Sadila Mikanda Yina Kele ti Malongi ya bo Pesaka Nge

BIBLIA kefwanisaka dibundu ya Bukristu ti nitu ya muntu. Bandambu yonso ya nitu kele mfunu, kansi “konso ndambu ya nitu ke na kisalu na yo ya diswaswanu.” Na kuwakana ti dyambu yai, beto fwete sala konso mukumba yina bo mepesa beto. Yo kelomba nde beto bakisa mpi beto tula dikebi na konso devware yina bo mepesa beto olie ya kufyotuna mfunu ya masolo yankaka sambu beto keyindula nde masolo yankaka meluta yo na kitoko. (Roma 12:4-8) Kimvuka ya mpika ya kwikama mpi ya mayele kele na mukumba ya kupesa madya ya kimpeve na “ntangu ya mbote.” (Mat. 24:45) Na ntangu beto kesadila mayele na beto sambu na kusala masolo na kulandaka bandongisila ya bo pesaka beto, beto kemonisaka ntonda sambu na ngidika yango. Yo kesalaka nde dibundu ya mvimba kutambula mbote.

Mambu ya Kukotisa. Kana bo mepesa nge disolo mosi na nzo-nkanda, sala yonso na kusala kaka disolo yina kansi kima yankaka ve. Mbala mingi, bo kepesaka mukanda mosi ya sikisiki kisika nge tabaka malongi ya nge tasala. Kana bo metubila nge ve na nki mukanda nge tabaka malongi ya disolo na nge, nge lenda baka malongi na mikanda yina nge mosi tapona. Kansi, na ntangu nge keyidika disolo na nge, sala yonso na mpila nde disolo na nge ya mvimba kubasika ve na nganda ya ntu-dyambu yina bo pesaka nge. Ntangu nge kepona mambu ya nge fwete kotisa, nge fwete tadila mpi bawi na nge.

Longuka mbotembote masolo yina kele na mukanda kisika nge kebaka malongi, longuka mpi baverse yina kele na kati na yo. Na nima tadila mutindu ya kusadila yo mbotembote sambu bawi kubakila yo mambote. Pona bangindu zole to tatu na mukanda yina mpi sadila yo bonso bangindu ya mfunu na disolo na nge. Mutindu mosi mpi, pona baverse yina nge kekana kutanga mpi kutendula na mukanda yina nge kebaka malongi.

Bangindu ikwa nge kekana na kutubila? Tubila kaka kiteso yina nge lenda sala mbotembote. Kuvila ve na kusadila bametode ya mbote ya kulongila kaka sambu nge kezola kukotisa malongi mingi. Kana malongi yankaka kewakana ve ti lukanu ya disolo na nge, tula dikebi na bitini yina tasadisa nge na kulungisa lukanu yina. Sadila kaka bangindu yina talonga mpi tavanda mfunu mingi sambu na bawi na nge. Lukanu ya ndongisila yai ya mutubi kele ve ya kusosa kuzaba kiteso ya malongi yina nge lenda sala, kansi na kusadila malongi yina bo pesaka nge bonso fondasio sambu na disolo na nge.

Lukanu ya disolo na nge kele ve kaka ya kutendula na bunkufi malongi yina bo pesaka nge. Nge fwete kudibongisa na kutendula bangindu yankaka na bunda, kupesa bambandu, mpi kumonisa na nsadisa ya mbandu mutindu ya kusadila yo. Nge lenda sadila bangindu yankaka sambu na kutendula bangindu ya mfunu yina kele na mukanda yina bo pesaka nge na kusadila olie ya kuyingisa yo ti malongi yankaka.

Bantangu yankaka, bo lenda lomba na bampangi yina kele balongi ya kufwana na kulonga na Lukutakanu ya Kisalu. Bo kebakisaka mfunu ya kusadila mbote malongi yina bo pesaka olie ya kuyingisa yo ti mambu yankaka. Mutindu mosi mpi, bo kepesaka bampangi yina kesalaka badiskure ya bantu yonso bapula yina bo fwete landa. Ata mutubi lenda soba mambu yankaka, bapula yai kemonisaka pwelele bangindu ya mfunu ya kutendula, bangindu yankaka yina kesimba bangindu ya mfunu, mpi baverse yina kesimba diskure. Kusadila malongi yina kele na mukanda yina bo lombaka nge na kusadila kele kima mosi ya mfunu yina tasadisa nge na kubaka mikumba yankaka ya kulonga.

Formasio yai lenda sadisa nge mpi na kulonguka Biblia ti bantu yina talanda na kuyela. Nge talonguka na kutula dikebi na malongi yina kele na mukanda ya beno kelonguka olie ya kusoba ntu-dyambu mpi kuyantika kutubila mambu yankaka yina lenda vanda ya mbote kansi yina kele ve mfunu sambu na kubakisa disolo ya beno ketubila. Kansi, kana nge mebakisa mambu yina dilongi yai ketubila, nge takangama kaka ve na mambu yina kele na mukanda mpi kubuya na kuyika bantendula yina longoki lenda vanda na yo mfunu.