Yuni

Yehowa ke sungikaka mpi ke longaka beto sambu yandi ke zolaka beto. Yandi ke zolaka nde beto vanda banduku na yandi mpi beto zinga mvula na mvula. Bantangu ya nkaka, disipline ke tendulaka kaka ve kupesa bandongisila. Kana mpangi me sala disumu ya nene, yandi ta fwana diaka ve na kuvanda ti mikumba na dibundu. Kana yo salama, disipline yina ta monisa nde Nzambi ke zolaka yandi. Mu mbandu, yo lenda sadisa yandi na kumona mfunu ya kutanga diaka Biblia mingi, kuyindula mingi mpi kusamba mingi. Kusala mambu yai lenda sadisa yandi na kukumisa diaka ngolo kinduku na yandi ti Yehowa. (Nk. 19:7) Na nima ya bantangu, yandi lenda vutukila mikumba na yandi. Ngidika ya kubasisa muntu na dibundu ke monisaka zola ya Yehowa sambu yo ke taninaka dibundu na bupusi ya mbi. (1 Bak. 5:6, 7, 11) Sambu Nzambi ke sungikaka ntangu yonso na lunungu, yo ke sadisaka muntu yina bo me basisa na dibundu na kubakisa mbi yina yandi salaka. Yo lenda sadisa yandi na kubalula ntima.—Bis. 3:19. w18.03 24 § 5-6

Muntu yina vandaka kukengila boloko zabaka ve Ndinga ya Nzambi. Sambu na kukuma Mukristu, yo lombaka nde yandi longuka malongi ya ntete-ntete ya Biblia, kubakisa mambu yina Yehowa ke lombaka bansadi na yandi mpi kulemfukila malongi ya Yezu. Mambu yina yandi longukaka na ntangu fioti sadisaka yandi na kubaka mbotika. (Bis. 16:25-33) Ya masonga, yandi landaka kulonguka mambu mingi na nima ya mbotika. Yo yina, kana mwana na nge kusonga nge nde yandi ke zola kubaka mbotika sambu yandi ke zolaka Yehowa mpi ke lemfukilaka yandi, nki nge ta sala? Nge lenda zabisa yandi na kusolula ti bankuluntu sambu bo tala kana yandi me fwana na kubaka mbotika. Bonso Bakristu yonso yina me bakaka mbotika, yandi ta landa kulonguka mambu mingi ya Yehowa luzingu na yandi ya mvimba mpi nkutu kimakulu.—Bar. 11:33, 34. w18.03 10 § 8-9

Kana beto ke sala bikesa sambu na kukumisa kimpeve na beto ngolo, mpeve santu ya Yehowa ta sadisa beto na kusoba mutindu na beto ya kuyindula. Malembe-malembe, beto ta kuma kuyindula bonso Kristu. Mpeve santu lenda sadisa beto na kuyambula banzala ya mbi mpi kuyedisa bikalulu yina ke sepedisaka Nzambi. Kana beto ke yindula bonso Kristu, yo ta monana na bikalulu na beto na kisalu, na nzo-nkanda, na bangogo na beto, mpi na balukanu na beto yonso. Balukanu na beto ta monisa nde beto ke sala bikesa sambu na kulanda mbandu ya Kristu. Sambu beto kele bantu ya kimpeve, beto ke zolaka ve nde kima mosi kubebisa kinduku na beto ti Tata na beto ya Zulu. Kana beto me kutana ti mpukumuna, kimpeve na beto ta tanina beto. Na ntwala ya kubaka lukanu, beto fwete yindula mingi mpi kudiyula nde: ‘Inki minsiku ya Biblia lenda sadisa mono? Kana yo vandaka Kristu, nki yandi zolaka kusala? Inki mono fwete sala sambu Yehowa kusepela?’ w18.02 25 § 12; 26 § 14

Na bilumbu ya Enoki, nkaka ya Noa, bantu vandaka dezia kusala mambu ya mbi. Bo vandaka kutuba mambu ya mbi yina vandaka “kuvweza” Yehowa. (Yude 14, 15) Bantu kumaka kusala mubulu mingi. Yo yina, na bilumbu ya Noa, “ntoto fulukaka ti mubulu.” Bawanzio yina kolamaka kwisaka na ntoto, bo lwataka nitu ya kimuntu mpi kwelaka bankento. Bo butaka bana ya nku mpi ya mubulu. (Kuy. 6:2-4, 11, 12) Kansi Noa vandaka ve bonso bantu yai. Biblia ke tuba nde: “Yandi vandaka ya kukonda kifu na kati ya bantu ya ntangu na yandi. Noa tambulaka ti Nzambi ya kieleka.” (Kuy. 6:9) Mbandu ya Noa ke longa beto nki? Ya ntete, yindula bamvula yina Noa sadilaka Yehowa na kwikama yonso na ntwala nde Mvula ya Ngolo kunoka. Yo vandaka ve kaka bamvula 70 to 80, kansi bamvula kiteso ya 600. (Kuy. 7:11) Ya zole, kuvila ve nde na ntangu yina dibundu vandaka ve sambu bampangi kusadisa Noa to kupesa yandi kikesa mutindu yo ke salamaka bubu yai. Yo ke monanaka nde ata bampangi na yandi sadisaka yandi ve. w18.02 4 § 4-5

