Februari

Yezu vandaka kutudila bantu dikebi. Bantu bakisaka nde yandi vandaka kuzola bo, yo yina bo ndimaka nsangu ya Kimfumu. Kana beto ke tudila bantu dikebi, beto ta sala mbote kisalu ya kusamuna. Inki ta sadisa beto na kuditula na kisika ya bantu yina beto ke longa? Beto fwete kuditula na kisika ya bantu yina beto ke solula ti bo na kisalu ya kusamuna mpi kusadila bo mambu mutindu beto ta zola nde bo sadila beto. (Mat. 7:12) Beto yindula bampusa ya konso muntu. Beto fwete sadila metode yai ntangu beto ke solula ti bantu na kisalu ya kusamuna. Beto fwete zaba mambu yina konso muntu ke kutana ti yo mpi mabanza na yandi. Yula yandi bangiufula na mayele yonso. (Bing. 20:5) Kana beto ke yula bangiufula, yo ta sadisa yandi na kutuba mambu yina ke yangisa yandi sambu beto zabisa yandi nsangu ya mbote. Kuzaba mambu yai, ta sadisa beto na kutula dikebi na mambu yina ke yangisa yandi mpi beto ta sadisa yandi mutindu Yezu vandaka kusala.—Fwanisa ti 1 Bakorinto 9:19-23. w19.03 20 § 2; 22 § 8-9

Adami ti Eva monisaka ve ntonda na mambu yonso ya mbote yina Yehowa sadilaka bo. Beto yonso lenda monisa nde lukanu na bo vandaka ya mbi. Ntangu beto ke bakaka mbotika, beto ke ndimaka nde Yehowa muntu kele ti nswa ya kutula bansiku na mambu ya mbote mpi ya mbi. Diaka, beto ke monisaka nde beto ke zolaka Tata na beto mpi ke tudilaka yandi ntima. Na nima ya kubaka mbotika, beto ke vandaka ti mukumba ya kuzitisa bansiku ya Yehowa konso kilumbu kansi ya beto mosi ve. Konso mvula, bantu mingi kibeni ke zitisaka bansiku ya Yehowa. Nge ta landa mbandu na bo kana nge ke landa kulonguka Biblia, Ndinga ya Nzambi, ke vukana mbala na mbala ti bampangi yai mpi ke longa na kikesa mambu ya Tata na nge ya zola. (Baeb. 10:24, 25) Ntangu nge ke baka balukanu, landa bandongisila yina Yehowa ke pesa nge na nzila ya Biblia mpi ya dibundu na yandi. (Yez. 30:21) Ebuna, mambu yonso ya nge ta sala ta nunga.—Bing. 16:20. w19.03 7 § 17-18

Yehowa ke pesaka beto madia mingi ya kimpeve na nzila ya balukutakanu, ya mikanda mpi ya site Internet na beto. Keti nge me waka dezia diskure mosi, disolo mosi ya nge me tangaka to nge me talaka manaka mosi ya JW Télédiffusion mpi na nima nge tuba nde: “Mambu yai kele kibeni yina mono vandaka na yo mfunu!” Inki mutindu beto lenda monisila Yehowa ntonda? (Bakol. 3:15) Beto lenda monisila Yehowa ntonda ntangu beto ke samba yandi sambu na mambu ya mbote yina yandi ke sadilaka beto. Beto ke monisilaka mpi Yehowa ntonda ntangu beto ke tulaka bunkete na Nzo ya Kimfumu. Beto ke tulaka bunkete mbala na mbala mpi ke taninaka yo. Diaka, bampangi yina ke talaka mambu ya bavideo mpi miziki ke sadilaka bisadilu yina mbote sambu yo beba ve. Kana beto ke tanina mbote Nzo ya Kimfumu, yo ta zinga mingi mpi yo ta lomba ve mambu mingi sambu na kuyidika yo. Kusala mutindu yina ta sadisa beto na kubumba mbongo sambu na kutunga mpi kuyidika Banzo ya Kimfumu ya nkaka na ntoto ya mvimba. w19.02 18 § 17-18

Yobi vandaka kulutisa ntangu na kutala mambu ya kuyituka yina Yehowa me salaka. (Yobi 26:7, 8) Ntangu yandi vandaka kutala ntoto, zulu, matuti, bambwetete mpi banzasi, yo vandaka kuyitukisa yandi mingi mpi yandi bakisaka nde yandi me zaba mambu fioti mpamba. Yandi vandaka kubaka na mbalu mambu yina Yehowa vandaka kutuba mpi yo pusaka yandi na kutuba nde: “Mono me bumba mbote-mbote mambu yina yandi ke tubaka.” (Yobi 23:12) Boma mpi luzitu yina Yobi vandaka na yo sambu na Yehowa sadisaka yandi na kubikala ya kwikama. Yandi zolaka Tata na yandi mpi zolaka kupesa yandi kiese. Yandi kumisaka ngolo lukanu na yandi ya kubikala ya kwikama. Beto mpi fwete sala mutindu mosi. Bubu yai, beto me zaba mambu mingi ya kuyituka yina Nzambi me salaka kuluta bantu ya bilumbu ya Yobi. Beto kele mpi ti Biblia ya mvimba yina ke sadisaka beto na kuzaba Yehowa mbote. Mambu yina beto ke longukaka ke sadisaka beto na kuwa Nzambi boma. Luzitu mpi boma sambu na Yehowa ta sadisa beto na kuzola mpi kulemfukila yandi. Yo ta sadisa beto mpi na kuvanda ti mpusa ya ngolo ya kubikala ya kwikama.—Yobi 28:28. w19.02 5 § 12

