Mutindu ya Kuyidika Masolo Sambu na Dibundu

BO MEYIDIKAKA manaka ya Nzo-Nkanda ya Kisalu ya Teokrasi sambu dibundu ya mvimba kubakila yo mambote. Beto kebakaka malongi yankaka ya mfunu na balukutakanu ya dibundu, ya sipesiali ya kilumbu mosi ti ya nzyunga, mpi ya distrike. Kana bo mepesa nge diskure mosi na balukutakanu yai, zaba nde bo mepesa nge mukumba mosi ya nene. Ntumwa Polo kulongisilaka Timoteo, Mukristu yina kuvandaka nkengi, na kukeba ntangu yonso na malongi na yandi. (1 Tim. 4:16) Bantu yina kekwisaka na balukutakanu ya Bukristu metulaka ntangu mosi ya mfunu na lweka​—mpi sambu na bankaka yo lombaka kusala kikesa mingi mpenza—​sambu na kwisa kulonguka mambu yina ketadila bangwisana na bo ti Nzambi. Kupesa malongi ya mutindu yai kele mukumba mosi ya nene kibeni! Inki mutindu nge lenda lungisa mukumba yai mbotembote?

Bantendula ya Mfunu ya Lutangu ya Biblia

Kitini yai ya nzo-nkanda kesalamaka ti mambu yina kele na kitini ya Biblia yina bo pesaka na kutanga na mposo yina. Yo fwete monisa mutindu mambu yango lenda sadisa beto bubu yai. Mutindu Nehemia 8:8 ketuba yo, Esdrasi ti banduku na yandi vandaka kutanga Ndinga ya Nzambi na meso ya bantu, bo vandaka “kutendula yo,” mpi kusadisa bantu na kubakisa yo. Nge mpi kele ti dibaku ya kusala mutindu yina na ntangu nge kesala bantendula ya mfunu ya lutangu ya Biblia.

Inki mutindu nge fwete bongisa devware yai? Kana mpila kele, tanga kitini ya Biblia yina bo mepesa mposo mosi to bamposo mingi na ntwala. Na nima, yindula dibundu na beno mpi mambu yina yo kele na yo mfunu. Samba sambu na yo. Inki bandongisila, inki bambandu, mpi nki minsiku na kitini yai ya Ndinga ya Nzambi kelungisa bampusa yina?

Yo kele mfunu na kusosa-sosa mambu. Keti index ya masolo kebasikaka na Nzozulu ya Nkengi na ndinga na beno na nsuka ya konso mvula? Kana yo kebasikaka, sadila yo. Kana nge sosa-sosa mambu yina bo mebasisaka sambu na baverse ya nge mepona na kutudila dikebi, nge lenda zwa malongi yina ketendula baverse yango, nge lenda zwa mpi bantendula yina ketubila kulungana ya bambikudulu, bantendula ya ketubila mambu yina baverse yankaka kemonisa sambu na Yehowa, to masolo yina ketubila minsiku. Kumeka ve kutubila mambu mingi. Pona kaka baverse fyoti ya nge tatudila dikebi. Yo kele mbote mingi na kutubila baverse fyoti mpi na kutendula yo mbote.

Na devware na nge, bo lenda lomba nge mpi na kulomba bawi na kutuba mambote ya bo bakaka na lutangu ya Biblia ya mposo. Keti bo monaka kima mosi yina lenda sadisa bo na kulonguka na bo mosi mpi ya dibuta to na kisalu na bo ya kusamuna to na luzingu na bo? Inki bikalulu Yehowa kumonisaka na mutindu yandi vandaka kusala mambu sambu na bantu mpi makanda? Keti bawi kulongukaka kima mosi yina kupesaka lukwikilu na bo ngolo mpi kukumisaka ntonda na bo sambu na Yehowa mingi? Kulutisa ve ntangu na mambu ya fyoti-fyoti mpi ya mpasi. Tendula bangindu ya nge ponaka mpi monisa mutindu ya kusadila yo.

Diskure ya Kulonga

Malongi na yo kekatukaka na mikanda yina mebasikaka dezia, mu mbandu masolo ya Nzozulu ya Nkengi to Réveillez-vous ! to mbala yankaka mambu ya bo mebaka na mukanda mosi. Mbala mingi, malongi kevandaka mingi kuluta ntangu ya bo mepesa nge. Inki mutindu nge fwete sala devware yai? Nge fwete sala yo bonso longi, kansi nge fwete sosa ve na kutuba mambu yonso ya kele na kitini ya bo mepesa nge. Nkengi fwete “zaba kulonga bantu mbote-mbote.”​—1 Tim. 3:2.

