Avril

Yezu monisaka nde yandi ke zolaka beto mingi mutindu yandi ndimaka na luzolo yonso kupesa luzingu na yandi sambu na beto. (Yoa. 15:13) Beto ta kuka ve ata fioti kufuta Yehowa mpi Yezu sambu na zola yina bo me monisilaka beto. Kansi beto lenda pesa bo mersi na mambu yina beto ke sala konso kilumbu. (Bakol. 3:15) Kimenga ya Yezu kele mfunu mingi sambu na Bakristu yina bo me tulaka mafuta, sambu yo ke pesa bo kivuvu mosi ya mbote kibeni. (Mat. 20:28) Bo ke kwikilaka na kimenga ya Yezu, yo yina Yehowa me ndimaka bo bonso bantu ya lunungu mpi yandi me ndimaka bo bonso bana na yandi. (Bar. 5:1; 8:15-17, 23) Mameme ya nkaka mpi ke pesaka Yehowa mersi sambu na kimenga ya Yezu. Bo ke kwikilaka mpi na kimenga ya Kristu. Yo yina bo kele ti kansansa ya bunkete na ntwala ya Nzambi mpi bo kele ti kivuvu ya kuguluka na mpasi ya nene. (Kus. 7:13-15) Bakristu yina bo me tulaka mafuta mpi mameme ya nkaka ke vukanaka konso mvula na Nkinsi ya Kuyibuka Lufwa ya Yezu sambu na kupesa mpi Yehowa mersi. w22.01 23 § 14-15

Kima yina pesaka Yezu mpasi mingi kele kikuma yina bo fwilaka yandi. Bo kusilaka yandi nde yandi vandaka kuvweza, disongidila nde yandi vandaka ve kuzitisa Nzambi to zina ya Nzambi. (Mat. 26:64-66) Diambu yina bo kusilaka Yezu yangisaka yandi mingi kibeni mpi yandi ndimaka nde Tata na yandi ta bika ve nde bo pesa yandi nsoni mutindu yina. (Mat. 26:38, 39, 42) Kikuma ya ntete, yo lombaka nde bo tula Yezu na nti sambu bo singa ve Bayuda. (Bag. 3:10) Ata mpidina, bo singaka bo kaka sambu bo silaka nde bo ta lemfukila nsiku ya Nzambi kansi na nima bo lemfukilaka yo ve. Yo yina, yo lombaka nde bo fwa sambu bo vandaka bana ya Adami kansi bo singaka bo mpi kaka. (Bar. 5:12) Nsiku ya Nzambi vandaka kutuba nde, muntu yina me sala disumu yina ke lomba nde bo fwa yandi, bo fwete fwa yandi. Bo fwete fwa yandi na zulu ya nti. (Kul. 21:22, 23; 27:26) Lufwa ya Yezu na zulu ya nti salaka nde Bayuda kuguluka mpi kimenga na yandi kusadisa bo ata bo buyaka yandi. w21.04 16 § 5-6

Yindula mambu yina Yezu kutanaka ti yo na kilumbu ya nsuka ya luzingu na yandi awa na ntoto. Basoda ya Roma bulaka yandi ngolo kibeni. (Mat. 26:52-54; Yoa. 18:3; 19:1) Bo bulaka yandi fimbu mpi yo lwadisaka yandi ngolo kibeni. Na nima, bo tulaka nti mosi ya kilo na mukongo na yandi yina vandaka ti bamputa. Yezu yantikaka kunata nti yina na kisika yina bo zolaka kufwa yandi. Kansi ntangu fioti na nima, basoda ya Roma songaka muntu mosi na kunatila Yezu nti yina. (Mat. 27:32) Ntangu Yezu kumaka na kisika yina bo zolaka kufwa yandi, bo tulaka yandi na nti, bo bulaka yandi minsonso na maboko mpi na makulu. Kizitu ya nitu ya Yezu salaka nde bamputa ya minsonso yina kukanguka. Banduku ya Yezu mpi mama na yandi vandaka kudila kansi bamfumu ya Bayuda vandaka kuseka Yezu. (Luka 23:32-38; Yoa. 19:25) Yezu niokwamaka bangunga mingi. Ntima na yandi mpi bapumo vandaka kusala mbote ve mpi yandi vandaka kupema na mpasi kibeni. Na ntwala nde yandi fwa, yandi salaka kisambu ya nsuka. Na nima, yandi niekisaka ntu mpi fwaka. (Mar. 15:37; Luka 23:46; Yoa. 10: 18; 19:30) Yo vandaka lufwa mosi ya mpasi kibeni mpi ya nsoni! w21.04 16 § 4

Yezu songaka balongoki na yandi 11 yina kangamaka kaka na yandi mambu ya me tala bakuwakana zole. Kuwakana ya mpa mpi kuwakana ya Kimfumu. (Luka 22:20, 28-30) Bakuwakana yina salaka nde, bantumwa yina mpi kimvuka mosi ya fioti ya bantu ya nkaka kukuma bantotila mpi banganga-nzambi na zulu. (Kus. 5:10; 14:1) Kaka Bakristu yina bo me tulaka mafuta, bayina kele awa na ntoto ya kele na bakuwakana yina zole bantu lenda dia dimpa mpi kunwa vinu na Nkinsi ya Kuyibuka Lufwa ya Yezu. Yehowa me pesaka bo kivuvu mosi ya kuyituka, disongidila kivuvu ya kuvanda ti nitu yina ke fwaka ve mpi yina ke polaka ve mpi ya kuzinga na zulu, kivuvu ya kuyala ti Yezu Kristu mpi bantu 144 000 mpi kivuvu ya kuluta yonso kele kivuvu ya kumona Yehowa Nzambi. (1 Bak. 15:51-53; 1 Yoa. 3:2) Bakristu yina bo me tulaka mafuta ke zabaka nde bo fwete landa kusadila Yehowa na mutindu ya mbote tii na lufwa na bo.— 2 Tim. 4:7, 8. w22.01 21 § 4-5

