Septembri

Yezu kuditulaka na kisika ya Marta ti Maria. Ntangu yandi monaka bo ke dila mpangi na bo Lazare, “Yezu basisaka mansanga.” (Yoa. 11:32-35) Yandi dilaka ve sambu yandi vidisaka nduku na yandi. Yandi zabaka nde yandi ta futumuna Lazare. Kansi, Yezu dilaka sambu yandi bakisaka mpi waka mpasi sambu na lufwa ya nduku na yandi. Beto ke bakaka mambote na mbandu ya Yezu ya kuditula na kisika ya bantu ya nkaka. Ya kieleka, beto kele ve bantu ya kukuka bonso Yezu. Ata mpidina, beto ke zolaka mutindu Yezu ke sadilaka bantu mambu. Yo ke pesaka beto kikesa ya kuzaba nde ntangu yai yandi kele Ntotila ya Kimfumu ya Nzambi. Ntama mingi ve yandi ta manisa bampasi yonso. Yandi me fwana na kumanisa bampasi yina luyalu ya Satana me natilaka bantu sambu yandi mpi kutanaka ti bampasi. Beto kele na kiese ya kuvanda ti Mfumu yina ke ‘wilaka beto mawa sambu na bifu na beto.’—Baeb. 2:17, 18; 4:15, 16. w19.03 17 § 12-13

Beto ke sadisaka bantu na kuzaba Nzambi kansi beto ve bantu ke salaka kisalu ya kuluta mfunu. (1 Bak. 3:6, 7) Yehowa muntu ke bendaka bantu. Kundima to kubuya nsangu ya mbote ke tadila konso muntu. (Mat. 13:4-8) Kuvila ve nde bantu mingi ndimaka ve nsangu ya Yezu ata yandi vandaka Longi ya kuluta nene! Yo yina, beto fwete lemba ve kana bantu yina beto ke longa kundima ve nsangu na beto. Beto ta baka mambote kana beto ke kuditula na kisika ya bantu ya nkaka na kisalu ya kusamuna. Beto ta kuma kuzola mingi kisalu na beto. Beto ta wa kiese yina ke katukaka na kupesa. Beto ta sadisa bantu yina kele ti “nkadilu ya mbote sambu na kubaka luzingu ya mvula na mvula” na kundima nsangu ya mbote. (Bis. 13:48) Yo yina, “ntangu yonso ya beto kele ti dibaku, beto sala mambu ya mbote na bantu yonso.” (Bag. 6:10) Mpidina, beto ta pesa Tata na beto ya zulu nkembo.—Mat. 5:16. w19.03 25 § 18-19

Ntotila Davidi sonikaka nde: “Yehowa kele nene mpi yandi me fwana kibeni na kubaka lukumu.” (Nk. 145:3) Yandi zolaka Yehowa mpi zola yango pusaka yandi na kukumisa Nzambi na “kati ya dibundu.” (1 Bans. 29:10-13; Nk. 40:5) Bubu yai, mutindu mosi ya kupesa Yehowa lukumu kele kupesa bamvutu na balukutakanu. Beto yonso ke zolaka kuwa bamvutu ya bampangi mingi na balukutakanu. Beto ke zolaka bamvutu ya pete mpi ya masonga yina bana ke pesaka. Kana mpangi mosi ke tuba mutindu yandi zabaka kieleka, yo ke pesaka beto kikesa. Beto ke bakaka na mbalu “kikesa” yina bampangi ke monisaka ntangu bo ke pesaka bamvutu, ata bo kele nsoni-nsoni to ke longuka ndinga na beto. (1 Bate. 2:2) Inki mutindu beto lenda monisila bo ntonda? Na nima ya lukutakanu, beto lenda sikisa bo sambu na bamvutu na bo. Mutindu ya nkaka ya kumonisila bampangi ntonda kele kupesa bamvutu. Mpidina, beto ke bakaka kikesa mpi ke pesaka bampangi ya nkaka kikesa.—Bar. 1:11, 12. w19.01 8 § 1-2; 9 § 6

Bantu kumi kele na mpasi ya ngolo. Bo kele ti maladi ya lepre mpi bo kele ve ti kivuvu ya kubeluka. Kilumbu mosi, bo me mona Yezu, Longi ya Nene na ntama. Bo me wa nde Yezu ke belula maladi ya mitindu yonso. Yo yina, bo me tuba na ndinga ya ngolo nde: “Yezu, Longi, wila beto mawa!” Yandi me belula bo. Ntembe kele ve nde bo yonso me sepela mutindu yandi me belula bo. Muntu ya Samaria me sepela mpi me monisila Yezu ntonda. Ntangu yandi me beluka, yandi me pesa Nzambi nkembo “na ndinga ya ngolo.” (Luka 17:12-19) Bonso muntu ya Samaria, beto ke zolaka kumonisa ntonda na bantu yina ke sadilaka beto mambu ya mbote. Yehowa kele mbandu ya mbote na kumonisa ntonda. Mu mbandu, yandi ke sakumunaka bantu yina ke pesaka yandi kiese. (2 Sam. 22:21; Nk. 13:6; Mat. 10:40, 41) Biblia ke siamisa beto na ‘kulanda mbandu ya Nzambi, sambu beto kele bana yina yandi ke zolaka mingi.’ (Baef. 5:1) Kikuma ya kuluta mfunu ya beto ke monisaka ntonda kele sambu beto ke landaka mbandu ya Yehowa. w19.02 14 § 1-2; 15 § 4

