Inki Kele Kidimbu ya “Bilumbu ya Nsuka” to “Ntangu ya Nsuka”?

Mvutu ya Biblia

Biblia ke tubila mambu mpi bikalulu yina ta monisa nde beto me kuma na “nsukilu ya ngidika ya bima,” to na “nsuka ya ntoto.” (Matayo 24:3; Bible en Kituba) Biblia ke binga nsungi yina “bilumbu ya nsuka” mpi “ntangu ya nsuka,” to “nsuka.”—2 Timoteo 3:1; Daniele 8:19; Bible en Kituba.

Inki kele mwa bambikudulu ya Biblia ya ke tubila “bilumbu ya nsuka”?

Biblia tubilaka na ntwala mambu mingi yina kana yo ke salama na ntangu mosi, yo ta vanda “kidimbu” ya kuzaba bilumbu ya nsuka. (Luka 21:7) Beto tadila mwa bambandu:

Bitumba na bansi mingi. Yezu tubaka nde: “Insi mosi ta nwanisa insi ya nkaka mpi kimfumu mosi ta nwanisa kimfumu ya nkaka.” (Matayo 24:7) Mutindu mosi, Kusonga 6:4 tubilaka muntu ya kifwani ya ke nataka mpunda; yo ke monisa bitumba yina ta “katula ngemba na ntoto.”

Nzala. Yezu tubaka nde: “Nzala ta vanda.” (Matayo 24:7) Mukanda ya Kusonga tubilaka muntu ya nkaka ya kifwani ya ke nataka mpunda; kutambula na yo ta sala nde nzala kuvanda na ntoto ya mvimba.—Kusonga 6:5, 6.

Kunikana ya ngolo ya ntoto. Yezu tubaka nde “ntoto” ta nikana ngolo “na bisika ya mutindu na mutindu.” (Matayo 24:7; Luka 21:11) Mutindu ntoto ta nikana ngolo na ntoto ya mvimba, yo ta sala nde bantu mingi kibeni kumona mpasi mpi kufwa.

Maladi. Yezu tubaka nde bipupa to “maladi ya mbi” ta vanda—Luka 21:11, Bible en Kituba.

Mubulu. Ata mubulu me yantikaka banda ntama kibeni, Yezu tubaka nde na bilbumu ya nsuka, “kikalulu ya kufwa bansiku ta kuma mingi.”—Matayo 24:12.

Kubebisa ntoto. Kusonga 11:18 tubaka nde bantu ta “bebisaka ntoto.” Bo ta sala yo na mitindu mingi, kansi kaka ve na nzila ya mubulu mpi ya kubaka avoka; bo ta sala yo mpi na mutindu bo ta bebisa mupepe to kisika ya bo ke zinga.

Kubeba ya bikalulu ya mbote. Na 2 Timoteo 3:1-4, Biblia tubaka nde bantu ta vanda bantu ya ke “pesaka ve matondo, bantu ya me konda kwikama, bantu ya ke zolaka ve kuwakana, bantu ya ke kusilaka bankaka makambu, bantu ya me konda kudiyala, bantu ya nku, bantu ya ke zolaka ve mambu ya mbote, bantu ya ke tekaka bankaka, bantu ya ntu-ngolo, bantu ya me fuluka ti lulendo.” Bantu ta monisa mingi mpenza bikalulu yai yo yina beto lenda binga kibeni nsungi yina nde “bantangu ya mpasi mpi ya nku.”

Kubeba ya mabuta. Na 2 Timoteo 3:2, 3, Biblia tubaka nde bantu mingi ta “zolaka ve bantu” ya mabuta na bo mpi nde bana ta “lemfukaka ve na bibuti.”

Bantu ta zola diaka ve Nzambi mingi. Yezu tubaka nde: “Zola ya bantu mingi ta bwa madidi.” (Matayo 24:12) Yezu zolaka kutuba nde bantu mingi ta kumaka diaka ve kuzola Nzambi. Mutindu mosi, 2 Timoteo 3:4 ke tuba nde na bilumbu ya nsuka, bantu ya mutindu yai ta vanda “bantu ya ke zolaka biese na kisika ya kuzola Nzambi.”

Luvunu na mambu ya Nzambi. Na 2 Timoteo 3:5, Biblia tubaka nde bantu ta monisaka na nganda nde bo ke sambila Nzambi kansi bo ta zitisaka mpenza bansiku na yandi na luzingu na bo.

Kubakisa mbote bambikudulu ya Biblia. Mukanda ya Daniele tubaka nde na “ntangu ya nsuka,” bantu mingi ta zaba mbote bakieleka ya Biblia; bo ta zaba mpi mbote-mbote bambikudulu yai.—Daniele 12:4, noti na nsi ya lutiti.

Kulonga nsangu ya mbote na ntoto ya mvimba. Yezu tubaka nde: “Bo ta samuna nsangu yai ya mbote ya Kimfumu na ntoto ya mvimba.”—Matayo 24:14.

Bantu mingi ta kipe ve mpi ta tula ve dikebi na balukebisu. Yezu tubaka nde bantu mingi ta tula ve dikebi na mambu mingi ya ke monisa nde nsuka me kuma pene-pene. (Matayo 24:37-39) Kuluta diaka, 2 Piere 3:3, 4 tubaka nde bantu ya nkaka ta vweza mambu yango mpi bo ta kipe ka bo yo ve.

Kulungana ya bambikudulu yonso. Yezu tubaka nde na bilumbu ya nsuka, bambikudulu yai yonso ta lungana nzila mosi; kansi ve kaka ndambu to mingi.—Matayo 24:33.

Keti beto ke zinga na “bilumbu ya nsuka”?

Ee. Mambu ya ke salama na nsi-ntoto mpi ba calcul ya beto ke sala na kutadila mambu yina Biblia tubilaka ke monisa nde bilumbu ya nsuka yantikaka na 1914, mvula yina Mvita ya Ntete ya Ntoto ya Mvimba yantikaka. Sambu na kuzaba mutindu mambu ya ke salama bubu yai ke monisa nde beto ke zinga na bilumbu ya nsuka, tala video yai:

Na 1914, Kimfumu ya Nzambi yantikaka kuyala na zulu mpi kima ya ntete yina yo salaka vandaka kukula Satana Diabulu ti bademo na yandi na zulu mpi kupesa bo nzila ya kusala kaka na ntoto. (Kusonga 12:7-12) Beto lenda mona bupusi ya Satana na luzingu ya bantu na mambu ya bo ke sala mpi na bikalulu na bo. Mambu yango ke sala nde bilumbu ya nsuka kuvanda “ya mpasi mpi ya nku.”—2 Timoteo 3:1.

Bantu mingi ke kudiyangisa sambu na bantangu yai ya mpasi. Bo ke kudiyangisa nde bantu ke zaba diaka ve mpila ya kuzinga na kimvuka. Bankaka nkutu ke wa boma nde bantu ta fwisana.

Kaka na ntangu yina, bantu ya nkaka yina ke kudiyangisa mpi sambu na mambu ya ke salama na nsi-ntoto kele ti kivuvu sambu na bilumbu ke kwisa. Bo ke ndima mpenza nde ntama mingi ve Kimfumu ya Nzambi ta manisa bampasi yonso ya kele na nsi-ntoto yai. (Daniele 2:44; Kusonga 21:3, 4) Bo ke vingila ti ntima ya nda nde Nzambi kulungisa balusilu na yandi, mpi bo ke bakaka kikesa na mambu yai ya Yezu tubaka: “Muntu yina ta kanga ntima tii na nsuka ta guluka.”—Matayo 24:13; Mika 7:7.