Bantu ya mbi zole vandaka mpi na zulu ya banti ya mpasi na lweka ya Yezu. (Luka 23:40, 41) Mosi na kati na bo balukaka mpi songaka Yezu nde: “Yibuka mono ntangu nge ta kwisa na Kimfumu na nge.” (Luka 23:42) Yezu pesaka muntu yina ya mbi kivuvu yai sambu yandi zabaka nde Tata na yandi ta wila muntu yina mawa. (Nk. 103:8; Baeb. 1:3) Yehowa ke vandaka na mpusa ya ngolo ya kulolula beto mpi ya kuwila beto mawa. Kansi yandi ta sala yo kaka kana beto me wa mpasi sambu na mambu ya mbi yina beto salaka mpi beto kwikila nde yandi lenda lolula beto na nsadisa ya kimenga ya Yezu Kristu. (1 Yoa. 1:7) Bantu ya nkaka lenda yindula nde Yehowa ta lolula bo ve ata fioti. Kana nge ke yindula mutindu yina, yindula diambu yai: Ntangu fioti na ntwala nde Yezu kufwa, yandi wilaka muntu ya mbi yina vandaka na zulu ya nti mawa sambu muntu yango yantikaka kukwikila na yandi. Yo ke monisa kibeni nde Yehowa ke wilaka bansadi na yandi ya kwikama mawa.—Nk. 51:1; 1 Yoa. 2:1, 2. w21.04 9 § 5-6

Mutindu Yezu taninaka kwikama na yandi tii na lufwa, yandi lungisaka mambu mingi. Ya ntete, yandi monisaka nde Satana kele muntu ya luvunu. Yezu monisaka nde muntu ya kukuka lenda tanina kwikama na yandi ata Satana kumeka yandi nki mutindu. Ya zole, Yezu pesaka luzingu na yandi bonso kimenga. Kimenga ya Yezu me salaka nde bantu ya kukonda kukuka kuvanda ti kinduku ya mbote ti Nzambi mpi kuzinga mvula na mvula. Ya tatu, Yezu monisaka nde Yehowa kele Mfumu ya mbote mpi yandi pesaka zina ya Tata na yandi lukumu. Konso kilumbu, beto fwete sala yonso sambu na kubikala ya kwikama. Yo yina, ata kana beto me fwa, beto ta songa Yehowa nde: “Yehowa, mono me sala yonso sambu na kubikala ya kwikama sambu na kumonisa nde Satana kele muntu ya luvunu, sambu na kupesa zina na nge lukumu mpi kumonisa nde nge kele Mfumu ya mbote.” w21.04 12 § 13-14

Bo me funda Yezu kansi yandi me sala ve diambu ya mbi; bo me seka yandi, bo me bula yandi ngolo mpi na nima bo me tula yandi na zulu ya nti ya mpasi. Bo me bula yandi minsonso na maboko mpi na makulu. Yandi ke tuba na mpasi mpi ke pema na mpasi. Kansi yandi fwete tuba sambu yandi kele ti mambu ya mfunu mingi ya kutuba. Beto lenda baka malongi ya mfunu na mambu yina Yezu tubaka na ntwala nde yandi fwa. Beto me longuka nde, beto fwete lolula bantu ya nkaka mpi kundima nde Yehowa ta lolula beto. Beto kele ti dibaku ya mbote ya kuvanda na dibuta ya kimpeve ya bampangi yina ke zolaka kusadisa beto. Kansi kana beto kele ti mfunu ya lusadisu, beto fwete sala yonso sambu na kulomba bo yo. Beto me zaba nde Yehowa ta sadisa beto na kukanga ntima na konso mpasi yina beto ke kutana ti yo. Beto me bakisa nde yo kele mfunu na kubikala ya kwikama konso kilumbu mpi kutula ntima nde ata beto me fwa, Yehowa ta futumuna beto. w21.04 8 § 1; 13 § 17

Kana beto landa bitambi ya Yezu beto ta baka luzingu ya mvula na mvula. Ntangu leke mosi ya mvwama yulaka Yezu mambu yina yandi fwete sala sambu na kubaka luzingu ya mvula na mvula, Yezu songaka yandi nde: “Kwisa kulanda mono.” (Mat. 19:16-21) Yezu songaka Bayuda yina vandaka kukwikila ve nde yandi kele Kristu mambu yai: “Mameme na mono . . . ke landaka mono. Mono ke pesa bo luzingu ya mvula na mvula.” (Yoa. 10:24-29) Beto ke monisaka lukwikilu na Yezu ntangu beto ke sadilaka mambu yina yandi longaka mpi ke salaka mambu yina yandi salaka. Kana beto sala mutindu yai, beto ta bikala na nzila ya luzingu ya mvula na mvula. (Mat. 7:14) Na ntwala ya kulanda bitambi ya Yezu mbote-mbote, beto fwete zaba yandi. Beto fwete landa kusala mambu mingi sambu na ‘kuzaba’ Yezu. Beto fwete landa kulonguka mambu mingi ya me tala yandi. Mu mbandu, bikalulu na yandi ya mbote mpi mutindu na yandi ya kuyindula. Ata beto me salaka bamvula mingi na dibundu ya Yehowa, beto fwete landa ‘kuzaba’ Yehowa mpi Mwana na yandi. w21.04 4 § 9-10

