Aprili

Keti nge ke kutana ti diambu mosi ya mpasi kibeni? Mbala ya nkaka mpangi mosi na dibundu me sala diambu yina me pesa nge mpasi. (Yak. 3:2) To mbala ya nkaka bantu yina nge ke salaka ti bo to bana ya nzo-nkanda ke seka nge sambu nge kele Mbangi ya Yehowa. (1 Pie. 4:3, 4) To bantu ya dibuta na nge ke sosa kukanga nge nzila ya kukwenda na balukutakanu to bo ke kanga nge nzila ya kusonga bantu ya nkaka balukwikilu na nge. (Mat. 10:35, 36) Kana mambu yango ke pesa nge mpasi mingi, yo lenda pusa nge na kuyambula kusadila Yehowa. Kansi nge fwete ndima nde ata nge ke kutana ti mpasi ya nki mutindu, Yehowa ta pesa nge mayele yina ta sadisa nge na kubaka balukanu ya mbote mpi ngolo ya kukangila yo ntima. Yehowa me salaka nde bo sonika na Ndinga na yandi masolo ya ke monisa mutindu bantu ya kukonda kukuka kangaka ntima na bampasi. Sambu na nki? Sambu beto baka malongi na bambandu na bo. Yina ngindu ya Yehowa songaka ntumwa Polo na kusonika. Kana beto ke tanga masolo yina, yo ta pesa beto kikesa mpi kivuvu. Sambu na kubakila yo mambote, beto fwete suka kaka ve na kutanga Biblia kansi beto fwete sala mpi mambu ya nkaka. Beto fwete bika nde mambu yina beto ke tanga na Biblia kusoba mutindu na beto ya kuyindula mpi kusimba bantima na beto. w21.03 14 § 1-2

Keti nge ke monaka bantu yina nge ke longaka nsangu ya mbote bonso bambuma ya bilanga yina me yela mpi ntangu ya kukatula yo me lunga? Kana mpidina, yo ta lomba nde nge sala mambu tatu: Ya ntete, nge fwete samuna ti ngindu nde kisalu yango fwete salama nswalu. Sambu nsungi ya kukatula bima na bilanga ke vandaka nkufi, nge fwete kudipesa na kukatula bima na bilanga kansi ve na mambu ya nkaka. Ya zole, nge fwete vanda na kiese ntangu nge ke mona bantu ke ndima nsangu ya mbote. Biblia ke tuba nde: “Bantu ke sepelaka na ntangu ya kukatula bima na bilanga.” (Yez. 9:3) Ya tatu, nge fwete ndima nde konso muntu yina nge ke solula ti yandi, lenda kuma longoki ya Yezu. Yo ta sadisa nge na kuwakanisa malongi na nge ti bampusa na yandi. Ziku balongoki ya Yezu yindulaka nde bantu ya Samaria ta ndima ve nsangu ya mbote kansi Yezu yindulaka ve mutindu yina ata fioti. Yandi vandaka kundima nde bo lenda kuma balongoki na yandi. Ntangu beto ke solula ti bantu, beto fwete ndima mpi nde bo lenda kuma balongoki ya Kristu. Ntumwa Polo bikilaka beto mbandu ya mbote na diambu yai. Yandi zabaka balukwikilu ya bantu yina yandi vandaka kulonga, bampusa na bo, mpi yandi ndimaka nde bo ta kuma balongoki ya Yezu. w20.04 8-9 § 3-4

Na kisika ya kuyindudila muntu mambu ya mbi sambu na kima mosi yina yandi me sala, sala bikesa ya kubakisa yandi. Yehowa mpamba muntu ke bakisaka beto mbote kuluta. Yo yina, lomba yandi na kusadisa nge na kutadila bantu ya nkaka mutindu yandi ke tadilaka bo mpi na kuzaba mutindu ya kuditula na kisika na bo. Kuvanda ve ti kikalulu ya kupona bantu yina nge fwete kuditula na kisika na bo; sambu bo yonso ke kutana ti bampasi bonso Yonasi, Eliya, Agare mpi Loti. Mingi na kati na bo salaka bifu yina natilaka bo bampasi. Ya masonga, beto yonso mpi me salaka dezia diambu mosi yina natilaka beto mpasi. Yo yina Yehowa ke lomba beto na kuvanda ti kikalulu ya kuditula na kisika ya bantu ya nkaka. (1 Pie. 3:8) Kana beto ke sadila ndongisila yai ya Yehowa, beto ta kumisa diaka ngolo bumosi ya dibuta na beto ya ntoto ya mvimba. Yo yina, sambu na kuzinga mbote ti bampangi, beto fwete vanda ti kikalulu ya kuwidikila bo, kubakisa bo mpi kuditula na kisika na bo. w20.04 18-19 § 15-17

Yezu pesaka beto mbandu ya mbote na yina me tala kulemfukila Yehowa. Yo yina, beto fwete landa mbote-mbote mbandu ya Yezu sambu na kulemfukila Yehowa. (Yoa. 8:29) Sambu na kulanda kutambula na kieleka, beto fwete ndima nde Yehowa kele Nzambi ya kieleka mpi nde mambu yonso yina yandi ke tubaka na Biblia, Ndinga na yandi kele kieleka. Beto fwete ndima mpi nde Yezu kele Mesia ya lusilu. Bantu mingi bubu yai ke ndimaka ve nde Yehowa me tulaka Yezu, Ntotila ya Kimfumu na yandi. Yoane tubaka nde “bantu mingi ya luvunu” ta kusa bantu yina ta vanda ve ti lukwikilu ya ngolo na Yehowa mpi na Yezu. (2 Yoa. 7-11) Yandi sonikaka nde: “Nani kele muntu ya luvunu, keti yo kele ve muntu yina ke buyaka nde Yezu kele Kristu?” (1 Yoa. 2:22) Kana beto ke longuka Ndinga ya Nzambi, bo ta kusa beto ve ata fioti. Kana beto ke longuka Biblia, beto ta zaba Yehowa mpi Yezu. (Yoa. 17:3) Yo ta sadisa beto na kundima kibeni nde beto kele na kieleka. w20.07 21 § 4-5