Na nzo-nkanda, leke mosi ya nkento me buya na luzitu yonso kusala nkinsi yina ke pesaka ve Nzambi kiese. Leke mosi ya bakala ya ke vandaka nsoni-nsoni, ke samuna nzo na nzo mpi me kokula na nzo ya ba mwana ya nzo-nkanda na bo yina ke sekaka Bambangi ya Yehowa. Mfumu ya kisalu ya bakala mosi me lomba yandi na kusala diambu mosi ya mbi. Bakala yango me baka lukanu ya kusala yo ve ata bo ta katula yandi na kisalu, yandi me tendula nde yandi fwete vanda masonga mpi kulemfuka na nsiku ya Nzambi sambu Nzambi ke lombaka bansadi na yandi na kuzitisa bansiku. (Bar. 13:1-4; Baeb. 13:18) Inki kikalulu bampangi yai tatu me monisa? Bo me monisa kikesa mpi masonga kansi bo yonso me bikala ya kwikama na Yehowa. Bo buyaka kufwa bansiku ya Nzambi. Kwikama sadisaka bo na kusala mutindu yina. Yo kele pwelele nde Yehowa waka kiese mingi mutindu bo yonso monisaka kikalulu yai. Beto mpi ke zolaka kusepedisa Tata na beto ya zulu. w19.02 2 § 1-2

Nsiku vandaka kutanina mingi-mingi bantu yina vandaka ve na lutaninu, mu mbandu bana-nsiona, mifwidi mpi banzenza. Nzambi pesaka bazuzi nsiku yai: “Nge fwete sambisa ve mambu ya munzenza to ya mwana ya me konda tata na mutindu ya mbi, mpi nge fwete kanga ve lele ya mufwidi ya nkento bonso kidimbu sambu na mfuka.” (Kul. 24:17) Yehowa vandaka kutula dikebi mingi na bantu yina vandaka ve na lutaninu. Yandi vandaka kupesa ndola na bantu yina vandaka kuniokula bo. (Kub. 22:22-24) Yehowa ke zolaka nde bantu yina kele ti kiyeka kuzola bantu yonso yina bo ke twadisa. Yandi ke mengaka mitindu yonso ya kuvukisa nitu na mutindu ya mbi mpi ke zolaka nde bo tanina bantu ya me konda lutaninu mpi kusadila bo mambu ya mbote. (Levi 18:6-30) Kana beto ke ndima nde Yehowa ke sadilaka beto mambu ya mbote, beto ta kuma kuzola yandi mingi. Kana beto ke zola Nzambi mpi bansiku na yandi, yo ta sadisa beto na kuzola bantu ya nkaka mpi kusadila bo mambu ya mbote. w19.02 24-25 § 22-26

Beto tadila mutindu beto lenda kuditanina na mabanza ya mbi ya Satana. Yehowa ke longa beto nde ‘pite mpi mitindu yonso ya mambu ya mvindu to lukasi fwete vanda ve na kati na beto.’ (Baef. 5:3) Kansi nki beto ta sala kana banduku ya kisalu to ya nzo-nkanda me yantika kuta masolo ya pite? Nkengidi disongidila kansansa na beto lenda kebisa beto na bigonsa. (Bar. 2:15) Keti beto ke widikilaka yo? Ngindu lenda kwisilaka beto na kulanda banduku to kutala bifwanisu yina bo ke songa na kisika ya kuwila kansansa na beto. Yo ta vanda mbote kukanga bakielo ya mbanza disongidila kusoba disolo to kukatuka. Yo ke lombaka kikesa sambu na kutelemina bangindu ti mambu ya mbi ya banduku. Beto lenda ndima nde Yehowa ke monaka bikesa na beto mpi nde yandi ta pesa beto ngolo ti mayele sambu na kutelamina mabanza ya Satana.—2 Bans. 16:9; Yez. 40:29; Yak. 1:5. w19.01 17-18 § 12-13

Salomo yina vandaka mvwama mpi ti kiyeka ya nene mekaka diambu yai. Yandi tubaka nde: “Bika mono meka kuwa kiese mpi kumona mambu ya mbote yina ta kwisa.” (Lon. 2:1-10) Salomo tungaka banzo ya kitoko, salaka masamba ya kitoko, yandi salaka yonso yina yandi me zola. Keti yandi vandaka na kiese? Salomo yandi mosi ke pesa mvutu na mukapu ya bubu. Inki dilongi nge me baka na mbandu ya Salomo? Bantu mingi ke bakaka malongi kaka kana bo me sala bifu mpi me kutana ti bampasi. Yehowa ke zola ve nde diambu ya mutindu yai kukumina nge. Yandi ke zola nde nge widikila mpi nge lemfukila yandi. Yo ke lombaka lukwikilu, ata mpidina balukanu yina nge me baka ta pesa nge mpasi ve ata fioti. Yehowa ta vila ve ata fioti “zola yina [nge] monisaka sambu na zina na yandi.” (Baeb. 6:10) Yo yina, sala ngolo sambu nge vanda ti lukwikilu ya ngolo. Ebuna nge ta baka balukanu ya mbote mpi ta mona nde Tata na nge ya zulu ke zola mambote na nge.—Nk. 32:8. w18.12 22 § 14-15

