Pona na Kusadila Yehowa Ntangu Nge Ke Leke
“Landa kaka mambu yina ya nge longukaka, ti [yina bo ndimisaka nge na kukwikila, NW].”—2 TIM. 3:14.
1. Inki mutindu Yehowa ketadilaka kisalu ya Bambangi na yandi yina kele baleke?
KISALU ya santu yina baleke kesalaka ke na mfunu mingi na meso ya Yehowa na mpila nde yandi tubaka mbikudulu mosi sambu na bo. Muyimbi-bankunga kuyimbaka nde: “Bantu na nge takudipesa na luzolo na bo mosi na kilumbu ya nge tasonga ngolo ya basoda na nge. Na nsemo ya busantu na nge, banda na luyantiku ya kilumbu, nge kele na kibuka ya baleke bonso malulu.” (Nk. 110:3) Ya kyeleka, Yehowa ketadilaka na mbalu mingi baleke yina kesadilaka yandi na luzolo yonso.
2. Sambu na yina metala luzingu na bo na bilumbu kekwisa, nki bupusi baleke kekutana ti yo na bantu ya nsi-ntoto bubu yai?
2 Beno baleke yina kele na dibundu ya Bukristu, keti beno mekudipesaka na Yehowa? Baleke mingi lenda mona nde yo kele mpasi na kubaka desizio ya kusadila Nzambi ya kyeleka. Bantu ya kesalaka mumbungu, balongi, mpi bantangu yankaka bantu ya dibuta ti banduku, kepusaka baleke na kulanda balukanu ya kinsuni. Ntangu baleke kelandaka balukanu ya kimpeve, mbala mingi bantu ya nsi-ntoto kesekaka bo. Kansi, kusadila Nzambi ya kyeleka kele mutindu ya luzingu ya kuluta mbote yina beno lenda landa. (Nk. 27:4) Na yina metala dyambu yai, beto tadila bangyufula tatu: Sambu na nki beno fwete sadila Nzambi? Inki mutindu beno lenda nunga na kuzinga luzingu ya muntu ya mekudipesaka na Nzambi, ata konso mambu yina bantu lenda tuba to kusala? Inki mabaku ya kitoko ya kisalu ya santu beno lenda sadila?
Kusadila Yehowa Ke Dyambu ya Mbote Yina Muntu Fwete Sala
3. Inki mutindu bima yina Yehowa megangaka fwete vanda na bupusi na luzingu na beto?
3 Sambu na nki beno fwete sadila Nzambi ya kyeleka mpi ya moyo? Kusonga 4:11 kepesa kikuma ya kuluta mfunu: “Nge Mfumu Nzambi na beto, nge me lunga na kubaka lukumu, luzitu ti ngolo. Sambu nge muntu salaka bima yonso; bima yonso ke zingaka, bo ke na moyo kaka sambu na luzolo na nge.” Yehowa kele Ngangi ya mbote yina megangaka bima yonso ya kele na luzingu. Ntoto kele kitoko kibeni! Banti, bintuntu, bambisi, banzadi-mungwa, bangumba, mpi banto ya masa ya nene, bima yai yonso, Yehowa muntu mesalaka yo. Nkunga 104:24 ketuba nde: “Ntoto me fulukaka na bima yonso ya [Nzambi] salaka.” Beto lenda monisa mpenza ntonda na mutindu Yehowa mepesaka beto na zola yonso nitu mpi mabanza yina kesadisaka beto na kusepela na ntoto mpi na bima ya mbote yina kele na ntoto. Ya kyeleka, ntonda na beto ya masonga sambu na bima ya kitoko yina Yehowa megangaka fwete pusa beto na kusadila yandi!
4, 5. Inki mambu Yehowa kusalaka ya kupusaka Yozue na kukwenda penepene ya Yehowa?
4 Kikuma yankaka ya kusadila Yehowa kele na mambu yina Yozue, ntwadisi ya bantu ya Izraele, kutubaka. Penepene ya nsuka ya luzingu na yandi, yandi zabisaka bantu ya Nzambi nde: “Beno me zaba mbote-mbote na ntima na beno yonso nde Mfumu Nzambi, Nzambi na beno, me sala mambu yonso ya yandi tubaka; ata kima mosi bikalaka ve, yandi me lungisa mambu yonso mpenza.” Sambu na nki Yozue kutubaka mambu yai?—Yoz. 23:14.