Beto ta buya kuvanda ‘kima ya ke budisaka sakuba’ sambu na bampangi ya ke baka ntinu kana beto ke ndima bangindu na bo na kisika ya kuzola nde mambu kusalama kaka mutindu beto ke zola. (Bar. 14:19-21; 1 Bak. 8:9, 13) Na nzila ya luzingu, beto ke bakaka ve ntinu bonso bantu ya nsi-ntoto yina ke salaka nsaka ya kubaka ntinu, konso muntu ke salaka bikesa sambu na kuluta bankaka mpi kubaka lufutu yandi mosi. Bantu yai ke yindulaka kaka mambote na bo mosi. Yo yina muntu mosi lenda pusa to kuyina bantu ya nkaka yina ke baka ntinu ti yandi sambu yandi baka kisika ya ntete. Kansi beto ke tesanaka ve ti bampangi na beto yina ke baka ntinu. (Bag. 5:26; 6:4) Lukanu na beto kele ya kusadisa bantu mingi na kukuma na ndilu ya nsuka sambu beto yonso kubaka lufutu ya luzingu. Yo yina, beto ke salaka bikesa ya kuzitisa ndongisila yai ya Biblia: “Beno sosa kaka ve mambote na beno mosi, kansi mpi mambote ya bantu ya nkaka.” (Bafil. 2:4) Na ntinu na beto ya Bakristu, Yehowa me silaka bantu yina ta manisa kubaka ntinu, lufutu ya kuluta nene disongidila luzingu ya mvula na mvula na zulu to na ntoto yina ta kuma paladisu. w20.04 28 § 10; 29 § 12

Bakristu mingi ya babakala mpi ya bankento ta guluka mpi bo ta kota na ntoto ya mpa. Bantu yina ta guluka ta mona mutindu bantu mingi ya nkaka ta nunga lufwa disongidila, bamilio ya bantu yina me fwaka ta futumuka. Bantu ta vanda na kiese ya mingi ntangu mambu yai ta salama. (Bis. 24:15) Diaka, bantu yonso yina ta bikala ya kwikama na Yehowa ta nunga lufwa yina beto me bakaka na Adami. Bo ta zinga mvula na mvula. Beto yonso ya ke zinga bubu yai fwete monisa ntonda sambu na bangogo ya lufutumuku ya ke pesa kikesa, yina Polo sonikilaka Bakorinto. Beto kele ti bikuma ya mbote ya kundima ndongisila ya Polo ya kudipesa mingi “na kisalu ya Mfumu.” (1 Bak. 15:58) Kana beto ke sala kisalu yango na kwikama mpi na kikesa yonso, beto ta vanda na kati ya bantu yina ta vanda ti luzingu ya kiese na bilumbu ke kwisa. Luzingu yina ya kiese me luta konso kima yina beto lenda vanda ti yo. Kana beto sala mpidina, beto ta bakisa nde kisalu ya ngolo yina beto ke sadila Mfumu kele ve ya mpamba. w20.12 13 § 16-17

Kana mambu yina kele na Ezekiele 38:10-23; Daniele 2:43-45; 11:44–12:1 mpi Kusonga 16:13-16, 21 ta salama na nsungi mosi, beto fwete vingila nde mambu yai ya me landa ta salama. Ntangu fioti na nima ya luyantiku ya mpasi ya nene, “bantotila ya ntoto ya mvimba” ta vukisa makanda. (Kus. 16:13, 14) Biblia ke binga kimvuka yina ya bantu “Gogi ya insi ya Magogi.” (Ezek. 38:2) Kimvuka yai ya bantu ya makanda ta bangika bansadi ya Nzambi ti ngindu ya kumanisa bo yonso. Ntangu Yoane tubilaka nsungi yai, yandi monaka mvula ya ngolo ya matadi ya nene yina ke bwa na bambeni ya Nzambi. Mvula ya matadi yina ya kifwani lenda vanda nsangu ya ngolo ya lusambisu yina bansadi ya Yehowa ta longa. Yo ta pusa “Gogi ya insi ya Magogi” na kunwanisa bansadi ya Nzambi sambu na kumanisa bo yonso na zulu ya ntoto.—Kus. 16:21. w20.05 15 § 13-14

Mpeve santu ya Nzambi kele dikabu yina beto fwete baka na mbalu mingi. Beto ta monisa ntonda ya mingi sambu na dikabu ya mpeve santu kana beto ke yindula mambu yina mpeve santu ke sala. Na ntwala nde Yezu kuvutuka na zulu, yandi songaka balongoki na yandi nde: “Beno ta baka ngolo ntangu mpeve santu ta kwisa na zulu na beno, mpi beno ta vanda bambangi na mono . . . tii na kisika ya kuluta ntama ya ntoto.” (Bis. 1:8) Na lusadisu ya mpeve santu bantu kuluta bamilio 8 ti ndambu na ntoto ya mvimba me kumaka bansadi ya Yehowa. Beto yonso ke sepelaka kuvanda na bumosi sambu mpeve santu ya Nzambi ke sadisaka beto na kuyedisa bikalulu ya mbote bonso zola, kiese, ngemba, ntima-nda, ntima-mbote, bumbote, lukwikilu, mawete mpi kudiyala. Bikalulu yai kele “mbuma ya mpeve.” (Bag. 5:22, 23) Mpeve santu kele kibeni dikabu mosi ya kuluta mfunu. w20.05 28 § 10; 29 § 13

