweza ve kisika ya santu ya Nzambi na yandi,+ sambu kidimbu ya kudipesa, mafuta ya santu ya Nzambi na yandi, kele na zulu na yandi.+ Mono kele Yehowa.

13 “‘Yandi fwete kwela nkento yina kele mwense.+ 14 Yandi lenda kwela ve mufwidi ya nkento, nkento yina makwela na yandi me fwaka, nkento yina bo me bebisaka, to nkento ya ndumba; kansi yandi fwete baka mwense na kati ya bantu na yandi sambu na kuvanda nkento na yandi. 15 Yandi fwete katula ve bana* na yandi lukumu na kati ya bantu na yandi,+ sambu mono kele Yehowa, muntu yina ke santisa yandi.’”

16 Yehowa landaka kutubila Moize nde: 17 “Songa Aroni nde, ‘Na bandonga na bo yonso ya bantu, mwana* na nge mosi ve, yina kele ti kifu na nitu lenda pusana sambu na kupesa dimpa ya Nzambi na yandi. 18 Kana muntu mosi kele ti kifu na nitu, yandi lenda pusana ve: muntu yina kele kifwa-meso, dikulu-kifu, to ilungi-kifu,* to kele ti dikulu to diboko nda mingi, 19 to muntu yina kele ti dikulu ya kubukana to diboko ya kubukana, 20 to muntu yina kele ti nkuki to yina kele nkufi kibeni,* to muntu yina kele disu-kifu to yina kele ti maladi ya mpusu ya nitu, to yina kele ti bisampala, to yina kele na bambuma ya kibakala ya kubeba.+ 21 Mwana* mosi ve ya nganga-nzambi Aroni yina kele ti kifu na nitu lenda pusana sambu na kupesa makabu ya Yehowa yina bo me yoka na tiya. Sambu yandi kele ti kifu na nitu, yandi lenda pusana ve sambu na kupesa dimpa ya Nzambi na yandi. 22 Yandi lenda dia dimpa ya Nzambi na yandi ya me katuka na bima ya kuluta santu+ mpi na bima ya santu.+ 23 Kansi, yandi lenda pusana ve pene-pene ya rido,+ mpi yandi lenda pusana ve pene-pene ya mesa-kimenga,+ sambu yandi kele ti kifu na nitu; mpi yandi fwete vweza ve kisika na mono ya santu,+ sambu mono kele Yehowa, muntu yina ke santisa bo.’”+

24 Mutindu yo yai Moize tubilaka Aroni ti bana na yandi mpi bantu yonso ya Izraele.

22 Yehowa tubilaka diaka Moize nde: 2 “Songa Aroni mpi bana na yandi nde bo fwete keba na mutindu bo ke sadila* bima ya santu ya bantu ya Izraele mpi bo fwete vweza ve zina na mono ya santu+ na yina me tala bima yina bo ke santisa sambu na mono.+ Mono kele Yehowa. 3 Tubila bo nde, ‘Na bandonga na beno yonso ya bantu, konso mwana na beno, ntangu yandi kele mvindu, kana yandi pusana pene-pene ya bima ya santu yina bantu ya Izraele ke santisa sambu na Yehowa, bo fwete fwa* muntu* yina na ntwala na mono.+ Mono kele Yehowa. 4 Mwana mosi ve ya Aroni yina ke bela maladi ya lepre+ to yina masa+ ke basika yandi lenda dia bima ya santu tii ntangu yandi ta kuma bunkete,+ yo vanda muntu yina me simba muntu yina me kuma mvindu na nzila ya muntu ya kufwa,*+ to muntu yina ke basika masa ya babakala,+ 5 to muntu yina me simba kigangwa ya ke tambulaka na kimvuka yina kele mvindu+ to muntu yina me simba muntu yina kele mvindu sambu na konso kikuma yina mpi yina lenda kumisa yandi mvindu.+ 6 Muntu yina ke simba konso kima na kati ya bima yai ta vanda mvindu tii na nkokila mpi yandi lenda dia ve ata kima mosi ya santu, kansi yandi fwete yobila masa.+ 7 Ntangu ntangu ta dinda, yandi ta kuma bunkete, mpi na nima yandi lenda dia ndambu ya bima ya santu sambu yo kele madia na yandi.+ 8 Diaka, yandi fwete dia ve konso mbisi yina bo me mona ya kufwa to konso kima yina mbisi ya mfinda me pasula mpi kukuma mvindu na nzila na yo.+ Mono kele Yehowa.

9 “‘Bo fwete lungisa mambu yina mono ke lomba bo, sambu bo nata ve disumu sambu na yo mpi bo fwa sambu na yo sambu bo vandaka kuvweza yo. Mono kele Yehowa, muntu yina ke santisa bo.

10 “‘Muntu mosi ve ya kele ve ti nswa* lenda dia kima ya santu.+ Munzenza ya nganga-nzambi to muntu ya kisalu yina ke bakaka lufutu lenda dia ve kima ya santu. 11 Kansi, kana nganga-nzambi me sumba muntu* mosi na mbongo na yandi mosi, muntu yina lenda dia yo. Bampika yina me butuka na nzo na yandi lenda dia mpi madia na yandi.+ 12 Kana mwana ya nganga-nzambi mosi me kwela muntu yina kele ve nganga-nzambi,* yandi lenda dia ve dikabu ya bima ya santu. 13 Kansi, kana mwana ya nganga-nzambi mosi me kuma mufwidi to makwela na yandi me fwa, yandi kele ve ti bana, mpi yandi me vutuka na nzo ya tata na yandi bonso na kileke na yandi, yandi lenda dia ndambu ya madia ya tata na yandi;+ kansi muntu mosi ve ya kele ve ti nswa* lenda dia yo.

14 “‘Kana muntu mosi kudia kima mosi ya santu na kidiba, yandi fwete yika ndambu mosi na kati ya bandambu tanu ya ntalu na yo mpi kupesa dikabu ya santu na nganga-nzambi.+ 15 Yo yina, bo fwete vweza ve bima ya santu ya bantu ya Izraele yina bo ke pesa Yehowa+ 16 mpi kusala nde bo baka ndola sambu na mbi na bo sambu bo diaka bima na bo ya santu; sambu mono kele Yehowa, muntu yina ke santisa bo.’”

17 Yehowa landaka kutubila Moize nde: 18 “Tubila Aroni ti bana na yandi mpi bantu yonso ya Izraele nde, ‘Kana muntu mosi ya Izraele to munzenza yina ke zinga na Izraele ke pesa Yehowa dikabu ya kuyoka+ sambu na kulungisa balusilu na yandi to sambu na kupesa dikabu ya luzolo ya mbote,+ 19 yandi fwete pesa mbisi ya bakala ya kukonda kifu+ ya me katuka na bangombe, bana-mameme ya babakala, to bankombo, sambu Nzambi kundima yo. 20 Beno fwete pesa ve konso kima yina kele ti kifu,+ sambu yo ta sadisa beno ve sambu Nzambi kundima beno.

