Watchtower MIKANDA YA KE NA INTERNET
Watchtower
MIKANDA YA KE NA INTERNET
Kikongo (Rép. dém. du congo)
  • BIBLIA
  • MIKANDA
  • BALUKUTAKANU
  • es25 balut. 98-108
  • Octobre

Kele ve ti video sambu na mambu ya nge ke sosa.

Kifu me salama na ntangu ya kubaka video.

  • Octobre
  • Beto Fimpa Masonuku Konso Kilumbu—2025
  • Tubantu-diambu
  • Kitatu 1er octobre
  • Kiya 2 octobre
  • Kitanu 3 octobre
  • Mposo 4 octobre
  • Lumingu 5 octobre
  • Kintete 6 octobre
  • Kizole 7 octobre
  • Kitatu 8 octobre
  • Kiya 9 octobre
  • Kitanu 10 octobre
  • Mposo 11 octobre
  • Lumingu 12 octobre
  • Kintete 13 octobre
  • Kizole 14 octobre
  • Kitatu 15 octobre
  • Kiya 16 octobre
  • Kitanu 17 octobre
  • Mposo 18 octobre
  • Lumingu 19 octobre
  • Kintete 20 octobre
  • Kizole 21 octobre
  • Kitatu 22 octobre
  • Kiya 23 octobre
  • Kitanu 24 octobre
  • Mposo 25 octobre
  • Lumingu 26 octobre
  • Kintete 27 octobre
  • Kizole 28 octobre
  • Kitatu 29 octobre
  • Kiya 30 octobre
  • Kitanu 31 octobre
Beto Fimpa Masonuku Konso Kilumbu—2025
es25 balut. 98-108

Octobre

Kitatu 1er octobre

Mayele yina ke katukaka na zulu ke vandaka . . . ya kuyilama na kulemfuka.​—Yak. 3:17.

Keti yo ke vandilaka nge mpasi na kulemfuka? Yo vandaka mpasi sambu na ntotila Davidi, yo yina yandi sambaka na kudikulumusa yonso nde: “Tedimisa na kati na mono luzolo ya kulemfukila nge.” (Nk. 51:12) Davidi vandaka kuzola Yehowa, kansi bantangu ya nkaka yo vandaka mpasi sambu yandi lemfukila yandi. Yo lenda kumina beto mpi. Sambu na nki? Ya ntete, beto kele bantu ya kukonda kukuka. Yo yina yo ke vandilaka beto mpasi sambu na kulemfukila Yehowa. Ya zole, Satana ke salaka yonso sambu na kupusa beto na kulemfukila ve Yehowa bonso yandi. (2 Bak. 11:3) Ya tatu, beto ke zinga na nsi-ntoto yina bantu ke lemfukaka ve, bayina kele ti “mpeve yina ke sala ntangu yai na bana ya kukonda bulemfu.” (Baef. 2:2) Yo yina, beto fwete sala yonso sambu na kunwana ti mpukumuna ya kusala disumu mpi sambu na kutelemina Diabulu ti nsi-ntoto yai ya ke pusaka beto na kukonda bulemfu. Beto fwete sala yonso sambu na kulemfukila Yehowa mpi bantu yina yandi me pesaka kiyeka. w23.10 6 § 1

Kiya 2 octobre

Nge me bumba vinu ya mbote tii ntangu yai.​—Yoa. 2:10.

Kima ya kuyituka yina Yezu salaka ya kukumisa masa malafu ke longa beto nki? Yo ke longa beto kudikulumusa. Yezu kudisikisaka ve sambu na mambu yina yandi salaka, nkutu yandi vandaka kudisikisa ve ata fioti na mambu yonso yina yandi vandaka kusala. Kansi na kudikulumusa yonso, yandi vandaka kupesa nkembo mpi lukumu yonso na Tata na yandi. (Yoa. 5:19, 30; 8:28) Kana beto ke landa mbandu ya kudikulumusa ya Yezu, beto ta kudisikisa ve na mambu yina beto ke sala. Beto fwete kudisikisa sambu beto kele ti dibaku ya kusadila Nzambi ya mbote kibeni. (Yer. 9:23, 24) Beto fwete pesa yandi lukumu yonso yina yandi me fwana na kubaka. Nkutu, beto ta kuka ve ata fioti kusala kima ya mbote kukonda lusadisu ya Yehowa. (1 Bak. 1:26-31) Kana beto kele bantu ya kudikulumusa, beto ta kudisikisa ve sambu na mambu ya mbote yina beto ke sala sambu na bantu ya nkaka. Beto kele na kiese mingi sambu beto ke zaba nde Yehowa ke monaka mpi yandi ke sepelaka ti mambu yina beto ke salaka. (Tala mpi Matayo 6:2-4; Baeb. 13:16) Ya kieleka, beto ke sepedisaka Yehowa ntangu beto ke landaka mbandu ya Yezu ya kudikulumusa.​—1 Pie. 5:6. w23.04 4 § 9; 5 § 11-12

Kitanu 3 octobre

Beno sosa kaka ve mambote na beno mosi, kansi mpi mambote ya bantu ya nkaka.​—Bafil. 2:4.

Na nsadisa ya mpeve santu, ntumwa Polo siamisaka Bakristu na kusosa mambote ya bantu ya nkaka. Inki mutindu beto lenda sadila mambu yina ntangu beto kele na balukutakanu? Kana beto ke yibuka nde bantu ya nkaka mpi ke zolaka kupesa bamvutu. Yindula diambu yai: Kana nge ke solula ti banduku na nge, keti nge ta tuba mingi mpi bo, bo tuba fioti? Ve. Nge ta zola mpi nde bo tuba. Mutindu mosi mpi, ntangu beto kele na balukutakanu, beto ke zolaka mpi nde bantu mingi kutuba. Yo yina, kima mosi yina beto lenda sala sambu na kupesa bampangi na beto kikesa kele kupesa bo dibaku ya kupesa bamvutu. (1 Bak. 10:24) Yo yina, beto fwete sala pesa bamvutu ya nkufi sambu yo pesa bantu ya nkaka dibaku ya kutuba. Ata ntangu nge ke pesa mvutu ya nkufi, kutubila ve mambu mingi na mbala mosi. Kana nge tubila bangindu yonso ya kele na paragrafe, yo lenda sala nde bantu ya nkaka kutuba ve. w23.04 22-23 § 11-13

Mposo 4 octobre

Mono ke sala mambu yonso sambu na nsangu ya mbote, sambu na kuzabisa yo na bantu ya nkaka.​—1 Bak. 9:23.