Beto kele ti bikuma mingi ya ke pusa beto na kundima nde bantu yina ta yamba bampangi na bo yina ta futumuka ta zaba bo. Mu mbandu, balufutumuku yina salamaka na ntangu ya ntama ke monisa nde Yehowa ta futumuna bantu mutindu bo vandaka, mutindu bo vandaka kutuba mpi mutindu bo vandaka kuyindula ntangu fioti na ntwala nde bo fwa. Kuvila ve nde Yezu fwanisaka lufwa ti mpongi mpi lufutumuku ti kutelama na mpongi. (Mat. 9:18, 24; Yoa. 11:11-13) Ntangu bantu ke telemaka na mpongi, bo ke sobaka ve. Beto baka mbandu ya Lazare. Ntangu yandi fwaka, bilumbu iya lutaka mpi nitu na yandi yantikaka kubeba. Kansi, ntangu Yezu futumunaka yandi, mbala mosi bampangi na yandi zabaka yandi mpi Lazare zabaka bampangi na yandi.—Yoa. 11:38-44; 12:1, 2. w20.08 14 § 3; 16 § 8

Nzambi ke zolaka Bakristu yina bo me tulaka mafuta mpi mameme ya nkaka kiteso mosi. Bo yonso kele mfunu mingi na meso na yandi. Yandi futaka ntalu mosi, disongidila luzingu ya Mwana na yandi yina yandi ke zolaka mingi sambu na kusumba Bakristu yina bo me tulaka mafuta mpi mameme ya nkaka. Kivuvu ya Bakristu yina bo me tulaka mafuta me swaswana ti ya mameme ya nkaka. Ata mpidina, bo yonso fwete bikala ya kwikama na Nzambi mpi na Kristu. (Nk. 31:23) Kuvila ve nde Yehowa ke pesaka konso muntu mpeve santu na kutadila mpusa ya konso muntu. Yehowa me pesaka bansadi na yandi yonso yina me kudipesaka na yandi kivuvu mosi ya kitoko sambu na bilumbu ke kwisa. (Yer. 29:11) Nkinsi ya Kuyibuka Lufwa ya Yezu ke pesaka beto yonso dibaku ya nene ya kukumisa Nzambi mpi Kristu sambu na mambu yina bo me salaka sambu na beto sambu beto baka luzingu ya kukonda nsuka. Ya kieleka, nkinsi ya Kuyibuka Lufwa ya Yezu kele lukutakanu mosi ya kuluta mfunu yina Bakristu ya kieleka ke salaka konso mvula. w21.01 18 § 16; 19 § 19

Bantu mingi yina ke vukanaka na nkinsi ya kuyibuka lufwa ya Mfumu Yezu kele ti kivuvu ya kuzinga na ntoto. Ebuna, sambu na nki bo ke vukanaka na Madia ya Nkokila ya Mfumu? Bo ke vukanaka bonso bantu yina ke kwenda na feti ya makwela ya nduku na bo. Bantu yina ke kwendaka na feti ya makwela sambu na kumonisa bankwelani nde bo ke zolaka bo mpi bo ke zola kusadisa bo. Mutindu mosi, mameme ya nkaka ke vukanaka na nkinsi ya Kuyibuka Lufwa ya Yezu sambu na kumonisa nde bo ke zolaka Yezu ti Bakristu yina bo me tulaka mafuta mpi bo ke zola kusadisa bo. Diaka mameme ya nkaka ke vukanaka na nkinsi yina sambu na kumonisa ntonda sambu na kimenga ya Yezu, yina me salaka nde bo kuma ti kivuvu ya kuzinga mvula na mvula awa na ntoto. Mameme ya nkaka ke vukanaka diaka na nkinsi ya Kuyibuka Lufwa ya Yezu sambu na kulemfuka na nsiku ya Yezu. Yo kele kikuma ya nkaka ya mfunu. Mbala ya ntete yina Yezu diaka Madia ya Nkokila ya Mfumu ti bantumwa na yandi ya kwikama, yandi songaka bo nde: “Beno landa kusala yo sambu na kuyibuka mono.” (1 Bak. 11:23-26) Yo yina mameme ya nkaka ke landaka kuvukana na Madia ya Nkokila ya Mfumu ti Bakristu ya nkaka yina bo me tulaka mafuta yina kele awa na ntoto. Mameme ya nkaka ke bingisaka bantu na kuvukana ti bo na nkinsi ya Kuyibuka Lufwa ya Yezu. w21.01 17-18 § 13-14