Banda ntama, bamfumu ya luyalu ke bangikaka bansadi ya Yehowa. Bo lenda kusila beto makambu mingi ya “mbi” kansi bo ke wilaka beto makasi sambu beto ‘ke lemfukilaka Nzambi bonso mfumu na kisika ya kulemfukila bantu.’ (Bis. 5:29) Bo lenda pesa beto nsoni, kutula beto na boloko to kubula beto. Kansi, na kisika ya kuvutula mbi na mbi, Yehowa ke sadisaka beto na kuvanda mawete. Beto tadila mbandu ya batoko tatu ya Baebreo Anania, Mishaele, mpi Azaria yina vandaka na kimpika na Babilone. Na mawete yonso, bo songaka ntotila kikuma yina bo buyaka kusambila kiteki yina yandi salaka. Bo ndimaka mambu yonso yina Yehowa ta pesa nzila nde yo salama. (Dan. 3:1, 8-28) Inki mutindu beto lenda landa mbandu ya batoko yai tatu ya Baebreo ntangu bantu ke meka kwikama na beto? Na kudikulumusa yonso, beto ke tulaka ntima nde Yehowa ta sadisa beto. (Nk. 118:7) Beto ke pesaka mvutu ya mawete mpi ya luzitu na bantu yina ke kusilaka beto makambu. (1 Pie. 3:15) Beto ke buyaka kusala konso kima yina lenda bebisa kinduku na beto ti Tata na beto ya zola. w19.02 10-11 § 11-13

Beto lenda kumisa kikesa na beto mingi kana beto ke yindula kivuvu yina beto kele na yo sambu na kimenga ya Yezu. (Yoa. 3:16; Baef. 1:7) Mwa bamposo na ntwala ya Lusungiminu, beto ke vandaka ti dibaku ya kumonisa ntonda sambu na kimenga yai. Na nsungi yina, landa kutanga Biblia sambu na Lusungiminu mpi yindula mingi na kisambu mambu yina salamaka bilumbu fioti na ntwala ya lufwa ya Yezu. Na nima, ntangu beto ke vukana sambu na Madia ya Nkokila ya Mfumu, beto ta bakisa mbote ntendula ya mampa ti vinu mpi mfunu ya kimenga ya Yezu. Ntangu beto ke bakisa mambu yina Yezu ti Yehowa me salaka sambu na beto mpi mambote yina yo ke natilaka beto ti bantu yina beto ke zolaka, kivuvu na beto ke kumaka ngolo mpi yo ke sadisaka beto na kukanga ntima tii na nsuka. (Baeb. 12:3) Beto fwete monisa ntonda na Yezu, Nganga-Nzambi na beto ya Nene yina ke landa kumonisa kikalulu ya kudikulumusa mpi kikesa mpi ke lombaka sambu na mambote na beto. (Baeb. 7:24, 25) Sambu na kumonisa ntonda ya mingi, beto fwete yibuka lufwa ya Yezu na kwikama yonso mutindu yandi songaka beto.—Luka 22:19, 20. w19.01 22 § 8; 23-24 § 10-11

Yehowa me pesaka beto yonso dibaku ya kukumisa yandi. Bamvutu yina beto ke pesaka na balukutakanu kele “kimenga ya lukumu,” ata muntu mosi ve lenda pesa kimenga yai na kisika na beto. (Baeb. 13:15) Keti Yehowa ke lombaka beto yonso kimenga, disongidila bamvutu ya mutindu mosi? Ata fioti ve! Mona balukutakanu bonso kisika yina nge ke dia ti banduku ya mbote. Yindula nde banduku na nge ya dibundu me bingisa nge na kudia ti bampangi ya nkaka mpi bo me lomba nge na kulamba madia, nki nge ta sala? Nge lenda wa boma kansi nge ta sala bikesa na kulamba madia yina ta sepedisa bampangi. Yehowa, muntu ke bingisaka beto. Yandi ke yidikilaka beto bima mingi ya mbote na balukutakanu. (Nk. 23:5; Mat. 24:45) Yandi ke sepelaka ti dikabu ya fioti ya kuluta mbote yina beto me nata. Yo yina, yidika mbote balukutakanu mpi pesa mvutu kukonda boma. Mpidina, nge ta dia na mesa ya Yehowa mpi nge ta nata dikabu ya kupesa bampangi. w19.01 8 § 3; 13 § 20