Muntu yina ke zolaka mbongo ke fulukaka ve mbongo. Yandi ke vandaka kaka ti mfunu ya mbongo mingi mpi ke kudiyangisaka mingi sambu na kuzwa mbongo ya nkaka. Yo ke natilaka yandi “bampasi mingi.” (1 Tim. 6:9, 10; Lon. 5:10) Ya kieleka beto yonso ke vandaka ti mfunu ya mbongo. Mbongo ke taninaka beto bantangu ya nkaka. (Lon. 7:12) Keti beto lenda vanda na kiese kana beto kele ti mwa mbongo yina lenda sadisa beto na kulungisa kaka bampusa na beto? Ee! (Lon. 5:12) Agure mwana ya Yake sonikaka nde: “Kupesa mono ve kinsukami, kimvwama mpi ve. Bika kaka nde mono dia madia na mono.” Beto ke bakisa sambu na nki muntu yai zolaka ve kuvanda kibeni nsukami. Yandi tubaka nde kana ve kinsukami ta pusa yandi na kuyiba sambu Nzambi ke zolaka ve kuyiba. Kansi sambu na nki yandi zolaka ve kukuma mvwama? Yandi sonikaka nde: “Kana ve mono ta fuluka mpi mono ta buya nge ebuna mono ta tuba nde, ‘Yehowa kele nani?’” (Bing. 30:8, 9) Yezu tubaka nde: “Muntu mosi ve lenda sala bonso mpika sambu na bamfumu zole; sambu yandi ta menga mosi mpi ta zola ya nkaka to yandi ta kangama na mosi mpi ta vweza ya nkaka. Beno lenda sala ve bonso bampika sambu na Nzambi mpi sambu na Kimvwama.”—Mat. 6:24. w18.01 24 § 9-11

Kana beto ke lolula bampangi na ntima ya mvimba, beto ta kumisa ngolo bumosi na beto. Kana beto ke sala mpidina, Yehowa ta lolula mpi masumu na beto na nsadisa ya kimenga ya Yezu. Yezu monisaka mfunu ya kulolula bankaka na kingana mosi yina yandi pesaka, kingana ya ntotila ti bampika na yandi. Tanga Matayo 18:23-34 mpi kudiyula nde: ‘Keti mono kele ti luzolo ya kusadila malongi yai ya Yezu? Keti mono ke vandaka ntima-nda mpi ke zingaka mbote ti bampangi? Keti mono ke lolulaka bantu yina me sala mono mbi?’ Ya kieleka, sambu masumu ya nkaka kele nene kuluta ya nkaka, yo yina kukonda kukuka lenda sala nde bantangu ya nkaka beto kuka ve kulolula mbi yina bo me sala beto. Kansi kingana ya Yezu ke longa beto nde Yehowa ke zolaka nde beto lolula bantu yina ke sala beto mbi. Yezu monisaka pwelele nde Yehowa ta lolula beto kaka kana beto ke lolula bankaka, mingi-mingi bayina ke balula ntima. Beto fwete yindula mingi dilongi yai. Sambu na kutanina bumosi na beto mpi kulanda kukumisa yo ngolo, beto fwete lolula bankaka mutindu Yezu tubaka. w18.01 15 § 12

Ata yo vandaka kigonsa, Daniele landaka kusamba na bisika yina bantu lendaka kumona yandi sambu yandi zolaka ve nde bantu kuyindula nde yandi me yambula kusambila Yehowa. Yehowa sakumunaka Daniele sambu na kikesa mpi lukanu yina yandi bakaka. Yehowa gulusaka Daniele na dibulu ya bantambu na mutindu ya kuyituka. Yo yina, bantu yonso ya Medo-Persia zabaka mambu ya Yehowa! (Dan. 6:25-27) Inki mutindu beto lenda kuma ti lukwikilu ya ngolo bonso Daniele? Beto fwete suka kaka ve na kutanga Ndinga ya Nzambi, beto fwete bakisa malongi na yo. (Mat. 13:23) Beto fwete zaba mabanza ya Yehowa mpi mutindu yandi ke tadilaka mambu. Beto fwete yindula mpi mingi mambu yina beto ke tanga. Beto fwete samba mpi mbala na mbala, mingi-mingi ntangu beto ke kutana ti bampasi. Beto tula ntima nde Yehowa ta pesa beto mayele mpi kikesa.—Yak. 1:5. w18.02 10 § 13; 11 § 14-15