Beto fwete vila ve nde yo kele mfunu mingi na kulanda kusadisa bantu ya nkaka, mingi-mingi kana beto ke longa nsangu ya mbote. Beto fwete vanda ti bukati-kati na kisalu ya kulonga nsangu ya mbote. Beto ke kutanaka ti bantu ya kele ti balukwikilu ya kuswaswana mpi ya me katuka na bisika ya mutindu na mutindu. Ntumwa Polo vandaka ti bukati-kati mpi beto lenda baka dilongi na mbandu na yandi. Yezu ponaka Polo na kuvanda “ntumwa ya makanda.” (Bar. 11:13) Yo yina, Polo vandaka kulonga Bayuda, Bagreki, bantu yina longukaka mingi, bantu ya kudikulumusa, bantu yina vandaka kuzinga na babwala, bamfumu mpi bantotila. Sambu na kusimba bantima na bo yonso, yandi kumaka “bima yonso sambu na bantu ya mitindu yonso.” (1 Bak. 9:19-22) Yandi vandaka kutula dikebi na mutindu bo vandaka kuzinga, mutindu bo yelaka, bisika ya bo katukaka mpi balukwikilu na bo. Yo sadisaka yandi na kuvanda bukati-kati mpi na kulonga konso muntu na mutindu yina ta sadisa yandi na kukwenda pene-pene na Nzambi. Beto mpi ta kuma kulonga mbote nsangu ya mbote kana beto kele ti bukati-kati mpi beto ke yindula mutindu ya mbote ya kusadisa konso muntu. w23.07 23 § 11-12

Lumingu 5 octobre

Mpika ya Mfumu fwete nwana ve, kansi yandi fwete vanda muntu ya mawete na bantu yonso.​—2 Tim. 2:24.

Kana muntu kele mawete, yo ke tendula ve nde yandi me konda ngolo. Nkutu, muntu ya mawete ke vandaka ngolo. Yo ke lombaka kikesa sambu na kudiyala ntangu beto ke kutana ti mpasi mosi buna. Mawete kele “mbuma ya mpeve.” (Bag. 5:22, 23) Bo vandaka mpi kusadila ngogo ya Kigreki ya bo me balula na “mawete” sambu na kutubila mpunda ya makasi ya mfinda yina bo me yikamisa ti bantu. Yindula fioti: mpunda ya makasi ya mfinda me kuma mawete. Yo kele mawete kansi yo kele kaka ngolo. Beto bantu, nki mutindu beto lenda vanda mawete mpi ngolo? Na ngolo na beto mosi ve. Kima ya kuluta mfunu kele kusamba Nzambi sambu yandi pesa beto mpeve santu na yandi mpi yo sadisa beto na kukuma ti kikalulu yina ya mfunu mingi. Eksperiansi ke monisa nde beto lenda kuma mawete. Bambangi mingi ya Yehowa me pesaka mvutu na mawete ntangu bantu vandaka kusosila bo. Yo sadisaka bantu ya nkaka na kukuma ti bangindu ya mbote sambu na Bambangi ya Yehowa.​—2 Tim. 2:24, 25. w23.09 15 § 3

Kintete 6 octobre

Mono [sambaka] . . . mpi Yehowa pesaka mono kima yina mono lombaka yandi.​—1 Sam. 1:27.

Na mbona-meso mosi, ntumwa Yoane monaka bankuluntu 24 na zulu ke kumisa Yehowa. Bo vandaka kukumisa Nzambi mpi kutuba nde yandi me fwana na kubaka “nkembo, lukumu, mpi ngolo.” (Kus. 4:10, 11) Bawanzio ya kwikama ke vandaka mpi ti bikuma mingi ya ke pusaka bo na kukumisa Yehowa. Bo ke zingaka na zulu ti yandi mpi bo ke zabaka yandi mbote. Bo ke monaka bikalulu na yandi na mambu yina yandi ke salaka. Ntangu bo ke monaka mambu yina Yehowa ke salaka, yo ke pusaka bo na kukumisa yandi. (Yobi 38:4-7) Beto mpi fwete kumisa Yehowa na bisambu na beto. Beto lenda sala yo kana beto ke songa yandi bikalulu na yandi yina ke sepedisaka beto mingi mpi sambu na nki beto ke zitisaka yandi. Ntangu nge ke tanga Biblia mpi ke longuka yo, sosa kuzaba bikalulu ya Yehowa yina nge ke sepelaka ti yo mingi. (Yobi 37:23; Bar. 11:33) Na nima, songa Yehowa nde nge ke sepelaka mingi ti bikalulu yina. Beto fwete kumisa mpi Yehowa sambu yandi ke sadisaka beto mpi bampangi na beto yonso. Yandi ke kebaka beto ntangu yonso mpi yandi ke taninaka beto.​—1 Sam. 2:1, 2. w23.05 3-4 § 6-7

Kizole 7 octobre

Tambula na mutindu yina me fwana na Yehowa.​—Bakol. 1:10.

Na 1919, Babilone ya Nene vandaka diaka ve ti bupusi na zulu ya bansadi ya Nzambi. Kaka na mvula yina, “mpika ya kwikama mpi ya mayele” yantikaka kusala kisalu sambu na kusadisa bantu ya ntima-masonga na kuyantika kutambula na “Nzila ya Busantu.” (Mat. 24:45-47; Yez. 35:8) Kisalu yina “bantu ya nkaka” salaka na ntangu ya ntama sambu na kuyidika “Nzila ya Busantu,” sadisaka bantu yina yantikaka kutambula na nzila yina na kulonguka mambu mingi ya me tala Yehowa mpi balukanu na yandi. (Bing. 4:18) Yo sadisaka bo mpi na kulemfukila bansiku ya Yehowa. Yehowa ke vingilaka ve nde bansadi na yandi kusala bansoba ya mfunu na mbala mosi kaka, kansi yandi ke sadisaka bo malembe-malembe. Beto ta vanda na kiese ya mingi ntangu beto ta sepedisa Nzambi na beto na mambu yonso yina beto ta sala. Yo ke lombaka kuyidika konso nzila mbala na mbala. Banda na 1919, kisalu ya kuyidika “Nzila ya Busantu” ke salamaka mbala na mbala sambu na kusadisa bantu mingi na kubasika na Babilone ya Nene. w23.05 17 § 15; 19 § 16

Kitatu 8 octobre

Mono ta bikisa nge ve ata fioti.​—Baeb. 13:5.