Muntu ya kimpeve ke kwikilaka na Nzambi mpi ke tadilaka mambu mutindu Nzambi ke tadilaka yo. Yandi ke bikaka nde Yehowa kutwadisa luzingu na yandi mpi ke lemfukilaka yandi. (1 Bak. 2:12, 13) Davidi kele mbandu ya mbote. Yandi tubaka nde: “Yehowa kele dikabu na mono, kimvwama na mono, mpi dikopa na mono.” (Nk. 16:5) Davidi monisaka ntonda sambu na “dikabu” na yandi disongidila kinduku na yandi ti Nzambi mpi mutindu Nzambi vandaka kutanina yandi. (Nk. 16:1) Nsuka-nsuka yandi tubaka nde: “Mono kele na kiese kibeni.” Kinduku ya ngolo ya Davidi ti Yehowa pesaka yandi kiese mingi kuluta bima yonso. (Nk. 16:9, 11) Bantu yina ke zolaka mbongo mpi biese lenda vanda ve na kiese bonso Davidi. (1 Tim. 6:9, 10) Kana nge ke kwikila na Yehowa mpi ke sadila yandi, nge ta vanda ti luzingu ya mbote mpi ya kiese. Inki nge lenda sala sambu na kukumisa lukwikilu na nge ngolo? Nge fwete lutisa ntangu mingi ti Yehowa ntangu nge ke tanga Ndinga na yandi, ke tala bima ya kitoko yina yandi me gangaka, ke yindula bikalulu na yandi mpi zola yina yandi ke monisilaka nge.—Bar. 1:20. w18.12 25 § 7-8

Polo tubilaka ve makwela ya bantu yonso. Yandi vandaka kusonga Bakristu nde bo fwete zitisa makwela disongidila, kubaka yo na mbalu. Kana nge kele nkwelani, keti nge ke tadilaka makwela mutindu yai? Kana nge ke baka makwela na mbalu, nge kele mbandu ya mbote. Yezu pesaka mpi makwela lukumu. Ntangu Bafarize yulaka yandi mambu yina me tala kufwa makwela, yandi vutukilaka mambu yina Nzambi tubaka sambu na makwela ya ntete nde: “Yo yina bakala ta bikisa tata na yandi ti mama na yandi, ebuna bo zole ta vanda nsuni mosi.” Yezu yikaka nde: “Bika nde muntu kukabula ve yina ya Nzambi me vukisaka.” (Mar. 10:2-12; Kuy. 2:24) Yezu ndimaka nde Nzambi muntu gangaka makwela mpi nde makwela fwete zinga kimakulu. Ntangu Nzambi yidikaka makwela ya ntete, yandi zolaka ve nde Adami ti Eva kufwa makwela. Kansi, lukanu na yandi vandaka nde “bo zole” kuzinga kumosi na makwela mvula na mvula. w18.12 10-11 § 2-4

Ntangu beto yantikaka kulonguka kieleka, beto bakisaka nde kulemfukila minsiku ya Yehowa kele mfunu. Mutindu beto ke landa kuyela na kimpeve, beto ke longuka mambu mingi ya me tala mabanza ya Yehowa, disongidila, mambu yina yandi ke zolaka, mambu yina yandi ke zolaka ve mpi mutindu yandi ke tadilaka mambu; yo ke twadisaka bisalu mpi balukanu na beto. Ata beto ke zolaka kukuma kuyindula bonso Yehowa, bantangu ya nkaka yo ke vandaka mpasi sambu beto kele bantu ya kukonda kukuka. Mu mbandu, beto ke zabaka mabanza ya Yehowa na yina me tala bunkete ya mabanza, nzala ya kuvanda ti bima mingi, kisalu ya kusamuna, mutindu ya mbi ya kusadila menga mpi mambu ya nkaka. Kansi yo lenda vanda mpasi sambu beto bakisa kikuma yina Yehowa ke tadilaka mambu mutindu yina. Inki mutindu beto lenda kuma kuyindula bonso Yehowa? Beto ta kumisa mabanza na beto ya mpa kana beto ke longuka Ndinga ya Nzambi, ke bakisa mabanza na yandi, ke yindula yo mingi mpi ke sala ngolo sambu na kuvanda ti mabanza ya Nzambi. w18.11 23-24 § 2-4