Toko, Yehowa ke monisilaka nge ntima-mbote ntangu yandi ke pesaka nge kikesa ya kulonga bantu kieleka na kisalu ya kusamuna to na nzo-nkanda. Yo ke vandaka pete ve na kulonga banduku ya nzo-nkanda, sambu nge me zaba ve mambu yina bo lenda tuba. Yo ke vandaka mpi pete ve na kulonga na ntwala ya bantu mingi. Kansi nki lenda sadisa nge? Yindula bikuma yina me pusaka nge na kukwikila na malongi ya Biblia. Kana ba fiche d’étude ya jw.org, ya ke sadisaka na kulonguka Biblia kele mpi na ndinga mosi yina nge me zaba, tangaka yo. Yo lenda sadisa nge na kuyindula diaka mbote malongi yina nge ke kwikilaka, bikuma yina ke pusaka nge na kukwikila yo mpi mutindu ya kulonga yo na bantu ya nkaka. Kana nge me longuka yo mbote-mbote, yo ta pusa nge na kulonga bantu mambu ya Yehowa.—Yer. 20:8, 9. w17.12 26 § 12, 14-15

Beto fwete suka ve kaka na kuzabisa bana masolo ya Biblia. Beto vila ve nde ‘bo ndimisaka Timoteo na kukwikila.’ Ngogo ya kisina ya bo me balula na kundimisa ke tendula “kusadisa na kubakisa” to “kundima nde diambu mosi kele ya kieleka.” Timoteo zabaka Masonuku ya Kiebreo “yantika bumwana.” Na nima, yandi ndimaka nde Yezu kele Mesia. Inki mutindu nge lenda sadisa bana na nge na kukuma ti lukwikilu ya ngolo bonso Timoteo, sambu nge ‘ndimisa bo mpi na kukwikila’? Ya ntete, vanda ntima-nda. Yo ke lombaka ntangu sambu muntu kukuma ti lukwikilu ya ngolo. Kuyindula ve nde sambu nge ke kwikilaka na diambu mosi, bana na nge mpi fwete kwikila nswalu na yo. Konso mwana fwete sadila ‘mayele na yandi ya kuyindula’ sambu na kukwikila malongi ya Biblia. (Bar. 12:1) Bibuti, beno kele ti mambu mingi ya kusala sambu na kusadisa bana na beno na kukumisa lukwikilu na bo ngolo, mingi-mingi kana bo ke yula bangiufula. w17.12 19 § 3, 5-6

Marta, nduku mpi longoki ya Yezu, vandaka na mpasi ya ngolo sambu mpangi na yandi Lazare fwaka. Mambu yina Yezu tubaka lembikaka yandi, Yezu silaka yandi nde: “Mpangi na nge ta futumuka.” (Yoa. 11:20-23) Marta zabaka nde na bilumbu ke kwisa bafwa ta futumuka. Kansi kaka na kilumbu yina mpi na ntangu yina, Yezu salaka kima mosi ya kuyituka. Yandi futumunaka Lazare. Beto fwete vingila ve nde Yezu to Tata na yandi kufutumuna bafwa kaka bubu yai. Keti nge ke kwikilaka bonso Marta nde na bilumbu ke kwisa bafwa ta futumuka? Mbala ya nkaka bakala to nkento na nge, mama to papa na nge, nkaka na nge to mwana na nge me fwaka. Bubu yai nge lenda yamba yandi diaka ve, nge lenda solula ve ti yandi to nkutu kuseka ti yandi. Kima ya kiese kele nde, bonso Marta, nge kele ti bikuma ya mbote ya kutuba nde, ‘Mono me zaba nde yandi ta futumuka.’ Ata mpidina, yo kele mbote nde konso muntu kuyindula bikuma yina ke ndimisaka yandi nde bafwa ta futumuka. w17.12 3 § 1-2

Yezu vandaka kuzola Nsiku ya Moize. Yo ke yitukisa beto ve sambu Nsiku yango katukaka na Tata na yandi Yehowa, Muntu ya kuluta mfunu na luzingu na yandi. Mukapu ya bubu monisaka na ntwala zola ya ngolo ya Yezu sambu na nsiku ya Nzambi. Mambu yina Yezu salaka mpi tubaka monisaka nde Nsiku ya Nzambi vandaka ya kukuka, ya kutudila ntima mpi yo vandaka mfunu mingi. (Mat. 5:17-19) Ziku Yezu vandaka kuwa mpasi na kumona balongi ya nsiku mpi Bafarize ke sadila Nsiku ya Tata na yandi na mutindu mosi ya mbi mpi bo vandaka kukumisa yo ngolo. Yandi tubaka nde: “Beno ke pesaka ndambu mosi na kati ya bandambu kumi ya mante, ya aneti mpi ya kumini,” yo ke tendula nde balongi ya nsiku mpi Bafarize vandaka kutula dikebi kaka na mambu ya fioti-fioti ya Nsiku. Keti yo vandaka mbi? Yezu tendulaka nde: “Kansi beno ke vwezaka mambu ya kuluta mfunu ya Nsiku, disongidila lunungu, mawa, mpi kwikama.” (Mat. 23:23) Bafarize vandaka ve kubakisa Nsiku, mpi bo vandaka kuyindula nde bo me luta bantu ya nkaka. Kansi Yezu bakisaka mbote Nsiku mpi mambu yonso yina Nsiku vandaka kumonisa sambu na Yehowa. w17.11 13 § 1-2