Bampangi ya Nto-Kimvuka bo mosi, ke pesaka bansadisi yina ke salaka na bakomite ya Nto-Kimvuka formasio. Bampangi yina kele bansadisi, ke lungisa mbote kibeni mikumba mingi yina bo kele ti yo na organizasio ya Yehowa bubu yai. Bo kele ya kuyilama kibeni sambu na kulanda kukeba mameme ya Kristu ntangu Bakristu yina bo me tulaka mafuta ta kwenda na zulu. Ntangu Bakristu yonso yina bo me tulaka mafuta ya kele ntete awa na ntoto ta mata na zulu na ntwala nde mpasi ya nene kusuka, bansadi ya Yehowa yina ta bikala awa na ntoto, ta landa kusadila yandi na mutindu ya mbote. Na lutwadisu ya Yezu Kristu, bansadi ya Nzambi ta konda ve ata kima mosi. Beto ke zaba nde na ntangu yina, kimvuka mosi ya makanda yina Biblia ke bingaka nde Gogi ya Magogi, ta nwanisa bansadi ya Nzambi. (Ezek. 38:18-20) Kansi yo ta sala ve bantangu mingi mpi bo ta nunga ve ata fioti. Bo ta kuka ve kukanga bansadi ya Nzambi nzila ya kulanda kusambila yandi. Yehowa ta gulusa kibeni bansadi na yandi. Na mbona-meso mosi, ntumwa Yoane monaka “kimvuka mosi ya nene” ya mameme ya nkaka ya Kristu. Bo songaka yandi nde ‘kimvuka yai ya nene’ kele bantu yina me katuka “na mpasi ya nene.” (Kus. 7:9, 14) Ya kieleka, Yehowa ta gulusa bo kibeni. w24.02 5-6 § 13-14

Kiya 9 octobre

Beno fwa ve tiya ya mpeve.​—1 Bate. 5:19.

Inki beto fwete sala sambu na kubaka mpeve santu? Beto fwete samba sambu na yo, kulonguka Ndinga ya Nzambi mpi kuvanda na organizasio yina mpeve yango ke twadisaka. Kusala mpidina ta sadisa beto na kuyedisa “mbuma ya mpeve.” (Bag. 5:22, 23) Yehowa ke pesaka mpeve santu na yandi kaka na bantu yina ke vandaka ti mabanza ya bunkete mpi ti bikalulu ya mbote. Yehowa ta landa ve kupesa beto mpeve santu na yandi kana beto ke yindula mambu ya mbi mpi ke sala yo. (1 Bate. 4:7, 8) Sambu na kulanda kubaka mpeve santu, beto fwete “vweza ve bambikudulu.” (1 Bate. 5:20) Na verse yai, “bambikudulu” ke tendula bansangu yina Yehowa ke pesaka beto na nzila ya mpeve santu na yandi, yo vanda bansangu ya me tala kilumbu na yandi mpi mutindu yo me kuma pene-pene. Beto fwete pusa ve ntama kilumbu ya Yehowa na mabanza na beto mpi beto fwete yindula ve nde Armagedoni ta kwisa ve na bilumbu na beto. Kana beto kele ti bikalulu ya mbote mpi ke ‘sala bisalu ya ke monisa kukangama na Nzambi,’ beto ta monisa nde beto ke ndima nde, kilumbu ya Yehowa kele pene-pene mpi nde yo ta kwisa ntama mingi ve.​—2 Pie. 3:11, 12. w23.06 12 § 13-14

Kitanu 10 octobre

Boma ya Yehowa kele luyantiku ya mayele.​—Bing. 9:10.

Kana kifwanisu ya pornografi me basika na kintulumukina na ba apareyi na beto, nki beto fwete sala? Na mbala mosi, beto fwete katula meso mpi kukatula yo. Yo ta vanda pete na kusala yo kana beto ke yibuka nde kinduku na beto ti Yehowa kele kimvwama ya kuluta nene yina beto kele ti yo. Ya kieleka, ata bifwanisu yina kele ve pornografi lenda tedimisa banzala ya kusala mansoni. Sambu na nki beto fwete tina yo? Sambu beto ke zolaka ve kuyindula ata kima mosi ya fioti yina lenda pusa beto na kusala mansoni na ntima na beto. (Mat. 5:28, 29) Mpangi David yina kele nkuluntu na Thaïlande ke tuba nde: “Mono ke kudiyulaka nde: ‘Ata bifwanisu yai kele ve pornografi, keti Yehowa ta sepela kana mono ke landa kutala yo?’ Kuyindula mutindu yina ke sadisaka mono na kusala mambu ya mbote.”Kuwa boma ya kusala konso kima yina lenda pesa Yehowa mpasi ke sadisaka beto na kusala mambu ya mbote. Boma ya Nzambi kele “luyantiku” to fondasio ya “mayele.” w23.06 23 § 12-13

Mposo 11 octobre

Beno kwenda, beno bantu na mono, beno kota na basuku na beno ya kati.​—Yez. 26:20.

Beto lenda fwanisa ‘basuku ya kati’ ti mabundu na beto. Na mpasi ya nene, beto ta vanda na lutaninu yina Yehowa ke silaka beto kana beto ke landa kuvukana ti bampangi na beto. Yo yina banda bubu yai, beto fwete sala yonso sambu na kuzola bampangi na beto mingi. Yo lenda sala nde beto guluka. “Kilumbu ya nene ya Yehowa” ta natila bantu bampasi mingi. (Sef. 1:14, 15) Bansadi ya Yehowa ta kutana mpi ti bampasi. Kansi kana beto ke yilama bubu yai, yo ta sadisa beto na kuvanda pima mpi na kusadisa bantu ya nkaka. Beto ta kanga ntima na bampasi ya mutindu na mutindu yina beto ta kutana ti yo. Kana bampangi na beto ke kutana ti bampasi, beto ta sala yonso sambu na kusadisa bo kana beto ke wila bo mawa mpi beto ke pesa bo bima yina bo kele ti yo mfunu. Kana beto ke zola bampangi na beto bubu yai, beto ta zola bo mpi mingi na bilumbu ke kwisa. Yehowa ta sakumuna beto ntangu yandi ta pesa beto luzingu ya mvula na mvula na nsi-ntoto ya mpa, kisika yina bisumbula mpi bampasi ta vandaka diaka ve.​—Yez. 65:17. w23.07 7 § 16-17

Lumingu 12 octobre

[Yehowa] ta kumisa beno kikesa, yandi ta kumisa beno ngolo, yandi ta tula beno fondasio ya ngolo.​—1 Pie. 5:10.

