Février

Ntangu ntotila Ezekiasi belaka ngolo, yandi lombaka Yehowa na kubelula yandi mpi Yehowa belulaka yandi. (2 Bant. 20:1-6) Kansi ntangu ntumwa Polo bondilaka Yehowa na kukatula yandi “nsende na nsuni,” Yehowa katulaka yandi yo ve. (2 Bak. 12:7-9) Ntotila Erode zolaka kufwa ntumwa Yakobo ti ntumwa Piere. Erode fwaka Yakobo kansi wanzio mosi gulusaka Piere. (Bis. 12:1-11) Beto lenda kudiyula nde: ‘Sambu na nki Yehowa gulusaka Piere kansi Yakobo ve?’ Biblia ke tubila yo ve. Beto ke ndima kibeni nde mambu yonso yina Yehowa ke salaka ke “kondaka ve lunungu ata fioti.” (Kul. 32:4) Bantangu ya nkaka, Yehowa lenda pesa mvutu na bisambu na beto na mutindu yina beto yindulaka ve. Kansi beto ke ndimaka kibeni nde bamvutu ya Yehowa na bisambu na beto ke vandaka kaka ya zola mpi ya lunungu, yo yina beto ke kudiyangisaka ve na mutindu yandi ta pesa beto mvutu.​—Yobi 33:13. w23.11 21 § 6

Na nsadisa ya mpeve santu, Yakobo tubaka nde muntu ya mayele ke vandaka “ya kuyilama na kulemfuka.” Yo ke tendula nki? Yo ke tendula nde beto fwete vanda ti mpusa ya ngolo mpi luzolo ya kulemfukila bantu yina Yehowa me pesaka kiyeka. Ata mpidina, Yehowa ke lomba beto ve na kulemfukila muntu yina ke songa beto na kufwa bansiku na yandi. (Bis. 4:18-20) Yo lenda vanda pete na kulemfukila Yehowa kansi bantu ve. Nkutu, ntangu yonso Yehowa ke pesaka beto lutwadisu ya kukuka. (Nk. 19:7) Kansi yo kele ve mutindu yina sambu na bantu yina kele ti kiyeka. Ata mpidina, Tata na beto ya zulu me pesaka bantu ya nkaka kiyeka. Mu mbandu bibuti, bamfumu ya luyalu mpi bankuluntu. (Bing. 6:20; 1 Bate. 5:12; 1 Pie. 2:13, 14) Kana beto ke lemfukila bo, ya kieleka beto ke lemfukila mpi Yehowa. w23.10 6 § 2-3

Kuyindula ngolo ya Yehowa kele kima ya nkaka ya ke sadisaka beto na kukumisa lukwikilu na beto ngolo. Yandi kele ti ngolo ya kulungisa balusilu yonso yina yandi me silaka. Yandi kele Nkwa-Ngolo Yonso. (Yobi 42:2; Mar. 10:27; Baef. 3:20) Yandi songaka Abrahami ti Sara nde bo ta buta mwana, ata bo vandaka minunu. (Kuy. 17:15-17) Yandi songaka diaka Abrahami nde yandi ta pesa bana na yandi ntoto ya Kanana. Bana ya Abrahami, disongidila bantu ya Izraele, salaka bamvula mingi na kimpika na Ezipte mpi yo monanaka bonso nde lusilu yina ta lungana ve ata fioti. Kansi yo lunganaka. Yehowa songaka mpi mwense mosi, Maria nde yandi ta buta Mwana ya Nzambi. Yo zolaka kulungisa lusilu mosi yina Yehowa silaka bamvula mingi na ntwala na kilanga ya Edeni. (Kuy. 3:15) Kana beto yindula balusilu yonso yina Yehowa me silaka mpi mutindu yandi lungisaka yo, beto ta bakisa nde yandi kele ngolo mingi mpi yo ta kumisa lukwikilu na beto ngolo. Yo ke ndimisa beto kibeni nde nsi-ntoto ya mpa ta kwisa.​—Yoz. 23:14; Yez. 55:10, 11. w23.04 28 § 10-12

Yehowa pesaka mvutu na bisambu ya Davidi. (1 Sam. 19:10, 18-20; 2 Sam. 5:17-25) Beto mpi fwete ndima nde yandi ta pesa mvutu na bisambu na beto. (Nk. 145:18) Yehowa lenda pesa mvutu na bisambu na beto na mutindu yina beto yindulaka ve. Polo lombaka Nzambi na kukatula yandi “nsende na nsuni.” Yandi sambaka Yehowa mbala tatu sambu yandi katula yandi yo. Keti Yehowa pesaka mvutu na bisambu yina? Ee, kansi ve na mutindu yina Polo vandaka kuyindula. Na kisika ya kukatula mpasi yina, Yehowa pesaka Polo ngolo yina yandi vandaka ti yo mfunu sambu na kulanda kusadila yandi na mutindu ya mbote. (2 Bak. 12:7-10) Bantangu ya nkaka, Yehowa lenda pesa beto mpi mvutu na mutindu yina beto yindulaka ve. Beto fwete ndima kibeni nde Yehowa ke zaba mutindu ya kuluta mbote ya kusadisa beto. Nkutu yandi lenda “sala mingi kibeni kuluta mambu yonso yina beto ke lombaka to ke yindulaka na kuwakana ti ngolo na yandi yina ke salaka na beto.” (Baef. 3:20) Yo yina, yandi lenda pesa mvutu na bisambu na beto na ntangu to na mutindu yina beto yindulaka ve. w23.05 8-9 § 4-6

