INKI BETO LENDA SALA KANA NTALU YA BIMA KE MATA?
Sepela ti Bima ya Nge Kele ti Yo
Bantu yina ke sepelaka ti bima ya bo kele na yo ke zingaka na kiese. Kana mambu ya luzingu na bo me soba, bo ke sobaka mpi sambu na kuzinga na mingi ya makuki na bo.
SAMBU NA NKI YO KELE MFUNU?
Muntu mosi ya mayele (psychologue) na zina ya Jessica Koehler tubaka nde mbala mingi bantu yina ke sepelaka ti bima ya bo kele na yo ke tadilaka mambu na mutindu ya mbote. Yandi yikaka nde bo ke vandaka ve bilula-lula. Yo ke kikuma ya ke salaka nde bantu yai kuvanda na kiese mpi bo vanda ve ti basusi mingi. Ya kieleka, bantu ya nkaka ya ke vandaka mpenza na kiese na luzingu ke vandaka ve ti mbongo mingi. Yo ke kuminaka mingi-mingi bantu ya ke tulaka dikebi na mambu ya kuluta mfunu ya luzingu mu mbandu, kiese ya ke katukaka na kulutisa ntangu ti bantu ya dibuta mpi banduku.
INKI NGE LENDA SALA?
Kudifwanisa ve ti bantu ya nkaka. Kana nge fwanisa mwa bima ya nge kele ti yo ti ya bantu yina kele bamvwama, nge lenda kuma mawa-mawa to nkutu kukuma bilula-lula. Nge lenda mona nde bantu ya kele ti bima ya ntalu kele mpenza bamvwama kansi bankaka lenda vanda ti bamfuka mingi. Nicole, yina ke zingaka na Sénégal ke tuba nde: “Mono ke vandaka ve na mfunu ya bima mingi sambu na kuvanda na kiese. Kana mono ke sepela ti bima yina mono kele na yo, mono ta vanda na kiese ata bantu ya nkaka kele ti bima mingi kuluta mono.”
Meka kusala diambu yai: Buya kutala ba piblisite to basite internet yina ke songaka bimvwama to bima ya ntalu ya bantu kele ti yo.
Pesaka mersi. Bantu ya ke vandaka ti kikalulu yai ke sepelaka ti bima yina bo kele na yo mpi bo ke yindulaka ve nde bo fwete vanda kaka ti bima mingi. Roberton yina ke zingaka na Haïti ke tuba nde: “Mono ke yindulaka mbala mingi mambu ya mbote yina bantu ya nkaka ke sadilaka mono ti dibuta na mono. Na nima mono ke songaka bo nde mono me sepela mingi ti mambu ya bo me sadila beto. Mono ke longaka mpi mwana na mono ya kele ti bamvula 8 na kupesa mersi sambu na konso kima yina bo me pesa yandi.”
Meka kusala diambu yai: Kuvila ve mambu ya mbote ya bo ke sadilaka nge. Kana mpila kele, nge lenda sonika konso kima yina nge ta zola kupesa mersi. Yo lenda vanda sante ya mbote ya nge kele ti yo, bantu ya dibuta, banduku ya mbote to nkutu sambu na nsemo ya kitoko ya ntangu na nkokila.
Bantangu ya nkaka, yo ke vandilaka beto yonso mpasi na kusepela ti bima yina beto kele na yo. Kansi yo kele mfunu mingi na kusala bikesa. Kana beto ke sepela ti bima yina beto kele na yo, beto ta vanda na kiese, kikalulu yina mbongo lenda sumba ve.