Bantu lenda tuba nde: “Sambu na nki beno kele makambu ngolo? Beno fwete sepela mpi ti luzingu.” Kansi Ndinga ya Nzambi ke buyisaka pite. (1 Bate. 4:4-8) Yehowa kele ti nswa ya kutudila beto bansiku sambu yandi muntu gangaka beto. Yandi ke tuba nde kaka bankwelani kele ti nswa ya kuvukisa nitu. Yehowa me pesaka beto bansiku sambu yandi ke zolaka beto. Yandi me zaba nde kana beto ke zitisa yo luzingu na beto ta vanda mbote. Dibuta yina ke zitisaka bansiku ya Nzambi ke zolanaka, ke vandaka ti luzitu mpi ta vanda na lutaninu. Nzambi ta pesa ndola na bantu yina ke zabaka bansiku na yandi kansi ke zitisaka yo ve. (Baeb. 13:4) Biblia ke longa beto mutindu ya kutina pite. Beto fwete keba na mambu yina beto ke talaka. (Mat. 5:28, 29) Yo ke tendula nde beto fwete tala ve bifwanisu to bafilme ya ke monisa bantu kinkonga mpi miziki ya kele ti mambu ya nsoni.—Baef. 5:3-5. w17.11 22 § 9-10

Bansadi ya Yehowa ya ntangu ya ntama vandaka kuyimba sambu na kukumisa yandi. Kima ya kiese kele nde ntangu bantu ya Izraele vandaka ya kwikama na Yehowa, kuyimba vandaka mfunu na lusambu na bo. Mu mbandu, ntangu Davidi vandaka kubongisa bima ya kutunga tempelo, yandi yidikaka Balevi 4000 sambu na kuyimbila Yehowa. Balevi 288 na kati na bo, “yikanaka ti bankunga sambu na Yehowa, bo yonso zabaka kisalu mbote-mbote.” (1 Bans. 23:5; 25:7) Miziki mpi bankunga vandaka mpi mfunu na nkinsi ya kuyantika kusadila tempelo. Biblia ke tuba nde: “Ntangu bantu yina ke bulaka bampungi ti miyimbi-bankunga vandaka kukumisa mpi kupesa Yehowa matondo na bumosi, mpi ntangu makelele ya bampungi, ya basembale, mpi ya bima ya nkaka ya kubudila miziki tombukaka na zulu ntangu bo vandaka kukumisa Yehowa, . . . nkembo ya Yehowa fulukaka na nzo ya Nzambi ya kieleka.” Ziku bantangu ya mutindu yai kumisaka ngolo lukwikilu ya bantu ya Izraele!—2 Bans. 5:13, 14; 7:6. w17.11 4 § 4-5

Yezu zabaka nde bantu yonso ve ta ndima malongi na yandi. Yandi zabaka mpi nde balongoki fwete vanda kikesa sambu bankaka ta telemina bo. Yezu kwisaka na ntoto sambu na kulonga bantu kieleka ya Nzambi kansi ve kukabula mabuta. (Yoa. 18:37) Kansi yo vandaka mfunu nde balongoki kuzaba nde kulanda Yezu ta vanda ve ntangu yonso pete, mingi-mingi kana banduku to bantu ya mabuta na bo ke ndima ve kieleka. Balongoki ke sepedisaka Yezu ntangu bo ke landaka kukanga ntima ata mabuta na bo ke seka bo to me yambula bo. Ata bo ke kutana ti bampasi, bo ke bakaka mambote mingi kuluta. (Mar. 10:29, 30) Ata bantu ya dibuta ke telemina beto sambu beto ke sambila Yehowa, beto fwete landa kuzola bo. Kansi beto fwete vila ve nde zola na beto sambu na Nzambi mpi sambu na Kristu fwete luta zola yina beto kele na yo sambu na bantu ya dibuta na beto. (Mat. 10:37) Beto fwete zaba nde Satana lenda sadila zola yina beto ke monisila bantu ya dibuta sambu na kubebisa kinduku na beto ti Yehowa. w17.10 13 § 3-6