5 Sambu yandi yelaka na Ezipte, yo fwete vanda nde Yozue kuzabaka lusilu yina Yehowa kupesaka bantu ya Izraele nde yandi tapesa bo ntoto ya bo mosi. (Kuy. 12:7; 50:24, 25; Kub. 3:8) Na nima, yandi monaka mutindu Yehowa yantikaka kulungisa lusilu yango na ntangu Yandi pesaka Bandola Kumi na bantu ya Ezipte mpi kupusaka na ngolo Farao na kuyambula bana ya Izraele bo kwenda. Yozue kuvandaka na kati ya bantu yina kugulukaka na Nzadi-Mungwa ya Mbwaki, mpi yandi monaka ntangu nzadi yango kufwaka Farao ti basoda na yandi. Na nsungi ya nzyetolo ya nda na ‘ntoto ya zelo na zelo ya nene ti ya boma’ ya ntoto ya Sinai, Yozue kumonaka mutindu Yehowa kupesaka bantu ya Izraele konso kima yina bo vandaka na yo mfunu. Ata muntu mosi ve kufwaka na mpusa ya masa to na nzala. (Kul. 8:3-5, 14-16; Yoz. 24:5-7) Lere ntangu kulungaka sambu bantu ya Izraele kununga makanda ya ngolo ya Kanana mpi kubaka Ntoto ya Lusilu, Yozue kumonaka mutindu Nzambi, yina yandi ti bantu yankaka ya Izraele vandaka kusambila, kusadisaka bo na kisalu yina.—Yoz. 10:14, 42.
6. Inki tasadisa beno na kuyedisa mpusa ya kusadila Nzambi?
6 Yozue kuzabaka nde Yehowa kulungisaka balusilu na Yandi. Yo yina, yandi tubaka nde: “Mono ti fami na mono beto ta sadilaka Mfumu Nzambi.” (Yoz. 24:15) Ebuna beno? Ntangu beno keyindulaka balusilu yina Nzambi ya kyeleka melungisaka dezia mpi yina yandi melungisa ntete ve, keti yo kepesaka beno mpusa ya kusadila yandi bonso Yozue?
7. Sambu na nki mbotika ya masa kele kitambi ya mfunu ya kusala?
7 Kutala bima yina Yehowa megangaka mpi kuyindulula balusilu na yandi ya kitoko yina mefwana na kutudila ntima fwete pusa beno kaka ve na kudipesa na Yehowa, kansi mpi na kumonisa kudipesa yango na mbotika ya masa. Mbotika kele kitambi ya mfunu yina bantu ya kezola kusadila Nzambi fwete sala. Dyambu yai kumonanaka pwelele na Yezu yina kele Mbandu na beto. Na ntwala ya kuyantika kisalu na yandi bonso Mesia, Yezu kukwendaka na Yoane Mbotiki sambu na kubaka mbotika. Sambu na nki Yezu kusalaka kitambi yina? Yandi tubaka nde: “Mono katukaka na zulu sambu na kwisa kusala luzolo na mono mosi ve, kansi sambu na kwisa kusala luzolo ya muntu yina tindaka mono.” (Yoa. 6:38) Sambu na kumonisa nde yandi kudipesaka na kusala luzolo ya Tata na yandi, Yezu kubakaka mbotika.—Mat. 3:13-17.
8. Sambu na nki Timoteo kuponaka na kusambila Nzambi, mpi yo lenda lomba nde beno sala inki?
8 Beto tadila mpi mbandu ya Timoteo, leke mosi ya Mukristu yina Yehowa kupesaka kisalu mpi mikumba mingi na nima. Sambu na nki Timoteo kuponaka na kusambila Nzambi ya kyeleka? Biblia kezabisa beto nde ‘yandi longukaka mambu mpi bo ndimisaka yandi mambu ya kukwikila.’ (2 Tim. 3:14) Kana beno melongukaka Ndinga ya Nzambi mpi bo mendimisaka beno na kukwikila nde malongi na yo kele ya kyeleka, beno kele mutindu mosi ti Timoteo. Ntangu yai, beno fwete baka desizio. Sambu na nki ve kuzabisa bibuti na beno mambu ya beno kezola kusala? Kumosi ti bankuluntu ya dibundu, bo lenda sadisa beno na kubakisa mambu yina Masonuku kelombaka sambu na kubaka mbotika.—Tanga Bisalu 8:12.