Beto fwete yindula mbala na mbala lusilu ya Yehowa ya me tala lufutumuku ya ke kwisa. Sambu na nki? Sambu beto me zaba ve ata fioti ntangu yina beto lenda bela maladi mosi ya ngolo to ntangu yina muntu mosi yina beto ke zolaka lenda fwa na kintulumukina. (Lon. 9:11; Yak. 4:13, 14) Kansi kivuvu na beto ya lufutumuku lenda sadisa beto na kukanga ntima na bampasi yina. (1 Bate. 4:13) Biblia ke ndimisa beto nde tata na beto ya zulu ke zabaka beto mbote mpi yandi ke zolaka beto mingi kibeni. (Luka 12:7) Yo me fwana kibeni nde, Yehowa kuzaba beto mbote sambu yandi sala beto diaka ti bikalulu yina beto vandaka ti yo mpi ti mambu yina beto zabaka dezia. Yehowa ke zolaka beto mingi kibeni, yo yina yandi me pesaka beto dibaku ya kuzinga mvula na mvula mpi ata beto me fwa, yandi ta futumuna beto diaka. Sambu na nki beto fwete kwikila na lusilu ya lufutumuku? sambu beto me zaba nde Yehowa kele ti nzala ya ngolo mpi ngolo ya kulungisa lusilu yina. w23.04 8-9 § 2-4

Yozefi ti Maria salaka yonso sambu na kukumisa kinduku na bo ti Yehowa ngolo. Bo zabaka nde yo kele mfunu mingi na kusambila Yehowa na dibuta. (Luka 2:22-24; 4:16) Yo kele mbandu ya mbote sambu na bantu yina me kwelaka bubu yai. Kana beno kele ti bana bonso Yozefi ti Maria, yo lenda vanda mpasi na kukwenda na balukutakanu to na kuyidika ntangu ya kusala lusambu ya dibuta. Yo lenda vanda mpi mpasi sambu bakala ti nkento kubaka ntangu ya kulonguka mpi ya kusamba kumosi. Kansi, beno vila ve nde, ntangu beno ke sambila Yehowa kumosi, yo ta sala nde beno pusana pene-pene na yandi mpi beno zolana diaka mingi. Yo yina, beno tula lusambu ya Yehowa na kisika ya ntete na dibuta na beno. Kana beno ke wakana ve na makwela na beno, yo lenda vanda mpasi na kusala lusambu ya dibuta. Kana mpidina, beno yantika kutubila disolo mosi ya nkufi mpi ya ke pesa kiese. Yo ta sadisa beno na kuzolana diaka mingi mpi na kusepela kusala mambu ya kimpeve kumosi. w23.05 22 § 7-8

Inki mutindu boma ya mbote sadisaka Obadia? Yo sadisaka yandi na kuvanda muntu ya masonga mpi yina bo lenda tudila ntima. Yo yina, ntotila pesaka yandi kiyeka na nzo na yandi. (Tala mpi Nehemia 7:2.) Boma yina pesaka yandi mpi kikesa ya kuyituka, kikalulu yina yandi vandaka kibeni ti mfunu na yo. Yandi zingaka na nsungi ya luyalu ya ntotila ya mbi Ahabi. (1 Bant. 16:30) Diaka, nkento na yandi Yezabele yina vandaka kusambila Baale vandaka kumenga Yehowa mingi kibeni yo yina yandi sosaka kukatula lusambu ya kieleka yina vandaka na kimfumu ya nordi. Nkutu yandi fwaka baprofete mingi ya Nzambi. (1 Bant. 18:4) Ntangu Yezabele yantikaka kusosa baprofete ya Nzambi sambu na kufwa bo, Obadia bakaka baprofete 100 mpi yandi bumbaka bo ‘na bimvuka ya bantu 50 na konso dibulu mpi yandi landaka kupesa bo mampa ti masa.’ (1 Bant. 18:13, 14) Kana Yezabele zabaka mambu yina Obadia muntu ya kikesa salaka, yandi zolaka kufwa yandi. Ya kieleka, Obadia vandaka kuwa boma ya lufwa kansi yandi vandaka kuzola Yehowa mpi bansadi na yandi mingi kuluta luzingu na yandi mosi. w23.06 16 § 9-10

