“Beno Keba na Mutindu Yina ya Beno Ke Waka Mambu”

KUWIDIKILA kele dyambu mosi ya mfunu sambu na kulonguka. Yo lenda vanda mpi na bupusi na kivuvu ya muntu kele na yo sambu na luguluku. Ntangu Yehowa vandaka kuyilama sambu na kukatula bantu na yandi na kimpika na Ezipte, yandi pesaka Moize bantuma ya bo zolaka kulanda. Moize kuzabisaka bambuta-bantu ya Izraele mambu yina bo zolaka kusala sambu na kugulusa bana na bo ya ntete na lufwa yina wanzyo zolaka kunata. (Kub. 12:21-23) Na nima, bambuta-bantu kuzabisaka nsangu yina na konso dibuta. Bo salaka yo na munoko. Yo lombaka nde bantu kuwidikila mbote. Inki bo salaka na nima? Biblia kepesa mvutu nde: “Bantu yonso ya Israele ndimaka mambu yina [Yehowa] songaka Moize ti Aroni.” (Kub. 12:28, 50, 51) Yo yina, bantu ya Izraele kubasikaka na Ezipte na mutindu mosi ya kuyituka mpenza.

Bubu yai, Yehowa keyidika beto sambu na kukatula beto na kimpika mosi ya kuluta nene. Ntembe kele ve nde, malongi yina yandi kepesa beto kelomba nde beto tudila yo dikebi mingi. Beto kebakaka malongi yango na balukutakanu ya dibundu. Keti nge kebakaka mpenza mambote ya balukutakanu yai? Sambu na kubaka mambote yango, yo ketadila ntetentete mutindu nge kewidikilaka.

Keti nge kesimbaka mambu ya mfunu ya malongi yina bo kepesaka na balukutakanu? Keti konso mposo nge kevandaka na kikalulu ya kusosa mitindu ya kusadila malongi yango na luzingu na nge to ya kuzabisa yo na bantu yankaka?

Yidika Ntima na Nge

Sambu na kubaka mpenza mambote yina balukutakanu ya Bukristu kepesaka, beto fwete yidika ntima na beto. Mambu yina kusalamaka na luyalu ya Ntotila Yozafati ya Yuda kemonisa mfunu ya kusala mutindu yina. Yozafati kukotilaka lusambu ya kyeleka na ngolo yonso. Yandi “fwaka bisika yonso ya kusambila banzambi ya biteki na ntoto ya Yuda” mpi yandi pesaka bana na yandi, Balevi, ti banganga-Nzambi kisalu ya kulonga Nsiku ya Yehowa na bantu na bambanza ya Yuda yonso. Ata mpidina, “bisika ya kusambila banzambi ya biteki yandi fwaka yo ve kimakulu.” (2 Bans. 17:6-9; 20:33) Lusambu ya banzambi ya luvunu ti mutindu yankaka ya kusamba yina Yehowa kendimaka ve, yina mimpani vandaka kusala na bisika ya nene ya kusambila vandaka kusonga nde yo manaka ve kimakulu.

Sambu na nki bantuma yina Yozafati kupesaka kuvandaka ve na bupusi ntangu ya nda? Disolo yango kelanda nde: “Bantu vandaka kudipesa ve na ntima na bo yonso na Nzambi ya bankaka na bo.” Bo waka kansi bo zitisaka ve mambu yina bo waka. Ziku bo yantikaka kuyindula nde kukwenda na tempelo ya Yeruzalemi sambu na kupesa makabu vandaka mbote ve. Ata mpidina, kele lukwikilu ve kima kupusaka ntima na bo na kusala yo.

Sambu beto vutukila ve banzila ya inza ya Satana, beto fwete yidika ntima na beto na kubaka malongi yina Yehowa kepesa bubu yai. Inki mutindu? Mutindu mosi ya mfunu ya kusala yo kele kisambu. Beto fwete sambaka nde beto tabaka malongi ya Nzambi ti ntonda yonso. (Nk. 27:4; 95:2) Yo tasadisa beto na kumonisa ntonda na bikesa yina bampangi na beto ya babakala kesala, na mpila nde ata bo kele bantu ya kukonda kukuka, bo kekudipesaka sambu Yehowa kusadila bo na kulonga bantu na yandi. Yo tapusa beto na kupesa Yehowa mersi sambu na mambu ya mpa kaka ve ya beto kelonguka, kansi sambu na okazio ya yandi mepesaka beto ya kumonisa ntonda na beto sambu na malongi ya beto melongukaka dezia. Sambu beto kele na mpusa ya kusala mpenza luzolo ya Nzambi, beto kesamba nde: “Mfumu, songa mono banzila na nge, . . . longa mono na [kutita zina na nge, NW] na ntima mosi.”​—Nk. 86:11.