Habakuki zingaka na bantangu ya mpasi kibeni. Yandi zingaka ti bantu ya mbi mpi ya nku, yo vandaka kuyangisa yandi mingi. Ntangu yonso yandi vandaka kumona kaka bantu ya Izraele ke sadila bampangi na bo mambu ya mbi mpi na nku yonso. Habakuki kudiyulaka nde: ‘Tii nki ntangu mambu ya mbi ta suka? Sambu na nki Yehowa ke sukinina na kumanisa diambu yai?’ Habakuki monaka nde yandi me konda lusadisu. Yo yina yandi bondilaka Yehowa na kusadisa yandi. Ziku yandi yindulaka nde Yehowa ke tudila diaka ve bansadi na yandi dikebi to yandi ta sala ve ata kima mosi. Keti nge mpi me kudiwaka mutindu yina? Keti bangiufula yina Habakuki yulaka ke monisa nde yandi vandaka diaka ve kutula ntima na Yehowa mpi na balusilu na yandi? Ata fioti ve! Habakuki yulaka bangiufula yai sambu Yehowa kusadisa yandi na bampasi na yandi, yo ke monisa ve nde yandi kondaka kivuvu, kansi yandi landaka kutudila Yehowa ntima. Habakuki vandaka kibeni kudiyangisa mpi kumaka kisaka-saka. Yandi bakisaka ve sambu na nki Yehowa vandaka kusukinina mpi kubika nde bo mona mpasi mingi. w18.11 14 § 4-5

Piere ti Andre vandaka balobi-mbisi, kansi ntangu Yezu bingaka bo na kukuma balongoki na yandi bo yambulaka kisalu na bo ya kuloba. (Mat. 4:18-20) Diambu yai ke tendula ve nde ntangu nge ke longuka kieleka, nge fwete yambula kisalu na nge. Muntu fwete sala kisalu sambu na kulungisa bampusa ya dibuta na yandi. (1 Tim. 5:8) Kansi ntangu nge ke longuka kieleka, nge fwete soba mutindu na nge ya kutadila bima ya kinsuni. Nge fwete bakisa kibeni mambu ya kuluta mfunu na luzingu. Beto tadila mbandu ya Maria. Yandi vandaka ti lukanu ya kukuma kusala nsaka ya golf mbote kibeni mpi kuzwa mbongo mingi. Na nima yandi yantikaka kulonguka Biblia mpi yandi kumaka kusadila mambu yina yandi vandaka kulonguka. Maria bakisaka nde kusala kinduku ya mbote ti Yehowa mpi kudipesa na nsaka ya golf zolaka kuvanda mpasi. (Mat. 6:24) Yo yina, yandi yambulaka kubula golf mpi kudipesaka na mambu ya mfunu. Bubu yai, yandi kele mupasudi-nzila mpi yandi ke tuba nde “luzingu na yandi kele ya kiese mpi ya mbote.” w18.11 5 § 9-10

Ntangu Yezu lungisaka bamvula 30, yandi yambulaka kisalu ya mabaya mpi kumaka kulonga sambu yandi zabaka nde kisalu yai vandaka mfunu mingi kibeni. Yandi tubaka nde kulonga nsangu ya mbote ya Kimfumu ya Nzambi vandaka na kati ya bikuma yina Nzambi tindaka yandi na ntoto. (Mat. 20:28; Luka 3:23; 4:43) Yezu kudipesaka ya mvimba na kulonga nsangu ya mbote mpi yandi vandaka kuzola nde bantu ya nkaka kulanda mbandu na yandi. (Mat. 9:35-38) Bampangi mingi ke salaka ve kisalu ya mabaya, ata mpidina beto yonso ke longaka bantu nsangu ya mbote. Kisalu ya kusamuna kele mfunu mingi, yo yina Nzambi ke sadisaka beto na kusala yo. Nkutu, Biblia ke binga beto “banduku ya kisalu ya Nzambi.” (1 Bak. 3:9; 2 Bak. 6:4) Beto ke ndimaka mambu yai ya muyimbi-bankunga tubaka: “Ndinga na nge ya mvimba kele kieleka.” (Nk. 119:159, 160) Ndinga ya Yehowa kele kieleka. Yo yina, beto fwete kuditadila mbote kana beto ke “tendulaka ndinga ya kieleka mbote-mbote.” (2 Tim. 2:15) Diaka, beto ke salaka bikesa sambu na kusadila mbote Biblia, kisadilu na beto ya ntete-ntete ya ke sadisaka beto na kulonga bantu mambu ya Yehowa, ya Yezu mpi mambu ya me tala Kimfumu. w18.10 11 § 1-2

Kana bakala ke landa mbandu ya zola ya mfumu na yandi, Yezu Kristu, nkento na yandi ta monisilaka yandi “luzitu ya mudindu” kukonda mpasi. (Baef. 5:22-25, 33) Nkento ya ke zitisaka bakala na yandi ke sosaka kubakisa mawi ya bakala na yandi. Ntangu bibuti ke sadilanaka mambu ti luzitu, bo ke pesaka mbandu ya mbote na bana na bo. Bo fwete longa mpi bana na bo na kuyibuka bantu ya nkaka mpi na kuvanda mawete. Mu mbandu, bibuti lenda longa bana na bo na kubaka ve ntinu na Nzo ya Kimfumu. Ntangu bo kele na feti mosi buna, bibuti lenda songa bana na bo na kuvingila bambuta kubaka ntete madia. Kana mwana me sala kima mosi ya mbote bonso kukangudila beto kielo, beto fwete sikisa yandi. Yo ta sadisa mwana na kudiwa mbote mpi na kubakisa nde “kiese ke vandaka mingi na kupesa, kansi na kubaka kiese ke vandaka fioti.” w18.09 29 § 5-6