Yehowa ke landa kutwadisa bansadi na yandi bubu yai mutindu yandi salaka na ntangu ya ntama. Yandi ke sadilaka Ndinga na yandi mpi Mwana na yandi yina kele mfumu ya dibundu. Keti kele ti bidimbu ya pwelele yina ke monisa nde Nzambi ke landa kusadila bantu sambu na kutwadisa beto mpi bubu yai? Ee. Mu mbandu, beto tadila mambu yina salamaka na bamvu 1800. Mpangi Charles Taze Russell ti banduku na yandi yantikaka kubakisa nde mvula 1914 ta vanda mvula mosi ya mfunu sambu na Kimfumu ya Nzambi. (Dan. 4:25, 26) Sambu na kubakisa yo, bo salaka bansosa na Biblia mpi bo ndimaka kibeni nde baprofesi na yo ta lungana. Keti Yehowa vandaka kutwadisa bansosa yina bo vandaka kusala na Biblia? Ee. Mambu yina salamaka na 1914 monisaka kibeni nde Kimfumu ya Nzambi me yantika kuyala. Na mvula yina, bitumba ya ntete ya ntoto ya mvimba yantikaka mpi na nima bipupa, kunikana ya ntoto mpi nzala landaka. (Luka 21:10, 11) Yehowa vandaka kusadila Bakristu yina ya ntima-masonga sambu na kusadisa bansadi na yandi. w24.02 22 § 11

Beto bansadi ya Yehowa, beto ke zabaka nde yandi ke zolaka beto mpi yandi ke zolaka nde beto vanda ti luzingu ya mbote. (Bar. 8:35-39) Beto ke ndimaka mpi nde kana beto ke sadila minsiku ya Biblia, yo ta natila beto mambote ntangu yonso. (Yez. 48:17, 18) Kansi, nki beto lenda sala kana beto ke kutana ti bampasi? Mu mbandu, muntu mosi ya dibuta lenda sala to kutuba kima yina lenda pesa beto mpasi. Beto lenda bela maladi mosi ya ngolo yina lenda sala nde beto sala ve mingi na kisalu ya Yehowa. Beto lenda kutana ti bampasi sambu na kisumbula ya lugangu to bantu lenda niokula beto sambu na lukwikilu na beto. Kana beto ke kutana ti bampasi ya mutindu yina, beto lenda kudiyula nde: ‘Sambu na nki mambu yai ke kumina mono? Keti mono me sala kima mosi ya mbi? Keti yo ke tendula nde Yehowa ke zola mono diaka ve?’ Kana nge me yindulaka dezia mpidina, kulemba ve nitu. Bansadi mingi ya Yehowa me yindulaka mpi mutindu yina.​—Nk. 22:1, 2; Hab. 1:2, 3. w23.04 14 § 1-2

Kana beto me kutana ti mpukumuna, mbala mosi beto fwete katula bangindu ya mbi mpi beto fwete sala ve mambu yina ta bebisa kinduku na beto ti Yehowa. Yehowa ke zolaka nde beto ‘lemfuka na ntima ya mvimba.’ (Bar. 6:17) Mambu yina yandi ke songaka beto ke vandaka kaka sambu na mambote na beto mpi beto fwete soba ve bansiku na yandi. (Yez. 48:17, 18; 1 Bak. 6:9, 10) Diabulu ke pusaka bantu na kutubila beto mambu ya mbi mpi na kubula beto ngolo sambu beto lungisa ve lukanu na beto. Lukanu na yandi kele ya “kudia” beto, disongidila ya kufwa kinduku na beto ti Yehowa. (1 Pie. 5:8) Bo vandaka kuniokula kibeni Bakristu ya mvu nkama ya ntete, kubula bo mpi kufwa bo sambu bo vandaka ti lukanu ya kukangama ngolo na Yehowa. (Bis. 5:27, 28, 40; 7:54-60) Bubu yai mpi Satana ke landa kusadila mbangika. Yo ke monana pwelele mutindu bo ke bula ngolo kibeni bampangi na beto ya babakala mpi ya bankento na Russie mpi na bansi ya nkaka. Bambeni ke niokula mpi bampangi na beto na mitindu ya nkaka. Satana ke sadilaka mpi “mayele ya mbi.” w23.07 15-16 § 6-9

Kana nge ke longuka Ndinga ya Nzambi mingi, zola na nge sambu na Yehowa ta yela. Zola yina ta pusa nge na kusadila mambu yina nge ke longuka. Nge ta baka balukanu ya mbote ya ke wakana ti minsiku ya Biblia. Nge ta yantika kuyindula mambu ya mbote mpi kusala mambu ya mbote sambu nge ke zola kusepedisa Nzambi. Kaka mutindu mwana ke landaka mbandu ya kibuti na yandi yina yandi ke zolaka, nge mpi ta landa mbandu ya Tata na nge ya zulu. (Baef. 5:1, 2) Beto lenda kudiyula nde: ‘Keti zola na mono sambu na Yehowa kele ngolo bubu yai kuluta yina mono vandaka ti yo na luyantiku ntangu mono bakaka mbotika? Banda mono me bakaka mbotika, keti mutindu na mono ya kuyindula mpi ya kusala mambu kele bonso ya Yehowa, mingi-mingi na yina me tala kuzola bampangi?’ Kana “zola yina nge vandaka na yo ntete” me yantika kubwa madidi, kulemba ve nitu. Diambu ya mutindu yai kuminaka mpi Bakristu ya mvu-nkama ya ntete. Yezu yambulaka bo ve mpi yandi ta yambula beto ve ata fioti. (Kus. 2:4, 7) Yandi ke zaba nde beto lenda vutukila diaka zola yina beto vandaka ti yo na luyantiku ntangu beto longukaka kieleka. w23.07 8 § 2-3

