Keti Nge Lenda Ta Kimbangi na Nkokila?
1. Na kutadila muntu mosi ya mayele, nki ntangu Polo vandaka kusamuna nzo na nzo?
1 Mukanda mosi, Daily Life in Bible Times, kemonisa nde, ntumwa Polo vandaka kuta kimbangi ya nzo na nzo mbala mingi “yantika na nkokila (16h) tii na mpimpa.” Beto mezaba mpenza ve kana Polo vandaka ti manaka ya mutindu yina, kansi beto mezaba mpenza nde, Polo vandaka ti luzolo ya kusala “mambu yonso sambu na nsangu ya mbote.” (1 Bak. 9:19-23) Ziku, yandi vandaka kuyidika mambu na yandi sambu na kusamuna nzo na nzo na ntangu yina yandi lendaka kusolula ti bantu mingi.
2. Sambu na nki nkokila kevandaka ntangu mosi ya mbote ya kusala kisalu ya kusamuna?
2 Na bisika mingi, bansamuni kevandaka ti kikalulu ya kusamuna nzo na nzo na menemene na kati ya mposo. Keti ntangu yai kevandaka mpi mbote sambu na teritware na beto? Mupasudi-nzila mosi ketuba mambu yai na yina metala teritware na yandi: “Yo kele mpasi na kumona bantu na banzo na bo na ntangu. Kansi bantu mingi kevandaka na banzo na bo na nkokila.” Kuta kimbangi na nkokila lenda vanda dibaku ya mbote ya kukutana ti bantu, mingi-mingi babakala, sambu na kulonga bo nsangu ya mbote. Mbala mingi bawi kevandaka pima mpi kendimaka kusolula na luzolo yonso. Kana kusala mutindu yai tavanda mbote sambu na dibundu na beno, bankuluntu fwete yidika balukutakanu ya kisalu ya bilanga na nkokila.
3. Inki mutindu beto lenda sadila luswasukusu ntangu beto keta kimbangi na nkokila?
3 Sadila Luswasukusu: Kusadila luswasukusu kele mfunu mingi ntangu beto keta kimbangi na nkokila. Kana nge memona nde yo kele ntangu mosi ya mbote ve sambu na muwi, mu mbandu ntangu yandi kedia, yo kele mbote na kuzabisa yandi nde nge tavutuka na nima. Kana mudidi kele mingi, telama na kisika yina muwi lenda mona nge, mpi songa yandi nge kele nani mpi kikuma ya viziti na nge. Yo tavanda mpi mayele na kusamuna bantu zole to na kimvuka, mpi kutambula na babalabala yina kele ti nsemo ya mbote, kisika yina beno tavanda ve na kingenga. Beno kwenda ve na retare na ntangu yina tapesa bawi mpasi kana bo keyilama sambu na kukwenda kulala. (2 Bak. 6:3) Kana kartie yina kevandaka kigonsa na mpimpa, beno samuna na ntwala nde mpimpa kubwa.—Bing. 22:3.
4. Inki balusakumunu beto kebakaka ntangu beto ketaka kimbangi na nkokila?
4 Balusakumunu: Kisalu ya kusamuna kepesaka kiese mingi kana beto kekuka kuta kimbangi. Kana beto kekuka kuta kimbangi mingi, beto tavanda mpi ti mabaku mingi ya kusadisa bankaka na “kuguluka mpi kubaka nzayilu ya sikisiki ya kieleka.” (1 Tim. 2:3, 4) Keti nge lenda yidika manaka na nge sambu na kuta kimbangi na nkokila?