Lutwadisu yina Yezu Kristu, Ntotila ya ke yala, ke pesaka beto ke sadisaka beto bubu yai mpi yo ta sadisa beto na bilumbu ke kwisa. Yibuka mambote yina nge me bakaka sambu nge yikamaka ti bansoba ya mpa. Na lusambu na beno ya dibuta, beno lenda tubila mutindu bansoba sambu na balukutakanu to sambu na kisalu ya kusamuna me sadisaka dibuta na beno. Kana beto ke yibuka mambote mingi yina beto ke bakaka ntangu beto ke zitisaka bantuma ya dibundu ya Yehowa, beto ta landa lutwadisu na yo kukonda mpasi mpi beto ta vanda na kiese. Mu mbandu, sambu bo ke niemaka diaka ve mikanda mingi, dibundu ya Yehowa me kumaka kubumba mbongo. Sambu beto me kumaka kusadila ba-apareyi, yo ke sadisaka beto na kulonga bantu mingi kibeni nsangu ya mbote. Yo yina sadila diaka mingi mikanda mpi bavideo na nzila ya ba-apareyi. Yo kele mpi mutindu ya kupesa maboko na lutwadisu ya Kristu yina ke zola nde beto sadila mbote mbongo ya dibundu ya Yehowa. Ntangu beto ke pesaka maboko na lutwadisu ya Kristu, beto ke sadisaka bampangi na kuvanda ti lukwikilu ya ngolo mpi na bumosi. w18.10 25-26 § 17-19

Kana beto kele mawete bonso Yehowa, beto ta pesa bampangi kikesa yina bo kele na yo mfunu. (2 Bak. 1:3-6) Kansi, beto fwete vingila ve nde bampangi kusadila beto mambu ya kukuka. Beto fwete vanda ti mabanza ya mbote. Kana beto ke yindula nde bampangi ta sadila beto mambu ya kukuka, beto ta lemba nitu. (Lon. 7:21, 22) Kuvila ve nde Yehowa ke lombaka beto kaka mambu yina beto ta kuka kusala. Yo yina, beto fwete monisilaka bampangi ntima-nda. (Baef. 4:2, 32) Beto ke zolaka ve ata fioti kumonisa bampangi nde bo ke salaka ve bikesa to kufwanisa bo ti bampangi ya nkaka. Kansi, beto ke pesaka bo kikesa mpi ke sikisaka bo na mambu ya mbote yina bo ke sala. Yo ta sadisa bo na kusadila Yehowa na kiese.—Bag. 6:4. w18.09 16 § 16-17

Kusala luzolo ya Nzambi vandaka bonso madia sambu na Yezu. Madia ya mbote ke sadisaka muntu na kudiwa mbote mpi ke pesaka nitu ngolo. Mutindu mosi kusala luzolo ya Nzambi ke sadisaka muntu na kudiwa mbote mpi ke kumisaka lukwikilu na yandi ngolo. Kana beto ke sala mambu yina Yehowa ke lomba beto, beto ta monisa nde beto kele mayele. (Nk. 107:43) Bantu ya mayele ke bakaka mambote mingi. Biblia ke tuba nde: “Kima mosi ve ya nge ke zola lenda fwanana ti yo. . . . Yo kele nti ya luzingu sambu na bantu yina ke simbaka yo, mpi bantu yina ke kangaka yo ngolo, bo ta binga bo bantu ya kiese.” (Bing. 3:13-18) Yezu tubaka nde: “Kana beno me zaba mambu yai, beno ta vanda na kiese kana beno ke sala yo.” (Yoa. 13:17) Balongoki ya Yezu ta vanda ntangu yonso na kiese kana bo sadila mambu yina Yezu songaka bo. Na luzingu na bo, bo fwete zitisa malongi na yandi mpi kulanda mbandu na yandi. w18.09 4 § 4-5

Ata Adami ti Eva vandaka bo mosi na Edeni, yo lombaka nde bo yindula mpi bantu ya nkaka. Sambu na nki? Sambu Yehowa pesaka bo kisalu. Yandi songaka bo na kubuta bana sambu na kufulusa ntoto mpi kukumisa yo paladisu. (Kuy. 1:28) Ziku Adami ti Eva zolaka nde bana yina bo ta buta kuvanda na kiese mutindu Yehowa zolaka nde bantu yonso kuvanda na kiese. Bantu yonso zolaka kusala kumosi sambu bo kumisa ntoto ya mvimba paladisu. Yo zolaka kuvanda kisalu mosi ya nene. Bantu ya kukuka zolaka mpi kusala kumosi ti Yehowa sambu na kukumisa ntoto Paladisu mpi kulungisa luzolo na yandi. Na mutindu yina, bo zolaka kukota na kupema na yandi. (Baeb. 4:11) Yindula mambote mpi kiese yina kisalu yai zolaka kunatila bantu. Kana bo sosaka mambote ya bantu ya nkaka mpi tudilaka bo dikebi, Yehowa zolaka kusakumuna bo mingi kibeni. w18.08 18 § 2; 19-20 § 8-9