Ntumwa Piere salaka bifu mingi. Ntete, Piere monisaka nde yandi vandaka kuditudila ntima mingi. Yandi bulaka ntulu nde yandi ta yambula ve Yezu ata bantumwa ya nkaka kuyambula yandi. (Mar. 14:27-29) Na nima, Piere lalaka mbala na mbala mpi yandi landaka ve kukengila. (Mar. 14:32, 37-41) Na nima, ntangu kimvuka mosi ya nene ya bantu kwisaka ti bambele ya bitumba mpi banti sambu na kukanga Yezu, Piere yambulaka yandi. (Mar. 14:50) Nsuka-nsuka, Piere buyaka mbala tatu nde yandi ke zaba ve Yezu, nkutu yandi salaka lusilu sambu na luvunu yina. (Mar. 14:66-71) Inki Piere salaka ntangu yandi bakisaka nde yandi me sala disumu mosi ya nene? Yandi lembaka nitu mpi yandi dilaka ngolo. (Mar. 14:72) Yezu nganinaka ve Piere sambu na bifu yina yandi salaka kansi yandi songaka yandi nde yandi ta baka mikumba ya nene. (Yoa. 21:15-17) Piere zabaka nde yandi salaka disumu ya nene kibeni, kansi yandi vandaka kusala bikesa ya kusala mambu ya mbote. Sambu na nki? Sambu yandi zabaka nde Mfumu na yandi Yezu, vandaka kuzola yandi kaka. Inki yo ke longa beto? Yehowa ke zola nde beto ndima kibeni nde yandi ke zolaka beto mpi nde yandi ke vandaka ya kuyilama na kulolula beto.​—Bar. 8:38, 39. w24.03 18-19 § 13-15

Kusala mansoni lenda sala nde nge wa nsoni, nge kudimona kukonda mfunu. Yo ke nataka mpi mavumu ya kukonda kukana mpi yo ke bebisaka mabuta. Ya kieleka, muntu ya mayele ta kwenda ve na “nzo” ya nkento ya zoba. Diaka, bantu yina ke salaka mansoni lenda bebisa kinduku na bo ti Yehowa mpi bo lenda baka maladi yina ta sala nde bo fwa nswalu. (Bing. 7:23) Bingana 9:18 ke sukisa nde: “Bantu yina yandi me binga kele na bisika ya mudindu ya Maziamu.” Ebuna, sambu na nki bantu mingi ke ndimaka kukwenda na yandi ata yo ke nataka bampasi mingi? (Bing. 9:13-18) Mutambu ya nkaka ya beto fwete tina kele pornografi ya me kuma mingi. Bantu ya nkaka ke yindulaka nde kutala pornografi kele ve mbi. Kansi pornografi kele mbi kibeni. Bantu yina ke talaka yo ke kudizitisaka ve mpi bo ke zitisaka ve bantu ya nkaka. Nkutu, yo ke vandaka mpasi sambu bo yambula yo. Mambu ya mansoni yina bo ke talaka ke wumelaka na mabanza mpi yo ke vandaka mpasi sambu bo vila yo. Diaka, pornografi ke fwaka ve banzala ya mbi kansi yo ke tedimisaka yo. (Bakol. 3:5; Yak. 1:14, 15) Yo yina, bantu mingi yina ke talaka pornografi ke salaka mpi mansoni. w23.06 23 § 10-11

Ata bantangu ya nkaka bansi ya nkaka ke teleminaka ngolo yina, bo ta yinga yo ve. Beto ke zaba yo sambu “ditadi” ya ke monisa Kimfumu ya Nzambi ta panza makulu ya kiteki yina, makulu yango ke monisa ngolo ya Anglo-Amerika. (Dan. 2:34, 35, 44, 45) Keti nge ke ndimaka kibeni nde profesi ya Daniele ya me tala makulu ya kibende mpi ya ntoto ya tuma kele kieleka? Kana nge ke ndimaka yo, yo ta sadisa nge na luzingu na nge. Nge ta sosa ve kukuma ti bima mingi ya kinsuni na nsi-ntoto yai ya ta fwa ntama mingi ve. (Luka 12:16-21; 1 Yoa. 2:15-17) Kubakisa profesi yina ta sadisa nge mpi na kubakisa mfunu ya kusamba mpi ya kusala kisalu ya kulonga nsangu ya mbote. (Mat. 6:33; 28:18-20) Na nima ya kulonguka profesi yina, nge lenda kudiyula nde: ‘Keti balukanu ya mono ke bakaka ke monisaka nde mono ke ndimaka kibeni nde ntama mingi ve Kimfumu ya Nzambi ta fwa bimfumu yonso ya bantu?’ w23.08 11 § 13-14

