Mambu Yai Yonso Ketendula Inki?

YEZU KRISTU kutubaka nde: Bantu tazaba “nsuka ya ngidika ya bima” (NW) na bitumba, banzala, maladi, mpi kunikana ya ntoto.​—Matayo 24:1-8; Luka 21:10, 11.

Banda na mvu 1914, bamvita na kati ya bansi mpi na kati ya makanda kebebisaka luzingu, mbala mingi bamvita yango kebasikaka sambu mabundu kekotaka na mambu ya politiki, mpi ntangu yai, sambu kiterorizme mepanzana mingi.

Ata siansi metomisaka bametode ya kuzwila madya, bamilio ya bantu na ntoto ya mvimba kezinga na nzala ya ngolo kibeni. Konso mvula, bamilio ya bantu kefwa na nzala.

Maladi ya nsambukila yina kefwaka bantu mingi kele mpi na kati ya kidimbu yina Yezu kupesaka. Na nima ya Mvita ya Ntete ya Inza ya Mvimba, epidemi ya grippe espagnole kufwaka bantu kuluta 21 000 000. Yo swaswanaka ti bamaladi yina vandaka kusimba babwala fyoti mpamba na bamvula meluta, sambu yo panzanaka na bansi ya ntoto ya mvimba tii na bisanga ya ntama mpenza. Ntangu yai, SIDA ke na kupanzana na ntoto ya mvimba, mpi bamaladi bonso tiberkiloze, malaria, maladi ya kefwaka meso, mpi maladi ya mpongi kelanda kaka na kupanzana na bansi ya bunsukami.

Na kutadila barapore, yo kemonana nde mafunda mingi ya kunikana ya ntoto yina kele ti ngolo ya kuswaswana kesalama konso mvula. Ata bo kele ti bisadilu ya mbote, mpi ata bametode ya kezabisaka kunikana ya ntoto na ntwala metomaka, bansangu ketubilaka mbala mingi mpasi yina kunikana ya ntoto kenataka na bisika yina bantu kele mingi.

Biblia kuzabisaka mpi na ntwala nde: “Nge fweti zaba mambu yai nde: Na bilumbu ya nsuka ta vanda mpasi mingi. Bantu ta zolaka bantu ya nkaka ve, bo ta zolaka kaka mbongo; bo ta kuditulaka, bo ta vandaka lulendo mingi; bo ta vwenzaka Nzambi, bo ta tulaka ntu-ngolo na batata ti bamama na bo; bo ta zabaka kupesa mersi ve; bo ta zitisaka mambu ya Nzambi ve; bo ta vandaka nku mingi, bo ta zingaka kaka na kimbeni, bo ta kumaka songi-songi, bo ta waka makasi nswalu, bo ta zolaka kusala bantu ya nkaka mpasi, bo ta zolaka ve mambu ya mbote; bo ta zolaka kuteka bantu ya nkaka; bo ta vandaka na kifu ya kusala mambu kukonda kuyindula ntete; ntima na bo ta vanda me fuluka na lulendo mingi; bo ta zolaka kiese ya nsi-ntoto, kansi Nzambi ve; bo ta songaka na meso ya bantu nde bo kele na kinzambi, kisi na ntima na bo, bo ke buyaka ngolo ya kieleka ya kinzambi. Kuvanda kimvuka mosi ve ti bantu ya mutindu yina!”​—2 Timoteo 3:1-5.

Keti nge kendima ve nde beto kezinga na bilumbu ya “mpasi mingi”?

Keti nge kemonaka ve nde bantu mekumaka kudizola bo mosi, kuzola mbongo, mpi mekumaka kudipesa na lulendo na kiteso mosi ya kuluta?

Nani tabuya nde inza mefuluka ti bantu yina ketulaka dikebi kaka na bo mosi, kansi ya kezabaka ve kupesa mersi, kezingaka na kimbeni, mpi kezitisaka ve mambu ya Nzambi?

Keti nge kezaba nde ntu-ngolo ya bana na bibuti kumosi ti nku ya ngolo mekuma mingi kibeni, na bisika fyoti mpamba ve kansi na ntoto ya mvimba?

Ntembe kele ve nde nge kebakisa nde beto kezinga na inza mosi ya kezolaka mingi kyese kansi ya mekonda zola ya mambote. Yai kele mutindu Biblia ketendula bikalulu yina tamonana na “bilumbu ya nsuka.”

Keti beto kele ti mfunu ya banzikisa yankaka sambu na kubakisa ntangu ya beto kezinga? Yezu kutubaka mpi na ntwala nde kaka na ntangu yango yai, nsangu ya mbote ya Kimfumu ya Nzambi talongama na ntoto ya mvimba. (Matayo 24:14) Keti yo ke na kusalama?

Bo kenyemaka mbala na mbala Nzozulu ya Nkengi, zulunalu mosi ya ketendulaka Biblia yina kesamunaka nsangu ya mbote ya Kimfumu ya Yehowa, na bandinga mingi kuluta bazulunalu yonso yankaka.

Konso mvula, Bambangi ya Yehowa kelutisaka bangunga kuluta miliare mosi sambu na kuzabisa bantu yankaka mambu ya metala Kimfumu ya Nzambi.