Na ntangu ya ntama, mbala mingi bo vandaka kutadila pite mutindu mosi ti lusambu ya luvunu. (Ozea 4:13, 14) Bantu mingi vandaka kuzola lusambu ya luvunu sambu bo vandaka kusala pite, keti lusambu yina vandaka kupesa bo kiese? Ata fioti ve! Davidi tubaka nde bantu yina ke sambilaka banzambi ya luvunu “ke kumisa mawa na bo mingi.” Nkutu, bo vandaka kutambika bana na bo na banzambi ya luvunu. (Yez. 57:5) Yehowa mengaka ntima na bo ya mbi. (Yer. 7:31) Bubu yai, mabundu mingi ya luvunu ke ndimaka pite mpi kuvukisa nitu babakala ti babakala to bankento ti bankento. Luzingu ya mansoni ya mutindu yai lenda pusa bantu na kuyindula nde bo kele na kimpwanza, kansi bo ‘ke kumisa mawa na bo mingi.’ (1 Bak. 6:18, 19) Keti nge ke bakisaka yo? Yo yina leke, widikila Tata na nge ya zulu. Monisa nde kulemfukila Nzambi kele mbote. Yindula mbote-mbote bampasi yina pite lenda natila nge. Nge ta bakisa nde ata kiese ya ntangu fioti ke nataka bampasi.—Bag. 6:8. w18.12 27-28 § 16-18

Kana nkwelani mosi me sala pite, nkwelani yina me sala mbi ve fwete baka lukanu. Yezu tubaka nde nkwelani yina me sala mbi ve kele ti nswa ya kufwa makwela mpi kukwela diaka. (Mat. 19:9) Kansi, yo kele mbi ve kana yandi me lolula nkwelani na yandi. Ozea vutulaka Gomere na makwela. Ntangu Ozea vutulaka Gomere na makwela, yandi songaka Gomere nde yandi lenda vukisa ve nitu ti bakala ya nkaka. Na ntangu mosi buna, Ozea ‘vukisaka ve nitu’ ti Gomere. (Ozea 3:1-3, noti na nsi ya lutiti) Yo fwete vanda nde Ozea vukisaka diaka nitu ti nkento na yandi. Diambu yai ke monisa mutindu Nzambi vandaka ti luzolo ya kulolula bantu ya Izraele mpi kulanda kusala kinduku ti bo. (Ozea 1:11; 3:4, 5) Yo ke longa beto nki sambu na makwela bubu yai? Kana nkwelani yina salaka mbi ve me vukisa diaka nitu ti nkwelani na yandi, yo ke monana nde yandi me lolula bakala to nkento na yandi. (1 Bak. 7:3, 5) Mpidina bo ta fwa diaka ve makwela. Na nima, bakala ti nkento fwete sala kumosi mpi kusadisana sambu na kuzitisa makwela bonso Nzambi. w18.12 13 § 13

Ntangu beto ke longuka, beto fwete yindula mutindu Yehowa ke tadilaka mambu sambu yo sadisa beto na kubaka balukanu ya mbote. Na nima, kana beto me kutana ti diambu yina ke lomba nde beto baka lukanu mbala mosi, yo ta vanda ve mpasi mingi sambu na beto. Ntangu nkento ya Potifare zolaka kuvukisa nitu ti Yozefi na kingolo-ngolo, na mbala mosi yandi buyaka. Yo kele pwelele nde Yozefi yindulaka mingi mutindu Yehowa ke tadilaka makwela. (Kuy. 39:8, 9) Yozefi tubilaka nkento ya Potifare nde: “Inki mutindu mono lenda sala mbi yai ya nene mpi kusala kibeni disumu na ntwala ya Nzambi?” Yo ke monisa nde Yozefi vandaka ti mabanza ya Nzambi. Ebuna nge? Inki nge ta sala kana nduku mosi ya kisalu me yantika kusadisa nge bansaka yina lenda tedimisa bampusa ya kuvukisa nitu ti yandi? To nki nge ta sala kana muntu mosi ke tindila nge ba message to bafoto na telefone yina ke monisa bantu kinkonga? Yo kele mpasi ve na kubikala ya kwikama na Yehowa kana beto me longukaka dezia mambu yai, me ndimaka bangindu ya Yehowa mpi me kudibongisaka na ntwala. w18.11 25 § 13-14