Tula Mabanza na Nge Kisika Mosi

Bima mingi lenda sala nde beto widikila ve na dikebi yonso. Mabanza na beto lenda fuluka na basusi. Makelele mpi bantu yina ketambula-tambula na kati to na nganda ya kisika beto kesadila lukutakanu lenda katula dikebi na beto. Kana mavimpi kele mbote ve, yo lenda vanda mpasi na kutula mabanza kisika mosi. Bantu yina kele ti bana ya fyoti kemonaka nde mbala mingi mabanza na bo kevandaka ya kukabwana. Inki lenda sadisa beto na kutula mabanza na beto na programe?

Meso kevandaka na bupusi ya ngolo na kisika ya beto ketula dikebi na beto. Sadila meso na nge sambu yo sadisa nge na kutula bangindu na nge kisika mosi mpi talaka mutubi. Kana yandi mepesa verse mosi ya Biblia, ata yina nge mezaba mbote, sosa yo na kati ya Biblia na nge, mpi landa yandi ntangu yandi ketanga yo. Kubika ve nzila na mpukumuna ya kutala na konso ndambu yina nge mewa makelele to kima menikana. Kana meso na nge kefulusa mabanza na nge na mambu yina kekatula nge dikebi, nge tawa ve mambu mingi ya bo ketuba na estrade.

Kana bangindu ya ‘mpasi’ kesala nde nge kekuka ve kutula dikebi na programe, samba Yehowa sambu yandi sadisa nge na kukuma pima na mabanza mpi na ntima sambu nge tula dikebi. (Nk. 94:19; Filp. 4:6, 7) Salaka mpidina mbala na mbala kana yo kele mfunu. (Mat. 7:7, 8) Balukutakanu ya dibundu kele mambu ya Yehowa meyidikaka. Yo yina, nge lenda tula ntima nde yandi kezola nde nge bakila yo mambote.—1 Yoa. 5:14, 15.

Kuwidikila Badiskure

Ziku, nge lenda yibuka bangindu ya mfunu ya nge mewaka na badiskure. Kansi, kuwidikila diskure kelomba ve kaka kusonika bangindu ya mfunu. Beto lenda fwanisa diskure na vwayaze. Ata mambu ya kitoko ya kutala lenda vanda mingi na nzila, kima ya ntetentete kele kumona kisika ya nge kekwenda, disongidila lukanu na nge. Yo lenda vanda nde mutubi ketwadisa bawi na kubakisa dyambu mosi buna to kenata bo na kusala kima mosi.

Baka mbandu ya mambu yina Yozue kuzabisaka dikanda ya Izraele, na Yozue 24:1-15. Lukanu na yandi vandaka ya kupusa bantu na kubaka pozisio ya ngolo sambu na lusambu ya kyeleka. Yo lombaka nde bo yambula lusambu ya biteki ya makanda yina vandaka kuzinga na nzyunga na bo. Sambu na nki yo vandaka mfunu nde bo sala yo? Mutindu lusambu ya luvunu kukumaka ngolo, yo tulaka kuwakana ya mbote yina dikanda kuvandaka na yo ti Yehowa na kigonsa. Bantu vutudilaka Yozue nde: “Beto ke na ngindu ata fioti ve na kubikisa Mfumu Nzambi na kwenda kusamba banzambi ya nkaka. . . . Beto fweti sadila Mfumu Nzambi.” Bo salaka mpi mutindu yina!​—Yoz. 24:16, 18, 31.

Ntangu nge kewidikila diskure, sosa kuzaba nki kele lukanu na yo. Yindula nki mutindu mambu yina mutubi ketuba kelungisa lukanu yina. Kudiyula nki mambu yina kelomba nge na kusala.

Kuwidikila na Ntangu ya Masolo

Kulonguka ya Nzozulu ya Nkengi, Kulonguka ya Mukanda ya Dibundu, ti masolo yankaka ya Lukutakanu ya Kisalu kele masolo ya kesalamaka na bangyufula mpi bamvutu ya malongi ya Biblia yina kele na mikanda.

