Oktobri

Beto kele ti banzikisa mingi ya ke monisa nde Yehowa ke taninaka bansadi na yandi. Yindula diambu yai: Beto ke samunaka mpi ke longaka kieleka na ntoto ya mvimba. (Mat. 28:19, 20) Beto ke monisaka pwelele bisalu ya Diabulu. Ya kieleka, kana Satana vandaka ngolo, yandi zolaka kukanga beto nzila ya kusala bisalu na beto yonso ya kimpeve kansi yandi kele ve ti kiyeka yina. Yo yina, beto fwete wa ve boma ya bampeve ya mbi. Kana beto kele ya kwikama, bademo ta sala beto ve mbi yina ta bikala kimakulu. Kansi beto yonso fwete telemina bampeve ya mbi mpi kutudila Yehowa ntima. Mpidina, beto ta baka balusakumunu mingi mpi Satana ta kusa beto ve. Diaka, beto ta wa ve boma ya bademo mpi beto ta kumisa ngolo kinduku na beto ti Yehowa. Biblia ke tuba nde: “Beno lemfukila Nzambi; kansi beno vanda bambeni ya Diabulu, ebuna yandi ta tina ntama ti beno. Beno kwenda pene-pene na Nzambi, ebuna yandi ta kwisa pene-pene na beno.”—Yak. 4:7, 8. w19.04 24 § 15; 25 § 18

Bana “kele dikabu ya me katuka na Yehowa.” Bibuti kele ti mukumba ya kutanina dikabu yai ya mfunu. Inki bibuti lenda sala sambu na kutanina bana sambu bo bebisa bo ve? Ya ntete, sosa kuzaba mambu ya me tala kuvukisa nitu. Zaba bikalulu mpi mayele ya mbi yina bantu ke sadilaka sambu na kukusa bana. Keba na bantu yina lenda vanda kigonsa. (Bing. 22:3; 24:3) Kuvila ve nde mbala mingi bantu yina ke bebisaka bana ke vandaka bantu yina bana me zaba mbote mpi ke tudilaka ntima. Ya zole, solula mbote ti bana. (Kul. 6:6, 7; Yak. 1:19) Kuvila ve nde bana yina bo me bebisaka ke kukaka ve kutela bantu mambu na bo. Ziku bo lenda yindula nde bantu ta ndima bo ve to bantu yina ke bebisaka bana lenda songa bo na kuzabisa ve muntu ya nkaka. Kana nge me bakisa diambu mosi ya mbi, yula bo bangiufula na mawete yonso mpi vanda ntima-nda ntangu bo ke tuba. Ya tatu, longa bana. Songa bo mambu ya me tala kuvukisa nitu na kutadila mvula na bo. Songa bo mambu yina bo fwete tuba mpi fwete sala kana muntu ke sosa kusimba bo na kisika ya mbi. w19.05 13 § 19-22

Sambu na nki Yehowa ke mengaka bantu ya lulendo? Sambu bantu yina ke kudizolaka ke landaka mbandu ya lulendo ya Satana. Satana yindulaka kibeni nde Yezu, yina Nzambi sadilaka sambu na kuganga bima yonso, ta fukimina mpi ta sambila yandi! (Mat. 4:8, 9; Bakol. 1:15, 16) Bantu ya lulendo yina ke vandaka ti mabanza yai ke ndimaka nde mayele ya nsi-ntoto kele mbote kuluta mayele ya Nzambi. (1 Bak. 3:19) Biblia ke longaka beto na kuvanda ti bukati-kati. Kuzola nitu na beto na mutindu ya mbote kele mbi ve. Yezu tubaka nde: “Nge fwete zola nkweno na nge bonso nge mosi,” yo ke monisa nde beto fwete lungisa bampusa na beto na mutindu ya mbote. (Mat. 19:19) Kansi, Biblia ke longa beto na kudimona ve mfunu mingi kuluta bankaka. Yo ke tuba nde: “Beno sala ve ata diambu mosi ti mpeve ya kuswana to sambu na kumonisa nde beno me luta bankaka, kansi ti kudikulumusa yonso beno tadila bankaka nde bo me luta beno.”—Bafil. 2:3; Bar. 12:3. w19.05 24 § 13-14

Yindula bansoba yina nge salaka ntangu nge zabaka kieleka ya Ndinga ya Nzambi mpi nge bakaka lukanu ya kusadila Yehowa. Mu mbandu, bampangi mingi me yambulaka mambu ya mbi. (1 Bak. 6:9-11) Beto ke waka kiese mutindu Yehowa ke sadisaka beto na kuyambula bikalulu ya mbi. Ata mpidina, beto fwete landa kusala bansoba. Ata beto me yambulaka kusala masumu ya nene yina beto vandaka kusala na ntwala ya kubaka mbotika, beto fwete sala ngolo sambu kima mosi ve kupusa beto na kuvutukila masumu yina. Beto fwete sala mambu zole. Ya ntete, beto fwete “yambula kulanda” nsi-ntoto yai. Ya zole, beto fwete “soba kimuntu na [beto]” mpi kukumisa mabanza na beto ya mpa. Nsoba yina Polo ke tubila kele ve ya zulu-zulu. Yo ke tadila kimuntu na beto ya mvimba. Beto fwete kumisa mabanza na beto ya mpa disongidila bikalulu, mawi mpi bampusa na beto. w19.06 9 § 4-6

