Banani Kesala Luzolo ya Nzambi Bubu Yai?

1. Inki ntangu beto ta yantika kulonguka kamukanda Banani Kesala Luzolo ya Nzambi Bubu Yai? mpi nki mambote beto ta baka?

¹ Banda na mposo ya Oktobri 28, beto ta longuka kamukanda: Banani Kesala Luzolo ya Nzambi Bubu Yai? na Kulonguka ya Biblia ya Dibundu. Lukanu ya kamukanda yai ya mpa, ya basikaka na Lukutakanu ya Distrike “Tanina Ntima na Nge!” kele ya kunata balongoki ya Biblia na organizasio. Kulonguka kamukanda yai ta sadisa beto kaka ve na kuyedisa ntonda na beto mutindu beto kele na organizasio ya Yehowa; kansi yo ta sadisa beto mpi na kuyikana mbote ti kisadilu yai ya mfunu na kisalu ya kusamuna.—Nk. 48:14.

2. Inki mutindu beto ta longuka kamukanda yai na dibundu?

² Mutindu Beto Ta Longuka Yo: Ntwadisi ta yidika ntangu na yandi sambu konso dilongi kubaka ntangu yina ya bo me lomba. Yandi ta yantika malongi yonso 28 na kutangaka ngiufula yina kele ntu-diambu. Na nima, ntwadisi ta lomba mutangi na kutanga paragrafe ya luyantiku. Diaka, yandi ta yula bawi ngiufula mosi yina yandi me yidika sambu na kuyantika. Ebuna, bo fwete tanga mpi kutubila konso kitini yina ke yantika ti bangogo yina kele ti bisono ya ndombe mingi mosi-mosi. Na nima ya kutanga kitini mosi, ntwadisi ta lomba bawi na kupesa bakomantere na bamvutu yina ke wakana ti ngiufula ya ntu-diambu ya dilongi. Kamukanda yango kele mpi ti bifwanisu mingi yina beno ta pesila bakomantere. Kana ntangu kele, beno lenda tanga baverse ya mfunu. Na ntwala ya kutadila dilongi ya ke landa, ntwadisi ta vutukila bangiufula yina kele na nsuka ya lutiti. Bawi ta tanga lupangu, “Sosa Kuzaba Mambu Mingi” kana yo kele; mpi na nima, ntwadisi ta lomba bawi na kupesa bakomantere na mutindu longoki ya Biblia ta baka mambote kana yandi ke sadila dibanza yina. Kana ntangu kele, ntwadisi lenda sadila bantu-diambu ya malongi bonso bangiufula ya mvutukila na nsuka ya kulonguka. Kuvila ve nde yo kele mfunu ve na kusadila metode yai sambu na kulonguka Biblia ti muntu.

3. Inki mutindu beto lenda baka mpenza mambote ntangu beto ke longuka kamukanda yai?

³ Sambu beto bakila yo mpenza mambote, yo ta vanda mbote na kudibongisa na ntwala ya kukwisa na lukutakanu. Sala kikesa na kupesa bakomantere. Ntangu disolo ke salama, yindula mutindu balongoki ya Biblia ta bakila yo mambote. Bika nde kulonguka ya kamukanda yai ya mpa kubongisa beto na kusadisa bantu ya nkaka na kuvukana ti beto sambu na kusala luzolo ya Nzambi, sambu bo mpi kuvanda ti kivuvu ya kuzinga kimakulu.—1 Yoa. 2:17.