Ntangu nge keyantika kudibongisa, banda ntete na kutanga malongi yina bo mepesa. Tanga baverse. Yindulula. Sala ngolo na kusala yo bilumbu mingi na ntwala ya kilumbu yina nge tasala diskure na nge. Kuvila ve nde bo kesyamisaka bampangi na kutanga na ntwala mukanda yina kele ti mambu kisika bo mebaka diskure na nge. Devware na nge kele ve kaka ya kuvutukila yo to kutuba yo na bunkufi kansi yo kumonisa mutindu ya kusadila yo. Sadila bitini ya mefwana ya malongi yina na mutindu mosi yina tasadisa kibeni dibundu.

Kaka mutindu konso mwana kevandaka ti kimuntu na yandi mosi, konso dibundu mpi kele ti mambu yina keswaswanisaka yo ti yankaka. Kibuti yina kelongaka mbote ketangilaka ve kaka mwana na yandi bansiku ya bikalulu ya mbote. Yandi keyindulaka ti mwana. Yandi ketadilaka kimuntu ya mwana mpi mambu ya mpasi ya yandi kenwana na yo. Mutindu mosi mpi, na dibundu balongi kesalaka ngolo na kubakisa bampusa ya kimvuka yina bo ketubila. Kansi, longi yina kele ti luswasukusu tasadila ve bambandu yina lenda pesa muntu mosi na kati ya bawi mpasi. Yandi tamonisa mambote yina bo kebaka dezia sambu bo ketambula na nzila ya Yehowa mpi yandi tapesa bandongisila ya Masonuku yina tasadisa bampangi na kununga mambu ya mpasi ya bo kenwana na yo.

Kulonga ya mbote kesimbaka ntima ya bantu yina kewidikila yo. Yo kelombaka kaka ve kutuba mambu kansi mpi kusadisa bantu na kubakisa mfunu ya mambu yina. Yo kelombaka kutudila bantu yina nge kelonga dikebi ya masonga. Bangungudi ya kimpeve fwete zaba mameme. Kana bo vila ve mambu ya mpasi yina konso dimeme kenwana na yo, bo takuka kutuba mambu yina tapesa bo kikesa, kubakisa bo, kuwila bo mawa, mpi kuditula na kisika na bo.

Mutindu balongi ya mbote mezaba yo, diskure fwete vanda ti lukanu ya pwelele ya yo kezola kulungisa. Nge fwete sala malongi na mpila nde bantu kusimba bangindu ya mfunu mpi bo vila yo ve. Bantu yina kelanda nge fwete kuka kuyibuka bangindu ya mfunu yina bo tasadila na luzingu na bo.

Lukutakanu ya Kisalu

Kana nge kesala diskure mosi yina ketubila disolo mosi yina kele na Kisalu na Beto ya Kimfumu, mpasi lenda vanda ya kuswaswana fyoti. Awa bo talomba nge mbala mingi na kutubila bawi mambu yonso ya bo mesonika, kansi na kupona ve yina mefwana. Sadisa bawi na kuyindula na baverse yina mesimba bandongisila ya bo kepesa. (Tito 1:9) Sambu mbala mingi ntangu kevandaka fyoti, kuyika ve mambu yankaka.

Kansi na ndambu yankaka, bo lenda lomba nge na kusala disolo yina malongi na yo kubasikaka ve na Kisalu na Beto ya Kimfumu. Bo lenda tinda nge na disolo mosi ya kele na Nzozulu ya Nkengi, to devware na nge lenda vanda kaka na mambu fyoti ya kusonika ya kesonga nge nki nge fwete sala. Mutindu nge kele longi, nge fwete tadila bampusa ya dibundu na kuwakana ti malongi yina bo mepesa nge. Nge lenda sadila mbandu mosi ya nkufi, ya ketubila mbala mosi dyambu yango to kupesa eksperiansi mosi ya kufwana. Yibuka nde mukumba na nge kesuka kaka ve na kutubila ntu-dyambu yina, kansi sala yo na mpila nde yo sadisa dibundu na kulungisa na kyese yonso kisalu yina Ndinga ya Nzambi kepesa beto.​—Bis. 20:20, 21.

Ntangu nge kebongisa devware na nge, yindula luzingu ya bantu yina kele na dibundu. Sikisa bo sambu na mambu yina bo kesala dezia. Inki mutindu kusadila bangindu yina kele na disolo na nge tatomisa kisalu na bo ya kusamuna mpi tayika bo kyese na kisalu yai?

Keti devware na nge kele ti nsonga to interview? Kana yo kele, nge fwete yidika yo mbote na ntwala. Mpukumuna kevandaka mingi ya kulomba na muntu yankaka na kuyidika yo, kansi kusala mutindu yina kebutaka ve ntangu yonso bambuma ya mbote. Kana mpila kele, beno meka kuvutukila nsonga to interview mbala mingi na ntwala ya kilumbu ya lukutakanu. Sala yonso na mpila nde bo sala kakitini yai ya devware na nge na mutindu yina tasadisa bantu na kubakisa mbote dilongi ya bo kepesa.