Ntangu beto ke kudiyangisaka, balukutakanu ke pesaka beto diaka kikesa. Na balukutakanu, beto ke pesaka diaka Yehowa dibaku ya kusadisa mpi ya kulembika beto. Kuna, yandi ke pesaka beto ngolo na nzila ya mpeve santu, ya Ndinga na yandi mpi ya bansadi na yandi. Balukutakanu ke pesaka beto dibaku ya ‘kupesana kikesa.’ (Bar. 1:11, 12) Mpangi-nkento Sophia ke tuba nde: “Yehowa ti bampangi ke sadisaka mono na bampasi na mono. Balukutakanu kele mfunu mingi sambu na mono. Mono me bakisaka nde kudipesa mingi na kusamuna mpi na mambu ya dibundu ke lembikaka basusi na mono.” Kana beto ke kudiyangisa, beto fwete vila ve nde Yehowa ke sila beto luzingu ya kiese na bilumbu ke kwisa ata mpidina, yandi ke sadisaka beto mpi ntangu beto ke kutanaka ti bampasi. Yandi ke pesaka beto mpusa ti “ngolo” ya kununga mambu yina ke yangisa beto mpi mambu yina ke katulaka beto kivuvu.—Bafil. 2:13. w19.06 19 § 17-18

Yo fwete vanda nde Yezu vandaka ti mambu ya mfumu mingi ya kusonga balongoki na yandi, yo yina na nima ya lufutumuku na yandi, yandi yidikaka mambu nswalu sambu na kusala lukutakanu ti balongoki na yandi. Na lukutakanu yina Yezu salaka ti balongoki, yandi tubilaka kisalu ya mfunu yina balongoki na yandi salaka na mvu-nkama ya ntete mpi yina beto ke sala bubu yai. Yandi tubaka nde: “Yo yina, beno kwenda mpi beno kumisa bantu ya makanda yonso balongoki, . . . beno longa bo na kuzitisa mambu yonso ya mono songaka beno.” (Mat. 28:19, 20) Yezu ke zolaka nde balongoki na yandi yonso kusamuna. Yo yina, yandi pesaka ve ntuma ya kukumisa bantu balongoki kaka na bantumwa 11. Beto ke ndima nde yo kele mpidina sambu ntangu yandi pesaka ntuma yai bantumwa mpamba ve bantu vandaka pana. Inki mutindu beto me zaba yo? Yibuka nde wanzio songaka bankento yina nde: “Beno ta mona yandi kuna [na Galilea].” (Mat. 28:7) Yo ke monisa nde bankento yina ya kwikama vandaka mpi na lukutakanu yina. w20.01 2-3 § 1-4

Yezu monisaka kikuma yina beto ke kutanaka ti mbangika. Yandi tubaka nde bo ta menga beto sambu beto kele ve bantu ya nsi-ntoto. Mbangika ke tendula ve nde Nzambi me buya beto. Kansi, yo ke monisaka nde beto ke salaka mambu ya mbote! Bambeni lenda kanga beto ve nzila ya kusadila Yehowa, Nzambi nkwa-ngolo yonso. Bambeni mingi mekaka kansi bo nungaka ve. Beto tadila mambu yina salamaka na Mvita ya Zole ya Ntoto ya Mvimba. Na ntangu yina, bamfumu ya bansi mingi bangikaka bansadi ya Nzambi. Bo buyisaka kisalu ya Bambangi ya Yehowa na Allemagne, na Australie, na Canada mpi na bansi ya nkaka. Kansi nki salamaka? Na 1939 ntangu bitumba yantikaka, bansamuni vandaka 72 475 na ntoto ya mvimba. Barapore monisaka nde na nsuka ya bitumba ya 1945, Yehowa sakumunaka bansadi na yandi mpi bansamuni kumaka 156 299. Ntalu ya bansamuni kumaka mingi kuluta. w19.07 9 § 4-5

Ata nge ke longukaka ve Biblia ti muntu, nge lenda sadisa muntu na kukuma longoki na mitindu ya nkaka. Mu mbandu, nge lenda yamba bantu yina me kwisa na mbala ya ntete na Nzo ya Kimfumu mpi kutudila bo dikebi. Mpidina, nge ta ndimisa bo nde zola kele kikalulu ya Bakristu ya kieleka. Bamvutu ya nkufi yina nge ta pesaka na balukutakanu lenda sadisa bantu ya mpa na kupesa mpi bamvutu ya masonga mpi na luzitu yonso. Nge lenda samuna ti nsamuni ya mpa mpi kusadisa yandi na kusadila mbote Biblia sambu na kuyindula ti bantu. Kana nge sala mutindu yai, nge ta sadisa yandi na kulanda mbandu ya Kristu. (Luka 10:25-28) Bakristu mingi ke vandaka ti mambu mingi ya kusala sambu bo ke vandaka ti mikumba mingi. Kansi bo ke zwaka ntangu ya kulonguka Biblia ti bantu mpi ke salaka yo na kiese. w19.07 17 § 11, 13