Bantu ya nkaka ya mayele yina ke longukaka Biblia ke ndimaka nde verse yai ke tendula: “Mono ta pumbuka na kiese sambu na Mfumu; mono ta yangalala sambu na Nzambi.” Yo kele dilongi ya mfunu sambu na beto! Yehowa me pesaka beto balusilu ya kitoko sambu na bilumbu ke kwisa mpi yandi ke ndimisa beto nde ntama mingi ve yandi ta lungisa balusilu na yandi. Dilongi ya mfunu ya beto ke longuka na mukanda ya Habakuki kele nde beto fwete tudila Yehowa ntima. (Hab. 2:4) Sambu na kulanda kutudila Yehowa ntima, beto fwete kumisa ngolo kinduku na beto ti yandi. Yo yina, beto fwete (1) Landa kusamba mpi kusonga Yehowa bampasi na beto yonso. (2) Widikila na dikebi yonso mambu yina Yehowa ke songa beto na Ndinga na yandi mpi kulanda lutwadisu yina yandi ke pesa beto na nzila ya dibundu na yandi. (3) Vanda ya kwikama mpi kumonisa ntima-nda ntangu beto ke vingila kulungana ya balusilu ya Yehowa. Habakuki salaka mambu yai. Ata Habakuki waka kibeni boma ntangu yandi yantikaka kusolula ti Yehowa, nsuka-nsuka yandi bakaka kikesa mpi kumaka mpenza na kiese! Kana beto ke landa mbandu ya Habakuki, Yehowa, Tata na beto ya zulu, ta yamba beto ngolo mpi ta pesa beto kikesa. Yo ke pesa beto mpenza kikesa sambu na kuzinga na nsi-ntoto yai ya mbi! w18.11 17 § 18-19

Tala kikuma ya nkaka ya ke ndimisa nde Yehowa ke zolaka beto: Yandi “zolaka nsi-ntoto mingi kibeni yo yina yandi pesaka Mwana na yandi mosi kaka ya kubutuka, sambu konso muntu yina ke monisa lukwikilu na Mwana kufwa ve kansi kubaka luzingu ya mvula na mvula.” (Yoa. 3:16) Kimenga ya Yezu ke ndimisa beto nde Yezu ke zolaka beto mpi zola yango ke pesaka beto kikesa. Biblia ke tuba nde “mbangika to nzala” lenda ve “kukabula beto na zola ya Kristu.” (Bar. 8:35, 38, 39) Bantangu ya nkaka, beto ke kutanaka ti mambu yina ke lembisaka nitu to mabanza na beto mpi yina lenda manisa kiese na beto ya kusadila Yehowa. Kansi, kuyibuka zola ya nene yina Kristu monisilaka beto lenda pesa beto ngolo ya kulanda kukanga ntima. (2 Bak. 5:14) Zola ya Yezu ke pesaka beto mpusa ya kulanda kuzinga mpi ya kusadila Yehowa. Zola yango lenda sadisa beto na kudifwa ve, ata beto ke kutana ti bisumbula, mbangika, mawa to basusi. w18.09 14 § 8-9

Sambu na kulanda kutambula na kieleka, beto fwete ndima mpi kulemfuka na mambu yonso yina Yehowa ke tuba. Beto fwete tula kieleka na kisika ya ntete na luzingu na beto mpi kusadila minsiku ya Biblia na mambu yonso. Davidi bakaka lukanu ya kulanda kutambula na kieleka, beto mpi fwete sala yo. Kana ve, beto lenda kuma kuyindula mambu yina beto yambulaka sambu na kieleka mpi nkutu kuvutukila diaka mambu ya nkaka. Kansi, beto lenda ndima ve bakieleka ya Biblia ya nkaka mpi kubuya ya nkaka. Beto fwete ndima ‘bakieleka yonso.’ (Yoa. 16:13) Kima ta sadisa beto na kuyambula ve kieleka kele kusadila mbote ntangu na beto. Kana beto keba ve, beto lenda lutisa ntangu mingi na bansaka, na Internet to na kutala televizio. Ata mambu yai kele kibeni mbi ve, yo lenda baka beto ntangu yina beto zolaka kulonguka to kusamuna. w18.11 10 § 7-8

Ntangu yonso, mambu ya luzingu lenda soba na mutindu yina beto yindulaka ve, yo lenda yangisa beto mingi mpi beto lenda kuma ti basusi. (Bing. 12:25) Kana beto ke kuka ve kundima to kuyikama ti nsoba mosi buna, nki beto lenda sala sambu na kuvanda na ngemba? (Nk. 131:1-3) Yo vanda beto ke kutana ti diambu ya mpasi mingi, beto lenda vanda ti “ngemba ya Nzambi” yina ke taninaka “mabanza” na beto mpi ke sadisaka beto na kudiwa mbote. (Bafil. 4:6, 7) Kana beto kele ti basusi mpi ke kudiyangisa, “ngemba ya Nzambi” lenda pesa beto kikesa ya kulanda kusadila Yehowa. Mpeve ya Nzambi lenda sadisa beto na kudiwa mbote mpi na kuzwa baverse yina ta sadisa beto na kubakisa mambu ya kuluta mfunu na luzingu.—Yoa. 14:26, 27. w18.10 27 § 2; 28 § 5, 8