Kuwidikila na ntangu disolo kesalama kele kukota na disolo yango na mutindu yankaka. Sambu na kubaka mambote mingi, widikilaka na dikebi yonso. Landaka mutindu disolo ke na kukwenda. Tala mutindu ntwadisi kevutukila ntu-dyambu ti mambu ya mfunu. Pesaka bamvutu na mabanza na nge na bangyufula yina yandi keyula. Waka na ntangu bantu yankaka ketendula mpi kemonisa mutindu ya kusadila malongi yango. Kutadila bansangu yango na mutindu bantu yankaka kebakisa yo lenda sadisa nge na kubakisa mutindu yankaka disolo mosi ya nge mezaba mbote. Kota na disolo na bamvutu na nge ya kemonisa lukwikilu na nge.​—Roma 1:12.

Kulonguka malongi yina bo pesaka na ntwala tasadisa nge na kukota mpenza na disolo mpi kulanda bakomantere yina bantu yankaka kepesa. Kana mpila ya kulonguka malongi yina na mudindu kele ve, baka mwa minuta sambu nge zaba nki mambu bo tatubila na ntwala nde lukutakanu kuyantika. Kusala mpidiyai tasadisa nge na kulonguka mambu mingi na disolo yango.

Kuwidikila na Balukutakanu ya Fyoti ti ya Nene

Na balukutakanu ya fyoti ti ya nene, mambu lenda vanda mingi ya lenda valangasa bangindu na beto kuluta na balukutakanu ya dibundu. Yo lenda kumisa kuwidikila mpasi mingi. Inki lenda sadisa beto?

Kima ya mfunu ya lenda sadisa beto kele kupema mingi na mpimpa. Na ntwala nde programe kuyantika konso kilumbu, simba mbote ntu-dyambu na mabanza na nge. Tala ntu-dyambu ya konso diskure, mpi meka na kuyindula na ntwala mambu yina disolo yango tatubila. Sadila mbote Biblia na nge. Bantu mingi kemonaka nde kubaka mwa banoti ya mambu ya mfunu kesadisaka bo na kutula mabanza yonso na programe. Sonika mambu yina nge kekana kusadila na luzingu na nge mpi na kisalu ya kusamuna. Na ntangu beno kekwenda na lukutakanu ya nene to kevutuka na nzo, beno tubilaka mwa mambu ya bo tubilaka na lukutakanu konso kilumbu. Kana nge sala mpidina yo tasadisa nge na kusimba mambu yango.

Longa Bana na Nge na Kuwidikila

Bibuti yina kele Bakristu lenda longa bana na bo, ata bana ya fyoti, na kukuma ti “mayele yina ta gulusa” bo kana bo kenata bo na balukutakanu ya dibundu, na balukutakanu ya fyoti, mpi na balukutakanu ya nene. (2 Tim. 3:15) Sambu bana kekukaka ve na kutula bangindu mpi dikebi kisika mosi, yo kelombaka nde bibuti kuvanda mayele sambu na kuzaba nki mutindu bo lenda sadisa bo na kulonguka na kuwidikila na dikebi yonso. Ziku bangindu yai melanda lenda sadisa nge.

Na nzo, pona ntangu yina bana tafonga mpi kuvanda pima mpi kutanga to kutala bifwanisu na mikanda na beto ya Bukristu. Na balukutakanu, kupesa ve bana biteki ya kusakana na yo sambu bo vanda pima. Mutindu yo vandaka kusalama na Izraele ya ntama, bubu yai mpi bana kekwendaka na balukutakanu sambu na ‘kuwa mpi kuzaba kuzitisa Mfumu Nzambi.’ (Kul. 31:12) Na bisika yina bo lenda sala yo, bibuti yankaka kepesaka bana na bo ya fyoti bakopi na bo mosi ya mikanda yina bo kelonguka. Kana bana meyela fyoti, sadisa bo na kuyilama sambu na kupesa bamvutu na baprograme yina kelombaka nde bawi kutuba.

Masonuku kemonisaka kuwakana ya ngolo yina kele na kati ya kuwidikila Yehowa ti kulemfukila yandi. Yo kemonana na mambu yina Moize kusongaka dikanda ya Izraele: “Mono ke pesa beno mambu yai na kusola: luzingu to lufwa, mambote to bampasi. . . . Beno sola luzingu sambu beno zinga, . . . Beno zola Mfumu Nzambi, Nzambi na beno, beno [wa ndinga na yandi, NW], beno ndima yandi.” (Kul. 30:19, 20) Bubu yai, kuwa malongi yina Yehowa kepesa mpi kusadila yo na bulemfu yonso na luzingu na beto kele mfunu mingi sambu Nzambi kundima beto mpi sambu beto baka luzingu ya mvula na mvula. Yo yina, yo kele mpenza mfunu mingi na kulemfuka na ndongisila yai ya Yezu: “Beno keba na mutindu yina ya beno ke waka mambu”!​—Luka 8:18.