Ntumwa Polo bikaka ve nde mambu ya mbote to ya mbi yina yandi salaka ntama kukatula yandi dikebi. Yandi monisaka nde yo kele mfunu na ‘kuvila mambu yina kele na nima’ sambu na ‘kulanda mambu yina kele na ntwala’ disongidila kubaka ntinu tii na nsuka. Inki mambu lendaka kukatula dikebi ya Polo? Ya ntete, mambu ya kuyituka yina yandi salaka ntangu yandi vandaka na dibundu ya Bayuda. Kansi, Polo tadilaka yo “bonso kita ya mvindu.” (Bafil. 3:3-8) Ya zole, yandi bikaka ve nde yandi kudiyangisa mingi na mutindu yandi vandaka kuniokula Bakristu. Ya tatu, yandi yindulaka ve nde yandi me sadila Yehowa mingi. Polo salaka mbote kisalu na yandi ya kusamuna ata bo tulaka yandi na boloko, bo bulaka yandi, bo taka yandi matadi, maswa yina yandi vandaka na kati dindaka mpi bantangu ya nkaka yandi kondaka madia ti bilele. (2 Bak. 11:23-27) Ata Polo salaka mambu mingi ya mbote mpi niokwamaka, yandi zabaka nde yandi fwete landa kubaka ntinu. Beto lenda sala mutindu mosi. w19.08 3 § 5

Bampangi mingi ke zingaka na bansi yina bo kele ve ti kimpwanza ya kusamuna, ata mpidina bo ke sadilaka bametode ya nkaka sambu na kusamuna nsangu ya mbote. (Mat. 10:17-20) Na insi mosi, nkengi ya nziunga lombaka konso nsamuni na kusamuna na “teritware” na yandi disongidila kulonga bantu ya dibuta na bo, bantu yina ke zingaka pene-pene na bo, banduku ya nzo-nkanda, banduku ya kisalu mpi bantu yina yandi ke zaba. Na nima ya bamvula zole, mabundu na nziunga yina kumaka mingi. Ata beto ke samuna na ngemba na insi na beto, mbandu ya bampangi yai lenda longa beto dilongi ya mfunu nde ntangu yonso beto fwete sosa mabaku ya kusamuna mingi mpi beto fwete tula kivuvu nde Yehowa ta pesa beto ngolo yina beto kele na yo mfunu sambu na kununga konso diambu ya mpasi. (Bafil. 2:13) Na ntangu yai ya mfunu, beto fwete zikisa mambu ya kuluta mfunu, beto vanda bunkete, beto budisa ve bantu ya nkaka sakuba mpi beto buta mbuma ya lunungu. Mpidina, zola na beto ta kuma mingi mpi beto ta pesa Yehowa, Tata na beto ya zola lukumu. w19.08 13 § 17-18

Bantu mingi ke zolaka ve banduku yina ke kangamaka na bangindu na bo mpi ke ndimaka ve bangindu ya bantu ya nkaka. Kansi, beto ke zolaka bampangi ntangu bo ke ‘kuditulaka na kisika ya bankaka, ke monisaka zola ya kimpangi, mawa ya nene, mpi kudikulumusa.’ (1 Pie. 3:8) Kana beto ke sepela ti bantu ya kudikulumusa ntembe kele ve nde bo mpi ta sepela ti beto kana beto mpi kele bantu ya kudikulumusa. Kudikulumusa ke kumisaka mpi luzingu pete. Bantangu ya nkaka beto lenda mona nde mambu ya nkaka ke salama ve mbote to ke salama ve na lunungu. Mbala mingi, bantu ke pesaka ve bantu ya mayele lukumu, kansi bo ke pesaka lukumu na bantu yina kele ve mayele. Salomo bakisaka nde beto fwete ndima mambu yina me kumina beto na kisika ya kudiyangisa kuluta ndilu. (Lon. 6:9) Kana beto kele bantu ya kudikulumusa, beto ta sepela ti luzingu na beto na kisika ya kulula luzingu yina beto kele na yo ve. w19.09 4-5 § 9-10

Bantu yina kele ti kiyeka mu mbandu batata, kele ti dibaku ya kusadisa bantu ya nkaka. Yehowa me pesaka tata kiyeka ya kuvanda mfumu ya dibuta mpi yandi ke zolaka nde tata kulonga mpi kusungika bana na yandi. (1 Bak. 11:3) Kansi kiyeka ya tata kele ti bandilu. Yehowa, Mfumu ya mabuta yonso ta sambisa yandi. (Baef. 3:14, 15) Batata ke lemfukilaka Yehowa ntangu bo ke sadilaka kiyeka na bo na mutindu yina ke sepedisaka yandi. Beno sadila ve kiyeka yina Yehowa me pesaka beno na mutindu ya mbi. Beno ndima bifu na beno mpi bandongisila ya Biblia yina bampangi ya nkaka ke pesa beno. Mpidina, mabuta na beno ta zitisa beno sambu na kudikulumusa na beno. Ntangu beno ke samba ti mabuta na beno, beno zabisa Yehowa mambu yina kele na ntima na beno sambu mabuta na beno kubakisa mutindu beno ke sosaka lusadisu mpi lutwadisu ya Yehowa. Diambu ya kuluta mfunu kele nde beno kudipesa ya mvimba na kisalu ya Yehowa. (Kul. 6:6-9) Mabuta na beno ta landa mbandu na beno ya mbote. w19.09 15 § 8; 17 § 14; 18 § 16