Mbala mingi beto ke yindulaka nde sambu na kumonisila bantu zola, beto fwete tubila bo kaka mambu ya mbote. Kansi zola ya kieleka ke monanaka mpi na bisalu. (Tala mpi Yakobo 2:17, 26.) Mu mbandu, Yehowa ke zolaka beto. (1 Yoa. 4:19) Yandi ke monisilaka beto zola na yandi na mambu ya kitoko yina kele na Biblia. (Nk. 25:10; Bar. 8:38, 39) Beto ke ndima nde Yehowa ke monisaka nde yandi ke zolaka beto na mambu yina yandi ke tubaka mpi yina yandi ke salaka. Yehowa pesaka nzila nde Mwana na yandi yina yandi ke zolaka kuniokwama mpi kufwa sambu na beto. (Yoa. 3:16) Yo ke ndimisa beto kibeni nde Yehowa ke zolaka beto. Beto ke lemfukilaka Yehowa mpi Yezu sambu na kumonisa nde beto ke zolaka bo. (Yoa. 14:15; 1 Yoa. 5:3) Yezu pesaka beto nsiku ya kuzolana. (Yoa. 13:34, 35) Beto fwete monisila ve bampangi na beto zola kaka na munoko, kansi beto fwete monisila bo mpi zola na mambu yina beto ke sala.—1 Yoa. 3:18. w21.01 9 § 6; 10 § 8

Bampangi yina Nzambi me tulaka mafuta na mpeve santu ta zinga ti Yezu mvula na mvula, bo ta yala ti yandi na Kimfumu ya Nzambi. Bo ta zinga kibeni ti Kristu, yo ke tendula nde bo ta mona yandi, ta solula ti yandi mpi bo ta lutisa ntangu kumosi. (Yoa. 14:2, 3) Sambu na bantu yina ta zinga na ntoto, Yezu ta monisila bo zola mpi ta tudila bo dikebi. Ata bo ta mona ve Yezu, ntangu bo ta zinga luzingu ya kiese yina Yehowa mpi Yezu ta yidikila bo, kinduku na bo ti Yezu ta kuma diaka ngolo. (Yez. 9:6, 7) Kana beto ke ndima kukuma banduku ya Yezu mutindu yandi ke lomba beto, beto ta baka mambote mingi. Mu mbandu banda bubu, yandi ta monisila beto zola mpi ta sadisa beto. Beto ta zinga mvula na mvula. Diambu ya kuluta mfunu kele nde kinduku na beto ti Yezu ta pesa beto kima mosi ya mbalu mingi; beto ta kuma banduku ya ngolo ya Yehowa, Tata ya Yezu. Ya kieleka, kuvanda nduku ya Yezu kele dibaku ya kuluta nene. w20.04 25 § 15-16

Ntumwa Polo sonikaka mukanda na yandi sambu na Bakristu ya Korinto yina bo me tulaka mafuta, yina ta futumuka sambu na kukwenda na zulu. Nzambi me ‘santisaka Bakristu yai na bumosi ti Kristu Yezu mpi me bingaka bo na kuvanda basantu.’ Polo tubilaka “bantu yina me fwaka na bumosi ti Kristu.” (1 Bak. 1:2; 15:18; 2 Bak. 5:17) Na mukanda ya nkaka, Polo tubaka nde bantu yina “me vukana ti [Yezu] na kifwani ya lufwa na yandi” ta ‘vukana mpi ti yandi na kifwani ya lufutumuku na yandi.’ (Bar. 6:3-5) Yezu futumukaka ti nitu ya kimpeve mpi kwendaka na zulu. Yo ta vanda mpi mutindu mosi sambu na bantu yonso yina kele “na bumosi ti Kristu,” disongidila Bakristu yonso yina bo me tulaka mafuta. Polo sonikaka nde Kristu ‘kele mbuma ya ntete yina futumukaka na bantu yina me fwaka.’ (1 Bak. 15:20) Kuvila ve nde bantu ya nkaka, mu mbandu Lazare futumukaka mpi zingaka diaka na ntoto. Kansi, Yezu kele muntu ya ntete yina futumukaka ti nitu ya kimpeve mpi bakaka luzingu ya kukonda nsuka. w20.12 5-6 § 15-16

Bakristu yina bo me tulaka mafuta yina ke fwa bubu yai ke futumukaka mbala mosi sambu na kukwenda na zulu. Ntumwa Polo me tendula kieleka yai na 1 Bakorinto 15:51, 52 nde: “Beto yonso ta fwa ve, kansi beto yonso ta soba, na mbala mosi, na kubweta ya disu, na mpungi ya nsuka.” Mambu yai Polo tubaka ke na kulungana bubu yai. Ntangu bampangi ya Kristu ke futumukaka, bo ke kumaka ti kiese ya mingi. Biblia ke monisa kisalu yina bantu yina ta soba “na kubweta ya disu” ta kwenda kusala na zulu. Yezu zabisaka bo nde: “Muntu yina ta nunga mpi ta landa bisalu na mono tii na nsuka, mono ta pesa yandi kiyeka na zulu ya makanda, mpi yandi ta gungula bantu ti nti ya kibende ebuna bo ta pasuka bonso mabungu ya ntoto, mutindu mono me bakaka kiyeka na Tata na mono.”—Kus. 2:26, 27 w20.12 12 § 14-15

