Sadila Metode Mosi ya Mbote

1. Bametode ya kuswaswana yina Bakristu ya ntete vandaka kusadila lenda pesa beto nki dilongi?

¹ Bakristu ya ntete samunaka nsangu ya mbote na bantu ya binkulu mpi ya mabundu ya kuswaswana. (Kol. 1:23) Ata nsangu vandaka ya mutindu mosi, disongidila Kimfumu ya Nzambi, bametode ya kusamuna swaswanaka na kutadila bawi na bo. Mumbandu, ntangu Piere kutubilaka Bayuda yina vandaka kuzitisa Masonuku mingi, yandi vutukilaka ntete mambu yina profete Yoele tubaka. (Bis. 2:14-17) Kansi, tala mutindu Polo yindulaka ti Bagreki na Bisalu 17:22-31. Bubu yai, na bateritware yankaka, bantu kezitisaka Masonuku mpi beto lenda sadila Biblia kukonda mpasi ntangu beto kesamuna nzo na nzo. Kansi yo lenda lomba nde beto vanda mayele ntangu beto kesolula ti bantu yina kesepelaka ve na Biblia, to na dibundu, to bayina kele ve na dibundu ya Bukristu.

2. Inki mutindu beto lenda kabula mikanda sambu na kusadisa bantu yina kezitisaka Biblia mpi bayina kesepelaka na yo ve?

² Kabula Mbote-Mbote Mikanda: Sambu na mvula ya kisalu yai, mikanda yina beto kekabulaka tasobaka na nima ya bangonda zole mpi beto tasadilaka bazulunalu, batrakiti mpi tumikanda. Ata bantu ya teritware na beto kesepelaka mpenza ve na Biblia, beto lenda zabisa bo disolo mosi ya kele na mukanda, yina tasepedisa bo. Ziku beto tatanga ve verse na mbala ya ntete ya beto mekutana ti muwi to kutubila mbala mosi Biblia, kansi kana yandi kumonisa mpusa, beto lenda vutukila yandi ti lukanu ya kusadisa yandi na kutula lukwikilu na Ngangi mpi na Ndinga na yandi. Kansi, kana beto kesamuna kisika yina bantu kezitisaka Biblia, beto lenda pesa mikanda mpi kusadila bametode yina kemonisa luzitu sambu na Biblia. Yo yina, beto lenda pesa mukanda Biblia Kelongaka to tumikanda Widikila Nzambi to Widikila Nzambi mpi Zinga Kimakulu konso ntangu, yo vanda beto kekabula mikanda yankaka na ngonda yina. Dyambu ya mfunu kele ya kusadila bametode ya mbote.

3. Na nki mutindu bantima ya bantu ya teritware na beto kele bonso ntoto?

³ Yidika Ntoto: Ntima ya muntu mefwanana ngolo ti ntoto. (Luka 8:15) Ntoto yankaka kelombaka kuyidika yo mbala mingi na ntwala nde bankeni ya kyeleka kutula misisa mpi kuyela. Bansamuni ya mvu-nkama ya ntete nungaka na kukuna na mitindu yonso ya ntoto, mpi yo pesaka bo kyese ya mingi. (Bis. 13:48, 52) Beto lenda nunga mpi kana beto ketula dikebi na bametode yina beto kesadila.