21 “‘Kana muntu ke pesa Yehowa kimenga ya kinduku+ sambu na kulungisa lusilu mosi to bonso dikabu ya luzolo ya mbote, yo fwete vanda mbisi ya kukonda kifu ya me katuka na bangombe to na mameme, sambu Nzambi kundima yo. Yo fwete vanda ve ti kifu ata fioti. 22 Ata dikabu mosi ve fwete vanda meso ya kufwa, ya kubukana, ti mputa, ti kivimbu, ti dikwanza, to ti kisampala; beno fwete pesa ve kima mosi na kati ya bima yai na Yehowa to kupesa dikabu ya mutindu yai na mesa-kimenga sambu na Yehowa. 23 Nge lenda pesa ngombe ya bakala to dimeme yina kele ti dikulu to diboko ya kele nda mingi to nkufi mingi bonso dikabu ya luzolo ya mbote, kansi yo ta ndimama ve bonso dikabu ya lusilu. 24 Kansi, beno fwete pesa ve Yehowa mbisi yina kele ti bambuma ya kibakala ya kubeba to ya kupanzana to ya kukatuka to ya kuzenga, mpi beno fwete pesa ve bambisi ya mutindu yina na insi na beno. 25 Beno fwete pesa ve kima mosi ya mutindu yai ya me katuka na maboko ya munzenza bonso dimpa ya Nzambi na beno, sambu yo kele ya kubeba mpi yo kele ti kifu. Yo ta ndimama ve sambu na beno.’”

26 Yehowa tubilaka diaka Moize nde: 27 “Kana ngombe ya bakala to mwana-dimeme ya bakala to nkombo me butuka, yo fwete landa kuvanda ti mama na yo bilumbu nsambwadi,+ kansi katuka kilumbu ya nana tii kuna yo ta ndimama bonso dikabu, dikabu yina bo me yoka na tiya sambu na Yehowa. 28 Sambu na ngombe ya bakala to dimeme, beno fwete fwa yo ve kilumbu mosi+ ti mwana na yo.

29 “Kana beno ke tambika kimenga sambu na kupesa matondo na Yehowa,+ beno fwete tambika yo sambu Nzambi kundima beno. 30 Beno ta dia yo na kilumbu yina. Beno fwete bika ve ndambu na yo tii na suka.+ Mono kele Yehowa.

31 “Beno fwete zitisa bansiku na mono mpi kusadila yo.+ Mono kele Yehowa. 32 Beno fwete vweza ve zina na mono ya santu,+ mpi mono fwete santisama na kati-kati ya bantu ya Izraele,+ mono kele Yehowa, muntu yina ke santisa beno,+ 33 muntu yina ke basisa beno na insi ya Ezipte sambu na kudimonisa nde mono kele Nzambi na beno.+ Mono kele Yehowa.”

23 Yehowa landaka kutubila Moize nde: 2 “Tubila bantu ya Izraele mpi songa bo nde, ‘Bankinsi ya Yehowa yina fwete salama na bansungi,+ yina beno fwete zabisa,+ kele balukutakanu ya santu. Yai bankinsi na mono yina fwete salama na bansungi:

3 “‘Beno lenda sala kisalu bilumbu sambanu, kansi kilumbu ya nsambwadi kele kisabatu ya kupema kibeni,+ lukutakanu mosi ya santu. Beno lenda sala ve ata kisalu mosi. Yo fwete vanda kisabatu sambu na Yehowa na konso kisika yina beno ke zinga.+

4 “‘Yai bankinsi ya Yehowa yina fwete salama na bansungi, balukutakanu ya santu, yina beno fwete zabisa na bantangu ya bo me tulaka sambu na yo: 5 Na ngonda ya ntete, na kilumbu ya 14 ya ngonda,+ na nkokila,* yo kele Paki+ sambu na Yehowa.

6 “‘Kilumbu ya 15 ya ngonda yai kele Nkinsi ya Mampa ya Kukonda Levire sambu na Yehowa.+ Beno ta dia mampa ya kukonda levire+ bilumbu nsambwadi. 7 Na kilumbu ya ntete, beno ta sala lukutakanu mosi ya santu.+ Beno fwete sala ve ata kisalu mosi ya ngolo. 8 Kansi beno ta pesa Yehowa dikabu yina bo me yoka na tiya bilumbu nsambwadi. Kilumbu ya nsambwadi ta vanda lukutakanu mosi ya santu. Beno fwete sala ve ata kisalu mosi ya ngolo.’”

9 Yehowa landaka kutubila Moize nde: 10 “Tubila bantu ya Izraele mpi songa bo nde, ‘Nsuka-nsuka ntangu beno ta kota na insi yina mono ke pesa beno mpi beno me katula bima na yo na bilanga, beno fwete nata na nganga-nzambi+ kita ya bambuma ya ntete+ ya beno me katula na bilanga. 11 Ebuna yandi ta nikisa kita yina na ntwala mpi na nima na ntwala ya Yehowa sambu Nzambi kundima beno. Nganga-nzambi fwete nikisa yo na kilumbu yina ke landa Kisabatu. 12 Kilumbu yina beno ta nikisa kita ya bambuma, beno fwete pesa mwana-dimeme ya bakala ya kukonda kifu yina kele na mvula na yo ya ntete, bonso dikabu ya kuyoka sambu na Yehowa. 13 Dikabu na yo ya mbuma ta vanda bandambu zole na kati ya bandambu kumi ya efa* ya fufu ya kitoko yina bo me vukisa ti mafuta, bonso dikabu yina bo me yoka na tiya sambu na Yehowa, dikabu ya nsudi ya kitoko.* Dikabu na yo ya malafu ta vanda ndambu mosi na kati ya bandambu iya ya hini* ya vinu. 14 Beno fwete dia ve dimpa, mbuma ya kukalanga, to mbuma ya mpa tii na kilumbu yai, tii kuna beno ta nata dikabu ya Nzambi na beno. Yo kele nsiku ya mvula na mvula sambu na bandonga na beno yonso ya bantu na konso kisika yina beno ke zinga.