Yo ke monana nde ntumwa Polo waka mpasi kibeni ntangu yandi yindulaka mambu ya mbi yina yandi salaka na ntwala ya kukuma Mukristu. Yo ke yitukisa ve mutindu yandi kudibingaka, “muntu ya ntete” yina salaka disumu. (1 Tim. 1:15) Na ntwala ya kukuma Mukristu, Polo vandaka kuniokula Bakristu na bambanza mingi, yandi vandaka kutula bankaka na boloko mpi yandi ndimaka nde bo fwa Bakristu ya nkaka. (Bis. 26:10, 11) Ntembe kele ve nde Polo zolaka kuwa mpasi mingi kana yandi kutana ti leke mosi ya Mukristu yina bo fwaka bibuti na yandi sambu na Polo. Polo waka mpasi mingi sambu na bifu na yandi ya ntama kansi yandi zabaka nde yandi lendaka kusoba yo ve. Yandi ndimaka nde Kristu fwaka sambu na yandi mpi yandi sonikaka nde: “Sambu na ntima ya mbote ya nene ya Nzambi, mono kele mutindu mono kele.” (1 Bak. 15:3, 10) Inki dilongi beto ke baka? Ndima nde Kristu fwaka sambu na nge mpi pesaka nge dibaku ya kuvanda ti kinduku ya mbote ti Yehowa. (Bis. 3:19) Diambu ya mfunu sambu na Nzambi kele mambu yina beto ke sala bubu yai mpi na bilumbu ke kwisa kansi ve bifu yina beto salaka na bilumbu me luta.—Yez. 1:18. w21.04 23 § 11

Ata Bayuda mingi na bilumbu ya Yezu buyaka kundima nde Mesia fwete fwa, beto tala mambu yina Biblia tubaka: “Yandi pesaka luzingu na yandi tii na lufwa mpi bo tangaka yandi na kati ya bantu ya ke fwaka nsiku; yandi nataka disumu ya bantu mingi, mpi yandi bondilaka sambu na mambu ya mbi ya bantu.” (Yez. 53:12) Yo yina, mutindu bo fundaka Yezu nde yandi salaka diambu mosi ya mbi kibeni mpi mutindu bo fwaka yandi, vandaka ve kikuma yina lendaka kupusa Bayuda na kubuya yandi. Bubu yai, kele ti mambu yina lenda sadisa beto na kulanda kuvanda balongoki ya Yezu. Beto tadila mambu yango. Na Disolo na Zulu ya Ngumba, Yezu songaka balongoki na yandi nde bantu ta ‘kusila bo makambu ya mutindu na mutindu.’ (Mat. 5:11) Satana kele na kisina ya mambu yonso yai ya luvunu. Yandi ke pusa bantu ya mbi na kutuba mambu ya luvunu sambu na balongoki ya Yezu. (Kus. 12:9, 10) Beto fwete buya mambu ya luvunu yina bantu ya mbi ke tubaka sambu na beto. Beto fwete bika ve nde mambu yai ya luvunu kukanga beto nzila ya kusadila Nzambi to yo lembisa lukwikilu na beto. w21.05 11 § 14; 12 § 16

Sadisa longoki ya Biblia na kutudila Yehowa ntima. Yezu songaka balongoki na yandi nde Yehowa ta sadisa bo sambu yandi ke zolaka bo. (Mat. 10:19, 20, 29, 30) Songa longoki nde Yehowa mpi ta sadisa yandi. Nge lenda sadisa yandi na kutudila Yehowa ntima kana nge ke samba ti yandi sambu na balukanu na yandi. Mpangi Franciszek na Pologne ke tuba nde: “Mbala mingi longi na mono vandaka kutubila balukanu na mono ntangu yandi vandaka kusamba. Ntangu mono monaka mutindu Yehowa pesaka mvutu na bisambu ya longi na mono, mbala mosi mono yantikaka kusamba. Mono monaka lusadisu ya Yehowa ntangu mono vandaka ti mfunu ya bilumbu ya konzie sambu na kukwenda na balukutakanu ya dibundu mpi na balukutakanu ya distrike.” Yehowa ke tudilaka balongoki ya Biblia dikebi mingi. Yandi ke sepelaka mutindu yandi ke monaka kisalu ya ngolo yina bansamuni ke salaka sambu na kusadisa bantu na kukwenda pene-pene na yandi mpi yandi ke zolaka bo mingi. (Yez. 52:7) Kana nge me yantika ntete ve kulonguka Biblia ti muntu, nge lenda sadisa balongoki ya Biblia ya bansamuni ya nkaka na kuyela mpi na kubaka mbotika ntangu nge ke kwenda kufidisa bansamuni yango sambu na kulonguka ti bo. w21.06 7 § 17-18