Marko vandaka ti kikalulu ya kusadila bantu ya nkaka. Yandi salaka bantangu mingi ti ntumwa Polo mpi Piere. Ntangu bantumwa yai vandaka kulungisa mikumba na bo, Marko vandaka kusadisa bo na kulungisa bampusa na bo ya kinsuni. (Bis. 13:2-5; 1 Pie. 5:13) Polo tubaka nde Marko kele mosi ya “banduku na mono ya kisalu sambu na Kimfumu ya Nzambi,” mpi muntu yina “ke pesaka mono kikesa.” (Bakol. 4:11, noti na nsi ya lutiti.) Marko kumaka nduku ya Polo ya ngolo. Mu mbandu, ntangu Polo vandaka na boloko na Roma na mbala ya nsuka, pene-pene ya mvu 65 ya ntangu na beto, yandi sonikilaka Timoteo mukanda ya zole. Na mukanda yina, Polo lombaka Timoteo na kukwenda na Roma ti Marko. (2 Tim. 4:11) Yo kele pwelele nde Polo sepelaka ti kisalu ya mbote ya Marko, yo yina yandi vandaka na mfunu ya Marko na ntangu yina ya mfunu mingi. Marko sadisaka Polo mingi, mbala ya nkaka yandi vandaka kusumbila yandi bima ya kudia to bima ya kusonikila mikanda. Lusadisu yina Polo bakaka na Marko sadisaka yandi mingi na kukanga ntima na bantangu yina ya nsuka ya luzingu na yandi, na ntwala nde bo fwa yandi. w20.01 11 § 12-13

Beto ke vandaka ti mpeve ya kuditambika mpi ke salaka kisalu ya ngolo. Yezu tubaka nde bo ta bangika beto. Kansi beto fwete ndima nde Yehowa ta pesa beto ngolo ya kununga bampasi. Kana beto ke kanga ntima, beto ta kuma ngolo. (Yak. 1:2-4) Beto fwete ndima mpi nde Yehowa ta sadisa beto, Yezu ta twadisa beto mpi bampangi ta pesa beto kikesa. (Mat. 6:31-33; Yoa. 10:14; 1 Bate. 5:11) Mambu yai yonso ta sadisa beto na kukanga ntima na bampasi. Nkento yina vandaka “kubasika menga” yina Yezu belulaka, bakaka kikesa banda kilumbu yina yandi belukaka. (Luka 8:43-48) Kansi sambu na kubaka kikesa ya kimakulu, yo lombaka nde yandi kuma longoki ya Kristu. Inki nge ke yindula, keti yandi salaka yo? Kana yandi bakaka vangu ya Yezu, yandi me bakaka mambote ya kusala ti Yezu na zulu. Konso kibansa yina yandi salaka sambu na kulanda Kristu fwanaka ve ti mambote yina yandi me bakaka. Yo vanda beto ta zinga na zulu to na ntoto, beto ta monisa ntonda na bangogo yai ya Yezu: “Beno kwisa na mono!” w19.09 25 § 21-22

Bantu ya Davidi vandaka na mfunu ya lusadisu, yo yina bo lombaka Nabale, yina vandaka mvwama na Izraele mwa madia. Bo lombaka sambu bo taninaka mameme ya Nabale na ntoto ya zelo na zelo. Kansi muntu yai ya bwimi buyaka kupesa bo madia. Davidi waka makasi mpi bakaka lukanu ya kufwa Nabale ti bantu yonso ya nzo na yandi. (1 Sam. 25:3-13, 22) Kansi, Abigaile, nkento ya Nabale vandaka kitoko mpi mayele. Yandi monisaka kikesa, bwaka na makulu ya Davidi mpi bondilaka yandi na kubasisa ve menga sambu na kuvutula mbi na mbi. Na mayele yonso yandi songaka Davidi na kutudila Yehowa ntima. Bangogo ya kudikulumusa mpi ya mayele ya Abigaile simbaka ntima ya Davidi. Davidi bakisaka nde Yehowa muntu tindaka Abigaile. (1 Sam. 25:23-28, 32-34) Abigaile yedisaka bikalulu yina pusaka Yehowa na kusadila yandi. Mutindu mosi, Yehowa lenda sadila bampangi-bankento yina ke vandaka mayele mpi ke bakisaka mambu mbote sambu na kupesa mabuta mpi bampangi kikesa.—Tito 2:3-5. w19.10 23 § 10

Bakristu yonso ya kieleka fwete vukana ve na mambu yonso ya Babilone ya Nene. Na ntwala ya kulonguka kieleka, ziku longoki ya Biblia vandaka na dibundu mosi ya luvunu. To yandi vandaka kuvukana na bisalu na yo. Yo lenda vanda mpi nde yandi vandaka kupesa mbongo na dibundu yina. Na ntwala nde bo ndima longoki ya Biblia na kukuma nsamuni yina me baka ntete ve mbotika, yandi fwete yambula mambu yonso ya ke wakana ti mabundu ya luvunu. Yandi fwete sonika mukanda nde yandi kele diaka ve muntu ya dibundu yina to na dibundu ya nkaka ya Babilone ya Nene. Mbangi ya Yehowa fwete zikisa mbote nde kisalu na yandi ke wakanaka ve ti Babilone ya Nene. (2 Bak. 6:14-17) Sambu na nki? Sambu beto ke zolaka ve kuvukana na bisalu mpi na masumu ya bimvuka yina kele mvindu na meso ya Nzambi.—Yez. 52:11. w19.10 12 § 16-17