Ndima na kudikulumusa yonso nde bamvula na nge, sante na nge mpi mambu yina nge ke kutana ti yo na luzingu, lenda sala nde nge sala ve mingi sambu na Yehowa bubu yai. Bonso Barzilai, kundima ve mikumba yina nge ta kuka ve kulungisa kana sante na nge to bamvula na nge lenda sala nde nge lungisa yo ve. (2 Sam. 19:35, 36) Bonso Moize, ndima lusadisu mpi pesa mikumba ya nkaka na bantu ya nkaka. (Kub. 18:21, 22) Kana nge sala mpidina, yo ta sadisa nge na kuditudila ve balukanu yina nge ta kuka ve kulungisa. Beto fwete kudiyangisa mpi ve sambu na balukanu ya mbi yina bantu ya nkaka ke baka. Beto lenda bakila ve bantu ya nkaka balukanu mpi beto lenda kuka ve kukanga nzila na bampasi yina balukanu na bo ya mbi lenda natila bo. Mu mbandu, mwana mosi lenda baka lukanu ya kuyambula kusambila Yehowa. Lukanu yina lenda pesa bibuti na yandi mpasi mingi kibeni. Kansi, kana bibuti yina ke kudipesa foti sambu na lukanu ya mbi yina mwana na bo me baka, bo ke kudiyika kizitu ya kukonda mfunu. Yo kele ve kizitu yina Yehowa ke lomba bo na kunata. w23.08 29 § 11-12

Samsoni vandaka muntu ya kukonda kukuka bonso beto, yo yina bantangu ya nkaka, yandi bakaka balukanu ya mbi. Lukanu mosi yina yandi bakaka natilaka yandi bampasi ya ngolo kibeni. Na nima ya kulungisa mukumba na yandi ya kizuzi sambu na mwa ntangu, “yandi zolaka nkento mosi na Muwanda ya Soreki, zina na yandi Dalila.” Ntete Samsoni zolaka kukwela nkento mosi ya Filistia, kansi “Yehowa muntu pusaka yandi na kubaka lukanu yina” sambu Yehowa “vandaka kusosa dibaku ya kunwanisa bantu ya Filistia.” Na nima, Samsoni bikalaka na nzo ya nkento mosi ya ndumba na Gaza, mbanza mosi ya bantu ya Filistia. Na dibaku yina, Nzambi pesaka Samsoni ngolo ya kunangula bakielo ya mbanza mpi yo vandaka diaka ve na lutaninu. (Baz. 14:1-4; 16:1-3) Kansi, yo ke monana nde Dalila vandaka muntu ya Izraele mpi yo vandaka kupesa ve Samsoni dibaku ya kunwanisa bantu ya Filistia. Dalila ndimaka mbongo ya mingi yina bantu ya Filistia pesaka yandi sambu na kuteka Samsoni. w23.09 5 § 12-13

Mayele lenda sadisa beto na kuvanda mawete. Muntu ya mayele ke kudiyalaka ntangu bantu ke tula ntembe na balukwikilu na yandi. Mbala mingi, ntangu bantu ke yulaka beto bangiufula, bo ke songaka beto mpenza ve kikuma yina me pusa bo na kuyula beto bangiufula yina. Yo yina, na ntwala ya kupesa mvutu, beto fwete zaba ntete nde, beto me zaba ve kima yina me pusa muntu yina na kuyula ngiufula yina. (Bing. 16:23) Beto tala mutindu Gedeoni pesaka bantu ya Efrayimi mvutu. Bo yulaka yandi na makasi yonso sambu na nki yandi bingaka bo ve na ntwala na kuvukana ti yandi sambu bo nwanisa bambeni ya Izraele. Keti yina vandaka mpenza kikuma yina pusaka bo na kuwa makasi mingi? Keti yo lenda vanda sambu na lulendo na bo? Yo vanda mpidina to ve, Gedeoni vandaka mayele, yandi bakisaka bo mpi yandi pesaka bo mvutu na mawete yonso. Inki salamaka? Bo “lembamaka.”​—Baz. 8:1-3. w23.09 16 § 8-9