Beto ta monisa nde beto ke sepelaka ti dikabu ya Ndinga ya Nzambi kana beto ke tanga yo mbala na mbala. Beto fwete longuka ve Ndinga ya Nzambi kaka na dibaku mosi buna to kana beto ke mona nde beto kele ti ntangu ya kusala yo. Kana beto ke longuka Biblia mbala na mbala, yo ta sadisa beto na kukumisa lukwikilu na beto ngolo. Beto kele ve bonso “bantu ya mayele ti ya ngangu” ya nsi-ntoto yai sambu lukwikilu na beto me simbama ngolo na Ndinga ya Nzambi. (Mat. 11:25, 26) Ntangu beto ke longukaka Biblia, beto ke bakisaka sambu na nki mambu ya nsi-ntoto yai ke landa kubeba. Beto ke bakisaka mpi mambu yina Yehowa ta sala sambu na kuyidika yo. Yo yina, beto fwete kumisa lukwikilu na beto ngolo mpi kusadisa bantu mingi na kundima nde Nzambi muntu salaka bima yonso. (1 Tim. 2:3, 4) Beto landa kuvingila ntangu yina bantu yonso ya ke zingaka na ntoto ta kumisa Yehowa mpi ta tuba mambu yai ya kele na Kusonga 4:11: “Yehowa Nzambi na beto, nge me fwana na kubaka nkembo . . . sambu nge muntu gangaka bima yonso.” w21.08 19 § 18-20

Bankuluntu kele bangungudi. Bo kele ti mukumba ya kupesa bampangi bandongisila kana yo ke lomba nde bo sala yo. Bo fwete sala bikesa ya kupesa bandongisila yina ta sadisa bampangi, yina ta pesa bo kikesa mpi yina ta “pesa ntima kiese.” (Bing. 27:9) Bankuluntu ke zolaka bampangi-babakala mpi bampangi-bankento ya dibundu. Bantangu ya nkaka, bo ke monisaka zola yina mutindu bo ke pesaka mpangi yina ke zola kusala kifu mosi buna bandongisila. (Bag. 6:1) Kansi na ntwala ya kupesa mpangi ndongisila, yo kele mbote nde nkuluntu kutadila ntete mambu yina ntumwa Polo tubaka na yina me tala zola. Yandi tubaka nde: “Zola kele ntima-nda mpi ntima-mbote. . . . Yo ke fikaka mambu yonso, ke kwikilaka mambu yonso, ke tulaka ntima na mambu yonso, ke kangaka ntima na mambu yonso.” (1 Bak. 13:4, 7) Kana nkuluntu me tadila mbote-mbote baverse yina ya Biblia, yo ta sadisa yandi na kundima nde yandi ta pesa mpangi ndongisila na zola. Kana mpangi yina yandi ke pesa ndongisila me bakisa nde nkuluntu yina ke tudila yandi dikebi, yandi ta ndima na luzolo yonso ndongisila yina yandi me pesa yandi. w22.02 14 § 3; 15 § 5

Ntangu Yehowa gangaka bawanzio mpi bantu, bo vandaka ya kukuka. Kansi na nima Satana (disongidila “Mbeni”) yina vandaka ntete wanzio ya mbote pusaka Adami ti Eva na kukolama na Yehowa. Bawanzio ya nkaka ti bantu ya nkaka kolamaka mpi na Yehowa. (Yude 6) Mambu yai pesaka Yehowa mpasi kibeni. Ata mpidina, Yehowa me kangaka ntima mpi yandi ke landaka kukanga ntima tii ntangu yandi ta fwa bantu yonso yina ke kolamaka na yandi. Yo ta sala nde Yehowa mpi bansadi na yandi ya kwikama kuvanda na kiese sambu bo ta kangaka diaka ve ntima na mambu ya mbi. Yobi vandaka nsadi ya kwikama ya Yehowa mpi Satana kusilaka yandi makambu. Satana tubaka nde Yobi mpi bansadi yonso ya kwikama ya Yehowa ke sadilaka yandi sambu na bikuma ya bwimi. (Yobi 1:8-11; 2:3-5) Diabulu ke landaka kukusila bansadi ya Yehowa makambu tii bubu yai. (Kus. 12:10) Beto ke monisaka nde Satana kele muntu ya luvunu ntangu beto ke kangaka ntima na bampasi mpi ke bikalaka ya kwikama na Yehowa sambu beto ke zolaka yandi. w21.07 9 § 7-8

Ntumwa Polo sadilaka mbandu mosi ya mbote kibeni sambu na kulonga beto nde yo kele mfunu mingi na kusoba bikalulu na beto. Yandi tubaka nde beto fwete tula ‘kimuntu na beto ya ntama’ “na zulu ya nti.” (Bar. 6:6) Disongidila, beto fwete landa mbandu ya Kristu. Beto fwete menga bikalulu mpi mambu yina Yehowa ke mengaka. Beto fwete sala mambu yina sambu na kukuma ti kansansa ya bunkete mpi kivuvu ya kuzinga mvula na mvula. (Yoa. 17:3; 1 Pie. 3:21) Yehowa ta soba ve bansiku na yandi sambu na kusepedisa beto. Beto bantu fwete soba kimuntu na beto mpi kuzitisa bansiku na yandi. (Yez. 1:17, 18; 55:9) Ata na nima ya kubaka mbotika, yo ta lomba nde nge landa kunwanisa banzala ya mbi. Samba Yehowa sambu na kulomba lusadisu na yandi mpi tula ntima na mpeve na yandi kansi na ngolo na nge mosi ve. (Bag. 5:22; Bafil. 4:6) Beto fwete sala bikesa sambu na kukatula kimuntu ya ntama mpi kuvutukila yo diaka ve. w22.03 6 § 15-17