Yeremia muntu sonikaka mukanda yina kele ti zina na yandi. Yo lenda vanda nde yandi muntu sonikaka mpi mukanda ya Bantotila ya ntete mpi ya zole. Kisalu yai sadisaka yandi na kumona mutindu Yehowa ke wilaka bantu mawa. Mu mbandu, yandi zabaka nde ntangu ntotila Ahabi balulaka ntima na mambu ya mbi yina yandi salaka, Yehowa tubaka nde yandi ta fwa dibuta ya mvimba ya Ahabi na nima ya lufwa ya Ahabi. (1 Bant. 21:27-29) Yeremia zabaka mpi nde Manase sadilaka Yehowa mambu ya mbi kibeni kuluta Ahabi. Ata mpidina, Yehowa lolulaka Manase sambu yandi balulaka ntima. (2 Bant. 21:16, 17; 2 Bans. 33:10-13) Yo fwete vanda nde masolo yai sadisaka Yeremia na kulanda mbandu ya Nzambi ya kumonisila banduku na yandi ntima-nda mpi ya kuwila bo mawa. Beto tadila mambu yina Yeremia salaka na ntangu yina Baruki kumaka kusala diaka mbote ve kisalu yina bo pesaka yandi. Na kisika ya kufwa nswalu kinduku na bo, Yeremia sadisaka Baruki mpi songaka yandi na mawete mpi na masonga yonso mambu yina Nzambi tubaka.—Yer. 45:1-5. w19.11 6 § 14-15

Mukanda ya Levi ke sadisa beto na kuzaba nde bantu ya Izraele vandaka kupesa kimenga ya kinduku “sambu na kupesa matondo.” (Levi 7:11-13, 16-18) Bo vandaka ve kupesa kimenga yina sambu yo lombaka nde bo pesa yo kansi sambu bo vandaka ti luzolo ya kupesa yo. Kisalu yina beto ke sadilaka Yehowa kele bonso bimenga ya kinduku sambu yo ke monisaka nde beto ke sadilaka yandi na luzolo yonso. Beto ke pesaka Yehowa bima na beto ya kuluta mbote sambu beto ke zolaka yandi na ntima ya mvimba. Yehowa ke waka kiese mingi kibeni mutindu bamilio ya bantu ke sambilaka yandi na luzolo yonso. Yo ke pesaka beto kikesa ya kuzaba nde Yehowa ke monaka mpi ke bakaka na mbalu kisalu na beto mpi bikuma yina ke pusaka beto na kusala yo. Mu mbandu, kana nge kele mununu mpi nge lenda sala ve mingi mutindu nge ke zola kusala, zaba nde Yehowa ke bakisa bandilu na nge. Nge lenda yindula nde nge ta kuka ve kusadila Yehowa mingi kansi kuvila ve nde Yehowa ke mona zola ya mingi yina ke pusa nge na kusala mambu yina nge lenda sala. Yandi ta ndima na kiese yonso bima na nge ya kuluta mbote yina nge lenda pesa yandi. w19.11 22 § 9; 23 § 11-12

Yo kele mfunu mingi nde muntu kuvanda ti bukati-kati na yina me tala kisalu. Na nsadisa ya mpeve santu ntotila Salomo sonikaka nde: “Konso kisalu kele ti ntangu na yo.” Yandi tubilaka kukuna, kutunga, kudila, kuseka, kukina mpi bisalu ya nkaka. (Lon. 3:1-8) Ya kieleka, kisalu mpi kupema kele mambu zole ya mfunu na luzingu. Yezu vandaka ti bukati-kati sambu na kisalu mpi kupema. Kilumbu mosi, bantumwa samunaka mingi mpi “bo vandaka ve ti ntangu ata ya kudia.” Yezu zabisaka bo mambu ya kele na mukapu ya bubu. (Mar. 6:30-34) Ata Yezu ti balongoki na yandi vandaka kusala mingi, yandi zabaka nde bo yonso vandaka ti mfunu ya kupema. Bantangu ya nkaka beto ke vandaka na mfunu ya kupema mpi ya kusoba mambu yina beto ke salaka konso kilumbu. Beto ta bakisa yo na mambu yina Nzambi yidikaka ntangu yandi tulaka Kisabatu ya konso mposo sambu na bansadi na yandi na ntangu ya ntama. Beto kele ve na nsi ya nsiku ya Moize kansi beto lenda baka mambote na mambu yina yo ke tuba sambu na Kisabatu. w19.12 3 § 6-7

Yehowa me silaka nde yandi ta sadisa bansadi na yandi ya kwikama, yo yina yandi ke zabaka nde yandi fwete lungisa lusilu na yandi. (Nk. 31:1-3) Diaka, Yehowa ke zaba mbote nde beto bantu ya dibuta na yandi, ta kudiyangisa mingi kana yandi ke pesa beto ve bima yina beto kele na yo mfunu. Yandi silaka nde yandi ta pesa beto bima yina beto kele na yo mfunu sambu na kuzingila mpi bima yina ta sadisa beto na kulanda kusadila yandi. Ata kima mosi ve ta kanga yandi nzila ya kulungisa lusilu yai. (Mat. 6:30-33; 24:45) Kana beto ke yibuka bikuma yina ke pusaka Yehowa na kulungisa balusilu na yandi, yo ta ndimisa beto nde yandi ta sadisa beto ntangu beto kele ve ti mbongo. Beto tubila mambu yina kuminaka Bakristu ya mvu-nkama ya ntete. Ntangu bo kumaka kuniokula ngolo bampangi ya Yeruzalemi, ‘bantu yonso panzanaka’ kaka bantumwa bikalaka. (Bis. 8:1) Yindula bampasi yina bampangi kutanaka ti yo. Mu mbandu, mpasi ya mbongo. Bampangi vandaka diaka ve ti banzo mpi bisalu. Ata mpidina, Yehowa yambulaka bo ve mpi bo taninaka kiese na bo. (Bis. 8:4; Baeb. 13:5, 6; Yak. 1:2, 3) Yehowa sadisaka Bakristu yai ya kwikama mpi yandi ta sadisa beto.—Nk. 37:18, 19. w20.01 17-18 § 14-15