Na ntangu yai, bo ke na kubasisa mikanda ya ketendulaka Biblia na bandinga kiteso ya 400, nkutu na bandinga yina bantu fyoti mpamba yina kezingaka na bisika ya ntama kibeni ketubaka. Bambangi ya Yehowa kezabisaka nsangu ya mbote na bansi yonso; bo kelongaka mpi na bisanga ti na bateritware mingi yina bantu ya politiki kemonaka mpamba sambu yo kele fyoti kibeni. Na bansi mingi, bo ketwadisaka ntangu yonso programe mosi ya kulonguka Biblia.

Ya kyeleka, bo ke na kulonga nsangu ya mbote ya Kimfumu ya Nzambi na ntoto ya mvimba sambu na kusoba ve bantu ya inza ya mvimba, kansi sambu na kuta kimbangi. Bo ke na kupesa bantu ya bisika yonso okazio ya kumonisa kana bo kekudibanzaka sambu na muntu yina kugangaka zulu ti ntoto mpi kana bo tamonisa luzitu sambu na bansiku na yandi mpi zola sambu na bampangi na bo.​—Luka 10:25-27; Kusonga 4:11.

Kubika fyoti, Kimfumu ya Nzambi takatula bantu yonso ya mbi na ntoto mpi tabalula ntoto yonso paladisu.​—Luka 23:43.

[Lupangu ya kele na lutiti 6]

Bilumbu ya Nsuka ya Inki?

Yo kele ve bilumbu ya nsuka ya bantu, sambu Biblia kepesa kivuvu ya luzingu ya mvula na mvula na bantu yina kesalaka luzolo ya Nzambi.​—Yoane 3:16, 36; 1 Yoane 2:17.

Yo kele ve bilumbu ya nsuka ya ntoto, sambu Ndinga ya Nzambi kesila nde ntoto tabikala kimakulu.​—Nkunga 37:29; 104:5; Yezaya 45:18.

Kansi, yo kele bilumbu ya nsuka ya ngidika ya bima yai ya nku ti ya kukonda zola mpi ya bantu yina kelandaka banzila na yo.​—Bingana 2:21, 22.

[Lupangu/Kifwanisu ya kele na lutiti 7]

Keti Biblia Kele Mpenza Ndinga ya Nzambi?

Mbala mingi, baprofete ya Biblia vandaka kusonika nde: “Mfumu Nzambi . . . ke tuba nde.” (Yezaya 43:14; Yeremia 2:2) Ata Yezu Kristu, Mwana ya Nzambi, kumonisaka nde ‘mambu yonso ya yandi vandaka kutuba vandaka kukatuka ve na yandi.’ (Yoane 14:10) Biblia yo mosi ketuba pwelele nde: “Masonuku yonso kele ya kupemama na Nzambi.”​—2 Timoteo 3:16, NW.

Rapore mosi ya Alliance biblique universelle kutubaka nde kele ve ti mukanda yankaka ya kebasikaka bonso Biblia na bandinga mingi kuluta 2 200. Kele ve ti mukanda yankaka ya bo mebasisaka mingi kibeni mutindu yina. Ntangu yai, bo kenyemaka bakopi kuluta bamiliare iya. Keti nge keyindula ve nde yo fwete vanda mutindu yai sambu na nsangu yina Nzambi metindila bantu?

Sambu na kuzwa banzikisa mingi dyaka yina kemonisa nde Biblia kele ya kupemama na Nzambi, tala mukanda La Bible : Parole de Dieu ou des hommes ?, yina Bambangi ya Yehowa mebasisaka.

Kana nge ketangaka Biblia mpi nge kendimaka nde yo kele mpenza Ndinga ya Nzambi, nge tabaka mambote mingi mpenza.

[Lupangu/Bifwanisu ya kele na lutiti 8]

Kimfumu ya Nzambi Kele Inki?

Yo kele luyalu ya kele na zulu yina kemonisa kiyeka ya Nzambi ya kyeleka, Yehowa, Ngangi ya zulu ti ya ntoto.​—Yeremia 10:10, 12.

Biblia kemonisa nde Nzambi mepesaka kiyeka yina ya kuyala na Yezu Kristu. (Kusonga 11:15) Ntangu yandi vandaka na ntoto, Yezu kumonisaka nde yandi vandaka dezia ti kiyeka ya kuyituka yina Nzambi kupesaka yandi. Kiyeka yango kusadisaka yandi na kuyala ntangu, mupepe ti masa, na kubelula maladi ya mitindu yonso, mpi nkutu na kufutumuna bafwa. (Matayo 9:2-8; Marko 4:37-41; Yoane 11:11-44) Mbikudulu ya Biblia kutubaka na ntwala nde Nzambi zolaka kupesa yandi dyaka “kiyeka, lukumu ti ngolo ya kimfumu na mpila nde bantu yonso ya nsi-ntoto ata bo kele nki dikanda to nki ndinga, bo sadila yandi.” (Daniele 7:13, 14) Bo kebingaka luyalu yango nde Kimfumu ya zulu; Yezu Kristu ke na kuyala ntangu yai tuka na zulu.

[Bifwanisu ya kele na lutiti 7]

Kulonga nsangu ya mbote na inza ya mvimba