Mbona-meso yai ke ndimisa beto nde Yehowa ta bika ve nde mambi kulanda kusalama na kati ya bansadi na yandi. Kana Yehowa kumona kima ya mbi, yandi ta katula yo nswalu kibeni. (1 Bak. 5:13) Wanzio monisaka yo ntangu yandi fikaka nswalu mufiniku ya kitunga yina vandaka ti mambi. Mbona-meso yai ndimisaka bantu ya Izraele ya bilumbu ya Zekaria nde Yehowa ta tanina lusambu ya bunkete. Mbona-meso yibusaka Bayuda nde bo mpi fwete sala ngolo na kutanina lusambu ya bunkete. Bansadi ya Nzambi fwete pesa ve nzila nde mambi kusalama na kati na bo. Bubu yai, Yehowa me bendaka beto na dibundu na yandi ya bunkete, yandi ke zolaka beto mpi ke taninaka beto. Konso muntu na kati na beto fwete sala ngolo sambu na kutanina bunkete ya dibundu. Mambi fwete vanda ve ata fioti na kati ya bansadi ya Yehowa. w17.10 24 § 14-15; 25 § 17-18

Bayuda to bantu ya Izraele sonikaka mikanda 39 ya ntete ya Biblia. Bo kele bantu ya ntete yina Nzambi ‘pesaka mambu na yandi ya santu.’ (Bar. 3:1, 2) Na mvu-nkama ya tatu na ntwala ya ntangu na beto, Bayuda mingi vandaka kubakisa diaka ve Kiebreo. Sambu na nki? Ntangu Alexandre le Grand nungaka bansi ya nkaka, kimfumu ya Grèce kumaka kuyala bansi mingi. Yo yina bantu ya bansi yina mpi bantu mingi kumaka kutuba Kigreki na kisika ya kutuba ndinga na bo. (Dan. 8:5-7, 20, 21) Bayuda mingi mpi vandaka kutuba diaka ve Kiebreo, yo kumaka mpasi sambu bo bakisa Biblia na Kiebreo. Inki sadisaka bo na kubakisa Biblia? Bo bakaka Biblia yina vandaka na Kiebreo mpi bo Balulaka yo na Kigreki, yo manaka na mvu-nkama ya zole na ntwala nde Yezu kubutuka. Bo bingaka mbalula yango la Septante. Yo kele mbalula ya ntete ya Masonuku ya Kiebreo. w17.09 20 § 7-9

Kana mfumu ya kisalu ke lomba nge na kusala bangunga mingi kuluta na kilumbu ya lusambu ya dibuta, ya balukutakanu to na kilumbu yina nge ke samunaka. Nge fwete monisa kikesa mpi kubuya ebuna bana na nge ta landa mbandu na nge ya mbote. Yo ke lombaka mpi kikesa sambu na kusadisa bana na kubaka lukanu ya kusadila Nzambi. Mu mbandu bibuti ya nkaka ke kukaka ve kusiamisa bana na bo na kusala kisalu ya kimupasudi-nzila bamvula mingi, kukwenda kisika mpusa kele mingi, kusala na Betele, kusala kisalu ya kutunga Banzo ya Kimfumu to Banzo ya Balukutakanu ya Nene. Ziku, bo ke yindulaka nde bana na bo ta kuka ve kusadisa bo ntangu bo ta nuna. Kansi bibuti ya mayele ke monisaka kikesa mpi ke tulaka ntima nde Yehowa ta lungisa bampusa na bo. (Nk. 37:25) Bibuti ya ke monisaka kikesa mpi ya ke tudilaka Yehowa ntima, ke sadisaka bana na bo na kusadila Yehowa.—1 Sam. 1:27, 28; 2 Tim. 3:14, 15. w17.09 30 § 14-15

Inki mutindu nge lenda sadisa bana na nge na kuyedisa kikalulu ya kudiyala? Bibuti ke zabaka nde bana ke butukaka ve ti kikalulu ya kudiyala. Ya kieleka, mbandu ya mbote ya bibuti ta sadisa bana na bo na kuyedisa kikalulu yai. (Baef. 6:4) Kana bana na nge kele ve ti kikalulu ya kudiyala, kuditadila kana nge ke pesaka mbandu ya mbote. Kana nge ke samuna mingi, ke kwenda na balukutakanu mpi ke twadisa lusambu ya dibuta, nge ta pesa bana na nge mbandu ya mbote. Vanda mpi ti kikesa ya kubuyisa bana na nge mambu yina nge ke mona mbi! Yehowa tudilaka Adami ti Eva bandilu sambu yo sadisa bo na kuzitisa kiyeka na yandi. Mutindu mosi, kana bibuti ke longa bana mpi ke pesa mbandu ya mbote, yo lenda longa bana na bo kikalulu ya kudiyala. Bibuti fwete sadisa bana na kuzitisa Nzambi mpi minsiku na yandi.—Bing. 1:5, 7, 8. w17.09 7 § 17