Ntangu Davidi gulusaka mameme ya tata na yandi na maboko ya ntambu mpi ya urse, yandi bakisaka nde Yehowa sadisaka yandi na kufwa bambisi yina ya makasi. Ntangu yandi fwaka Goliati, soda ya ngolo, yandi bakisaka pwelele nde Yehowa vandaka kutwadisa yandi. (1 Sam. 17:37) Ntangu yandi vandaka kutina ntotila Saule yina vandaka kuwila yandi kimpala, yandi ndimaka nde Yehowa gulusaka yandi. (Nk. 18, bangogo yina kele na zulu ya kapu) Kana Davidi vandaka lulendo, ziku yandi zolaka kuyindula nde yandi salaka mambu yina yonso na ngolo na yandi mosi. Kansi yandi vandaka muntu ya kudikulumusa yo yina, yandi ndimaka nde Yehowa sadisaka yandi. Disolo ya Davidi ke longa beto nki? Beto fwete suka kaka ve na kulomba Yehowa lusadisu. Beto fwete sala yonso sambu na kuzaba ntangu mpi mutindu Yehowa ke sadisaka beto. Kana beto kele bantu ya kudikulumusa, beto ta bakisa nde beto lenda sala ve mambu yonso na ngolo na beto mosi mpi nde Yehowa ke sadisaka beto na mambu yina beto ke salaka. Kana beto ke ndima nde Yehowa ke sadisaka beto, yo ta sadisa beto na kukumisa diaka ngolo kinduku na beto ti yandi. w19.12 20 § 18-19

Beto kele ti bikuma mingi ya kundima nde Yehowa ke monaka nde beto kele mfunu mingi na meso na yandi. Yandi me bendaka beto na yandi mpi yandi monaka mutindu beto ndimaka nsangu ya mbote. (Yoa. 6:44) Ntangu beto yantikaka kukwenda pene-pene na yandi, yandi kwisaka pene-pene na beto. (Yak. 4:8) Yehowa ke bakaka ntangu mpi ke salaka bikesa ya kulonga beto sambu na kumonisa beto nde beto kele mfunu mingi na meso na yandi. Yandi ke zabaka kimuntu na beto ya bubu yai mpi mutindu ya bantu yina beto lenda kuma na bilumbu ke kwisa. Bantangu ya nkaka, yandi ke pesaka beto ndola sambu yandi ke zolaka beto. Mambu yai ke ndimisa kibeni nde beto kele mfunu mingi na meso ya Yehowa! Bantu ya nkaka monaka nde ntotila Davidi vandaka ve mfunu, kansi Davidi zabaka nde Yehowa vandaka kuzola yandi mpi kusadisa yandi. Yo sadisaka Davidi na kukanga ntima na mambu yina yandi vandaka kukutana ti yo. (2 Sam. 16:5-7) Ntangu beto ke lembaka nitu to ke kutanaka ti bampasi, Yehowa ke sadisaka beto na kukanga ntima to kununga bampasi yina. (Nk. 18:27-29) Yehowa ke sadisaka beto na kulanda kusadila yandi na kiese yonso ata beto ke kutana ti bampasi.—Bar. 8:31. w20.01 15 § 7-8

Beto samba na ntwala ya kulonguka ti muntu. Yo kele mbote na kusamba na luyantiku mpi na nsuka ya kulonguka ti muntu. Beto fwete sala yo kukonda kusukinina kana mpila kele ntangu beto me yantika kibeni kulonguka Biblia ti muntu. Beto fwete sadisa longoki na kubakisa nde mpeve santu ya Nzambi ke sadisaka beto na kubakisa Biblia. Sambu na kusadisa balongoki na kubakisa mfunu ya kisambu, bansamuni ya nkaka ke tangilaka bo Yakobo 1:5, ya ke tuba nde: “Kana muntu mosi na kati na beno me konda mayele, bika yandi landa kulomba na Nzambi.” Na nima, nsamuni lenda yula longoki nde: “Inki mutindu beto lenda lomba Nzambi mayele?” Ntembe kele ve nde longoki ta tuba nde beto fwete samba. Beto longa balongoki ya Biblia mutindu ya kusamba. Beto fwete ndimisa bo nde Yehowa ke waka bisambu ya bantu ya ntima-masonga. Beto songa bo nde ntangu bo ke samba, bo fwete songa Yehowa mambu yina kele na ntima na bo, ata mambu yina bo ke zola ve kusonga muntu ya nkaka. Beto monisa bo mpi nde Yehowa ke zabaka dezia bangindu na beto na ntwala nde beto tuba yo.—Nk. 139:2-4. w20.01 2 § 3; 5 § 11-12