Inki nge lenda sala kana muntu me kusila nge makambu? Mambu yai kuminaka mpi Yezu ti Yoane Mbotiki. (Mat. 11:18, 19) Inki Yezu salaka? Yandi sadilaka ve ntangu mpi ngolo na yandi sambu na kundimisa bantu nde mambu yina vandaka luvunu. Kansi yandi siamisaka bantu na kusosa banzikisa. Yandi zolaka nde bo tula dikebi na mambu yina yandi vandaka kusala mpi kulonga. Yezu tubaka nde: ‘Mayele ke monanaka na bisalu na yo.’ (Mat. 11:19) Beto lenda baka dilongi ya mfunu na mbandu ya Yezu. Bantangu ya nkaka bantu lenda tuba mambu ya luvunu sambu na beto mpi beto lenda kudiyangisa nde yo lenda bebisa lukumu na beto. Kansi mutindu na beto ya kuzinga lenda sadisa bantu na kubakisa mpenza bikalulu na beto. Bonso na mbandu ya Yezu, bikalulu na beto ya mbote lenda monisa nde mambu yina bantu ke tuba sambu na beto kele ve ya kieleka mpi bo ke kusila beto makambu. w18.08 6 § 11-13

Kaini, Salomo mpi bantu ya Izraele vandaka ti dibaku ya kubalula ntima mpi kusoba mabanza. (Bis. 3:19) Ya kieleka, Yehowa ke yambulaka ve bantu nswalu kaka sambu bo me sala disumu. Yindula mutindu yandi lolulaka Aroni. Bubu yai, Yehowa ke pesaka beto balukebisu ya zola sambu na kutanina beto na kusala ve mambu ya mbi. Yandi ke salaka yo na nzila ya Biblia, ya mikanda na beto mpi ya bampangi ya nkaka. Kana beto ke tula dikebi na balukebisu ya Yehowa, beto lenda ndima nde yandi ta wila beto mawa. Yehowa ke monisilaka bantu ntima ya mbote ya nene ti kikuma. (2 Bak. 6:1) Yo ke pesa beto dibaku ya ‘kuvweza ve Nzambi mpi kubuya banzala ya nsi-ntoto.’ (Tito 2:11-14) Na nsi-ntoto yai, mambu ya nkaka ta mekaka kwikama na beto. Baka lukanu ya kubikala kibeni na lweka ya Yehowa! w18.07 21 § 20-21

Inki mutindu beto lenda kumisa ngolo mpusa na beto ya kusosa nde Yehowa kuzaba beto kansi nsi-ntoto ve? Beto fwete tula dikebi na bakieleka zole ya mfunu. Ya ntete, Yehowa ke zabaka ntangu yonso bantu yina ke sadilaka yandi na kwikama yonso. (Baeb. 6:10; 11:6) Yehowa ke bakaka na mbalu bansadi na yandi yonso ya kwikama, yo yina yandi ke monaka nde yo ta vanda kukonda “lunungu” kana yandi me vila bo. Yandi “me zaba nzila ya bantu ya lunungu” mpi mutindu ya kugulusa bo. (Nk. 1:6; 2 Pie. 2:9) Ya zole, Yehowa lenda sadisa beto na mutindu yina beto ke yindulaka ve ata fioti. Kana bantu ke sala mambu ya mbote kaka sambu bantu ya nkaka kukumisa bo, Yehowa ta pesa bo ve matabisi. Sambu na nki? Mutindu Yezu tubaka yo, yina kele dezia matabisi na bo. (Mat. 6:1-5) Kansi, Yehowa “ke talaka na kinsweki” bantu yina ke sosaka ve lukumu sambu na mambu ya mbote yina bo ke sadilaka bantu ya nkaka. Yandi ke monaka mambu yina bo ke salaka mpi ke sakumunaka bo. w18.07 9 § 8, 10

Na nima ya mbona-meso, Piere bakisaka ve dilongi yina ndinga yina zolaka kulonga yandi. Ntangu fioti na nima, bantu yina Korneye tindaka kumaka. Mpeve santu twadisaka Piere na nzo ya Korneye, yo yina yandi kwendaka ti bantu yina Korneye tindaka. Kana Piere tulaka dikebi na “mambu yina ke monana na meso,” yandi zolaka ve kukwenda na nzo ya Korneye. Bayuda vandaka ve kukwenda na banzo ya Bantu ya Makanda. Kansi sambu na nki Piere kwendaka na nzo ya Korneye? Ata yandi vandaka ti bangindu ya mbi sambu na Bantu ya Makanda, mbona-meso yina yandi monaka mpi lutwadisu ya mpeve santu sobaka mabanza na yandi. Na nima ya kuwidikila Korneye, Piere tubaka nde: “Ya kieleka, ntangu yai mono me bakisa kibeni nde Nzambi ke pona-ponaka ve, kansi na konso dikanda yandi ke ndimaka muntu yina ke tinaka yandi boma mpi ke salaka mambu ya mbote.” (Bis. 10:34, 35) Piere sepelaka mingi ti kieleka yai ya mpa, na nima yo sadisaka Bakristu yonso. w18.08 9 § 3-4