15 “‘Beno fwete tanga bisabatu nsambwadi yantika kilumbu yina me landa Kisabatu, yantika kilumbu yina beno ke nata kita ya bambuma ya dikabu ya kunikisa.+ Yo fwete vanda bamposo ya mvimba. 16 Beno ta tanga bilumbu 50+ tii na kilumbu yina ke landa Kisabatu ya nsambwadi, mpi na nima beno fwete pesa dikabu ya mbuma ya mpa na Yehowa.+ 17 Katuka na bisika yina beno ke zingaka, beno fwete nata mampa zole bonso dikabu ya kunikisa. Bo fwete sala yo na bandambu zole na kati ya bandambu kumi ya efa* ya fufu ya kitoko. Bo fwete yoka yo ti levire,+ bonso bambuma ya ntete ya kuyela sambu na Yehowa.+ 18 Beno fwete pesa mampa yina kumosi ti bana-mameme nsambwadi ya babakala ya kukonda kifu, konso mbisi fwete vanda ti mvula mosi, mpi mwana-ngombe mosi ya bakala ti mameme zole ya babakala.+ Beno ta pesa yo bonso dikabu ya kuyoka na Yehowa kumosi ti dikabu ya mbuma mpi makabu ya malafu ya me fwanana, bonso dikabu yina bo me yoka na tiya, dikabu ya nsudi ya kitoko* sambu na Yehowa. 19 Beno fwete pesa mwana-nkombo mosi bonso dikabu sambu na disumu+ mpi bana-mameme zole ya babakala, konso mbisi fwete vanda ti mvula mosi, bonso kimenga ya kinduku.+ 20 Nganga-nzambi ta nikisa yo na nima mpi na ntwala kumosi ti mampa ya bambuma ya ntete ya kuyela, bonso dikabu ya kunikisa na ntwala ya Yehowa, kumosi ti bana-mameme zole ya babakala. Yo fwete vanda bonso kima ya santu sambu na Yehowa, sambu na nganga-nzambi.+ 21 Na kilumbu yai beno ta zabisa+ nde beno kele ti lukutakanu mosi ya santu. Beno lenda sala ve ata kisalu mosi ya ngolo. Yo kele nsiku ya mvula na mvula na bisika na beno yonso ya kuzinga sambu na bandonga na beno yonso ya bantu.

22 “‘Ntangu beno ke katula bima na bilanga ya insi na beno, nge fwete katula ve bima yonso ya kele na ndilu ya kilanga na nge mpi nge fwete lokuta ve yina ke bikala ntangu nge ke katula bima na bilanga.+ Nge fwete bikisa yo sambu na nsukami*+ mpi sambu na munzenza.+ Mono kele Yehowa Nzambi na beno.’”

23 Yehowa tubilaka diaka Moize nde: 24 “Songa bantu ya Izraele nde, ‘Na ngonda ya nsambwadi, na kilumbu ya ntete ya ngonda, beno fwete pema kibeni, yo ta vanda kilumbu mosi ya kuyibuka yina beno ta bula mpungi sambu na kuzabisa yo,+ lukutakanu mosi ya santu. 25 Beno lenda sala ve ata kisalu mosi ya ngolo, mpi beno ta pesa Yehowa dikabu yina bo me yoka na tiya.’”

26 Yehowa tubilaka diaka Moize nde: 27 “Kansi, kilumbu ya kumi ya ngonda yai ya nsambwadi kele Kilumbu ya Kufika Masumu.+ Beno fwete sala lukutakanu mosi ya santu, mpi beno fwete kudimonisa* mpasi+ mpi kupesa Yehowa dikabu yina bo me yoka na tiya. 28 Beno fwete sala ve ata kisalu mosi ya ngolo na kilumbu yai ya mfunu sambu yo kele kilumbu ya kufika masumu sambu na kufika masumu+ na beno na ntwala ya Yehowa Nzambi na beno. 29 Konso muntu* yina ta kudipesa ve mpasi* na kilumbu yai, bo fwete katula* yandi na kati ya bantu na yandi.+ 30 Ebuna konso muntu* yina ke sala konso kisalu na kilumbu yina, mono ta fwa yandi na kati ya bantu na yandi. 31 Beno fwete sala ve ata kisalu mosi. Yo kele nsiku ya mvula na mvula sambu na bandonga na beno yonso ya bantu na bisika yonso ya beno ke zinga. 32 Yo kele kisabatu ya kupema kibeni sambu na beno, mpi beno ta kudimonisa* mpasi+ na kilumbu ya uvwa ya ngonda yina na nkokila. Beno fwete zitisa kisabatu na beno katuka na nkokila tii na nkokila.”

33 Yehowa landaka kutubila Moize nde: 34 “Songa bantu ya Izraele nde, ‘Kilumbu ya 15 ya ngonda yai ya nsambwadi kele Nkinsi ya Bisasa* sambu na bilumbu nsambwadi sambu na Yehowa.+ 35 Beno ta vanda ti lukutakanu mosi ya santu na kilumbu ya ntete, mpi beno fwete sala ve ata kisalu mosi ya ngolo. 36 Bilumbu nsambwadi beno fwete pesa Yehowa dikabu yina bo me yoka na tiya. Na kilumbu ya nana, beno fwete sala lukutakanu mosi ya santu,+ mpi beno fwete pesa Yehowa dikabu yina bo me yoka na tiya. Yo kele lukutakanu ya santu. Beno lenda sala ve ata kisalu mosi ya ngolo.

37 “‘Yai bankinsi ya Yehowa yina fwete salama na bansungi+ yina beno fwete zabisa bonso balukutakanu+ ya santu, sambu na kupesa Yehowa dikabu yina bo me yoka na tiya: dikabu ya kuyoka,+ dikabu ya mbuma+ ya kimenga, mpi makabu ya malafu+ na kutadila manaka ya konso kilumbu. 38 Beno fwete pesa makabu yina na zulu ya makabu yina beno ke pesaka na bisabatu ya Yehowa,+ makabu na beno,+ makabu na beno ya lusilu,+ mpi makabu na beno ya luzolo ya mbote,+ yina beno fwete pesa Yehowa. 39 Kansi, na kilumbu ya 15 ya ngonda ya nsambwadi, ntangu beno ta vukisa bima ya insi yina, beno fwete sala nkinsi ya Yehowa bilumbu nsambwadi.+ Kilumbu ya ntete kele kupema kibeni mpi kilumbu ya nana kele kupema kibeni.+ 40 Na kilumbu ya ntete, beno ta baka bambuma ya banti ya nene, mandalala ya maba,+ balutangu ya banti yina kele ti matiti mingi, mpi banti ya pepliye ya muwanda, mpi beno ta wa kiese+ na ntwala ya Yehowa Nzambi na beno bilumbu nsambwadi.+ 41 Beno ta ta yo bonso nkinsi sambu na Yehowa bilumbu nsambwadi konso mvula.+ Bonso nsiku ya mvula na mvula na bandonga na beno yonso ya bantu, beno fwete ta yo na ngonda ya nsambwadi. 42 Beno fwete zinga na bisasa bilumbu nsambwadi.+ Bankwa-nsi yonso ya Izraele fwete zinga na bisasa, 43 sambu bandonga na beno ya bantu yina ke kwisa kuzaba+ nde mono salaka nde bantu ya Izraele kuzinga na bisasa ntangu mono vandaka kubasisa bo na insi ya Ezipte.+ Mono kele Yehowa Nzambi na beno.’”