Yehowa ti Yezu kele ti kinduku ya kuluta ngolo kibeni yina tata lenda vanda ti yo ti mwana na yandi. Ya kieleka, Yehowa waka mpasi mingi ntangu yandi monaka mutindu bo vandaka kumonisa Mwana na yandi mpasi mingi, mutindu bo buyaka yandi mpi mutindu yandi vandaka kuniokwama. Bibuti yina me fwilaka dezia mwana, me zaba mbote mpasi yina kufwila mwana ke pesaka. Beto ke vandaka ti kivuvu ya lufutumuku, kansi kana muntu mosi yina beto ke zolaka me fwa, yo ke pesaka beto mpasi mingi kibeni. Mbandu yina ke sadisa beto na kubakisa mutindu Yehowa waka ntangu yandi monaka Mwana na yandi ya yandi ke zolaka mingi, ke niokwama mpi ke fwa na Nisani 14, ya mvula 33 ya ntangu na beto. (Mat. 3:17) Banda bubu yai tii na kilumbu ya kuyibuka lufwa ya Yezu, nge lenda longuka mambu mingi ya me tala kimenga ya Yezu na kulonguka na nge mosi to na Lusambu ya Dibuta. Na kilumbu ya kuyibuka lufwa ya Yezu, kuvila ve kutala Lusambu ya Suka sambu na kilumbu yango. Kana beto yidika bantima na beto sambu na Nkinsi ya Kuyibuka Lufwa ya Yezu, beto ta kuka kusadisa bantu ya nkaka sambu bo bakila yo mpi mambote.​—Esd. 7:10. w24.01 11 § 10-12

Kisambu kele kima mosi yina lenda sadisa nge na kubaka ngolo na Yehowa. Yandi lenda pesa mvutu na bisambu na beto ntangu yandi ke pesa beto “ngolo yina me luta ngolo ya bantu.” (2 Bak. 4:7) Beto lenda baka mpi ngolo na Yehowa ntangu beto ke tanga Ndinga na yandi mpi beto ke yindula mambu yina beto ke tanga. (Nk. 86:11) Mambu yina Yehowa ke songa beto na Biblia “kele . . . ngolo.” (Baeb. 4:12) Kana nge ke samba Yehowa mpi ke tanga Ndinga na yandi, yandi ta pesa nge ngolo yina nge kele ti yo mfunu sambu na kukanga ntima, na kulanda kuvanda na kiese mpi na kulungisa mukumba mosi ya mpasi. Beto tala mutindu Yehowa pesaka profete Yonasi ngolo. Yonasi tinaka sambu na kulungisa ve mukumba ya mpasi yina Yehowa pesaka yandi. Yo yina, yandi zolaka kufwa na mupepe ya ngolo yina bulaka na maswa mpi yandi tulaka luzingu ya bantu yina vandaka ti yandi na kigonsa. Ntangu bo losaka yandi na masa, yandi kudimonaka kisika yina yandi me vandaka ntete ve, disongidila na divumu ya mbisi mosi ya nene. Inki Yonasi salaka sambu na kubaka kikesa ntangu yandi vandaka na divumu ya mbisi yina? Yandi sambaka.​—Yon. 2:1, 2, 7. w23.10 13 § 4-6

Ata ntumwa Piere sonikaka mikanda yina sambu na Bakristu ya mvu-nkama ya ntete, Yehowa salaka nde yo vanda na kati ya Ndinga na yandi sambu beto bakila yo mambote bubu yai. (Bar. 15:4) Beto ke zinga na kati ya bantu yina ke ndimaka ve baprofesi ya Biblia. Bambeni lenda seka beto sambu beto ke tubaka nde nsuka ta kwisa. Bantu ya nkaka ke tubaka nde yo ta kwisa ve ata fioti. (2 Pie. 3:3, 4) Kana muntu mosi yina beto ke longa nsangu ya mbote, nduku na beto ya kisalu to muntu ya dibuta na beto me tuba mpidina, yo lenda lembisa kibeni lukwikilu na beto. Piere tubilaka mambu yina lenda sadisa beto. Bantu ya nkaka lenda mona nde Yehowa ke fwa ve nswalu nsi-ntoto yai ya mbi. Mambu yina Piere tubaka ke sadisa beto na kuyibuka nde mutindu Yehowa ke tadilaka ntangu me swaswana kibeni ti mutindu bantu ke tadilaka yo. (2 Piere 3:8, 9) Sambu na Yehowa, bamvula 1 000 kele bonso kilumbu mosi. Yehowa ke vandaka ntima-nda mpi yandi ke zolaka ve nde ata muntu mosi kufwa. Kansi ntangu kilumbu yina yandi me tulaka ta lunga, yandi ta fwa kibeni nsi-ntoto yai. w23.09 26-27 § 2-5