Balukutakanu ya Nene mpi ya Distrike

Bo lenda lomba na bampangi ya babakala yina meyedisaka bikalulu ya mbote ya kimpeve mpi bayina ketubaka mpi kelongaka mbote na meso ya bantu na kusala badiskure na lukutakanu mosi ya nene to ya distrike. Yai kele kibeni baokazio ya nene ya Nzambi kesadilaka sambu na kulonga beto. Diskure yango lenda vanda maniskri, pula, bantuma sambu na drame mosi ya Biblia mpi dilongi sambu na ntangu na beto, to paragrafe mosi ya bantuma. Kana nge kele ti dibaku yai ya nene ya kusala diskure na programe ya mutindu yai, longuka mbote-mbote malongi yina bo mepesa nge. Longuka yo tii kuna nge tabakisa mfunu na yo.

Bantu yina bo mepesa diskure maniskri fwete tanga yo na kutanga. Bo tayingisa ve bangogo yankaka to kuyidika dyaka bansa. Bo talonguka yo sambu na kubakisa mbote bangindu ya mfunu mpi mutindu bo meyidika yo. Bo tatangulula yo mbala mingi na ndinga ya ngolo tii kuna bo lenda sala diskure yango ti kikesa, tiya, mawi, ngolo, mpi kundimisa sambu yo wakana ve nde bo ketanga yo ya kutanga. Bo tasadilaka mpi mungungu ya kufwana na kisika bantu kele mingi.

Bampangi yina bo mepesa diskure ya pula kele na mukumba ya kusala malongi na kulandaka pula mbotembote. Olie ya kutanga mambu yina kele na pula na ntangu yandi kesala diskure to kuyidika yo bonso diskure maniskri, mutubi fwete sala yo mutindu yandi ketubaka konso kilumbu, mpi mambu ya yandi ketuba fwete katukaka na ntima. Yo kele mfunu na kuzitisa ntangu yina bo mepesa na pula sambu na kusala na mutindu ya pwelele konso ngindu ya mfunu yina bo memonisa. Mutubi fwete sadila mbote bangindu mpi baverse yina kele na nsi ya bangindu ya mfunu. Yandi fwete katula ve mambu yina kele na pula sambu na kuyika mambu yankaka ya yandi kezolaka. Ya kyeleka, malongi yina yonso kekatuka na Ndinga ya Nzambi. Bankuluntu kele ti mukumba ya ‘kulonga nsangu.’ (2 Tim. 4:1, 2) Yo yina, mutubi fwete tula dikebi mingi na baverse yina kele na pula, yandi fwete yindula mpi kumonisa mutindu ya kusadila yo.

Kuvutula Ve Mambu na Nima

Keti nge kele na dibundu yina nge kevandaka na mabaku mingi ya kusala badiskure? Inki mutindu nge lenda sala sambu na kutomisa badiskure yina yonso? Kubongisaka ve badiskure na nge na nsukinina.

Sambu diskure kupesa bantu mambote na dibundu, yo kelombaka kuyindulula mbotembote mambu ya nge tatuba. Kana bo mepesa nge devware, vanda ti kikalulu ya kutangaka malongi yina ntangu fyoti na nima ya kuzwa yo. Yo tasadisa nge na kuyindulula yo ntangu nge kesala bisalu na nge yankaka. Bilumbu to bamposo fyoti na ntwala nge sala diskure na nge, nge lenda wa bakomantere yina tasadisa nge na kumona mutindu ya kuluta mbote ya kusadila mambu yina kele na diskure na nge. Mambu lenda basika yina tasala nde mambu yina nge talonga kuvanda mfunu mingi na ntangu yina. Kutanga mpi kuyindula mambu yina kele na devware na nge na nima ya kubaka yo kebakaka ntangu, kansi yo kele ntangu mosi ya nge kelutisa ve mpamba. Nsukansuka ntangu nge tavanda sambu na kubongisa pula na nge, nge tabaka mambote mingi na mutindu nge yindulaka mambu yina na ntwala. Kusala badevware mutindu yai takulumusa mingi kibeni boma na nge mpi yo tasadisa nge na kusala devware na nge na mutindu mosi ya mbote yina tasimba ntima ya bantu na dibundu.

Kana nge kebakaka na valere dikabu ya bo mepesaka nge ya kusala badiskure na programe ya Yehowa ya kulonga bantu na yandi, nge tapesa yandi lukumu mpi nge takuma lusakumunu sambu na bantu yina kezolaka yandi.​—Yez. 54:13; Roma 12:6-8.