44 Na mutindu yai Moize tubilaka bantu ya Izraele mambu ya me tala bankinsi ya Yehowa yina fwete salama na bansungi.

24 Yehowa landaka kutubila Moize nde: 2 “Songa bantu ya Izraele na kunatila nge mafuta ya olive ya bunkete mpi ya bo me tuta sambu na nsemo, sambu minda kulanda kupela ntangu yonso.+ 3 Na nganda ya rido ya Kimbangi na tenta ya lukutakanu, Aroni ta baka bangidika sambu minda kulanda kupela katuka na nkokila tii na suka na ntwala ya Yehowa ntangu yonso. Yo kele nsiku ya ntangu yonso sambu na bandonga na beno yonso ya bantu. 4 Yandi fwete tula minda na ndonga na kima ya kutudila minda+ ya bo me sala na wolo ya kukonda kuvukisa ti kima ya nkaka na ntwala ya Yehowa ntangu yonso.

5 “Nge ta baka fufu ya kitoko mpi nge ta yoka mampa 12 ya bo me sala bonso lupetu. Nge ta sadila bandambu zole na kati ya bandambu kumi ya efa* na konso dimpa. 6 Nge ta tula yo na bandonga zole, sambanu na konso ndonga,+ na mesa ya bo me sala na wolo ya kukonda kuvukisa ti kima ya nkaka na ntwala ya Yehowa.+ 7 Nge fwete tula ndumbu ya mpembe ya bo me vukisa ve ti kima ya nkaka na konso ndonga, mpi yo ta vanda bonso dimpa sambu na dikabu ya kifwani*+ yina bo me yoka na tiya sambu na Yehowa. 8 Na konso kilumbu ya Kisabatu, yandi fwete yidika yo mbala na mbala na ntwala ya Yehowa.+ Yo kele kuwakana ya mvula na mvula ti bantu ya Izraele. 9 Yo ta kuma ya Aroni ti ya bana na yandi,+ mpi bo ta dia yo na kisika mosi ya santu,+ sambu yo kele kima ya kuluta santu sambu na yandi ya me katuka na makabu ya Yehowa yina bo me yoka na tiya, bonso nsiku ya mvula na mvula.”

10 Na kati ya bantu ya Izraele, kuvandaka ti mwana-bakala mosi yina mama na yandi vandaka muntu ya Izraele mpi tata na yandi muntu ya Ezipte;+ yandi ti muntu mosi ya Izraele yantikaka kunwana na camp. 11 Mwana-bakala ya nkento yina ya Izraele yantikaka kuvweza Zina* mpi kusinga* yo.+ Yo yina bo nataka yandi na Moize.+ Kansi, zina ya mama na yandi vandaka Shelomiti, mwana ya Dibri ya dikanda ya Dani. 12 Bo tulaka bantu na kukeba yandi tii kuna bo zabisaka bo pwelele+ lukanu ya Yehowa.

13 Na nima, Yehowa tubilaka Moize nde: 14 “Nata muntu yina singaka na nganda ya camp, ebuna bantu yonso yina waka yandi fwete tula maboko na bo na zulu ya ntu na yandi, mpi kimvuka ya mvimba ya bantu fwete losila yandi matadi.+ 15 Mpi nge fwete songa bantu ya Izraele nde, ‘Kana muntu kusinga Nzambi na yandi, yandi ta vutula munoko sambu na disumu na yandi. 16 Yo yina, muntu yina ke vweza zina ya Yehowa, bo fwete fwa yandi kibeni.+ Kimvuka ya mvimba fwete losila yandi kibeni matadi. Bo fwete fwa munzenza mutindu mosi ti munkwa-nsi sambu yandi me vweza Zina.

17 “‘Kana muntu kufwa muntu ya nkaka,* bo fwete fwa yandi kibeni.+ 18 Konso muntu yina ke bula mpi ke fwa mbisi mosi ya bwala* fwete futa sambu na yo, luzingu sambu na luzingu. 19 Kana muntu mosi kulwadisa nkweno na yandi, bo fwete sala yandi+ diambu yina yandi me sala. 20 Kubuka sambu na kubuka, disu sambu na disu, dinu sambu na dinu, bo ta pesa yandi+ mpasi ya mutindu mosi ti yina yandi pesaka muntu ya nkaka. 21 Muntu yina ke bula mbisi mpi ke fwa yo fwete futa yo,+ kansi muntu yina ke bula muntu ya nkaka mpi ke fwa yandi, bo fwete fwa yandi.+

22 “‘Bo ta sadila nkanu ya mutindu mosi sambu na beno, yo vanda munzenza to munkwa-nsi,+ sambu mono kele Yehowa Nzambi na beno.’”

23 Na nima Moize tubilaka bantu ya Izraele, mpi bo basisaka na nganda ya camp muntu yina singaka, mpi bo losilaka yandi matadi.+ Ebuna, bantu ya Izraele salaka kaka mutindu Yehowa songaka Moize.

25 Yehowa tubilaka diaka Moize na Ngumba ya Sinai nde: 2 “Tubila bantu ya Izraele mpi songa bo nde, ‘Nsuka-nsuka ntangu beno ta kota na insi yina mono ke pesa beno,+ insi ta zitisa kisabatu sambu na Yehowa.+ 3 Nge ta kuna nkeni na kilanga na nge bamvula sambanu, mpi nge ta zenga balutangu ya banti ya vinu ya kilanga na nge bamvula sambanu, mpi nge ta katula bambuma ya ntoto.+ 4 Kansi mvula ya nsambwadi, ta vanda kisabatu ya kupema kibeni sambu na insi, kisabatu sambu na Yehowa. Nge ta kuna ve nkeni na kilanga na nge mpi ta zenga ve balutangu ya banti ya vinu ya kilanga na nge. 5 Nge fwete katula ve bima yina ke mena yo mosi na bambuma yina bikalaka na nima ya kukatula bima na bilanga, mpi nge fwete katula ve bisuka ya banti na nge ya vinu yina bo me zenga ve balutangu na yo. Ntoto fwete pema kibeni mvula mosi. 6 Kansi, beno lenda dia madia yina ke basika na insi na kisabatu na yo; nge, bampika na nge ya babakala ti ya bankento, muntu na nge ya kisalu yina ke bakaka lufutu, mpi banzenza yina me kwisaka kuzinga ti nge lenda dia yo, 7 mpi bambisi ya bwala ti ya mfinda yina kele na insi na nge. Beno lenda dia konso kima yina ke mena na ntoto.