Mbala mingi, bantu ya kwikama yina Ndinga ya Nzambi ke tubilaka vandaka ngolo. Ata bantu ya ngolo mingi na kati na bo lembaka mpi nitu bantangu ya nkaka. Mu mbandu, bantangu ya nkaka ntotila Davidi vandaka “ngolo bonso ngumba,” kansi bantangu ya nkaka yandi “kumaka kutekita.” (Nk. 30:7) Ata mpeve ya Nzambi kumisaka Samsoni ngolo mingi kibeni, kansi yandi tubaka nde kukonda mpeve yina, yandi ta ‘lemba ebuna yandi ta kuma bonso bantu yonso ya nkaka.’ (Baz. 14:5, 6; 16:17) Bantu yina ya kwikama vandaka ngolo sambu Yehowa muntu pesaka bo yo. Ntumwa Polo tubaka nde yandi mpi vandaka ti mfunu ya ngolo yina ke katukaka na Yehowa. (2 Bak. 12:9, 10) sante na yandi vandaka mpi kuyangisa yandi. (Bag. 4:13, 14) Bantangu ya nkaka, yo vandilaka yandi mpasi sambu na kusala mambu ya mbote. (Bar. 7:18, 19) Bantangu ya nkaka diaka, yandi vandaka kudiyangisa mingi mpi yandi vandaka kuwa boma ya mambu yina lenda kumina yandi. (2 Bak. 1:8, 9) Kansi ntangu Polo vandaka ya kulemba, na ntangu yo yina yandi vandaka ngolo. Inki mutindu? Yehowa pesaka Polo ngolo yina yandi vandaka ti yo mfunu sambu na kukanga ntima na bampasi yina yandi kutanaka ti yo. w23.10 12 § 1-2

Kintete 13 octobre

Yehowa ke monaka na ntima.​—1 Sam. 16:7.

Kana bantangu ya nkaka beto ke yindula nde beto kele ve mfunu, beto fwete vila ve nde Yehowa yandi mosi muntu bendaka beto na yandi. (Yoa. 6:44) Yandi ke monaka bikalulu na beto ya mbote, yina mbala ya nkaka beto mosi ke monaka yo ve mpi yandi ke zabaka ntima na beto mbote kibeni. (2 Bans. 6:30) Yo yina, ntangu yandi ke tubaka nde beto kele mfunu mingi, beto fwete ndima yo kibeni. (1 Yoa. 3:19, 20) Na ntwala ya kuzaba kieleka, bampangi ya nkaka salaka mambu ya mbi yina ke yangisaka bo tii bubu yai. (1 Pie. 4:3) Ata Bakristu yina ke sadilaka Yehowa na mutindu ya mbote lenda nwana mpi ti bangindu yina. Keti bantangu ya nkaka nge mpi ke nwanaka ti bangindu yina? Kana mpidina, nge ta baka kikesa kana nge zaba nde bansadi ya Yehowa ya ntangu ya ntama, bayina vandaka kusadila yandi na mutindu ya mbote, nwanaka mpi bantangu ya nkaka ti bangindu yina. Mu mbandu, ntangu ntumwa Polo vandaka kuyindula bifu na yandi, yandi tubaka nde yandi kele muntu ya mawa. (Bar. 7:24) Ya kieleka, Polo balulaka ntima na masumu yina yandi salaka mpi yandi bakaka mbotika. Ata mpidina, yandi kudibingaka nde yandi kele “muntu ya kuluta fioti na kati ya bantumwa” mpi “muntu ya ntete” na kati ya bansumuki.​—1 Bak. 15:9; 1 Tim. 1:15. w24.03 27 § 5-6

Kizole 14 octobre

Bo yambulaka nzo ya Yehowa.​—2 Bans. 24:18.

Dilongi mosi ya mfunu yina beto lenda baka na lukanu ya mbi yina ntotila Yehoashi bakaka kele nde, beto fwete pona banduku yina fwete pusa beto na kusala mambu ya mbote, disongidila banduku yina ke zolaka Yehowa mpi ke sosaka kusepedisa yandi. Beto fwete baka ve kaka banduku yina kele mvula mosi ti beto. Kuvila ve nde Yehoashi vandaka mwana-fioti kansi Yehoyada vandaka mbuta mingi. Sambu na banduku yina nge ke ponaka, kudiyula nde: ‘Keti bo ke sadisaka mono na kukumisa lukwikilu na mono ngolo? Keti bo ke sadisaka mono na kulemfukila bansiku ya Nzambi? Keti bo ke tubilaka mambu ya Yehowa mpi bakieleka ya mfunu? Keti bo ke zitisaka bansiku ya Nzambi? Keti bo ke songaka mono kaka mambu yina ta sepedisa mono to bo ke vandaka ti kikesa ya kuvutula mono na nzila kana mono me kwenda na lweka?’ (Bing. 27:5, 6, 17) Ya kieleka, kana banduku na nge ke zolaka ve Yehowa, nge kele ve ti mfunu na bo. Kansi kana bo ke zolaka Yehowa, kangama ti bo, bo ta sadisa nge mingi.​—Bing. 13:20. w23.09 9-10 § 6-7

Kitatu 15 octobre

Mono kele Alfa mpi Omega.​—Kus. 1:8.

Kisono alfa, kele kisono ya ntete ya alphabet ya Kigreki mpi kisono omega kele kisono ya nsuka. Ntangu Yehowa ke sadila bisono “Alfa mpi Omega,” yandi ke zola kutuba nde kana yandi me yantika kima mosi, yandi ke salaka yonso sambu na kumanisa yo. Ntangu Yehowa salaka Adami ti Eva, yandi tubilaka bo nde: ‘Beno buta mingi mpi beno kuma mingi, beno fulusa ntoto mpi beno yala yo.’” (Kuy. 1:28) Na ntangu yina, yo kele bonso nde Yehowa tubaka nde “Alfa.” Yandi tubaka lukanu na yandi na pwelele yonso nde kele ti ntangu yina, bana ya Adami ti Eva, yina ta vanda ya kukuka, ta fulusa ntoto mpi ta kumisa yo Paladisu. Ntangu lukanu yina ta lungana, yo ta vanda bonso Yehowa ke tuba nde “Omega.” Ntangu Yehowa manisaka kusala zulu, ntoto mpi bima yonso ya kele na kati na yo, yandi tubaka kima mosi sambu na kumonisa nde lukanu na yandi ta lungana kibeni. Yehowa monisaka nde yandi ta lungisa kibeni lusilu na yandi sambu na bantu mpi sambu na ntoto. Yo ta lungana kibeni mbote-mbote na nsuka ya kilumbu yina ya nsambwadi.​—Kuy. 2:1-3. w23.11 5 § 13-14

Kiya 16 octobre

Beno yidika nzila ya Yehowa! Beno sala nzila mosi ya nene ya kusungama na ntoto ya zelo na zelo sambu na Nzambi na beto.​—Yez. 40:3.