Inki kima me pesaka bantu mpasi mingi kibeni? Luvunu! Kutuba luvunu ke tendula kutuba kima yina beto me zaba nde yo kele ve ya masonga sambu kaka na kukusa muntu. Nani tubaka luvunu ya ntete? Diabulu! Yezu Kristu bingaka yandi “tata ya luvunu.” (Yoa. 8:44) Inki ntangu yandi tubaka luvunu ya ntete? Yandi tubaka yo na kilanga ya Edeni bamvula mingi me luta. Adami ti Eva vandaka ti luzingu ya kiese na Paladisu ya kitoko yina Yehowa pesaka bo. Nzambi songaka bo nde kana bo dia “mbuma ya nti ya kuzaba mambu ya mbote ti ya mbi,” bo ta fwa. Ata Satana zabaka mambu yai, yandi sadilaka nioka sambu na kusonga Eva nde: “Beno ta fwa ve ata fioti.” Yo vandaka luvunu ya ntete. Satana tubaka diaka nde: “Nzambi me zaba nde kaka kilumbu yina beno ta dia yo meso na beno ta kanguka mpi beno ta kuma bonso Nzambi, beno ta zaba mambu ya mbote ti ya mbi.”—Kuy. 2:15-17; 3:1-5. w18.10 6 § 1-2

Sambu na kuvanda ntima-mpembe, beto fwete bika nde mabanza mpi bampusa na beto kuvanda bunkete. Diambu yai kele mfunu kibeni sambu Yehowa kundima lusambu na beto. (2 Bak. 4:2; 1 Tim. 1:5) Yehowa tubaka nde: “Ata muntu mosi ve lenda mona mono mpi kubikala na luzingu.” (Kub. 33:20) Kansi nki mutindu bantu ya ntima-mpembe lenda “mona Nzambi”? Ngogo ya Kigreki ya bo me balula nde “mona” lenda tendula kumona na mabanza, kubakisa to kuzaba. Yo yina, ‘kumona Nzambi’ ke tendula kubakisa kimuntu na yandi mpi kuzola bikalulu na yandi. (Baef. 1:18) Diaka, beto ‘ke monaka Nzambi’ ntangu beto ke monaka mutindu yandi ke sadisaka beto. (Yobi 42:5) Beto mpi lenda “mona” to kutula dikebi na mambu ya kitoko yina Yehowa ke sila bantu ya ntima-mpembe mpi bayina ke sadilaka yandi na kwikama yonso. w18.09 20 § 13, 15-16

Kana beto ke sala mambu yina beto me zaba nde yo kele mbote, beto ta monisa mayele mpi Yehowa ta sakumuna beto. Ya kieleka, nzayilu ke sadisaka muntu na kuvanda mayele, kansi mayele ke tendula ve kaka kubakisa mambu. Mayele ke monanaka mpi na balukanu yina beto ke bakaka. Nkutu bafurmi ke vandaka mayele, bo ke bumbaka madia sambu na nsungi ya madidi. (Bing. 30:24, 25) Kristu, yina Biblia ke bingaka nde “mayele ya Nzambi,” ke salaka ntangu yonso mambu yina ke sepedisaka Tata na yandi. (1 Bak. 1:24; Yoa. 8:29) Nzambi ta sakumuna beto mpi kana beto ke monisa mayele ntangu beto ke sala mambu ya mbote mpi ke landa kumonisa kudikulumusa. (Mat. 7:21-23) Yo yina, beto landa kusala bikesa sambu dibundu kuvanda kisika yina bantu yonso lenda sadila Yehowa na kudikulumusa yonso. Yo ke lombaka ntangu mpi ntima-nda sambu na kusala mambu yina beto me zaba nde yo kele mbote. Ata mpidina, kusala yo ke monisaka nde beto kele bantu ya kudikulumusa mpi kikalulu yai ta sadisa beto na kuvanda na kiese bubu yai mpi mvula na mvula. w18.09 7 § 18

Ntangu Yehowa salaka bantu, yandi zolaka nde bo kuma banduku na yandi ya kisalu. Ata bubu yai bantu kele ya kukonda kukuka, bantu ya kwikama lenda sala ti Yehowa konso kilumbu. Mu mbandu, kulonga nsangu ya mbote ya Kimfumu mpi kukumisa bantu balongoki ke kumisaka beto “banduku ya kisalu ya Nzambi.” (1 Bak. 3:5-9) Yo kele lukumu ya nene kibeni mutindu Ngangi, nkwa-ngolo yonso me ponaka beto na kusala kisalu mosi ya mfunu! Ata mpidina, kisalu ya kusamuna mpamba ve ke pesaka beto dibaku ya kusala ti Yehowa. Beto ke salaka mpi ti yandi ntangu beto ke sadisaka bantu ya dibuta na beto mpi bampangi ya nkaka na dibundu, ntangu beto ke yambaka bampangi, ke pesaka maboko na bisalu yina ke salama na dibundu ya Yehowa na ntoto ya mvimba mpi ntangu beto ke salaka mingi na kisalu ya Nzambi. (Bakol. 3:23) Beto fwete vila ve nde bantu kele ya kuswaswana. Bamvula na beto, sante na beto, mutindu na beto ya kuzinga mpi makuki na beto kele ve mutindu mosi. Yo yina, kufwanisa ve bikesa yina nge ke sala sambu na Yehowa ti bikesa yina bampangi ya nkaka ke sala. w18.08 23 § 1-2