8 “‘Nge ta tanga bamvula ya kisabatu nsambwadi, bamvula nsambwadi mbala nsambwadi, mpi bilumbu ya bamvula nsambwadi ya kisabatu ta sala bamvula 49. 9 Ebuna nge ta bula kibongo ngolo na ngonda ya nsambwadi, na kilumbu ya kumi ya ngonda, na Kilumbu ya Kufika Masumu;+ beno fwete sala nde makelele ya kibongo kuwakana na insi na beno ya mvimba. 10 Beno fwete santisa mvula ya 50 mpi kuzabisa kimpwanza na insi na bantu yonso ya insi.+ Yo ta kuma Yubile sambu na beno, mpi konso muntu ta vutuka na ntoto na yandi mpi konso muntu fwete vutuka na dibuta na yandi.+ 11 Mvula yina ya 50 ta kuma Yubile sambu na beno. Beno ta kuna ve nkeni, ta katula ve bima yina ke basika yo mosi na bambuma yina bikalaka, mpi beno ta katula ve bambuma ya banti ya vinu+ yina bo me zenga ve balutangu na yo. 12 Sambu yo kele Yubile. Yo fwete vanda santu sambu na beno. Beno lenda dia kaka bima yina ntoto ke buta yo mosi.+

13 “‘Na mvula yai ya Yubile, konso muntu fwete vutuka na ntoto na yandi.+ 14 Kana beno tekila nkweno na beno kima mosi, to kana beno sumba kima mosi na yandi, beno yibana ve.+ 15 Ntangu nge ke sumba kima na nkweno na nge, nge fwete tadila ntalu ya bamvula yina me luta na nima ya Yubile, mpi yandi fwete tekila nge kima na kutadila bamvula ya kukatula bima na bilanga+ yina me bikala. 16 Kana bamvula yina me bikala kele mingi, yandi lenda matisa ntalu ya kusumbila yo, mpi kana bamvula yina me bikala kele fioti, yandi fwete kulumusa ntalu ya kusumbila yo, sambu yandi ke tekila nge ntalu ya bima yina bo ta katula na bilanga. 17 Ata muntu mosi ve na kati na beno fwete yiba nkweno na yandi,+ mpi beno fwete wa Nzambi na beno boma,+ sambu mono kele Yehowa Nzambi na beno.+ 18 Kana beno ke zitisa bansiku na mono mpi ke sadila bankanu na mono, beno ta zinga na ngemba na insi yina.+ 19 Ntoto ta buta mbuma na yo,+ ebuna beno ta dia mpi ta fuluka, mpi beno ta zinga na ngemba+ kuna.

20 “‘Kansi kana beno tuba nde: “Inki beto ta dia na mvula ya nsambwadi kana beto kuna ve nkeni to kukatula ve bima na bilanga?”+ 21 Mono ta pesa beno lusakumunu na mono na mvula ya sambanu, mpi ntoto ta buta bambuma yina me fwana sambu na bamvula tatu.+ 22 Ebuna beno ta kuna nkeni na mvula ya nana mpi ta dia mbuma ya ntama tii na mvula ya uvwa. Beno ta dia bambuma ya ntama tii kuna nsungi na yo ya kukatula bima na bilanga ta lunga.

23 “‘Beno fwete teka ve ntoto kimakulu,+ sambu ntoto kele ya mono.+ Sambu na meso na mono,+ beno kele banzenza mpi bantu yina me kwisaka kuzinga na insi ya nkaka. 24 Na insi ya mvimba yina ta vanda ya beno, beno fwete pesa nswa ya kusumba diaka ntoto.

25 “‘Kana mpangi na nge me kuma nsukami mpi yo ke lomba nde yandi teka kitini ya ntoto na yandi, muntu ya ke sumba diaka yina kele mpangi na yandi ya pene-pene fwete kwisa mpi kusumba diaka kitini ya ntoto yina mpangi na yandi tekaka.+ 26 Kana muntu mosi kele ve ti muntu ya kusumba yandi diaka, kansi yandi me kuma mvwama mpi me kuma na mbongo ya kufwana sambu na kusumba yo diaka, 27 yandi fwete tanga ntalu na yo tuka bamvula yina yandi tekaka yo mpi kuvutula mbongo yina me bikala na muntu yina yandi tekilaka yo. Na nima, yandi lenda vutuka na ntoto na yandi.+

28 “‘Kansi kana yandi me zwa ve mbongo sambu na kubaka yo diaka na muntu yina, kima yina yandi tekaka ta bikala ya muntu yina sumbaka yo tii na mvula ya Yubile;+ mpi yo ta kuma diaka ya yandi na Yubile, mpi yandi ta vutuka na ntoto na yandi.+

29 “‘Kana muntu kuteka nzo yina kele na mbanza ya bo me ziungaka ti bibaka, nswa na yandi ya kusumba diaka ta landa kuvanda mpi tii na nsuka ya mvula yantika ntangu yina yandi manisaka kuteka yo; nswa na yandi ya kusumba diaka+ ta vanda na ngala mvula ya mvimba. 30 Kansi, kana bo sumba yo diaka ve tii na nsuka ya mvula ya mvimba, nzo yina kele na mbanza ya bo me ziungaka ti bibaka ta kuma kimakulu nzo ya muntu yina sumbaka yo, na bandonga na yandi yonso ya bantu. Bo ta vutula yo ve na Yubile. 31 Kansi, bo ta tadila banzo ya babwala yina bo me ziungaka ve ti bibaka bonso kitini ya ntoto ya nseke. Nswa ya kusumba yo diaka ta landa kuvanda, mpi bo ta vutula yo na Yubile.

32 “‘Sambu na banzo ya Balevi na bambanza na bo,+ Balevi ta vanda ti nswa ya kimakulu ya kusumba yo diaka. 33 Kana bo sumba diaka ve banzo ya Balevi, nzo yina bo me teka na mbanza na bo, bo ta vutula yo mpi na Yubile,+ sambu banzo yina kele na bambanza ya Balevi kele banzo na bo na kati ya bantu ya Izraele.+ 34 Diaka, bo lenda teka ve nseke+ yina kele na nziunga ya bambanza na bo, sambu yo kele dikabu na bo ya kimakulu.

35 “‘Kana mpangi na nge yina ke zinga pene-pene na nge me kuma nsukami mpi kele diaka na mbongo ve, nge fwete sadisa yandi+ mutindu nge ke sadisaka munzenza mpi muntu yina me kwisaka kuzinga+ na insi na nge, sambu yandi landa kuzinga ti nge. 36 Kubaka ve luta na mpangi na nge mpi kudefisa yandi+ ve sambu na kubaka mbongo mingi na zulu.* Nge fwete wa Nzambi na nge boma,+ ebuna mpangi na nge ta landa kuzinga ti nge. 37 Nge fwete defisa yandi ve mbongo sambu na kubaka luta+ to kupesa yandi madia sambu na kubaka matabisi. 38 Mono kele Yehowa Nzambi na beno, yina basisaka beno na insi ya Ezipte+ sambu na kupesa beno insi ya Kanana, sambu mono vanda Nzambi na beno.+