Yehowa ke ponaka ntangu ya kupona Bakristu yina yandi ta tula mafuta. (Bar. 8:28-30) Yehowa yantikaka kupona bo na nima ya lufutumuku ya Yezu. Yo ke monana nde na mvu-nkama ya ntete Yehowa tulaka Bakristu yonso ya kieleka mafuta. Na bamvula yina landaka, bantu mingi yina vandaka kudibinga Bakristu landaka ve Kristu. Ata mpidina, na bamvula yina, Yehowa tulaka Bakristu fioti ya kieleka mafuta. Bo vandaka bonso ble yina Yezu tubaka nde yo ta yela na kati ya matiti ya mbi. (Mat. 13:24-30) Na bilumbu yai ya nsuka, Yehowa ke landa kupona bantu yina ta vanda na kati ya bantu 144000. Kana Nzambi me baka lukanu ya kupona bankaka na kati na bo ntangu fioti na ntwala nde nsuka kukwisa, beto lenda mona ve lukanu yina mbi. (Bar. 9:11) Beto fwete keba na kutuba ve mambu bonso bantu ya kisalu yina Yezu tubilaka na kingana mosi yina yandi pesaka. Bo bokutaka sambu na lufutu yina mfumu pesaka bantu yina yantikaka kisalu na ngunga ya nsuka.—Mat. 20:8-15. w20.01 30 § 14

Yehowa ke zolaka nde bantu ya dibuta na yandi kuzinga na kiese. Ata beto ke kutana ti bampasi, beto kele ti bikuma mingi ya kuvanda na kiese banda bubu yai. Mu mbandu, beto ke bakisa nde Tata na beto ke zolaka beto mingi. Beto me zabaka kieleka ya Biblia, Ndinga ya Nzambi. (Yer. 15:16) Beto kele na dibuta mosi mpamba yina bantu na yo ke zolaka Yehowa, ke zolaka bansiku na yandi ya bikalulu ya mbote mpi ke zolanaka. (Nk. 106:4,5) Beto lenda tanina kiese na beto sambu beto me zaba nde na bilumbu ke kwisa, luzingu ta vanda mbote kuluta. Ntama mingi ve Yehowa ta katula mambu yonso ya mbi mpi Kimfumu na yandi ta sala nde ntoto kukuma diaka Paladisu. Beto kele mpi ti kivuvu ya kuluta mbote nde bafwa ta futumuka mpi ta zinga diaka ti bantu yina bo vandaka kuzola mingi. (Yoa. 5:28, 29) Yo ta vanda kiese mingi kibeni! Diambu ya mfunu kuluta kele nde konso muntu na zulu to na ntoto ta pesaka Tata na beto ya zola lukumu, nkembo mpi ta sambilaka yandi na mutindu ya mbote kibeni. w20.02 13 § 15-16

Kana nge me sala disumu ya nene, kubumba yo ve. Zabisa Yehowa disumu na nge. Nge ta kudiyangisa diaka ve mingi sambu na yo mpi nge ta yantika kuwa ngemba ya mabanza. Kansi kana nge ke zola kuvutula kinduku na nge ti Yehowa, nge fwete sala diambu ya nkaka. Nge fwete ndima ndola. Ntangu Yehowa tindaka profete Natani na kusonga ntotila Davidi disumu na yandi ti Bat-sheba, Davidi sosaka ve kupesa bikuma to kutuba nde yo vandaka ve disumu ya nene. Mbala mosi yandi ndimaka disumu yina yandi sadilaka bakala ya Bat-sheba mpi mingi-mingi Yehowa. Davidi ndimaka ndola yina Yehowa pesaka yandi mpi Yehowa lolulaka yandi. (2 Sam. 12:10-14) Kana beto me sala disumu ya nene, beto fwete zabisa yo bankuluntu yina Yehowa me tulaka sambu na kutanina beto. (Yak. 5:14, 15) Beto fwete sosa ve kudinungisa. Kana beto me ndima ndola yina bo me pesa beto mpi beto me zitisa yo, beto ta zwa nswalu ngemba ya mabanza mpi kiese. w20.02 24-25 § 17-18

“Bantu kumi” yina ke monisa bantu yina kele ti kivuvu ya kuzinga mvula na mvula na ntoto. Bo ke zabaka nde Yehowa me ponaka kimvuka ya fioti ya Bakristu yina bo me tulaka mafuta; Bakristu yango ke monisa “Muyuda.” Yo yina bantu yango ke bakisaka nde kusadila Nzambi ti bantu yai kele lukumu ya nene. Ata beto ta kuka ve kuzaba zina ya konso mpangi yina bo me tulaka mafuta ya kele na ntoto bubu yai, bantu yina kele ti kivuvu ya kuzinga na ntoto lenda ‘kwenda ti’ Bakristu yina bo me tulaka mafuta. Inki mutindu? Mvutu kele na mukapu ya bubu. Verse yai ke tubila Muyuda mosi. Kansi mambu yina yo ke tuba ke monisa nde Muyuda yango kele ve muntu mosi kansi kimvuka ya bantu, yina ke monisa kimvuka ya mvimba ya Bakristu yina bo me tulaka mafuta. Bansadi ya nkaka ya Yehowa ke sadilaka yandi kumosi ti Bakristu yina bo me tulaka mafuta. Ata mpidina, bo ke monaka ve nde Bakristu yina bo me tulaka mafuta kele bantwadisi na bo sambu bo ke zabaka nde Yezu mpamba muntu kele Ntwadisi.—Mat. 23:10. w20.01 26 § 1-2