Ntangu Polo ke binga Yezu “mbuma ya ntete,” Ntumwa Polo zolaka kumonisa nde na nima na yandi bantu ya nkaka mpi ta futumuka mpi ta kwenda kuzinga na zulu. Bantumwa mpi bantu ya nkaka yina ke zinga “na bumosi ti Kristu” ta landa yandi na zulu. (1 Bak. 15:18) Na ntangu ya me fwana bo ta futumuka ti nitu ya kimpeve mpi ta kwenda na zulu bonso Yezu. Lufutumuku ya kukwenda na zulu sambu na bantu yina kele “na bumosi ti Kristu,” yantikaka ve ntangu Polo sonikilaka Bakristu ya Korinto. Kansi Polo vandaka kutubila mutindu yo ta salama na bilumbu ke kwisa. Yandi sonikaka nde: “Konso muntu na ndonga na yandi: Kristu mbuma ya ntete, na nima bayina kele bantu ya Kristu na nsungi ya kukala na yandi.” (1 Bak. 15:23; 1 Bate. 4:15, 16) Bubu yai beto ke zinga na nsungi yina Polo bingaka “nsungi ya kukala” ya Kristu. Yo lombaka nde bantumwa mpi Bakristu ya nkaka yina bo me tulaka mafuta, yina me fwaka kuvingila tii na nsungi ya kukala ya Kristu sambu bo baka lufutu na bo ya kukwenda kuzinga na zulu mpi bo ‘vukana ti Yezu na kifwani ya lufutumuku na yandi.’—Bar. 6:5. w20.12 5 § 12; 6 § 16-1

Ntumwa Polo vandaka kutubila bantu yina ta futumuka ti nitu ya kukwenda kuzinga na zulu, disongidila bantu ya ke futumukaka ti “nitu ya kimpeve.” (1 Bak. 15:43, 44) Ntangu Yezu vandaka na ntoto, yandi vandaka ti nitu ya kinsuni. Kansi ntangu yandi futumukaka, yandi “kumaka mpeve yina ke pesaka luzingu” mpi yandi vutukaka na zulu. Bakristu yina bo me tulaka mafuta mpi ta futumuka ti nitu ya kimpeve. Polo tendulaka nde: “Mutindu beto me fwanana ti muntu yina bo salaka na putulu, beto ta fwanana mpi ti muntu yina katukaka na zulu.” (1 Bak. 15:45-49) Yo kele mfunu na kuzaba nde Yezu futumukaka ve ti nitu ya kinsuni. Polo monisaka nde “nsuni mpi menga lenda baka ve Kimfumu ya Nzambi” na zulu. (1 Bak. 15:50) Ntangu bantumwa mpi Bakristu ya nkaka yina bo me tulaka mafuta ke futumuka sambu na kukwenda na zulu, bo ke kwendaka ve ti nitu ya kinsuni ya kele ti menga mpi ya ke polaka. w20.12 10-11 § 10-12

Nzambi twadisaka balongoki ya nkaka ya Yezu na mvu-nkama ya ntete na kusonika mambu ya me tala kivuvu ya zulu. Ntumwa Yoane sonikaka nde: “Ntangu yai beto kele bana ya Nzambi, kansi mutindu beto ta vanda me monana ntete ve. Beto me zaba nde ntangu yandi ta monana, beto ta vanda bonso yandi.” (1 Yoa. 3:2) Yo yina Bakristu yina bo me tulaka mafuta ke zabaka ve mutindu bo ta vanda na nima ya lufutumuku ntangu bo ta kwenda na zulu mpi ta kuma ti nitu ya kimpeve. Kansi, bo ta mona kibeni Yehowa ntangu bo ta baka lufutu na bo. Biblia ke tubila ve mambu yonso ya me tala lufutumuku ya bantu yina ta kwenda na zulu. Kansi ntumwa Polo tubilaka mambu ya nkaka ya me tala lufutumuku ya bantu yina ta zinga na zulu. Bakristu yina bo me tulaka mafuta, ta vanda ti Yezu ntangu yandi ta kwisa ‘kufwa baluyalu yonso mpi biyeka yonso mpi ngolo,’ mpi ntangu yandi ta katula “lufwa, mbeni ya nsuka.” Nsuka-nsuka, Yezu ti bantu yina ta yala ti yandi, ta kuditula na nsi ya Yehowa mpi ta vutudila yandi bima yonso. (1 Bak. 15:24-28) Yo ta vanda ntangu mosi ya kiese kibeni! w20.12 8 § 2

Bakristu ya kwikama yina ta kwenda ve kuzinga ti Kristu na zulu kele mpi ti kivuvu ya lufutumuku. Biblia ke tuba nde ntumwa Polo mpi bantu ya nkaka yina ta kwenda kuzinga na zulu ta baka “lufutumuku ya ntete na bafwa.” (Bafil. 3:11) Yo ke monisa nde lufutumuku ya nkaka ta vanda. Yo ke wakana ti mambu yina Yobi tubaka sambu na kivuvu na yandi na bilumbu ke kwisa. (Yobi 14:15) “Bayina kele bantu ya Kristu na nsungi ya kukala na yandi” ta vanda ti Yezu na zulu ntangu yandi ta kwisa kufwa baluyalu yonso, biyeka yonso mpi ngolo. Nkutu yandi ta katula “lufwa, mbeni ya nsuka.” Lufwa yina bantu me bakaka na Adami ta vanda diaka ve ti kiyeka na bantu yina ta kwenda kuzinga na zulu. (1 Bak. 15:23-26) Bantu yina kele ti kivuvu ya kuzinga na ntoto ke baka kikesa na bangogo ya ntumwa Polo ya kele na verse ya bubu. Yo kele pwelele nde bantu ya kukonda lunungu ta kwenda ve na zulu, yo yina mambu yai ya Polo tubaka kele sambu na bantu yina ta futumuka sambu na kuzinga awa na ntoto. w20.12 6-7 § 18-19