Yehowa ke tuba nde yandi ta pesa beto madia, bilele mpi nzo kana beto ke sosa ntete Kimfumu na yandi mpi kana beto ke lemfukila bansiku na yandi. (Mat. 6:33) Kana beto ke ndima nde Yehowa ta pesa beto bima yai yonso, beto ta yindula ve nde bima ya kinsuni ya nsi-ntoto yai ta tanina beto mpi ta pesa beto kiese yina ta wumela. Beto ke zabaka nde beto ta vanda ti ngemba ya mabanza kaka kana beto ke sala luzolo ya Yehowa. (Bafil. 4:6, 7) Ata beto lenda vanda ti mbongo ya kusumba bima mingi, beto fwete tala kana beto ta vanda kibeni ti ntangu to ngolo ya kusadila bima yina yonso mpi ya kutanina yo. Keti beto ta kangama ngolo na bima na beto ya kinsuni? Kuvila ve nde Nzambi me pesaka beto kisalu na dibuta na yandi. Yo yina beto fwete bika ve nde ata kima mosi kukatula dikebi na beto na kisalu yango. Ya kieleka, beto ke zola ve kuvanda bonso muntu yina buyaka kulanda Yezu sambu yandi kangamaka ngolo na bima na yandi ya kinsuni. Yo salaka nde yandi baka ve dibaku ya kusadila Yehowa mpi ya kukuma mwana na yandi.—Mar. 10:17-22. w21.08 6 § 17

Ntangu nge ke longuka Biblia, nge ta zaba kimuntu ya Yehowa mpi bikalulu na yandi; yo kele bikalulu yina nge longukaka ntangu nge talaka bima yina Yehowa me salaka. Kana beto ke longuka bikalulu ya Yehowa, yo ta sadisa beto na kundima kibeni nde yandi kele. (Kub. 34:6, 7; Nk. 145:8, 9) Kana nge zaba Yehowa mbote, lukwikilu na nge na yandi ta kuma ngolo, nge ta kuma kuzola yandi diaka mingi mpi kinduku na nge ti yandi ta kuma ngolo. Longa bantu ya nkaka mambu yina nge ke kwikilaka na yina me tala Nzambi. Kana muntu mosi yina nge ke longa me yula nge ngiufula sambu na kuzaba kana Nzambi kele to ve mpi nge ke mona nde nge kele ve ti mvutu ya kupesa yandi, nki nge ta sala? Sosa verse yina ke tubila diambu yango mpi na nima songa yo muntu yango. Nge lenda lomba mpi mpangi ya nkaka na kusadisa nge. Ata muntu yango kundima bamvutu ya Biblia to ve, bansosa yina nge salaka ta natila nge mambote. Lukwikilu na nge ta kuma ngolo. w21.08 18 § 14-15

Beto fwete yambula ve bima yonso yina beto kele ti yo sambu na kusepedisa Yehowa. (Lon. 5:19, 20) Kansi, kana beto ke buya kusala mingi na kisalu ya Nzambi kaka sambu beto ke zola ve kuyambula bima na beto ya nkaka, beto lenda sala kifu yina muntu yina Yezu tubilaka na mbandu na yandi salaka. Yandi buyaka Nzambi kaka sambu yandi vandaka kusala ngolo sambu na kuvanda ti bima mingi ya mbote. (Luka 12:16-21) Ntangu beto ke kutanaka ti bampasi, beto ke sambaka Yehowa sambu yandi sadisa beto mpi beto ke yindulaka mbote-mbote mambu yina beto fwete sala sambu na bampasi yango. (Bing. 3:21) Yehowa ke sakumunaka beto na mitindu mingi. Beto lenda monisa nde beto ke sepelaka mingi ti mambu ya mbote yina yandi ke sadilaka beto kana beto ke sala yonso sambu na kukumisa yandi. (Baeb. 13:15) Beto lenda sala mingi kisalu ya kulonga mpi Yehowa ta sakumuna beto diaka mingi kuluta. Konso kilumbu beto fwete sala yonso sambu na ‘kumeka mpi kumona nde Yehowa kele mbote.’ (Nk. 34:8) Kana beto sala mutindu yina, beto ta vanda bonso Yezu yina tubaka nde: “Madia na mono kele kusala luzolo ya muntu yina tindaka mono mpi kumanisa kisalu na yandi.”—Yoa. 4:34. w21.08 30-31 § 16-19

Satana ke zolaka nde beto kuma lulendo. Yandi ke zaba nde kana beto me kuma lulendo bonso yandi, beto ta baka ve luzingu ya mvula na mvula. Yo yina, ntumwa Polo tubaka nde muntu yina me “fuluka na lulendo mpi ta bwa na ndola yina bo me zengilaka Diabulu.” (1 Tim. 3:6, 7) Mambu yai lenda kumina beto yonso, yo vanda beto ke sadilaka Yehowa banda bamvula mingi to fioti. Muntu ya lulendo ke vandaka bwimi. Satana ke pusaka beto na kutula dikebi kaka na mambu na beto na kisika ya kutudila Yehowa ntima, mingi-mingi ntangu beto ke kutana ti bampasi. Mu mbandu, kana bo me kusila beto makambu to bo me sadila beto mambu ya mbi. Satana ke zolaka nde beto wila Yehowa makasi to bampangi na beto. Diabulu ke zolaka nde nge yindula nde sambu na kusala mambu mbote, nge fwete sala yo na mutindu na nge mosi na kisika ya kulanda lutwadisu yina Yehowa ke pesaka na Ndinga na yandi.—Lon. 7:16, 20. w21.06 15 § 4-5

