Vanda Nsadisi ya Mbote na Kisalu ya Kusamuna
1. Inki mambote kekatukaka na kusala ti muntu yankaka na kisalu ya kusamuna?
1 Na dibaku mosi, Yezu kutindaka balongoki 70 na kukwenda kusamuna, mpi yandi tindaka bo “zole-zole.” (Luka 10:1) Ntembe kele ve nde ngidika yai kupesaka balongoki na yandi nzila ya kusadisana mpi kupesana kikesa na ntangu bo vandaka kusamuna. Na ntangu beto kele ti nsamuni yankaka na kisalu ya kusamuna, inki mutindu beto lenda pesa lusadisu?
2. Ntangu mpangi ya beto kesamuna ti yandi kezabisa nsangu, inki mutindu mpi sambu na nki beto fwete widikila?
2 Na Kuwidikilaka: Widikila na dikebi yonso ntangu mpangi ya nge kesamuna ti yandi kezabisa nsangu. (Yak. 1:19) Kana yandi ketanga verse, landa kumosi na Biblia na nge. Tala muntu yina ketuba, yo vanda mpangi ya kesamuna ti nge to muwi. Kana nge tula mpenza dikebi na masolo, yo lenda syamisa muwi na kusala mutindu mosi.
3. Inki ntangu mpangi ya beto kesamuna ti yandi lenda lomba beto na kutuba?
3 Na Kuswasukisaka Inki Ntangu Kutuba: Ntangu beto kele ti mpangi yina kezabisa nsangu, beto kepesaka yandi lukumu kana beto kepesa yandi nzila ya kubaka ntwala. (Roma 12:10) Beto fwete buya kuzenga yandi ndinga. Kana yandi vidisa ngindu to muwi kubasisa ntembe to kuyula ngyufula mpi mpangi ya beto kele ti yandi kulomba lusadisu, beto fwete sala ngolo na kuyika bangindu na mambu yina yandi metuba na kisika ya kukotisa disolo yankaka. (Bing. 16:23; Lo. 3:1, 7) Kana beto ketuba, bangogo na beto fwete wakana ti kimbangi yina beto keta.—1 Kor. 14:8.
4. Inki tasala nde beto vanda na kyese mpi kununga na kisalu ya kusamuna?
4 Ntangu balongoki 70 yina bo tindaka zole-zole kumanisaka kusamuna, bo “kwisaka kuvutuka na kiese.” (Luka 10:17) Beto mpi tavanda na kyese mpi tanunga na kisalu ya kusamuna kana beto kewidikila mpi keswasukisa inki ntangu kutuba sambu na kusadisa bampangi ya beto kesala ti bo kisalu ya kusamuna.