Yehowa ndimisaka Habakuki nde yandi ta pesa mvutu na bangiufula na yandi ya masonga. Na nima ya ntangu fioti Yehowa manisaka bampasi yonso ya Habakuki. Yo vandaka bonso Yehowa ke tubila profete yai nde: “Vanda ntima-nda mpi tudila mono ntima. Mono ta pesa mvutu na bisambu na nge, ata yo ke sukinina.” Yehowa yibusaka Habakuki nde yandi bakaka dezia lukanu ya kulungisa balusilu na yandi. Yo yina, Yehowa siamisaka Habakuki na kulanda kuvingila. Nsuka-nsuka profete bakaka kikesa. Beto mpi fwete vingila nde Yehowa kuyidika mambu. Diaka, beto fwete widikila na dikebi yonso malongi na yandi. Mpidina, beto ta tudila Yehowa ntima mpi ta vanda na ngemba ya mabanza ata beto ke kutana ti bampasi. Yezu siamisaka beto na kudiyangisa ve na “bantangu to bansungi” yina Nzambi me tubilaka beto ve. (Bis. 1:7) Beto fwete ndima nde Yehowa me zaba ntangu ya mbote ya kuyidika mambu. Yo yina, beto fwete yambula ve, beto fwete kudikulumusa, kuvanda ntima-nda mpi kutula kivuvu na Nzambi. Ntangu beto ke vingila, beto fwete sadila ntangu na beto na mayele yonso mpi kusadila Yehowa na mutindu ya kuluta mbote.—Mar. 13:35-37; Bag. 6:9. w18.11 16 § 13-14

Banda kileki, Piere zabaka nde Bantu ya Makanda vandaka mvindu. Kansi mambu ya nkaka yina salamaka na nima sobaka mabanza na yandi. Mu mbandu, mbona-meso yina Nzambi monisaka yandi. (Bis. 10:9-16) Bonso Piere, ata beto kele ti mikumba na dibundu ya Yehowa, beto fwete kuditadila mbote mpi kundima lusadisu ya bampangi sambu na kuzaba kana beto kele kaka ti mwa bangindu ya mbi sambu na bantu ya nkaka. Inki mambu ya nkaka beto fwete sala? Kana ‘beto me kangula kibeni ntima na beto,’ beto ta zola bantu ya nkaka na kisika ya kuvanda ti bangindu ya mbi sambu na bo. (2 Bak. 6:11-13) Keti nge ke zolaka kukangama kaka ti bantu ya mpusu ya nitu, insi, to ndinga na nge? Kana mpidina, sosa mpi kukangama ti bantu ya nkaka. Nge lenda samuna ti bampangi ya kuswaswana. To nge lenda binga bo na nzo na nge sambu na kudia to kulutisa ntangu. (Bis. 16:14, 15) Mpidina, ntima na nge ta fuluka ti zola mpi nge ta vanda diaka ve ti bangindu ya mbi sambu na bantu ya nkaka. w18.08 9 § 3, 6; 10 § 7

Bambangi ya nkaka ke vandaka ve kibeni ya kuswaswana ti nsi-ntoto. Mu mbandu, na bafeti bampangi ya nkaka ke kinaka mpi ke salaka mambu na mutindu yina me fwana ve sambu na Bakristu. Bampangi ya nkaka ke tulaka bafoto na Internet mpi ke sonikaka mambu yina ke monisaka mabanza ya kinsuni. Yo yina, bo kele mbandu ya mbi sambu na bampangi yina ke salaka ngolo sambu na kuswaswana ti nsi-ntoto. (1 Pie. 2:11, 12) Bima yonso ya nsi-ntoto ke bendaka dikebi ya bantu na ‘nzala ya nitu mpi nzala ya meso mpi kusonga na lulendo yonso bima ya kuzingila.’ (1 Yoa. 2:16) Beto bantu ya Yehowa, beto me swaswana ti bantu ya nkaka. Beto ke ‘vwezaka ve Nzambi mpi ke buyaka banzala ya nsi-ntoto sambu na kuzinga ti mabanza ya mbote, lunungu, mpi kukangama na Nzambi na kati ya ngidika ya bima ya ntangu yai.’ (Tito 2:12) Mutindu na beto ya kutuba, ya kudia, ya kunwa, ya kulwata mpi ya kusala kisalu fwete monisa pwelele nde beto kele bantu ya Yehowa. w18.07 25 § 13-14

Kana beto ke landa kutala Yehowa, beto ta bebisa ve kinduku na beto ti yandi to beto ta wa ve makasi sambu na bifu ya bantu ya nkaka. Yo kele mfunu mingi-mingi kana beto kele ti mikumba na dibundu ya Nzambi, mutindu Moize vandaka ti yo. Ya kieleka, konso muntu na kati na beto fwete sala ngolo mpi kulemfukila Yehowa sambu na kuguluka. (Bafil. 2:12) Kana beto kele ti mikumba mingi, Yehowa ta vingila nde beto zitisa yandi mingi kuluta. (Luka 12:48) Kana beto ke zolaka kibeni Yehowa, ata kima mosi ve ta budisa beto sakuba to kukabula beto na zola na yandi. (Nk. 119:165; Bar. 8:37-39) Beto ke zinga na bantangu ya mpasi kibeni. Yo yina yo kele mfunu nde beto landa kutula meso na Yehowa, “muntu yina me vanda na kiti ya kimfumu na zulu,” sambu na kubakisa mambu yina yandi ke zola nde beto sala. (Nk. 123:1) Beto fwete bika ve nde bifu ya bantu ya nkaka kubebisa kinduku na beto ti Yehowa. w18.07 16 § 19-20