Yehowa pesaka profete Agai kisalu mosi ya mfunu. Na 537 na ntwala ya ntangu na beto, kimvuka mosi ya Bayuda katukaka na kimpika na Babilone mpi bo vutukaka na Yeruzalemi. Ntembe kele ve nde Agai vandaka mpi na kati ya Bayuda yina. Ntangu bo kumaka na Yeruzalemi, bo yantikaka mbala mosi kutunga nzo ya Yehowa to tempelo. (Esd. 3:8, 10) Kansi ntangu bo yantikaka kutunga, diambu mosi ya mawa salamaka. Bo lembaka nitu mpi bo yambulaka kutunga tempelo sambu bantu vandaka kutelemina bo. (Esd. 4:4; Agai 1:1, 2) Yo yina, na 520 na ntwala ya ntangu na beto, Yehowa tindaka diaka Agai sambu yandi sadisa bo na kuvutukila kikesa na bo mpi bo manisa kutunga tempelo. (Esd. 6:14, 15) Agai kwendaka kusonga Bayuda yina lembaka nitu nsangu ya Yehowa sambu na kukumisa lukwikilu na bo ngolo. Bangogo “Yehowa ya makesa” pesaka bo kikesa. Yehowa kele ti kiyeka na zulu ya kimvuka ya nene ya bawanzio ya basoda, yo yina yo lombaka nde Bayuda kutudila Yehowa ntima sambu bo manisa kisalu ya kutunga tempelo. w21.09 15 § 4-5

Bambangi ya Yehowa na ntoto ya mvimba ke zolanaka mpi bo ke zingaka na bumosi. Beto me swaswana ti mabundu yonso sambu beto kele na dibuta mosi ata beto me katukaka na bansi ya kuswaswana, ata beto kele ve mpusu mosi mpi ata beto kele ve ndinga mosi. Beto ke monaka zola yina ya kieleka ntangu beto ke vukanaka na balukutakanu ya dibundu, na balukutakanu ya nene mpi na balukutakanu ya distrike. Yo ke ndimisaka beto kibeni nde beto ke sambilaka Yehowa na mutindu yina ke sepedisaka yandi. (Yoa. 13:34) Biblia ke songa beto na “kuzolana ngolo.” (1 Pie. 4:8) Beto lenda sala yo kana beto ke lolula bampangi ya nkaka mpi kana beto ke kanga ntima na bifu na bo. Beto fwete sala mpi yonso sambu na kumonisa kikalulu ya kukaba mpi ya kuyamba bampangi na beto yonso na dibundu, yo vanda bampangi yina me sadila beto diambu ya mbi. (Bak. 3:12-14) Kana beto ke zolana ngolo, beto ta monisa kibeni nde beto kele Bakristu ya kieleka. w21.10 22 § 13-14

Keti kubasisa muntu na dibundu lenda sadisa muntu yina me sala disumu mpi me balula ve ntima na kusoba? Ee, yo lenda sadisa yandi. Bampangi mingi yina vandaka kusala masumu ya nene tubaka nde yo vandaka mbote mutindu bo basisaka bo na dibundu sambu yo sadisaka bo na kubakisa nde bo salaka mbi, yo sadisaka bo na kubalula ntima, na kusoba mpi na kuvutukila Yehowa. (Baeb. 12:5, 6) Beto tadila mbandu mosi ya ke monisa nde kubasisa muntu na dibundu ke monisa nde bo me wila yandi mawa. Ngungudi me mona nde dimeme mosi ke bela. Yandi me bakisa nde sambu na kusansa dimeme yina, yandi fwete tula yo na kingenga. Kansi mameme ke zolaka kuzinga na kimvuka mpi kana dimeme mosi kele na kingenga, yo ke zingaka ve mbote. Keti yo ke tendula nde ngungudi kele makambu ngolo to yandi kele nku mutindu yandi me tula dimeme yina ke bela na kingenga sambu na kusansa yo? Ve. Yandi ke zaba nde kana yandi bika dimeme yina ke bela kisika mosi ti mameme ya nkaka, mameme yina ta baka mpi maladi yina. Kana yandi tula dimeme yina ke bela na kingenga, yandi ta tanina mameme ya nkaka. w21.10 10 § 9-10

Yo kele dibaku ya nene ya kuvanda na kati ya dibuta ya bampangi ya ntoto ya mvimba yina ke zolanaka. Beto ke zolaka nde bantu mingi kuvukana ti beto sambu na kusambila Yehowa. Yo yina beto fwete sala ve ata fioti diambu yina ta pusa bantu na kukuma ti bangindu ya mbi sambu na Yehowa to sambu na bansadi na yandi. Beto ke salaka yonso sambu na kusala mambu yina ta pusa bantu na kundima nsangu ya mbote. Bantangu ya nkaka, bantu lenda tubila beto mambu ya mbi to bo lenda niokula beto sambu beto ke lemfukilaka Tata na beto ya zulu. Inki beto lenda sala kana beto ke wa boma ya kusonga bantu ya nkaka mambu yina beto ke kwikilaka? Beto fwete ndima nde Yehowa mpi Mwana na yandi ta sadisa beto. Yezu songaka balongoki na yandi nde bo fwete kudiyangisa ve sambu na mambu yina bo ta tuba. Sambu na nki? Yezu tubaka nde: “Sambu mambu yina beno ta tuba bo ta pesa beno yo na ngunga yina; sambu bantu ke tuba kele kaka beno ve, kansi yo kele mpeve ya Tata na beno yina ke tuba na nzila na beno.”—Mat. 10:19, 20. w21.09 24 § 17-18