39 “‘Kana mpangi na nge yina ke zingaka pene-pene na nge me kuma nsukami mpi yo ke lomba nde yandi kuditeka na nge,+ nge fwete pusa yandi ve na kusala kisalu ya ngolo bonso mpika.+ 40 Nge fwete sadila yandi mambu bonso muntu ya kisalu yina ke bakaka lufutu,+ bonso muntu yina me kwisaka kuzinga na insi na nge. Yandi fwete sala ti nge tii na mvula ya Yubile. 41 Na nima yandi ta bikisa nge, yandi ti bana na yandi, mpi ta vutuka na dibuta na yandi. Yandi fwete vutuka na ntoto ya ba-nkaka na yandi.+ 42 Sambu bo kele bampika na mono yina mono basisaka na insi ya Ezipte.+ Bo fwete kuditeka ve mutindu bo ke tekaka mpika. 43 Nge fwete sadila yandi ve mambu na nku,+ mpi nge fwete wa Nzambi na nge boma.+ 44 Bampika na beno ya babakala ti ya bankento fwete katuka na makanda yina kele na nziunga na beno, beno lenda sumba mpika ya bakala to ya nkento na kati na bo. 45 Diaka, na kati ya bana ya babakala ya banzenza yina me kwisaka kuzinga na kati na beno,+ beno lenda sumba bampika na kati na bo mpi na kati ya mabuta na bo yina ke butuka na insi na beno, mpi bo ta kuma bantu na beno. 46 Beno lenda pesa bo na bana na beno sambu bo baka bo bonso dikabu ya kimakulu. Beno lenda sadila bo bonso bantu ya kisalu, kansi beno fwete sadila ve bampangi na beno bantu ya Izraele mambu na nku.+

47 “‘Kansi kana munzenza to muntu yina me kwisaka kuzinga na kati na beno me kuma mvwama mpi mpangi na nge yina kele pene-pene na yandi me kuma nsukami mpi yandi fwete kuditeka na munzenza to na muntu yina me kwisaka kuzinga na kati na beno, to na muntu ya dibuta ya munzenza yina, 48 yandi ta landa kuvanda ti nswa ya kudisumba diaka na nima ya kuditeka. Mpangi na yandi mosi ya bakala lenda sumba yandi diaka,+ 49 to mpangi ya tata na yandi to mwana-bakala ya mpangi ya tata na yandi lenda sumba yandi diaka, to konso mpangi ya menga, muntu ya dibuta na yandi, lenda sumba yandi diaka.

“‘To kana yandi mosi me kuma mvwama, yandi fwete kudisumba diaka.+ 50 Kumosi ti muntu yina sumbaka yandi, bo fwete tanga ntangu yantika na mvula yina yandi kuditekaka na yandi tii na mvula ya Yubile,+ mpi mbongo yina bo tekaka yandi ta fwanana ti ntalu ya bamvula yina.+ Na ntangu yina, bo ta tanga bilumbu na yandi ya kisalu na kutadila ntalu yina bo ke futaka muntu ya kisalu yina ke bakaka lufutu.+ 51 Kana bamvula yina me bikala kele mingi, yandi fwete futa ntalu ya kudisumba diaka na kutadila bamvula yina me bikala. 52 Kansi kana bamvula fioti kaka me bikala tii na mvula ya Yubile, yandi fwete kuditangila bamvula yina me bikala mpi kufuta ntalu ya kudisumba diaka, na kutadila bamvula yina me bikala. 53 Yandi fwete landa kusadila yandi konso mvula bonso muntu ya kisalu yina ke bakaka lufutu; mpi nge fwete zikisa nde yandi ke sadila yandi ve mambu na nku.+ 54 Kansi, kana yandi lenda kudisumba diaka ve na kutadila mambu yina, yandi ta basika kukonda kufuta mbongo na mvula ya Yubile,+ yandi ti bana na yandi.*

55 “‘Sambu bantu ya Izraele kele bampika na mono. Bo kele bampika na mono yina mono basisaka na insi ya Ezipte.+ Mono kele Yehowa Nzambi na beno.

26 “‘Beno fwete kudisadila ve banzambi ya kukonda mfunu,+ beno fwete tedimisa ve kiteki+ to dikunzi ya santu, mpi beno fwete tula ve kifwanisu ya ditadi+ na insi na beno sambu na kufukama na ntwala na yo;+ sambu mono kele Yehowa Nzambi na beno. 2 Beno fwete zitisa bisabatu na mono mpi kumonisa luzitu ya ngolo sambu na* kisika na mono ya santu. Mono kele Yehowa.

3 “‘Kana beno landa kuzitisa bansiku na mono ti bantuma na mono mpi beno sadila yo,+ 4 mono ta pesa beno bamvula ya ngolo na ntangu na yo,+ insi yina ta buta mbuma na yo,+ mpi banti ya bilanga ta buta mbuma na yo. 5 Nsungi na beno ya kututa bambuma sambu na kukatula yo bampusu ta landa tii na nsungi na beno ya kukatula bambuma ya vinu, mpi nsungi ya kukatula bambuma ya vinu ta landa tii na nsungi ya kukuna; mpi beno ta dia mampa mpi ta fuluka ebuna beno ta zinga na lutaninu na insi na beno.+ 6 Mono ta tula ngemba na insi yina,+ beno ta lala mpi muntu mosi ve ta pesa beno boma;+ mono ta katula bambisi ya mfinda ya makasi na insi yina, mpi mbele ya bitumba ta luta ve na insi na beno. 7 Beno ta landa kibeni bambeni na beno, mpi bo ta bwa na ntwala na beno na mbele ya bitumba. 8 Bantu tanu na kati na beno ta landa bambeni 100, bantu 100 na kati na beno ta landa bambeni 10 000, mpi bambeni na beno ta bwa na ntwala na beno na mbele ya bitumba.+

9 “‘Mono ta sakumuna beno,* mono ta sala nde beno buta mingi, mono ta kumisa beno mingi,+ mpi mono ta tanina kuwakana na mono ti beno.+ 10 Ntangu beno ke dia ntete bambuma na beno ya ntama ya mvula yina me luta, yo ta lomba nde beno katula bambuma ya ntama sambu na kubikisa kisika na bambuma ya mpa. 11 Mono ta tula nzo-tenta na mono na kati-kati na beno,+ mpi mono* ta buya beno ve. 12 Mono ta tambula na kati na beno mpi mono ta vanda Nzambi na beno,+ ebuna beno ta vanda bantu na mono.+ 13 Mono kele Yehowa Nzambi na beno, yina basisaka beno na insi ya Ezipte sambu beno vanda diaka ve bampika na bo, mpi mono bukaka vangu na beno mpi mono salaka nde beno tambula ba-ntu na zulu.*

14 “‘Kansi, kana beno wila mono ve to kana beno zitisa ve bansiku+ yai yonso, 15 kana beno buya bansiku+ na mono, mpi kana beno menga* bankanu na mono na mpila nde beno zitisa ve bantuma na mono yonso, mpi beno zitisa ve kuwakana+ na mono, 16 mono ta sala beno mambu yai: mono ta pesa beno ndola ti bampasi, ti maladi ya tiberkilose mpi fievre ya ngolo, mono ta sala nde meso na beno kufwa mpi luzingu* na beno kubeba. Beno ta kuna nkeni na beno sambu na mpamba, sambu bambeni na beno ta dia yo.+ 17 Mono ta buya beno, mpi bambeni+ na beno ta bedisa beno; bantu yina ke mengaka beno ta niata beno,+ mpi beno ta tina ata ntangu muntu mosi ve ke landa beno.+

18 “‘Kana ata mambu yai kupusa beno ve na kuwila mono, yo ta lomba nde mono pesa beno ndola mbala nsambwadi kuluta sambu na masumu na beno. 19 Mono ta manisa lulendo na beno ya ngolo mpi ta kumisa zulu na beno bonso kibende+ mpi ntoto na beno bonso kwivre. 20 Beno ta manisa ngolo na beno ya mpamba, sambu ntoto na beno ta buta ve mbuma na yo,+ mpi banti ya insi ta buta ve bambuma.