Voyage yina ya mpasi ya kukatuka na Babilone tii na Izraele zolaka kusala bangonda kiteso ya iya. Kansi Yehowa tubaka nde yandi ta katula bigonsa yonso yina lendaka kukanga bo nzila ya kuvutuka na Izraele. Bayuda ya kwikama bakisaka nde mambote yina bo ta baka kana bo vutuka na Izraele ta luta bibansa yina bo ta sala. Kima ya kuluta mfunu vandaka lusambu na bo. Ata tempelo mosi ya Yehowa vandaka ve na Babilone. Mesa-kimenga vandaka ve sambu bantu ya Izraele kupesa bimenga mutindu Nsiku ya Moize vandaka kulomba. Bo yidikaka ve mambu sambu banganga-nzambi kupesa bimenga yango. Diaka, bantu yina vandaka kusambila banzambi ya luvunu vandaka mingi kuluta bantu yina vandaka kulemfukila bansiku ya Yehowa. Yo yina, Bayuda mingi yina vandaka kuzola Yehowa vandaka kuvingila ntangu yina bo ta vutuka na insi na bo sambu na kuvutula lusambu ya bunkete. w23.05 14-15 § 3-4

Kitanu 17 octobre

Beno landa kutambula bonso bana ya nsemo.​— Baef. 5:8.

Beto kele ti mfunu ya lusadisu ya mpeve santu ya Nzambi sambu na kulanda kutambula “bonso bana ya nsemo.” Sambu na nki? Sambu yo kele ve pete na kulanda kuvanda bunkete na nsi-ntoto yai ya mvindu. (1 Bate. 4:3-5, 7, 8) Mpeve santu ta sadisa beto na kunwana ti bangindu ya nsi-ntoto yai, mu mbandu malongi na yo mpi bangindu na yo yina ke wakanaka ve ti bangindu ya Nzambi. Mpeve santu lenda sadisa beto mpi na kusala mambu ya “mitindu yonso ya bumbote mpi ya lunungu.” (Baef. 5:9) Beto ta baka mpeve santu kana beto lomba yo na Yehowa. Yezu tubaka nde Yehowa ta “pesa mpeve santu na bantu yina ke lombaka yandi yo.” (Luka 11:13) Diaka, ntangu beto ke kumisaka Yehowa ti bampangi na balukutakanu, beto ke bakaka mpi mpeve santu. (Baef. 5:19, 20) Mpeve santu ta sadisa beto mpi na kuzinga na mutindu yina ke sepedisaka Nzambi. w24.03 23-24 § 13-15

Mposo 18 octobre

Beno landa na kulomba, ebuna bo ta pesa beno; beno landa na kusosa, ebuna beno ta mona; beno landa na kubula na kielo, ebuna bo ta kangudila beno.​—Luka 11:9.

Keti nge kele ti mfunu ya ntima-nda mingi? Sambu na yo. Ntima-nda kele kitini ya mbuma ya mpeve. (Bag. 5:22, 23) Yo yina, beto fwete lomba Yehowa mpeve santu mpi beto fwete lomba yandi na kusadisa beto na kuyedisa mbuma ya mpeve. Kana beto ke kutana ti diambu mosi yina ke sala nde beto kuka ve kuvanda ntima-nda, beto fwete “landa na kulomba” Yehowa mpeve santu sambu yo sadisa beto na kuvanda ntima-nda. (Luka 11:13) Beto lenda lomba mpi Yehowa na kusadisa beto na kutadila mambu bonso yandi. Na nima ya kusamba, beto fwete sala yonso sambu na kuvanda ntima-nda konso kilumbu. Kana beto ke samba mingi sambu na kuvanda ntima-nda mpi beto ke sala bikesa ya kuvanda ntima-nda, kikalulu yai ya kitoko ta tula misisa na ntima na beto mpi yo ta kuma kimuntu na beto. Yo ke sadisaka mpi na kuyindula mingi bambandu yina kele na Biblia. Biblia ke tubilaka bambandu ya bantu mingi yina vandaka ntima-nda. Kana beto ke yindula mingi bambandu yina, beto ta zaba mitindu ya kumonisa ntima-nda. w23.08 22 § 10-11

Lumingu 19 octobre

Beno losa babukondi na beno sambu na kukanga bambisi.​—Luka 5:4.

Yezu ndimisaka ntumwa Piere nde Yehowa ta sadisa yandi. Na nima ya lufutumuku ya Yezu, yandi sadisaka Piere ti bantumwa ya nkaka na kukanga diaka bambisi na mutindu ya kuyituka. (Yoa. 21:4-6) Yo ndimisaka Piere nde Yehowa ta pesa yandi bima ya kinsuni yina yandi ta vanda ti yo mfunu. Mbala ya nkaka na ntangu yina, Piere yibukaka mambu yina Yezu tubaka nde Yehowa ta lungisa bampusa ya bantu yina ke landaka “kusosa ntete Kimfumu.” (Mat. 6:33) Mambu yina yonso salaka nde Piere kutula kisalu ya Yehowa na kisika ya ntete na luzingu na yandi kansi ve kisalu ya kuloba bambisi. Yandi longaka ti kikesa yonso na kilumbu ya Pantekoti ya mvu 33 ya ntangu na beto mpi yandi sadisaka bantu mingi na kundima nsangu ya mbote. (Bis. 2:14, 37-41) Na nima, yandi sadisaka bantu ya Samaria mpi Bantu ya Makanda na kulonguka mambu ya Kristu mpi na kukuma balongoki na yandi. (Bis. 8:14-17; 10:44-48) Ya kieleka, Yehowa sadilaka Piere mingi sambu na kusadisa bantu ya mitindu yonso na kukuma Bakristu. w23.09 20 § 1; 23 § 11

Kintete 20 octobre

Kana beno zabisa mono ve ndosi yina, ti ntendula na yo, bo ta zenga beno bitini-bitini.​—Dan. 2:5.

