Bamvutu na Bangyufula na Beno
◼ Keti yo kele mbote nde bawi kubula maboko na nima ya konso disolo na Nzo-Nkanda ya Kisalu ya Teokrasi mpi na Lukutakanu ya Kisalu?
Ntangu Ngangi, Yehowa, kugangaka ntoto, “bambwetete vandaka kuyimba na suka-suka ya kilumbu yina, bawanzio mpi vandaka kutula milolo sambu na kiese.” (Yobi 38:7) Bawanzio yai zolaka kupesa Yehowa lukumu sambu na kisalu na yandi ya kuyituka ya kuganga, yina vandaka mutindu mosi ya mpa ya kumonisa mayele, bumbote mpi ngolo na yandi.
Yo kele dyambu ya mbote sambu na beto na kumonisa ntonda ya masonga sambu na bikesa ya bampangi na beto mpi masolo yina bo kesalaka. Mu mbandu, mbala mingi beto kebulaka maboko sambu na badiskure mpi bansonga yina kesalamaka na balukutakanu yankaka bonso balukutakanu ya nene mpi ya distrike. Bitini ya masolo yina kesalamaka kuna kelombaka ntangu mingi ti bikesa sambu na kubongisa yo. Maboko ya beto kebulaka kemonisaka kaka ve nde beto mesepela na kisalu ya ngolo ya mutubi, kansi mpi sambu na malongi yina Yehowa kepesa na nzila ya Ndinga mpi organizasio na yandi.—Yez. 48:17; Mat. 24:45-47.
Ebuna nki beto lenda tuba na yina metala kubula maboko sambu na masolo yina kesalamaka na Nzo-Nkanda ya Kisalu ya Teokrasi mpi na Lukutakanu ya Kisalu? Kele ve ti nsiku mosi ya sikisiki ya kebuyisa kubula maboko mingimingi kana yo mesalama kukonda kukana, mu mbandu kana mwana ya nzo-nkanda memanisa kusala disolo na yandi ya ntete na nzo-nkanda. Kansi, kubula maboko lenda kuma kukonda mpasi kikalulu mpi kuvidisa ntendula na yo. Yo yina, mbala mingi beto kebulaka ve maboko na konso disolo.
Ata beto lenda bula ve maboko na masolo mingi ya bo kesalaka na Nzo-Nkanda ya Kisalu ya Teokrasi mpi na Lukutakanu ya Kisalu, kele ti mitindu yankaka yina beto yonso lenda monisa ntonda sambu na malongi mpi bikesa ya bampangi yina kesala yo. Beto lenda sala yo kana beto vanda pima mpi kutula dikebi ya mingi na mitubi. Mpi na nima ya lukutakanu, mbala mingi mpila kevandaka ya kwenda kukutana ti bo sambu na kumonisa ntonda na bikesa yina bo salaka.—Ef. 1:15, 16.