Moize mpi tubaka mambu ya mutindu mosi sambu na kumonisa nde Yehowa ke taninaka beto. (Nk. 90:1, noti na nsi ya lutiti.) Ntangu fioti na ntwala nde Moize kufwa, yandi bendaka dikebi ya bantu na diambu mosi ya mfunu ya ke pesa kikesa. Yandi tubaka nde: “Nzambi kele kitininu katuka bantangu ya ntama, maboko na yandi ya kimakulu kele na nsi na nge.” (Kul. 33:27) Bangogo “maboko na yandi ya kimakulu kele na nsi na nge” ke longa beto nki sambu na Yehowa? Kana beto ke ndima nde Yehowa kele kisika na beto ya kubumbana, beto ta kudiwa na lutaninu. Ata mpidina, bantangu ya nkaka beto lenda lemba nitu mpi yo lenda baka bantangu mingi. Inki Yehowa ta sala sambu na kusadisa beto na bantangu ya mutindu yina? (Nk. 136:23) Yandi ta simba beto na maboko na yandi, yandi ta telemisa beto na mawete yonso mpi yandi ta sadisa beto na kubaka diaka kikesa. (Nk. 28:9; 94:18) Beto me zaba nde beto lenda tula ntima ntangu yonso na lusadisu ya Yehowa. Yo ke sadisa beto na kuvila ve nde Yehowa ke sadisaka beto na mitindu zole. Ya ntete, yandi ke taninaka beto konso kisika yina beto ke zinga. Ya zole, Tata na beto ya zola yina kele na zulu ke lungisaka bampusa na beto mbote-mbote. w21.11 6 § 15-16

Yezu zabaka nde mambu ya kukonda lunungu ta meka lukwikilu ya balongoki na yandi. Yandi pesaka mbandu mosi yina kele na mukanda ya Luka sambu na kusadisa bo na kukanga ntima na mambu ya kukonda lunungu. Yezu telaka bo disolo ya mufwidi mosi yina vandaka kudidila zuzi mosi ya kukonda lunungu sambu zuzi yango kusadila yandi mambu na lunungu yonso. Yandi ndimaka nde nsuka-nsuka, zuzi yina ta sadisa yandi kana yandi landa kudidila yandi. Nsuka-nsuka, zuzi yina sadilaka mufwidi yina mambu na lunungu mutindu yandi zolaka. Yo ke longa beto nki? Yo ke longa beto nde Yehowa kele Nzambi ya lunungu. Yo yina Yezu tubaka nde: “Ebuna, keti Nzambi ta zenga ve mambu na lunungu sambu na bantu yina yandi me solaka, bayina ke didilaka yandi mpimpa ti mwini?” (Luka 18:1-8) Yezu tubaka diaka nde: “Ntangu Mwana ya muntu ta kwisa, keti yandi ta kuta kibeni lukwikilu yai na ntoto?” Kana bo ke sadila beto mambu ya kukonda lunungu, beto fwete vanda ntima-nda mpi kulanda kudidila Yehowa sambu yandi sadisa beto sambu beto vanda ti lukwikilu ya ngolo bonso ya mufwidi yina. Lukwikilu yina ta sadisa beto na kundima kibeni nde Yehowa ta sadisa beto. Beto fwete ndima mpi nde kisambu kele ngolo mingi. Bantangu ya nkaka, Yehowa lenda pesa mvutu na bisambu na beto na mutindu yina beto yindulaka ve. w21.11 23 § 12; 24 § 14

Baleke, keti bantangu ya nkaka beno ke monaka nde bansiku ya Yehowa kele ngolo mingi? Satana ke zola nde beno yindula mutindu yina. Yandi ta sosa kupusa beno na kutula dikebi na mambu yina bantu yina kele na nzila ya nene ke salaka sambu yo lenda monana bonso nde bo ke vandaka ti luzingu ya kiese. Yandi ke zola nde beno yindula nde beno kele ve ti luzingu ya kiese bonso banduku na beno ya nzo-nkanda to bantu yina beno ke mona na Internet. Diaka, Satana ke zola nde beno yindula nde bansiku ya Yehowa ke kanga beno nzila ya kuvanda ti luzingu ya kiese. Kansi beno vila ve diambu yai: Satana ke zolaka ve nde bantu yina ke tambula na nzila yina ya nene kuzaba mambu yina ke vingila bo na ntwala. (Mat. 7:13, 14) Kansi Yehowa me songaka beno mbote-mbote luzingu ya kitoko yina beno ta vanda ti yo kana beno ke landa kutambula na nzila ya nkaka.—Nk. 37:29; Yez. 35:5, 6; 65:21-23. w21.12 23 § 6-7