9. Kana beno sala kitambi ya kubaka mbotika, yo lenda vanda ti nki bupusi na zulu ya bantu yankaka?
9 Kana beno baka mbotika, yo kele luyantiku mosi ya mbote sambu na kusadila Nzambi ya kyeleka. Na ntangu beno kesala kitambi yina, beno kebaka ntinu na nzila yina kenataka na luzingu ya mvula na mvula mpi yina kepesa ntangu yai kyese ya kekatukaka na kusala luzolo ya Nzambi. (Baeb. 12:2, 3) Beno tapesa mpi kyese na bantu ya dibuta na beno yina kebakaka dezia ntinu na nzila yina mpi na banduku na beno yina kele na dibundu ya Bukristu. Dyambu ya kuluta mfunu, beno tasepedisa ntima ya Yehowa. (Tanga Bingana 23:15.) Ya kyeleka, bantu yankaka lenda bakisa ve sambu nki beno mepona na kusambila Yehowa, mpi bo lenda yindula nde yo kele ve desizio ya mbote. Nkutu, bo lenda menga beno. Kansi, beno lenda nunga mambu yai ya mpasi.
Ntangu Bantu Yankaka Keyula Beno Bangyufula to Kemenga Beno
10, 11. (a) Inki bangyufula bantu lenda yula beno na yina metala desizio na beno ya kusadila Nzambi? (b) Inki dilongi beno lenda baka na mutindu Yezu kupesaka bamvutu na bangyufula ya metala lusambu ya kyeleka?
10 Desizio na beno ya kusadila Yehowa lenda yitukisa banduku ya nzo-nkanda, bamfinangani, mpi bantu ya dibuta na beno. Bo lenda yula beno sambu na nki beno mepona na kulanda nzila yai mpi mambu yina beno kekwikilaka. Inki mutindu beno fwete pesa mvutu? Ya kyeleka, beno fwete tadila mbote mabanza ti mawi na beno sambu na kukuka kutendula bikuma ya desizio na beno. Sambu na kupesa bamvutu na bangyufula ya metala mambu ya beno kekwikilaka, mbandu ya Yezu kele mbandu ya kuluta mbote yina beno lenda landa.
11 Ntangu bamfumu ya mabundu ya Bayuda kuyulaka Yezu bangyufula na yina metala lufutumuku, yandi bendaka dikebi na bo na verse mosi yina bo vandaka kutadila ve. (Kub. 3:6; Mat. 22:23, 31-33) Ntangu longi mosi ya bansiku kuyulaka yandi nki kuvandaka munsiku ya kuluta nene, Yezu kuvutukilaka baverse ya Biblia yina kufwanaka sambu na yandi. Bakala yango kutondaka Yezu sambu na mvutu yina. (Levi 19:18; Kul. 6:5; Mar. 12:28-34) Mutindu Yezu vandaka kusadila Masonuku mpi mutindu na yandi ya kutuba kusalaka nde bantu “kukabana” sambu na yandi, ebuna bambeni na yandi kukukaka ve kusala yandi mbi. (Yoa. 7:32-46) Ntangu beno kepesa mvutu na bangyufula ya metala lukwikilu na beno, beno sadila Biblia mpi beno pesa mvutu “na malembe ti na luzitu.” (1 Pie. 3:15, 16) Kana beno kezaba ve mvutu na ngyufula mosi, beno ndima nde beno mezaba ve mpi beno zabisa na bawi na beno nde beno tasala bansosa. Na nima, beno sosa disolo yango na Index des publications Watch Tower to na Watchtower Library na CD-ROM, kana yo kele na ndinga na beno. Kana beno kudibongisa mbote, beno tazaba “kupesa bamvutu ya mbote.”—Kol. 4:6.
12. Sambu na nki beno fwete bika ve nde minyokudi kulembisa beno?
12 Katula bangyufula ya metala desizio ya beno mebaka ya kusadila Nzambi mpi mambu ya beno kekwikilaka, beno lenda kutana mpi ti mambu mingi yankaka. Beno vila ve nde mbeni ya Nzambi, Satana Dyabulu, keyala nsi-ntoto. (Tanga 1 Yoane 5:19.) Yo tavanda kukonda mayele na kuvingila nde bantu yonso kusikisa to kundima beno, mpi beno lenda kutana ti kimbeni. Bantu yankaka lenda ‘vwenza beno,’ mpi bo lenda landa kaka na kusala yo. (1 Pie. 4:4) Kansi, beno yibuka nde beno kele ve beno mosi. Yezu Kristu mpi bo monisaka yandi mpasi. Dyala, ntumwa Piere mpi kumonaka mpasi, mpi yandi sonikaka nde: “Bampangi na mono ya mono ke zolaka, beno yituka ve kana beno ke mona mpasi mingi, bonso nde kima mosi ya nene me kwisila beno. Kansi beno vanda na kiese kana beno ke mona mpasi yina ya Kristo monaka.”—1 Pie. 4:12, 13.