21 “‘Kansi kana beno ke landa kutambula na kimbeni ti mono mpi beno ke buya kuwila mono, yo ta lomba nde mono bula beno mbala nsambwadi kuluta, na kiteso ya masumu na beno. 22 Mono ta tinda bambisi ya mfinda na kati na beno,+ mpi yo ta bikisa beno kukonda bana,+ yo ta manisa bitwisi na beno, mpi yo ta fiotuna ntalu na beno, ebuna banzila na beno ta yuma.+

23 “‘Kana na nima ya mambu yai beno ndima ve kusungika+ ya mono ta sungika beno mpi beno landa kutambula na kimbeni ti mono, 24 mono mpi ta tambula na kimbeni ti beno, mpi mono ta bula beno mbala nsambwadi sambu na masumu na beno. 25 Mono ta nata mbele ya bitumba ya kuvutula mbi na zulu na beno sambu beno me zitisa ve kuwakana+ na mono. Kana beno tina na bambanza na beno, mono ta tinda maladi na kati na beno,+ mpi mono ta pesa beno na maboko ya mbeni.+ 26 Ntangu mono ta panza kisika na beno ya kubumbila* mampa,*+ bankento kumi ta yoka mampa na beno kaka na fulu mosi mpi ta kabula mampa na beno na kilo;+ beno ta dia kansi beno ta fuluka ve.+

27 “‘Kana ata sambu na mambu yai beno wila mono ve mpi beno tambula kaka na kimbeni ti mono, 28 mono ta kumisa ngolo kimbeni+ na mono ti beno, mpi yo ta lomba nde mono pesa beno ndola mbala nsambwadi sambu na masumu na beno. 29 Ebuna yo ta lomba nde beno dia nsuni ya bana na beno ya babakala, mpi beno ta dia nsuni ya bana na beno ya bankento.+ 30 Mono ta fwa bisika na beno ya kunanguka ya santu+ mpi ta bwisa-bwisa bamesa-kimenga na beno ya ndumbu mpi ta tula bamvumbi na beno na zulu ya bamvumbi ya biteki na beno ya nzanzi,*+ ebuna mono* ta tina beno sambu na nzanzi.+ 31 Mono ta fwa+ bambanza na beno mpi ta sala nde bisika na beno ya santu kubikala mpamba, mpi mono ta wa ve nsudi ya kitoko* ya bimenga na beno. 32 Mono ta sala nde insi yina kubikala mpamba,+ mpi bambeni na beno yina ta zinga kuna ta tala yo ti kuyituka.+ 33 Mono ta panza beno na kati ya makanda,+ mpi mono ta basisa mbele ya bitumba na nima na beno;+ insi na beno ta bikala mpamba,+ mpi mono ta bebisa bambanza na beno.

34 “‘Na ntangu yina insi yina ta futa bisabatu na yo bilumbu yonso yina yo ta bikala mpamba, ntangu beno ta vanda na insi ya bambeni na beno. Na ntangu yina insi ta pema,* sambu yo fwete futa bisabatu na yo.+ 35 Bilumbu yonso yina yo ta bikala mpamba yo ta pema, sambu yo pemaka ve na nsungi ya bisabatu na beno ntangu beno vandaka kuzinga kuna.

36 “‘Sambu na bantu yina ta guluka,+ mono ta fulusa bantima na bo ti kukonda kivuvu na bansi ya bambeni na bo; bo ta tina na makelele ya dititi ya ke nikana, mpi bo ta tina bonso muntu ya ke tina mbele ya bitumba mpi bo ta bwa ata ntangu muntu mosi ve ke landa bo.+ 37 Bo ta bulana sakuba bonso bantu yina ke tina mbele ya bitumba, kisi ve ata muntu mosi ve ke landa bo. Beno ta kuka ve kunwana ti bambeni+ na beno. 38 Beno ta fwa na kati ya makanda,+ mpi insi ya bambeni na beno ta dia beno. 39 Bantu yina ta bikala na kati na beno ta pola na bansi ya bambeni+ na beno sambu na kifu na bo. Ya kieleka, bo ta pola sambu na bifu ya batata+ na bo. 40 Ebuna bo ta funguna kifu na bo,+ kifu ya batata na bo, ti kukonda kwikama ya batata na bo, mpi bo ta ndima nde bo kuditwadisaka kukonda kwikama na mutindu bo tambulaka na kimbeni ti mono.+ 41 Ebuna mono mpi tambulaka na kimbeni ti bo,+ na mutindu mono nataka bo na insi ya bambeni+ na bo.

“‘Mbala ya nkaka bantima na bo ya kukonda kuyotisa* ta kudikulumusa,+ mpi bo ta futa kifu na bo. 42 Ebuna mono ta yibuka kuwakana na mono ti Yakobi,+ mpi kuwakana na mono ti Izaki,+ mpi mono ta yibuka kuwakana na mono ti Abrahami,+ mpi mono ta yibuka insi yina. 43 Ntangu bo yambulaka insi yina, insi vandaka kufuta bisabatu+ na yo mpi yo bikalaka mpamba kukonda bo, mpi bo vandaka kufuta sambu na kifu na bo, sambu bo buyaka bankanu na mono mpi bo* mengaka bansiku+ na mono. 44 Kansi ata sambu na mambu yai yonso, ntangu bo ta vanda na insi ya bambeni na bo, mono ta buya bo ve kibeni+ ata fioti mpi mono ta losa bo ve na kiteso ya kumanisa bo; kusala mutindu yina ta zitisa ve kuwakana+ na mono ti bo, sambu mono kele Yehowa Nzambi na bo. 45 Sambu na bo, mono ta yibuka kuwakana ya mono salaka ti ba-nkaka+ na bo yina mono basisaka na insi ya Ezipte na meso ya makanda,+ sambu na kumonisa nde mono kele Nzambi na bo. Mono kele Yehowa.’”

46 Yai bantuma, bankanu, mpi bansiku yina Yehowa pesaka bantu ya Izraele na Ngumba ya Sinai na nzila ya Moize.+

27 Yehowa landaka kutubila Moize nde: 2 “Tubila bantu ya Izraele mpi songa bo nde, ‘Kana muntu me sala lusilu ya mfunu+ ya kupesa Yehowa ntalu yina bo me zenga sambu na muntu* mosi, 3 ntalu ya bo me zenga sambu na bakala yina kele ti bamvula yantika na 20 tii na 60 ta vanda bashekele* 50 ya arza na kutadila shekele ya kisika ya santu.* 4 Kansi kana yo kele nkento, ntalu yina bo me zenga ta vanda bashekele 30. 5 Kana yandi kele ti bamvula yantika na 5 tii na 20, ntalu yina bo me zenga sambu na bakala ta vanda bashekele 20, mpi bashekele 10 sambu na nkento. 6 Kana yandi kele ti bamvula yantika na ngonda mosi tii na bamvula tanu, ntalu yina bo me zenga sambu na bakala ta vanda bashekele tanu ya arza mpi bashekele tatu ya arza sambu na nkento.