Beto ke vandaka na kiese mingi ya kuwa nde bansadi ya Nzambi ke bikaka nde nsemo na bo kusema! Na 2017, Bambangi ya Yehowa longukaka Biblia ti bantu kuluta 10 000 000. Bantu mingi yina ke sepelaka ti kieleka kwisaka na Lusungiminu mpi longukaka ntendula ya kimenga ya Yezu yina kele dikabu ya zola ya Yehowa. (1 Yoa. 4:9) Na ntoto ya mvimba, Bambangi ya Yehowa ke tubaka bandinga mingi. Kansi yo ke kangaka ve dibuta ya bampangi ya ntoto ya mvimba nzila ya kupesa Yehowa nkembo. (Kus. 7:9) Yo vanda beto ke tubaka nki ndinga to ke zingaka nki kisika, beto lenda pela “bonso minda na nsi-ntoto.” (Bafil. 2:15) Kisalu na beto ya kusamuna, bumosi na beto ya Bukristu mpi kikalulu na beto ya kulanda kukengila ke pesaka Yehowa lukumu. w18.06 21 § 1-3

Bantumwa songaka Yezu na kudia, kansi sambu na Yezu, kusolula ti nkento yina vandaka mfunu kuluta madia. Nzambi zolaka nde Yezu kusamuna mpi kusala luzolo na yandi, yo yina kulonga nkento ya Samaria vandaka bonso madia sambu na Yezu. (Yoa. 4:32-34) Yakobo mpi Yoane bakisaka ve dilongi yai ya mfunu. Ntangu balongoki vandaka kusala nzietelo ti Yezu na Samaria, bo sosaka kisika ya kulala na bwala mosi ya Samaria sambu mpimpa bwaka. Kansi bantu ya Samaria pesaka bo ve kisika. Yakobo ti Yoane waka makasi mingi, bo lombaka Yezu nswa sambu bo tinda tiya ya zulu sambu yo yoka bwala ya mvimba. Yezu sungikaka bo ngolo mpenza. (Luka 9:51-56) Ziku Yakobo ti Yoane zolaka ve kuwa makasi kana mambu yai salamaka na nziunga na bo na Galilea. Ntembe kele ve nde bo waka makasi sambu bo vandaka ti bangindu ya mbi sambu na bantu ya Samaria. Na nima, ntangu Yoane vandaka kulonga bantu ya Samaria, bantu mingi ndimaka nsangu, ziku yo yangisaka yandi sambu na mambu ya mbi yina yandi tubaka sambu na bo.—Bis. 8:14, 25. w18.06 10-11 § 12-13

Sambu bakieleka ya Ndinga ya Nzambi ke vandaka mfunu sambu na beto, beto ke lemfukaka na malongi ya Biblia mpi ke tubaka kieleka ntangu yonso. Luvunu kele na kati ya mitambu ya ngolo yina Satana ke sadilaka. Luvunu ke yangisaka muntu ya ke tuba yo mpi muntu ya ke kwikila na yo. (Yoa. 8:44) Yo yina ata beto kele bantu ya kukonda kukuka, beto ke salaka bikesa ya kutuba ve luvunu. (Baef. 4:25) Kusala yo lenda vanda mpasi. Abigail, yina kele ti bamvula 18 ke tuba nde: “Bantangu ya nkaka kutuba kieleka lenda monana bonso nde yo kele mfunu ve, mingi-mingi ntangu kutuba luvunu lenda gulusa nge na diambu mosi ya mpasi.” Ebuna sambu na nki kutuba kieleka? Victoria, yina kele ti bamvula 23 ke tuba nde: “Kana nge ke tuba masonga mpi ke nwanina balukwikilu na nge, bantu lenda bangika nge. Ata mpidina, yo ta natila nge mambote mingi, mu mbandu, bantu ta tudilaka nge ntima, nge ta kuma nduku ya Yehowa mpi bantu yina ke zolaka nge ta kuma kuzitisa nge.” Keti nge me bakisa mfunu ya kulwata ntangu yonso ‘mukaba ya kieleka’? w18.05 28 § 3, 5