Beto me zaba nde beto fwete lolula bampangi sambu yo kele diambu ya mbote yina beto fwete sala. Kansi bantangu ya nkaka yo lenda vanda mpasi sambu na kulolula bo. Mbala ya nkaka yo vandaka mpi mpasi sambu ntumwa Piere kulolula bantu ya nkaka. (Mat. 18:21, 22) Inki lenda sadisa nge? Ya ntete, yindulula mutindu Yehowa ke lolulaka nge. (Mat. 18:32, 33) Yo lombaka ve nde Yehowa kulolula beto, kansi yandi ke lolulaka beto na ntima ya mvimba. (Nk. 103:8-10) Yo yina, “beto mpi beto fwete zolana.” Beto fwete lolula mpi bantu ya nkaka. Kana beto ke lolula bampangi na beto, yo kele bonso nde beto ke defisa bo. (1 Yoa. 4:11) Ya zole, yindula mambu yina ta salama kana beto me lolula bampangi. Beto lenda sadisa mpangi yina me sadila beto diambu ya mbi. Yo ta sadisa dibundu na kuvanda na bumosi, beto ta tanina kinduku na beto ti Yehowa mpi beto ta katula kizitu na mapeka na beto. (2 Bak. 2:7; Bakol. 3:14) Na nima, samba muntu yina ke lombaka beto na kulolula bantu ya nkaka. Kubika ve nde Satana kubebisa kinduku na nge ya mbote ti bampangi. (Baef. 4:26, 27) Beto kele ti mfunu ya lusadisu ya Yehowa sambu na kutina mitambu ya Satana. w21.06 22 § 11; 23 § 14

Davidi vandaka kutina sambu muntu mosi vandaka kuzola kufwa yandi. Muntu yango kele Saule, ntotila ya ngolo ya Izraele. Ntangu Davidi vandaka ti mfunu ya bima ya kudia, yandi telemaka na mbanza Nobi. Yandi lombaka mampa tanu na mbanza yango. (1 Sam. 21:1, 3) Na nima, yandi ti bantu na yandi kwendaka kubumbana na dibulu mosi ya ditadi. (1 Sam. 22:1) Inki salaka nde Davidi kukuma ti luzingu yina? Saule kumaka kuwila Davidi kimpala ya ngolo sambu bantu mingi vandaka kuzola Davidi mpi bo vandaka kukumisa yandi sambu yandi nungaka bitumba mingi. Saule zabaka mpi nde Yehowa katulaka yandi ntotila ya Izraele sambu na kukonda bulemfu na yandi. Yo yina Yehowa ponaka Davidi sambu na kukuma ntotila. (1 Sam. 23:16, 17) Kansi na ntangu yina, Saule vandaka kaka ntotila ya Izraele. Yandi vandaka ti basoda mingi mpi bantu mingi vandaka kukotila yandi. Yo yina yo lombaka nde Davidi kutina sambu Saule kufwa yandi ve. Keti Saule yindulaka kibeni nde yandi lendaka kukanga Nzambi nzila ya kukumisa Davidi ntotila? (Yez. 55:11) Biblia ke tubila yo ve kansi beto ke ndima nde Saule vandaka kuditula na kigonsa ya ngolo. Bantu yina ke teleminaka Yehowa ke nungaka ve ata fioti. w22.01 2 § 1-2

Yezu salaka bikesa mingi sambu na kulonga nsangu ya mbote. Yandi monisaka nde yandi ke zolaka bantu mutindu yandi landaka kulonga nsangu ya mbote na mabaku yonso. (Luka 19:47, 48) Sambu na nki Yezu vandaka kusala mpidina? Sambu yandi vandaka kuwila bantu mawa. Bantangu ya nkaka, bantu mingi kibeni vandaka ti mfunu ya kuwa malongi ya Yezu mpi yo vandaka kusala nde yandi ti balongoki na yandi ‘kumona ve ata mpila ya kudia.’ (Mar. 3:20) Diaka, ntangu muntu mosi vandaka ti mfunu ya kusolula ti Yezu na mpimpa, disongidila na ntangu yina fwanaka sambu na muntu yango, Yezu ndimaka kusolula ti yandi na ntangu yina. Bantu mingi yina waka malongi ya Yezu kumaka ve balongoki na yandi. Ata mpidina, bantu yonso yina widikilaka yandi, waka nsangu ya mbote yina yandi longaka bo. Bubu yai mpi beto fwete pesa bantu yonso dibaku ya kuwa nsangu ya mbote. (Bis. 10:42) Sambu na kusala yo, beto lenda yidika manaka na beto ya kisalu ya kulonga nsangu ya mbote. Na kisika ya kulonga nsangu ya mbote kaka na ntangu yina me fwana sambu na beto, beto fwete soba mpi manaka na beto sambu beto longa nsangu ya mbote na ntangu yina beto ta kutana ti bantu mingi. Kana beto sala mutindu yina, Yehowa ta sepela kibeni. w22.01 17 § 13-14

Bubu yai, bantu mingi ke tudilaka ve bamfumu ntima. Sambu bo ke monaka mutindu baluyalu mpi bansiku yina bo ke tulaka ke vandaka mingi-mingi sambu na mambote ya bamvwama mpi ya bantu ya nene. Kansi ve sambu na mambote ya bansukami. Diaka, bamfumu ya nkaka ya mabundu ke salaka mambu ya mbi. Yo me salaka nde bantu ya nkaka kutudila diaka ve Nzambi ntima. Yo yina kana beto ke longuka Biblia ti muntu, beto fwete sala yonso sambu na kusadisa yandi na kutudila Yehowa ntima mpi bantu yina yandi me pesaka mikumba na organizasio na yandi. Balongoki ya Biblia mpamba ve bantu fwete tudila Yehowa ntima mpi organizasio na yandi. Ata beto ke sadilaka Yehowa banda bamvula mingi, beto fwete vila ve nde mutindu na yandi ya kusala mambu ke vandaka mbote ntangu yonso. Bantangu ya nkaka, beto lenda kutana ti diambu mosi yina lenda sala nde beto tudila diaka ve Yehowa ntima. w22.02 2 § 1-2