7 “‘Kana yandi kele ti bamvula 60 mata, ntalu yina bo me zenga ta vanda bashekele 15 sambu na bakala mpi bashekele 10 sambu na nkento. 8 Kansi kana yandi kele kibeni nsukami sambu na kufuta ntalu yina bo me zenga,+ muntu yina ta telama na ntwala ya nganga-nzambi, ebuna nganga-nzambi ta tula ntalu sambu na yandi. Nganga-nzambi ta tula ntalu yina na kutadila kima yina muntu ya me sala lusilu lenda pesa.+

9 “‘Kana dikabu yina ke tadila mbisi yina me fwana sambu na kupesa Yehowa, konso kima yina bo lenda pesa Yehowa ta kuma kima ya santu. 10 Yandi lenda soba yo ve to kuyingisa yo, mbisi ya mbote na mbisi ya mbi to mbisi ya mbi na mbisi ya mbote. Kansi kana yandi yingisa mbisi mosi na mbisi ya nkaka, mbisi ya ntete mpi mbisi yina yandi me pesa sambu na kuyingisa yo ta kuma santu. 11 Kana yo kele mbisi+ ya mvindu yina bo lenda pesa ve bonso dikabu na Yehowa, yandi ta nata mbisi yina na ntwala ya nganga-nzambi. 12 Nganga-nzambi ta tula ntalu na yo, yo vanda yo kele ya mbote to ya mbi. Ntalu yina nganga-nzambi me zenga ta soba ve. 13 Kansi kana yandi ke zola kusumba yo diaka, yandi fwete yika na zulu ya ntalu yina bo me zenga+ ndambu mosi na kati ya bandambu na yo tanu.

14 “‘Ebuna kana muntu ke zola kusantisa nzo na yandi bonso kima ya santu sambu na Yehowa, nganga-nzambi ta tula ntalu na yo, yo vanda yo kele mbote to mbi. Ntalu yina nganga-nzambi ta tula, yo yina ta vanda ntalu na yo.+ 15 Kansi kana muntu yina ke santisa nzo na yandi ke zola kusumba yo diaka, yandi fwete yika ndambu mosi na kati ya bandambu tanu ya mbongo na ntalu yina bo me zenga, ebuna yo ta kuma ya yandi.

16 “‘Kana muntu ke santisa ndambu ya kilanga na yandi sambu na Yehowa, bo ta zenga ntalu na yo na kutadila nkeni yina bo kele na yo mfunu sambu na kukuna yo: homere* mosi ya mbuma ya orze ta vanda bashekele 50 ya arza. 17 Kana yandi santisa kilanga na yandi yantika na mvula ya Yubile,+ ntalu yina bo me zenga ta soba ve. 18 Kana yandi santisa kilanga na yandi na nima ya Yubile, nganga-nzambi ta tangila yandi ntalu na kutadila bamvula yina me bikala tii na mvula ya Yubile yina ke kwisa, mpi yandi ta kulumusa ntalu yina bo me zenga.+ 19 Kansi kana muntu yina santisaka kilanga ke zola kusumba yo diaka, yandi fwete yika na zulu na yo ndambu mosi na kati ya bandambu tanu ya mbongo ya ntalu yina bo me zenga, ebuna yo ta bikala ya yandi. 20 Kana yandi sumba diaka ve kilanga yina mpi bo tekila yo muntu ya nkaka, bo lenda sumba yo diaka ve na nima. 21 Kana bo me yambula kilanga yina na Yubile, yo ta kuma kima ya santu sambu na Yehowa, bonso kilanga yina bo me pesa yandi. Yo ta kuma kima ya banganga-nzambi.+

22 “‘Kana muntu kusantisa sambu na Yehowa kilanga ya yandi sumbaka, yina kele ve na kati ya ntoto+ ya bo me bikilaka yandi, 23 nganga-nzambi ta tangila yandi ntalu na yo tii na mvula ya Yubile, mpi yandi ta pesa ntalu yina bo me zenga na kilumbu yina.+ Yo kele kima ya santu sambu na Yehowa. 24 Na mvula ya Yubile, kilanga yina ta vutuka na muntu yina yandi sumbaka yo, na munkwa-ntoto+ yina.

25 “‘Bo fwete zenga konso ntalu na kutadila shekele ya kisika ya santu. Shekele mosi kele bagera* 20.

26 “‘Kansi, muntu mosi ve fwete santisa mwana ya ntete ya bambisi, sambu yo ke butukaka bonso mwana ya ntete sambu na Yehowa.+ Yo vanda ngombe ya bakala to dimeme, yo kele ya Yehowa.+ 27 Kana yo kele na kati ya bambisi ya mvindu mpi yandi sumba yo diaka na kutadila ntalu yina bo me zenga, yandi fwete yika na zulu na yo+ ndambu mosi na kati ya bandambu na yo tanu. Kansi kana bo sumba yo diaka ve, bo ta teka yo na kutadila ntalu yina bo me zenga.

28 “‘Kansi bo lenda teka ve to kusumba diaka konso kima ya bo me pesaka yina muntu me baka na bima na yandi mpi ke pesa ya mvimba na Yehowa, yo vanda bantu, bambisi, to kilanga na yandi. Konso kima yina bo me pesaka kele kima ya kuluta santu sambu na Yehowa.+ 29 Diaka, bo lenda sumba diaka+ ve ata muntu mosi ya bo me bedisa* yina bo me tula na kingenga sambu bo fwa yandi. Bo fwete fwa yandi kibeni.+

30 “‘Konso ndambu mosi na kati ya bandambu kumi*+ ya ntoto, yo vanda yina me katuka na bima ya bilanga to na bambuma ya banti, kele ya Yehowa. Yo kele kima ya santu sambu na Yehowa. 31 Kana muntu ke zola kusumba diaka konso ndambu mosi na kati ya bandambu kumi ya bima na yandi, yandi fwete yika na zulu na yo ndambu mosi na kati bandambu na yo tanu. 32 Sambu na konso ndambu mosi na kati ya bandambu kumi ya bangombe mpi ya mameme, konso kima yina ke lutaka na nsi ya nti ya ngungudi, mbisi* ya kumi ta kuma kima ya santu sambu na Yehowa. 33 Yandi ta tala ve kana yo kele mbote to mbi, mpi yandi fwete yingisa yo ve. Kansi kana yandi meka kuyingisa yo, mbisi ya ntete mpi mbisi yina yandi yingisaka yo fwete kuma kima ya santu.+ Bo lenda sumba yo diaka ve.’”

34 Yai bansiku yina Yehowa pesaka Moize na Ngumba ya Sinai+ sambu na bantu ya Izraele.