Yezu tubaka nde bantu ta zaba balongoki na yandi ya kieleka kana bo ke monisa zola yina yandi monisilaka bo. Mambu yai lunganaka na mvu-nkama ya ntete mpi yo ke lungana bubu yai. Yo kele mfunu mingi nde beto zola bantu ya nkaka, ata ntangu yo kele mpasi na kusala yo. Kudiyula nde: ‘Inki malongi mono lenda baka na mbandu ya bampangi yina ke landaka kuzola bantu ya nkaka ata yo ke lombaka nde bo sala bikesa mingi?’ Sambu beto kele bantu ya kukonda kukuka, yo ke vandaka mpasi sambu beto zola mingi bantu ya nkaka. Ata mpidina, beto fwete sala bikesa ya kulanda mbandu ya Kristu. Yezu monisaka nde yo kele mfunu na kuzinga na ngemba ti mpangi yina kele ti makambu ti beto. (Mat. 5:23, 24) Yandi monisaka pwelele nde kana beto ke zola nde Nzambi kundima beto, beto fwete zinga na ngemba ti bantu ya nkaka. Yehowa ke waka kiese ntangu yandi ke monaka bikesa yina beto ke salaka sambu na kuzinga na ngemba ti bampangi. Yandi ta ndima ve lusambu na beto kana beto kele ti kimbeni ti bantu ya nkaka mpi ke buya kutula ngemba ti bo.—1 Yoa. 4:20. w20.03 24 § 1-4

Satana, “tata ya luvunu,” me kusaka bantu banda luyantiku. (Yoa. 8:44) Luvunu ya me tala lufwa mpi luzingu na nima ya lufwa kele na kati ya malongi ya luvunu ya Satana. Bantu me kumaka ti bikalulu ya nkaka mpi ke salaka mambu mingi sambu bo ke waka boma ya bafwa. Sambu na nki Satana ke kusaka bantu mingi? Satana ke sadilaka mawi yina beto ke butukaka na yo sambu na kukusa bantu na yina me tala lufwa. Sambu Nzambi me gangaka beto ti mpusa ya kuzinga kimakulu, beto ke zolaka ve kufwa. (Lon. 3:11) Lufwa kele mbeni na beto. (1 Bak. 15:26) Ata Satana ke landa kukusa bantu, kieleka ya me tala lufwa me zabanaka. Bubu yai bantu mingi ke zabaka mpi ke longaka mambu yina Biblia ke tubaka sambu na mambu yina ke kuminaka bantu na nima ya lufwa mpi kivuvu ya bafwa. (Lon. 9:5, 10; Bis. 24:15) Kieleka yai ke pesaka beto kikesa, ke katulaka beto boma mpi baketi-keti ya kukonda mfunu. w19.04 14 § 1; 15 § 5-6

Yehowa Nzambi ke zolaka bansadi na yandi. Ntangu yonso yandi ke zolaka bo mpi ta landa kuzola bo. Yandi ke zolaka mpi lunungu. (Nk. 33:5) Yo yina beto fwete ndima nde: (1) Yehowa ke waka mpasi ntangu bo ke sadilaka bansadi na yandi mambu ya mbi. (2) Yandi ta manisa mambu yonso ya kukonda lunungu. Zola vandaka na kisina ya Nsiku yina Nzambi pesaka bantu ya Izraele na nzila ya Moize. Yo vandaka kusiamisa lunungu, kusadila bantu yonso mambu na lunungu, ata bayina me konda lutaninu. (Kul. 10:18) Nsiku yai monisaka mutindu Yehowa ke tudilaka bansadi na yandi dikebi ya mingi. Nsiku ya Moize sukaka na mvu 33 ya ntangu na beto, ntangu dibundu ya Bukristu yantikaka. Keti Bakristu ta kuma kuzinga kukonda nsiku yina zola kele na kisina na yo mpi yina ke siamisaka lunungu? Ve. Bakristu bakaka nsiku ya mpa: “nsiku ya Kristu.” Yezu pesaka ve balongoki na yandi mukanda ya bansiku, kansi yandi pesaka bo bantuma, bansiku mpi minsiku yina ta twadisa bo. “Nsiku ya Kristu” ke tadila mambu yonso yina Yezu longaka. w19.05 2 § 1-3

Bantu ke zolaka nde bantu ya nkaka kulembika bo; bo mpi ke zolaka kulembika bantu ya nkaka. Mu mbandu kana mwana-fioti ke sakana, yandi me bwa mpi me lwala na dibolongo, yandi ta didila mama to papa na yandi. Bibuti ta belula ve mputa yina kansi bo ta sosa kulembika yandi. Bo ta yula yandi mambu yina salamaka, kukatula yandi mansanga, kutubila yandi bangogo ya mawete yina lenda lembika yandi mpi bo ta tula yandi nkisi to ta kanga yandi kitenda. Ntangu fioti na nima, mwana ta yambula kudila mpi yandi lenda sakana diaka. Malembe-malembe mputa ta beluka. Bantangu ya nkaka, bana ke lwalaka na mutindu ya mbi kuluta. Bantu lenda vukisa nitu ti bo. Bo lenda vukisa nitu ti bo mbala mosi to mbala mingi. Yo vanda mbala mosi to mbala mingi, mwana ke landaka kuniokwama na mabanza. Bantangu ya nkaka, bo ke kangaka muntu yina me bebisa mwana mpi ke pesaka yandi ndola. Bantangu ya nkaka mpi bo lenda pesa ve muntu yina me sala mbi ndola. Ata bo me pesa yandi ndola, mwana lenda niokwama tii na kimbuta. w19.05 14 § 1-2