Kiteso ya bamvula zole na nima ya ntangu yina bantu ya Babilone fwaka Yeruzalemi, ntotila Nebukadenezare ya Babilone lalaka ndosi mosi yina pesaka yandi boma. Na ndosi yango, yandi monaka kiteki mosi ya nene kibeni. Yandi songaka bantu na yandi ya mayele, ti Daniele mpi, nde bo songa yandi ndosi yina yandi lalaka mpi bo tendudila yandi yo. (Dan. 2:3-5) Kana bo sala yo ve, yandi ta fwa bo yonso. Yo lombaka nde Daniele kusala nswalu sambu luzingu ya bantu mingi vandaka na kigonsa. Yandi “kwendaka mpi lombaka ntotila na kupesa yandi ntangu sambu yandi pesa ntotila ntendula ya ndosi yina.” (Dan. 2:16) Yo lombaka nde yandi vanda kikesa mpi ti lukwikilu. Ata verse mosi ve ke monisa nde Daniele tendulaka dezia bandosi na ntwala. Yandi lombaka banduku na yandi ‘na kusamba Nzambi ya zulu sambu yandi wila bo mawa na diambu ya ke tadila kinsweki yina.’ (Dan. 2:18) Yehowa pesaka mvutu na bisambu na bo. Yehowa sadisaka Daniele na kutendula ndosi ya Nebukadenezare. Yo gulusaka luzingu ya Daniele mpi ya banduku na yandi. w23.08 3 § 4

Kizole 21 octobre

Muntu yina ta kanga ntima tii na nsuka ta guluka.​—Mat. 24:13.

Beto tadila mambote ya kuvanda ntima-nda. Kana beto kele ntima-nda, beto ta vanda na kiese mingi mpi ntima-madidi. Ntima-nda lenda sadisa beto na kuvanda na sante ya mbote. Kana beto kele ntima-nda, beto ta zinga mbote ti bantu ya nkaka. Dibundu na beto ta vanda kibeni na bumosi. Kana muntu mosi me pesa beto makasi, kikalulu na beto ya kuwa ve makasi nswalu ta sala nde mambu kubeba ve. (Nk. 37:8, noti na nsi ya lutiti; Bing. 14:29) Diambu ya kuluta mfunu kele nde beto ta landa mbandu ya Tata na beto ya zulu mpi beto ta pusana kibeni pene-pene na yandi. Ntima-nda kele kikalulu ya mbote kibeni yina ke natilaka beto yonso mambote. Yo ke vandaka ve pete ntangu yonso na kuvanda ntima-nda. Kansi beto ke ndima nde Yehowa ta sadisa beto na kulanda kuyedisa kikalulu yina. Beto ke vingila ti ntima-nda yonso nsi-ntoto ya mpa mpi beto ke ndima kibeni nde “meso ya Yehowa ke talaka bantu yina ke waka yandi boma, bantu yina ke vingilaka zola na yandi ya kwikama.” (Nk. 33:18) Beto yonso fwete landa kulwata ntima-nda. w23.08 22 § 7; 25 § 16-17

Kitatu 22 octobre

Lukwikilu, kana yo me konda bisalu, yo kele ya kufwa.​—Yak. 2:17.

Yakobo tubaka nde muntu lenda tuba nde yandi kele ti lukwikilu, kansi mambu yina yandi ke sala ke monisa ve nde yandi kele ti lukwikilu. (Yak. 2:1-5, 9) Yakobo tubilaka mpi muntu mosi yina me mona mpangi mosi ya ‘bakala to ya nkento me konda bilele to madia’ kansi yandi me sadisa yandi ve. Ata muntu yina kutuba nde yandi kele ti lukwikilu, mambu yina yandi ke sala ke monisa nde yandi kele ve ti lukwikilu. (Yak. 2:14-16) Yakobo tubaka nde mambu yina Rahabi salaka monisaka nde yandi vandaka ti lukwikilu. (Yak. 2:25, 26) Yandi waka mambu ya Yehowa mpi ndimaka nde yandi vandaka kusadisa bantu ya Izraele. (Yoz. 2:9-11) Mambu yina yandi salaka monisaka nde yandi vandaka ti lukwikilu. Yandi taninaka bantu ya Izraele zole yina kwendaka kutala mbanza ntangu luzingu na bo vandaka na kigonsa. Yo yina, Yehowa bingaka Rahabi muntu ya lunungu bonso Abrahami, ata yandi vandaka ve muntu ya Izraele mpi yandi vandaka muntu ya kukonda kukuka. Bo yonso zole vandaka mpi ve na nsi ya Nsiku ya Moize. Mbandu ya Rahabi ke longa beto nde yo kele kibeni mfunu nde mambu yina beto ke sala kumonisa nde beto kele ti lukwikilu. w23.12 5-6 § 12-13

Kiya 23 octobre

Beno vanda ti misisa ya ngolo mpi beno kangama ngolo na fondasio.​—Baef. 3:17.

Beto fwete suka ve kaka na kuzaba malongi ya ntete-ntete ya Biblia. Kansi beto fwete longuka “ata mambu ya mudindu ya Nzambi” na nsadisa ya mpeve santu na yandi. (1 Bak. 2:9, 10) Nge lenda yantika kulonguka Biblia na mudindu sambu yo sadisa nge na kupusana kibeni pene-pene ya Yehowa. Mu mbandu, nge lenda longuka mutindu yandi monisilaka bansadi na yandi ya ntangu ya ntama zola mpi mambu yina ke monisa kibeni nde yandi ke zolaka nge mpi. Nge lenda longuka mpi mutindu Yehowa vandaka kuzola nde bantu ya Izraele kusambila yandi mpi mutindu yandi ke zolaka nde beto sambila yandi bubu yai. To nge lenda longuka mbote-mbote baprofesi yina Yezu lungisaka ntangu yandi vandaka awa na ntoto. Mukanda Index des publications des Témoins de Jéhovah to Mukanda ya Bansosa Sambu na Bambangi ya Yehowa ta sadisa nge na kulonguka masolo yina mpi nge ta sepela mingi. Kana nge ke longuka Biblia na mudindu, yo ta kumisa lukwikilu na nge ngolo mpi nge ta “zwa nzayilu ya Nzambi.”​—Bing. 2:4, 5. w23.10 18-19 § 3-5

Kitanu 24 octobre

Kuluta yonso, beno zolana ngolo, sambu zola ke fikaka masumu mingi.​—1 Pie. 4:8.

