Ngiufula Mosi ya Mpasi

BANTU ke vandaka ti bangindu mingi ya kuswaswana sambu na luzingu mpi lufwa. Bantu ya nkaka ke yindulaka nde bo ta landa kuzinga na nima ya lufwa, ziku na mutindu ya nkaka to na kisika ya nkaka. Bankaka ke yindulaka nde bo ta vutuka na luzingu mpi ta zinga diaka. Kansi bankaka diaka ke yindulaka nde lufwa kele nsuka ya mambu yonso.

Ziku nge ke tadilaka diambu yai na mutindu na nge mosi, na kutadila mpila ya nge me yelaka to mambu yina bo me longaka nge. Sambu bantu ke vandaka ti bangindu ya me swaswana mingi kibeni sambu na mambu yina ke salamaka na lufwa, keti kele ti muntu to kisika yina beto lenda zwa bamvutu ya mbote mpi ya kieleka na ngiufula yai ya mpasi?

Na nsungi ya bamvu-nkama mingi, bamfumu ya mabundu me longaka dilongi ya ke tubaka nde moyo ke fwaka ve. Bantu ya mabundu yonso ya nene—Bakristu, ba Hindu, Bayuda, Bamizilma, mpi bantu ya mabundu ya nkaka—ke kwikilaka nde bantu kele ti moyo yina ke fwaka ve; bo ke tubaka nde kana muntu me fwa, moyo ke fwaka ve mpi yo ke landaka kuzinga na nsi ya bampeve. Kansi, bantu ya Buda ke kwikilaka nde na nzila ya kubutuka mbala mingi, ngolo yina ke vandaka na kati ya muntu lenda kuma na Nirvana, disongidila kuvanda na kiese mingi kibeni.

Sambu na malongi yai, bantu mingi na ntoto ya mvimba me kumaka kukwikila nde lufwa ke kangudilaka bantu nzila sambu bo kwenda kuzinga na kisika ya nkaka. Yo yina, sambu na bantu mingi, lufwa kele kitini ya mfunu ya luzingu, mpi bo ke yindulaka nde lufwa kele na kati ya luzolo ya Nzambi. Kansi, nki Biblia ke tubaka sambu na diambu yango? Nge lenda tanga disolo ya ke landa. Ziku mvutu ya nge ta baka ta yitukisa nge.