Bubu yai beto fwete landa kukengila mingi kuluta. Mambu ya nsi-ntoto ke landa kaka kubeba. Ata mpidina, beto me zaba nde nsuka ta kwisa na ntangu yina Yehowa me tulaka. (Mat. 24:42-44) Na ntwala nde yo salama, beto fwete vanda ntima-nda mpi kutula dikebi na bilumbu ke kwisa. Tangaka Biblia konso kilumbu mpi landa na kusamba Yehowa. (1 Pie. 4:7) Landa mbandu ya bampangi yina me sadilaka Yehowa bamvula mingi. Kudipesa mingi na kisalu ya Yehowa. Sadila bantu ya nkaka mambu na mawete mpi lutisaka ntangu ti bampangi. Mpidina, nge ta vanda na kiese mpi nge ta mona nde ntangu ke kwenda nswalu. (Baef. 5:16) Ata beto ke salaka bifu mingi, Yehowa ke ndimaka nde beto sadila yandi. Sambu na kusadisa beto, yandi me pesaka beto ‘makabu ya bantu,’ disongidila bankuluntu. (Baef. 4:8, 11, 12) Yo yina kana bankuluntu me kwisa kutala nge, baka mambote na ntangu yina nge ke lutisa ti bo sambu mayele mpi bandongisila na bo kusadisa nge. w18.06 24-25 § 15-18

Yezu songaka balongoki na yandi nde bo fwete ‘bikala na zola na yandi.’ Sambu na nki? Sambu yandi zabaka nde balongoki na yandi fwete kanga ntima sambu na kuzinga mutindu Bakristu ya kieleka fwete zinga. Ya kieleka, na Yoane 15:4-10, Yezu sadilaka ngogo ‘bikala’ mbala mingi sambu na kusadisa balongoki na yandi na kubakisa nde bo fwete kanga ntima. Inki mutindu beto ke monisaka nde beto ke bikalaka na zola ya Kristu mpi yandi ke ndimaka beto? Kana beto ke lemfukila yandi. Yezu ke lombaka beto na kusala kaka mambu yina yandi salaka. Yandi tubaka nde: “Mono me zitisaka bansiku ya Tata mpi ke bikalaka na zola na yandi.” Yezu kele mbandu na diambu yai. (Yoa. 13:15) Bansiku ya Yezu ke katukaka na Tata na yandi, yo yina ntangu beto ke lemfukilaka nsiku ya Yezu ya kukwenda mpi kusamuna, beto ke monisaka mpi zola na beto sambu na Yehowa. (Mat. 17:5; Yoa. 8:28) Ntangu beto ke monisilaka Yehowa ti Yezu zola, bo ke sadisaka beto na kubikala na zola na bo. w18.05 18 § 5-7

Nge kele ti balukanu mingi ya kubaka ntangu nge kele leke. Mu mbandu, kubaka balukanu na yina me tala banzo-nkanda, kisalu yina nge ta sala mpi mambu ya nkaka. Kana nge me zaba mbote balukanu na nge, nge ta sala bansola ya mbote. Kana nge baka balukanu ya mbote ntangu nge kele leke, nge ta nunga. Bampangi mingi ya baleke na ntoto ya mvimba ke bakaka balukanu ya mbote kibeni mpi yo me fwana na kusikisa bo. Bo ke tulaka kinduku na bo ti Yehowa mpi balukanu na bo ya kimpeve na kisika ya ntete. Baleke yai ke vandaka na kiese mpi ke landaka lutwadisu ya Yehowa na mambu yonso, mu mbandu na yina me tala luzingu ya dibuta. Salomo tubaka nde: “Tula ntima na nge ya mvimba na Yehowa.” Yandi yikaka nde: “Na banzila na nge yonso, yindula yandi, ebuna yandi ta katula basakuba na banzila na nge.” (Bing. 3:5, 6) Baleke, Yehowa ke zolaka beno mingi kibeni! Yandi ke bakaka beno na mbalu mpi yandi ke taninaka, ke twadisaka mpi ke sakumunaka beno. w18.04 26 § 7; 27 § 9

Ntumwa Yoane vandaka na kati ya bampangi yina vandaka kutwadisa dibundu na mvu-nkama ya ntete. Yandi sonikaka disolo ya kisalu ya kusamuna ya Yezu na Evanzile na yandi. Mukanda yai me pesaka Bakristu kikesa bamvula mingi mpi yo ke landa kupesa beto kikesa. Mu mbandu, Yoane mpamba muntu sonikaka bangogo ya Yezu ya ke monisa nde zola kele kikalulu yina ke sadisaka bantu na kuzaba balongoki ya kieleka. (Yoa. 13:35) Mikanda tatu ya Yoane kele mpi ti mambu ya mfunu mingi. Kana beto me lemba nitu sambu na bifu na beto, beto ke bakaka kikesa ntangu beto ke tangaka nde kimenga ya Yezu ‘ke katulaka masumu na beto yonso.’ (1 Yoa. 1:7) Kana beto ke landa kudiyangisa sambu na masumu na beto ya ntama, bangogo “Nzambi kele nene kuluta bantima na beto” ke pesaka beto kikesa. (1 Yoa. 3:20) Na Biblia, Yoane mpamba muntu me sonikaka nde “Nzambi kele zola.” (1 Yoa. 4:8, 16) Na mukanda na yandi ya zole mpi ya tatu, Yoane sikisaka Bakristu yina ke landa “kutambula na kieleka.”—2 Yoa. 4; 3 Yoa. 3, 4. w18.04 18 § 14-15