Keti Nzozulu ya Nkengi Yina Kele ti Kingelesi ya Pete Tasadisa Nge?

Ntangu yai, nimero ya Kulonguka ya Nzozulu ya Nkengi, yina kele ti kingelesi ya pete mebasika. Bo mebasisa yo sambu na (1) bansamuni yina ketubaka Kingelesi kansi mbala yankaka bo melongukaka mingi ve, ebuna bangogo na yo ya pete tasadisa bo; (2) bansamuni yina Kingelesi kele ve ndinga na bo ya ntete; (3) baleke, ti bayina kele na nzo-nkanda ya primere mpi ya sekondere; (4) balongoki ya Biblia yina kele ti mfunu ya bangogo ya pete mpi ya pwelele sambu na kubakisa mambu ya kimpeve.

Banimero ya baparagrafe, bangyufula, mpi bantu-dyambu kele mutindu mosi ti yina ya Nzozulu ya Nkengi ya beto kesadilaka dezia. Malongi kele kaka ya mutindu mosi, kansi bangogo ya bo mesadila kele ya pete. Ata ntwadisi ya kulonguka ya Nzozulu ya Nkengi mpi mutangi tasadila Nzozulu ya Nkengi ya beto kesadilaka dezia, katula kaka kana bawi mingi kele ti Nzozulu ya Nkengi yina kele ti Kingelesi ya pete, bayina kesadila Nzozulu yai ya mpa tamona baverse ti bifwanisu ya mutindu mosi mpi bo lenda landa lutangu ya baparagrafe mpi kupesa bakomantere.

Bayina kemona nde yo tasadisa bo, bo fwete sala komande ya kimakulu mpi kupesa yo na mpangi yina ketalaka mambu ya baperiodike.