Beto ke salaka bikesa ya kusala ve mambu yina Nzambi ke mengaka. Kansi nki beto fwete sala kana beto me kutana ti diambu yina ata nsiku mosi ve ya Biblia ke tubila pwelele? Inki mutindu beto ta zaba mambu yina Nzambi ke zolaka nde beto sala? Kana beto ke bika nde Biblia kulonga kansansa na beto, beto ta bakaka balukanu ya mbote. Sambu Yehowa ke zolaka beto, yandi ke pesaka beto minsiku yina ke twadisaka kansansa na beto. Yandi ke tuba nde: “Mono, Yehowa, mono kele Nzambi na nge, Muntu yina ke longa nge sambu na mambote na nge mosi, Muntu yina ke twadisa nge na nzila yina nge fwete tambula.” (Yez. 48:17, 18) Kana beto ke yindula mingi minsiku ya Biblia mpi ke bika nde yo simba ntima na beto, beto ta sungika kansansa na beto mpi ta longa yo. Mpidina, beto ta kuma kubaka balukanu ya mbote. Munsiku kele kieleka yina ke sobaka ve yina ke twadisaka mabanza na beto mpi ke sadisaka beto na kubaka balukanu ya mbote. Kuzaba minsiku ya Yehowa ke sadisaka beto na kubakisa mutindu yandi ke yindulaka mpi bikuma yina yandi ke pesaka beto bansiku. w18.06 17 § 5; 18 § 8-10

“Bantu ya Erode,” disongidila bantu yina vandaka kundima bangindu ya politiki ya Erode, yindulaka nde kana Yezu kutuba nde bo fwete futa ve mpaku, bo ta funda yandi nde yandi kele mbeni ya luyalu ya Roma. Kansi, kana Yezu kutuba nde bo fwete futa mpaku, bantu ta landa yandi diaka ve. Yezu vandaka mayele mpi yandi kudikotisaka ve na mambu yina. Yezu zabaka nde bakalaki mingi ya mpaku vandaka ve kusala mambu na masonga, ata mpidina yandi tulaka ve dikebi na mambu yina. Kansi yandi bendaka dikebi ya bantu na Kimfumu ya Nzambi yina ta manisa bampasi ya bantu. Yezu me bikilaka beto mbandu. Beto fwete kudikotisa ve na konso kimvuka ya politiki, yo vanda kimvuka mosi ke monana ya mbote mpi ya nkaka ke monana ya mbi. Bakristu ke tulaka dikebi na Kimfumu ya Nzambi mpi na mambu yina Nzambi ke tubaka nde yo kele mbote. Yo yina, beto ke pesaka ve bangindu na mambu ya kukonda lunungu to kutuba mambu ya mbi sambu na bamfumu ya politiki. (Mat. 6:33) Bambangi ya Yehowa mingi me yambulaka kupesa bangindu na mambu ya politiki mutindu bo vandaka kusala yo ntete. w18.06 6 § 9-11

Katula mutambu ya kuvukisa nitu, mbala ya nkaka yandi silaka mpi bawanzio nde bo ta vanda ti kiyeka na zulu ya bantu yonso. Na mutindu yina, ziku Satana zolaka nde mbikudulu ya Yehowa ya me tala ‘mwana ya nkento’ kulungana ve. (Kuy. 3:15) Kansi Yehowa pesaka ve nzila nde Satana kununga. Yehowa nokisaka Mvula ya Ngolo, yina bebisaka balukanu yonso ya Satana ti ya bademo na yandi. Kuvukisa nitu mpi lulendo kele mitambu ya ngolo kibeni yina Satana ke sadilaka. Bawanzio yina vukanaka ti Satana salaka bamvula mingi na zulu ti Nzambi. Ata mpidina, mingi na kati na bo bikaka nde banzala na bo ya mbi kuyela mpi yo kumaka ngolo kibeni. Beto fwete vila ve nde ata beto me sadilaka Yehowa bamvula mingi, banzala ya mbi lenda tula misisa na bantima na beto. (1 Bak. 10:12) Yo yina, ntangu yonso beto fwete sosa kuzaba mambu yina kele na ntima na beto mpi kukatula mabanza yonso ya kuvukisa nitu mpi lulendo.—Bag. 5:26; Bakol. 3:5. w18.05 25 § 11-12