Bampasi ya bansadi ya Yehowa ta mana kaka ntangu nsi-ntoto ya Satana ta suka. Beto yonso lenda kutana ti bampasi ya mutindu na mutindu, mu mbandu kukonda kisalu, maladi ya ngolo, mbangika, bisumbula, to bantu ya mbi lenda baka bima na beto. Sambu na kusadisana na bampasi yai, beto fwete wila kibeni bampangi mawa. Mawa ta pusa beto na kusadila bampangi mambu ya mbote. (Baef. 4:32) Yai kele bikalulu ya kimuntu ya mpa. Yo ta sadisa beto na kulanda mbandu ya Nzambi mpi kupesa bampangi kikesa. (2 Bak. 1:3, 4) Inki mutindu beto lenda monisila bampangi ya kele banzenza mpi bansukami ntima-mbote? Beto fwete yambaka bo, kukuma banduku na bo mpi kusadisa bo na kubakisa nde dibundu ke zolaka bo. (1 Bak. 12:22) Diaka, Bambangi mingi ke wilaka banzenza mawa mpi ke salaka ngolo na kulonguka ndinga na bo.—1 Bak. 9:23. w17.08 23 § 7; 24 § 8, 9

Yehowa ke zolaka nde beto vanda ntima-nda. Inki ta sadisa beto? Beto fwete samba sambu na kulomba mpeve santu ya Nzambi. Kuvila ve nde mpeve santu ke sadisaka beto na kuvanda ntima-nda. (Baef. 3:16; 6:18; 1 Bate. 5:17-19) Yo yina, bondila Yehowa na kusadisa nge na kuvanda ntima-nda! Yibuka mpi mambu yina sadisaka Abrahami, Yozefi mpi Davidi na kuvingila kulungana ya balusilu ya Yehowa. Bo vandaka ti lukwikilu mpi bo tudilaka Yehowa ntima. Bo sosaka ve kaka mambote na bo mosi mpi bo vandaka ve kusala mambu yina bo me zola. Kuyindula mambote yina bo bakaka ta pesa beto mpi kikesa ya kuvanda ntima-nda. Ata beto ke kutana ti bampasi, lukanu na beto kele ya kuvanda ti “kikalulu ya kuvingila.” Bantangu ya nkaka beto lenda kudiyula nde: “O Yehowa, tii nki ntangu?” (Yez. 6:11) Ata mpidina, mpeve santu lenda sadisa beto na kutuba bangogo ya Yeremia yina kele na mukapu ya bubu. w17.08 7 § 18-20

Ntangu Yezu vandaka mwana, yo kele pwelele nde yandi vandaka kusakana. Ndinga ya Nzambi ke tuba nde, kele ti “ntangu ya kuseka” mpi “ntangu ya kukina.” (Lon. 3:4) Kansi, Yezu kumaka nduku ya Yehowa sambu yandi vandaka kutanga Biblia. Ntangu yandi vandaka ti bamvula 12, balongi ya tempelo yitukaka sambu “na mayele na yandi mpi sambu na bamvutu na yandi.” (Luka 2:42, 46, 47) Ntangu Yezu kumaka mbuta, yandi vandaka na kiese ya kusala mambu yina Nzambi vandaka kulomba yandi. Mu mbandu, Nzambi lombaka yandi na “kuzabisa nsangu ya mbote na bansukami” mpi kuzabisa “bifwa-meso nde bo ta mona.” (Luka 4:18) Yezu vandaka kusepela kulonga bantu mambu ya Tata na yandi. (Luka 10:21) Na nima ya kusolula ti nkento mosi mambu ya lusambu ya kieleka, Yezu songaka balongoki na yandi nde: “Madia na mono kele kusala luzolo ya muntu yina tindaka mono mpi kumanisa kisalu na yandi.” (Yoa. 4:31-34) Yezu vandaka na kiese sambu yandi vandaka kuzola Nzambi mpi bantu ya nkaka. Kana nge sala mpidina, nge ta vanda mpi na kiese. w17.07 23 § 4-5

Mambu yina Yezu salaka mpi tubaka monisaka nde yandi landaka mbote-mbote bikalulu ya Tata na yandi. (Yoa. 5:19) Yehowa tindaka Yezu na ntoto sambu na kupesa kikesa na ‘bantu yonso yina kele na mpasi mpi na mawa.’ (Yez. 61:1, 2; Luka 4:17-21) Bantu zabaka nde Yezu vandaka kubakisa bampasi na bo mpi yandi vandaka kibeni na mfunu ya kusadisa bo. (Baeb. 2:17) Biblia ke monisa pwelele nde Yezu ke sobaka ve. Yo ke tuba nde: “Yezu Kristu kele mutindu mosi mazono, bubu yai, mpi kimakulu.” (Baeb. 13:8) Biblia ke binga yandi “Ntwadisi ya Ntete-Ntete ya luzingu” sambu yandi ke zolaka nde beto zinga mvula na mvula. Yezu yandi mosi kutanaka ti bampasi yo yina “yandi lenda sadisa bantu yina ke mekama.” (Bis. 3:15; Baeb. 2:10, 18) Yezu ke waka mpasi ntangu bantu ke monaka mpasi. Yandi ke bakisaka bampasi na bo mpi ke pesaka bo kikesa “na ntangu ya mbote.”—Baeb. 4:15, 16. w17.07 13 § 6-7; 14 § 10