Sambu na nki ntumwa Polo sonikilaka Bakristu ya Baebreo yina vandaka kuzinga na Yudea? Ntembe kele ve nde yandi sonikilaka bo sambu na bikuma zole ya mfunu. Ya ntete, sambu na kupesa bo kikesa. Mingi na kati na bo vandaka na dibundu ya Bayuda na ntwala nde bo kuma Bakristu. Mbala ya nkaka bamfumu ya dibundu yina, vandaka kuseka bo sambu bo kumaka Bakristu. Sambu na nki? Sambu Bakristu vandaka ve ti tempelo sambu na kusambila, bo vandaka ve ti mesa-kimenga sambu na kupesa Nzambi bimenga mpi bo vandaka ve ti banganga-nzambi. Mambu yina lendaka kulembisa balongoki ya Kristu nitu mpi kulembisa lukwikilu na bo. (Baeb. 3:12, 14) Nkutu mbala ya nkaka, bankaka na kati na bo kumaka ti nzala ya kuvutuka na dibundu ya Bayuda. Ya zole, Polo songaka Bakristu yina ya Baebreo nde bo vandaka ve kusala bikesa ya kubakisa malongi ya mpa to ya mudindu disongidila, “madia ya ngolo” ya kele na Ndinga ya Nzambi. (Baeb. 5:11-14) Nkutu, bankaka na kati na bo vandaka kulanda kulemfukila Nsiku ya Moize. w23.10 24-25 § 3-4

Bankento ya nkaka ke ponaka na kukwela ve. (Mat. 19:10-12) Yehowa ti Yezu ke yindulaka ve nde Bakristu yina me kwelaka ve kele ve mfunu. Na ntoto ya mvimba, bampangi-bankento yina me kwelaka ve kele bambandu ya mbote na mabundu. Zola yina bo ke monisilaka bantu ya nkaka mpi dikebi yina bo ke tudilaka bo na masonga yonso, ke salaka nde bampangi-bankento yai ya Bakristu kukuma bampangi mpi bamama ya bantu mingi. (Mar. 10:29, 30) Bankaka ke salaka kisalu ya ntangu yonso. Bampangi-bankento ke salaka mingi na kisalu ya kulonga nsangu ya mbote na ntoto ya mvimba. (Nk. 68:11) Keti nge lenda kuditudila lukanu ya kusala kisalu ya ntangu yonso? Nge lenda kuma mupasudi-nzila, kusala kisalu ya kutunga bisika na beto ya lusambu to kusala na Betele. Samba sambu na lukanu na nge. Solula ti bampangi ya nkaka yina me lungisaka dezia lukanu yina mpi tala mambu yina nge fwete sala sambu na kulungisa lukanu yango. Na nima, sala manaka yina ta sadisa nge na kulungisa lukanu yango. Kulungisa lukanu na nge yina ta kangudila nge nzila ya kusala mambu mingi ya mbote na kisalu ya Yehowa. w23.12 22 § 16-17

Mpasi ya nene me kuma kibeni pene-pene, yo yina yo kele mfunu mingi nde beto landa kulonga nsangu ya mbote ti kikesa yonso. Kansi, yo lenda vanda mpasi nde beto landa kutula dikebi ya mingi na kisalu ya kulonga nsangu ya mbote kana beto ke kutana ti mpasi ya mbongo to kana bantu ke telemina beto. Inki ta sadisa beto na kulanda kutula lusambu ya Yehowa na kisika ya ntete? Beto fwete ndima kibeni nde “Yehowa ya makesa” kele ti beto. Yandi ta sadisa beto kana beto ke landa kutula lusambu na yandi na kisika ya ntete. Yo yina, beto fwete wa ve boma ata ya kima mosi. (Agai 2:4) Yehowa ke zola nde beto kudipesa na kisalu ya mfunu mingi ya ke gulusa luzingu ya bantu, disongidila kukumisa bo balongoki. Agai pesaka bansadi ya Nzambi kikesa sambu bo yantika diaka kutunga tempelo. Kana bo sala yo, Yehowa tubaka nde yandi “ta tinda lusakumunu.” (Agai 2:18, 19) Beto ke ndima mpi nde Yehowa ta sakumuna bikesa yina beto ke salaka kana beto ke tula kisalu yina yandi me pesaka beto na kisika ya ntete. w23.11 16 § 8; 17 § 11

Na mukanda yina ntumwa Polo sonikilaka Bakristu ya Roma, yandi tubaka nde bantu yonso kele bantu ya masumu. Kansi, nki mutindu beto lenda sepedisa Nzambi sambu yandi tadila beto bonso bantu ya lunungu mpi ya kukonda kifu? Polo tubilaka mbandu ya Abrahami sambu na kusadisa Bakristu yonso ya masonga na kupesa mvutu na ngiufula yina. Yehowa bingaka Abrahami muntu ya lunungu ntangu yandi vandaka kuzinga na ntoto ya Kanana. Sambu na nki Yehowa bingaka yandi muntu ya lunungu? Keti yo vandaka sambu Abrahami vandaka kulemfukila mbote-mbote Nsiku ya Moize? Mpidina ve. (Bar. 4:13) Nzambi pesaka bantu ya Izraele Nsiku yina bamvula kuluta 400 na nima ya ntangu yina yandi bingaka Abrahami nde muntu ya lunungu. Kansi sambu na nki yandi bingaka Abrahami muntu ya lunungu? Yehowa monisilaka yandi ntima-mbote mpi yandi bingaka yandi muntu ya lunungu sambu na lukwikilu na yandi.​—Bar. 4:2-4. w23.12 3 § 4-5