Beto lenda kudiyula nde, ‘Inki lenda ndimisa mono kibeni nde Yehowa me lolula mono?’ Kana nge kudiyula ngiufula yai, yo ke monisa nde Yehowa lenda lolula nge. Bamvula mingi me luta, Nzozulu ya Nkengi mosi tubaka nde: “Beto lenda landa kuvutukila kifu mosi mbala na mbala. Yo lenda vanda mpasi nde beto yambula kifu yina beto vandaka ti yo na ntwala ya kusadila Yehowa. . . . Kuyindula ve nde nge me sala disumu yina Yehowa lenda lolula ve. Satana ke zolaka nde beto yindula mutindu yina. Kieleka kele nde kana nge me sala kifu yina, nge ke waka mpasi mpi yo ke pesaka nge makasi. Yo ke monisa nde nge kele ve muntu ya mbi mpi nde Yehowa lenda lolula nge. Vanda ti kikalulu ya kudikulumusa mpi landa kusamba Yehowa sambu yandi lolula nge. Yandi ta sadisa nge na kukuma diaka ti kansansa ya bunkete mpi ta sadisa nge na kuyambula kusala diambu yina ya mbi. Na ntwala nde ntumwa Polo kukuma Mukristu, yandi salaka masumu mingi ya nene. Polo yibukaka mambu yina yandi salaka. (1 Tim. 1:12-15) Yandi ndimaka nde Yehowa me lolulaka yandi na nzila ya kimenga ya Yezu. Polo bakisaka nde kimenga ya Yezu vandaka dikabu yina Yehowa pesaka sambu na yandi. Yo yina, Polo vandaka kudiyangisa ve kuluta ndilu mpi yandi tulaka dikebi na yandi na kisalu ya Yehowa. w20.11 27 § 14; 29 § 17

Satana ke tudilaka beto mitambu mingi sambu beto sala mambu ya mbi. Inki beto fwete sala? Bangindu na beto lenda pusa beto na kumona nde mambu yango kele kibeni mbi ve. Mu mbandu beto lenda tuba nde: ‘Bo lenda basisa ve muntu na dibundu sambu na diambu yai, disongidila nde yo kele ve mbi, yo kele ve disumu ya nene.’ Bangindu ya mutindu yai kele mbi. Yo kele mbote nde beto kudiyula bangiufula bonso: ‘Keti yai kele ve mutambu ya Satana sambu na kukabula ntima na mono? Keti kulanda bampusa yai ya mbi ta fingisa ve zina ya Yehowa? Keti diambu yai ta sadisa mono na kukumisa ngolo kinduku na mono ti Nzambi to yo ta bebisa yo?’ Beto fwete yindula bangiufula yai. Samba sambu Yehowa kupesa nge mayele sambu nge pesa mvutu ya masonga na bangiufula yai kukonda nsoni. Kana nge sala mutindu yai, nge ta kuditanina. Yo ta sadisa nge na kutelemina ngolo mitambu ya Satana mutindu Yezu salaka yo ntangu yandi tubilaka Satana nde: “Katuka awa, Satana!” (Mat. 4:10) Yibuka ntangu yonso nde yo kele mbote ve na kuvanda ti ntima ya kukabwana. w20.06 12-13 § 16-17

Beto ke lemfukilaka minsiku ya Yehowa na kudikulumusa yonso sambu beto ke zaba nde Yehowa ke zabaka ntangu yonso mambu ya kuluta mbote sambu na beto. (Baef. 4:22-24) Kudikulumusa ke pusaka beto na kusala luzolo ya Yehowa na kisika ya kusala luzolo na beto. Yo ke sadisaka beto mpi na kumona nde bantu ya nkaka me luta beto. Yo yina, beto ke kumaka banduku ya ngolo ya Yehowa mpi ya bampangi na beto. (Bafil. 2:3) Kana beto keba ve, nsi-ntoto ya Satana lenda kumisa beto bantu ya lulendo mpi ya bwimi. Yo ke monana nde bampangi ya nkaka ya mvu-nkama ya ntete vandaka mpi na kigonsa ya mutindu yai, yo yina ntumwa Polo sonikilaka Bakristu ya Roma nde: “Mono ke zabisa konso muntu na kati na beno na kuyindula ve nde yandi kele mfunu kuluta mutindu yandi kele, kansi na kuyindula na mutindu yina ke monisa nde yandi kele ti mabanza ya mbote.” Polo zabaka nde beto ke zolaka nde bantu kuzitisa beto. Kansi, kudikulumusa ta sadisa beto na kuvanda ti bukati-kati mpi na kuyindula ve nde beto kele mfunu kuluta bantu ya nkaka. w20.07 2 § 1-2

Nsuka-nsuka na bilumbu ya ntotila Aza bilumbu ya ngemba manaka. Kimvuka mosi ya basoda ya ngolo, milio mosi katukaka na Etiopia. Zera, mfumu ya kimvuka yango, vandaka ti kivuvu nde yandi ti basoda na yandi ta nunga Yuda. Kansi ntotila Aza tulaka ve ntima na basoda na yandi, yandi tulaka ntima na Yehowa Nzambi na yandi. Yandi sambaka nde: “Sadisa beto, O Yehowa Nzambi na beto, sambu beto ke tula ntima na nge, mpi beto me kwisa kunwanisa kimvuka yai ya bantu na zina na nge.” (2 Bans. 14:11) Ata basoda ya Etiopia vandaka mingi kibeni kuluta basoda ya Aza, Aza zabaka nde Yehowa kele ngolo mingi mpi yandi ta sadisa bantu na yandi. Yehowa sadisaka bantu na yandi. Ata basoda ya Etiopia vandaka mingi, bo nungaka ve. (2 Bans. 14:8-13) Ata beto me zaba ve mambu yonso yina ta kumina konso muntu na kati na beto na bilumbu ke kwisa, beto ke zaba nde ntangu yonso ya ngemba yina Bambangi ya Yehowa kele na yo ta mana. Beto fwete vila ve nde, Yezu tubaka nde na bilumbu ya nsuka “makanda yonso ta menga” balongoki na yandi.—Mat. 24:9. w20.09 17-18 § 14-16