13. Sambu na nki Bakristu lenda vanda na kyese ntangu bo kenyokula bo?
13 Sambu beno kele Bakristu, kukanga ntima na minyokudi to na kimbeni kele kikuma ya fwete pesa beno kyese. Sambu na nki? Sambu kusosa nde bantu ya nsi-ntoto kundima beno tamonisa nde beno kezinga na kuwakana ti minsiku ya Satana, kansi ya Nzambi ve. Yezu kukebisaka nde: “Mawa na beno kana bantu yonso kutuba mambu ya mbote sambu na beno, sambu bankaka na bo ya ntama tubaka mutindu mosi sambu na baprofete ya luvunu.” (Luka 6:26) Minyokudi kemonisaka nde Satana ti nsi-ntoto na yandi kewila beno makasi sambu beno kesadila Yehowa. (Tanga Matayo 5:11, 12.) Dyaka, “kana bo ke finga beno sambu beno kele bakristo,” yo fwete pesa beno kyese.—1 Pie. 4:14.
14. Inki mambote muntu lenda baka ntangu yandi kebikala ya kwikama na Yehowa ata bo kenyokula yandi?
14 Ntangu beno kebikalaka ya kwikama na Yehowa ata bo kenyokula beno, yo kenataka mambote iya. Beno ketaka kimbangi sambu na Nzambi ti Mwana na yandi. Kukanga ntima mpi kwikama na beno kesyamisaka bampangi na beno Bakristu. Bantu yankaka yina mezaba ve Yehowa lenda baka kikesa ya kusosa yandi. (Tanga Filipi 1:12-14.) Mpi, na ntangu beno kemona mutindu Yehowa kepesa beno ngolo ya kukanga ntima na bampasi, zola na beno sambu na yandi keyelaka.
“Kyelo Mosi ya Nene” Mekanguka Sambu na Beno
15. Inki ‘kyelo ya nene’ bo kangudilaka ntumwa Polo?
15 Sambu na yina metala kisalu na yandi ya kusamuna na Efezo, ntumwa Polo kusonikaka nde: “Bo mekangudila mono kyelo mosi ya nene yina kenataka na kisalu.” (1 Kor. 16:8, 9, NW) Yo vandaka kyelo ya kenataka na kisalu mosi ya nene ya kusamuna nsangu ya mbote mpi ya kukumisa bantu balongoki na mbanza yina. Sambu yandi kotaka na kyelo yina, Polo kusadisaka bantu mingi na kulonguka mambu ya metala Yehowa mpi na kusambila Yandi.
16. Inki mutindu bapakulami yina mebikalaka kukotaka na kyelo yina ‘kukangukaka’ na mvu 1919?
16 Na mvu 1919, Yezu Kristu yina mebakaka lukumu, ‘kukangulaka kyelo’ mosi na ntwala ya bapakulami yina mebikalaka. (Kus. 3:8) Bo kotaka na kyelo yina, ebuna bo yantikaka kusamuna nsangu ya mbote mpi kulonga kyeleka ya Biblia ti kikesa kibeni kuluta mutindu bo vandaka kusala ntete. Kisalu na bo mebutaka nki mbuma? Ntangu yai, nsangu ya mbote kelongama na ntoto ya mvimba, mpi bantu kiteso ya bamilio nsambwadi kele ti kivuvu ya kubaka luzingu ya mvula na mvula na nsi-ntoto ya mpa ya Nzambi.
17. Inki mutindu beno lenda kota na “kyelo mosi ya nene yina kenataka na kisalu”?
17 “Kyelo mosi ya nene yina kenataka na kisalu” kele kaka ya kukanguka ngolo na bansadi yonso ya Yehowa. Bantu yina kekotaka na kyelo yina kebakaka kyese na mutindu bo kesalaka mingi na kisalu ya kusamuna nsangu ya mbote. Beno baleke yina kele bansadi ya Yehowa, keti beno kebakaka na mfunu mingi dibaku ya nene kibeni ya beno kele na yo ya kusadisa bankaka na ‘kundima nsangu ya mbote’? (Mar. 1:14, 15) Keti beno metadilaka kusala bonso mupasudi-nzila nsadisi to ya ntangu yonso? Kutunga Banzo ya Kimfumu, kusala na Betele, mpi kusala kisalu ya kimisionere kele mabaku yankaka yina mingi na kati na beno lenda sadila. Sambu nsi-ntoto ya mbi ya Satana kekwenda nswalu na nsuka, yo kelomba kusadila mabaku yai ya kisalu ya Kimfumu kukonda kusukinina mpenza. Keti beno takota na ‘kyelo ya nene’ lere yai ya ntangu kele ntete?