Ngogo yina ntumwa Piere sadilaka sambu na “ngolo” ke tendula “kutanda.” Kitini ya zole ya verse ke monisa mambu yina beto ta sala kana beto kele ti zola ya ngolo sambu na bampangi. Zola ya ngolo ke sadisaka beto na kufika bifu ya bampangi. Beto baka mbandu mosi: Yindula nde mesa mosi kele ti batashe mingi na zulu na yo. Beto lenda tanda lele mosi na zulu na yo sambu yo fika batashe yina. Yo ta fika ve kaka tashe mosi to batashe zole mpamba, kansi yo ta fika batashe mingi. Mutindu mosi, kana beto kele ti zola ya ngolo sambu na bampangi na beto, beto ta fika to ta lolula bifu na bo. Beto ta lolula ve kaka kifu mosi to zole kansi bifu mingi. Zola na beto sambu na bampangi fwete vanda ngolo sambu yo pusa beto na kulolula bifu na bo ata ntangu yo kele ve pete na kusala yo. (Bakol. 3:13) Kana beto lolula bampangi na beto, beto ta monisa nde zola na beto sambu na bo kele ngolo mpi beto ta sepedisa Yehowa. w23.11 11-12 § 13-15

Mposo 25 octobre

Shafani yantikaka kutanga yo na ntwala ya ntotila.​—2 Bans. 34:18.

Ntangu ntotila Yoziasi kumaka ti bamvula 26, yandi yantikaka kuyidika tempelo. Ntangu bo vandaka kuyidika yo, bo zwaka “mukanda ya Nsiku ya Yehowa yina yandi pesaka na nzila ya Moize.” Ntangu bo tangilaka Yoziasi mukanda yango, yo pusaka yandi na kusala mambu yina ke wakana ti yina mukanda yango vandaka kutuba. (2 Bans. 34:14, 19-21) Keti nge ke sepelaka kutanga Biblia konso kilumbu? Kana nge ke meka kutanga yo, keti nge ke sepela ti yo? Keti nge ke simbaka baverse yina lenda sadisa nge? Ntangu yandi vandaka ti bamvula kiteso ya 39, yandi bakaka lukanu mosi ya mbi yina nataka yandi na lufwa. Yandi kuditudilaka ntima na kisika ya kulomba lutwadisu ya Yehowa. (2 Bans. 35:20-25) Beto lenda baka dilongi mosi. Ata beto kele bambuta to beto ke longukaka Biblia banda ntama, beto fwete landa kusosa lutwadisu ya Yehowa. Yo ke tendula nde beto fwete samba Yehowa mbala na mbala sambu na kulomba yandi lutwadisu, kulonguka Ndinga na yandi mpi kulanda bandongisila ya Bakristu ya kuyela na kimpeve. Yo ta sala nde, beto sala ve bifu ya nene mpi beto vanda na kiese ya mingi.​—Yak. 1:25. w23.09 12 § 15-16

Lumingu 26 octobre

Nzambi kele mbeni ya bantu ya lulendo, kansi yandi ke monisaka ntima ya mbote ya nene na bantu ya kudikulumusa.​—Yak. 4:6.

Biblia ke tubilaka bankento mingi yina vandaka kuzola Yehowa mpi vandaka kusadila yandi. Bo vandaka “bantu ya ke lutisaka ve ndilu na bikalulu na bo” mpi “bantu ya kwikama na mambu yonso.” (1 Tim. 3:11) Diaka, baleke ya bankento lenda zwa na mabundu na bo, bampangi-bankento ya kuyela na kimpeve yina kele bambandu ya mbote ya bo lenda landa. Baleke ya bankento, beno tala bampangi-bankento yina beno me zaba ya kele bambandu ya mbote yina beno lenda landa. Beno tala bikalulu na bo ya mbote. Na nima, beno tala mutindu beno lenda kuma mpi ti bikalulu yango. Kudikulumusa kele kikalulu ya mfunu mingi sambu na Mukristu ya kuyela na kimpeve. Kana nkento kele muntu ya kudikulumusa, yandi ta vanda ti kinduku ya mbote ti Yehowa mpi ti bantu ya nkaka. Mu mbandu, nkento yina ke zolaka Yehowa ta lemfuka na kudikulumusa yonso na mambu yina kele na 1 Bakorinto 11:3. Na verse yina, Yehowa ke tendula nani yandi me pesaka mukumba ya kutwadisa dibundu mpi dibuta. w23.12 18-19 § 3-5

Kintete 27 octobre

Babakala fwete zola bankento na bo . . . bonso nitu na bo mosi.​—Baef. 5:28.

Yehowa ke zolaka nde bakala kuzola nkento na yandi, kulungisa bampusa na yandi ya kinsuni mpi ya kimpeve. Yandi fwete vanda mpi nduku ya ngolo ya nkento na yandi. Kukuma ti mayele ya kuyindula, kuzitisa bankento mpi kuvanda muntu yina bo lenda tudila ntima ta sadisa nge na kuvanda bakala ya mbote. Na nima ya kukwela, nge lenda kuma papa. Inki mutindu mbandu ya Yehowa lenda sadisa nge na kuvanda papa ya mbote? (Baef. 6:4) Yehowa songaka Mwana na yandi Yezu na pwelele yonso nde yandi ke zolaka yandi mpi nde yandi me ndima yandi. (Mat. 3:17) Kana nge kuma papa, sala yonso sambu na kundimisa bana na nge mbala na mbala nde nge ke zolaka bo. Sikisa bo mbala na mbala sambu na mambu ya mbote yina bo ke sala. Batata yina ke landaka mbandu ya Yehowa ke sadisaka bana na bo na kukuma Bakristu ya kuyela na kimpeve. Nge lenda yilama banda bubu yai sambu na kulungisa mukumba yina kana nge ke zola bantu ya dibuta na beno, bampangi na dibundu mpi kana nge ke songa bo nde nge ke zolaka bo mpi nge ke bakaka bo na valere.​—Yoa. 15:9. w23.12 28-29 § 17-18

Kizole 28 octobre

[Yehowa] kele lutaninu ya bantangu na nge.​—Yez. 33:6.