Ata muntu mosi ve ke zolaka nde bo finga yandi. Kansi, kana bambeni kufinga beto mpi beto kudiyangisa mingi kibeni sambu na mambu yina bo ke tuba, yo lenda lembisa beto nitu. (Bing. 24:10) Ebuna nki beto fwete sala kana bambeni ke finga beto? Bonso ntumwa Polo, beto lenda ‘mona kiese na mafingu.’ Sambu na nki? Sambu kana bantu ke finga beto mpi ke niokula beto, yo ke monisaka kibeni nde beto kele balongoki ya kieleka ya Yezu. (1 Pie. 4:14) Yezu tubaka nde bo ta niokula balongoki na yandi. (Yoa. 15:18-20) Mambu yai kuminaka mpi Bakristu ya mvu-nkama ya ntete. Bantu yina vandaka kulanda bikalulu ya Bagreki vandaka kumona Bakristu bonso bantu ya kukonda mayele mpi ya kukonda ngolo. Sambu na Bayuda, Bakristu vandaka bantu yina “me longukaka ve mpi ya mpamba-mpamba,” mu mbandu ntumwa Piere mpi Yoane. (Bis. 4:13) Bantu vandaka kuyindula nde Bakristu vandaka ngolo ve, bo vandaka ve na lutaninu sambu bo vandaka ve kukota na mambu ya politiki mpi bo vandaka ve kukuma basoda mpi bantu vandaka kumenga bo. Bakristu ya mvu-nkama ya ntete bikaka ve nde bangindu ya mbi ya bambeni kulembisa bo. w20.07 14-15 § 3-4

Ntumwa Yoane vandaka kuzola mingi bampangi mpi yandi vandaka kudiyangisa sambu na kimpeve na bo. Yo ke monana pwelele na bandongisila yina yandi pesaka na mikanda tatu yina yandi sonikaka na nsadisa ya mpeve santu. Yo ke pesa kibeni kikesa na kuzaba nde bampangi ya babakala mpi ya bankento yina ta yala ti Yezu na zulu ke vandaka mpi na zola, ke tudilaka bankaka dikebi bonso Yoane. (1 Yoa. 2:27) Beto sadila bandongisila yina yandi pesaka. Beto baka lukanu ya kutambula na kieleka mpi ya kulemfukila Yehowa na mambu yonso ya luzingu na beto. Beto longuka Ndinga na yandi mpi beto tudila yo ntima. Beto vanda ti lukwikilu ya ngolo na Yezu. Beto landa ve bangindu ya mbi ya bantu mpi beto buya malongi ya baaposta. Beto sala mpi ve mambu ya mbi na kinsweki, beto kuma ve bantu ya ke sala masumu. Beto zitisa bansiku ya bikalulu ya nene ya Yehowa. Beto ta sadisa bampangi na kuvanda ti lukwikilu ya ngolo, ntangu beto ke lolula bampangi yina me sala beto mbi mpi ke sadisa bayina kele na mpasi. Kana beto sala mutindu yina, ata beto ke kutana ti bampasi, beto ta landa kutambula na kieleka. w20.07 24-25 § 15-17

Yehowa ke zolaka nde bansadi na yandi yonso ya kwikama kuvanda mfunu na dibundu na yandi. Ata beto yonso ke salaka ve kisalu ya kiteso mosi, beto kele mfunu mpi beto yonso ke vandaka ti mfunu ya bampangi ya nkaka. Ntumwa Polo monisaka pwelele nde ata muntu mosi ve lenda songa muntu ya nkaka nde: “Mono kele na mfunu na nge ve.” (1 Bak. 12:21) Kana beto ke zola nde ngemba kuvanda na dibundu, beto fwete mona mfunu ya bampangi ya nkaka mpi kusala ti bo na bumosi. (Baef. 4:16) Kana beto ke sala ti bampangi na bumosi, konso muntu ta bakisa nde bo ke zolaka yandi mpi bampangi yonso na dibundu ta baka kikesa. Bo ke ponaka bankuluntu yonso na dibundu na nzila ya mpeve santu ya Yehowa. Kansi, konso nkuluntu kele na dikabu na yandi. (1 Bak. 12:17) Yo lenda vanda nde bankaka me kuma bankuluntu ntama mingi ve mpi bo ke zaba ve mambu mingi. Bankaka lenda kuka ve kusala mambu mingi, sambu bo me kuma minunu to sambu bo ke belaka. Ata mpidina, nkuluntu mosi ve fwete songa nkuluntu ya nkaka nde: “Mono kele na mfunu na nge ve.” Bankuluntu yonso fwete sadila ndongisila ya Polo ya kele na Baroma 12:10. w20.08 26 § 1-2; 27 § 4