“Beno Meka, Beno Tala Beno Mosi Mutindu Mfumu Nzambi Kele Mbote!”
18, 19. (a) Inki kusadisaka Davidi na kuvanda ti mpusa ya ngolo ya kusadila Yehowa? (b) Inki kemonisa nde Davidi kubokutaka ve ata fyoti na kusadila Nzambi?
18 Muyimbi-bankunga, yina kusonikaka na ngolo ya mpeve ya Nzambi, kubingaka bankaka na ‘kumeka mpi kutala bo mosi mutindu Mfumu Nzambi kele mbote.’ (Nk. 34:9) Ntangu Davidi Ntotila ya Izraele kuvandaka leke mpi ngungudi, Yehowa kugulusaka yandi na maboko ya bambisi ya makasi. Nzambi kusadisaka yandi ntangu yandi nwanaka ti Goliati mpi kugulusaka yandi na bampasi mingi yankaka. (1 Sam. 17:32-51; Nk. 18:1) Zola ya nene ya Nzambi kupusaka Davidi na kusonika nde: “Nzambi na mono, nge me sadila beto mambu mingi ya mbote; nzambi ya nkaka kele ve bonso nge. Nge me sadila beto mambu mingi ya kuyituka.”—Nk. 40:6.
19 Davidi kumaka kuzola Yehowa mingi mpenza mpi yandi vandaka na mpusa ya kukumisa Yandi na ntima ti mabanza na yandi ya mvimba. (Tanga Nkunga 40:9-11.) Mutindu bamvula kulutaka, Davidi kubokutaka ve ata fyoti na mpila yandi sadilaka luzingu na yandi na kusambila Nzambi ya kyeleka. Kuzinga na kuwakana ti kudipesa na yandi na Nzambi kuvandaka dikabu ya nene sambu na yandi, kisika yandi vandaka kubaka kyese yina beto lenda tesa ve. Na kimununu, Davidi kutubaka nde: “Mfumu, ntima na mono kele na nge; katuka ntangu mono vandaka leki tii bubu yai, mono ke tulaka nge ntima. Awa ya mono me kuma mbuta, nsuki na mono me kuma mpembe, kubikisa mono ve, Nzambi.” (Nk. 71:5, 18) Ata ngolo ya nitu ya Davidi kumanaka, ntima yina yandi vandaka kutula na Yehowa mpi kinduku na yandi ti Yehowa kukumaka ngolo.
20. Sambu na nki kusadila Nzambi kele mutindu ya kuluta mbote ya nge lenda sadila luzingu na nge?
20 Luzingu ya Yozue, Davidi, ti Timoteo keyika na banzikisa ya kemonisa nde kusadila Yehowa kele mutindu ya kuluta mbote ya kusadila luzingu na beno. Mambote ya kinsuni ya ntangu fyoti yina beno lenda baka na kisalu mosi na nsi-ntoto yai lenda fwanana ve ti mambote mingi kibeni yina beno tabaka na “kusadila [Yehowa] na ntima na beno yonso.” (Yoz. 22:5) Kana nge mekudipesaka ntete ve na Yehowa na kisambu, kudiyula nde, ‘Inki kekangaka munu nzila na kukuma Mbangi ya Yehowa?’ Kana nge kele nsadi ya Yehowa ya mebakaka mbotika, keti nge tazola kubaka kyese mingi na luzingu? Ebuna, sala mingi na kisalu na nge ya kusamuna, mpi landa na kuyela na kimpeve. Disolo yina kelanda tamonisa mutindu nge lenda landa mbandu ya ntumwa Polo sambu na kuyela na kimpeve.
Inki Mvutu Nge Tapesa?
• Pesa bikuma zole ya beto fwete sadila Nzambi.
• Inki kusadisaka Timoteo na kubaka desizio ya kusadila Nzambi?
• Sambu na nki nge fwete bikala ya kwikama na ntangu bo kemonisa nge mpasi?
• Inki mabaku ya kisalu nge lenda sadila?
[Kifwanisu ya kele na lutiti 22]
Kusadila Yehowa kele mutindu ya luzingu ya kuluta mbote
[Kifwanisu ya kele na lutiti 23]
Keti nge lenda pesa mvutu na bangyufula ya metala lukwikilu na nge?