Beto fwete baka bimvwama ya kimpeve na valere. Beto fwete sala ngolo sambu Satana ti nsi-ntoto kukanga beto ve nzila ya kulanda kuzola bimvwama ya kimpeve. Kana beto keba ve, beto lenda kuma kudipesa mingi na kisalu yina ke pesa mbongo mingi, luzingu ya kitoko, to kukuma ti mpeve ya kudisikisa sambu na bima na beto. Ntumwa Yoane ke yibusa beto nde kubika fioti nsi-ntoto yai ti mambu na yo yonso ta vanda diaka ve. (1 Yoa. 2:15-17) Yo yina beto fwete landa kuzola bimvwama ya kimpeve mpi kutanina yo. Yambula konso kima yina lenda pusa nge na kuzola diaka ve Kimfumu ya Nzambi. Samuna nsangu ya Kimfumu ti kikesa, mpi landa kuzola kisalu ya kusamuna. Landa na kulonguka bakieleka ya Biblia. Kana nge ke sala mpidina, nge ta kuma ti ‘kimvwama yina ke manaka ve na zulu, kisika miyibi ke kumaka ve mpi nselele ke diaka ve.’—Luka 12:33. w17.06 13 § 19-20

Yehowa kele ve Mfumu ya nku. Bantu yina ke lemfukilaka yandi ke zingaka mbote mpi na kiese. (2 Bak. 3:17) Davidi tubaka mambu yai sambu na Yehowa: “Bunene ti lukumu kele na ntwala na yandi; ngolo ti kiese kele na kisika yina yandi ke zingaka.” (1 Bans. 16:7, 27) Muyimbi-bankunga Etani sonikaka nde: “Kiese na bantu yina me zaba milolo ya kiese. O Yehowa, bo ke tambulaka na nsemo ya luse na nge. Bo ke vandaka na kiese sambu na zina na nge kilumbu ya mvimba, mpi na lunungu na nge, bo kele ya kunanguka.” (Nk. 89:15, 16) Kuyindula mambu ya mbote yina Yehowa ke sadilaka beto ta ndimisa beto nde yandi kele Mfumu ya kuluta mbote. Yehowa muntu gangaka beto, yo yina yandi ke zabaka mbote-mbote bima yina lenda pesa beto kiese. Yandi kele ntima-mbote mpi ke kabilaka beto bima mingi kuluta. Konso kima yina yandi ke lombaka beto kele sambu na mambote na beto. Nkutu kana beto ke kudipesa na kisalu ya Yehowa mpi ke lemfukila yandi, beto ta zinga na kiese.—Yez. 48:17. w17.06 29 § 10-11

Mpangi-nkento mosi na Angleterre vandaka kibeni na mfunu ya kubuta. Ntangu yandi bakisaka nde yandi kele mukobo, yandi kudiyangisaka mingi. Na nima yandi ti bakala na yandi kumaka kusansa mwana ya muntu ya nkaka. Ata mpidina, mpangi-nkento vandaka kaka kudiyangisa bantangu ya nkaka. Yandi ke tuba nde: “Mono zabaka nde kusansa mwana ya muntu kele ve kiteso mosi ti kusansa mwana na mono mosi.” Biblia ke tuba nde “bo ta tanina” nkento na “nzila ya kubuta.” (1 Tim. 2:15) Yo ke tendula ve nde nkento ta baka luzingu ya mvula na mvula kaka sambu yandi butaka bana. Kansi nki verse yai ke zola kutuba? Nkento yina me butaka ke lutisaka ntangu mingi na kuyidika bana ti nzo na yandi, yandi ke vandaka mpenza ve ti ntangu ya kutonga to kudikotisa na mambu yina me tala yandi ve.—1 Tim. 5:13. w17.06 5 § 6-8

Keti Elihu zolaka kutuba nde bikesa na beto na kisalu ya Nzambi kele mpamba? Ve. Elihu zolaka kutuba nde Yehowa ke pusaka beto ve na ngolo na kusambila yandi sambu yandi kele ya kukuka. Beto lenda sala ve kima mosi yina lenda kumisa Yehowa mvwama to ngolo. Ya kieleka, bikalulu na beto ya mbote me katuka na Nzambi, yandi ke monaka mutindu beto ke sadilaka yo, mpi ke sadisaka beto na kusala mambu ya mbote. Ntangu beto ke zolaka mingi bansadi ya Yehowa, yandi ke monaka nde beto ke monisa kimuntu na yandi. Bingana 19:17 ke tuba nde: “Muntu yina ke monisila muntu ya kukonda mfunu ntima ya mbote ke defisa Yehowa, mpi Nzambi ta futa yandi sambu na mambu yina yandi ke sala.” Yehowa ke monaka konso kima ya mbote yina beto ke sadilaka bantu ya nkaka. Ata Yehowa gangaka bima yonso, yandi ke tadilaka konso kima ya mbote yina beto ke salaka bonso mfuka yina yandi ta futa, disongidila yandi ta pesa beto bima mingi ya mbote. Yezu, Mwana ya Nzambi, ndimisaka kieleka yai.—Luka 14:13, 14. w17.04 29 § 3-4