Beto me zaba nde Polo lembaka sambu Bayuda ndimaka ve nsangu ya Kimfumu. Ata mpidina, Polo yambulaka ve kulonga bo. Yandi monisaka mutindu yandi kudiwaka sambu na Bayuda ntangu yandi tubaka nde: “Nzala ya ntima na mono mpi kisambu ya mono ke sala na Nzambi sambu na bo kele kibeni nde bo guluka. Sambu mono ke ta kimbangi nde bo kele ti kikesa sambu na Nzambi, kansi ve na kuwakana ti nzayilu ya sikisiki.” (Bar. 10:1, 2) Kikuma yina pusaka Polo na kulonga Bayuda kele ‘nzala ya ntima na yandi.’ Luzolo na yandi vandaka mpenza nde bo guluka. (Bar. 11:13, 14) Polo bondilaka Yehowa na kusadisa Bayuda sambu bo ndima nsangu ya Kimfumu. Polo tubaka nde: “Bo kele ti kikesa sambu na Nzambi.” Yandi monaka mambu na bo ya mbote mpi makuki na bo ya kusadila Yehowa. Polo bakisaka nde kikesa yina Bayuda vandaka na yo lenda sadisa bo na kukuma balongoki ya Kristu, bonso yandi. w18.05 13 § 4; 15-16 § 13-14

Konso muntu fwete tula dikebi na bampusa ya bampangi sambu na kusadisa bo. Polo sonikilaka Bakristu ya Ebreo nde: “Beno pesa maboko yina me lemba mpi mabolongo yina kele ngolo ve kikesa, mpi beno landa kusungika banzila ya makulu na beno, sambu yina kele ti kifu kukatuka ve na binkoso, kansi yo beluka.” (Baeb. 12:12, 13) Beto yonso, ata baleke, fwete tuba mambu yina ke pesa bampangi kikesa. Polo sonikaka nde: “Kana kele ti kikesa ya kupesa na kati ya Kristu, kana kele ti ndembikilu ya zola, kana kele ti kinduku ya kimpeve, kana kele ti lutondo mpi mawa, beno kumisa kiese na mono mingi kibeni mpi beno monisa nde beno kele ti ngindu ya mutindu mosi, mpi zola ya mutindu mosi, mpi nde beno kele kibeni na bumosi mpi beno kele ti mabanza ya mutindu mosi. Beno sala ve ata diambu mosi ti mpeve ya kuswana to sambu na kumonisa nde beno me luta bankaka, kansi ti kudikulumusa yonso beno tadila bankaka nde bo me luta beno. Beno sosa kaka ve mambote na beno mosi, kansi mpi mambote ya bantu ya nkaka.”—Bafi. 2:1-4. w18.04 22 § 10; 23, § 12

Yehowa pesaka Yezu sambu na kukatula beto na kimpika ya disumu mpi ya lufwa sambu beto sadila yandi luzingu na beto ya mvimba. Mutindu ya mbote ya kusadila kimpwanza na beto kele kusadila mingi ngolo mpi ntangu na beto sambu na Yehowa. Kusala mutindu yai ta sadisa beto na kubika ve nde mambu ya nsi-ntoto mpi banzala na beto kubaka kisika ya ntete na luzingu. (Bag. 5:16) Yindula mambu yina Noa mpi dibuta na yandi salaka. Bo zingaka ti bantu ya nku mpi ya mansoni. Kansi bo landaka ve balukanu mpi bikalulu ya bantu yina. Bo kudipesaka na kisalu yina Yehowa pesaka bo. Bo tungaka maswa, bumbaka madia na bo ti ya bambisi mpi longaka bantu ya nkaka na yina me tala Mvula ya Ngolo. Biblia ke tuba nde “Noa salaka mambu yonso kaka mutindu Nzambi songaka yandi. Yandi salaka kaka mutindu yina.” (Kuy. 6:22) Yo yina, Noa ti dibuta na yandi gulukaka ntangu Nzambi fwaka nsi-ntoto.—Baeb. 11:7. w18.04 10 § 8; 11 § 11-12

Satana ti bademo ke sadilaka mpi dibundu ya luvunu mpi mumbongo ya nsi-ntoto sambu na kukusa “ntoto ya mvimba” disongidila bantu yonso. (Kus. 12:9) Satana ke sadilaka dibundu ya luvunu sambu na kutuba mambu ya luvunu sambu na Yehowa, nkutu yandi ke salaka ngolo sambu bantu kuzaba ve zina ya Nzambi. (Yer. 23:26, 27) Yo yina, bantu ya nkaka ya masonga ke sambilaka bademo kukonda kuzaba. (1 Bak. 10:20; 2 Bak. 11:13-15) Satana ke sadilaka mpi mumbongo ya nsi-ntoto sambu na kumwanga luvunu, mu mbandu bantu ke tubaka nde mbongo ti bima ya kinsuni ke pesaka kiese. (Bing. 18:11) Bantu ya ke ndimaka mambu yai ya luvunu, ke lutisaka luzingu na bo na kusadila “Kimvwama” na kisika ya kusadila Nzambi. (Mat. 6:24) Ata bo vandaka ntete kuzola Nzambi, zola na bo sambu na bima ya kinsuni ke kumaka ngolo mpi zola na bo sambu na Nzambi ke manaka.—Mat. 13:22; 1 Yoa. 2:15, 16. w18.05 23 § 6-7