Ata beto kele bansadi ya Yehowa, beto ke kutanaka ti mambu ya mpasi mpi beto ke belaka kaka mutindu yo ke kuminaka mpi bantu yonso. Diaka, bantu yina ke teleminaka bansadi ya Nzambi lenda telemina beto to kuniokula beto. Yehowa ke pesaka nzila nde mambu yina kukumina beto, kansi yandi ke sila beto nde yandi ta sadisa beto. (Yez. 41:10) Yandi lenda sadisa beto na kulanda kuvanda na kiese, na kubaka balukanu ya mbote mpi na kukangama kaka na yandi ata beto ke kutana ti bampasi ya nki mutindu. Yehowa ke sila nde yandi ta pesa beto “ngemba ya Nzambi.” (Bafil. 4:6, 7) Ngemba yango kele kuvanda pima mpi kudiyangisa ve na mabanza mpi na ntima. Beto ke waka mutindu yina kana beto kele ti kinduku ya mbote ti Yehowa. Ngemba yango “me luta mayele yonso ya kubakisa mambu,” disongidila yo me luta yina beto lenda yindula. Keti yo me kuminaka nge dezia nde nge samba Yehowa ngolo kibeni mpi na nima nge wa ngemba yina yitukisaka nge? Ngemba yina kele “ngemba ya Nzambi.” w24.01 20 § 2; 21 § 4

Kitatu 29 octobre

Bika mono kumisa Yehowa; bika nde bima yonso yina kele na kati na mono kukumisa zina na yandi ya santu.​—Nk. 103:1.

Bantu yina ke zolaka Nzambi ke sepelaka kukumisa zina na yandi na ntima na bo ya mvimba. Ntotila Davidi bakisaka nde kukumisa zina ya Yehowa kele kukumisa Yehowa yandi mosi. Zina ya Yehowa ke tendula mpi lukumu na yandi. Yo yina ntangu beto ke waka zina ya Yehowa, beto ke yindulaka bikalulu na yandi yonso ya mbote kibeni mpi mambu ya mbote yina yandi me salaka. Sambu na Davidi, zina ya Yehowa vandaka santu mpi yandi vandaka kukumisa yo. Yandi vandaka kuzola kukumisa yo na ‘bima yonso yina vandaka na kati’ na yandi, disongidila na ntima na yandi ya mvimba. Mutindu mosi mpi Balevi vandaka kukumisa Yehowa. Bo tubaka na kudikulumusa yonso nde bangogo na bo lendaka kumonisa kibeni ve lukumu yonso yina bo fwete pesa na zina ya santu ya Yehowa. (Neh. 9:5) Ya kieleka, mambu yina bo tubaka na kudikulumusa yonso sambu na kukumisa Yehowa na ntima ya mvimba, pesaka yandi kiese mingi kibeni. w24.02 9 § 6

Kiya 30 octobre

Na kiteso yina beto me yela, beto landa kutambula na mutindu yina me fwana na nzila yai mosi.​—Bafil. 3:16.

Yehowa ta yindula ve nde nge me kuka ve sambu nge kuditudilaka lukanu yina nge ta kuka ve kulungisa. (2 Bak. 8:12) Baka malongi na mambu ya mpasi yina lenda salama. Kuvila ve balukanu yina nge me lungisaka dezia. Biblia ke tuba nde: “Nzambi me konda ve lunungu sambu yandi vila kisalu na beno.” (Baeb. 6:10) Nge mpi nge fwete vila ve balukanu yina nge me lungisaka. Yindula balukanu yina nge me lungisaka dezia. Mu mbandu, kukumisa kinduku na nge ti Yehowa ngolo, kulonga bantu ya nkaka mambu na yandi to kubaka mbotika. Mutindu nge salaka bikesa ya kulungisa balukanu na nge ya kimpeve na bilumbu ya me luta, nge lenda landa mpi kusala bikesa ya kulungisa lukanu yina nge me kuditudila. Yehowa ta sadisa nge na kulungisa lukanu na nge Ntangu nge ke landa kusala yonso sambu na kulungisa lukanu na nge ya kimpeve, kuvila ve na kuyindula mutindu Yehowa ke sadisa nge mpi ke sakumuna nge na kulungisa yo. (2 Bak. 4:7) Kana nge yambula ve, nge ta baka balusakumunu mingi kibeni.​—Bag. 6:9. w23.05 31 § 16-18

Kitanu 31 octobre

Tata yandi mosi ke zolaka beno, sambu beno me zolaka mono mpi me kwikilaka nde mono kwisaka bonso mumonisi ya Nzambi.​—Yoa. 16:27.

Yehowa ke sosaka mabaku ya kumonisa bansadi na yandi nde yandi ke zolaka bo mpi nde yandi ke ndimaka bo. Biblia ke tubila bambala zole yina Yehowa songaka Yezu nde yandi kele Mwana na yandi yina yandi ke zolaka mingi mpi yina yandi ke ndimaka. (Mat. 3:17; 17:5) Keti nge mpi ke zolaka nde Yehowa kusonga nge nde yandi ke ndimaka nge? Yehowa ke solulaka ve ti beto kimuntu-kimuntu, kansi yandi ke solulaka ti beto na nzila ya Biblia. Kana beto ke tanga mambu yina Yezu songaka balongoki na yandi na zola yonso na Baevanzile, yo kele bonso nde beto ke “wa” Yehowa ke songa beto mambu yango. Yezu landaka mbandu ya Tata na yandi na mutindu ya kukuka. Yo yina, ntangu beto ke tangaka mutindu Yezu vandaka kusonga balongoki na yandi ya kukonda kukuka, bayina vandaka kusadila Yehowa na mutindu ya mbote nde yandi ke ndimaka bo, beto lenda mona na mabanza mutindu Yehowa ke songa beto mpi mambu yina. (Yoa. 15:9, 15) Kana beto ke kutana ti bampasi, yo ke tendula ve nde Nzambi ke ndima beto diaka ve. Kansi, bampasi yina ke pesaka beto mabaku ya kumonisa nde beto ke zolaka Nzambi mingi mpi beto ke tudilaka yandi ntima. Diaka, ntangu beto ke kutana ti bampasi yina, beto ta mona mutindu Yehowa ke zolaka beto mpi mutindu yandi ke sadisaka beto na kukanga ntima.​—Yak. 1:12. w24.03 28 § 10-11

    Mikanda ya Kikongo (1982-2026)
    Basika
    Kota
    • Kikongo (Rép. dém. du congo)
    • Kabula
    • Mambu ya Nge Me Zola
    • Copyright © 2025 Watch Tower Bible and Tract Society of Pennsylvania
    • Bantuma ya Kulanda na Ntwala ya Kusadila
    • Bansiku ya Ke Tadila Kinsweki
    • Paramètres de confidentialité
    • JW.ORG
    • Kota
    Kabula