Katula kutanga Biblia mpi mikanda na beto, nki kima ya nkaka ta sadisa beto na kuzola Biblia mingi? Kukwenda mbala na mbala na balukutakanu sambu Yehowa kulonga beto. Mu mbandu, konso mposo Nzambi ke longaka beto na nzila ya Nzozulu ya Nkengi. Kana beto ke zola kubakila yo mambote, beto fwete yidika yo na ntwala mpi kutanga baverse yonso yina kele na kati. Bubu yai, bantu lenda baka to kutanga Nzozulu ya Nkengi na Internet. Na jw.org mpi na JW Library, Nzozulu ya Nkengi kele na bandinga mingi. Baprograme ya nkaka yina bantu ke sadilaka na telefone to na tablete ke basisaka baverse nswalu. Beto fwete tanga masolo yonso ya kele na kati. Kana beto ke tanga mpi ke yindula na dikebi yonso baverse yina kele na kati, beto ta kuma kuzola Biblia mingi. w17.05 20 § 14

Na nima ya mbotika, beto ke salaka ngolo na kuzinga na kuwakana ti lusilu na beto mpi kusadila Nzambi na kwikama yonso. Kana muntu me sala lusilu ya kusadila Yehowa, yandi lenda soba yo diaka ve. Mpangi yina me lemba na kusadila to kuzitisa bansiku ya Yehowa lenda tuba ve nde yandi kudipesaka ve na Nzambi mpi nde mbotika na yandi vandaka ve ya kieleka. Kana mpangi yina me kudipesaka na Yehowa me sala disumu ya nene, Yehowa mpi dibundu ta sambisa yandi. Beto fwete vanda ve bonso bantu yina Yezu tubilaka nde: ‘Beno me bikisaka zola yina beno vandaka na yo ntete.’ Kansi, beto ke zola nde yandi zabisa beto nde: ‘Mono me zaba bisalu na beno, zola na beno, lukwikilu na beno, kisalu na beno, mpi kukanga-ntima na beno, mpi bisalu na beno ya ntangu yai kele mingi kuluta yina beno salaka ntete.’ (Kus. 2:4, 19) Sambu na kusepedisa Yehowa, beto fwete lungisa mambu yina beto silaka ntangu beto kudipesaka na yandi. w17.04 6-7 § 12-13

Abrahami yulaka ngiufula yai: “Keti Zuzi ya ntoto ya mvimba ta sala ve mambu ya mbote?” (Kuy. 18:25) Abrahami vandaka muntu ya kimpeve, yandi vandaka ve na badute ntangu yandi yulaka ngiufula yai. Kansi, ngiufula na yandi monisaka nde yandi vandaka kundima nde ntangu Yehowa ta fwa Sodome ti Gomore, yandi lenda ve ata fioti kufwa ‘muntu ya mbote kumosi ti muntu ya mbi.’ Abrahami lendaka ve ata fioti kuyindula kima ya mutindu yina. Yandi ndimaka na ntima ya mvimba sambu Yehowa kele muntu ya ntete ya ke salaka mambu ya mbote, yandi ta salaka ntangu yonso mambu ya mbote. Biblia ke tuba nde: “Yandi ke zolaka lunungu mpi ke sambisaka kukonda kupona-pona.”—Nk. 33:5. w17.04 18 § 1-2

Bibuti, kana beno ke zola nde bana na beno kuvanda banduku ya Yehowa mpi kubaka luzingu ya mvula na mvula, beno fwete vanda bambandu ya mbote sambu na bo. Ntangu bana ke mona mutindu beno ke ‘sosa ntete Kimfumu,’ bo ta kuma kundima nde konso kilumbu, Yehowa ta pesa bo bima yina bo kele na yo mfunu. (Mat. 6:33, 34) Beno tula kisalu ya Yehowa na kisika ya ntete, beno kudipesa ve mingi na kusosa bima ya kinsuni. Beno zinga kukonda mindondo mpi beno baka-baka ve bamfuka. Beno sosa ‘kimvwama ya zulu,’ disongidila kusosa nde Yehowa kundima beno na kisika ya kusosa mbongo to “nkembo ya bantu.” (Mar. 10:21, 22; Yoa. 12:43) Kibuti, yidika manaka na nge ya kisalu sambu nge vanda ti ntangu ya kusolula ti bana na nge. Monisa bana nde nge ke zolaka bo tula Yehowa na kisika ya ntete kansi ve kusosa lukumu to mbongo, sambu na bo mosi to sambu na kusadisa beno bibuti. Beno yindula ve nde bana fwete bongisa luzingu na beno. Bantu “ke vingilaka ve nde bana kubumba bima sambu na bibuti na bo, kansi nde bibuti kubumba bima sambu na bana na bo.”—2 Bak. 12:14. w17.05 8 § 3; 9 § 4