Kaka na mpimpa yina profete Natani songaka ntotila Davidi mambu yina kele na verse ya bubu, Yehowa songaka yandi na kusonga Davidi nde yandi ve muntu ta tunga tempelo. (1 Bans. 17:3, 4, 11, 12) Inki Davidi salaka? Yandi yidikaka mbongo mpi bima yina mwana na yandi Salomo ta vanda ti yo mfunu sambu na kutunga tempelo. (1 Bans. 29:1-5) Ntangu Natani songaka Davidi nde yandi ve muntu ta tunga tempelo, na mbala mosi Yehowa salaka kuwakana ti Davidi. Yehowa silaka Davidi nde mwana na yandi mosi ta yala kimakulu. (2 Sam. 7:16) Yindula kiese yina Davidi ta wa na nsi-ntoto ya mpa ntangu yandi ta zaba nde yandi ke zinga na nsi ya Luyalu ya Bamvula Funda ya Yezu, Ntotila yina katukaka na dikanda na yandi. Disolo yai ke sadisa beto na kubakisa nde ata beto lenda sala ve yonso yina beto lenda sala sambu na Yehowa, yandi ta sakumuna beto mingi kuluta mutindu beto vandaka kuyindula. w23.04 16 § 8-10

Nge lenda bakisa nde baverse ya nkaka ya Biblia lenda pesa nge kikesa, mingi-mingi ntangu nge ke wa boma. Mu mbandu, nge lenda baka kikesa na mukanda ya Yobi, ya Bankunga, ya Bingana mpi na mambu yina Yezu tubaka ya kele na Matayo kapu 6. Kana nge ke samba Yehowa mpi nge ke tanga Ndinga na yandi, nge ta baka kikesa. Beto fwete ndima nde Yehowa ta sadisa beto ntangu beto ke kutana ti bampasi ya ngolo. Beto kele ve beto mosi. (Nk. 23:4) Yehowa ke sila nde yandi ta tanina beto, ta simba beto, ta sadisa beto mpi ta pesa beto kikesa. Yezaya 26:3 ke tuba mambu yai sambu na Yehowa: “Nge ta tanina bantu yina ke yekamaka kibeni na nge; nge ta pesa bo ngemba ya ntangu yonso, sambu bo ke tudilaka nge ntima.” Yo yina, tudila Yehowa ntima mpi sala yonso sambu na kubaka lusadisu yonso yina yandi ke pesa nge. Kana nge sala mutindu yina, nge ta landa kuvanda kikesa ata na bantangu ya mpasi. w24.01 25 § 16-17

Mambu yina verse ya bubu ke tubila ke lungana kibeni bubu yai. Mambu yai ya ke landa ke lungana mpi na ntangu na beto: “Yehowa ta longa bana na nge yonso, mpi ngemba ya bana na nge ta vanda mingi. Bo ta tula nge ngolo na lunungu. . . . Nge ta wa boma ata ya kima mosi ve mpi nge ta vanda ve ti kikuma ya kutekitila, sambu yo ta kwisa ve pene-pene na nge.” (Yez. 54:13, 14) Ata nkutu Satana yandi mosi, “nzambi ya ngidika yai ya bima,” kele ve ti ngolo ya kukanga bansadi ya Yehowa nzila ya kulonga bantu mambu ya Yehowa. (2 Bak. 4:4) Yehowa me vutulaka lusambu ya bunkete mpi yo ta beba diaka ve ata fioti. Yo ta vanda mvula na mvula. Ata kinwaninu mosi ve ya bo ta sadila sambu na kunwanisa beto ta nunga. w24.02 4 § 10

Bakristu ke zabaka nde lusilu na bo ya kudipesa na Yehowa kele mfunu mingi. Beto ke salaka nde balukanu yina beto ke baka mpi mambu yina beto ke sala sambu na dibuta na beto kuwakana ti lusilu yango. Beto ke salaka ngolo sambu na kulungisa mikumba na beto na dibuta mutindu Biblia ke lombaka beto, kansi beto fwete bika ve nde mambu yina bantu ya mabuta na beto ke zola nde beto sala kusala nde beto sala ve mambu yina Yehowa ke lomba beto. (Mat. 10:35, 36; 1 Tim. 5:8) Bantangu ya nkaka, yo lenda lomba nde beto baka balukanu yina ke sepedisa Yehowa ata yo ke sepedisa ve bantu ya mabuta na beto. Yandi salaka dibuta mpi yandi ke zola nde dibuta na beto kuvanda na kiese. (Baef. 3:14, 15) Kana beto ke zola kuvanda mpenza na kiese, beto fwete sala mambu yina Yehowa ke zola nde beto sala. Ya kieleka, Yehowa ke bakaka na valere mingi bikesa yina nge ke salaka sambu na kusadila yandi kana nge ke lungisa bampusa ya dibuta na nge mpi nge ke sadila bantu ya dibuta na nge mambu na zola mpi na luzitu yonso.​—Bar. 12:10. w24.02 18 § 11, 13