Yehowa ke twadisa beto na nzila yina ke nata na luzingu na nsadisa ya kitini ya organizasio na yandi ya ntoto. Ntembe kele ve nde, ntangu dibundu ya Yehowa ke pesaka beto ntendula ya mpa ya dilongi mosi ya Biblia to ke pesaka beto lutwadisu na mambu ya me tala bikalulu ya mbote, beto ke ndimaka yo na kiese yonso mpi ke sadilaka yo. Kansi nki beto ke salaka kana dibundu ya Yehowa me sala nsoba ya nkaka mu mbandu me teka Nzo ya Kimfumu yina beno ke sadilaka? Beto ta tanina kiese na beto kana beto ke yibuka nde kisalu yonso yina beto ke salaka kele sambu na Yehowa mpi yandi ke twadisa dibundu na yandi. (Bakol. 3:23, 24) Ntotila Davidi pesaka mbandu ya mbote ntangu yandi pesaka mbongo sambu na kutunga tempelo. Yandi tubaka nde: “Mono kele nani mpi bantu na mono kele banani, sambu beto pesa nge makabu ya luzolo ya mbote bonso yai? Sambu bima yonso ke katukaka na nge, mpi beto me pesa nge bima yina me katuka na diboko na nge mosi.” (1 Bans. 29:14) Ntangu beto ke pesaka makabu, beto mpi ke pesaka Yehowa bima yina yandi pesaka beto. Ata mpidina, Yehowa ke sepelaka ti ntangu, ngolo mpi bima yina beto ke pesaka sambu kisalu na yandi kukwenda na ntwala.—2 Bak. 9:7. w20.11 22-23 § 14-16

Sambu na beto Bambangi ya Yehowa, kusamuna mbote ke tendula ve kukumisa bantu mingi Bambangi ya Yehowa. (Luka 8:11-15) Kana beto ke landa kusamuna nsangu ya mbote mpi kulonga bantu ya nkaka, Yehowa ta mona nde beto ke sala kisalu mbote. Sambu na nki? Sambu beto ke lemfukila yandi mpi Mwana na yandi. (Mar. 13:10; Bis. 5:28, 29) Beto fwete sala kisalu ya kusamuna nswalu sambu nsuka ya nsi-ntoto yai me kuma kibeni pene. Ntangu me bikala fioti kibeni sambu na kusala kisalu yai ya kugulusa bantu. Yo yina, kusukinina ve to kuyindula ve nde nge fwete kinga ntangu ya mbote sambu na kusala kisalu yai ya mfunu. Kumisa ngolo nzala na nge ya kusamuna, longuka mambu mingi ya Biblia, vanda kikesa mpi sala bibansa. Samuna ti balobi-bantu kuluta bamilio nana yina kele na ntoto ya mvimba mpi nge ta baka kiese yina Yehowa ke pesaka. (Neh. 8:10; Luka 5:10) Baka lukanu ya kusamuna mingi kibeni tii kuna Yehowa ta tuba nde yo me lunga. w20.09 7 § 18-20

Beto fwete vanda ve ti nzala ya ngolo ya bima mingi ya kinsuni. “Kiyeka ya kimvwama ya ke kusaka” lenda bebisa kinduku na beto ti Yehowa, yo lenda sala nde beto monisa ve ntonda sambu na Ndinga ya Nzambi mpi beto longa yo ve bantu ya nkaka. (Mat. 13:22) Kana beto ke zola kutanina mbote bima yina Yehowa me pesaka beto, beto fwete sala mambu nswalu ntangu beto me kutana ti kigonsa. Beto lenda yindula na ntwala mambu yina beto lenda sala sambu na kuditanina nswalu kana mansoni, mambu ya mubulu, mambu ya baaposta me basika ntangu beto ke sadila Internet to ke tala filme mosi na televizio. Kana beto me yindula yo na ntwala, yo ta sadisa beto na kutina nswalu mambu yina lenda bebisa kimpeve na beto sambu beto bikala bunkete na meso ya Yehowa. (Nk. 101:3; 1 Tim. 4:12) Beto fwete bumba mambu ya mfunu yina Yehowa me pesaka beto disongidila bakieleka ya mfunu ya Biblia mpi dibaku ya kulonga yo na bantu ya nkaka. Kana beto ke sala mutindu yina beto ta vanda ti kansansa ya mbote, luzingu ya mbote mpi beto ta vanda ti kiese ya kusadisa bantu ya nkaka na kuzaba Yehowa. w20.09 30 § 16-19

Keti nge me bakaka mbotika? Kana ee, nge me monisaka na meso ya bantu nde nge ke kwikilaka na Yehowa mpi nge ke zola kusadila yandi na luzolo yonso ti dibundu na yandi. Beto ke mona bikalulu ya mbote ya Yehowa na lukanu na yandi, na bansiku na yandi mpi na mutindu yandi ke twadisa dibundu na yandi bubu yai. Beto tala bikalulu tatu ya Yehowa yina beto ke mona na dibundu na yandi. Ya ntete, “Nzambi ke pona-ponaka ve.” (Bis. 10:34) Zola pusaka Yehowa na kupesa Mwana na yandi bonso ‘nkudulu sambu na bantu yonso.’ (1 Tim. 2:6; Yoa. 3:16) Yehowa ke sadilaka bantu na yandi sambu na kulonga nsangu ya mbote na bantu yonso yina ke zola kuwa yo, yandi ke sadisaka mpi bantu mingi na kubaka mambote na kimenga ya Yezu. Ya zole, Yehowa kele Nzambi ya ndonga mpi ya ngemba. (1 Bak. 14:33, 40) Yo yina, bansadi na yandi fwete sala mambu na ndonga mpi na ngemba. Ya tatu, Yehowa kele “Longi ya Nene.” (Yez. 30:21) Yo yina, bansadi na yandi ke salaka yonso sambu na kulonga malongi yina kele na Biblia, yo vanda na dibundu to na kisalu ya kusamuna. w20.10 20 § 1-3